རྨི་ལམ་བར་དོའི་གདམས་པ་བག་ཆགས་དག་བྱེད།
བླ་མ་ཡིད་བཞིན་ནོར་བུའི་རྫོགས་རིམ་ལྟ་བ་གསང་ཐིག་ལས་རྨི་ལམ་བར་དོའི་གདམས་པ་བག་ཆགས་དག་བྱེད་བཞུགས་སོ༔
བླ་མ་ཡིད་བཞིན་ནོར་བུ་ལ་ཕྱག་འཚལ་ལོ༔ བླ་མའི་ཐུགས་སྒྲུབ་ཡིད་བཞིན་ནོར་བུ་ཡི༔ རྫོགས་རིམ་ཟབ་མོ་ལྟ་བའི་གསང་ཐིག་ལས༔ བག་ཆགས་དག་བྱེད་རྨི་ལམ་བར་དོའི་ཁྲིད༔ རྨི་ལམ་འོད་གསལ་གདམས་པ་བསྟན་པ་ནི༔ ཨོ་རྒྱན་ཆེན་པོས་བཀའ་སྩལ་བ༔ ཉོན་ཅིག་སྣོད་ལྡན་རྣལ་འབྱོར་མ༔ རྨི་ལམ་བར་དོ་འོད་གསལ་ཁྲིད༔ འདུན་པ་དྲག་པོས་སྦྱངས་པ་ནི༔ རླུང་དང་ཤེས་པ་འདུ་འཕྲོད་དེ༔ ལུས་ཀྱི་རྩ་ནང་འདུས་པ་ལས༔ གཉིད་དུ་འགྲོ་སྟེ་མ་སད་བར༔ རྨི་ལམ་སྒྱུ་མ་བར་དོ་ཡིན༔ དེ་རུ་རྨི་ལམ་རྟོག་པ་ནི༔ བདེ་སྡུག་སྣ་ཚོགས་སེམས་སུ་ཤར༔ ཐམས་ཅད་བག་ཆགས་ཁ་ལོ་སྒྱུར༔ སྔོན་གྱི་ཆོས་ཉིད་དྲན་པ་ནི༔ གནས་ལུགས་གོམས་ཤིང་བརྟན་པ་ན༔ རྨི་ལམ་བར་དོའི་སྡུག་བསྔལ་གྲོལ༔ གནས་ལུགས་མ་དྲན་རྨི་ལམ་དེ༔ འཁྲུལ་རྟོག་བདེ་སྡུག་སྣ་ཚོགས་འོང༔ འདུན་པ་དྲག་པོས་རྩོལ་འཛིན་དགོས༔ ཉིན་སྣང་ཀ་དག་ཉམས་ལེན་དང༔ བདེ་སྡུག་རྫུན་སྣང་རྟོག་པ་ལམ་ཁྱེར་དགོས༔ མཚན་མོ་འོད་གསལ་འདུལ་ཁྲིམས་དགོས༔ ཁྱད་པར་ཐོད་རྒལ་གནད་དུ་ཟབ༔ གནས་ལུགས་ངང་དུ་གོང་ལྟ་བུ༔ བླ་མའི་རྣལ་འབྱོར་མོས་གུས་བྱེད༔ ཉིན་སྣང་རྨི་ལམ་སྦྱོང་བ་ནི༔ འཁོར་འདས་ཆོས་རྣམས་ཐམས་ཅད་ཀུན༔ མི་རྟག་རྨི་ལམ་ཡིན་པར་ཤེས་པ་བྱ༔ ཉིན་མོ་ལམ་ཁྱེར་འོད་དུ་གསལ༔ དང་པོ་ཉིན་སྣང་ཀ་དག་ངང་༔ དེ་དང་མོས་གུས་འབྲེལ་བས་མཚན་མོའི་དུས༔ རྨི་ལམ་མཚན་མོ་འོད་གསལ་ཁྲིད༔ བག་ཆགས་འབྲེལ་མཚམས་སྦྱོར་བ་ནི༔ མཚན་མོ་གཉིད་ཚེ་མགྲིན་པ་རུ༔ པདྨ་དམར་པོ་ཁ་ཟླུམ་པོ༔ བུམ་སྐུའི་རྣམ་པའི་དབུས་ཉིད་དུ༔ ཐིག་ལེ་དཀར་དམར་དངུལ་ཆུའི་མདོག༔ རྣམ་པ་བུང་བའི་ཚད་ཙམ་ལ༔ རིག་པ་རྩེ་གཅིག་གཏད་པར་བྱ༔ རྨི་ལམ་འོད་གསལ་ཟིན་པར་བྱ༔ སྙམ་པའི་ངང་དུ་གཉིད་ལོག་གོ༔ དེ་ཚེ་རྨི་ལམ་ཟིན་པ་ན༔ རང་ལུས་མེ་དང་ཆུ་ལ་སོགས༔ སྤྲུལ་བསྒྱུར་སྣ་ཚོགས་བྱེད་པའོ༔ ཆུ་དང་འཇིགས་སྐྲག་གཡང་ལ་སོགས༔ གང་བྱུང་རྨི་ལམ་ཤེས་པ་ཡིས༔ བདེན་མེད་ཡིན་པ་དྲན་པས་ཟུངས༔ དྲན་པས་ཟིན་པས་རང་སར་གྲོལ༔ རབ་ཀྱིས་ཉོན་མོངས་དེ་གའི་སྟེང༔ ཀ་དག་ངང་དུ་རང་སར་གྲོལ༔ འབྲིང་གིས་རྨི་ལམ་འོད་གསལ་ཟིན༔ ཐ་མ་རྨི་ལམ་རྨི་ལམ་ཤེས༔ གོང་གིས་རྨི་ལམ་མ་ཟིན་ན༔ མགྲིན་པ་བུམ་སྐུ་ཐིག་ལེའི་ལམ༔ ཐིག་ལེ་འོད་འབར་མར་མེ་ལྟ་བུ་ལ༔ རྨི་ལམ་རྩེ་གཅིག་གཏད་ལ་བཟུང༔ དེ་ལ་ཟིན་ནས་སྣང་སྲིད་རྨི་ལམ་ངོ་བོར་བསམ༔ དེ་རྗེས་ཚུར་འདུས་པདྨ་བུམ་པའི་ནང༔ ཐིག་ལེ་དམར་པོ་སྲན་མ་ཙམ༔ ཡི་གེ་ཨཱཿདམར་མང་པོ་ཡིས༔ གསལ་བསྐོར་ཀྱིལ་ལེར་བྱེད་པར་བསམ༔ འདུན་པ་རྩེ་གཅིག་རབ་ཏུ་གཏད༔ རྨི་ལམ་ཡིན་བསམ་མ་ཡེངས་བྱ༔ ཐམས་ཅད་གནད་དུ་གཉིད་དུས་སུ༔ གཉིད་མཚམས་རྩེ་གཅིག་མ་ཡེངས་པར༔ རྨི་ལམ་ཡིན་ནོ་བདེན་ཡོད་མིན༔ རྩེ་གཅིག་རྟོག་པས་བར་མ་ཆོད༔ ཡེངས་མེད་ངང་དུ་ཉལ་བར་བྱ༔ ཧ་ཅང་བསྒྲིམ་ན་བྱ་ཡར་དོགས༔ དང་པོ་འདུན་པས་མཚམས་བཅོས་ལ༔ གཉིད་དུ་འགྲོ་དུས་རྟོག་མེད་དུ༔ འདུན་པའི་ངང་དུ་གཉིད་ལོག་ན༔ ངེས་པར་ཟིན་པ་གནད་དུ་ཆེ༔ དེ་ལ་ཟིན་ནས་འདུན་པ་བསྒྱུར༔ རྩལ་སྦྱངས་སྤྲུལ་བསྒྱུར་དུ་མ་ཡིས༔ བྱ་ཁྱུང་བྱ་རྒོད་ལ་སོགས་དང༔ ཞིང་ཁམས་ལྔ་དང་ཨོ་རྒྱན་ཡུལ༔ སྟེང་འོག་ལྷ་དང་ལྷ་མིན་ཡུལ༔ གང་འདོད་ཡུལ་དུ་སྤྲུལ་ཞིང་འགྲོ༔ རིག་པ་རྡོ་རྗེ་རྩེ་ལྔ་འབར༔ སྤྲུལ་ཞིང་ལྷོ་ནུབ་ཟངས་མདོག་ཡུལ༔ གུ་རུ་ཉིད་ཀྱི་དྲུང་དུ་འགྲོ༔ ལྷ་དང་ཀླུ་དང་གནོད་སྦྱིན་གྱི༔ བུ་མོ་རྣམས་དང་སྦྱོར་དུ་འགྲོ༔ ཞིང་ཁམས་ལྔ་དང་མཇལ་དུ་འགྲོ༔ ནུབ་ཕྱོགས་བདེ་ཆེན་རི་བོ་ཏ་ལའི་ཞིང༔ དུར་ཁྲོད་བརྒྱད་དང་ཡུལ་ཉི་ཤུ༔ ཞིང་ཁམས་རྣམས་སུ་སྤྲུལ་ཞིང་ཉུལ༔ རང་སེམས་ལྷ་ཡི་ཕྱག་མཚན་རྣམས༔ ཞི་དྲག་གང་དགོས་བསྒྱུར་བ་ཡིས༔ རང་ཤར་དག་སྣང་མཐོང་བར་འགྱུར༔ བར་དོར་ལོངས་སྐུ་རང་དབང་ཐོབ༔ ཀུན་གྱི་གནད་དུ་ཉིན་མོ་བླ་མ་ལ༔ འདུན་པ་རྩེ་གཅིག་མོས་གུས་གནད༔ ཡང་ན་གཉིད་འཚམས་འདུན་པ་ཡིས༔ མགྲིན་པའི་པདྨ་ཐིག་ལེའི་མལ༔ གུ་རུ་ཞི་སྐུ་ཚོན་གང་བ༔ སྐུ་གསུམ་ཆ་བྱད་གང་རུང་ལ༔ མཁའ་འགྲོ་དཀར་མོ་རྒྱན་མེད་པས༔ བསྐོར་བ་ཀྱིལ་ལེ་བྱེད་པར་བསམ༔ གསོལ་བ་བཏབ་ཅིང་རྩེ་གཅིག་གནད༔ རབ་ཀྱིས་རྨི་ལམ་རང་དབང་ཐོབ༔ ཀ་དག་སྟེང་དུ་མཉམ་བཞག་ཐུབ༔ མྱུར་དུ་འོད་གསལ་བརྟན་པ་ཐོབ༔ ཉིན་མཚན་འཁྲུལ་པས་བར་མི་ཆོད༔ ཟུང་འཇུག་འོད་གསལ་ཁ་སྦྱོར་སྟེ༔ བར་དོ་མེད་པར་སངས་རྒྱས་སོ༔ རང་བཞིན་ཀ་ནས་དག་པ་ཡི༔ སྐྱེས་བུས་འོད་གསལ་ཉམས་བླངས་པས༔ རྨི་ལམ་དུ་ནི་དྲན་ཤེས་པའི༔ དེ་ཉིད་མཉམ་པར་སྦྱོར་བ་ནི༔ བཅོ་ལྔའི་ཟླ་ནུབ་ཉི་ཤར་ཚེ༔ དེ་ཚེ་མུན་པས་མི་ཆོད་ལྟར༔ རྣལ་འབྱོར་འཁྲུལ་པའི་གྲོང་ཁྱེར་དུ༔ མི་འཇུག་འདི་ཉིད་སྐད་ཅིག་གྲོལ༔ འཁྲུལ་པའི་གྲོང་ཁྱེར་ག་ལ་འཇུག༔ ཀ་དག་འོད་གསལ་སངས་རྒྱས་སོ༔ ཨེ་མ་ངོ་མཚར་རྨི་ལམ་འོད་གསལ་ཟབ༔ ཡེ་ཤེས་མཚོ་རྒྱལ་ཁྱོད་ཀྱི་ཐུགས་ལ་ཆོངས༔ ཨཐྎ༔ གྷུ་ཧྱ༔ གཉིས་པ་རྨི་ལམ་རྣལ་འབྱོར་པས༔ རྨི་ལམ་འོད་གསལ་ཀ་དག་ལས༔ ཉིན་སྣང་འདུན་པ་ལམ་ཁྱེར་ནི༔ དང་པོ་འཁོར་འདས་ཆོས་རྣམས་ཀུན༔ རྨི་ལམ་ཡིན་པར་ཤེས་པར་བྱ༔ སྔར་འདས་མ་འོངས་ཆོས་རྣམས་ཀུན༔ རྨི་ལམ་ཡིན་པས་འཇིག་ནས་མེད༔ ད་ལྟའི་ཆོས་རྣམས་ཐམས་ཅད་ཀུན༔ རྨི་ལམ་ལྟ་བུར་རྟག་མི་ཐུབ༔ ཉིན་མོའི་དུས་ཀྱི་བྱ་བ་རྣམས༔ མཚན་མོ་རྨི་ལམ་དུས་སུ་བདེན་མེད་འགྲོ༔ མཚན་དུས་རྨི་ལམ་བྱ་བ་རྣམས༔ ཉིན་མོ་གཉིད་སད་བདེན་མེད་འགྲོ༔ ཉིན་མཚན་གཉིས་ཀ་མི་བདེན་པས༔ ཐམས་ཅད་བདེན་མེད་རྨི་ལམ་ཡིན༔ བདེན་པར་གྲུབ་པ་གང་ཡང་མེད༔ རྨི་ལམ་རྨི་ལམ་མ་ཤེས་པས༔ བདེན་པར་བཟུང་བས་སེམས་ཅན་བྱུང༔ རྟག་མི་ཐུབ་པས་སྡུག་བསྔལ་ཏེ༔ ཟད་མཐའ་མེད་པར་འཁོར་བ་ཡིན༔ དེ་ཕྱིར་འདུན་པས་མི་རྟགས་བསམ༔ རྨི་ལམ་ངོ་ཤེས་སངས་རྒྱས་ཏེ༔ ཇི་ལྟར་ཤར་ཡང་དགག་སྒྲུབ་མེད༔ འོད་གསལ་ངང་ནས་སྤྱོད་པ་ཡིས༔ རྨི་ལམ་ཡིན་པར་ཤེས་པར་བྱ༔ ཨཐྎ༔ གྷུཧྱ༔ གསུམ་པ་སྒྱུ་མ་གཏན་ལ་དབབ་པ་ནི༔ སྣང་གྲག་སྒྱུ་མའི་ལམ་ཁྱེར་རོ༔ ཆོས་རྣམས་རྨི་ལམ་སྒྱུ་མ་སྟེ༔ བདེན་མེད་སྒྱུ་མ་ཡིན་པ་རུ༔ འདི་ཕྱི་བར་དོ་ཐམས་ཅད་ཀུན༔ ད་ལྟ་མངོན་སུམ་གཏན་ལ་དབབ༔ ད་ལྟའི་དངོས་པོའི་སྣང་བ་ཡང༔ དཔེར་ན་ཆུ་ནང་ཟླ་བ་ལྟར༔ གཟུགས་དང་སྐྱེ་མེད་གང་གྱུར་ཀྱང༔ དངོས་པོར་འཛིན་རྒྱུ་སྤུ་ཙམ་མེད༔ དེ་བཞིན་ད་ལྟའི་དངོས་སྣང་ཀུན༔ བརྟགས་ཤིང་དཔྱད་པས་དངོས་པོ་མེད༔ བདེན་མེད་སྒྱུ་མའི་རྣམ་གཟུགས་ཡིན༔ ད་ལྟའི་སྒྲ་སྐད་ཐམས་ཅད་ཀྱང༔ དཔེར་ན་བྲག་ཆའི་སྒྲ་བཞིན་དུ༔ སྣ་ཚོགས་གྲགས་ཀྱང་རང་བཞིན་མེད༔ དེ་བཞིན་སྒྲ་སྣང་ཐོས་པ་རྣམས༔ བརྟགས་ཤིང་དཔྱད་པས་དངོས་པོ་མེད༔ བདེན་མེད་སྒྱུ་མ་འཁྲུལ་སྣང་ཡིན༔ ཡིད་ཀྱི་དྲན་རྟོག་ཐམས་ཅད་ཀྱང༔ དཔེར་ན་ནམ་མཁའི་འཇའ་སྤྲིན་ལྟར༔ མཁའ་ལས་འབྱུང་ཞིང་མཁའ་ལ་ཐིམ༔ མཁའ་ལ་གནས་པ་མ་གཏོགས་པ༔ གཞན་ནས་འཇའ་སྤྲིན་གྲུབ་པ་མེད༔ ཐམས་ཅད་ནམ་མཁའི་འཆར་ཚུལ་ལོ༔ དེ་བཞིན་དྲན་རིག་སྣ་ཚོགས་ཀྱང༔ སེམས་ལ་གནས་ཤིང་སེམས་ལ་ཐིམ༔ སེམས་སུ་གྲོལ་བ་མ་གཏོགས་པ༔ གཞན་ནས་ལོགས་སུ་འབྱུང་བ་མེད༔ ཐམས་ཅད་སེམས་ཀྱི་འཆར་ཚུལ་ཡིན༔ ཤར་ཡང་སེམས་ལ་དངོས་པོ་མེད༔ བདེན་པར་མ་གྲུབ་སྒྱུ་མ་ཡིན༔ དེ་ལྟར་མངོན་སུམ་གཏན་ཕབ་འདུན་པ་བྱ༔ ཁྱད་པར་སྣང་གྲག་ལམ་ཁྱེར་སྦྱང༔ ཐམས་ཅད་སྒྱུ་མར་གཏན་ལ་ཕབ༔ སྒྱུ་མའི་དངོས་པོ་ཅིར་ཡང་འགྱུར༔ དངོས་པོ་ཡིན་ན་བསྒྱུར་མི་བཏུབ༔ དེ་ཕྱིར་རང་གི་སྒྱུ་ལུས་དང༔ དངོས་པོའི་གཟུགས་སྣང་ཐམས་ཅད་ཀུན༔ ལྷ་དང་ལྷ་མོའི་འདུན་པ་ལམ་དུ་བྱས༔ གང་ལྟར་བྱས་པ་དེ་ལྟར་འགྱུར༔ མཚན་མོ་འོད་གསལ་ཟིན་པ་ཡིས༔ ལུས་མེད་ལུས་སྟེ་ལུས་ཀྱི་མཆོག༔ ཡེ་ཤེས་ལུས་ལེན་ཆེ་བའི་མཆོག༔ སྣང་བ་ཐམས་ཅད་ཆོས་སྐུར་འཆར༔ སྒྲ་གྲག་ཐམས་ཅད་གུ་རུའི་གསུང༔ འགག་མེད་ཡི་དམ་ལྷའི་སྙིང་པོ༔ ཆོས་ཉིད་རང་སྒྲར་ཤེས་པར་བྱ༔ གང་ལྟར་ཉན་པ་དེ་ལྟར་འགྱུར༔ གྲགས་སྟོང་ཆོས་ཉིད་གསུང་གི་མཆོག༔ སྒྲ་གྲག་ཐམས་ཅད་ཆོས་སུ་ཐོས༔ ཡིད་ལ་དྲན་རྟོག་ཐམས་ཅད་ཀུན༔ སྟོང་གསལ་སྐྱེ་མེད་ཆོས་སྐུར་བལྟ༔ གང་ལྟར་དྲན་པ་དེ་ལྟ་འགྱུར༔ དྲན་ཚད་ཆོས་ཉིད་རོལ་པར་འཆར༔ ཤར་ཙམ་ཉིད་དུ་རང་སར་གྲོལ༔ རང་གྲོལ་སངས་རྒྱས་དངོས་སུ་འགྱུར༔ གུ་རུའི་སྐུ་གསུང་ཐུགས་ཞིང་ཁམས༔ བླ་མེད་མངོན་པར་རྫོགས་སངས་རྒྱས༔ སྤྲུལ་པ་སྐུ་གསུམ་གང་འདུལ་གྱིས༔ གཞན་དོན་འཁོར་བ་དོང་སྤྲུགས་སོ༔ པདྨ་བདག་དང་མཛད་པ་མཉམ༔ རྨི་ལམ་འོད་གསལ་ཉིན་སྣང་གི༔ འདུན་པ་ལམ་ཁྱེར་ངོ་མཚར་ཟབ༔ ཡེ་ཤེས་མཚོ་རྒྱལ་ཐུགས་ལ་ཆོངས༔ རྨི་ལམ་བར་དོའི་ཁྲིད་རིམ་རྫོགས༔ བྷེ་ཙིཏྟ་དམར་མྱག༔ སཱ་མཱ་ཡཱ༔ རྒྱ་རྒྱ་རྒྱ༔ ཨཐྎ༔ གྷུཧྱ༔