༤༽ སྒྲུབ་པ་ཉམས་སུ་བླངས་པའི་ཐབས་མདོར་བསྟན་པ།
སྒྲུབ་པ་ཉམས་སུ་བླངས་པའི་ཐབས་ལ། མདོར་བསྟན་པ་དང༌། རྒྱས་པར་བཤད་པ་གཉིས་ཀྱི། དང་པོ་ནི། སེམས་ཅན་དམ་པ་བྱང་ཆུབ་མཆོག །འདོད་པར་གྱུར་པ་དེ་དག་ལ། །བླ་མ་རྣམས་ཀྱིས་བསྟན་པ་ཡི། །ཡང་དག་ཐབས་ནི་བཤད་པར་བྱ། །ཞེས་གསུངས་ཏེ། སྲིད་པ་ཐམས་ཅད་སྡུག་བསྔལ་དུ་ཤེས་པས་འཁོར་བ་ལ་མི་གནས་ཤིང༌། རང་གི་ཉམས་ལ་དཔགས་ནས་སེམས་ཅན་འཁོར་བ་ན་འཁྱམས་པ་ལ་མི་བཟོད་པའི་སྙིང་རྗེས་སེམས་ཅན་གྱི་སྡུག་བསྔལ་ཟད་པར་བྱ་བའི་དོན་དུ་འཁོར་བ་མི་འདོར་བས། མྱ་ངན་ལས་འདས་པ་ལ་མི་གནས་པའི་བསམ་པ་ཅན་ཐེག་པ་ཆེན་པོའི་རིགས་ཅན་དུ་གྱུར་པའི་སེམས་ཅན་དམ་པ་སེམས་ཅན་གཞན་འཁོར་བ་ལས་གཏན་ཐར་པའི་རྫོགས་པའི་བྱང་ཆུབ་ལ་འགོད་པ་ལ་རང་ཉིད་ཀྱིས་དེ་ལྟ་བུའི་འཕྲིན་ལས་མཛད་སྤྱོད་པའི་སངས་རྒྱས་ཐོབ་དགོས་པར་ཤེས་པས། འབྲས་བུ་བྱང་ཆུབ་ཀྱི་མཆོག་རྫོགས་པའི་སངས་རྒྱས་ཀྱི་གོ་འཕང་འདོད་པར་གྱུར་པ་དེ་དག་ལ་བླ་མ་དམ་པ་གསེར་གླིང་པ་ལ་སོགས་པ་རྣམས་ཀྱིས་ཇོ་བོ་ཉིད་ལ་ཇི་སྐད་དུ་བསྟན་པ་ཡིན། ཡང་དག་པའི་ཐབས་ཐེག་པ་ཆེན་པོའི་ཕ་རོལ་ཏུ་ཕྱིན་པ་དང༌། གསང་སྔགས་ཀྱི་ཚུལ་ཕྱིན་ཅི་མ་ལོག་པ་དག་ནི་བཤད་པར་བྱ་ཞེས་པ་སྟེ། དེ་ལ་ཤ་ར་བའི་ཞལ་ནས། ཇོ་བོ་རིག་པའི་གནས་ཐམས་ཅད་ལ་སློབ་དཔོན་གྱི་གོ་འཕང་བརྙེས་པ་ལ་སོགས་པ་སྔར་བསྟན་པའི་ཡོན་ཏན་དེ་སྙེད་མངའ་བ་ཡང་ཀ་ཁ་རང་ཡང་ངོས་མི་ཤེས་པ་ཞིག་བླ་མས་ཁ་སློབ་བྱས་པ་འགའ་ལ་རྟེན་པ་སྐད་གསུངས་བ་འདི་ཀུན་ཡང་རང་ཅག་ལ་ཡོན་ཏན་དང་བདེ་བ་ཇི་སྙེད་སྐྱེས་པ་ཐམས་ཅད་བླ་མའི་བཀའ་དྲིན་ཡིན་པས་དེ་ལྟར་ཤེས་ནས་བླ་མ་ལ་བཀའ་དྲིན་རྗེས་སུ་གཟོ་བ་ཡོད་ན་དེ་དག་མ་སྐྱེས་པ་སྐྱེ་ཞིང་སྐྱེས་པ་མི་ཉམས་པར་གོང་ནས་གོང་དུ་འཕེལ། དེ་ལྟར་ཤེས་པ་མེད་པར་རང་སྒོ་ལས་བྱུང་བའམ་ཁ་རྗེ་དང་སྟེས་དབང་ཙམ་དུ་བྱེད་པ་ལ་དེ་དག་སྐྱེ་བ་ཡང་མི་ཡོང༌། སྔར་ཅུང་ཟད་སྐྱེས་པ་ཡོད་ན་ཡང་ཉམས་པར་འགྱུར་བ་ཞིག་ཏུ་བསྟན་པའི་མན་ངག་ཡིན། དེ་བས་ན་ཡོན་ཏན་དང་བདེ་ལེགས་ཐམས་ཅད་བླ་མའི་བཀའ་དྲིན་དུ་ཤེས་པ་ཁམ་པ་ལུང་པ་བཞིན་དུ་བྱེད་དགོས་པ་ཡིན་ཏེ། པུ་ཏོ་བ་འདས་པའི་དུས་མི་ཐམས་ཅད་དེར་བྱའོ། །མི་མང་བའི་སྟོབས་ཀྱིས་ཀ་ཆ་སྤན་སྤུན་ཕྱག་ཏུ་རྙེད་པས། ཁོང་རང་གིས་ཕྱག་རིས་མཛད་དགེ་བཤེས་སྟོན་པའི་ཕྱག་དཔེ་ལ་འབྲུ་ཐུག་མཛད་པའི་བརྒྱད་སྟོང་པས་སྣ་དྲངས་པའི་འབུལ་བ་མང་པོ་དགེ་བཤེས་སྡེངས་པ་ལ་བརྫངས་ནས་རྭ་སྒྲེང་དུ་འབུལ་དུ་བཏང༌། ཤོག་འཕྲིན་གྱི་དབུར། དགེ་བའི་བཤེས་གཉེན་གྱི་བཀའ་དྲིན་གྱིས་དངོས་ངན་པ་ཡང་འཚོ་བ་ངན་ཕྱིད་ཙམ་དུ་མཆིས་བྱ་བ་བྲིས། དགེ་བཤེས་སྟོན་པས་གདན་བཤམས། མཎྜལ་དང་མེ་ཏོག་ཕུལ་ནས་དངོས་སུ་བཞུགས་པས་གཏམ་བཤད་མཛད་པ་བཞིན་དུ་མཛད། ད་ལྟ་ཡོན་ཏན་སྐྱེས་པ་དང་ཅི་ཡང་མེད་དེ། ཅུང་ཟད་སྐྱེས་ཀྱང་བླ་མའི་བཀའ་དྲིན་ཡིན་བྱ་བ་ཁ་ནས་མི་ཐོན་པར། གནམ་ནས་བྱུང་བ་བཞིན་དུ་བྱེད་པ་ལ་ཡོན་ཏན་ཕྱི་མ་སྐྱེ་བ་ཡང་མི་ཡོང་ལ་སྔར་གྱི་ཅུང་ཟད་པོ་དེ་ཡང་ཉམས་ཏེ་ཆ་བ་རྟེན་འབྲེལ་གྱི་ཆེ་བ་ཡིན། དེ་ལྟར་ཡིན་པ་ཡང་ཅིས་ཤེས་ན། རིགས་ངན་གྱི་རྣལ་འབྱོར་པ་ཞིག་ལ་རྫུ་འཕྲུལ་གྱིས་བྱང་གི་སྒྲ་མི་སྙན་ནས་ཤིང་ཐོག་ལེན་ནུས་པའི་མན་ངག་ཡོད་པས། དེས་དེ་ནས་ཤིང་ཐོག་བླངས་ཀྱིན་རྒྱལ་པོ་ལ་ཡང་དབུལ། རང་ཡང་ལོངས་སྤྱོད་པ་ན། བྲམ་ཟེ་ཞིག་ཀྱང་དེ་བཞིན་དུ་བྱེད་པར་འདོད་ནས་དེ་ལ་དེའི་མན་ངག་ཞུས་པ་ལ། འདི་རིགས་བཟང་པོའི་ང་རྒྱལ་གཅོག་ཏུ་མི་འདོད་པས་མན་ངག་བྱིན་ཡང་རྫུ་འཕྲུལ་མི་འཐོབ་སྙམ་ནས་མ་བྱིན་ཟེར་ཏེ། དེ་ཀུན་ཡང་མན་ངག་ཁོ་ན་ཡིན། ང་རྒྱལ་མི་གཅོག་ཅིང་བླ་མ་ལ་དད་གུས་མེད་པ་ལ་ཡོན་ཏན་ཅི་ཡང་མི་སྐྱེ་བ་དགེ་བཤེས་སྟོན་པས་ལྷབ་སྟོན་ལ་ཇོ་བོ་སྟོན་པ་ང་རྒྱལ་གྱི་ལྒང་བུ་ལ་ཡོན་ཏན་གྱི་ཆུ་མི་འབྲུབ་བྱ་བ་གསུངས་པ་བཞིན་དུ་ཡིན། དེར་དེས་ཁྲིའི་རྩར་ཉལ་གྱིན་འདུག་པ་ལ་ནུབ་ཅིག་རྣལ་འབྱོར་པ་དེ་ཆང་གིས་བོགས་ནས་བྱུང་སྟེ་ཁྲི་ལ་ཉལ་ནས་འདུག བྲམ་ཟེ་དེས་ཁྲི་འགྱེལ་དུ་དོགས་ནས་ཁྲིའི་རྐང་པ་ལ་བརྟེན་ནས་ཉལ་བའི་དུས་ན་དེ་སྐྱུགས་པས་བྲམ་ཟེའི་མགོ་ལུས་ཐམས་ཅད་ཁྱབ་པར་གྱུར། ནངས་པར་དེ་མཐོང་བས་གནོང་ཡང་གནོང༌། ད་འདིས་ང་རྒྱལ་ནི་ལེགས་མོར་བཅག་སྙམ་ནས་མན་ངག་བྱིན་པས་རྫུ་འཕྲུལ་ཐོབ་སྟེ་ཤིང་ཐོག་བླངས་ནས་སྔ་མ་བཞིན་དུ་བྱེད་ཀྱིན་ཡོད་པའི་དུས་ན། བྲམ་ཟེ་རྣམས་ཀྱིས་འདིས་རིགས་ངན་འདི་ལ་བླ་མ་བྱས་ཏེ་འོང༌། བླ་མའི་མན་ངག་མེད་པར་ནི་ཡོན་ཏན་སྐྱེ་བ་མི་ཡོང༌། མན་ངག་དེ་ཡོད་པ་ནི་རིགས་ངན་འདི་ལས་མེད་བྱས་ནས་ཞལ་ཆུ་བཏབ་ཟེར་ཏེ་དེ་ཡང་མན་ངག་ཁོ་ན་ཡིན། དེ་ནས་སྐབས་ཤིག་བྲམ་ཟེ་དེ་རང་གི་རིགས་མཐུན་ཚན་ཞིག་གི་ནང་ན་འདུག་པའི་དུས་སུ་རྣལ་འབྱོར་པ་དེ་མཐོང་བའི་ཉེ་འཁོར་དུ་བྱོན་པ་ལ་མངོན་དུ་ལྡང་བ་བྱས་ན་དེ་ལ་བླ་མར་བྱས་པ་ཤེས་ནས་བྲམ་ཟེའི་ཁྱུ་ནས་ཕྱུང་གིས་དོགས་ནས། བསམ་པ་ནི་གུས་པར་བྱས་ལ་མ་ལངས་པས། རྣལ་འབྱོར་པ་དེ་ན་རེ། འུ་ནེའུ་གསིང་ནས་ཤིང་ཐོག་མི་ལེན་གྱི་གསུངས་པ་ལ། དེ་ནས་དེའི་རྫུ་འཕྲུལ་དེ་ཉམས་ནས་ཤིང་ཐོག་ཀྱང་མ་ལོན་བྲམ་ཟེའི་རིགས་ཀྱང་ཉམས་པའི་གཏམ་རྒྱུད་དང༌། སློབ་དཔོན་སངས་རྒྱས་ཡེ་ཤེས་ཀྱིས་སློབ་དཔོན་འཇམ་དཔལ་བཤེས་གཉེན་བྱང་ཕྱོགས་ཀྱི་རྒྱུད་ན་བཞུགས་ཟེར་ནས་ཚོལ་དུ་བྱོན་པ་དང༌། བན་དེ་མོས་སྣ་ཁྲིད་བན་དེས་ཐོང་བ་བཟུང་ནས་ཞིང་རྨོ་བ་ཞིག་དང་མཇལ། ཁྱོད་གར་འགྲོ་ཟེར། སློབ་དཔོན་འཇམ་དཔལ་བཤེས་གཉེན་ཚོལ་དུ་འགྲོ་བྱས་ལ། ད་འདི་ཕན་ཆད་ན་མིས་འཛིན་པ་ཡེ་མེད་ཟེར།དེར་ཞག་ནས་བཞུགས་པ་ན་བན་དེ་ཡིན་པ་ལ་དགོང་མོ་ཚ་བ་བསྐོལ། དེའི་ནང་ནས་སྦལ་ལྗོང་གྱུ་གྱུ་འདུག་པ་འཚེད། དེ་ལྟར་རྟོག་དཔྱོད་ཞུགས་པ་དང༌། དེ་ཉིད་དེ་ཡིན་པར་མཁྱེན། དེར་སློབ་དཔོན་གྱི་ཞལ་ནས་ཁྱོད་ང་ལ་དངོས་གྲུབ་ཞུའམ་རྣལ་འབྱོར་མ་ལ་ཞུ་གསུངས། སློབ་དཔོན་ཉིད་ལ་ཞུ་བྱས་པས་དེ་ཉིད་ནུབ་མོ་དེའི་བྱིན་རླབས་ཀྱིས་དངོས་གྲུབ་ཐོབ་ནས་གསང་བ་འདུས་པའི་ལྷ་ཚོགས་མངོན་སུམ་དུ་གྱུར། ཕྱིས་སློབ་དཔོན་སངས་རྒྱས་ཡེ་ཤེས་འཁོར་ཚན་ཞིག་ལ་ཆོས་གསུངས་ཤིང་བཞུགས་ཙ་ན། དེ་སྤྲང་པོའི་ཆ་ལུགས་སུ་བྱོན་པ་ལ་འཁོར་མ་དད་ཀྱིས་དོགས་ནས་བསམ་པས་གུས་པར་མཛད་ཆོས་ཐུན་བཏང་ལ་བསྙེན་བཀུར་བྱ་དགོངས་ནས་བར་དེར་མ་གཟིགས་པ་བཞིན་མཛད་ནས་སྤྱན་བྱོལ་བས་དེ་ཉིད་དུ་སྤྱན་གཉིས་ས་ལ་ལྷུང༌། དེར་ཤིན་ཏུ་སྐྲག་སྟེ་དེའི་ཕྱི་ནས་སྙེགས་ནས་བཟོད་པ་གསོལ་བ་དང༌། ད་ཁྱོད་ཀྱི་ཆུ་བུར་གྱི་མིག་དེ་གཞུག་ཏུ་མི་བཏུབ་ཡེ་ཤེས་ཀྱི་སྤྱན་ཞིག་སྦྱིན་གསུངས་ནས་དེ་གནང༌། ཐ་མལ་པའི་སྤྱན་ལོང་བ་བཞིན་དུ་བཞུགས་གསུངས་པས་ཤེས་ཏེ། དེ་བས་ན་བླ་མ་རྫུ་འཕྲུལ་ཐོབ་རུང་མ་ཐོབ་རུང༌། སློབ་མས་དེ་ཐོབ་ནས་ནམ་མཁའ་ལ་འགྲོ་བ་ཡིན་ན་ཡང་བླ་མ་མཐོང་བ་ནས་རྫུ་འཕྲུལ་བཤིག་ནས་འགྲོ་དགོས། མ་བཤིག་པར་ཕྱིན་ན་བླ་མའི་ཐད་ཀར་སླེབ་ཙ་ན་ལྟུང་བ་ཆོས་ཉིད་ཡིན་གསུངས། བླ་མས་བསྟན་པའི་ཐབས་ཀྱང་དུས་གསུམ་གྱི་སངས་རྒྱས་ཐམས་ཅད་ཀྱིས་ཐབས་གང་གིས་ཐུགས་བསྐྱེད་པ་བཅོམ་ལྡན་འདས་བྱམས་པའི་མངོན་སུམ་ཡིན། དེས་ཐོགས་མེད་ལ། དེས་དབྱིག་གཉེན་ལ། དེས་བློ་གྲོས་བརྟན་པ་ལ་གནང་བ་ནས་བརྒྱུད་པའི་ཐབས་གསེར་གླིང་པ་ལ་མངའ། དེས་ཇོ་བོ་ལ་གནང་བ་རྫོགས་སངས་བྲིས་སྐུ་ཞེས་པ་ལ་སོགས་པ་རྣམས་ཡིན་པའོ། །