སྲིད་པ་བར་དོའི་གདམས་པ་སྲིད་པའི་མེ་ལོང་།
བླ་མའི་ཐུགས་སྒྲུབ་ཡིད་བཞིན་ནོར་བུའི་རྫོགས་རིམ་ལྟ་བ་གསང་ཐིག་ལས་བར་དོའི་གདམས་པ་ཐོས་གྲོལ་གསང་བའི་ལྟ་ཐིག་སྲིད་པ་བར་དོའི་གདམས་པ་སྲིད་པའི་མེ་ལོང་བཞུགས་སོ༔ ༔
བླ་མ་ཡིད་བཞིན་ནོར་བུ་ལ་ཕྱག་འཚལ་ལོ༔ བླ་མའི་ཐུགས་སྒྲུབ་ཡིད་བཞིན་ནོར་བུ་ཡི༔ རྫོགས་རིམ་ལྟ་བ་གསང་ཐིག་གི༔ སྲིད་པ་བར་དོའི་གདམས་པ་ནི༔ ཨོ་རྒྱན་ཆེན་པོས་བཀའ་སྩལ་པ༔ ཉོན་ཅིག་སྣོད་ལྡན་རྣལ་འབྱོར་མ༔ གོམས་ཆ་ཆུང་བའི་དབང་ཐ་རྣམས༔ ཆོས་ཉིད་བར་དོར་མ་གྲོལ་ནས༔ སྲིད་པ་བར་དོ་འཆར་ཚུལ་ལ༔ དོན་མདོར་བསྡུ་བ་བཞི་ཡིས་བཤད༔ སྲིད་པ་འཆར་དང་མངལ་སྒོ་དགག༔ ཕལ་པ་སྐྱེ་བའི་བར་དོ་དང༔ དེ་ལ་ཕན་བྱེད་དགེ་བའོ༔ ཆོས་ཉིད་བར་དོ་རང་སྣང་དེ༔ རང་ངོ་རང་གིས་མ་ཤེས་འཁྲུལ༔ སྒྲ་འོད་ཟེར་གསུམ་སྔངས་སྐྲག་དང༔ སྣང་བ་ཐམས་ཅད་གཤིན་རྗེར་གྱུར༔ འོད་ཟེར་ཐམས་ཅད་མཚོན་ཆར་གྱུར༔ མེ་འབར་ཆུ་འབྲུག་རླུང་འཚུབ་དང༔ རི་ཉིལ་ཐོག་འབེབ་འཇིགས་སྐྲག་འོང༔ སྐྱབས་ཤིག་འཚོལ་བའི་སྣང་བ་ཤར༔ ད་ནི་ཤི་འདུག་ཅི་བྱ་སྙམ༔ སྣང་བ་ཕྱ་ཕྱོ་བན་བུན་དུ༔ འགྲོ་ཞིང་འདུག་པའི་ས་ཚུགས་མེད༔ ཀྱེ་མ་ད་ནི་ཅི་ཚུགས་བྱ༔ ལུས་གཅིག་བླངས་ན་ཅི་མ་རུང༔ སྙམ་ནས་ཀུན་ལ་སྙམ་ཞིང་འཇུག༔ མི་སྲིད་པ་ནི་སྣ་ཚོགས་འཆར༔ བར་དོ་ཡིད་ཀྱི་ལུས་ཅན་ལ༔ ཤ་ཁྲག་གདོས་བཅས་གཟུགས་མེད་དོ༔ སྔོན་གྱི་བག་ཆགས་ལུས་ཡོད་སྙམ༔ ཡིད་ལུས་ཡིན་པར་མ་ཤེས་ནས༔ དབང་པོ་ཀུན་ཚང་ཐོགས་མེད་རྒྱུ༔ དངོས་པོ་ཀུན་ལ་ཐོགས་པ་མེད༔ བྱ་སྒྲོ་རླུང་གིས་ཁྱེར་བ་འདྲ༔ ལས་ཀྱི་རྫུ་འཕྲུལ་ཤུགས་དང་ལྡན༔ བསྐལ་བ་བཟང་པོའི་ལུས་བཞིན་དུ༔ མངོན་ཤེས་ཕྲ་མོ་ཅུང་ཟད་ཀྱིས༔ ལྷ་མི་དག་པ་གར་སྐྱེ་བའི༔ རིགས་མཐུན་ནང་ཚན་མཐོང་བར་འགྱུར༔ རིག་པ་ཕུང་པོ་རྟེན་དང་བྲལ༔ རི་རབ་ཁང་ཁྱིམ་ས་རྡོ་བྲག༔ མ་ཡི་མངལ་དང་རྡོ་རྗེ་གདན༔ རི་རབ་གླིང་བཞི་སྐད་ཅིག་ལ༔ ལག་པ་བརྐྱང་བསྐུམ་གང་བསམ་འཁོར༔ ཟང་ཐལ་འགྲོ་བའི་སྟོབས་དང་ལྡན༔ ལས་ཀྱི་ཤུགས་ཀྱི་རྫུ་འཕྲུལ་ནི༔ ཡ་མ་ཟུང་ཉིད་སྣ་ཚོགས་སྟོན༔ ནམ་དྲན་ཉིད་དུ་སྟོན་ནུས་སོ༔ ཤེས་པ་བདུན་འགྱུར་གསལ་བའོ༔ རིགས་མཐུན་རིགས་དྲུག་གར་སྐྱེ་བ༔ ཡང་དག་བསམ་གཏན་བསྒོམ་པས་མཐོང༔ རྒྱུན་དུ་མི་མཐོང་འདུན་པ་གཏད་པས་མཐོང༔ དེ་དུས་བླ་མའི་གདམས་པ་གཅེས༔ བསམ་གཏན་ཏིང་འཛིན་གསལ་གདབ་བྱ༔ སྔོན་དུས་གོམས་འདྲིས་ཡོད་པ་ཡི༔ ཆོས་ཉིད་རྩོལ་མེད་ཤར་བ་ཡོད༔ དྲན་པ་དྲུག་པོ་གོང་ལྟར་ཤར༔ དེ་མ་ཐག་ཏུ་གྲོལ་བ་ཡོད༔ སྒྲ་འོད་ཤར་མ་ཐག་ཉིད་དུ༔ ཕལ་ཆེར་ངོ་ཤེས་གྲོལ་བ་སྲིད༔ ཞི་ཁྲོའི་སྣང་བ་ཤར་མ་ཐག༔ ཡི་དམ་ངོ་འཕྲོད་གྲོལ་བ་ཡོད༔ དབང་པོ་ཐ་མའི་རབ་ཀྱི་གྲོལ་ཚུལ་ཡིན༔ རིགས་དྲུག་གར་སྐྱེའི་ལུས་ཉིད་མཐོང༔ བརྫུས་སྐྱེས་ནང་དུ་མཐོང་སྙམ་བྱེད༔ གལ་ཏེ་སྐད་ཅིག་ཉིད་དུ་གྱུར༔ དྲོད་སྐྱེས་ནང་དུ་ཕྱིན་སྙམ་ན༔ གཉིད་སད་ལྟ་བུར་ལུས་གྲུབ་བོ༔ སྒོང་སྐྱེས་མངལ་སྐྱེས་རིགས་མཐུན་ནོ༔ ཕོ་མོ་སྦྱོར་དུས་མ་ཡི་མངལ༔ ཡིད་དུ་འོང་བའི་སྣང་བ་ཡོད༔ མ་ལ་ཆགས་ནས་ཕ་ལ་སྡང༔ མོ་ལུས་དེ་ལས་ལྡོག་པའོ༔ ཕ་ལ་ཆགས་ཤིང་མ་ལ་སྡང༔ ཕོ་ལུས་དེ་ལས་ལྡོག་པའོ༔ ཆགས་སྡང་གཉིས་ཀྱི་སྲེད་ལེན་གྱིས༔ རྣམ་ཤེས་མངལ་དུ་སྐད་ཅིག་ཚུད༔ ཁུ་ཁྲག་བར་དུ་རྣམ་ཤེས་འཐུམ༔ དྲན་པ་ཤོར་ཏེ་རྨོངས་ཤིང་འགྲོ༔ སྐྱེ་བ་ཅི་ལེན་ཆ་མེད་པས༔ རིགས་དྲུག་ཕ་མ་འདུ་འཕྲོད་ཚེ༔ དེ་དུས་བླ་མའི་གདམས་ངག་དགོས༔ བདེན་མེད་སྒྱུ་མ་ལྟ་བུར་བསྒོམ༔ བླ་མ་སྐུ་གསུམ་ཏིང་འཛིན་ནི༔ ཕྱག་རྒྱ་ཆེན་པོའི་གསལ་གདབ་བྱ༔ དེ་ཡིས་གྲོལ་བ་གདོན་མི་ཟ༔ དེ་ལྟར་བསྒོམ་པར་མ་ཤེས་ཀྱང༔ གསེར་གྱི་རྡོ་རྗེ་རྩེ་ལྔ་ཅིག༔ རིགས་པ་གཏད་དེ་མངོན་དགའ་འམ༔ ཞིང་ཁམས་ལྔའམ་པདྨ་འོད༔ གང་མོས་ཞིང་ལ་འདུན་པ་གཏད༔ ཐོགས་མེད་མདའ་ལྟར་འགྲོ་སྙམ་པས༔ ཞིང་ཁམས་སྐྱེ་འགྱུར་ཐེ་ཚོམ་མེད༔ སྤྲུལ་སྐུའི་ཞིང་དུ་དབུགས་འབྱིན་ཅིང༔ སྐད་ཅིག་ལོངས་སྐུར་གྲོལ་བ་དང༔ དེ་ཉིད་ཆོས་སྐུ་ཀ་དག་གྲོལ༔ གཞན་དོན་མཛད་པ་འབྱུང་བར་ངེས༔ བློ་མཐའི་འབྲིང་གི་གྲོལ་ཚུལ་ལོ༔ བློ་ནི་ཐ་མའི་ཡང་མཐས་ཀྱང༔ བླ་མ་སྐད་ཅིག་ཙམ་དྲན་པས༔ ལས་འཕྲོ་བཟང་པོར་ངེས་པར་འཇུག༔ ཡུར་བ་ཆད་པར་ཝ་འཛུག་བཞིན༔ གདམས་པ་འདི་ཐོས་མོས་པ་ཡིས༔ སྐྱེས་ངན་རིགས་དྲུག་ལུས་མི་ལེན༔ སྐྱེས་བུ་སྟོབས་ལྡན་བསྐྱེད་རྫོགས་ཀྱི༔ འཕྲོ་འདུ་བྱེད་པའི་མངལ་དུ་ཞུགས༔ ཡབ་ཀྱི་ཡུམ་འཇུག་སྐུ་དབྱིབས་བརྒྱུད༔ ཡུམ་གྱི་པདྨའི་རྫིང་བུར་འཁྱིལ༔ སྐུ་བལྟམས་ཡོན་ཏན་བདུན་ལྡན་དུ༔ སྐྱེས་ཏེ་དལ་འབྱོར་བཅོ་བརྒྱད་ཐོབ༔ བཅུ་གསུམ་བཅོ་བརྒྱད་ཉེར་གཅིག་ཉེར་བརྒྱད་ལ༔ དམ་ཆོས་འདི་འཕྲད་འགྲོ་དོན་བྱེད༔ མཐར་ཐུག་ཕུང་པོ་མངོན་སངས་རྒྱས༔ ཨཐྎ༔ གཉིས་པ་མངལ་སྒོ་བདམ་པའི་གདམས་པ་ནི༔ ཡི་དམ་ལྷ་ཡི་བསྐྱེད་རིམ་བསྒོམ༔ གང་ཡིན་མངལ་དུ་འཇུག་མི་བྱ༔ གྲོང་ཁྱེར་སྟོབས་ཆེན་རྒྱལ་རིགས་སམ༔ ཆོས་རྒྱལ་འཁོར་ལོས་སྒྱུར་བའམ༔ ཆོས་བརྒྱུད་ཁྱད་པར་དྲི་མེད་ཀྱི༔ ཐེག་ཆེན་ཆོས་ཀྱི་བསྟན་པ་དར༔ རིགས་བཟང་མངལ་དུ་འཇུག་པར་བྱ༔ མི་གཙང་གའུ་དེ་ཉིད་ལ༔ དྲི་ཞིམ་འཛིན་པའི་འདུ་ཤེས་སྐྱེས༔ དེ་ལ་ཆགས་སེམས་འཛིན་མེད་དུ༔ སྒྱུ་མ་ལྟ་བུའི་འདུ་ཤེས་ཀྱིས༔ དེ་རྣམས་སྣང་བ་གང་ཤར་དེ༔ དེ་ཉིད་ཆགས་སྡང་འཛིན་མེད་བྱ༔ སེམས་བསྐྱེད་འདུན་པ་འདི་ལྟར་བྱ༔ འགྲོ་བ་སེམས་ཅན་ཐམས་ཅད་དོན༔ ཆོས་རྒྱལ་འཁོར་ལོས་བསྒྱུར་བ་འམ༔ གྲུབ་པ་ཐོབ་པའི་སྐྱེས་བུ་ནི༔ ཐེག་ཆེན་འགྲོ་དོན་བྱེད་པ་ཡི༔ སྟོབས་ལྡན་སྐྱེས་བུའི་སྐྱེ་བ་བླངས༔ དེ་ལ་ཆོས་རྒྱུད་རིགས་མ་ནི༔ བསོད་ནམས་ཅན་གྱི་མངལ་དུ་འཇུག༔ མངལ་དེ་གཞལ་ཡས་ཁང་བྱིན་རློབས༔ རྡོ་རྗེ་སེམས་དཔའ་འཇམ་དཔལ་དང༔ སྤྱན་རས་གཟིགས་དང་ཕྱག་རྡོར་དང༔ སྣང་སྲིད་ཟིལ་གནོན་གུ་རུའམ༔ རྟ་མགྲིན་ལ་སོགས་གང་མོས་སུ༔ གཞལ་ཡས་ཁང་དུ་བྱིན་གྱིས་བརླབས༔ རང་ཉིད་ལྷ་ཡང་དེ་ལྟར་བསྒོམ༔ ཡི་དམ་རྒྱལ་བ་ཡབ་ཡུམ་ལ༔ དབང་བསྐུར་ཞུ་སྙམ་འཇུག་པར་བྱ༔ དེ་ཡིས་འགྲོ་འདུལ་སྤྲུལ་བའི་སྐུ༔ འཁོར་ལོས་སྒྱུར་རྒྱལ་གཟུགས་སྐུའམ༔ ཐུབ་དབང་ལྟ་བུར་འགྲོ་དོན་བྱེད༔ སྤྲུལ་པ་སྣ་ཚོགས་ཕྱོགས་བཅུར་འགྱེད༔ འཁོར་བ་དོང་སྤྲུགས་སྐྱེས་བུར་གྱུར༔ ཨཐྎ༔ གྷུཧྱ༔ གསུམ་པ་སྐྱེ་བོ་ཐ་མལ་པ༔ ཕལ་བའི་བར་དོ་ཤར་ཚུལ་ནི༔ འབྱུང་བཞི་ཐིམ་སྡུད་གོང་བཞིན་ནོ༔ ཆོས་ཉིད་ཀ་དག་བར་དོ་ནི༔ བཟང་ངན་རྩྭ་ཡི་ཁྱད་པར་གྱིས༔ སྐད་ཅིག་བདུན་ཙམ་འཆར་བ་ཡོད༔ ཟན་ཟའི་ཡུན་སོགས་མ་ངེས་སོ༔ འོད་གསལ་ལྷུན་གྲུབ་གོང་ལྟར་དུ༔ ཤར་ཡང་ངོ་མ་ཤེས་པ་ཡོད༔ ང་ལ་སྔར་མེད་བསམ་པ་ཡིས༔ གློ་བུར་ཤར་བས་སྣང་བ་དགྲ་རུ་ལྡང༔ སྒྲ་འོད་ཟེར་གསུམ་སྐྲག་དངངས་འཇིགས༔ ཆོས་ཉིད་རང་སྒྲ་སོད་སོད་དང༔ རྒྱོབ་རྒྱོབ་ཞེས་པའི་སྒྲ་རུ་གྲགས༔ ཡེ་ཤེས་འོད་ལྔ་མཚོན་ཆར་མཐོང༔ ཞི་ཁྲོའི་སྐུ་རྣམས་གཤེད་མར་མཐོང༔ ཞག་ལྔའི་བར་དུ་བརྒྱལ་དུ་འགྲོ༔ བརྒྱལ་སངས་ཐག་ཏུ་གཤིན་རྗེ་ཡི༔ ཡུལ་ཐང་སྐྱ་བོ་སྐྱི་གཡར་སླེབ༔ ཉི་རྒལ་ཤིན་ཏུ་འཇིགས་པ་ཡིས༔ འཇིགས་སྐྲག་འཁྲུག་ཅིང་སྡོད་མི་ཚུགས༔ དེ་ནས་གཤིན་རྗེས་རྒྱབ་ནས་དེད༔ མུན་པ་འཇིགས་པས་སྔོན་ནས་བསུ༔ ལས་རླུང་དྲག་པོས་དྲག་ཏུ་ཕུལ༔ ལྷ་ལམ་དཀར་པོ་གནམ་དུ་ནར་ཙམ་བརྐྱང༔ གཤིན་ལམ་ནག་པོ་མཐུར་དུ་བརྐྱང༔ མཚམས་སུ་གཤིན་རྗེའི་རྒྱལ་པོ་བཞུགས༔ སྐུ་ནི་ཆེ་ཆུང་རི་རབ་ཙམ༔ ཤེལ་མིག་ཡ་སྭོས་མ་མཆུ་མནན༔ དབུ་སྐྲ་སེར་པོ་སྤྱི་བོར་བཅིངས༔ གསུས་ཁྱིམ་ཆེ་ལ་ཡན་ལག་རག༔ ཕྱག་གཉིས་ཐོད་པ་ཁྲམ་ཤིང་ཐོགས༔ ཞལ་ནས་ཁྲག་འཛག་མཆེ་བ་གཙིགས༔ བློན་པོ་སྡིག་པ་སྦྲུལ་ཕག་མགོ༔ གླང་མགོས་རྒྱ་སྲང་མེ་ལོང་བལྟ༔ ལྷན་ཅིག་སྐྱེས་པའི་ལྷ་འདྲེ་གཉིས༔ དགེ་སྡིག་གཉིས་ཀྱི་རྡེའུ་འགྲིམ༔ རང་ཉིད་ཞེད་ཅིང་བྲེད་པ་ཡིས༔ སྡིག་པ་མ་བྱས་རྫུན་གཏམ་བྱེད༔ རྫུན་གྱིས་མི་ཐུབ་མེ་ལོང་གསལ༔ ཁྲིམས་རྡོ་དཀར་ནག་ནག་པོ་མང༔ སྲང་ལ་མགྱོགས་( བཀྱགས་)ཀྱང་ནག་པོ་ལྕི༔ རྫུན་གྱིས་མི་ཐུབ་མངོན་སུམ་འདུག༔ ལྷན་སྐྱེས་ལྷ་ནི་རང་བཞིན་ཡལ༔ ལྷན་སྐྱེས་འདྲེ་ནི་གཤིན་རྗེ་དང༔ བསྡོང་ཟླ་བྱེད་ཅིང་བདུད་ཞགས་བཅིངས༔ སྐེ་བྲེག་སྙིང་བཏོན་ཀླད་པ་ལྡག༔ འཆི་རུ་མི་འདོད་ཡང་སོས་སྦྱོངས༔ དགེ་བ་ཤས་ཆེའི་མི་རྣམ་ལས༔ ལྷན་སྐྱེས་ལྷ་ཡིས་ལག་ནས་འཐེན༔ ལྷ་མོ་བཅུ་དྲུག་རོལ་མོས་བསུ༔ ལྷ་ལམ་དཀར་པོ་མཐོ་རིས་འདྲེན༔ སྡིག་ཆེན་གཤིན་རྗེས་མར་ལ་དེད༔ མར་གྱི་ཟང་ཐལ་འགྲོ་བའང་ཡོད༔ འཁྲུལ་སྣང་བར་དོ་ཞག་ལྔ་གནས༔ དེ་ནས་སྲིད་པ་བར་དོ་ཤར་ཤིང་འཁྱམས༔ ཤེས་པ་ཡད་ཡུད་ཕྱད་ཕྱོད་འཚུབས༔ གཉེན་འདུན་བཟའ་རོགས་བུ་ཕོ་མོ༔ ངུ་འབོད་སྨྲེ་སྔགས་མཆི་མ་འདོན༔ མིང་ནས་འབོད་པ་ཡིད་ཀྱིས་ཚོར༔ ཀྱི་ཧུད་ང་ནི་འཆི་འདུག་བསམ༔ ཅི་བྱེད་བསམ་ནས་སེམས་གྲང་ཧེད༔ ཉ་མོ་བྱེ་ཚན་སྐྱུར་འདྲའི་སྡུག་བསྔལ་མྱོང༔ ཉེ་དྲུང་ངུ་བའི་རྩར་སོང་སྟེ༔ མ་ངུ་ང་ནི་འདིར་ཡོད་སྨྲས༔ འཇུས་ཀྱང་ཚུར་ལ་མི་མཐོང་ཞིང༔ དེ་ལ་སྡུག་བསྔལ་ཆེན་པོས་ནོན༔ ལུས་གཅིག་བླངས་ན་ཅི་སྙམ་སེམས༔ བུག་པ་ཤར་ཚད་ནང་དུ་འགྲོ༔ ཞག་ནི་ཉེར་གཅིག་བར་དུ་འབྱུང༔ དགེ་བ་ཤས་ཆེའི་མི་དག་དང༔ ང་རྒྱལ་ཆེ་བའི་མི་རྣམས་ལ༔ མཐོ་རིས་ལྷ་གནས་སྐྱེ་བའི་རྟགས༔ ལྷ་ཁང་ནང་ངམ་འོད་དཀར་ནང༔ ཚུད་སྙམ་བྱུང་ན་ལྷ་ལུས་ཐོབ༔ ལས་དག་ལྷ་ཡི་གུ་རུ་ཡིས༔ ཆོས་བཤད་དབང་བསྐུར་གྲོལ་བ་ཡོད༔ ལས་ངན་མ་དག་ཚེ་འཕོས་ན༔ དམྱལ་བ་ངན་སོང་མཐའ་མེད་འཁོར༔ ཕྲག་དོག་ཤས་ཆེའི་མི་རྣམས་ལ༔ སྤྲིན་དང་འོད་ལྗང་ན་བུན་དུ༔ ཚུད་སྙམ་བྱུང་ན་ལྷ་མིན་སྐྱེ༔ ལས་ངན་དག་ནས་ལྷ་མིན་གྱི༔ གུ་རུས་དབང་བསྐུར་ཆོས་ཐོས་གྲོལ༔ ལས་ངན་མ་དག་ངན་སོང་ལྟུང༔ འདོད་ཆགས་ཤས་ཆེའི་མི་རྣམས་ལ༔ ཁང་ཁྱིམ་སེར་པོ་ལྗང་དམར་ནང༔ ཚུད་སྙམ་བྱུང་ན་མི་རུ་སྐྱེ༔ ལས་ངན་དག་ནས་མི་ཡི་གུ་རུ་ཡིས༔ གསང་སྔགས་འབྲས་བུའི་དབང་བསྐུར་ཆོས་ཐོབ་གྲོལ༔ ལས་ངན་མ་དག་ངན་སོང་འཁོར་བར་འཁྱམས༔ སྡིག་སྒྲིབ་གཏི་མུག་ཤས་ཆེའི་མི༔ གསེར་མདོག་འོད་དང་བྲག་ཕུག་ནང༔ ཚུད་སྙམ་བྱུང་ན་བྱོལ་སོང་སྐྱེ༔ ལས་ངན་དག་ནས་བྱོལ་སོང་གི༔ གུ་རུའི་གསང་སྔགས་འབྲས་བུའི་ཆོས་བཤད་གྲོལ༔ ལས་ངན་མ་དག་ངན་འགྲོར་འཁོར༔ སྡིག་པ་སེར་སྣ་ཤས་ཆེ་རྣམས༔ ཁང་སྟོང་མི་གཙང་འོད་སྨུག་ནག༔ ས་ཕུག་དོང་རིང་ནང་ཚུད་སྙམ༔ པྲེ་ཏ་ཡི་དྭགས་གནས་སུ་སྐྱེ༔ ལས་ངན་དག་ནས་ཡི་དྭགས་གུ་རུ་ཡིས༔ འབྲས་བུ་གསང་སྔགས་ཆོས་བཤད་དབང་བསྐུར་གྲོལ༔ ལས་ངན་མ་དག་འོག་ཏུ་ཐོན་དཀའ་འགྲོ༔ སྡིག་པ་ཁམས་ཆེན་དམ་ཉམས་སྡོམ་ཤོར་དང༔ ཞེ་སྡང་ཆེ་བའི་མི་རྣམས་ལ༔ བྲག་ཕུག་ཆུ་འཐབས་འོད་ནག་པོ༔ རོ་མྱག་འདམ་དུ་ཚུད་སྙམ་རྣམས༔ དམྱལ་བའི་གནས་སུ་བརྫུས་སྐྱེས་འགྱུར༔ གསོད་གཅོད་སྡུག་བསྔལ་སྣ་ཚོགས་མྱོང༔ ལས་ངན་དག་ནས་དམྱལ་བ་འདུ་བྱེད་ཀྱི༔ གུ་རུའི་གསང་སྔགས་བླ་མེད་འབྲས་བུའི་ཆོས༔ བཤད་དང་དབང་བསྐུར་དམྱལ་བའི་སེམས་ཅན་གྲོལ༔ གལ་ཏེ་ལས་ངན་མ་ཟད་སེམས་ཅན་རྣམས༔ རིག་དྲུག་གནས་སུ་ཐར་མེད་ཡང་ཡང་དུ༔ མི་ཟད་རླུང་འཁོར་ལྟ་བུ་བརྒྱུད་མར་འཁོར༔ དེ་བས་འཁོར་བ་འདི་ལས་ཐར་ཐབས་སྟོན༔ ཨཐྎ༔ བཞི་པ་སེམས་ཅན་བར་དོ་འཁྱམས་པ་རྣམས༔ ཐུགས་རྗེའི་ར་མདའ་དགེ་བ་བྱ་ཐབས་ནི༔ དེ་ཡང་མ་གྲོལ་བར་དོར་འཁྱམས་པ་ཡིས༔ བཤད་ཚོད་ཙམ་དུ་ཞག་གྲངས་སྟོན་པ་ནི༔ ཆོས་ཉིད་བར་དོར་ཞག་བདུན་གནས༔ སྒྲ་འོད་བར་དོར་ཞག་ལྔ་འཁོར༔ འཇིགས་སྐྲག་བར་དོར་ཞག་ལྔ་གནས༔ ནམ་མཁའི་སྣང་བ་ཞག་ལྔ་འཆར༔ ཆུར་ནུབ་སྣང་བ་ཞག་ལྔ་འཆར༔ སས་ནོན་སྣང་བ་ཞག་ལྔ་འཆར༔ རླུང་གཡེང་སྣང་བ་ཞག་ལྔ་འཆར༔ མེས་ཚིག་སྣང་བ་ཞག་ལྔ་འཆར༔ མུན་གླིང་སྣང་བ་ཞག་ལྔ་འཆར༔ བདུན་ཕྲག་བདུན་ལ་ཡིད་ལུས་ཀྱིས༔ བར་དོར་འཁྱམས་པས་སྡུག་བསྔལ་སྦྱངས༔ དགེ་བའི་དངོས་པོ་ཅི་བྱས་ཀྱིས༔ དེ་ཡི་བར་དུ་ཕན་པར་ངེས༔ ཆེ་ཆུང་འབྲིང་དང་འདུས་བྱས་ཀྱི༔ རྒྱུ་ཡི་བསམ་པ་རྣམ་དག་རྣམས༔ གཤིན་དོན་བདུན་ཚིགས་དེ་ལ་འབུངས༔ ངན་སོང་གནས་སུ་ལྟུང་རྒྱུ་ཡང༔ མཐོ་རིས་གནས་སུ་སྐྱེ་བར་འགྱུར༔ ལས་ཀྱི་སྒྱུར་ཀ་གནད་ཆེའོ༔ བདུན་ཚིགས་བཟུང་བའི་བཤེས་གཉེན་གྱིས༔ ཐུགས་རྗེ་ཆེ་བའི་བྱིན་རླབས་སྟོབས༔ རིགས་དྲུག་སྒོ་བཀག་དགོངས་པ་ཡི༔ ཀུན་རིགས་འོད་དཔག་མེད་གཉིས་ཀྱི༔ བདུན་ཚིགས་གནས་སྦྱངས་གནད་དུ་བསྣུན༔ སྤྱིར་ཡང་རང་རང་ཡི་དམ་གྱི༔ རབ་ཀྱི་ཡི་དམ་སྲས་སུ་འཕང༔ སྤྲུལ་སྐུར་དབུགས་དབྱུང་གྲོལ་བ་ཡིན༔ ཀ་དག་ས་ལ་སྐྱེལ་བ་ཡོད༔ འབྲིང་གི་ཆོས་མཛད་ཡབ་ཡུམ་གྱི༔ སྦྱོར་མཚམས་ཚུད་དེ་ལས་ཀྱི་འཕྲོ༔ བཟང་པོ་མཐུད་ནས་ཡར་ལྡན་ཐོབ༔ ཐ་མ་མི་ལུས་གཙང་མའི་རིགས༔ ཐོབ་འགྱུར་བསོད་ནམས་སྨོན་ལམ་སྟོབས༔ དགེ་སྦྱོར་མཐོ་རིས་གནས་སུ་འགྲོ༔ སྡིག་སྤྱོད་མར་མར་ཟོ་ཆུ་འདྲ༔ གྱེན་དུ་འགྲོ་བ་ཤིན་ཏུ་ཉུང༔ ཆུ་བཞིན་ཐུར་དུ་འགྲོ་བ་མང༔ སེམས་ཅན་མ་རིག་ལས་ངན་སྟོབས༔ ལས་ཀྱི་བག་ཆགས་འགོག་པར་དཀའ༔ ཁམས་གསུམ་ངན་སོང་རྫོང་རེ་བཙན༔ འདི་ཉིད་གྲོལ་ཐབས་འབད་པར་གཅེས༔ སྲིད་པ་བར་དོའི་གདམས་པ་ཟབ༔ སཱ་མཱ་ཡཱ༔ རྒྱ་རྒྱ་རྒྱ༔ ཨཐྎ༔ གྷུ་ཧྱ༔