བདེ་བར་གཤེགས་པའི་མཛད་པ་བཅུ་གཉིས་ལ་མདོ་ཙམ་བསྔགས་པ་གསེར་གྱི་པད་མོ་རབ་ཏུ་རྒྱས་པ་རིན་པོ་ཆེའི་འཁྲི་ཤིང་།

༄༅། །བདེ་བར་གཤེགས་པའི་མཛད་པ་བཅུ་གཉིས་ལ་མདོ་ཙམ་བསྔགས་པ་གསེར་གྱི་པད་མོ་རབ་ཏུ་རྒྱས་པ་རིན་པོ་ཆེའི་འཁྲི་ཤིང་ཞེས་བྱ་བ། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་གི་ཐུགས་ནི་སྙིང་རྗེའི་དབང་གྱུར་བསྐལ་པ་བྱེ་བ་སྟོང་དག་ཏུ། །འགྲོ་ལ་ཕན་པ་རྒྱ་ཆེན་སྒྲུབ་མཛད་རྩོད་པའི་དུས་འདིར་བྱང་ཆུབ་ནས། །ཕས་རྒོལ་ཚར་བཅད་ཐེག་གསུམ་དམ་ཆོས་སེང་གེའི་སྒྲ་དབྱངས་ཆེར་བསྒྲགས་པ། །འཇིག་རྟེན་གསུམ་མགོན་ཐུབ་པ་མཆོག་གི་ཞབས་ལ་མགོ་བོས་ཕྱག་བྱས་ནས། ༡ །ཕྱོགས་བཅུའི་འདྲེན་པ་སྲས་དང་བཅས་པས་གང་གི་བསྔགས་བརྗོད་དབྱར་གྱི་རྔ། །ཆོས་ཀྱི་དབྱིངས་ཀུན་ཁྱབ་པར་སྒྲོགས་ལས་ཆ་ཙམ་ཐོས་འཛིན་དཔྱིད་སོན་པས། །རབ་ཏུ་དགའ་བའི་བདག་བློ་རྨ་བྱ་དད་བརྒྱའི་སྤུ་ལོང་གཡོ་བཞིན་དུ། །ངོ་མཚར་བཅུ་གཉིས་མཛད་པའི་བསྟོད་དབྱངས་ཟློས་གར་ཅིར་ཡང་བསྒྱུར་ལ་སྤྲོ། ༢ །བྱང་ཆུབ་སྤྱོད་པའི་ཆ་ཤས་ཡོངས་གང་དམ་པ་ཏོག་དཀར་རི་བོང་འཛིན། །རྒྱལ་སྲས་རྒྱུ་སྐར་ཕྲེང་བའི་དབུས་མཛེས་དགའ་བ་བརྒྱ་ལྡན་ཀུན་གསལ་ངོགས། །དམ་ཆོས་བདུད་རྩིའི་འོད་དཀར་འབུམ་ཕྲག་ཆེས་ཆེར་སྤྲོས་པའི་དཔལ་ཡོན་གྱིས། །རྣམ་སད་ཀུ་མུ་ད་ཡི་ཕྲེང་ཚོགས་ཐལ་གྲོལ་ཀེ་སར་དགོད་པར་གྱུར། ༣། གང་གི་དགྱེས་སྤྱན་འཛུམ་པའི་མདའ་རྣོན་རྣམ་ལྔའི་འབེན་ལ་ཆགས་པ་དང་། །ཆབས་ཅིག་བརྩེ་ཆེན་ཐུགས་རྗེའི་སྤྲིན་ཕུང་གདུལ་བྱའི་ཞིང་ལ་གཡོ་བ་ཡིས། །འདུས་པའི་ཚོགས་རྣམས་དབུགས་དབྱུང་སེང་གེའི་སྒྲ་བསྒྲགས་མ་ཕམ་མགོན་པོའི་དབུར། །རིན་ཆེན་ཅོད་པཎ་བཅིངས་དང་རྒྱལ་ཚབ་མཆོག་ཏུ་མངའ་གསོལ་ལྷན་ཅིག་བྱས། ༤ །ཟླ་གཞོན་བྱེ་བ་བཞུས་པའི་ཁུ་བས་བྱེད་པོས་ལན་སྟོང་བྱུག་པ་ལྟའི། །མཆེ་བ་དྲུག་ལྡན་གཉིས་འཐུང་ཟོལ་གྱིས་ལྷ་མོ་སྒྱུ་འཕྲུལ་ལྷུམས་ཞུགས་ནས། །དྲི་མེད་མངལ་རྒྱ་བཻཌཱུར་གཙང་མར་སྒྲིབ་བྲལ་ངོ་མཚར་མཚན་དཔེའི་སྐུ། །ཞབས་ཟུང་རྡོ་རྗེའི་མདུད་པ་ལེགས་བསྐྱིལ་འགྲོ་མང་ཐེག་གསུམ་ལམ་བཀོད་མཚར། ༥ །དད་བརྒྱའི་བདུད་རྩིས་རབ་མྱོས་བྱེད་པོས་སྟོང་གསུམ་ཟིལ་དངར་རོ་བཅུད་འབུམ། །གཅིག་ཏུ་བསྡོམས་པའི་སྲི་ཞུས་འགྲོ་བའི་བླ་མ་བསྙེན་ལ་མི་མཚར་ཡང་། །བསོད་ནམས་བྱེ་བ་འབུམ་གྱིས་བསྐྲུན་པའི་གང་སྐུ་ཟླ་བཅུར་འཛིན་ནུས་པའི། །བསགས་པ་མཆོག་གྱུར་ཡུམ་གྱི་ལྟོ་བ་མཆོག་དེ་ཨེ་མ་བསྔགས་པར་འོས། ༦ །གློ་གཡས་རྩིབ་མའི་སྤྲིན་དཀར་གསེབ་ལས་མཛེས་སྐུ་སྔོན་མེད་ཉིན་མོར་བྱེད། །འགྲོ་བསོད་ཡངས་པའི་མཁའ་ལ་མངོན་སྣང་ཕན་བདེའི་སྣང་བ་འབུམ་ཕྲག་གིས། །གྲོང་ཁྱེར་དྲུག་གི་སྡུག་བསྔལ་མུན་ཚོགས་ཆེས་ཆེར་བསལ་དང་ཆབས་ཅིག་པར། །ལྷ་ཀླུ་འཇིག་རྟེན་སྐྱོང་བ་རྣམས་ཀྱི་གཙུག་གི་ནོར་བུས་ཞབས་ལ་གཏུགས། ༧། དགེ་ལེགས་ཚོགས་གཉིས་བྱེ་བའི་ཚོང་ཟོང་གིས་བསྐྲུན་རྒྱལ་མཆོག་ཡིད་བཞིན་དབང་། །སྲིད་ན་མངོན་སྣང་སྐྱེ་དགུའི་རྒུད་པའི་དབུལ་བ་མ་ལུས་སེལ་ལོ་ཞེས། །ཡ་མཚན་རྨད་བྱུང་གྲགས་པའི་ཕྲེང་བ་རབ་འབྱམས་ཞིང་ན་སྒྲོགས་སླད་དུ། །ངོ་མཚར་མཚན་མ་བྱེ་བ་ཁྲག་ཁྲིག་འབུམ་ཕྲག་ཅིག་ཅར་དགོད་པ་བཞིན། ༨ །བསྙེངས་བྲལ་མཁས་པ་སེང་གེ་ལྟར་གཤེགས་དབུགས་དབྱུང་ངོ་མཚར་སྒྲ་བསྒྲགས་ཚེ། །དོན་ཀུན་གྲུབ་པ་རྒྱལ་བའི་སྲས་ཀྱི་གྲགས་པའི་ཕྲེང་བས་ཆོས་དབྱིངས་ཀུན། །ཁྱབ་པར་དཀྲིགས་པའི་དགེ་མཚན་ཤིན་ཏུ་ལྕི་བའི་ཁུར་གྱིས་དུབ་པ་ཡི། །ཆུ་གཏེར་བཞི་ཡི་སྐ་རགས་ལེགས་བཅིངས་ནོར་འཛིན་འཁུན་བཅས་འདར་བ་འདྲ། ༩ །གང་གི་མཐུ་ཡིས་གཏུམ་པོ་རྣམས་ཀྱང་ཐུབ་པ་བཞིན་དུ་ཞི་གྱུར་ཅིང་། །ཤཱཀྱ་འཕེལ་བྱེད་གནོད་སྦྱིན་གཙུག་ནོར་ཞབས་སེན་མཛེས་པའི་རྒྱན་གྱུར་ཚེ། །དཀའ་ཐུབ་གྲུབ་པ་ཉོན་མོངས་མེད་ཀྱི་འབྱུང་འགྱུར་བསྔགས་པའི་ཨུཏྤལ་ཕྲེང་། །ཆེས་ཆེར་འཐོར་བྱས་དེ་ཡི་ལྕེ་ཡང་བསྐལ་པ་བཟང་གྱུར་དོན་ལྡན་ཉིད། ༡༠ །ཤེས་བྱའི་ཆུ་ཀླུང་བྱེ་བ་ཕྲག་བརྒྱ་ཐུགས་མཚོར་རོ་གཅིག་བསྡོམས་བྱས་རྒྱུས། །སྔོན་མེད་བཟོ་དང་སྒྱུ་རྩལ་འབུམ་གྱི་གཏེར་ཁ་གསར་བཞད་རྣམ་དཔྱོད་ཀྱིས། །དྲེགས་ལྡན་སྐྱེ་ཤིང་བརྒྱ་ཡི་ཁེངས་པའི་ཡལ་འདབ་ས་ལ་བསྙིལ་བ་ལ། །རྒྱུ་སྐར་ཕྲེང་བས་ཡོངས་མཛེས་སྔོ་བསངས་བུ་མོ་འཕྱ་བས་དགོད་པ་འདྲ། ༡༡། གང་ཞིག་སྟོན་མཚན་དྭངས་པའི་མཁའ་ལ་རྒྱུ་སྐར་ཁྲོད་ན་ཟླ་བ་བཞིན། །བརྒྱད་ཁྲི་བཞི་སྟོང་བཙུན་མོའི་འཁོར་གྱིས་མཆོད་ལ་རྩེ་ཞིང་རོལ་བ་གང་། །འཆི་མེད་དབང་པོའི་འདུན་ས་དག་དང་མཚུངས་མོད་འདི་ཡི་ཡོན་ཏན་གྱིས། །འཁོར་རྣམས་བྱང་ཆུབ་མཆོག་ལ་ཡོངས་སུ་སྨིན་པར་མཛད་དེས་ཁྱད་པར་བྱས། ༡༢ །རྣམ་བཞིའི་གཟིགས་པ་མ་ལ་ཡ་ལས་ལེགས་འོངས་དྲི་ཡི་བཞོན་པ་ཡིས། །སྔོན་སྨོན་ཐུགས་བསྐྱེད་བཙན་པོའི་བ་དན་གཅིག་ཏུ་བསྐུལ་བའི་དགེ་མཚན་གྱིས། །འགྲོ་ཀུན་སྲིད་པའི་ཆུ་གཏེར་ལས་སྤྲོས་སྔོན་མེད་རིན་ཆེན་གྲུ་གཟིངས་མཆོག །སྒྲ་མེད་མི་གཡོ་ཞི་བའི་ནགས་སུ་མངོན་དུ་གཤེགས་ལ་ཕྱོགས་པར་གྱུར། ༡༣ །ཤཱཀྱ་རྣམས་ཀྱིས་ངལ་བརྒྱས་སྲིད་ན་འཆིང་བའི་ཆོ་ག་མངོན་བརྩམ་ཡང་། །བསྐལ་མང་ཚོགས་གཉིས་འབྲས་བཟང་དུས་སུ་སྨིན་ལ་སུ་ཡིས་འགོག་པར་ནུས། །གཟའ་བྲལ་རྒྱུ་སྐར་ཁྲོད་ན་ཟླ་བཞིན་རྣམ་པ་དབྱེ་བས་ཡོངས་བསྐོར་ཏེ། །མཁའ་ངོས་འཇའ་སྤྲིན་ལམ་ལས་རྣམ་དག་དྲུང་གི་ས་གཞིར་གཤེགས་པར་གྱུར། ༡༤ །མཁའ་ལྟར་སྔོ་བའི་རལ་གྲིས་སྟང་ཟིལ་མདངས་འཕྲོག་དབུ་སྐྱེས་ཆུན་པོ་དང་། །ཆབས་ཅིག་སྲིད་རྩ་གཟུང་འཛིན་འཆིང་བའི་དྲྭ་བ་མ་ལུས་བཅད་བྱས་ནས། །གསེར་སྦྱངས་ཐགས་སུ་བསྐྲུན་པའི་རྣམ་གསུམ་ཆོས་གོས་གསར་པའི་བགོ་བ་དང་། །ཉེས་ཚོགས་ཚད་གཞིལ་ཚུལ་ཁྲིམས་གཙང་མའི་རྒྱན་མཆོག་གསོལ་བ་ལྷན་ཅིག་མཛད། ༡༥ །བླུན་པོ་དག་གི་ཚེ་གང་སྒྲུབ་པའི་ཏིང་འཛིན་འཆིང་བུའི་འཕྲེང་བ་དག །མཁས་པས་ཡུད་ཀྱིས་བདག་གིར་མཛད་ནས་ནཻརཉྫནའི་ཀླུང་ངོགས་སུ། །ཤིན་ཏུ་རྣམ་དཀའི་དཀའ་ཐུབ་ལོ་དྲུག་སྤྱད་དང་འགྲོལ་བར་མཛད་པར་ཡང་། །མཐའ་གཉིས་སྤངས་པའི་ལམ་ལ་འགྲོ་རྣམས་བཀོད་སླད་ཐབས་མཁས་མཛད་པ་ལགས། ༡༦ །སྔོན་རབས་དུས་ནས་བསོད་ནམས་ལ་གུས་ཞིང་བའི་བུ་མོས་འོ་ཐུག་གི། །བསྙེན་བསྐུར་སྟོབ་པའི་དགེ་མཚན་གཟི་ཡིས་གསེར་སྦྱངས་བརྟན་པ་འཕྲོག་པའི་སྐུ། །ཕུལ་བྱུང་མཚན་དཔེའི་རི་མོ་བརྒྱ་དང་བཅུ་གཉིས་ཀུན་ནས་སྣང་བའི་དཔལ། །ཕན་ཚུན་ལང་ཚོའི་དྲེགས་པས་འགྲན་པ་བཞིན་དུ་ལྷན་ཅིག་སྒེག་པར་གྱུར། ༡༧ །མི་བསྐྱོད་སྟབས་སོགས་ལྔ་བཅུ་གཅིག་གིས་བྱང་ཆུབ་སྙིང་པོ་ལ་གཤེགས་ཚེ། །ས་ཆེན་འཇིག་རྟེན་སྙན་པའི་སྒྲར་བཅས་ཚངས་དང་དབང་པོས་མཆོད་གྱུར་ཅིང་། །ཀུན་ཕན་ཐུགས་རྗེའི་འོད་ཀྱིས་འགྲོ་ལ་དབུགས་དབྱུང་མཆོག་སྩལ་ཀུ་ཤིའི་ཁྲིར། །བསྙེངས་བྲལ་སེང་གེ་ལྟར་འགྱིང་དམ་བཅའི་སྲོག་ཤིང་གཅིག་ཏུ་བརླིང་བར་མཛད། ༡༨ །དེར་ནི་མི་བསྲུན་འཇིགས་གཟུགས་ཁོང་ནས་མེ་འབར་ལྟས་ངན་སྒྲ་དང་བཅས། །གདུག་པའི་མཚོན་ཐོགས་སྲིད་གསུམ་གཡོ་བྱེད་གཡོན་ཅན་བདུད་སྡེའི་དཔུང་ཚོགས་ཀྱིས། །ངལ་བརྒྱས་སྒྲུབ་པའི་ལོག་སྦྱོར་མཐའ་དག་བྱམས་ཆེན་གོ་ཆས་རབ་གཞིལ་ནས། །བདེན་ཚིག་མཐུ་ཡིས་ས་ལྷས་རབ་བསྔགས་འདོད་ལྷའི་རེ་བ་འབྲས་མེད་བྱས། ༡༩ །སྐྱེས་བུ་ཁྱུ་མཆོག་ཁ་ལོ་བསྒྱུར་དེས་འཕགས་པའི་ཡེ་ཤེས་སྟོབས་བསྐྱེད་པས། །བསམ་གཏན་བདེན་བཞི་རྟེན་འབྲེལ་རིམ་གཟིགས་རྡོ་རྗེ་ལྟ་བུའི་ཏིང་འཛིན་གྱིས། །དེ་ཡི་མཚན་མོ་དག་དང་ལྷན་ཅིག་ཤེས་སྒྲིབ་བག་ཉལ་ཟད་བྱས་ཏེ། །བླ་མེད་ཡང་དག་རྫོགས་པའི་བྱང་ཆུབ་བདུད་རྩི་མཆོག་དེ་གསོལ་བར་གྱུར། ༢༠ །ས་ཆེན་འཇིག་རྟེན་རྣམ་དྲུག་གཡོ་བའི་གོམ་སྟབས་དང་འགྲོགས་ཀུན་གསལ་ངོགས། །ཉི་ལྟར་རྣམ་མཛེས་ས་གསུམ་བླ་མས་ཆེད་དུ་བརྗོད་པའི་དབྱངས་སྒྲོགས་ལ། །ཕྱོགས་བཅུའི་འདྲེན་པས་ཤིས་པའི་མེ་ཏོག་དང་བཅས་མངོན་པར་དབང་བསྐུར་ཚེ། །བདུད་རྩིའི་ཟས་ཅན་རྣམས་ཀྱིས་རབ་མཆོད་སྐལ་བཟང་མིང་འདི་དོན་ལྡན་བྱས། ༢༡ །རབ་དཀར་བསོད་ནམས་ཤིང་རྟས་སྲིད་པ་གསུམ་གྱི་བླ་ན་མངོན་མཐོ་བའི། །གདོང་བཞི་པ་དང་ཤིས་བརྗོད་ཉན་གྱི་ཕུལ་བྱུང་མཆོད་པའི་སྤྲིན་བཀོད་ནས། །ཡང་ཡང་དམ་ཆོས་བདུད་རྩིའི་སྨན་མཆོག་འགྲོ་ལ་སྩོལ་བར་གསོལ་བཏབ་མཐར། །བརྩེ་བས་ཞལ་བཞེས་ངོ་མཚར་སེང་གེའི་སྒྲ་ཡིས་སྲིད་གསུམ་དགའ་བར་མཛད། ༢༢ །སྡུག་བསྔལ་གསུམ་གྱི་ནད་ཀྱིས་མནར་བའི་འགྲོ་ལ་བརྩེ་བས་རྗེས་དགོངས་ཏེ། །ཀུན་འབྱུང་ལས་ཉོན་རྩད་ནས་གཞོམ་བྱེད་ལམ་བདེན་སྨན་གྱི་མཆོག་སྩོལ་བས། །འགོག་པ་མངོན་གྱུར་འཕགས་བཞིའི་ཕྲེང་བས་ས་འདིར་དཀོན་མཆོག་གསུམ་གྱི་མཚན། །ཐོག་མར་གསལ་བྱས་རྨད་བྱུང་ཆོས་ཀྱི་གཎྜཱིའི་སྒྲ་དབྱངས་ཆེར་བསྒྲགས་སོ། ༢༣ །སྟོབས་མཆོག་སྟོབས་ཀྱིས་སྟོན་པ་དྲུག་སོགས་ཕས་ཀྱི་རྒོལ་ཀུན་ཚར་བཅད་ནས། །མ་སྨིན་སྨིན་དང་ཡོངས་སུ་སྨིན་གྱུར་གདུལ་བྱ་རྒྱ་མཚོར་ཐུགས་བརྩེ་བས། །རིམ་གསུམ་ཆོས་འཁོར་མཆོག་བསྐོར་འགྲོ་ཚོགས་བྱང་ཆུབ་གསུམ་གྱི་འབྲས་བཟང་ལ། །མངོན་པར་སྦྱོར་དེས་རྒྱལ་བ་རྒྱ་མཚོའི་ཕྲིན་ལས་མ་ལུས་རྫོགས་པར་མཛད། ༢༤ །ཆོས་ཀྱི་དབང་ཕྱུག་འཆི་བདག་བདུད་བཅོམ་སྐྱེ་འཇིག་མཚན་མ་དང་བྲལ་ཡང་། །རྟག་ལྟ་འདུལ་ཕྱིར་བརྒྱད་ཅུའི་ལོ་ལ་ཆོས་དབྱིངས་ཞི་བར་གཟིམས་ནས་སླར། །ཐུགས་ལས་རང་བྱུང་ཡེ་ཤེས་མེ་ཡིས་གཟུགས་སྐུའི་སྙིགས་མ་སྦྱངས་པ་ལས། །ངོ་མཚར་རིང་བསྲེལ་ཕུང་པོ་རྗེས་འཇུག་དད་པའི་རྟེན་དུ་བཞག་ཕྱག་འཚལ། ༢༥ །དེ་ལྟར་མཚུངས་མེད་ཐུབ་པའི་མཛད་བཟང་མཁའ་ལྟར་རྒྱ་ཆེ་གཏིང་ཟབ་པ། །ཚུལ་མཐོང་བྱིས་བློས་གཞལ་བྱ་མིན་ཡང་བདག་བློ་དད་པ་འཕེལ་བའི་རྒྱུས། །ཆ་ཙམ་བརྗོད་ལས་བསོད་ནམས་ཉུང་ཟད་དེ་རིང་བདག་གི་ཐོབ་པ་འདིས། །འགྲོ་རྣམས་སྒྲིབ་གཉིས་འཆིང་བའི་དྲི་བྲལ་ཀུན་མཁྱེན་ཡེ་ཤེས་མངོན་བྱེད་ཤོག །བཀྲ་ཤིས་དཔལ་མངའ་སྲས་བཅས་རྒྱལ་བའི་ཐུགས་རྗེའི་ཆུ་འཛིན་ལྷུན་སྟུག་ལས། །བཀྲ་ཤིས་དགེ་མཚན་བྱེ་བའི་བདུད་རྩིའི་ཆར་རྒྱུན་ཆིལ་ཆིལ་འབེབས་པ་ཡིས། །བཀྲ་ཤིས་ཕུན་ཚོགས་བསྟན་འགྲོའི་བདེ་སྐྱིད་པད་ཚལ་མཆོག་ཏུ་བཞད་པ་དང་། ༢༦ །བཀྲ་ཤིས་དཔལ་གྱིས་ཕྱོགས་དུས་ཀུན་ཁྱབ་རྟག་བརྟན་ལྷུན་གྲུབ་ཆེན་པོར་ཤོག ༢༧ །དེ་ལྟར་བདག་ཅག་གི་སྟོན་པའི་མཛད་པའི་ཚུལ་ལ་མདོ་ཙམ་བསྔགས་པའི་རབ་ཏུ་བྱེད་པ་འདིའང་ཤཱཀ་བཙུན་རྨོངས་པ་འགྱུར་མེད་པདྨ་རྣམ་རྒྱལ་གྱིས་དད་པ་རྣམ་པར་འཕེལ་བའི་ངག་གིས་བརྗོད་པ་སྟེ། འདིས་ཀྱང་འགྲོ་ཀུན་རྒྱལ་བ་མཆོག་གི་རྗེས་སུ་འཛིན་པའི་རྒྱུར་གྱུར་ཅིག། །།
༄༅། །ༀ་སྭསྟི། དྲི་མེད་གསེར་སྦྱངས་སྙིང་པོའི་ལྷུན་པོ་ལ། །གཟི་ལྡན་ཉི་མ་སྟོང་གིས་འཁྱུད་པ་བཞིན། །མཚན་དཔེའི་གཟི་བརྗིད་ཀུན་ནས་ལྷམ་མེ་བ། །ཤཱཀྱའི་སྲས་པོ་མཆོག་ལ་ཕྱག་འཚལ་ལོ། །འཛམ་གླིང་འགྲོ་ལ་བརྩེ་བས་རྗེས་དགོངས་ཏེ། །དགའ་ལྡན་གནས་ནས་གླང་ཆེན་ཚུལ་གྱིས་གཤེགས། །སྒྱུ་འཕྲུལ་ལྷུམས་སུ་ངོ་མཚར་མཛད་པ་སྐྱོང་། །ལུམ་བིའི་ཚལ་དུ་མཚན་དཔེའི་དཀྱིལ་འཁོར་ངོམ། །སྒྱུ་རྩལ་དྲུག་ཅུས་དྲེགས་ཚོགས་ཁེངས་པ་བསྙིལ། །སུམ་ཁྲི་དྲུག་སྟོང་བཙུན་མོའི་འཁོར་ལ་རོལ། །ངེས་འབྱུང་རྐྱེན་གྱིས་ཞི་བའི་ནགས་སུ་གཤེགས། །ནཻ རཉྫནར་མཁའ་ཁྱབ་ཏིང་འཛིན་བསྒོམ། །རྡོ་རྗེ་གདན་དུ་མི་གཡོའི་དམ་བཅའ་བརྟན། །བྱམས་པའི་མཚོན་ཆས་བདུད་སྡེའི་གཡུལ་ངོ་བཅོམ། །བྱང་ཆུབ་ཞི་བའི་བདུད་རྩི་མངོན་མཛད་ནས། །རིམ་གསུམ་ཆོས་ཆར་གདུལ་བྱའི་ཞིང་ལ་དབབ། །ཆོ་འཕྲུལ་ཆེན་པོས་ཕས་རྒོལ་ཚར་བཅད་ནས། །རྟག་ལྟ་འདུལ་སླད་ཞི་བའི་དབྱིངས་གཟིམས་ཏེ། །སྐུ་གདུང་རྒྱས་པར་མཛད་ལ་ཕྱག་འཚལ་ལོ། །དེ་ལྟར་མཚུངས་མེད་ཐུབ་པའི་མཛད་པའི་ཕྲེང་། །དད་པའི་ངག་གིས་བསྔགས་ཤིང་གསོལ་བཏབ་མཐུས། །ཚེ་རབས་ཕྲེང་བར་རྒྱལ་བས་རྗེས་བཟུང་སྟེ། །ས་བཅུ་ལམ་ལྔའི་ཡོན་ཏན་མཐར་ཕྱིན་ཤོག །བདེ་བར་གཤེགས་པ་ཁྱེད་སྐུ་ཅི་འདྲ་དང་། །སོགས་ནས། འགྱུར་བར་ཤོག །ཅེས་པ་འདི་རབ་ཚེས་མེ་བྱ་གསར་འཆར་གྱི་ཆོ་འཕྲུལ་ཟླ་བའི་ཚེས་གཅིག་གི་ཐོ་རེངས་ཆར་ཉིས་འཁྲུལ་དུ། རྒྱལ་དང་རྒྱལ་སྲས་དུ་མར་བསྔགས་བརྗོད་ཀྱི་ཕྲེང་བ་སྤེལ་བའི་ནང་ནས་འདི་ཉིད་ཀྱི་ཚིག་དོན་མ་བསྙེལ་བར་ཡིད་ལ་ངེས་པར་འདུག་པས་དེ་འཕྲལ་ཡི་གེའི་རིས་སུ་སྤེལ་བ་ནི་ཤཱཀ་བཙུན་པདྨ་རྣམ་རྒྱལ་ཏེ་འདིས་ཀྱང་འགྲོ་ཀུན་རྒྱལ་བ་མཆོག་གི་རྗེས་སུ་འཛིན་པའི་རྒྱུར་གྱུར་ཅིག། །།