འཆི་ཁ་བར་དོའི་གདམས་པ་སྡུག་བསྔལ་རང་གྲོལ་འཆི་ལྟས་དང་བཅས་པ།
བླ་མའི་ཐུགས་སྒྲུབ་ཡིད་བཞིན་ནོར་བུའི་རྫོགས་རིམ་ལྟ་བ་གསང་ཐིག་ལས་འཆི་ཁ་བར་དོའི་གདམས་པ་སྡུག་བསྔལ་རང་གྲོལ་འཆི་ལྟས་དང་བཅས་པ་བཞུགས་སོ༔
བླ་མ་ཡིད་བཞིན་ནོར་བུ་ལ་ཕྱག་འཚལ་ལོ༔ བླ་མའི་ཐུགས་སྒྲུབ་ཡིད་བཞིན་ནོར་བུ་ཡི༔ རྫོགས་རིམ་ལྟ་བ་གསང་ཐིག་ལས༔ ཐོས་པས་གྲོལ་བའི་གདམས་པ་མཆོག༔ འཆི་ཁ་སྡུག་བསྔལ་བར་དོ་ཡི༔ གདམས་པ་ཟབ་མོ་བཅུད་ཕུར་གྱི༔ འཆི་བ་བརྟགས་པའི་རིམ་པ་ནི༔ ཨོ་རྒྱན་ཆེན་པོས་འདི་ལྟར་གསུངས༔ ཉོན་ཅིག་སྣོད་ལྡན་རྣལ་འབྱོར་མ༔ འདུས་བྱས་མི་རྟག་འཆི་བ་བརྟགས༔ ཕྱི་རྟགས་མི་མཐུན་སྣ་ཚོགས་ལངས༔ ནོར་དང་ལོངས་སྤྱོད་གོད་པ་འབྱུང༔ དབང་པོ་མི་གསལ་ཚིག་པ་ཟ༔ རང་སེམས་ཕྱ་ཕྱོ་རྨི་ལམ་འཁྲུག༔ དགེ་སྦྱོར་མི་འོང་སྡོད་མི་ཚུགས༔ གདམས་ངག་མི་གསལ་གྲོགས་ལ་ཆགས་སྡང་སྐྱེ༔ དེ་བྱུང་བླ་མར་གསོལ་བཏབ་ཚོགས་འཁོར་བྱ༔ བསྐང་བ་དབང་བསྐུར་ཉམས་ལེན་འབད༔ ཡོ་བྱད་ཅི་ཡོད་སྤངས་དག་བྱ༔ ནང་རྟགས་ཚེ་གཟུགས་བརྟགས་པར་བྱ༔ ཡན་ལག་ཁ་དོག་ཉམས་པ་ན༔ འབྱུང་བ་ལྔ་ཡི་འཁོར་ལོས་ཚེ་བཅུད་བསྡུས༔ ངར་གླུད་རྡོ་རྗེའི་ཚིག་གིས་བསྒྱུར༔ གསང་བ་སེམས་ལ་འཆར་བ་འོང༔ ནུས་མཐུ་མ་བསྒྲུབ་བསྟན་པ་འབྱུང༔ བླ་མ་ཡི་དམ་མཁའ་འགྲོས་ལུང་བསྟན་འབྱུང༔ གཡེངས་བ་ཆེ་དང་སྙིང་རྗེ་ཆུང༔ དུག་ལྔ་རྨོངས་སེམས་ཆགས་སྡང་དང༔ དགེ་སྦྱོར་མེད་པར་ཁེ་གྲགས་བདུད་ཀྱིས་ཁྱེར༔ ཐུན་མོང་ཚེ་ཡི་བར་ཆད་རྟགས༔ མཆོག་གི་ལམ་ལ་བར་དུ་གཅོད༔ རྣལ་འབྱོར་དངོས་གྲུབ་རྣམ་གཉིས་རིང་བའི་བདུད༔ དེ་དག་བཟློག་པར་བྱ་བ་ནི༔ རབ་ཀྱིས་ལྟ་བ་ཆོས་ཉིད་རོལ་པར་ཁྱེར༔ འབྲིང་གིས་ཉམས་ལེན་ཆགས་མེད་སྒྱུར་མར་སྦྱངས༔ ཐ་མས་རི་དྭགས་དགྲ་བྲོས་ལྟར༔ དབེན་པའི་ས་ཕྱོགས་རྒྱུས་མེད་སར༔ ཕྱོགས་མེད་བྲོས་ཤིང་ཉམས་ལེན་སྙོམས་པར་བྱ༔ རིག་པས་བཙན་ས་མ་ཟིན་པར༔ ཉམས་ལེན་དོ་རིག་བརྩོན་པར་བྱ༔ དེས་ནི་བཟློག་འགྱུར་གདོན་མི་ཟ༔ རྒྱས་པ་དཀྱུས་ལས་ཤེས་པར་གྱིས༔ ཨཐྎ༔ གྷུཧྱ༔ གཉིས་པ་འཆི་ཁའི་སྡུག་བསྔལ་ནི༔ གལ་ཏེ་ཅིས་ཀྱང་མ་བཟློག་ན༔ བཏགས་པས་གྲོལ་བའི་གདམས་པ་དག༔ རིན་ཆེན་བྲིས་ལ་མགུལ་དུ་བཏགས༔ སྐྱེལ་མ་མྱུར་མགྱོགས་འཕོ་བ་འབད༔ རིག་པ་གཏན་ཕབ་གནས་ལུགས་སྐྱོངས༔ ཐམས་ཅད་མི་རྟག་སྒྱུ་མའི་རང་བཞིན་བསམ༔ ད་ནི་འཇིག་རྟེན་བོར་ནས་འོག་མིན་ན༔ འགྲོ་བས་དགའ་ཡིས་བསམ་པའི་འདུན་པ་དང༔ རྩེ་གཅིག་ཉམས་ལེན་གསལ་བཏབ་བོ༔ ཀྱེ་མ་འཆི་བའི་བར་དོ་འབྱུང་བའི་ཚེ༔ འབྱུང་བ་ལྔ་པོ་སྟོབས་ཟད་འཁྲུགས༔ ཤིན་ཏུ་ཟུག་གཟེར་ནད་ཀྱིས་གདུངས༔ མལ་གྱི་ཐ་མ་འཆི་མལ་ཉལ༔ ཟས་ཀྱི་ཐ་མ་འཆི་ཆུ་འཐུང༔ གཏམ་གྱི་ཐ་མ་ཁ་ཆེམས་འཇོག༔ གོས་ཀྱི་ཐ་མ་འཆི་གོས་གྱོན༔ སྣང་བ་མི་སྡོད་ཤེས་པ་བན་བུན་འཕྱོ༔ དབང་པོའི་དངས་མ་མིག་ཀྱང་འགྲིབ༔ ཆུ་ཡི་དངས་མ་མཆུ་ནི་སྐམ༔ མཚེར་བའི་དངས་མ་ལྕེ་ཡང་དིགས༔ མཆིན་པའི་དངས་མ་མཆི་མ་འདུ༔ མཁལ་མའི་དངས་མ་རྣ་བ་འབྱར༔ གློ་བའི་དངས་མ་སྣ་ཡང་ཞོམ༔ ཁྲག་གི་དངས་མ་འགྲམ་པ་ཤོངས༔ བ་སྤུའི་དངས་མ་སྨིན་མ་འཚུབ༔ རུས་པའི་དངས་མ་སྦོ་ཡང་གནག༔ དབུགས་ཀྱི་དངས་མ་ངར་ཤིང་རྒོད༔ རིག་པ་མི་བཟོད་ཕྱ་ཕྱོ་འཚུབས༔ འདུས་ཤེས་དངས་མ་ལངས་གསལ་འགྲིབ་འདུག་མང་༔ རུས་པའི་དངས་མ་ཧིཀ་ཀ་འབྱིན༔ བློ་སྣ་འཚུབ་ཅིང་ལག་པ་བྲེལ༔ མགོ་ཡང་མི་ཁྱོག་ཡར་བསླངས་ཟེར༔ འཆི་བ་ངོ་ཤེས་སྡུག་བསྔལ་མང༔ ཚེ་འདས་( འདིའི་) སྣང་བ་བག་ཆགས་ཀྱི༔ ཞེན་ཅིང་ཆགས་སེམས་དྲག་པོར་སྐྱེ༔ འབྱུང་བ་ཐིམ་སྡུད་རིམ་པར་འབྱུང༔ ཆུ་ལ་ཆུ་ཐིམ་ཁ་ཆུ་སྣ་ཆུ་འཛག༔ ལྟེ་བའི་རྩ་མདུད་འཇིག་པར་སོང༔ ལུས་ཉམས་དབང་པོ་ཟུང་མི་ཐུབ༔ ས་མལ་འཆུག་ལ་ལུས་གཡོ་ལྕི༔ ཤེས་པ་བྱིང་ཞིང་སྣང་བ་སྨིག་རྒྱུར་འཆར༔ མེ་ལ་མེ་ཐིམ་ལྕེ་དང་ཁ་སྣ་སྐམ༔ སྨྲ་བར་འདོད་ཀྱང་བརྡའ་མི་འཕྲོད༔ ཆུ་ལ་ཆུ་ཐིམ་སྙིང་ཁའི་རྩ་མདུད་འཇིག༔ ཆུ་རླུང་མལ་འཆུག་ཁ་སྐོམ་ཤེས་པ་འཚུབས༔ ལུས་འཁྱག་མདངས་ཤོར་དབུགས་མི་བདེ༔ མེ་ཉིད་རླུང་ཐིམ་མགྲིན་པའི་རྩ་མདུད་འཇིག༔ མེ་རླུང་མལ་འཆུག་དྲོད་སྡུད་དོ༔ སྣང་བ་གསལ་འགྲིབ་སྲིན་བུ་མེ་ཁྱེར་འཆར༔ རྣམ་པར་ཤེས་པ་རླུང་ལ་ཐིམ་པ་ནི༔ གསང་གནས་རྩ་མདུད་འཇིག་ཅིང་རླུང་མལ་འཆུག༔ དབུགས་ལྡོག་ནང་དུ་སྡུད་མི་ཤེས༔ ཤེས་པ་འཁྲུག་ལ་འོད་སྣང་ཅུང་ཟད་འཆར༔ འབྱུང་བ་ཐིམ་པས་དབང་པོ་ཡུལ་ལྔ་འགགས༔ དེ་ཚེ་བླ་མ་བཞུགས་ན་རབ་ཡིན་ངོ་སྤྲོད་གདབ༔ མེད་ན་རྡོ་རྗེ་སྤུན་ཚོགས་ཀྱིས༔ གསལ་གདབ་ངོ་སྤྲོད་ལེགས་པར་བསྐྱར༔ རྩ་དབུ་མའི་མར་སྣའི་ཐིག་ལེ་དངས་མ་ནི༔ ལྟེ་འོག་ཐིག་ལེ་ཨཿའི་རྣམ་པའི༔ གཟུགས་སུ་ཡོད༔ རོ་མའི་ནུས་པ་ཉམས་པས་གྱེན་དུ་རྒྱུག༔ སྣང་བ་དམར་ལམ་འཆར་བ་འོང༔ དེ་ཚེ་འདོད་ཆགས་རྟོག་པ་འགགས༔ དབུ་མའི་ཡར་སྣ་རྩ་ཡི་དངས་མ་ནི༔ ཐིག་ལེ་ཧཾ་མགོ་ཐུར་བསྟན་རྣམ་པའི་གཟུགས༔ རྐྱང་མའི་ནུས་པ་ཉམས་པས་ཐུར་དུ་འབབ༔ སྣང་བ་དཀར་ལམ་ཤར་བའོ༔ དེ་ཚེ་ཞེ་སྡང་རྟོག་པ་འགགས༔ སྤྱི་བོར་ཁྱབ་བྱེད་རླུང་བྲོས་པས༔ ནག་ལམ་ཤར་བས་གཏི་མུག་རྟོག་པ་འགགས༔ དུག་གསུམ་འགགས་པས་ང་རྒྱལ་ཕྲག་དོག་རང་སར་འགགས༔ དུག་གསུམ་རྩ་གསུམ་ལ་འདུས་ཕྱིར༔ དེ་ཚེ་ཕྱི་དབུགས་ཧར་གྱིས་ཆད༔ ཕྱི་དབུགས་ཆད་དང་ནང་དབུགས་བར༔ ཉི་མ་ཡར་འཕར་ཟླ་བ་མར་བབ་ནས༔ སྙིང་ཁར་འདྲེས་པས་དབུ་མར་རླུང་སེམས་ཚུད༔ དུས་གསུམ་དབུ་མར་གནས་ཤིང་རྟོགས་པ་འགགས༔ རྣམ་པར་མི་རྟོག་ཀ་དག་ཡེ་ཤེས་ཆོས་ཀྱི་སྐུ༔ ཀུན་བཟང་དགོངས་པ་སྤྲོས་བྲལ་ལྷག་གེར་ཤར༔ གང་ཟག་དབང་པོ་རབ་ཀྱིས་ངོས་ཟིན་གྲོལ༔ ཡེ་ཤེས་ངོས་ཟིན་སངས་རྒྱས་གནས་ལུགས་ནི༔ གདེང་ལྡན་གོམས་འདྲིས་འདྲིས་པར་བྱས་སྟོབས་ཀྱིས༔ ལམ་གྱི་ནུས་པའི་ཡེ་ཤེས་དང༔ ལྷན་ཅིག་སྐྱེས་པའི་རང་འབྱུང་ཡེ་ཤེས་དེ༔ རང་ངོ་ཤེས་པས་ཆོས་སྐུ་མ་བུ་འཕྲོད༔ རིག་པ་དབྱིངས་ལ་གཏད་པ་ཡིས༔ སངས་རྒྱས་དབྱིངས་སུ་གཤེགས་པ་ཡིན༔ དབང་རབ་བར་དོ་མེད་པར་ཡར་ཟང་ཐལ༔ ཆོས་སྐུ་སྐྱེ་མེད་ཐོབ་པའོ༔ ལིངས་ཀྱིས་བསྐྱུར་བས་སྒྱུ་ལུས་ཡིན༔ ཐིམ་གྱིས་འགགས་པས་འཁྲུལ་སྣང་ཡིན༔ ལྷག་གེར་ཤར་བ་ཡེ་ཤེས་ཡིན༔ ཁྲོལ་གྱིས་གྲོལ་བ་རིག་པ་ཡིན༔ རྣལ་འབྱོར་ལུས་རྒྱ་ཞིག་པ་དང༔ ཡར་གྱི་ཟང་ཐལ་སྐད་ཅིག་དུས་མཉམ་མོ༔ དེ་ཡང་གནད་ཀྱི་གདམས་པ་ནི༔ རབ་ཀྱིས་རྣལ་འབྱོར་ངོ་སྤྲོད་ཙམ་གྱིས་གྲོལ༔ ངོ་སྤྲོད་རྟོགས་པས་གྲོལ་བ་དུས་མཉམ་མོ༔ ཆོས་བོར་འཁྲུལ་རྟོག་འགགས་པ་དུས་མཉམ་མོ༔ འཁྲུལ་རྟོག་འགགས་པས་མ་རིག་སངས་བ་དུས་མཉམ་མོ༔ ཡེ་སངས་རྒྱས་དང་མངོན་པར་རྫོགས་པ་དུས་མཉམ་མོ༔ དཔེར་ན་ཤར་ནས་ཉི་ཤར་ནུབ་ཀྱི་མུན་སངས་མཉམ༔ འབྲིང་གི་རྣལ་འབྱོར་ཉམས་སུ་བླངས་པ་ཡིས༔ བླ་མས་ངོ་སྤྲོད་དོན་རྣམས་གཅིག་ཏུ་དྲིལ་བས་མྱོང༔ མ་ཆོས་ཉིད་ཀྱི་དཀྱིལ་འཁོར་དབྱིངས་ཉིད་ལ༔ བུ་རང་བྱུང་རིག་པའི་དཀྱིལ་འཁོར་ཤར༔ བར་དོའི་སྣང་བ་མེད་པར་སངས་རྒྱས་སོ༔ རྣལ་འབྱོར་རབ་ཀྱི་ཐ་མས་ཀྱང༔ ལུས་བོར་གྲོལ་བ་དུས་མཉམ་མོ༔ གོང་ལྟར་དབུགས་ཆད་ཧ་ཟེར་བས༔ རླུང་སེམས་ནམ་མཁའི་ངང་དུ་སྙིང་ནང་ཟུག༔ དཔེ་ནི་རྟ་ལོང་རྐང་ཅན་སྐྱེས་བུ་མི་ཆགས་ལྟར༔ སེམས་དང་རིག་པ་སོ་སོར་རྒྱབ་གྱེས་སོ༔ དེ་ལས་སྦྱངས་སྟོབས་ཆེ་ཆུང་རྩ་བཟང་ངན༔ རབ་བདུན་འབྲིང་ལྔ་ཐ་མ་ཞག་གསུམ་དུ༔ སྙིང་ནང་ཁྲག་དང་ཆུ་སེར་མེད་པ་ཡི༔ ལྷང་ངེར་དགོངས་པ་བཞུགས་པར་ཡོད༔ བསག་རྒྱ་ཆེ་ཆུང་དགོངས་པས་ཤེས༔ བསག་ཆུང་རྣམས་ལ་སྐད་ཅིག་དག་ལས་མེད༔ དེ་ནས་ལུས་ཀྱི་ཁྲག་རྣམས་སྲོག་དབུགས་སྡུད༔ སྲོག་དབུགས་ཙིཏྟའི་ནང་དུ་སྡོད༔ དེ་ལས་རྩ་དཀར་ཤེལ་གྱི་སྦུ་གུར་སྡུད༔ ལམ་ནི་ཆུ་ཡི་སྒྲོན་མར་ཐོན༔ སྐུ་གསུམ་སྣང་བ་དུས་གཅིག་ཤར༔ ཐུགས་རྗེ་རང་སྣང་ཡིན་པར་ངོ་ཤེས་ན༔ སྐད་ཅིག་མ་ལ་གྲོལ་ཏེ་སྣང་བ་དང༔ རྟོག་གྲོལ་དུས་མཉམ་ཐུགས་རྗེ་ཤར༔ ཐུགས་རྗེ་ཤར་བ་དང་འགྲོ་དོན་དུས་མཉམ་མོ༔ འཆི་ཁ་བར་དོའི་གདམས་པ་ཟབ༔ ཡེ་ཤེས་མཚོ་རྒྱལ་ཐུགས་ལ་ཆོངས༔ ས་མ་ཡ༔ རྒྱ་རྒྱ་རྒྱ༔