འཇམ་དཔལ་དཀར་པོ་ལ་བསྟོད་པ་ཟླ་བ་བདུད་རྩིའི་ཟིལ་ཐིགས།
༄༅། །འཇམ་དཔལ་དཀར་པོ་ལ་བསྟོད་པ་ཟླ་བ་བདུད་རྩིའི་ཟིལ་ཐིགས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཤེས་དང་ཤེས་བྱའི་ཆོས་ཀུན་རོ་མཉམ་པའི། །མཁའ་ཁྱབ་མཁའ་ཡི་རྡོ་རྗེའི་ཡེ་ཤེས་ནི། །སྲིད་ཞིར་མི་གནས་སྒྱུ་འཕྲུལ་དྲྭ་བ་ཆེ། །འཇམ་དཔལ་ཡེ་ཤེས་སེམས་དཔས་དགེ་ལེགས་སྩོལ། ༡ །སྣང་སྟོང་ཟུང་འཇུག་སྤྲོས་པ་བྲལ་བའི་གཤིས། །རྣམ་ཐར་གསུམ་ལྡན་དབུ་མ་ཆེན་པོ་ཚུལ། །རྟེན་འབྱུང་མ་འགགས་ཕྱག་རྒྱའི་དཀྱིལ་འཁོར་ཆེར། །རྣམ་པར་འཕྲུལ་བའི་ཚུལ་ལ་བསྔགས་པར་བགྱི། ༢ །ལྷ་དང་དྲང་སྲོང་གྲུབ་པའི་སྐྱེད་མོས་ཚལ། །ཐལ་དཀར་གླང་པོས་བརྟེན་པའི་ཉམས་དགའི་གཞིར། །པད་ཟླུམ་དྲྭ་བས་མཛེས་པའི་འོ་མའི་མཚོ། །བརྟན་གཡོའི་མཛེས་ཆོས་མཐའ་དག་སྤུངས་པ་བཞིན། ༣ །གསེར་སྦྱངས་ཐགས་སུ་བསྐྲུན་པའི་པདྨ་དཀར། །དམར་སེར་ཟེའུ་འབྲུས་སྒེག་སྟེང་རི་བོང་ཅན། །རབ་མཛེས་གདན་གྱི་ཁྱད་པར་འདི་ཁོ་ན། །སོ་སྐྱེའི་བསོད་ནམས་ཟོང་གིས་ཁུག་བྱ་མིན། ༤ །སྐྱེ་མེད་ཡི་གེ་ལས་འཁྲུངས་རྒྱལ་བའི་སྐུ། །ཟུང་བཞིའི་ན་ཚོད་མཆོག་སྦྱིན་ཨུཏྤལ་བསྣམས། །དུ་མའི་རྒྱན་སྤྲས་རྡོ་རྗེ་སྐྱིལ་ཀྲུང་བཞུགས། །མཐོང་ཐོས་དྲན་པས་རྨོངས་བློའི་མུན་སེལ་རྨད། ༥ །ཟླ་གཞོན་བྱེ་བའི་ཁུ་བས་ཏི་སེའི་རི། །ལན་སྟོང་བྱུགས་ལ་བརྒྱ་ཕྲག་བཅུ་གཉིས་ཀྱི། །མཚན་དཔེའི་རི་མོ་མ་འདྲེས་བཀྲ་གྱུར་ན། །གང་སྐུ་མཛེས་པའི་སྤུན་ཟླར་རུང་བར་སེམས། ༦ །བཅུ་ཕྲག་དྲུག་གི་ཡོན་ཏན་རྫོགས་གྱུར་ཀྱང་། །མ་རིག་གཉིད་ལ་ཡོལ་བའི་འགྲོ་མང་ཁམས། །དུས་གཅིག་སློང་བའི་ཁྱད་ཆོས་འདི་མེད་ཕྱིར། །ཚངས་པའི་ངག་གིས་གང་གསུང་འགྲན་ནུས་མིན། ༧ །གཏིང་མཐའ་མི་དཔོག་སྐྱེ་འགག་མཚན་བྲལ་བའི། །ལྷས་རྩེན་མ་འདི་ཁྱོད་ཐུགས་དཔེར་བྱར་མོད། །ཟབ་གསལ་མཁྱེན་བརྩེའི་ཡེ་ཤེས་འདིས་བཏང་རྒྱུས། །རྣམ་པ་ཀུན་ནས་ནམ་ཡང་མཚུངས་མ་ལགས། ༨ །བེམ་པོའི་རང་བཞིན་ལག་འགྲོས་བདག་ཏུ་བཟུང་། །སྲིད་པའི་འབྱོར་བ་ཟག་བཅས་དམན་པའི་རྒྱུ། །དེ་སླད་འཇོག་པོའི་གཙུག་གི་ནོར་བུ་ཡིས། །ཁྱོད་ཀྱི་ཡོན་ཏན་ཆ་ཙམ་འགྲན་ནུས་མིན། ༩ །འཕོང་སྐྱེན་ར་མ་ཎ་ཡི་ཉག་ཕྲན་གྱིས། །ཆ་ཙམ་མཚོན་མིན་གང་གི་ཕྲིན་ལས་མདའ། །གང་ལ་རེག་དེས་ཤེས་བྱར་འཁོན་པའི་དགྲ། །མིང་གི་ལྷག་མར་བྱེད་ལ་སུ་ཡིས་བསྙོན། ༡༠ །མུ་མེད་སྲིད་མཚོར་བྱིང་བའི་ཉམ་ཐག་འགྲོ། །ལུས་པ་མེད་པར་འབྱིན་པའི་དམ་བཅའི་གོ །དཔའ་བོ་ཁྱོད་གཅིག་ཁོ་ནས་བཞེས་ཞེས་གྲགས། །དེ་སླད་དཔེ་དང་བྲལ་གང་ཆོས་ཉིད་ལགས། ༡༡ །བློ་ཆེན་ཀུན་ཏུ་བཟང་དང་སྤྱན་རས་གཟིགས། །དཔའ་བོ་གང་ལ་གུས་པའི་བརྟུལ་ཞུགས་ཀྱིས། །རྔ་ཡབ་ནོར་བུའི་མཚན་པས་བསྙེན་བཀུར་ན། །སྲིད་ཞིའི་ཁོངས་ན་ཁྱོད་དང་མཉམ་པ་སུ། ༡༢ །འཆི་མེད་གྲུབ་པའི་རིག་འཛིན་གཞོན་ནུ་ཡིས། །ལྷ་རྫས་མེ་ཏོག་ཆར་གྱིས་མཆོད་མཐོང་ནས། །ལྷ་སོགས་འཇིག་རྟེན་སྐྱོང་བ་ཆེ་དགུ་ཡིས། །གཙུག་ནོར་དཔལ་གྱིས་ལན་སྟོང་བསྙེན་པ་འདྲ། ༡༣ །སྲིད་ཞིའི་མཆོད་སྡོང་མཚུངས་ཟླས་དབེན་གང་ལ། །རིག་འཛིན་གྲུབ་པས་བསྙེན་ལ་མི་མཚར་ཡང་། །ལན་གཅིག་ཐོས་པས་སྲིད་ལམ་རྒྱུན་གཅོད་པའི། །གང་མཚན་ཐོས་པའི་འགྲོ་རྣམས་སྐལ་བཟང་ཉིད། ༡༤ །ཁྱབ་པར་དཀྲིགས་སོ་ཞིང་ཁམས་རབ་འབྱམས་ན། །ཁྱོད་ཀྱི་ཡོན་ཏན་བསྔགས་པའི་ཕྲེང་བས་ཏེ། །མི་མཛེས་འཇིག་རྟེན་བྱེ་བ་ཕྲག་བརྒྱ་རུ། །ཁྱོད་སྲས་མཁས་དང་གྲུབ་པའི་ཕྲེང་བས་ཀྱང་། ༡༥ །རིགས་སྔགས་རྒྱལ་པོ་ཅུང་ཟད་བཟླས་པའམ། །གུས་པའི་ཡིད་ཀྱིས་ཡུད་ཙམ་བཏུད་གྱུར་ཀྱང་། །ཡིད་ལ་ཐོ་རེངས་དུས་ཀྱི་དགའ་བ་བཞིན། །སྣང་བ་དམ་པས་འཇིག་རྟེན་མཛེས་པར་བྱེད། ༡༦ །སྙིང་དབུས་ཟླ་འཁོར་རྣོ་ལྡན་རྩིབས་དྲུག་པ། །དཀར་གསལ་གཟུངས་སྔགས་གཡས་གཡོན་དྲག་བསྐོར་བས། །ཉེས་འཇོམས་བློ་རྣོ་སྟོབས་ལྡན་འཛིན་སོགས་ཀྱི། །ཡོན་ཏན་ཕུང་པོ་སུག་མཐིལ་གཏེར་བཞིན་འབྱིན། ༡༧ །གྲེ་ཕུག་ཨཱཿདཀར་འཕྲོ་འདུའི་འོད་ཟེར་གྱིས། །སྲས་བཅས་རྒྱལ་བའི་མཁྱེན་རབ་ཀུན་བསྡུས་བཅུད། །ཡི་གེའི་ཕྲེང་བས་ལུས་ཀུན་འགེངས་བྱས་པའི། །དགེ་མཚན་མི་བརྗེད་གཟུངས་ཀྱི་འདོད་པ་འཇོ། ༡༨ །མཐེ་བོང་རལ་གྲིས་མཚན་པའི་ལས་སྦྱོར་གྱིས། །ཕས་རྒོལ་བློ་གྲོས་རང་དབང་མེད་པར་འཕྲོག །སྨྲ་བྱེད་དུམ་བུར་གཏུབ་པའི་ངོ་མཚར་གྱིས། །ཕྱོགས་ལས་རྣམ་རྒྱལ་གྲགས་པའི་རྔ་གསང་སྙན། ༡༩ །མཱ་ཤའི་སྦྱོར་བ་འཆི་མེད་བཅུད་ལེན་གྱིས། །རྒ་དང་རྒུད་པའི་གདུང་བ་ཀུན་བཅིལ་ནས། །ཕུལ་བྱུང་བློ་གྲོས་གཟུངས་སྤོབས་སྒོ་འབྱེད་པའི། །ལེགས་བྱས་ནམ་མཁའི་མུ་ཁྱུད་ར་བ་བརྒལ། ༢༠ །གཞན་ཡང་རྫས་སྔགས་ཏིང་འཛིན་དམིགས་པའི་འཕྲུལ། །དུ་མའི་དཔལ་གྱིས་གྲུབ་གཉིས་འདོད་དགུའི་ཆར། །ཅི་དགར་འཇོ་བའི་ཡིད་བཞིན་རིན་ཆེན་སྤྲིན། །སེམས་ཤེས་སྐྱེ་བོ་ཡོད་ན་མི་བརྟེན་སུ། ༢༡ །དེ་སླད་བདག་བློ་ཀུ་མུཏ་གསར་པའི་ཕྲེང་། །དད་པའི་འདབ་མ་རྣམ་པར་གཡོ་བྱེད་ན། །འཇམ་མགོན་ཟླ་བ་རྒྱས་པའི་དཀྱིལ་འཁོར་དགོངས། །བྱིན་རླབས་བདུད་རྩིའི་ཟེར་ཐིགས་དེང་སྩོལ་ཅིག ༢༢ །ཐོས་བསམ་སྒོམ་པའི་ཀེ་སར་ཆེས་མཐོ་ཞིང་། །འཆད་རྩོད་རྩོམ་པའི་ཟིལ་དངར་འབུམ་ཕྲག་འཇོ། །འཁོར་ལོ་གསུམ་གྱི་འདབ་ཕྲེང་ཁྱོན་ཡངས་པོས། །ཐུབ་བསྟན་མཚོ་ཆེན་མཛེས་པའི་རྒྱན་དུ་ཤོག ༢༣ །སྐྱེ་བ་ཀུན་ཏུ་རྗེ་བཙུན་མཁྱེན་པའི་གཏེར། །མི་འབྲལ་དགེ་བའི་བཤེས་སུ་ཉེར་ཐོབ་ནས། །འཇིག་རྟེན་འཇིག་རྟེན་འདས་པའི་དགེ་མཚན་གྱིས། །དོན་གཉིས་བསམ་ཀུན་ཡིད་བཞིན་འགྲུབ་གྱུར་ཅིག ༢༤། བཀྲ་ཤིས་ཀུན་གྱི་འབྱུང་གནས་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་ཆེན་པོ་མཆོག །འཇམ་དཔལ་ཡང་དག་དོན་གྱི་བཀྲ་ཤིས་ལྷས། །ཕྱོགས་དུས་ཀུན་ཏུ་བཀྲ་ཤིས་འཕེལ་བྱེད་ཤོག ༢༥ །འཇམ་དབྱངས་བླ་མས་རྗེས་བཟུང་ཞིང་། །འཇམ་དབྱངས་མགོན་ལ་རབ་དད་པའི། །འཇམ་དབྱངས་བློ་གྲོས་རྒྱ་མཚོས་བྲིས། །འཇམ་དབྱངས་ཤེས་རབ་ཐོབ་པར་ཤོག།
༄༅། །ན་མོ་གུ་རུ་མཉྫུ་ཤྲཱི་ཡེ། རིག་སྟོང་ཟུང་འཇུག་ཆོས་དབྱིངས་མཉམ་པ་ཉིད། །གློ་བུར་འཁྲུལ་པའི་སྦུབས་རྒྱ་ལས་གྲོལ་བའི། །ཟག་མེད་ཡོན་ཏན་བགྲེས་རྒུད་བྲལ་བའི་དཔལ། །འཇམ་པའི་དབྱངས་ལ་རྟག་པར་ཕྱག་བགྱིའོ། ༡ །ཁྱོད་ནི་འགྲོ་ཀུན་སེམས་ཀྱི་ཆོས་ཉིད་དེ། །སྟོང་པའི་དབྱིངས་དང་ཡེ་ནས་འདུ་འབྲལ་མེད། །འདི་ཞེས་མི་མཚོན་བྱིས་བློའི་སྤྱོད་ཡུལ་ཅི། །ཟབ་པའི་ཚུལ་དེ་ཁྱོད་ཀྱི་རང་གཤིས་ལགས། ༢ །འོད་གསལ་རང་མདངས་ཉི་དང་འོད་ཟེར་བཞིན། །ཟག་མེད་ཡོན་ཏན་བྱེ་བའི་ལང་ཚོ་ཡིས། །རྟག་ཏུ་འཁྱུད་ཀྱང་བུམ་ནང་མར་མེ་བཞིན། །སྒྲིབ་པས་བསྒྲིབས་ཏེ་མ་མཐོང་ཀྱེ་མ་མཚར། ༣ །སྟོང་པར་གཞིག་ཀྱང་སྣང་བའི་གཤིས་ལུགས་ཉིད། །སྣང་བར་སྒྲུབ་ཀྱང་སྟོང་པའི་རང་བཞིན་དངོས། །ཇི་ལྟར་དཔྱད་ཀྱང་ཆོས་དབྱིངས་གཅིག་གི་ངང་། །ཟུང་འཇུག་ཀློང་དུ་དགག་སྒྲུབ་མཚན་མ་ཅི། ༤ །མ་བརྟགས་ཉམས་དགའ་ཀུན་རྫོབ་སྣང་བའི་ཆོས། །བརྟགས་ན་མ་གྲུབ་སྒྱུ་མ་ཆུ་ཟླའི་ཚུལ། །ནན་གྱིས་བརྟགས་ན་སྤྲོས་མཚན་དབྱིངས་སུ་ཐིམ། །བརྟག་བྱ་མེད་ལ་རྟོག་བྱེད་ཇི་ལྟར་ཡོད། ༥ །བདེན་པ་གཉིས་ཀྱང་བརྡ་ཙམ་ཐ་སྙད་ཙམ། །འདི་ཞེས་མི་མཚོན་ཚིག་གི་བརྗོད་པས་ཅི། །བསམ་མི་ཁྱབ་ལ་ཇི་ལྟར་བསམ་པར་ནུས། །བརྗོད་མེད་ཀློང་དུ་འཁོར་འདས་ཆོས་ཀུན་འུབ། ༦ །དེ་ཚུལ་མ་རྟོགས་ཀུན་རྟོག་སྐྲ་ཤད་ཀྱིས། །སྒྲིབ་པའི་འགྲོ་ལ་དམིགས་མེད་སྙིང་རྗེའི་གདངས། །སྒྱུ་མ་ལྟ་བུར་ཚོགས་གཉིས་གོམས་པའི་མཐུས། །མིག་འཕྲུལ་བཞིན་དུ་ལམ་ཀུན་བགྲོད་དེ་མཚར། ༧ །མཐར་ཐུག་ཤེས་དང་ཤེས་བྱ་རོ་མཉམ་པའི། །མི་ཕྱེད་ཐུགས་ཀྱི་རྡོ་རྗེ་བདེ་བ་ཆེ། །ངེས་དོན་འཇམ་དཔལ་དཔའ་བོ་མངོན་གྱུར་ནས། །མུ་མཐའ་ཁྱབ་པའི་འགྲོ་ཀུན་སྒྲོལ་བར་ངེས། ༨ །དེ་སྐད་འཇམ་པའི་རྡོ་རྗེའི་རིགས་སྔགས་ལ། །གུས་པ་ལྷུར་ལེན་བློ་གྲོས་རྒྱ་མཚོའི་སྡེས། །གྲུབ་པའི་སྦྱོར་བར་མདོ་ཙམ་བརྗོད་པ་སྟེ། །དགེ་བས་སྤོོབས་པའི་གཏེར་བརྒྱད་གྲོལ་གྱུར་ཅིག །