སྐྱེ་གནས་བར་དོའི་ཁྲིད་དུག་ལྔ་ལམ་ཁྱེར་བདུད་དཔུང་ཟིལ་གནོན།
བླ་མའི་ཐུགས་སྒྲུབ་ཡིད་བཞིན་ནོར་བུའི་རྫོགས་རིམ་ལྟ་བ་གསང་ཐིག་ལས་སྐྱེ་གནས་བར་དོའི་ཁྲིད་དུག་ལྔ་ལམ་ཁྱེར་བདུད་དཔུང་ཟིལ་གནོན་བཞུགས་སོ༔
བླ་མ་ཡིད་བཞིན་ནོར་བུ་ལ་ཕྱག་འཚལ་ལོ༔ བླ་མའི་ཐུགས་སྒྲུབ་ཡིད་བཞིན་ནོར་བུ་ལས༔ སྐྱེ་གནས་བར་དོ་ཉོན་མོངས་དུག་ལྔ་ཡི༔ བདུད་དཔུང་ལམ་ཁྱེར་ཁྲིད་ཀྱི་རིམ་པ་བསྟན༔ ཨཐྎ༔ ཉོན་མོངས་བདུད་ལྔ་ལམ་ཁྱེར་འདི༔ རྩལ་སྦྱང་རིམ་བཞིན་ཤར་ཚད་དང༔ གཏན་ཕབ་ངོ་བོ་སྐུ་ལྔར་གྲོལ༔ དང་པོ་འདོད་ཆགས་བདུད་དེ་ནི༔ གཞན་གྱི་ཡུལ་ལ་འདོད་པ་འཕྲོས༔ དེ་ལ་ཞེན་པས་ཆགས་པའོ༔ འདོད་པ་ཕར་ལ་བྱས་པ་ཡིས༔ ཞེན་ཞེ་འདོད་པ་ཚུར་ལ་བྱུང་བས་ན༔ རང་ལ་འདོད་ཆགས་བདུད་དུ་བྱུང༔ འདོད་ཆགས་རང་ལ་སྐྱེས་དུས་སུ༔ འདོད་ཆགས་མི་སྤངས་ངོ་བོར་བལྟ༔ འདོད་ཆགས་ཡུལ་དང་ཆགས་མཁན་དང༔ ཆགས་པའི་ངོ་བོ་ཅི་ལྟར་འདུག༔ བལྟས་པས་ཆགས་མཁན་ཆགས་ཡུལ་དང༔ ཆགས་པའི་རང་བཞིན་མ་གྲུབ་པས༔ འདོད་ཆགས་བདེ་སྟོང་ཆེན་པོར་གྲོལ༔ ཁམས་གསུམ་མཁའ་མཉམ་སེམས་ཅན་ཐམས་ཅད་ཀྱི༔ འདོད་ཆགས་ཐམས་ཅད་བདག་གི་འདོད་ཆགས་འདིས༔ གོ་ཆོད་པར་གྱུར་ནས་བདེ་སྟོང་སྐྱེས་པར་བསམ༔ སྨོན་ལམ་བཏབ་ཅིང་སྐྱོ་བ་བསྐྱེད༔ ཀུན་རྟོག་ཡེ་ཤེས་ཀློང་དུ་གྲོལ༔ འདོད་ཆགས་པདྨ་གུ་རུར་གྲོལ༔ འདོད་ཆགས་ཐར་ལམ་ཆེན་པོར་རྫོགས༔ འདོད་ཆགས་བདེ་སྟོང་ལམ་ཁྱེར་ཟབ༔ ཨཐྎ༔ གྷུཧྱ༔ གཉིས་པ་ཞེ་སྡང་ལམ་ཁྱེར་ནི༔ དང་པོ་ཞེ་སྡང་བདུད་དེ་ནི༔ ཞེ་བ་སྣང་བའི་ཡུལ་ལ་འཆང༔ སྡང་བ་གཞན་ལ་གནོད་སེམས་བསྐྱེད༔ ཞེ་སྡང་ཕར་ལ་བྱས་པ་ཡིས༔ གནོད་པ་རང་ལ་ཚུར་ལ་ལོག༔ ཞེ་སྡང་རང་ལ་བདུད་དུ་འོང༔ རང་ལ་ཞེ་སྡང་སྐྱེས་དུས་སུ༔ ཞེ་སྡང་མི་སྤངས་ངོ་བོར་བལྟ༔ ཞེ་སྡང་ཡུལ་དུ་ཆགས་མཁན་གང༔ སྡང་བའི་ངོ་བོ་ཅི་ལྟར་འདུག༔ བལྟས་པས་སྡང་མཁན་སྡང་ཡུལ་དང༔ སྡང་བའི་རང་བཞིན་མ་གྲུབ་པས༔ ཞེ་སྡང་སྟོང་གསལ་ཆེན་པོར་གྲོལ༔ ཁམས་གསུམ་མཁའ་མཉམ་སེམས་ཅན་ཐམས་ཅད་ཀྱི༔ ཞེ་སྡང་ཐམས་ཅད་བདག་གི་ཞེ་སྡང་འདིས་གོ་ཆོད་པར་གྱུར་ཅིག༔ བྱམས་པ་རྒྱུད་ལ་སྐྱེ་བའི་སྨོན་ལམ་བཏབ་ཅིང་ཞེ་སྡང་སྙིང་རྗེ་བསྐྱེད༔ ཞེ་སྡང་ངོ་བོ་བྱམས་པ་བསྒོམ༔ མེ་ལོང་ཡེ་ཤེས་ངང་དུ་གྲོལ༔ ཞེ་སྡང་བཛྲ་གུ་རུར་གྱུར༔ ཞེ་སྡང་ཐར་ལམ་ཆེན་པོར་རྫོགས༔ ཞེ་སྡང་གསལ་སྟོང་ལམ་ཁྱེར་ཟབ༔ ཨཐྎ༔ གྷུཧྱ༔ གསུམ་པ་གཏི་མུག་ལམ་ཁྱེར་ནི༔ མ་རིག་གཏི་མུག་བདུད་དེ་ནི༔ གཏི་བས་རང་ཉིད་ངོ་མ་ཤེས༔ མུག་པས་གཞན་ལ་མ་རིག་སྒྲིབ༔ ཕར་ལ་གཞན་གྱི་དོན་མ་རྟོགས༔ ཚུར་ལ་རང་སེམས་མ་རྟོགས་པས༔ གཏི་མུག་རང་གི་བདུད་དུ་བྱུང༔ རང་ལ་བླུན་རྨུགས་སྐྱེས་དུས་སུ༔ གཏི་མུག་མི་སྤངས་ངོ་བོར་བལྟ༔ གཏི་མུག་ཡུལ་དང་རྨུགས་མཁན་གང༔ གཏི་མུག་ངོ་བོ་ཇི་ལྟར་འདུག༔ བལྟས་པས་རྨུགས་མཁན་རྨུགས་པའི་ཡུལ༔ རྨུགས་པའི་ངོ་བོ་མ་གྲུབ་པས༔ གཏི་མུག་སྟོང་ཉིད་ཆེན་པོར་ཤར༔ ཁམས་གསུམ་མཁའ་མཉམ་སེམས་ཅན་ཐམས་ཅད་ཀྱི་གཏི་མུག་ཐམས་ཅད་བདག་གི་གཏི་མུག་འདིས་གོ་ཆོད་པར་གྱུར་ནས་སྟོང་ཉིད་རྒྱུད་ལ་སྐྱེ་བར་གྱུར་ཅིག༔ སྨོན་ལམ་བཏབ་ཅིང་སྙིང་རྗེ་བསྐྱེད༔ གཏི་མུག་སྟོང་ཉིད་ཆོས་དབྱིངས་ངང་དུ་གྲོལ༔ གཏི་མུག་བྷུདྷ་གུ་རུར་གྱུར༔ གཏི་མུག་ཐར་ལམ་ཆེན་པོ་རྫོགས༔ གཏི་མུག་ཐར་པའི་ལམ་ཁྱེར་ཟབ༔ ཨཐྎ༔ གྷུཧྱ༔ བཞི་པ་ང་རྒྱལ་ལམ་ཁྱེར་ནི༔ ང་རྒྱལ་ཉོན་མོངས་བདུད་དེ་ནི༔ ང་ནི་ང་རང་ཆེ་བ་རློམ༔ རྒྱལ་བ་གཞན་ལ་བརྙས་པ་བྱས༔ ང་རྒྱལ་ཕར་ལ་བྱས་པ་ཡིས༔ ལན་པོ་ཚུར་ལ་ལོག་པ་ནི༔ ང་རྒྱལ་རང་གི་བདུད་དུ་བྱུང༔ ང་རྒྱལ་རང་ལ་སྐྱེས་དུས་སུ༔ ང་རྒྱལ་མི་སྤང་ངོ་བོར་བལྟ༔ ང་རྒྱལ་ཡུལ་དང་རྒྱལ་མཁན་གང་༔ ང་རྒྱལ་ངོ་བོ་ཅི་ལྟར་འདུག༔ བལྟས་པས་ང་རྒྱལ་རྒྱལ་མཁན་རྒྱལ་ཡུལ་དང་༔ ང་རྒྱལ་ངོ་བོ་མ་གྲུབ་པས༔ ང་རྒྱལ་ཚོར་སྟོང་ཆེན་པོར་གྲོལ༔ ཁམས་གསུམ་མཁའ་མཉམ་སེམས་ཅན་ཐམས་ཅད་ཀྱི་ང་རྒྱལ་བདག་གི་ང་རྒྱལ་འདིས་གོ་ཆོད་པར་གྱུར་ནས་སྙིང་རྗེ་རྒྱུད་ལ་སྐྱེ་བར་གྱུར་ཅིག༔ སྨོན་ལམ་བཏབ་ཅིང་སྙིང་རྗེ་བསྐྱེད༔ ང་རྒྱལ་ངོ་བོ་མཉམ་པར་བཞག༔ མཉམ་ཉིད་ཡེ་ཤེས་ངང་དུ་གྲོལ༔ རཏྣ་གུ་རུའི་སྐུ་རུ་གྱུར༔ ང་རྒྱལ་ཐར་ལམ་ཆེན་པོ་རྫོགས༔ ང་རྒྱལ་ཚོར་སྟོང་ལམ་ཁྱེར་ཟབ༔ ཨཐྎ༔ གྷུ་ཧྱ༔ ལྔ་པ་ཕྲག་དོག་ལམ་ཁྱེར་ནི༔ དང་པོ་ཕྲག་དོག་བདུད་དེ་ནི༔ ཕྲག་པ་རང་རྟོག་ངན་པ་དེ༔ དོག་པ་གཞན་སྣང་བློར་མི་ཤོངས༔ ཕྲག་དོག་ཕར་ལ་བྱས་པ་ཡིས༔ ཉེར་ལེན་ཚུར་ལ་བྱུང་བ་ཡིན༔ ཕྲག་དོག་རང་གི་བདུད་དུ་བྱུང་༔ རང་ལ་ཕྲག་དོག་སྐྱེས་དུས་སུ༔ ཕྲག་དོག་མི་སྤངས་ངོ་བོར་བལྟ༔ ཕྲག་དོག་ཡུལ་དང་དོག་མཁན་གང་༔ ཕྲག་དོག་ངོ་བོ་ཇི་ལྟར་འདུག༔ ཁ་དོག་གཟུགས་དབྱིབ་རྩད་མཐའ་ཆོད༔ བལྟས་པས་ཕྲག་དོག་དོག་མཁན་ཡུལ༔ ཕྲག་དོག་རང་བཞིན་མ་གྲུབ་པས༔ ཕྲག་དོག་ཡེ་སྟོང་ཆེན་པོར་གྲོལ༔ མཁའ་མཉམ་སེམས་ཅན་འགྲོ་བ་ཐམས་ཅད་ཀྱི་ཕྲག་དོག་བདག་གི་ཕྲག་དོག་འདིས་གོ་ཆོད་པར་གྱུར་ནས་བཏང་སྙོམས་རྒྱུད་ལ་སྐྱེ་བར་གྱུར་ཅིག༔ སྨོན་ལམ་བཏབ་ཅིང་ཚད་མེད་བསྐྱེད༔ ཕྲག་དོག་ངོ་བོ་བཏང་སྙོམས་ཚད་མེད་བསྒོམ༔ ཕྲག་དོག་བྱ་གྲུབ་ཡེ་ཤེས་གྲོལ༔ ཀརྨཱ་གུ་རུའི་སྐུ་རུ་གྱུར༔ ཕྲག་དོག་ཡེ་སྟོང་ཐར་ལམ་རྫོགས༔ ཕྲག་དོག་མ་སྤངས་ལམ་ཁྱེར་ཟབ༔ ཨཐྎ༔ གཱུ་ཧྱ༔ བདུད་ཞེས་བྱ་བ་ལོགས་སུ་མེད༔ ཉོན་མོངས་རྒྱས་པས་དགེ་བ་བཅོམ༔ འཁྲུལ་རྟོག་རང་གིས་རང་མ་རིག༔ འཁྲུལ་རྟོག་རང་ག་རྒྱས་པ་ཡིས༔ བག་ཆགས་རྗེས་སུ་རབ་འབྲང་པས༔ བདུད་ཅེས་བྱ་བར་མིང་ཡང་བཏགས༔ བསོད་ནམས་སྟོབས་ཀྱིས་ཆོས་བར་བཅད༔ ལྷ་ཡི་བུ་ཡི་བདུད་ཡིན་ནོ༔ དུག་ལྔའི་དབང་སོང་བར་བཅད་པས༔ ཉོན་མོངས་བདུད་ཅེས་བྱ་བའོ༔ ལེ་ལོ་འཁྲུལ་འབྱམས་ཚེ་འདིར་སོང༔ ཕུང་པོའི་བདུད་ཅེས་བྱ་བའོ༔ ནད་དང་འབྱུང་འཁྲུག་འཆི་བ་ལ༔ འཆི་བདག་བདུད་ཅེས་བྱ་བ་ཏེ༔ བདུད་བཞིའི་རྩ་བ་ཉོན་མོངས་ལྔ༔ འདི་ལ་མ་འདུས་མེད་པས་གཟབ༔ བདུད་དེ་རང་གིས་རང་འདུལ་གྱིས༔ སཱ་མཱ་ཡཱ༔ ཨཐྎ༔ གྷུཧྱ༔ རྒྱ་རྒྱ་རྒྱ༔ ཉོན་མོངས་དུག་ལྔ་བདུད་ལྔ་དེ༔ མ་སྤངས་འཁོར་བའི་རྩ་བའོ༔ ལམ་ཁྱེར་ཐར་པ་བདེ་ཆེན་ཐོབ༔ མ་སྤངས་ལམ་ཁྱེར་གནས་སུ་དག༔ དུག་ལྔ་ཡེ་ཤེས་ཀློང་དུ་གྲོལ༔ བདུད་ལྔ་རང་གྲོལ་སངས་རྒྱས་སོ༔ ཚོགས་དྲུག་ཡུལ་སྣང་རེ་རེ་ཞིང༔ ལེགས་པར་བལྟ་ཞིང་རྩལ་སྦྱངས་བྱ༔ རང་གིས་ཉམས་དང་མྱོང་བ་ལ༔ ལེགས་པར་བརྟགས་ཤིང་རྩལ་སྦྱངས་བྱ༔ བཟང་ངན་བར་གསུམ་ཐོག་མཐའ་ལས༔ ལེགས་པར་བརྟགས་ཤིང་རྩལ་སྦྱངས་བྱ༔ སྦྲུལ་མདུད་བཞིན་དུ་རང་སང་གྲོལ༔ དུག་ནི་བདུད་རྩིར་གྱུར་པའོ༔ སེམས་ཉིད་གསལ་སྟོང་ངང་གིས་གསལ༔ ངོ་བོ་སྟོང་པ་ཆོས་སྐུར་རྟོགས༔ རང་བཞིན་གསལ་བ་ལོངས་སྐུར་རྟོགས༔ ཐུགས་རྗེས་ཀུན་ཁྱབ་སྤྲུལ་སྐུར་རྟོགས༔ དུག་ལྔ་སྐུ་གསུམ་རང་ཆས་གྱུར༔ རྐྱེན་ཀྱིས་བསྐུལ་བས་དུག་ལྔ་སྐྱེས༔ ཞེ་སྡང་རང་གར་སྐྱེས་པ་དེ༔ ནང་དུ་ལོགས་ནས་ཞེ་སྡང་ལ་བལྟས་ཏེ༔ ཞེ་སྡང་གཟུགས་དང་ཁ་དོག་མ་གྲུབ་པས༔ གསལ་ལ་མ་འགགས་མེ་ལོང་ཡེ་ཤེས་སོ༔ ཕྱི་རུ་ང་རྒྱལ་རང་གར་སྐྱེས༔ དེ་ཉིད་ནང་ལོགས་བལྟས་པ་ཡིས༔ ང་རྒྱལ་གཟུགས་དང་ཁ་དོག་མ་གྲུབ་པས༔ བདག་གཞན་མཉམ་ལ་མ་འདྲེས་སོ༔ ང་རྒྱལ་མཉམ་ཉིད་ཡེ་ཤེས་ཡིན༔ འདོད་ཆགས་རང་ག་སྐྱེས་པ་དེ༔ ཁ་ནི་ནང་ལོགས་བལྟས་པ་ན༔ འདོད་ཆགས་ངོ་བོ་འཛིན་མཁན་མ་གྲུབ་བོ༔ སོ་སོར་གསལ་ལ་མ་གྲུབ་པས༔ འདོད་ཆགས་སོར་རྟོག་ཡེ་ཤེས་སོ༔ ཕྲག་དོག་གཞན་ལ་དོག་པ་སྐྱེས༔ ཁ་ནང་ལོགས་ནས་དེ་ཉིད་བལྟས་པའི་དུས༔ ཕྲག་དོག་ངོ་བོ་གཟུགས་དང་དབྱིབས་མ་གྲུབ༔ རང་བཞིན་དག་ནས་ནན་ཏན་ཡེ་ཤེས་སོ༔ ཕྱིར་བལྟས་མ་རིག་བདག་ཏུ་འཛིན༔ ནང་དུ་བལྟས་པས་བདག་དང་འཛིན་ཡུལ་མེད༔ ཐམས་ཅད་རང་བཞིན་མེད་པར་ཤེས་པ་དེ༔ གཏི་མུག་ཆོས་དབྱིངས་ཡེ་ཤེས་ཤར༔ དུག་ལྔ་སྣ་ཚོགས་ཕྱིར་སྐྱེས་དུས༔ ནང་དུ་སྐྱེ་མཁན་ངོ་བོར་བལྟས༔ དུག་ལྔའི་ངོ་བོ་མ་གྲུབ་སྟོང༔ སྟོང་གསལ་ཡེ་ཤེས་ལྔ་རུ་གསལ༔ ཆོས་རྣམས་ཐམས་ཅད་རང་བཞིན་མེད་པའི་ཤེས་རབ་གྱིས༔ གཏི་མུག་ཆོམ་པས་བྷུདྡྷ་གུ་རུ་ཡི༔ དགོངས་དོན་རྟོགས་པས་འགྲོ་དོན་བྱེད༔ བདག་གཞན་རང་བཞིན་མེད་པར་རྟོགས་པ་ཡིས༔ འགྲོ་ལ་བྱམས་དང་སྙིང་རྗེ་བསྐྱེད༔ ཞེ་སྡང་བྱམས་པས་ཆོམ་པ་བཛྲ་གུ་རུ་ཡི༔ དགོངས་དོན་འགྲོ་དོན་བྱེད་པའོ༔ བདག་འཛིན་རང་བཞིན་མེད་པར་ཤེས་པ་ཡིས༔ ང་རྒྱལ་བདག་མེད་ཆོམ་པས་རཏྣ་གུ་རུ་ཡི༔ དགོངས་པས་འགྲོ་དོན་བྱེད་པའོ༔ ཡུལ་ལ་རང་བཞིན་མེད་པར་ཤེས་པ་ཡིས༔ ཆགས་ཞེན་གྲོལ་ནས་འདོད་ཆགས་ཆོམ༔ པདྨ་གུ་རུའི་དགོངས་པས་འགྲོ་དོན་བྱེད༔ བདག་གཞན་མ་གྲུབ་རིས་མེད་ཀྱི༔ ཕྲག་དོག་ཆོམ་པས་ཀརྨཱ་གུ་རུའི་དགོངས་པ་ཡིན༔ འགྲོ་དོན་ཕྲིན་ལས་འགྱེད་པའོ༔ དུག་ལྔ་རང་གྲོལ་སྨན་དུ་གྱུར༔ བདག་ཏུ་བཟུང་བ་བཙལ་མི་རྙེད༔ བྱང་ཆུབ་ཆེན་པོའི་བཙན་མཁར་འཛིན༔ བདུད་ཀྱི་དམག་དཔུང་བྱུང་ན་ཡང༔ ཉམ་ང་བག་ཚ་མེད་པའི་ཡོན་ཏན་ལྡན༔ ཀུན་བཟང་པདྨའི་དགོངས་པའོ༔ ཡི་དམ་དགོངས་པ་འདུས་པའི་ཡང་སྙིང་ཡིན༔ ཚེ་གཅིག་ལུས་གཅིག་སྐྱེས་ནས་མ་ཤིའི་བར༔ བསྐྱེད་རྫོགས་ལམ་ཁྱེར་གནས་ལུགས་གཏན་ཕེབས་གཅེས༔ བྱིན་རླབས་བླ་མའི་སྒྲུབ་པ་འདི་ལ་འབུངས༔ པདྨས་ཐུགས་རྗེས་མི་གཏོང་ཐ་ཚིག་ཡིན༔ སཱ་མཱ་ཡཱ༔ ཨཐྎ༔ གྷུ་ཧྱ༔ ཟབ་རྒྱ༔ རྒྱ་རྒྱ་རྒྱ༔