འཇམ་དཔལ་ཡབ་ཡུམ་ལ་བསྔགས་པ་བློ་གྲོས་པད་ཚལ་བཞད་པའི་ཉིན་བྱེད།

༄༅། །འཇམ་དཔལ་ཡབ་ཡུམ་ལ་བསྔགས་པ་བློ་གྲོས་པད་ཚལ་བཞད་པའི་ཉིན་བྱེད། ན་མོ་གུ་རུ་མཉྫུ་ཤྲཱི་སྭ་ར་སྭ་ཏྱཻ། གུར་གུམ་ཆར་གྱིས་འ ཛམ་བུ་ན་དའི་རིར། །ལན་སྟོང་བྱུགས་ལ་བརྒྱ་ཕྲག་ཉི་མའི་གཟིས། །འཁྱུད་མཚུངས་ནང་གི་མུན་སེལ་སྨྲ་བའི་རྒྱལ། །སྙིང་གི་པདྨོར་འབྲལ་བ་མེད་པར་མཛོད། ༡ །ཟག་བྲལ་ལང་ཚོས་དུད་པའི་སྨིན་ལེགས་མ། །གཟུངས་སྤོབས་བློ་གྲོས་བྱེ་བའི་འཇོ་སྒེག་གིས། །བརྩེ་དགའི་དུས་སྟོན་སྦྱིན་མཛད་དབྱངས་ཀྱི་རྒྱལ། །མགྲིན་པའི་འོ་མཚོར་རྟག་པར་རྩེན་མཛོད་ཀྱཻ། ༢ །ཕུལ་བྱུང་རྒྱལ་ཀུན་མཁྱེན་རབ་ཡེ་ཤེས་མཆོག །སྣང་སྟོང་ཐབས་ཤེས་དྲྭ་བའི་སྒྱུ་འཕྲུལ་ཆེའི། །མཚན་སྙན་ངོ་མཚར་ནོར་བུའི་ཏམ་བུ་ར། །ཞིང་ཁམས་རྒྱ་མཚོར་རྣ་བའི་བཅུད་ལེན་ཉིད། །སྤྱན་ལྔ་རྣམ་པར་དག་པས་གཟིགས་པའི་ཁྱོན། །གང་ན་འཕགས་བཞིའི་ཕྲེང་བ་མཆིས་དེ་ཀུན། །གཞར་ཡང་ཁྱོད་ཀྱིས་མ་བསྐྲུན་སྲིད་མིན་ཡང་། །བཅུ་དྲུག་ལང་ཚོ་ཡོལ་བ་མེད་དེ་མཚར། ༤ །རྟག་ཏུ་ཞི་ཡང་འབར་བ་ཆེན་པོའི་མདངས། །མཚན་དཔེ་ཚ་ཟེར་བྱེ་བའི་གཟི་འོད་ཀྱིས། །ས་གསུམ་རྨོངས་པའི་བུད་ཤིང་ཀུན་ཟོས་ཀྱང་། །ཡིད་སྲུབ་སྙིང་ལ་རྣག་དཀའི་མུན་པར་གྱུར། ༥ །ཡུན་རིང་འགྲོགས་ཀྱང་ལྷན་སྐྱེས་དགྲར་གྱུར་པས། །ཉེས་བརྒྱའི་འབྲས་མང་སྙིང་ལ་སྦྱིན་བྱེད་པའི། །འདོད་སྲེད་མ་རིག་ལྟ་བའི་མྱུ་གུའི་རྒྱུན། །གཅོད་པའི་མཚོན་རྣོན་གདེངས་འདི་རང་གཤིས་ལགས། ༦ །ཀུན་མཁྱེན་མཛོད་དུ་ཆུད་གྱུར་ཤེས་བྱའི་དངོས། །སོ་སོ་ཡང་དག་རིག་བཞིའི་ལྡེའུ་མིག་མཆོག །སྦྱིན་ལ་ལེན་པོ་སུ་ཞེས་དུས་ཀུན་ཏུ། །ཡང་ཡང་གླེགས་བམ་གཏོད་འདི་མ་འཚལ་ནོངས། ༧ །དབྱངས་གཅིག་ཡན་ལག་རྒྱ་མཚོར་སྒྲོགས་པའི་སྒྲས། །འགྲོ་ཚོགས་དུས་གཅིག་སློང་བའི་རྣམ་དཔྱོད་དཔལ། །ཐོས་ཚེ་བདག་སྐྱེས་མི་སྨྲའི་བརྟུལ་ཞུགས་ཀྱིས། །སྒྲ་འཛིན་བརྒྱད་ཀྱིས་ཉན་ལ་སོམ་ཉི་ཅི། ༨ །རྟག་ཏུ་ཆོས་ཀྱི་དབྱིངས་ལ་མཉམ་བཞག་ཀྱང་། །ཤེས་བྱར་སྲིད་ཚད་མཁྱེན་པ་གཅིག་གིས་བཟུང། །རྡུལ་ཙམ་སྲིད་ཞིའི་མཚན་མ་མ་དམིགས་མོད། །བརྩེ་བའི་སྤྱན་རས་ཡིད་ཅན་ཀུན་ལ་བཙའ། ༩ །ཐབས་མཁས་འཕྲུལ་གྱི་ཞགས་པ་གདེངས་ཙམ་གྱིས། །ས་གསུམ་ཡུད་ཀྱིས་འཆིང་ནུས་རྣམ་དཔྱོད་མཐུས། །རང་གི་ངན་གཡོ་འཕྱེ་བོར་བྱས་མཐོང་ནས། །གླང་རྫི་ཕག་པའི་གཟུགས་ཀྱིས་ཡིབ་པར་ངེས། ༡༠ །བྲལ་སྨིན་ཡོན་ཏན་འབུམ་གྱི་ཕུང་པོ་ཆེ། །ནམ་མཁའི་མུ་ཁྱུད་ར་བར་མ་ཤོངས་ནས། །འཁོར་འདས་བརྟན་གཡོ་ཀུན་གྱི་ཆོས་ཉིད་ཀྱི། །གཤིས་ལུགས་ཡོངས་ལ་མཉམ་པར་ཞུགས་དེ་མཚར། ༡༡ །སྲིད་པའི་དམ་བཅའ་མིང་ཙམ་གཏང་ནུས་ཕུལ། །ཐུགས་བསྐྱེད་བརྩོན་པའི་རླབས་ཆེན་ཕྲིན་ལས་ཀྱི། །ཕ་མཐར་འཁྱོང་སྐབས་དབེན་ཞེས་ལྷས་རྩེན་མ། །སྐྱེངས་ནས་རྒྱུ་སྐར་ཚོགས་བཅས་འདར་བ་འདྲ། ༡༢ །རྫ་མཁན་ལྟ་བུར་བྱེད་པོར་རློམ་པ་ཡི། །དགྲ་སྟྭའི་དུམ་བུས་སྔོན་ཆད་མེས་པོའི་གདོང་། །བཅད་པའི་ལེ་ལན་དེ་རིང་བཅོམ་མོ་ཞེས། །སློང་ཕོར་ལག་ཏུ་ཐོགས་ནས་རྒྱུ་མིན་ནམ། ༡༣ །དུས་གསུམ་གཤེགས་པའི་མི་མཆོག་སྲས་བཅས་ཀྱི། །རྣམ་ཐར་རྒྱ་མཚོ་འདི་ཡིས་བཟུང་གཟིགས་ནས། །ཏིལ་གྱི་གོང་བུ་ལྟ་བུའི་བཀོད་པ་ཡིས། །འཁོར་གྱི་དཀྱིལ་འཁོར་ཡོངས་སུ་མཛེས་པར་བྱས། ༡༤ །ལྷ་བརྒྱའི་གཙུག་གི་ནོར་བུའི་ཅོད་པཎ་གྱིས། །ཞབས་སེན་འཆར་ཀའི་ཟླ་གཞོན་མཛེས་པ་དང་། །ཆབས་ཅིག་རིག་འཛིན་གྲུབ་པའི་ཚོགས་རྣམས་ཀྱི། །སོར་བཅུའི་ཆུ་སྐྱེས་སྤྱི་བོར་ཟུམ་པར་བྱེད། ༡༥ །མགོ་སྐྱེས་ཙམ་པ་ཀ་ཡི་ལ་ཐོད་ཀྱིས། །ཆེས་ག ནོན་ཀུན་རྨོངས་དྲྭ་བས་ཡིད་ཁེབས་ཀྱང་། །རིག་པ་ཉིན་ཞག་གཅིག་ཙམ་གོམས་བྱས་པའི། །ཡོན་ཏན་ཆུ་ལྷའི་ལྕེས་ཀྱང་གཞལ་བྱ་ཅི། ༡༦ །མཆོག་བྱིན་བདུད་རྩིའི་ཟེགས་མའི་ཆ་ཤས་ཙམ། །མྱོང་བའི་སྐལ་བཟང་ཐོབ་པའི་མཁས་མང་གི། །ཞབས་སེན་མཐོན་ཀས་རེག་པའི་ས་ལའི་ལྗོངས། །དགའ་བ་བརྒྱ་ལྡན་གྲོང་ལས་བསྔགས་འོས་ཉིད། ༡༧ །སྣང་བར་བྱས་སོ་གངས་ཅན་མཚོ་ཡི་ཞིང་། །གང་གི་གསང་གསུམ་སྒྱུ་འཕྲུལ་རོལ་མོས་ཏེ། །ཁྱོད་སྲས་འཕགས་དང་མཁས་པའི་སྐྱེ་བོ་ཡིས། །སྔོན་མེད་གཙུག་ལག་བྱེ་བའི་སྒོ་འཕར་ཡང་། ༡༨། འཇིག་རྟེན་སྣང་བྱེད་སྒྲོན་མ་མང་བྱོན་ཀྱང་། །མཆོག་གི་རྣམ་ཐར་ཟབ་མོར་འཇུག་ནུས་སུ། །ནོར་འཛིན་རྐང་འཐུང་ཕྲེང་བས་གཡོགས་མོད་ཀྱི། །འཆི་མེད་ལྗོན་པའི་དཔལ་དེ་གཉིས་པ་མིན། ༡༩ །ཡིད་ཀྱི་ཤིང་རྟ་འགེངས་པའི་དཔལ་ཁོ་ནས། །ཁྱོད་དང་མནྡ་ར་མཚུངས་བརྗོད་མིན་ཏེ། །འབད་སོགས་རྣམ་རྟོག་རྩོལ་བས་གོས་མིན་པར། །ཕན་བདེའི་གྲིབ་བསིལ་ཤིན་ཏུ་སྣུམ་འདིས་ཀྱང་། ༢༠ །ལྷ་ལ་ལྷ་ཡི་དཔག་བསམ་ཡོངས་འདུའི་ལྗོན། །ཀླུ་ལ་ཀླུ་ཡི་ནོར་བུ་མཐོན་ཀའི་དཔལ། །བདག་ལ་བདག་གི་སྐྱབས་གཅིག་ངག་དབང་ལྷ། །གང་ལ་གང་འདོད་སྩོལ་ལ་མཚུངས་པ་ཉིད། ༢༡ །དེ་སླད་རྟག་པར་རེ་བའི་བུས་པ་བདག །སྙན་ཚིག་མེ་ཏོག་གསར་པའི་ཁྲོད་ཕྱིན་ནས། །དད་པའི་ལག་པས་ཕྲེང་བར་བསྟར་བ་འདི། །ཡུས་པའི་ཚུལ་གྱིས་རིངས་པར་འབུལ་གྱི་བཞེས། ༢༢ །སྔོན་ཆད་མ་འཚལ་བཞིན་དུ་ནོངས་པའི་གཡས། །རིགས་ཁམས་ཆོས་ཉིད་རྣམ་དག་བུམ་བརྒྱ་སྐྱེས། །བསླད་གང་གདུང་བའི་ང་རོས་སྙིང་ནས་མཐོལ། །བྱམས་ཆེན་ཕ་མས་དེ་རིང་སྦྱོང་བར་མཛོད། ༢༣ །ཤ་ཟ་རྣམས་ཀྱང་བུ་ལ་བརྩེ་བྱེད་ན། །མ་བཅོལ་ལེགས་པར་མཛད་པའི་མགོན་ཟུང་གིས། །ཉེས་བརྒྱའི་གཅན་གཟན་འཁྲུགས་པའི་ནགས་ཁྲོད་དུ། །བུ་སྡུག་ཁ་འོ་ཙ་རེ་འདོར་ཕོད་དམ། ༢༤ །ཡོན་ཏན་ལུས་ཤེད་མ་རྫོགས་འཁྱོལ་བའི་འགྲོས། །འདིར་སྣང་འཇའ་ཚོན་རི་མོས་བསླུས་པའི་གར། །དྲན་ཤེས་རྒན་པོའི་མིག་ལྕིབ་འགེབས་ཚེ་ཡང་། །ཉེས་ལྟུང་སྦབ་ལ་འཆལ་འདི་མ་གཟིགས་སམ། ༢༥ །ལས་སྒྲིབ་ལྕི་བས་ཉིན་མཚན་དུས་དྲུག་ཏུ། །གདུང་བའི་འོ་དོད་ཁྱེད་ལ་འབོད་བྱེད་ཀྱི། །ལས་ངན་ཟད་ན་གསོལ་ཡང་ཅི་ཞིག་འཚལ། །བྱམས་པའི་ཕྱག་ཡངས་ད་ནི་རྐྱོང་རན་ལགས། ༢༦ །ཡིད་འོང་ཉི་མ་འཆར་ཀའི་གཟི་བྱིན་ཅན། །མཚན་དཔེ་འོད་རིས་བྱེ་བས་འཁྱུད་པའི་གར། །བལྟ་བས་མི་ངོམས་སྙིང་གི་གདུང་སེལ་དེ། །མངོན་སུམ་མིག་གི་བདུད་རྩིར་སིམ་པར་མཛོད། ༢༧ །མིའམ་ཅི་མོ་སྟོང་གི་གླུ་དབྱངས་ཀྱིས། །མཚོན་མིན་ཀུན་རྨོངས་གཉིད་ལ་ཡོལ་བའི་འགྲོ། །ཅིག་ཅར་སད་བྱེད་ཚངས་ཆེན་རྔ་སྒྲའི་གསུང་། །མ་བསྐལ་ཐོས་འཛིན་དཔྱིད་དུ་སྨིན་པར་མཛོད། ༢༨ །གློ་བུར་ཀུན་རྟོག་སྤྲོས་དང་མཛའ་མིན་པའི། །རྡོ་རྗེ་ནམ་མཁའི་དཀྱིལ་ལྟར་རྣམ་དག་ཐུགས། །མཁྱེན་བརྩེ་འོད་ཟེར་བརྒྱ་པའི་ཐུར་མ་ཅན། །བདག་གི་ཡིད་ལ་མྱུར་དུ་འཇུག་པར་མཛོད། ༢༩ །ལེགས་བཤད་མཐོ་རིས་ཀླུང་གི་རྒྱུན་བཟང་པོས། །ཉེས་བཤད་དུག་ཅན་བུ་ཡི་འཆིང་བའི་དྲི། །ཡོངས་གཞིལ་རིས་མེད་ཐུབ་བསྟན་དག་བྱེད་གཏེར། །རབ་སྤེལ་འཆད་པའི་བློ་གྲོས་བདག་ལ་སྩོལ། ༣༠ །ལུང་རིགས་ཚད་མ་གསུམ་གྱི་ང་རོའི་སྒྲས། །རྒོལ་ངན་གཉིས་འཐུང་སྟོང་གི་ཀླད་རྒྱ་དབྲལ། །བསྙེངས་བྲལ་ངེས་གསང་མཆོག་བསྟན་གངས་རིའི་ངོགས། །རབ་བསྒྱིངས་རྩོད་པའི་སྤོབས་པ་བདག་ལ་སྩོལ། ༣༡ །དོན་བཟང་འཁྲུལ་པ་ཀུན་བྲལ་མ་ཎི་ཀ{ཀཿའདིའི་རིགས་འདི་ལྟར་ཞུས། } །སྡེབ་ལེགས་གསེར་གྱི་སྐུད་པར་བརྒྱུས་པའི་ཕྲེང་། །མཁས་མང་མགྲིན་པའི་རྒྱན་དུ་ཆེར་འོས་པའི། །ཕུལ་བྱུང་རྩོམ་པའི་རྣམ་དཔྱོད་བདག་ལ་སྩོལ། ༣༢ །མདོར་ན་འཕགས་མཆོག་འཇམ་མགོན་ཡབ་ཡུམ་གྱི། །གསང་མཛོད་མཆོག་དང་མཉམ་པ་ཉིད་གྱུར་ནས། །ཇི་སྲིད་སྲིད་པ་གནས་པ་དེ་སྲིད་དུ། །ས་གསུམ་སྣང་བའི་ཉི་མར་བདག་སྒྱུར་ཅིག ༣༣ །ཅེས་པའང་འཇམ་དཔལ་ཡབ་ཡུམ་གྱི་རིགས་སྔགས་ལ་གུས་པ་ལྷུར་ལེན་པའི་ཟེ་ཆེན་པ་འཇམ་དབྱངས་བློ་གྲོས་རྒྱ་མཚོ་དབྱངས་ཅན་དགྱེས་པའི་སྡེས་དུས་ཚེས་དགེ་བར་འབྲུ་མར་གྱི་སྣང་བ་ལ་བརྟེན་ནས་སྦྱར་བ་སརྦ་དཱ་ཀ་ལྱཱ་ཎཾ་བྷ་ཝ་ཏུ།༷
༄༅། །ན་མོ་མཉྫུ་ཤྲཱི་ཡེ། སྲས་བཅས་རྒྱལ་བའི་མཁྱེན་རབ་གསེར་སྦྱངས་ཁམས། །གཅིག་ཏུ་བསྡུས་པའི་ཉིང་{སྙིང་འདིའི་རིགས་འདི་ལྟར་ཞུས། }ཁུ་ལས་ཕྱུང་བ། །དྲན་པས་བདེ་སྟེར་མཚུངས་མེད་ཆོས་ཀྱི་རྗེ། །སྨྲ་བའི་སེང་གེ་མཆོག་ལ་མ གོས་ཕྱག་འཚལ། །མ་ལུས་རྒྱལ་ཀུན་བསྐྱེད་པའི་ཡབ་གྱུར་ཀྱང་། །ཀུན་ཏུ་བཅུ་དྲུག་གཞོན་ཚུལ་ཉམས་པ་མེད། །མིག་ལ་ཟླ་བ་ཡིད་ལ་བདུད་རྩིའི་རྒྱུན། །སྨྲ་བའི་རྒྱལ་པོ་ཁྱོད་ལ་མགོས་ཕྱག་འཚལ། །མཚན་དཔེའི་འདབ་སྟོང་བཞད་པའི་གེ་སར་རྩེར། །ཟུར་ཕུད་ནོར་བུའི་ཅོད་པཎ་རབ་གཡོ་ཞིང་། །ལྷ་ཡི་ཆ་ལུགས་ལྷ་ལས་ཁྱད་འཕགས་པ། །སྨྲ་བའི་ཉི་མ་ཁྱོད་ལ་མགོས་ཕྱག་འཚལ། །ལུས་ཅན་སྲིད་རྩ་གཅོད་པའི་མཚོན་ཆེན་དང་། །གཟུངས་སྤོབས་བློ་གྲོས་མཆོག་སྦྱིན་པུསྟིཀཿ། །དཔུང་པའི་འཁྲི་ཤིང་རྩེ་ན་མངོན་མཛེས་པ། །སྨྲ་བའི་ཟླ་བ་ཁྱོད་ལ་མགོས་ཕྱག་འཚལ། །མི་འཇིགས་གདོང་ལྔས་བཏེགས་པའི་ཁྲི་ལ་འགྱིང་། །ཆེ་བའི་ཡོན་ཏན་དར་དང་རཏྣས་སྤྲས། །ལན་ཅིག་དྲན་པས་སྙིང་གི་མུན་སེལ་བ། །སྨྲ་བའི་དབང་ཕྱུག་ཁྱོད་ལ་མགོས་ཕྱག་འཚལ། །བ་སྤུའི་ཁུང་བུ་གཅིག་གི་ཡོན་ཏན་མཐའ། །ངག་གི་རང་བཞིན་གྲུབ་པས་བསྐལ་མང་དུ། །བརྗོད་ཀྱང་ཆ་ཙམ་དཔོག་མིན་བདག་ལྟས་ཅི། །ཡོན་ཏན་བསམ་མི་ཁྱབ་ལ་མགོས་ཕྱག་འཚལ། །འཕགས་བཞི་སྐྱེད་ཡུམ་ཤེས་རབ་ཕ་རོལ་ཕྱིན། །གང་འདུལ་མཚན་དཔེར་སྣང་བ་ངག་གི་ལྷ། །ཉེས་བརྒྱའི་གདུང་བ་བཅིལ་བའི་བསིལ་ཟེར་དབང་། །འཕགས་མ་སྒྲ་དབྱངས་ལྷ་མོར་མགོས་ཕྱག་འཚལ། །དབང་སྔོན་ཞུན་མས་བྱུགས་འདྲའི་མེ་ན་ཀ །འཛུམ་ཁྲོ་ཆགས་པའི་ཉམས་ཀྱིས་སྒེག་པའི་གར། །གང་གིས་དྲན་ལ་སྣང་བ་མཆོག་སྟེར་མ། །དབྱངས་ཅན་ངག་གི་དཔལ་མོར་མགོས་ཕྱག་འཚལ། །སྣང་སྟོང་སྒྱུ་འཕྲུལ་དྲྭ་བའི་བཀོད་པ་ཡིས། །ཞིང་ཁམས་རྒྱ་མཚོར་སངས་རྒྱས་མཛད་པ་སྒྲུབ། །མ་ལུས་འགྲོ་བའི་སྐྱབས་གཅིག་མཚུངས་པ་མེད། །ལྷག་པའི་ལྷ་མཆོག་ཁྱོད་ལ་མགོས་ཕྱག་འཚལ། །སྲིད་ཞིའི་ཁོངས་སུ་རྣམ་མང་འབྱོར་པའི་སྤྲིན། །ཇི་སྙེད་མཆིས་ཀུན་བློ་ཡིས་ཡོངས་བསྡོམས་ཏེ། །ལྷ་མཆོག་དགྱེས་པའི་དཔྱིད་དུ་འབུལ་ལགས་ན། །ཀུན་བཟང་རྣམ་ཐར་རྒྱ་མཚོར་འཇུག་གྱུར་ཅིག །ཐོག་མེད་བསགས་པའི་སྒྲིབ་གསུམ་མུན་པའི་དཔུང་། །རང་བཞིན་མེད་རྟོགས་ནོར་བུའི་སྒྲོན་མ་ཡིས། །རབ་བསལ་རིགས་ཁམས་ཡོན་ཏན་འབྱོར་པའི་གཏེར། །མ་སྒྲིབ་དོན་གཉིས་སུག་རྩེར་སྨིན་གྱུར་ཅིག །རྒྱལ་དང་རྒྱལ་སྲས་འཕགས་དང་སྐྱེ་བོ་ཡི། །དུས་གསུམ་བྱས་བསགས་རྣམ་དཀར་ཇི་སྙེད་པ། །ཡི་རང་ནོར་བུའི་ཞགས་པས་གཅིག་བསྡམས་པས། །ཚོགས་གཉིས་བྲེ་ཁ་ཡོངས་སུ་འགེངས་གྱུར་ཅིག །ལམ་ཞུགས་རྣམས་ཀྱི་ལམ་གྱི་གེགས་བསལ་ཞིང་། །ལམ་མ་ཞུགས་ལ་ཐར་པའི་ལམ་སྟོན་ཕྱིར། །ལམ་བདེན་བདུད་རྩིའི་གྲུ་ཆར་འཇོ་གསོལ་ན། །ཞིང་ཁམས་རྒྱ་མཚོར་ཆོས་སྤྲིན་མཛེས་གྱུར་ཅིག །སྐྱེ་འཇིག་མཚན་མས་གཞར་ཡང་གོས་མིན་པའི། །ཡེ་ཤེས་སྐུ་མཆོག་མཚན་དཔེའི་ཉིན་མོར་བྱེད། །ལོག་རྟོག་སྤྲིན་གྱིས་ནམ་ཡང་སྒྲིབ་མིན་པར། སྲིད་པ་ཇི་སྲིད་འགྲོ་ལ་སྣང་གྱུར་ཅིག །ལེགས་བྱས་ཆུ་ཐིགས་དམིགས་པའི་དུག་སྤང་སྟེ། །དམིགས་མེད་ཆོས་དབྱིངས་རྒྱ་མཚོར་བསྔོ་བགྱིད་ན། །འཇམ་མགོན་ཀླུ་ཡི་དབང་པོས་ཉེར་བཟུང་བའི། །རྣམ་ཐར་ཟབ་མོར་རོ་གཅིག་འདྲེས་གྱུར་ཅིག །དེའི་མཐུས་སྐྱེ་དང་ཚེ་རབས་ཕྲེང་བ་རུ། །འཇམ་མགོན་ཡབ་ཡུམ་ཞབས་སྐྱེས་ནོར་བུའི་རྡུལ། །སྤྱི་བོས་ལེན་པའི་སྐལ་བཟང་ཡོལ་མིན་པར། །སྲས་བཅས་རྒྱལ་བའི་ཕྲིན་ལས་སྒྲུབ་པར་ཤོག །གང་ཚེ་བལྟ་དང་འདྲི་བར་འདོད་པའི་ཚེ། །གེགས་མེད་འཇམ་མགོན་ཡབ་ཡུམ་གཉིས་མཐོང་ནས། །ཐོགས་མེད་བློ་དང་འཛད་མེད་གཟུངས་སྤོབས་ཀྱིས། །ངེས་དོན་ཆོས་ཀྱི་རྒྱལ་སྲིད་སྐྱོང་ནུས་ཤོག །འཆད་ལ་མི་སྐྱོ་གང་སྨྲས་གཞན་དོན་འགྱུར། །རྩོད་ལ་མི་འཇིགས་རྒོལ་ངན་ལོག་རྟོག་ཆོམས། །རྩོམ་ལ་མི་ངལ་ཐུབ་བསྟན་སྲིད་མཐར་གསལ། །དོན་གཉིས་བསམ་ཀུན་འགྲུབ་པའི་བཀྲ་ཤིས་སྩོལ། །ཞེས་པའང་ལྷག་པའི་ལྷ་འདི་ཉིད་ཀྱི་བསྙེན་སྒྲུབ་ལ་གཞོལ་བའི་ཚེ་འཇམ་དབྱངས་བློ་གྲོས་རྒྱ་མཚོས་བྲིས་ཤིང་གསོལ་བ་བཏབ་པ་སིདྡྷི་རསྟུ།