བར་དོའི་གདམས་པ་ཉུང་ངུ།
བར་དོའི་གདམས་པ་ཉུང་ངུར་ཡིད་དཔྱོད་གང་དྲན་གྱི་རི་མོ་ཞེས་རྨོངས་པ་དག་གི་སྤྱོད་ཡུལ་ལོ། །
དཔལ་གྱུར་འགྲོ་བའི་དོན་མཛད་པ། །པདྨ་གེ་སར་སྙིང་པོ་ལས། །རང་བྱུང་འོད་ཀྱི་སྐུ་རུ་བྱོན། །མཚན་དང་དཔེ་བྱད་ལྟ་མི་ངོམ། །མི་འགྱུར་མི་ཤིགས་རྡོ་རྗེའི་སྐུ། །པདྨ་འབྱུང་གནས་ཞེས་པ་ཡི། །བླ་མ་དེ་ལ་གུས་པས་འདུད། །ཁྱོད་ཀྱི་བར་དོའི་དྲི་བ་གང་། །རིང་མོ་ཞིག་ནས་བསྐུལ་ནའང་། །ལེ་ལོའི་དབང་གྱུར་ལུས་པར་གྱུར། །སྤྱིར་ནི་བར་དོ་དྲུག་བཤད་དེ། །སྐྱེ་གནས་རྨི་ལམ་བསམ་གཏན་དང་། །འཆི་ཁ་ཆོས་ཉིད་སྲིད་པའོ། །སྐྱེ་བོ་རྣམས་ལ་བསམ་གཏན་མེད། །ལས་ངན་རྣམས་ལ་ཆོས་ཉིད་མེད། །དེས་ན་བར་དོ་བཞི་རུ་འཆད། །ཡང་ན་གང་ཟག་ཕལ་ཆེར་ལ། །སྲིད་པ་རྨི་ལམ་བར་དོ་མེད། །ལ་ལར་འཆི་ཁ་བར་དོའང་བྲལ། །དེས་ན་བར་དོ་བཞིའམ་གསུམ། །ཀུན་ལ་འབྱུང་ཞེས་བཤད་པའོ། །དེ་ཡང་བར་དོའི་མཚན་ཉིད་ནི། །རྣམ་པ་བཞི་ཡིས་ཤེས་པར་བྱ། །ངོ་བོ་སྔ་མ་འདས་པའི་རྗེས། །ཕྱི་མ་ས ོ་མས་མ་སླེབ་པར། །བར་དུ་གནས་པའི་རང་བཞིན་དེ། །སྐྱེས་གནས་ཞེས་བྱ་སྐྱེས་གྱུར་ནས། །མ་ཤིའི་བར་དུ་གནས་བྱས་ནས། །མི་ལུས་བྱ་བ་ལས་ལ་སྤྱོད། །དེ་བཞིན་ཀུན་ལ་ཤེས་པར་འདྲེས། །ངེས་ཚིག་མིང་གི་གྲངས་ངེས་ཏེ། །སྐྱེ་གནས་རྨི་ལམ་བསམ་གཏན་དང་། །འཆི་ཁ་ཆོས་ཉིད་སྲིད་པ་དྲུག །དབྱེ་བ་བྱེད་ལུག་སྣ་ཚོགས་ཏེ། །སྐྱེ་གནས་མ་ལས་འཇུག་ཅིང་སྐྱེས། །སྣང་བ་མི་དང་འགྲོགས་ཤིང་གནས། །ལས་ནི་བདེ་སྡུག་སྣ་ཚོགས་མྱོང་། །བྱ་བ་མི་བྱ་གཅིག་ཀྱང་མེད། །རྨི་ལམ་དེ་ནུབ་གཉིད་བྱས་ནས། །ནང་མོ་མ་སད་བར་དུ་རྨི། །སྣང་བ་བག་ཆགས་སྔ་ཕྱིའི་སྤྱོད། །ལས་ནི་གང་བྱུང་གཟུར་མེད་གནས། །བྱ་བ་རྟེན་འབྲེལ་ལས་ལ་བརྩོན། །བསམ་གཏན་མཉམ་པར་བཞག་བྱས་ནས། །ཐུན་ལས་གྲོལ་ནས་རྗེས་སྤྱོད་བར། །སྣང་བ་གང་སེམས་བདེན་པས་འགྲོགས། །ལས་ནི་བསྐྱེད་རྫོགས་ཟུང་འཇུག་སྟེ། །བྱ་བ་བདེན་པ་མཐོང་བར་བྱེད། །འཆི་ཁ་ནད་ཀྱི་སྡུག་བསྔལ་ཏེ། །ཟུག་རྔུ་སྣ་ཚོགས་མྱོང་བ་སྟེ། །སྣང་བ་སྡུག་བསྔལ་རེ་དོག་སྤྱོད ། །ལས་ནི་ནད་ཟུག་ཁུར་བོས་ནོན། །བྱ་བ་ལུས་སེམས་སོ་སོར་བྲལ། །ཆོས་ཉིད་ལུས་རྒྱ་དང་བྲལ་ནས། །སེམས་ནི་ཆོས་ཉིད་མ་ལ་གནས། །སྣང་བ་སྒྲ་འོད་ཟེར་སྣ་ཚོགས། །རིགས་ལྔ་ཞི་ཁྲོའི་སྣང་བའོ། །ལས་ནི་ཉམས་ཀྱི་ཟོ་ལ་སྡོད། །བྱ་བ་བརྟན་པ་ཐོབ་མ་ཐོབ། །སྲིད་པ་འཆི་ནས་མ་འཇུག་བར། །བྱ་སྤྱོད་ལུས་མེད་སྟོང་གཟུགས་དང་། །སྣང་བ་བག་ཆགས་ལུས་དང་འགྲོགས། །ལས་ནི་རྒྱུ་འབྲས་གཉིས་ལ་གནས། །བྱ་བ་མཐོ་རིས་ངན་སོང་སོགས། །གང་དུ་འཇུག་པའི་ཕ་མ་འཕྲད། །ས་མཚམས་སྐྱེ་གནས་བར་དོ་ནི། །མ་ཡི་མངལ་དུ་འཇུག་ཚུན་ནས། །དང་པོ་སྐྱེས་ནས་བར་དུ་དར། །དེ་ནས་ཐ་མ་རྒས་ཤིང་འཁོག །མདོར་ན་འཆི་ནད་བཏབ་ཀྱི་བར། །གནས་ཚུལ་མི་གཅིག་སྣ་ཚོགས་སྤྱོད། །ལ་ལས་མི་ཆོས་བྱ་བ་བྱེད། །ལ་ལས་སྡུག་པའི་ཡོ་ལངས་སྤྱོད། །ལ་ལས་སེམས་ཅན་འགྲོ་དོན་བྱེད། །ལ་ལས་དམ་ཆོས་དགེ་ཚོགས་བསྐྲུན། །འོ་སྐོལ་ཚོ་ཡི་གནས་ཚུལ་ནི། །ཆོས་ཚུལ་འཛིན་ཚུལ་ལེ་ལོའི་ངང་། །ཉིན་མོ་གཡེང་བ་ཟས་སྤྱོད་འཁྱམས། །ནུབ་མོ་གཉིད་དང་ཉལ་འདོད་ཁྱེར། །ལྟོས་དང་དུས་ངན་ཆོས་པ་ཚོ། །ཆགས་སྡང་གཉིས་ཀྱི་ངང་དུ་གདའ། །བསམ་གཏན་བར་དོའི་ས་མཚམས་ནི། །བླ་མ་མཇལ་ནས་སངས་རྒྱས་བར། །དང་པོ་སློབ་གཉེར་བསམ་གཏན་འཇུག །དེ་བཞིན་བསླབ་དོན་རྒྱུ་འབྲས་ཀྱི། །བསམ་གཏན་སྤང་བླང་ཚུལ་བཞིན་སྤྱོད། །དེ་ནས་བསྐྱེད་རྫོགས་རྩ་རླུང་སོགས། །མན་ངག་གང་ཐོབ་སེམས་ལ་བསམ། །བརྟན་པར་གྱུར་ནས་དོན་ལྡན་ཏེ། །གང་བསྒོམ་ཐམས་ཅད་མངོན་གྱུར་ཏེ། །ལ་ལར་ཐུན་ཆུང་ཕྲའུ་ཡོད། །མཉམ་པར་བཞག་པ་མགོ་བཙུག་ནས། །ཐུན་མཚམས་མ་ཡེངས་བར་དུ་ནི། །བསམ་ཞིང་བརྟན་པར་བསམ་གཏན་གྱི། །བར་དོ་ཡིན་ཞེས་སྤྱི་ནས་འཆད། །གནས་ཚུལ་བསྐྱེད་རྫོགས་རྫོགས་ཆེན་དང་། །རྩ་རླུང་ཐིག་ལེའི་གདམས་པ་སྟེ། །བསྐྱེད་ཚེ་རང་སེམས་དྲན་པའི་ངོ་། །ལྷ་དེ་མ་གཏོགས་གཞན་མི་ལྟ། །གསལ་སྟོང་མེ་ལོང་གཟུགས་བརྙན་ལྟར། །གནས་ཚེ་ལྷ་ཡི་བསམ་གཏན་ཞེས། །བསྡུས་ནས་རྗེས་སུ་སྤྱོད་པ་གཞན། །སྤྱོད་ཚེ་བསམ་གཏན་འདས་པ་སྟེ། །དེ་བཞིན་ཕྱག་རྫོགས་ཀུན་ཀྱང་འདྲེས། །ཨ་ལ་མཚར་པོ་དུས་ངན་གྱི། །བསམ་གཏན་བསྒོམ་ཚེ་ངོ་མཚར་ཆེ། །རྣམ་རྟོག་འདོད་ཕྱོགས་སྤངས་བླངས་དང་། །ཐེ་ཚོམ་ཡིད་གཉིས་སྒྲོས་བཏགས་ཀྱི། །སྤྲེའུ་ཤིང་ཁར་ཕྱིན་འདྲའི་སྒོམ། །དེ་ལ་བསམ་གཏན་ཨེ་ཟློ་ན། །རྨི་ལམ་བར་དོའི་ས་མཚམས་ནི། །གང་དག་གཟུགས་དེ་རྙེད་བྱས་ནས། །སད་པར་གྱུར་གྱི་བར་དུ་དེ། །གནས་ཚུལ་བདག་གི་སྙིང་དབུས་སུ། །རང་སེམས་ཁ་དོག་མཐིང་ཀའི་ཚུལ། །སྟེང་དུ་ཕ་ཡི་ཁུ་བ་དཀར། །འོག་ཏུ་མ་ཡི་ཁུ་བ་དམར། །ཨ་ཐུང་གྱེན་ལྡོག་ནུས་པ་ཡི། །ཐིག་ལེ་དཀར་དམར་འཕྲད་ནས་བདེ། །ནང་དུ་སངས་རྒྱས་བཞི་བཅུ་གཉིས། །ཀུན་བཟང་ཀློང་དུ་རོ་གཅིག་གྱུར། །ཐིམ་རིིམ་གསུམ་འཆར་ཧྲུལ་གྱིས་གཉིད། །ལས་རླུང་གིས་སྤྱོད་ཅུང་ཟད་མཆེད། །དེ་ལས་རྨི་ལམ་སྣ་ཚོགས་རྨི། །ཐིག་ལེའི་རྒྱ་འཐུམ་མི་སད་དེ། །ལས་རླུང་སྣ་ཚོགས་བག་ཆགས་དང་། །ཕྲ་རག་རྟོག་པ་སྣ་ཚོགས་བསྐྱེད། །ལ་ལ་འོད་གསལ་ངང་དུ་གནས། །ལ་ལ་མ་རིག་བག་ལ་ཞ། །དེ་དང་དེ་གཉིས་ནོར་ཉེན་ཡོད། །ལ་ལས་སྤྲུལ་བསྒྱུར་སྣ་ཚོགས་སྟོན། །ལ་ལ་འཁྲུལ་སྣང་སྣ་ཚོགས་འཆར། །ལ་ལ་བསམ་གཏན་ཉམས་མྱོང་སྐྱོང་། །ལ་ལས་བག་ཆགས་རྗེས་སུ་འབྲང་། །ལ་ལས་རྨི་ལམ་རང་ངོ་འཕྲོད། །ལ་ལས་སྡིག་སླང་འཚུབ་བར་ལོང་། །ལ་ལ་རྨི་ལམ་རང་དབང་ཐོབ། །ལ་ལ་གཉིས་འཁྲུལ་རྩིབས་ལ་སྐྱོན། །དེ་ལ་སོགས་པ་མཐའ་ལས་འདས། །འཆི་ཁ་བར་དོའི་ས་མཚམས་ནི། །དེ་ཉིན་འཆི་ནད་དེ་ཐོབ་ནས། །ཧ་ཞེས་དབུགས་རྒྱུད་རྦད་ཀྱི་ཆད། །ལུས་ཉིད་རོ་ཡི་ཆོས་ཅན་ནོ། །གནས་ཚུལ་འཆི་ནད་སྣ་ཚོགས་ཏེ། །ལ་ལ་གྲི་མཚོན་གཡང་རྦབ་དང་། །ལ་ལ་རྒྱལ་པོའི་ཆད་པ་དང་། །ལ་ལ་འབྱུང་ལྔའི་ལས་སྦྱར་དངོས། །སྣ་ཚོགས་རྐྱེན་ནི་ངེས་པ་མེད། །གཏོ་དགེ་སྨན་དཔྱད་རིམ་གྲོར་འབད། །ཕན་བྱ་གང་བས་གནོད་ཚབ་ཆེ། །དེ་ནི་ངེས་པར་འཆི་རྐྱེན་ཏེ། །འཆི་ཁ་ཉེ་རིང་འཁོར་གཡོག་དང་། །བརྩེ་བའི་གྲོགས་ཀྱིས་མཐའ་ནས་བསྐོར། །ཀུན་གྱིས་ནད་པའི་གདོང་ལ་ལྟ། །མཆི་མའི་རླན་གྱིས་ངུ་སྐད་འབྱིན། །ཕན་ཚུན་བརྩེ་སེམས་ཟློ་རེས་བྱེད། །བསམ་བསམ་མང་པོ་མལ་དུ་ལུས། །གྱིས་གྱིས་མང་པོའི་ཁ་ཆེམས་བཞག །ཆགས་སེམས་ཀུན་ནས་བསླང་བ་ཡི། །སྡུག་བསྔལ་དྲན་ཀྱང་བཟོད་བླག་མེད། །ཕལ་ཆེར་ནད་དབང་ངང་དུ་འགྲོ། །ཀུན་ཀྱང་སྡུག་བསྔལ་འབའ་ཞིག་སྟེ། །འཆི་ལུག་རྒྱལ་པོ་ལྟ་བུ་དང་། །སྤྲང་པོ་ལྟ་བུ་གཉིས་ལ་འདུས། །ལ་ལ་འཆི་ཁ་དག་སྣང་འཆར། །ཞིང་ཁམས་གང་དུ་འཕོ་རྟགས་འབྱུང་། །ལ་ལ་འཇའ་ལུས་འགྲོ་བའང་ཡོད། །དེ་ནི་ལྷག་མེད་སངས་རྒྱས་ཟེར། །ལ་ལ་ངན་འགྲོའི་རྟགས་ངན་འཆར། །མར་གྱི་ཟང་ཐལ་བྱ་བ་ཡོད། །དེ་སོགས་རྣམ་པ་སྣ་ཚོགས་སོ། །དབུགས་ཆད་རིག་པ་སྙིང་དབུས་བརྒྱལ། །ནག་ལམ་སྐབས་ཞེས་ལ་ལར་གསུངས། །ཡང་ན་ཆོས་ཉིད་མ་ལ་ཞ། །ཞེས་ཀྱང་ཟེར་ཏེ་འཆི་ཁའོ། །ཆོས་ཉིད་བར་དོའི་ས་མཚམས་ནི། །ལུས་དང་སེམས་བྲལ་རིག་པ་ཉིད། །ཕྱི་ཡི་ཆོས་ཉིད་དག་ལ་གནས། །སྲིད་པ་བར་དོ་མ་འཆར་བར། །གནས་ཚུལ་ལས་ཀྱི་རླུང་གིས་བསྐྱོད། །ཚངས་བུག་སོགས་ནས་ཕྱིན་ཐོན་ཏེ། །ཐམས་ཅད་སྟོང་ཉིད་རྗེན་པར་འཆར། །སྟོང་པའི་ངང་ལས་འབྱུང་བ་འཁྲུག ། སྒྲ་འོད་ཟེར་དང་སྐུ་ཡིག་འབྲུ། །ཐིག་ལེ་ཐིག་ཕྲན་རིགས་ལྔའི་དལ། །ཞི་བ་ཡོངས་རྫོགས་ཁྲག་འཐུང་སོགས། །ཞི་ཁྲོ་ཡོངས་སུ་རྫོགས་པར་ཤར། །ལ་ལར་རང་རང་ཡི་དམ་ལྷ། །གོམས་འདྲིས་གང་ཡོད་ལྷ་ཚོགས་རྣམས། །འཆར་ནས་ལུང་བསྟན་དབུག་དབྱུང་སྟེ། །ཞིང་ཁམས་དག་ཏུ་འདྲེན་པར་གསུངས། །དེ་ཡང་བརྟན་པ་ཐོབ་པ་རྣམས། །དེ་ཉིད་རྒྱུ་ནི་སངས་རྒྱས་སྟེ། །དེ་མིན་ལུང་བསྟན་གནང་བ་ཐོབ། །དེར་གནས་ཆོས་ཉིད་ངང་དུ་གནས། །དེས་ན་ཆོས་ཉིད་བར་དོ་བྱ། །སྲིད་པ་བར་དོའི་ས་མཚམས་ནི། །ཆོས་ཉིད་ས་ལ་ལ་ལ་ནི། །དབང་པོའི་སྒོ་ནས་ཕྱིར་ཐོན་ནས། །ཆོས་ཉིད་མི་འཆར་སྲིད་པ་འབྱུང་། །ལ་ལར་གཤིན་རྗེ་གཤེད་དུ་སྣང་། །རྡེའུ་གཤར་མར་འབྱུང་བར་གསུངས། །གོང་ལྟར་ཆོས་ཉིད་དེ་ཡལ་ནས། །མ་ཡི་མངལ་དུ་མ་ཚུད་བར། །སྲིད་པ་བར་དོ་བྱ་བ་སྟེ། །གནས་ཚུལ་བག་ཆགས་ཡིད་ལུས་ལ། །ཕྱ་ཕྱོད་ཡད་ཡུད་འདུག་མི་ཚུགས། །ཕྱོགས་བཅུ་ཀུན་སྤྱོད་སྐྱབས་གནས་ཚོལ། །སྣང་བ་གཉིས་ཆ་བཞི་ཆ་འཆར། །འདས་དང་མ་འོངས་ད་ལྟ་གསུམ། །ལུང་མ་བསྟན་སོགས་བག་ལ་ཉལ། །ཉིན་དང་མཚན་ཞེས་སྣང་བ་ནུབ། །ལས་རླུང་གང་དུ་བསྐྱོད་དེ་འགྲོ། །རང་གི་ཉེ་འཁོར་ཀུན་མཐོང་ཡང་། །དེ་ཚོས་བདག་ཉིད་རིག་མི་འགྱུར། །གལ་ཏེ་མཐོང་ཡང་མིག་འཁྲུལ་ཙམ། །དེ་ཙ་ཁོང་ཚོས་གང་སྨྲ་དང་། །བྱ་བྱེད་མཐོང་བཞིན་ཡི་མ་རངས། །སྙིང་མི་དགའ་ཞིང་ཡིད་ཕྱོ་སྟེ། །ཁོ་ཐག་ཆོད་ནས་ཁ་ཕྱིར་སྟོན། །རུས་( ལུས་) མེད་ཡིད་ཡུལ་བར་དོར་འཁྱམས། །སྣང་བ་ཆ་གཅིག་སྔོན་མ་ཡི། །བག་ཆགས་ལ་སོགས་ཐལ་ཐོལ་འཆར། །ཆ་གཅིག་མ་འོངས་གང་སྐྱེ་ཡི། །སྐྱེ་གནས་བདེ་སྡུག་ཡིད་ལ་སྐྱེས། །ཆ་གཅིག་ད་ལྟའི་སྣང་བརྙན་ཙམ། །དྲི་ཟའི་བྱ་བ་འབའ་ཞིག་སྤྱོད། །ཆ་གཅིག་ལུང་མ་བསྟན་པ་ཡི། །བག་ལ་ཉལ་དུ་གནས་ཞེས་གསུངས། །དེས་ན་སྲིད་པ་ལུགས་འབྱུང་བས། །སྲིད་པ་བར་དོ་ཞེས་བཤད་དོ། །དེ་ལྟར་བར་དོ་དྲུག་པོ་ཡི། །གདམས་པ་ཉམས་སུ་ལེན་ཚུལ་ནི། །ཐོག་མར་སྐྱེ་གནས་བར་དོའི་དུས། །དང་པོ་བླ་མ་མཚན་ལྡན་བརྟེན། །སྤྱོད་ཚུལ་འདུལ་བའི་གཞུང་ལུགས་ལྟར། །བསླབ་གསུམ་སྡོམ་པ་རྒྱན་བཞིན་དུ། །རྒྱུ་འབྲས་ཡིད་ཆེས་སྤང་དང་བླང་། །ཚུལ་བཞིན་མ་ནོར་སྤྱོད་བྱས་ནས། །དབང་དང་མན་ངག་ལུང་ལག་ལེན། །ཐོས་པས་ཕྱི་ཡི་ཁོང་གྲོལ་བ། །ཐི་བྱ་ཚང་འཇུག་ལྟ་བུ་དེར། །བུང་བས་རྩི་བཞིན་གདམས་པ་ཉན། །ཐོས་ཚད་ཁོང་སྲན་མ་སོང་བ། །བསྐྱེད་དང་རྫོགས་དང་རྫོགས་པ་ཆེ། །ཟུང་འཇུག་རྩ་རླུང་ཐིག་ལེ་སོགས། །ཉམས་ལེན་སྲང་དུ་གཅུན་པ་ནི། །དབེན་པར་རི་དྭགས་ལྟ་བུར་སྤྱོད། །བག་ལ་ཉལ་དང་ཐེ་ཚོམ་རྣམས། །མཚངས་ཡུལ་འདོན་ཅིང་ཆོག་ཤེས་ལྡན། །ཐམས་ཅད་བདེན་མེད་སྒྱུ་མ་ལྟར། །སྨྱོན་པའམ་ནི་མཛེ་སྤྲང་ལྟར། །སྤྱོད་པ་གདར་ཤ་ཆོད་པར་བྱ། །མདོར་ན་རྒྱུད་ལུང་མན་ངག་གི། །དཀྱུས་བཞིན་ཚེ་འདིར་གྲོལ་ནུས་གྱིས། །དེ་ནི་ཚེ་གཅིག་སངས་རྒྱས་པས། །བར་དོ་གཞན་རྣམས་སྨྲོས་ཅི་དགོས། །གལ་ཏེ་ཚེ་འདིར་མ་གྲོལ་ན། །འཆི་ཁ་མན་ངག་བླངས་པར་གསུངས། །དེས་ན་འཆི་བའི་ནད་ཐེབས་ནས། །འཆི་ལྟས་འདི་རྣམས་འོང་བར་གསུངས། །ཕྱི་འབྱུང་ལྔ་པོ་ནང་དུ་ཐིམ། །ནང་འབྱུང་ལྔ་པོ་གསང་འབྱུང་ཐིམ། །གསང་འབྱུང་ལྔ་པོ་ཡོངས་སུ་རྫོགས། །དེ་ཡང་ས་ནི་ས་ལ་ཐིམ་པ་དང་། །དེ་བཞིན་ཆུ་དང་མེ་དང་རླུང་། །སོ་སོར་རང་ལ་ཐིམ་པའི་རྟགས། །སྐྱེས་བུའི་ལུས་ལ་འདི་ལྟར་འོང་། །ཤ་ནི་ས་ལ་ཐིམ་པའི་རྟགས། །ལུས་ནི་ལྗིད་ཅིང་ཟས་མི་ལེན། །ལུས་སྟོབས་འཆོར་ཞིང་ཤེས་པ་རྨུག །ལང་མི་ནུས་པ་ས་རྡོ་འདྲ། །དྲོད་ནི་མེ་ལ་ཐིམ་པའི་རྟགས། །ཁ་སྣ་བསྐམས་ཤིང་ལུས་དྲོད་འཆོར། །ཤེས་པ་རེས་གསལ་རེས་མི་གསལ། །ཕྱི་ནང་བར་གསུམ་དྲོད་རྣམས་འཆོར། །དབུགས་ཉིད་རླུང་ལ་ཐིམ་པའི་རྟགས། །དབུགས་ནི་ངར་ངར་ཡན་ལག་གཡོབ། །མིག་ཀྱང་གྱེན་ལ་ལྡོག་པའོ། །བཀྲག་མདངས་ཐམས་ཅད་ཡལ་གྱུར་ཏེ། །ཟས་ཀྱི་ཐ་མ་དུར་བརྒྱག་ཟ། །གཏམ་གྱི་ཐ་མ་ཁ་ཆེམས་འདྲི། །གཉེན་དང་འཕྲད་ཚེ་ངུ་འབོད་འཇུ། །དེ་འདྲ་འབྱུང་བ་ངོ་ཤེས་སམ། །ཁྲག་རྣམས་ཆུ་ལ་ཐིམ་པའི་རྟགས། །ཁ་ཆུ་སྣ་ཆུ་འཛག་པར་བྱེད། །ཆུ་ངན་མི་ཐུབ་གྲེ་ལྕེ་སྐམ། །མིག་བཟློག་དབུགས་རིང་འདོན་པའོ། །དེ་ཡི་མཐའ་ལ་ཐུག་པའི་དུས། །ཕྱི་དབུགས་ཧར་གྱི་ཆད་ནས་འགྲོ། །དེ་དུས་སྔར་གྱི་མན་ངག་རྣམས། །ཡིད་ལ་དྲན་པ་ཙམ་གྱིས་གྲོལ། །གལ་ཏེ་དྲན་པ་འཐོར་བ་ན། །གྲོགས་ཀྱིས་གསལ་བཏབ་འཕོ་བ་བསྒོམ། །རྒྱས་པར་སོ་སོའི་དཀྱུས་ནས་མངོན། །དེ་དུས་སྣང་བ་འདི་ལྟར་འདུ། །ཕྱི་ཡི་དབང་པོ་དྲན་བྱེད་ཉམས། །མུན་སྲོས་ལྟ་བུ་འུབ་ཀྱིས་ནུབ། །རིག་པ་སྙིང་གི་དཀྱིལ་དུ་བརྒྱལ། །སྨྲ་ཡང་མི་ཤེས་དྲན་བསམ་ཉམས། །འདིའི་སྐབས་ཐིག་ལེ་རྩལ་སྦྱངས་པའི། །དགའ་བཞི་ངོ་སྤྲོད་ཐོབ་པ་རྣམས། །དཀར་དམར་འདྲེས་པའི་བདེ་བ་མྱོང་། །སྐད་ཅིག་དེ་ལ་བདེ་ཆེན་ཐོབ། །བདེ་བ་ཅན་དུ་མངོན་སངས་རྒྱས། །གྲོལ་བར་ཐོབ་པ་གོང་མས་གསུངས། །དེ་ནས་འབྱུང་བ་ཐིམ་བསྡུས་ཏེ། །ལུས་ཀྱི་ཁྲག་རྣམས་ཀུན་འདུས་ནས། །སྲོག་རྩའི་ནང་དུ་ཐིམ་པ་ཡིས། །ཁ་གདངས་མིག་ནི་སྐྱ་ལོག་འགྲོ། །སྣང་བ་ཁང་སྟིབ་ལྟ་བུ་འབྱུང་། །དབུགས་ནི་གྲུ་གང་ཙམ་དུ་ཆད། །དེ་ནས་ཁྲག་ཐིག་གཉིས་བརྒྱབ་པས། །མགོ་དགུག་དབུགས་ནི་མདའ་གང་ཆད། །སྣང་བ་གཉིད་ནི་འཐུག་པོ་འདྲ། །དེ་ནས་ཁྲག་ཐིག་གསུམ་བརྒྱབ་པས། །ཨིག་འབྱིན་མན་བྲུམ་ལུས་ཟུང་ཆད། །སྣང་བ་རྨི་ལམ་སྐྲག་ཚད་འདྲ། །དེ་ནས་ཕྱི་དབུགས་ཀུན་ཆད་ནས། །རིག་པ་སྙིང་དཀྱིལ་ཧྲིག་གེར་སྡོད། །སྣང་བ་ཐོ་རེངས་འོད་གསལ་འདྲ། །འདིའི་སྐབས་ཕྱག་རྒྱ་ཆེན་པོ་དང་། །རྩ་རླུང་ཐིག་ལེའི་ཉམས་འཆར་བས། །སྔོན་གོམས་སྐྱེས་བུ་སྦྱངས་སྟོབས་ཅན། །ངོ་འཕྲོད་སྐད་ཅིག་དེ་རུ་གྲོལ། །ངེས་པར་སངས་རྒྱས་གདོན་མི་ཟ། །དེ་ལྟར་གདམས་པ་མི་ལྡན་རྣམས། །འདི་དུས་འཕོ་བ་འདེབས་པ་དང་། །གསལ་འདེབས་ལམ་བསྟན་མཆོག་ཏུ་གཅེས། །འདི་ཕན་འཆི་ཁའི་བར་དོ་ཟེར། །གང་ཟག་འབྲིང་རྣམས་གྲོལ་བའི་ས། །གསུམ་པ་ཆོས་ཉིད་བར་དོ་ནི། །དེ་ནས་རྣམ་ཤེས་ནམ་མཁར་ཐིམ། །དོན་ལ་རླུང་ལྔ་བྲོས་པ་ཡིས། །ཀུན་ཁྱབ་རླུང་ནི་ནམ་མཁར་ཐིམ། །ཤེས་པ་ནག་ལམ་ཞེས་བྱ་བ། །ཐམས་ཅད་མུན་པ་འབའ་ཞིག་འཆར། །གྱེན་རྒྱུའི་རླུང་ནི་རླུང་ལ་ཐིམ། །སྒྲ་སྣང་འབྲུག་སྟོང་ལྡིར་འདྲ་འོང་། །མེ་མཉམ་རླུང་ནི་མེ་ལ་ཐིིམ། །སྲིན་བུ་མེ་ཁྱེར་ལྟ་བུ་དང་། །འོད་ཟེར་རྣམ་པ་སྣ་ཚོགས་འཆར། །ཐུར་སེལ་རླུང་ནི་ཆུ་ལ་ཐིམ། །སྔོན་པོ་མཚོན་ཆ་སྣ་ཚོགས་དང་། །ཆུ་སོགས་འཇིགས་སྣང་མང་པོ་འཆར། །སྲོག་འཛིན་སའམ་མཁའ་ལ་ཐིམ། །ཐམས་ཅད་སྟོང་རྗེན་ལྷང་ལྷང་དང་། །དཀར་ལམ་དམར་ལམ་འོད་སྣང་མཆེད། །འདི་ནས་དབང་པོའི་སྒོ་སོགས་ནས། །རྣམ་ཤེས་དབྱངས་ཀྱི་མཁའ་ལ་ཐིིམ། །འཇའ་འོད་ཟེར་དང་སྒྲོན་མ་དྲུག །ཐིག་ལེ་ཐིག་ཕྲན་སྣམ་བུ་ལྔ། །རིགས་ལྔ་ཡབ་ཡུམ་ཕྱེད་སྐུ་སོགས། །ཞི་ཁྲོ་ཡོངས་རྫོགས་འཆར་བར་གསུངས། །འདི་དུས་རྫོགས་ཆེན་རྣལ་འབྱོར་རྣམས། །མ་པང་བུ་རྒྱུག་ཨ་ལ་ལ། །ཐེག་དམན་ཕལ་གྱི་རྣལ་འབྱོར་འགའ། །ཐེ་ཚོམ་ལོག་ལྟས་འཁོར་བར་འཆིང་། །དེས་ན་གདམས་པ་འདི་ལ་སྦྱང་། །ཤེས་ལྡན་ཐོད་རྒལ་ཉམས་སུ་ལོངས། །ཆོས་ཉིད་མངོན་གསུམ་མཐོང་ཙམ་ནས། །ངན་སོང་གསུམ་སོགས་འཁོར་བ་རུ། །དམྱལ་མཁན་གྱིས་ཁྲིད་སངས་རྒྱས་ཀྱིས། །དེད་ཀྱང་མཐུར་ལ་ཅི་ཕྱིར་འགྲོ། །དེས་ན་ཉམས་ལེན་དཀྱུས་ལ་དྲིལ། །འདི་ཡི་སྣང་བའི་རྟགས་རྫོགས་ནས། །སྲིད་པ་བར་དོ་ཞེས་གྲགས་ཏེ། །སྣང་ཚུལ་འཆར་ཚུལ་གོང་དུ་ཐལ། །ཞིབ་པར་དགོངས་པ་རང་གྲོལ་སོགས། །གོང་མ་རྣམས་ཀྱི་གསུངས་ལ་ལྟོས། །ཉམས་ལེན་བསྐྱེད་རིམ་གོམས་པ་དང་། །སྒྱུ་མ་སྒོམ་པ་མཆོག་ཏུ་གཅེས། །དེས་ན་ད་ལྟའི་དུས་སུ་ནི། །མེ་ལོང་གཟུགས་ལ་རིག་པ་བཅུག །ལྷ་བསྐྱེད་ཕྱི་སྣོད་སྣང་བ་སྦྱོང་། །བདག་ལུས་སྦྱོང་ཤིང་རྩལ་འབྱིན་ན། །བར་དོའི་སྣང་བ་ལང་ལོང་དང་། །བན་བུན་ཕྱད་ཕྱོད་འཆར་བའི་ཚེ། །སྐད་ཅིག་དེ་ལ་གྲོལ་བར་འགྱུར། །དེས་ན་ད་ལྟའི་སྦྱོང་ཚུལ་ལྟ། །འོན་ཀྱང་དེ་ཡིས་མ་གྲོལ་ན། །ཕ་མ་ལ་སོགས་མཐོང་བའི་ཚེ། །ཡི་དམ་བསྒོམ་མམ་སྒྱུ་མར་བསྒོམ། །ཡང་ན་ཕྱག་ཆེན་ངང་དུ་བཞག །ཐ་མ་རྩ་གསུམ་ར་མདའ་སྦྲེང་། །དེ་ཡིས་མངལ་ཁེག་སངས་རྒྱས་གསུངས། །དེས་ན་བར་དོ་སྦྱངས་ཚུལ་ཡང་། །འདི་ལྟར་ཉིན་མཚན་དུས་ཀུན་ཏུ། །བར་དོའམ་ནི་རྨི་ལམ་ཡིན། །ཐམས་ཅད་སྒྱུ་མ་སྨིག་རྒྱུ་འང་། །བདེན་མེད་ཡིད་ལ་འབྱོངས་པ་དང་། །གང་སྣང་ཐམས་ཅད་ལྷར་མོས་ནས། །མེ་ལོང་ལྷ་ཡི་ས་མ་ཏི། །མ་བརྗེད་ལྷང་ལྷང་སྐྱེ་བར་བྱ། །ལ་ལས་འཁྲིག་པ་སྤྱོད་མཐོང་ཚེ། །ངེས་པར་ཡི་དམ་ཡབ་ཡུམ་བསྒོམ། །དེ་ལ་སྟོང་བ་ཉིད་དང་( ངང་)དུ། །མ་ཡེངས་ལྷམ་མེར་བཞག་པ་གནད། །དེ་བཞིན་རང་ཡང་ཕྱི་རོལ་གྱི། །རྐྱེན་གྱིས་ཆགས་པ་སྐྱེས་བའི་དུས། །ཡི་དམ་མེ་ལོང་བློ་བཞག་ནས། །དཔའ་གདེང་ཕྱག་རྒྱ་ཆེན་པོ་སྟེ། །འདོད་ཆགས་སྤངས་བླངས་མ་བསྒྱུར་བར། །སོ་མ་དེ་ཡི་ངོ་བོ་ལ། །རྗེན་ནེ་ཧྲིག་གེ་མེར་རེ་བཞག །དེ་ཡིས་གྲོལ་བ་ཐོབ་པར་གསུངས། །ཁྱད་པར་དུས་བཞི་གཅན་ཟན་དང་། །རི་དྭགས་གཡུང་དྭགས་འདབ་ཆགས་རྣམས། །འཁྲིག་པ་སྤྱོད་པའི་དུས་དག་ཏུ། །དེ་དག་ཡི་དམ་ཡབ་ཡུམ་བསྒོམ། །ཕྱག་རྒྱ་ཆེན་པོའི་རྒྱས་འདེབས་བྱ། །དེ་ནི་འགྲོ་དོན་མཆོག་ཏུ་སྟེ། །བར་དོའི་མངལ་ཁ་སྟོང་པར་བཤད། །དེས་ན་སྟོན་ཁར་རི་དྭགས་དང་། །དཔྱིད་ཁ་འདབ་ཆགས་དབྱར་གཡུང་དག །དགུན་དུས་གཅན་ཟན་ཐམས་ཅད་དེ། །རིམ་བཞིན་ཡི་དམ་ཡབ་ཡུམ་ནི། །ཟླ་རེར་བསྒོམ་ན་འགྲོ་བའི་དོན། །རླབས་ཆེན་འགྲུབ་སྟེ་དེང་ཕྱིན་ཆད། །བདག་ཀྱང་སྲིད་པར་ངེས་པ་ཉིད། །ཕ་མ་མཐོང་མ་ཐག་ཉིད་དུ། །གྲོལ་བར་གྱུར་བར་གདོན་མི་ཟ། །དེ་བཞིན་རྨི་ལམ་བར་དོ་ནི། །རབ་ཀྱི་རང་བཞིན་ཉམས་ལེན་ལ། །བརྟན་པ་ཐོབ་ཚེ་གྲོལ་འགྱུར་ཏེ། །བར་དོའི་ཚད་ཀྱི་རྨི་ལམ་འཛིན། །ཞེས་གསུངས་འབྲིང་གིས་སྒྱུ་མ་སོགས། །རྨི་ལམ་སྦྱངས་ཐབས་ཀུན་ཏུ་གསལ། །བསམ་གཏན་བསྐྱེད་རྫོགས་རྩ་རླུང་དང་། །རྫོགས་ཆེན་རྫོགས་པ་ཆེན་པོ་སོགས། །གང་བྱེད་དེ་ཡི་ཉམས་སུ་གསལ། །དེས་ན་གསང་སྒྲོགས་འགྲོ་ཉེན་ཆེ། །འདི་ན་ཞིབ་པར་མ་སྨོས་སོ། །འོན་ཀྱང་མན་ངག་གཞུང་ལ་ལྟོས། །དེ་ལྟར་བར་དོའི་དྲི་བ་རྣམས། །ཨོ་རྒྱན་བསྟན་འཛིན་གྱིས་བསྐུལ་ངོར། །གང་འདུག་ས་བོན་མ་ནུབ་ཙམ། །གང་དྲན་བསམ་གཏན་རྡོ་རྗེ་ངས། །རྣམ་སྣང་མི་སྤྱོད་ཕོ་ཕྲང་དུ། །སྦྱར་བས་འགྲོ་ཀུན་གྲོལ་གྱུར་ཅིག །ཅེས་སྨྲས་སོ།། །།