རྗེ་བཙུན་སྒྲོལ་མ་ལ་གསོལ་བ་འདེབས་པ་འཇིགས་བརྒྱད་སྐྱོབ་པའི་མཁར་རྫོང་།

༄༅། །རྗེ་བཙུན་སྒྲོལ་མ་ལ་གསོལ་བ་འདེབས་པ་འཇིགས་བརྒྱད་སྐྱོབ་པའི་མཁར་རྫོང་བཞུགས། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། རབ་འབྱམས་སྲས་བཅས་རྒྱལ་བའི་ཕྲིན་ལས་གཅིག་བསྡོམས་གར། །ངོ་མཚར་སྐུ་དང་རྣམ་འཕྲུལ་བསམ་མི་ཁྱབ་པའི་སྤྲིན། །ཆོས་དབྱིངས་དང་མཉམ་དྲན་པས་འཇིགས་ཀུན་འཕྲོག་མཛད་མ། །དཔལ་མོ་ཁྱོད་ལས་སྐྱབས་གཞན་མ་འཚལ་དེ་སླད་དགོངས། །དྭངས་པའི་ཡིད་མཁའ་སེང་ལྡེང་ནགས་ཚལ་འཁྲིགས་པའི་དབུས། །པད་ཟླའི་སྟེང་ན་སེམས་སྐྱིལ་གྱིས་བཞུགས་རྗེ་བཙུན་མ། །ལྗང་སེར་མཛེས་འཛུམ་ཨུཏྤལ་ལེགས་འཛིན་སྤྲུལ་ཚོགས་བཅས། །ཁྱོད་ལ་འདུད་དོ་འཇིགས་དང་སྡུག་བསྔལ་ཀུན་སྐྱོབས་ཤིག །རབ་ཏུ་བརྗིད་ལྡན་སེང་གེའི་ཞལ་གདངས་མཆེ་གཙིགས་ཤིང་། །གློག་དམར་འཁྱུགས་འདྲའི་ལྗགས་བསྐྱོད་དམར་བའི་སྡང་མིག་གཡོ། །དམར་སེར་རལ་བའི་སྤྲིན་འཁྲིགས་མི་འཇིགས་ཕྱག་རྒྱ་ཅན། །ཁྱོད་ལ་འདུད་དོ་སེང་གེའི་འཇིགས་ལས་དེང་སྐྱོབས་ཤིག །གཉིས་འཐུང་ཞལ་ལྡན་ཤངས་མཐོ་མཆེ་བ་རྣམ་པར་གཙིགས། །མི་བསྲུན་དུ་བའི་མདོག་འཆང་གསུས་པ་རྣམ་པར་འཕྱང་། །ཕྱག་གཉིས་མཐེ་བོང་བརྐྱང་ཞིང་སྡིགས་ཚུལ་འཇིགས་མཛད་མ། །ཁྱོད་ལ་འདུད་དོ་གླང་པོའི་འཇིགས་ལས་དེང་སྐྱོབས་ཤིག །དུས་མཐའི་ཞུགས་ཀྱིས་མེ་མཚོན་འབར་བའི་སྡང་མིག་ཅན། །བདུན་ཕྲག་ཞལ་དང་ལྗགས་ལྡན་དབུ་སྐྲ་གྱེན་དུ་འབར། །རྒྱན་གྱིས་རྣམ་བརྒྱན་ཐབས་ཤེས་པདྨའི་ཕྱག་རྒྱ་མཛད། །ཁྱོད་ལ་འདུད་དོ་མེ་ཡི་འཇིགས་ལས་དེང་སྐྱོབས་ཤིག །མིག་སྨན་མདངས་འཛིན་བཅུ་ཕྲག་བྲང་འགྲོའི་གདེངས་ཀ་ཅན། །ཤིན་ཏུ་མཛེས་པའི་སྐྲ་གྲོལ་རྒྱན་གྱིས་རྣམ་པར་བརྒྱན། །འགྲོ་བ་ཀུན་ལ་མི་འཇིགས་སྦྱིན་པའི་ཕྱག་རྒྱ་མཛད། །ཁྱོད་ལ་འདུད་དོ་སྦྲུལ་གྱི་འཇིགས་ལས་དེང་སྐྱོབས་ཤིག །ཨིཎྜའི་མདོག་འཆང་འཇིགས་ཚུལ་ཁྲོ་གཉེར་བསྡུས་པའི་ཞལ། །དབུ་སྐྲ་གྱེན་བརྫིས་ཕྱག་གཡས་རལ་གྲི་འབར་བ་གདེངས། །གཡོན་པ་སྡིགས་མཛུབ་བཞེངས་སྟབས་རྒྱན་གྱིས་བརྒྱན་པའི་སྐུ། །ཁྱོད་ལ་འདུད་དོ་ཆོམ་རྐུན་འཇིགས་ལས་དེང་སྐྱོབས་ཤིག །རྒྱ་སྐྱེགས་ཁུ་བ་ལན་སྟོང་བྱུག་འདྲའི་མྱུར་མཛད་མ། །ཕྱག་གཡས་ལྕགས་སྒྲོག་དང་ནི་གཡོན་པས་ཞགས་པ་འཛིན། །རྒྱན་གྱི་ལེགས་བརྒྱན་འགྲོ་ལ་བརྩེ་བས་བཞེངས་སྟབས་ཅན། །ཁྱོད་ལ་འདུད་དོ་ལྕགས་སྒྲོག་འཇིགས་ལས་དེང་སྐྱོབས་ཤིག། རབ་དཀར་ཟླ་བ་བྱེ་བའི་ལང་ཚོས་མཚོན་མིན་སྐུ། །བཞེངས་སྟབས་མཆོག་ཏུ་ཞི་ཞིང་འཛུམ་པའི་མདངས་དང་ལྡན། །ཕྱག་གཡས་ལྕགས་སྒྲོག་ལེགས་བསྣམས་གཡོན་པ་སྡིགས་མཛུབ་མཛད། །ཁྱོད་ལ་འདུད་དོ་ཆུ་ཡི་འཇིགས་ལས་དེང་སྐྱོབས་ཤིག །ཁ་བ་དུང་དང་པད་རྩའི་རྗེས་འགྲོ་སེམས་སྐྱིལ་ཅན། །ལྷ་ཡི་ཆ་ལུགས་ལྷ་ལས་ཁྱད་འཕགས་སྒེག་པའི་སྐུ། །ཕྱག་གཡས་མཆོག་སྦྱིན་གཡོན་པས་མི་འཇིགས་ཕྱག་རྒྱ་མཛད། །ཁྱོད་ལ་འདུད་དོ་ཤ་ཟའི་འཇིགས་ལས་དེང་སྐྱོབས་ཤིག །གཞན་ཡང་གང་འདུལ་སྒྱུ་འཕྲུལ་བཀོད་པ་བསམ་ཡས་ཀྱིས། །འགྲོ་ཚོགས་སྡུག་བསྔལ་གསུམ་གྱི་ཚ་དབལ་གཏན་བཅིལ་ནས། །ཕན་བདེའི་འདོད་པ་འཇོ་བའི་འཕགས་མ་ཚེ་སྦྱིན་མ། །ཁྱོད་ལ་འདུད་དོ་བྱང་ཆུབ་བར་དུ་རྗེས་སྐྱོངས་ཤིག །ཐེག་མཆོག་རིགས་སད་མཐུན་རྐྱེན་འཁོར་ལོ་བཞི་ཡིས་འབྱོར། །འཕགས་ནོར་བདུན་ལྡན་སྒྲུབ་ལ་བརྩོན་ཞིང་དམ་ཆོས་འཕེལ། །རྟག་པར་ཁྱོད་བསྒྲུབ་ཞལ་མཐོང་སྟོང་ཉིད་ལྟ་བ་རྟོགས། །བྱང་ཆུབ་སེམས་མཆོག་ཡར་ངོའི་ཟླ་ལྟར་འཕེལ་བར་མཛོད། །ཕྱི་ནང་བཀྲ་ཤིས་སྣོད་བཅུད་རྟེན་འབྲེལ་གཅིག་ཏུ་འཚོགས། །དུས་གསུམ་བཀྲ་ཤིས་ཐོག་མཐའ་བར་གསུམ་ཀུན་ཏུ་དགེ། །བསླབ་གསུམ་བཀྲ་ཤིས་ལུང་རྟོགས་ཡོན་ཏན་འབྱོར་པས་ཕྱུག །རྣམ་ཀུན་བཀྲ་ཤིས་དོན་གཉིས་བསམ་ཀུན་འགྲུབ་གྱུར་ཅིག །ཅེས་པའང་རབ་ཚེས་ལྕགས་ཁྱི་ནག་པས་ཉ་བའི་དམར་ཕྱོགས་ཀྱི་དགའ་བ་གཉིས་པར་བཙུན་པ་གཞན་ཕན་ཆོས་ཀྱི་བློ་གྲོས་ཀྱིས་གསོལ་བ་བཏབ་པ་སིདྡྷི་རསྟུ།