ཐུབ་དབང་ཉེ་སྲས་བརྒྱད་ཀྱི་རྣམ་ཐར་ཕྱོགས་གཅིག་གི་ཆ་ཤས་ལ་དད་པས་བསྔགས་ཤིང་གསོལ་བ་འདེབས་པ་སྤྲིན་བྲལ་ཟླ་བ་རྒྱས་པའི་མེ་ལོང་གི་ཕྲེང་བ།

༄༅། །ཐུབ་དབང་ཉེ་སྲས་བརྒྱད་ཀྱི་རྣམ་ཐར་ཕྱོགས་གཅིག་གི་ཆ་ཤས་ལ་དད་པས་བསྔགས་ཤིང་གསོལ་བ་འདེབས་པ་སྤྲིན་བྲལ་ཟླ་བ་རྒྱས་པའི་མེ་ལོང་གི་ཕྲེང་བ་ཞེས་བྱ་བ་བཞུགས་སོ།། ན་མོ་ཤཱཀྱ་མུ་ནེ་ཡེ། སྔོན་ཚེ་དབང་པོའི་ཏོག་སོགས་སངས་རྒྱས་མཛད་པ་བསྒྲང་ཡས་བསྟན་ཟིན་ཀྱང་། །ཐུགས་རྗེ་ཆེན་པོས་རྩོད་དུས་ཡོངས་བཟུང་དམ་བཅའི་གོ་ཆ་ལྔ་བརྒྱ་བཞེས། །མཚན་ཐོས་ཙམ་གྱིས་སྐལ་ཆེན་བརྒྱད་ཁྲིའི་སྒྲིབ་པའི་མུན་སྟུག་སེལ་མཛད་པ། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །ད་ལྟར་ཕྱོགས་བཅུའི་ཞིང་གི་མགོན་རྣམས་སློབ་ཚེ་ཁྱོད་ཀྱི་བྱང་ཆུབ་ཏུ། །སྨིན་པར་མ་མཛད་འགའ་ཡང་སངས་རྒྱས་སྤྱན་གྱིས་གཟིགས་པའི་ཡུལ་མིན་ཞིང་། །ད་དུང་འགྲོ་ཁམས་ཇི་སྲིད་གནས་པར་འདུལ་བཞིའི་ཆོ་འཕྲུལ་རྒྱུན་ཆགས་སྟོན། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །སྐྱབས་མེད་བདག་ཅག་ཁོ་ནའི་ཆེད་དུ་དབུ་དང་སྐུ་ལུས་གྲངས་མེད་བཏང་། །དེ་བཞིན་ཚུལ་ཁྲིམས་བཟོད་བརྩོན་བསམ་གཏན་ཤེས་རབ་ཐབས་སྟོབས་སྨོན་ལམ་དང་། །ཡེ་ཤེས་བསམ་མི་ཁྱབ་པའི་སྤྲིན་བཀོད་བདུད་རྩིའི་བགོ་བཤའ་ཕངས་མེད་སྩལ། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །འཕོ་དང་ལྷུམས་ཞུགས་བལྟམས་དང་ངེས་འབྱུང་བདུད་བརྟུལ་བྱང་ཆུབ་ཆོས་འཁོར་སོགས། །སྲིད་པ་ཇི་སྲིད་གནས་ཀྱི་བར་དུ་འགྲོ་སེམས་གཙང་མའི་མཁར་སྟོན་ཡང་། །ཁྱོད་ནི་ཆོས་དབྱིངས་ཟབ་མོའི་ཚུལ་ལས་ནམ་ཡང་མ་གཡོས་གཡོ་མི་འགྱུར། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །བསོད་ནམས་བྱེ་བ་འབུམ་གྱིས་བསྐྲུན་པའི་མཚན་དཔེའི་གཟི་བྱིན་བལྟས་མི་ངོམས། །བཞི་ཡིས་ལྷག་པའི་དྲུག་ཅུའི་དབྱངས་ཀྱིས་བསྒྲང་ཡས་ཐེག་པའི་སྒོ་འཕར་འབྱེད། །མཁྱེན་བརྩེའི་ཡེ་ཤེས་གཏིང་མཐའ་མི་དཔོག་གངས་ཆེན་མཚོ་ཡི་བཀོད་པ་ཅན། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །ཟག་མེད་སྡེ་ཚན་ཉེར་གཅིག་གིས་གཏམས་ཡོན་ཏན་མཛོད་ཁང་མཚུངས་པ་མེད། །བརྒྱ་བྱིན་རྔ་སྤྲིན་ཚངས་ཉི་ནོར་བུ་སྒྲ་སྙན་ནམ་མཁའ་ས་གཞི་ཡི། །དཔེ་ཡིས་རྗེས་བསྟན་ཕྲིན་ལས་ཟབ་མོའི་འཇུག་པ་བྱིས་བློས་གཞལ་བྱ་ཅི། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །དད་པའི་ཡིད་ཀྱིས་མེ་ཏོག་གཅིག་ཙམ་མཆོད་སོགས་བཟང་འབྲེལ་ལྟ་ཅི་སྨོས། །འཁྲུག་པའི་ཡིད་ཀྱིས་སྐུ་གཟུགས་བལྟས་དང་རྩེ་ཕྱིར་སེན་མོས་བྲིས་ཙམ་ཡང་། །སྲིད་ལམ་རྒྱུ་བ་མཐའ་ཅན་རྣམ་གྲོལ་ལམ་ལ་དབུགས་དབྱུང་མཛད་པ་ཡི། །ཤཱཀྱའི་སྲས་ཀྱི་ཐུགས་རྗེའི་ཉི་འོད་སྙིང་གི་པདྨོར་འཇུག་པར་མཛོད། །ཁྱོད་རྗེས་རབ་བྱུང་ཤིན་ཏུ་འཆལ་བའང་སྐལ་བཟང་འདི་ལ་འབྲས་ཐོབ་ཅིང་། །ཞིང་འདིའི་སྲོག་ཆགས་ཕལ་ཡང་རིང་པོར་མི་ཐོགས་དཀོན་མཆོག་གདུང་འཚོབ་པའི། །འབྲེལ་ཚད་དོན་ལྡན་སྨོན་ལམ་ཡོངས་གྲུབ་འཁོར་བ་དོང་སྤྲུགས་མཛད་པ་ཅན། །ཤཱཀྱའི་སྲས་ཀྱི་ཐུགས་རྗེའི་ཉིད་འོད་སྙིང་གི་པདྨོར་འཇུག་པར་མཛོད། །དུས་ངན་ཚེ་ན་ཁྱོད་གསུངས་ཚིགས་བཅད་གཅིག་ཙམ་འཛིན་དང་ཀློག་པ་དང་། །ཉིན་མཚན་གཅིག་ཙམ་བསླབ་པ་བསྲུང་བའི་བསོད་ནམས་ཕུང་པོ་གང་ཡིན་དེས། །འདུས་བྱས་མཚན་མའི་དགེ་ཚོགས་ཟིལ་མནན་རྒྱ་མཚོ་གནག་རྗེས་ཆུ་བོ་བཞིན། །ཤཱཀྱའི་སྲས་ཀྱི་ཐུགས་རྗེའི་ཉིད་འོད་སྙིང་གི་པདྨོར་འཇུག་པར་མཛོད། །སྐུ་གཟུགས་གླེགས་བམ་མཆོད་སྡོང་ཆོས་སྐུའི་རིང་བསྲེལ་དག་ཀྱང་ཆེར་རྒྱས་པས། །བསོད་ནམས་ཚོགས་སྤེལ་སྐལ་ངན་དུས་ཀྱི་རྒུད་པའི་གདུང་པ་བཅིལ་ལ་སོགས། །སངས་རྒྱས་མཛད་པ་རྗེས་སུ་སྒྲུབ་པའི་རྣམ་ཐར་བསམ་མི་ཁྱབ་པའི་བདག །ཤཱཀྱའི་སྲས་ཀྱི་ཐུགས་རྗེའི་ཉིད་འོད་སྙིང་གི་པདྨོར་འཇུག་པར་མཛོད། །མཆོག་གི་ཕྲིན་ལས་ནོར་བུའི་ཞགས་པས་དབང་དུ་གྱུར་པའི་འབངས་རྣམས་ཀྱིས། །ལུས་སྲོག་གང་གཱའི་བྱེད་སྙེད་བཏང་ཡང་བཀའ་དྲིན་ཕྱོགས་ཙམ་འཁོར་མཐའ་ཅི། །དེ་སླད་ཉིན་མཚན་ཀུན་ཏུ་དད་བརྒྱའི་འདབ་སྟོང་ཅིག་ཅར་གཡོ་བྱེད་ན། །བསླབ་གསུམ་སྦྲང་རྩིའི་ལྕིད་ཀྱིས་གནོན་པའི་དགའ་སྟོན་ལ་འུར་སྩོལ་མཛོད་ཀྱཻ། །དེད་དཔོན་མཚུངས་མེད་སྐྱོབ་པ་མཆོག་གི་ཐུགས་བསྐྱེད་དམ་བཅའི་ཁྱད་པར་དང་། །མཛད་པ་སྨོན་ལམ་མཁྱེན་བརྩེ་ནུས་མཐུ་བླ་མེད་ཡེ་ཤེས་སྒྱུ་འཕྲུལ་གྱི། །གསང་བ་ཟབ་མོའི་ཚུལ་དང་བདག་སོགས་འགྲོ་ཀུན་མཉམ་པ་ཉིད་གྱུར་ཏེ། །སྲིད་པའི་དམ་བཅའ་རྡུལ་དུ་ཞིག་ནས་སྐུ་བཞིའི་གྲོང་མཆོག་འབྱོར་གྱུར་ཅིག །བཀྲ་ཤིས་གང་ཞིག་སྲས་བཅས་རྒྱལ་བའི་བདེན་སྟོབས་ཐུགས་རྗེའི་སྤྲིན་ཆེན་འཁྲིགས། །སྣོད་བཅུད་རྒུད་པའི་ཚད་གདུང་ཡོངས་བཅིལ་དཔལ་འབྱོར་འཛད་མེད་ཆར་རྒྱུན་འཇོ། །བཤད་སྒྲུབ་ཕྲིན་ལས་རླབས་ཕྲེང་གཡོ་བའི་ཐུབ་བསྟན་མཚོ་ཆེན་སྲིད་མཐར་རྒྱས། །སྐྱེ་དགུ་དགའ་བའི་རྫོགས་ལྡན་དུས་སྟོན་གསར་དུ་ངོམ་པའི་གཞི་ཚུགས་ཤིག །
༄༅། །ན་མོ་ཨཱཪྻ་མཉྫུ་ཤྲཱི་ཡེ། རབ་འབྱམས་རྒྱལ་ཀུན་མཁྱེན་པའི་ཡེ་ཤེས་རྡུལ་བྲལ་མ་ཎི་ཀ་ཡི་ཕྲེང་། །མ་ལུས་གཅིག་བསྡོམས་བསམ་བརྗོད་ལས་འདས་ཡོན་ཏན་ཟབ་མོའི་གཏེར་གྱི་མཛོད། །དྲན་པ་ཙམ་གྱིས་གྲུབ་གཉིས་འདོད་པ་ཡིད་བཞིན་འཇོ་བའི་དཔྱིད་གཅིག་པུ། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །གང་ཞིག་སངས་རྒྱས་སྤྱན་གྱིས་གཟིགས་པའི་ཞིང་ཁམས་རབ་འབྱམས་རྡུལ་སྙེད་ན། །མི་མཆོག་སྐྱོབ་པ་ལྷ་ཡི་ལྷར་གྱུར་ཇི་སྙེད་བཞུགས་པ་དེ་ཀུན་ལ། །བྱང་ཆུབ་དམ་པ་འཛིན་དུ་སྩལ་མོད་གཞོན་ནུའི་ངང་ཚུལ་ཉམས་པ་མེད། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །རྟག་ཏུ་ཆོས་དབྱིངས་ཟབ་མོར་སྙོམས་འཇུག་སྐྱེ་སོགས་སྤྲོས་མཚན་མ་དམིགས་ཀྱང་། །ཐུགས་རྗེའི་དབང་གིས་འགྲོ་སེམས་མཁའ་ལ་མཚན་དཔེའི་ཟླ་བ་མངོན་མཛེས་ཤིང་། །ཡེ་ཤེས་ཟེར་གྱིས་རྨོངས་ཆེན་བློ་ཡི་མུན་པ་མི་བཟད་འཇོམས་པའི་དཔལ། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །ཇི་ལྟ་ཇི་སྙེད་ཤེས་བྱའི་ཆོས་ཀུན་མཁྱེན་པའི་ཡེ་ཤེས་གཅིག་གིས་གཟིགས། །གསུང་གཅིག་གིས་ཀྱང་མཐའ་ཀླས་འགྲོ་བའི་ཐེ་ཚོམ་དུད་པ་བྱེ་བ་འགྲོལ། །སྲས་བཅས་རྒྱལ་བའི་རྣམ་ཐར་མ་ལུས་ཁྱོད་གཅིག་ཁོ་ནས་ཡོངས་སུ་འཛིན། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །གདུལ་བྱའི་ས་གཞིར་སྙིང་རྗེའི་རྩ་བརྟན་སྨོན་ལམ་ཡལ་འདབ་ཆེས་ཆེར་རྒྱས། །སྟོབས་བཅུ་མི་འཇིགས་མ་འདྲེས་ཆོས་ཀྱི་ལོ་འདབ་མེ་ཏོག་འབྲས་ཁུལ་ལྕི། །དབང་བཅུའི་གྲིབ་བསིལ་ཤིན་ཏུ་རྒྱ་ཆེན་སྐྱེ་དགུའི་ངལ་འཚོའི་སྨན་གཅིག་པུ། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །སྡུག་བསྔལ་སྲིད་པའི་ཚང་ཚིང་སྲེག་ལ་བསྐལ་དུས་འཇིག་པའི་མེ་ཆེན་པོ། །ཀུན་འབྱུང་ཕྲ་རྒྱས་མུན་ཚོགས་གཞིལ་ལ་སྔོན་མེད་ནོར་བུའི་སྒྲོན་མེ་མཆོག །ལམ་བདེན་ཤིང་རྟས་ཉེར་དྲངས་འགོག་མཆོག་ཞི་བའི་གྲོང་ལ་སྦྱོར་མཛད་པའི། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །སྲིད་ཞིའི་ཆུ་གཏེར་ཕ་རོལ་སྒྲོལ་བའི་བཅོས་ལེགས་རིན་ཆེན་གྲུ་བོ་མཆོག །ཟག་མེད་རྣམ་གྲོལ་ཡོན་ཏན་ནོར་མཆོག་ཅི་དགར་སྦྱིན་མཛད་དེད་དཔོན་ཆེ། །མཚན་ཐོས་ཙམ་གྱིས་ཀུན་རྨོངས་ནད་གཞིལ་སྨན་པའི་རྒྱལ་པོ་ཟླ་མེད་པ། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །བརྒྱུད་ལྔར་འཕྱན་པའི་འགྲོ་ཚོགས་སྐྱོབ་མཛད་བྱམས་བརྩེའི་མ་མ་གཅིག་པུ་སྟེ། །བློ་ཆེན་རྣམས་ཀྱི་རྣམ་གྲོལ་ཡོན་ཏན་ལུས་ཟུང་བསྐྱེད་པའི་ཕ་ཡང་ཡིན། །མ་འདྲིས་མཛའ་བཤེས་མཚུངས་མེད་འཇམ་པའི་དཔལ་དང་ཡང་དག་ལྡན་པ་ཡི། །རྗེ་བཙུན་སྨྲ་བའི་སེང་གེས་གཟུངས་སྤོབས་བློ་གྲོས་སྣང་བ་མཆོག་སྩོལ་ཅིག །སྒྲིབ་མེད་ཀུན་ཏུ་གཟིགས་པའི་སྤྱན་གྱིས་སུ་ཞིག་རྒུད་པས་ཉམ་ཐག་པར། །ཐུགས་རྗེའི་ཕྲིན་ལས་ལྷག་པར་འཇུག་ཅེས་གྲགས་པའི་སྤྲིང་ཡིག་ཆེས་གསལ་མོད། །འཆིང་བ་བརྒྱས་བཅིངས་ཉམ་ཐག་བདག་ནི་མ་གཟིགས་ཀྱེ་མ་སྡུག་བསྔལ་ལོ། །ད་ནི་མི་ཤེས་དྲྭ་བ་མ་ལུས་གཅོད་པར་མཛོད་ཅིག་མགོན་པོ་ཀྱེ། །ཐོས་བསམ་སྒོམ་པའི་གེ་སར་ཆེས་མཐོ་འཆད་རྩོད་རྩོམ་པའི་འདབ་ཕྲེང་མཛེས། །མཁས་བཙུན་བཟང་པོའི་དྲི་བསུང་རྒྱ་ཆེ་སྐལ་བཟང་བུང་བ་དགའ་བའི་གཉེན། །ལུང་རྟོགས་སྦྲང་རྩིའི་ཉིང་ཁུ་འཇོ་བས་ཐུབ་བསྟན་པད་ཚལ་མཛེས་བྱེད་པའི། །འཕགས་ཆེན་རྣམས་ཀྱི་རྣམ་ཐར་ཟབ་མོའི་རྗེས་སུ་སློབ་ནུས་བྱིན་རླབས་སྩོལ། །བསོད་ནམས་བརྒྱ་ལས་གྲུབ་པའི་བཀྲ་ཤིས་རེ་ཁ{ཁཱ་འདིའི་རིགས་འདི་ལྟར་ཞུས། } ས་མཛེས་པའི་ཕྱག་ཡངས་ཀྱིས། །ཚེ་རབས་ཕྲེང་བར་མགོ་བོའི་ཐོད་དུ་ཉུག་པར་མཛད་དང་ཆབས་ཅིག་པར། །བློ་མཆོག་སྤོབས་པའི་གཏེར་བརྒྱད་ཁོང་ནས་རྒོད་པས་སྲིད་ཞིའི་གདུང་བཅིལ་བའི། །དགེ་མཚན་ནུབ་པ་མེད་པས་ཀུན་ནས་བསྲུང་བའི་བཀྲ་ཤིས་འཕེལ་གྱུར་ཅིག། ༈ ན་མོ་མ་ཧཱ་ཀཱ་རུ་ཎི་ཀཱ་ཡ། ཆོས་དབྱིངས་མཁའ་ལ་སྙིང་རྗེའི་སྤྲིན་འཁྲིགས་གང་འདུལ་མཛད་པའི་ཆར་ཆེན་པོས། །གྲོང་ཁྱེར་རྣམ་དྲུག་ཀུན་ནས་ཁྱབ་མཛད་སྡུག་བསྔལ་ཀུན་འབྱུང་མེ་ཚོགས་བཅིལ། །རྣམ་གྲོལ་ཡོན་ཏན་མྱུ་གུ་བསྐྱེད་བསྲིང་ཕན་བདེའི་ཆུ་གཏེར་འཕེལ་མཛད་པ། །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །ཐུགས་རྗེ་ཆེན་པོའི་ལྗོན་ཤིང་རྨད་བྱུང་དམ་བཅའི་རྩ་བ་རབ་ཏུ་བརླིང་། །ས་བཅུ་ལམ་ལྔའི་ཡལ་འདབ་རབ་རྒྱས་སྤངས་རྟོགས་འབྲས་བུའི་ཁུར་གྱིས་ལྕི། །གཞན་ཕན་ཕྲིན་ལས་གྲིབ་བསིལ་རྒྱ་ཆེ་སྐྱེ་དགུ་ཡོངས་ཀྱི་ངལ་འཚོར་གྲུབ། །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །སྲིད་ན་ཕན་བདེའི་དངོས་ཀུན་དེ་བཞིན་གཤེགས་པའི་མཐུ་ལས་གཞན་གྱིས་མིན། །མི་མཆོག་འདྲེན་པ་སྟོང་ཡང་ཕྱག་གི་འོད་ཟེར་ཆ་ལ་ཉེར་གནས་པས། །རྣམ་ཐར་དཔག་ཡས་ཆོས་ཀྱི་དབྱིངས་མཉམ་དཔའ་ཆེན་ཡོངས་ཀྱི་ཕྱག་བྱས་པ། །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །གང་གང་འདུལ་ལ་དེ་དེར་སྟོན་པའི་ངོ་མཚར་གཟུགས་བརྙན་བྱེ་བ་འབུམ། །འགྲོ་སེམས་བཻཌཱུར་གཙང་མའི་ངོགས་སུ་སྐལ་བར་འཚམས་པ་རྗེས་སྟོན་པས། །ཀུན་སྦྱོར་འཆིང་བ་དམ་བཅད་བག་ཆགས་རྐུན་པོའི་རྒྱུན་ལམ་མ་ལུས་བཀག །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །སྡིག་སེམས་རང་གཟུགས་སྡུག་བསྔལ་གསུམ་གྱི་མེ་ཡིས་ཀུན་ནས་བཀླུབས་གྱུར་ཅིང་། །ལྟ་ངན་མུན་པས་མིག་ལྡོང་བླང་དོར་འཆོལ་བའི་འགྲོས་ཅན་དམན་རྣམས་ལ། །ཐུགས་རྗེ་ཆེན་པོས་ལྷག་པར་རྗེས་དགོངས་བྱམས་པའི་ཕྱག་གིས་སྲུང་མཛད་པ། །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །གང་གི་བ་སྤུའི་ཁུང་བུ་རེར་ཡང་སངས་རྒྱས་ཞིང་ཁམས་བསྒྲང་ཡས་བཀོད། །སྣ་ཚོགས་ཐབས་ཀྱི་འདུལ་བ་བཞི་ཡི་ཕྲིན་ལས་མཁའ་མཐའ་ཚད་བཟུང་བྲལ། །མཚན་ཐོས་ཙམ་གྱིས་འགྲོ་ཀུན་སྨིན་མཛད་ལྷ་བརྒྱའི་གཙུག་གི་ཅོད་པཎ་མཆོག །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །བརྒྱད་གཉིས་འཇིགས་པའི་ཚད་གདུང་བཅིལ་ལ་ཞི་བསིལ་ཚངས་པའི་རལ་ཀླུང་མཆོག །བྱམས་དང་སྙིང་རྗེའི་ཆུ་གཏེར་འཕེལ་བྱེད་ཆ་ཤས་ཡོངས་རྫོགས་འོད་དཀར་དབང་། །སྐྱེ་དགུ་ཀུན་ལ་འདོད་པ་འཇོ་བའི་བུམ་བཟང་གཏེར་དང་དཔག་བསམ་ཤིང་། །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །མེ་དོང་ཆུད་པའི་བུ་ལ་མ་བཞིན་འགྲོ་ཁམས་རྒྱ་མཚོར་རྗེས་བརྩེའི་སྤྱན། །སྲིད་མཐར་གཟིགས་པའི་དམ་བཅའི་གོ་ཆ་དཔའ་ཆེན་གཞན་གྱིས་བསྐྲུན་མིན་པ། །མགོན་པོ་ས་བཅུའི་དབང་ཕྱུག་ཐུགས་རྗེ་ཆེ་ལྡན་ཐབས་ཚུལ་དཔག་མེད་བདག །སྙིང་རྗེའི་ལྷ་ཡིས་བདག་རྒྱུད་བྱང་ཆུབ་སེམས་ཀྱི་བདུད་རྩིས་བརླན་མཛོད་ཀྱཻ། །སྒྲིབ་མེད་སྤྱན་གྱིས་འགྲོ་ཁམས་རྟག་གཟིགས་དུས་ལས་ཡོལ་མེད་ཕྲིན་ལས་ཀྱི། །ནོར་བུའི་ཞགས་པས་དབང་དུ་མི་མཛད་འགའ་ཡང་སྲིད་ན་མ་མཆིས་མོད། །ལས་ཀྱིས་བསྐལ་པའི་དམན་པ་བདག་ནི་བཏང་སྙོམས་བཞིན་དུ་གྱུར་ལགས་ཀྱི། །ཐུགས་རྗེའི་ཕྱག་ཡངས་ལ་འུར་རྐྱོངས་མཛོད་གངས་རིའི་ཁྲོད་ཀྱི་མགོན་པོ་མཆོག །ཚད་མེད་རྣམ་བཞིས་དུལ་བའི་ཞིང་སར་བྱང་ཆུབ་སེམས་གཉིས་ས་བོན་ཐེབས། །བསླབ་གསུམ་མྱུ་གུ་བྱང་ཆུབ་ཕྱོགས་ཆོས་གསེར་གྱི་སྙེ་མའི་དོག་པས་ལྕི། །དོན་གཉིས་འབྲས་བཟང་འགྲོ་ལ་འགྱེད་པའི་རྫོགས་ལྡན་དུས་སྟོན་གསར་པ་ཡིས། །ས་གསུམ་སྐྱེ་དགུའི་རེ་བ་སྐོང་ནུས་མཆོག་དང་རྣམ་ཐར་མཚུངས་བྱིན་རློབས། །ལུས་ཅན་ཀུན་གྱི་སྙིང་གི་པདྨོར་མཆོག་བྱིན་བདུད་རྩིའི་བཅུད་ཆགས་པས། །སྡིག་སེམས་ཟུག་རྔུའི་ཚོར་བ་ཀུན་བཅིལ་བདེ་དགའ་རྒྱ་མཚོའི་ལུས་སྟོབས་རྒྱས། །ཀུན་ཀྱང་ཐེག་ཆེན་བཞོན་པ་ལ་བརྟེན་རྣམ་གྲོལ་སྙིང་པོའི་གྲོང་སྙོགས་པས། །སྲིད་པའི་དམ་བཅའ་རྡུལ་དུ་ཞིག་པའི་བཀྲ་ཤིས་སྣང་བས་མཛེས་གྱུར་ཅིག ། ༈ ན་མོ་བཛྲ་པཱ་ཎ་ཡེ། བསྒྲངས་ཡས་ཞིང་ན་སྲས་བཅས་རྒྱལ་བ་ཡོངས་ཀྱི་གསང་བའི་མཛོད་འཛིན་པ། །ནུས་མཐུ་རྩེ་བརྒྱ་འབར་བའི་མཚོན་གྱིས་བདུད་རིགས་ཀླད་པ་འགེམ་མཛད་ཅིང་། །དྲན་པ་ཙམ་གྱིས་ཕས་རྒོལ་གཡུལ་ལས་རྣམ་པར་རྒྱལ་བའི་དཔལ་སྟེར་བའི། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །ཆོས་ཀྱི་དབྱིངས་སུ་རྒྱལ་རྣམས་དགོངས་པའི་གསང་མཛོད་མཉམ་པ་ཉིད་གྱུར་ཀྱང་། །གདུལ་བྱ་འདུལ་སླད་སྟོན་འཁོར་ཞུ་གསུང་སྡུད་པ་པོ་དང་གཉེར་འཛིན་ཚུལ། །དུ་མའི་བཀོད་པས་སྲིད་མཐས་གཏུག་པར་གསང་སྔགས་རིག་མཆོག་སྟོན་པ་པོ། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །གང་ཞིག་དྲན་ན་གཤིན་རྗེའི་ཚོགས་ཀྱང་སྐྲག་ནས་ཕྱོགས་བཅུར་འབྱེར་བྱེད་ཅིང་། །བདུད་སྡེའི་རུ་མཚོན་བསྙིལ་དང་ཆབས་ཅིག་ཕྱོགས་ཀུན་བཅིང་བ་ལྟར་གྱུར་ནས། །བྲོས་པའི་མཐུ་ཟད་ཞབས་ཀྱི་རྡུལ་འོག་ལྷུང་གང་བརྩེ་བས་འདོར་མིན་པ། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །ལྟ་ངན་འཐིབ་པོས་ཀུན་ནས་ནོན་གྱུར་མུ་ཅོར་སྨྲ་བ་ཏརྐའི་སྡེ། །དད་པའི་པདྨོ་ཟུམ་པའི་ངང་ཚུལ་ཀུན་ནས་འཐོར་བྱེད་དུས་མཐའི་རླུང་། །ཐུབ་དབང་རྒྱལ་བའི་རུ་མཚོན་ཆེར་བསྒྲེངས་ཆོ་འཕྲུལ་མཆོག་ཀྱང་ཁྱེད་ཀྱི་མཐུ། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །སྐྱེ་བོ་ཕལ་དང་རང་བདེ་དོན་གཉེར་ཉན་ཐོས་རང་སངས་རྒྱས་དེ་བཞིན། །བློ་ཆེན་སེམས་མཆོག་དང་པོ་བསྐྱེད་ནས་རྒྱུན་མཐར་གྱུར་པ་དེ་སྲིད་དུ། །རེ་རེའི་ཕྱི་བཞིན་མཚོན་ཆ་གདེངས་པའི་ཟོལ་གྱིས་ཀུན་ཏུ་སྲུང་མཛད་པ། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །སེམས་ཀྱི་སྐད་ཅིག་རེར་ཡང་འགྲོ་ཀུན་བསམ་དང་སྤྱོད་པའི་རྗེས་འགྲོ་བའི། །སྣ་ཚོགས་ཐེག་པའི་སྒོ་འཕར་བྱེ་བ་བརྒྱ་ཕྲག་འབྱེད་ཅིང་སྟོན་པ་པོ། །མཐའ་ཀླས་གཟུངས་སྤོབས་ནོར་བུའིགཏེར་འཆང་ས་བཅུའི་དབང་ཕྱུག་ཡོངས་ཀྱི་ཏོག །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །རླབས་ཆེན་ཕྱིན་དྲུག་སྤྱོད་པའི་གསེར་བཟང་ཐབས་མཁས་མཛད་པའི་བཞུ་བཏུལ་གྱིས། །སྟོབས་མཆོག་མུ་ཁྱུད་མཛེས་འབར་སྨོན་ལམ་བསམ་མི་ཁྱབ་པའི་རྩིབས་སྟོང་བཀྲ། །ཡེ་ཤེས་མཁའ་ལ་རྣམ་པར་བསྐྱོད་པའི་སྔོན་མེད་ཆོས་ཀྱི་འཁོར་ལོ་མཆོག །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །རྒྱུད་དོ་ཅོག་གི་ཆུ་ཀླུང་མཐའ་དག་འབྱུང་བའི་གནས་གཅིག་གདེངས་ཅན་དབང་། །རྒྱལ་ཀུན་གསང་བ་ཟབ་མོའི་མཛོད་གཉེར་འགྲོ་ཚོགས་སྐྱོང་བའི་མ་མ་མཆོག །འཇིགས་པས་ཉེན་པ་རྣམས་ཀྱི་དཔུང་གཉེན་དོན་མཐུན་མགྲོན་པོའི་ས་མཁན་ཆེ། །དཔའ་ཆེན་ལག་ན་རྡོ་རྗེས་བྱང་ཆུབ་ལམ་གྱི་བར་ཆད་ཀུན་སོལ་ཅིག །རྟག་ཏུ་ཆོས་དབྱིངས་ཞི་ལ་གནས་ཀྱང་འབར་བ་ཆེན་པོའི་སྐུར་སྟོན་པ། །ལྷ་ཡི་ལྷ་སྟེ་བདུད་ཀྱི་བདུད་གྱུར་བགེགས་ཀྱི་དགྲ་ཆེན་མཚུངས་མེད་ཁྱོད། །དེང་འདིར་རྗེས་དགོངས་བདག་བློའི་ཉོན་མོངས་གཟུང་འཛིན་འཁྲུལ་པའི་སྦུབས་རྒྱ་འདི། །ཡེ་ཤེས་རྡོ་རྗེའི་མཚོན་གྱིས་ད་ལྟ་ཉིད་དུ་ལྷག་མེད་གཞོམ་མཛོད་ཀྱཻ། །རྡོ་རྗེ་ཡེ་ཤེས་འབེབས་པའི་བྱིན་རླབས་སྙིང་གི་དབུས་སུ་རབ་ཞུགས་ནས། །མཆོག་ཏུ་མི་འགྱུར་བདེ་ཆེན་རྡོ་རྗེར་སྲིད་ཞི་རོ་མཉམ་གྱུར་པ་ཡི། །འཁོར་འདས་ཀུན་གྱི་སྤྱི་དཔལ་ཧེ་རུ་ཀཿཔ་དེང་འདིར་འགྲུབ་འགྱུར་ནས། །རྡོ་རྗེ་འཛིན་བདག་གསང་བ་གསུམ་དང་རྣམ་ཐར་མཉམ་པའི་བྱིན་རླབས་སྩོལ། །བདག་སོགས་མཐའ་ཀླས་འགྲོ་ཀུན་ལུས་སེམས་རྡོ་རྗེ་ལྟ་བུ་རབ་བརྟན་ཞིང་། །བར་ཆད་བདུད་དགྲའི་འཚེ་བ་མིང་མེད་མི་ཤིས་རྒུད་པ་གཏན་བཅིལ་ནས། །རྡོ་རྗེའི་གསང་མཆོག་ཟབ་མོར་རྗེས་སློབ་དོན་གཉིས་ནོར་བུའི་གཏེར་འབྱེད་པའི། །བཀྲ་ཤིས་སྣང་བས་ཕྱོགས་དུས་ཀུན་ཁྱབ་དགའ་སྟོན་རྒྱལ་མཚན་སྒྲེང་གྱུར་ཅིག །༈ ན་མ་ཨཱཪྻ་མཻ་ཏྲི་ ཡེ། ཉི་མའི་གཉེན་སོགས་དཔའ་སྟུག་ཡོངས་ཀྱི་དབང་བསྐུར་ཅོད་པཎ་དབུར་བཅིངས་ཤིང་། །དགའ་བ་བརྒྱ་ལྡན་གྲོང་དུ་ཐེག་ཆེན་ཆོས་ཀྱི་རྒྱལ་སྲིད་ལེགས་བསྐྱངས་ནས། །ཞིང་འདིར་སངས་རྒྱས་མཛད་པ་སྟོང་མཛད་ས་བཅུའི་དབང་ཕྱུག་ཟླ་མེད་པ། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །བྱམས་ཆེན་འགྲན་ཟླ་བྲལ་བའི་ཏིང་འཛིན་གོ་ཆ་ཆེན་པོ་གཅིག་པུས་བགོས། །ཐབས་ལ་མཁས་པས་དཀའ་བ་མེད་པར་རྫོགས་སྨིན་སྦྱངས་པ་མཐར་ཕྱིན་མཛད། །བྲལ་ཐོབ་སྨིན་པའི་ཡོན་ཏན་བྱེ་བའི་རིན་ཆེན་གཏེར་ལ་རང་དབང་བསྒྱུར། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །སེམས་ཀྱི་སྐད་ཅིག་རེར་ཡང་གྲངས་མཐའ་ཡས་པའི་རྒྱལ་ལ་བཀའ་བགྲོས་ཤིང་། །ཏིང་ངེ་འཛིན་དང་ཡེ་ཤེས་རྣམ་འཕྲུལ་བསམ་མི་ཁྱབ་པས་འགྲོ་མང་འདུལ། །སངས་རྒྱས་ཆོས་རྣམས་ལྐོག་ཏུ་མ་གྱུར་མངོན་སུམ་ལག་མཐིལ་གཏེར་བཞིན་གཟིགས། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །རྒོལ་བ་ངན་པའི་གླང་པོའི་ཁྱུ་ལ་འཇིགས་མེད་སེང་གེའི་ང་རོའི་དབྱངས། །བདུད་ཀྱི་སྤྱོད་ཡུལ་ཡོངས་སུ་གཅོད་བྱེད་ཡེ་ཤེས་མཚོན་ཆའི་འཁོར་ལོ་མཆོག །ལོག་པར་ལྟ་བའི་རྒྱ་མཚོ་སྐེམ་ལ་བསྐལ་དུས་འཇིག་པའི་མེ་ཆེན་པོ། །རྒྱལ་ཚབ་མ་ཕམ་མགོན་གྱི་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །བསླབ་གསུམ་རྙོག་པའི་དྲི་མ་བགྲུང་བྱེད་སྔོན་མེད་ནོར་བུ་ཀེ་ཏ་ཀ །གཟུངས་སྤོབས་བློ་གྲོས་སྒོ་བརྒྱ་འབྱེད་ལ་རིན་ཆེན་ལྡེའུ་མིག་མཚུངས་པ་མེད། །བྱམས་པའི་ཆར་གྱིས་ཁྲོ་བའི་མེ་ཚོགས་གཞིལ་མཛད་སྤྲིན་ཆེན་ལྷུན་འཐུག་པོ། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །དཀར་ཆོས་རིགས་ཀྱི་མྱུ་གུ་སྐྱེད་བྱེད་དྲི་མེད་བདུད་རྩིའི་ཆོས་ཆར་ཆེ། །ས་ལམ་ཡོན་ཏན་གོང་མར་སྦྱོར་ལ་རིན་ཆེན་ཐེམ་སྐས་བཟང་པོ་སྟེ། །སྲིད་མཚོ་སྒྲོལ་བའི་གྲུ་ཆེན་མཉན་པ་ལམ་སྟོན་སྐྱེལ་མ་དཔའ་བོ་མཆོག །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །རྒྱལ་སྲས་རྒྱུ་སྐར་ཕྲེང་བའི་དབུས་ན་མཁྱེན་རྟོགས་དཀྱིལ་འཁོར་གང་བའི་ཟླ། །ཐེག་མཆོག་ཆོས་ཀྱི་འོད་དཀར་འགྱེད་པས་བློ་ཆེན་ཡིད་ཀྱི་ཀུ་མུ་ད། །ཅི་དགར་བཞད་པས་ས་གསུམ་འཇིག་རྟེན་ཀུན་ནས་དགའ་བར་མཛད་པ་ཅན། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །ཤཱཀྱའི་སྲས་ཀྱི་བསྟན་འདིར་དགེ་རྩའི་ས་བོན་ཆེས་ཕྲ་གང་བཏབ་རྣམས། །བྱམས་མགོན་ཉི་མའི་དཀྱིལ་འཁོར་འགྲོ་བསོད་མཁའ་ལ་འཆར་བར་གྱུར་དེའི་ཚེ། །བྱང་ཆུབ་གསུམ་གྱི་འབྲས་བཟང་སྨིན་མཛད་རྣམ་ཐར་བཀའ་དྲིན་བསམ་མི་ཁྱབ། །རྒྱལ་ཚབ་མ་ཕམ་མགོན་གྱིས་བདག་རྒྱུད་བསླབ་གསུམ་ཡོན་གྱིས་འབྱོར་བར་མཛོད། །སྙིགས་སྤྱོད་སྐྱེ་བོ་ཁྲེལ་དང་ངོ་ཚའི་གོས་བྲལ་དྲན་ཤེས་ས་མཁན་སྟོར། །ཚུལ་ཁྲིམས་ནོར་དབུལ་ཏིང་འཛིན་ཁ་ཟས་ཉམ་ཆུང་མ་རིག་འབྲོག་དགོན་དུ། །རྣམ་པར་འཕྱན་འདི་ཀྱེ་མ་བྱམས་མགོན་ཐུགས་རྗེའི་གཏེར་གྱིས་མ་གཟིགས་སམ། །བསླབ་གསུམ་ནོར་བུའི་མཛོད་ཁང་མཆོག་ལ་ད་ལྟ་ཉིད་དུ་སྤྲད་མཛད་གསོལ། །སྦྱངས་ཡོན་བཅུ་གཉིས་ཁྲིམས་གཙང་ལྷ་གོས་པཉྩ་ལི་ཀས་ཉེར་ཀླུབ་ཅིང་། །ཟག་མེད་ཏིང་འཛིན་སྐ་རགས་ལེགས་བཅིང་ཤེས་རབ་ཟབ་མོའི་རྒྱན་མཆོག་གིས། །ལེགས་སྤྲས་བསྟན་འཛིན་ལྷ་ཕྲུག་གཞོན་ནུའི་རྩེ་རར་བག་ཕེབས་རྒྱུ་བ་ཡི། །སྤོོབས་པས་རྒྱལ་བསྟན་སྲིད་མཐའི་བར་དུ་འཛིན་ལ་བསྙེང་བྲལ་བྱིན་གྱིས་རློབས། །བསོད་ནམས་བསམ་མི་ཁྱབ་པའི་སྤྲིན་ལས་ལེགས་འོང་ཕན་བདེའི་ཆར་ཆེན་པོས། །ས་འོག་ས་སྟེང་ས་བླའི་འཇིག་རྟེན་མ་ལུས་ཀུན་ནས་ཁྱབ་གྱུར་པས། །བྱམས་པའི་ཏིང་འཛིན་མཆོག་གིས་རྒྱུད་བརླན་འཐབ་དང་རྩོད་པའི་མིང་མི་གྲགས། །བདེ་དགའ་རྒྱ་མཚོའི་འབྱོར་པས་བཀྲ་ཤིས་དཔལ་དུ་འབར་བའི་གཞི་ཚུགས་ཤིག ། ༈ ན་མཿཀྵིཏི་གརྦྷཱ་ཡ། དཔལ་ལྡན་དགེ་ལེགས་ཡོན་ཏན་བྱེ་བའི་རང་བཞིན་རྫོགས་ལྡན་ནོར་བུའི་སྤྲིན། །སྨོན་ལམ་རླུང་གིས་ཉེར་བསྐུལ་ཚེ་དཔལ་འབྱོར་པ་འདོད་དགུའི་གྲུ་ཆར་གྱིས། །ས་གསུམ་སྐྱེ་དགུའི་རེ་བའི་ཤིང་རྟ་ཕྱུར་བུར་འགེངས་པའི་དཔལ་ཡོན་ཅན། །གྲགས་མཆོག་ས་ཡི་སྙིང་པོས་གྲུབ་གཉིས་འདོད་པ་ཡིད་བཞིན་འཇོ་བར་མཛོད། །ཚོགས་གཉིས་རྒྱ་མཚོ་བསྲུབས་ལས་ཉེར་ཐོན་མཁྱེན་བརྩེའི་དཀྱིལ་འཁོར་གང་བའི་ཟླ། །ཆོས་དབྱིངས་མཁའ་ལ་རྟག་གནས་འགྲོར་སེམས་གཙང་མའི་ཆུ་སྣོད་བྱེ་བ་བརྒྱར། །གང་འདུལ་བཀོད་པའི་གཟུགས་བརྙན་བསྒྲང་ཡས་འགོག་མེད་འཆར་བའི་ངོ་མཚར་ཅན། །གྲགས་མཆོག་ས་ཡི་སྙིང་པོས་གྲུབ་གཉིས་འདོད་པ་ཡིད་བཞིན་འཇོ་བར་མཛོད། །རིན་ཆེན་མཆོག་ལྟར་དཀོན་པའི་མཚན་མཆོག་སུ་ཞིག་སྒྲ་འཛིན་བུག་པ་རུ། །སོན་པའི་སྐལ་བཟང་ཐོབ་དང་ཆབས་ཅིག་རེ་བ་ལས་ལྷག་འདོད་པའི་འབྲས། །འབད་མེད་སྩོལ་ལ་བུམ་བཟང་གཏེར་དང་དཔག་བསམ་ཤིང་གིས་བསྐྲུན་བྱར་མིན། །གྲགས་མཆོག་ས་ཡི་སྙིང་པོས་གྲུབ༴ བསོད་ནམས་ས་བོན་དམན་པས་རྒྱལ་སྲས་གཞན་གྱིས་སྤོང་བ་བཞིན་གྱུར་ཅིང་། །སྡིག་དང་སྡུག་བསྔལ་འདུ་བྱེད་རྦ་ལ་ཆེས་ཆེར་འཕྱན་པས་ཉམ་ཐག་པར། །བློ་ཆེན་ཁྱོད་ནི་ལྷག་པར་བརྩེ་བས་ཐུགས་རྗེའི་འཇུག་པ་མྱུར་ལ་ཟབ། །གྲགས་མཆོག་ས་ཡི་སྙིང་པོས༴ གང་གིས་ཁྱོད་མཚན་དྲན་པའི་མོད་ལ་བརྒྱད་གཉིས་འཇིགས་པའི་གཡུལ་ཟློག་ཅིང་། །རིན་ཆེན་འབྲུ་སྨན་ཟས་གོས་གནས་མལ་འཚོ་བའི་ཡོ་བྱད་མཁོ་དགུའི་རིགས། །མ་ཚང་མེད་པའི་འབྱོར་ཚོགས་སུག་པའི་མཐིལ་ན་གནས་པའི་གཏེར་བཞིན་འཐོབ། །གྲགས་མཆོག་ས་ཡི་སྙིང་པོས་གྲུབ་གཉིས་འདོད་པ་ཡིད་བཞིན་འཇོ་བར་མཛོད། །སྙོམས་འཇུག་ཕྲ་བ་གཅིག་གི་མཐུས་ཀྱང་རྡུལ་སྙེད་གྲངས་མཉམ་སངས་རྒྱས་ཞིང་། །བཀོད་པ་ཕུན་ཚོགས་ཡིད་བཞིན་སྤྲིན་གྱིས་ཀུན་ནས་བརྒྱན་ཅིང་སྐྱེ་དགུའི་ཚོགས། །ཟག་མེད་ཏིང་འཛིན་མཆོག་གི་དགའ་བས་ཆེས་ཆེར་མྱོས་པའི་དགེ་མཚན་འཛིན། །གྲགས་མཆོག་ས་ཡི་སྙིང་པོས༴ ཅིར་སྣང་གསོད་པའི་མཚོན་ཆར་མངོན་ཞིང་སུ་མཐོང་དགྲ་ཡི་དྭངས་མ་རུ། །འདུ་ཤེས་ལོག་པར་གྱུར་ཚེ་བྱམས་ཆེན་ཆར་གྱིས་ཁྲོ་བའི་མེ་བསད་ནས། །ཕན་ཚུན་མ་བུའི་གདུང་བས་རྩེ་དགའི་དུས་སྟོན་གསར་དུ་ངོམ་མཛད་པ། །གྲགས་མཆོག་ས་ཡི་སྙིང་པོས༴ སེར་སྣའི་འབྲས་གཟུགས་བཅུད་དུ་སྨིན་པས་ཀོ་ཊ་པ་ཡི་ཁ་ཟས་ཀྱང་། །མི་འབྱོར་ཡི་དྭགས་གཟུགས་ཅན་བཀྲེན་ལ་བརྩེ་བས་བཟའ་བཏུང་གོས་ཆར་གྱིས། །དབུལ་པོའི་གྲོང་ཡང་སུམ་རྩེན་གནས་བཞིན་ཀུན་ནས་འབྱོར་བར་མཛད་པ་ཡི། །གྲགས་མཆོག་ས་ཡི་སྙིང་པོས་གྲུབ་གཉིས༴ འཆོས་མེད་ནད་རིམས་གཤིན་རྗེ་ཁྲོས་པའི་གྲེ་བར་ཆུད་གྱུར་མགོན་མེད་འགྲོ། །མཆོག་བྱིན་གྲུབ་པའི་སྨན་གྱིས་ལེགས་གཞིལ་རིང་འཚོའི་སྲོག་གི་སྦྱིན་པ་སྩལ། །སྡིག་སེམས་ལུ་མའི་ཆུ་བོ་ཡེ་ཤེས་མེ་ཡིས་ལྷག་མེད་སྐེམ་མཛད་པ། །གྲགས་མཆོག་ས་ཡི་སྙིང་པོས༴ སྙིགས་ལྔའི་རྒུད་པའི་བ་མོ་གཞིལ་ལ་ཉིན་མོར་བྱེད་པའི་གཟི་འོད་ཆེ། །བརྟན་གཡོའི་དགེ་མཚན་ཆེས་ཆེར་སྤེལ་བྱེད་གདེངས་ཅན་དབང་པོའི་གཙུག་ནོར་མཆོག །སྲིད་ལམ་རྒྱུ་བའི་འཁྲུལ་འཁོར་གཞིག་ལ་གནམ་ལྕགས་ཐོག་གིས་མཚོན་མིན་པ། །གྲགས་མཆོག་ས་ཡི་སྙིང་པོས༴ །འཇམ་དཔལ་ཀུན་ཏུ་བཟང་སོགས་གངྒཱའི་བྱེ་སྙེད་རྒྱལ་སྲས་དཔའ་བོ་རྣམས། །ཁྲག་ཁྲིག་བསྐལ་པར་མཆོད་ལས་ཁྱོད་མཚན་སྐད་ཅིག་དྲན་གང་དོན་ཆེ་བར། །ཐུབ་གསུང་སེང་གེའི་སྒྲ་ཡིས་རྗེས་བསྔགས་དཔེ་ལས་འདས་པའི་ཡོན་ཏན་ཅན། །གྲགས་མཆོག་ས་ཡི་སྙིང་པོས་གྲུབ་གཉིས་འདོད་པ་ཡིད་བཞིན་འཇོ་བར་མཛོད། །སྲིད་དང་ཞི་བའི་དགེ་མཚན་མི་ནུབ་ནོར་བུའི་རྒྱལ་མཚན་ཆེ་མཐོ་བ། །སྲིད་མཐའི་བར་དུ་མཆོག་བྱིན་དཔུང་པས་ཡོངས་སུ་བཟུང་བའི་གྲིབ་བསིལ་ལ། །གྲོང་ཁྱེར་དྲུག་གི་འགྲོ་བ་མ་ལུས་བདེ་བར་ངལ་འཚོ་ཐོབ་པ་ཡི། །ས་འདི་དགའ་བ་བརྒྱ་ལྡན་གྲོང་བཞིན་ཀུན་ནས་འབྱོར་བའི་ཤིས་པ་སྩོལ། །བདག་ཀྱང་སྐྱེ་ཀུན་ས་ཡི་གཙོ་བོའི་ཐུགས་རྗེའི་ཉི་འོད་སྙིང་ལ་ཤར། །དཔག་ཡས་ཏིང་འཛིན་གཟུངས་སྤོབས་རྣམ་འཕྲུལ་ཡོན་ཏན་བྱེ་བའི་འདབ་སྟོང་བཞད། །གཞན་ཕན་ཕྲིན་ལས་སྦྲང་རྩིའི་དགའ་སྟོན་མུ་མེད་འགྲོ་ལ་འགྱེད་པ་ཡི། །དོན་གཉིས་ལྷུན་གྲུབ་བཀྲ་ཤིས་དཔལ་གྱིས་ཕྱོགས་དུས་ཀུན་ཏུ་ཁྱབ་གྱུར་ཅིག། ༈ ན་མ་སརྦཱ་བ་ར་ཎ་བི་ཀམྦྷཱ་ཡ། སེམས་ཅན་ཀུན་གཙོ་རྒྱལ་སྲས་ཚུལ་ཆེན་ཉོན་མོངས་དྲི་མ་ཀུན་ལས་འདས། །ཐུགས་རྗེ་ཆེན་པོ་སྒྲིབ་ཀུན་ངེས་འགྲོལ་ཡེ་ཤེས་རྣམ་ཐར་བསམ་མི་ཀྱབ། །གྲགས་མཆོག་རྒྱུ་སྐར་བྱེ་བའི་དབུས་ན་མཚན་མོའི་མགོན་ལྟར་ཆེས་འཕགས་པའི། །སྒྲིབ་པ་ཐམས་ཅད་རྣམ་པར་སེལ་བས་བདག་བློའི་ཀུན་འབྱུང་འཆིང་བ་ཁྲོལ། །མགོན་པོ་གང་དག་འདས་དང་མ་བྱོན་ད་ལྟར་བཞུགས་པའི་མི་མཆོག་རྣམས། །སློབ་ཚེ་བྱང་ཆུབ་དམ་པ་མཆོག་དེ་ཁྱོད་གཅིག་ཁོ་ནས་འཛིན་སྩལ་པའི། །ཡེ་ཤེས་སྒྱུ་མའི་རྣམ་འཕྲུལ་དཔག་ཡས་བློ་ཆེན་གཞན་གྱིས་གཞལ་དཀའི་གནས། །སྒྲིབ་པ་ཐམས་ཅད་རྣམ་པར་སེལ་བས་བདག་བློའི་ཀུན་འབྱུང་འཆིང་བ་ཁྲོལ། །འགྲོ་ཀུན་འཇམ་དཔལ་དབྱངས་དང་དེ་བཞིན་ཐེ་ཚོམ་སེལ་མའི་གནས་ཐོབ་ཀྱང་། །དཔའ་བོ་གང་གི་ཏིང་འཛིན་སྟོབས་དང་ཡེ་ཤེས་རྣམ་འཕྲུལ་ཚད་མེད་པའི། །རྣམ་ཐར་ཟབ་མོའི་བརྒྱ་ཕྲག་སྟོང་གི་ཆར་ཡང་ཉེ་བར་འགྱུར་མིན་པ། །སྒྲིབ་པ་ཐམས་ཅད་རྣམ་པ་སེལ་བས་བདག་བློའི་ཀུན་འབྱུང་འཆིང་བ་ཁྲོལ། །གང་གི་མཚན་ཙམ་ཐོས་པས་སྒྲིབ་པའི་དྲྭ་བ་མ་ལུས་འདྲལ་མཛད་ཅིང་། །ངན་སོང་གསུམ་དང་བུད་མེད་དམན་སོགས་སྲིད་པའི་སྡུག་བསྔལ་ཐ་མར་བྱེད། །བདེ་ནས་བདེ་བའི་འཇུག་ངོགས་ལ་བརྟེན་རྣམ་གྲོལ་དཔལ་ལ་སྦྱོར་མཛད་པ། །སྒྲིབ་པ་ཐམས་ཅད་རྣམ་པར་སེལ་བས༴ བློ་མཆོག་མངའ་བ་ཁྱོད་ཀྱི་ལེགས་བརྙེས་ཡེ་ཤེས་ཏིང་འཛིན་ཟབ་མོ་ཡི། །མིང་གི་རྣམ་གྲངས་ཙམ་ཡང་དཔའ་ཆེན་གཞན་གྱིས་བསྒྲང་བར་བཟོད་མིན་ན། །རྣམ་ཐར་རྒྱ་མཚོའི་ཚུལ་དང་མཉམ་པ་སྲིད་ཞིའི་ཁོངས་ན་ལྟ་ཅི་ཞིག །སྒྲིབ་པ་ཐམས་ཅད་རྣམ་པར་སེལ་བས༴ ཆོས་ཀུན་མཉམ་པ་ཉིད་དུ་གཟིགས་ཀྱང་གདུལ་བྱའི་ཞིང་ལ་བརྩེ་ཚུལ་སྟོན། །སྐྱེ་སོགས་སྤྲོས་པའི་མཚན་མ་བྲལ་ཡང་སྐྱེ་བའི་ཆོ་འཕྲུལ་འགགས་པ་མེད། །མེད་སྣང་སྒྱུ་མར་འཕྱན་པའི་འགྲོ་རྣམས་བྱང་ཆུབ་གསུམ་ལ་འགོད་མཛད་པ། །སྒྲིབ་པ་ཐམས་ཅད་རྣམ་པར་སེལ་བས༴ སྐྲ་རྩེའི་ཁྱོན་ལ་རྡུལ་སྙེད་ཞིང་གི་བཀོད་པ་རབ་འབྱམས་བསྐྲུན་བྱས་ནས། །སྐད་ཅིག་རེར་ཡང་སངས་རྒྱས་རྒྱ་མཚོ་མཆོད་སྤྲིན་རྒྱ་མཚོས་མཉེས་བྱེད་ཅིང། །ཆོས་མཛོད་རྒྱ་མཚོ་སྲུང་ཞིང་སེམས་ཅན་རྒྱ་མཚོ་ཡོངས་སུ་སྨིན་མཛད་པ། །སྒྲིབ་པ་ཐམས་ཅད་རྣམ་པར་སེལ་བས༴ སྒྲིབ་པའི་དྲི་མ་འཁྲུད་ལ་ཁྲུས་ཆབ་ལྟུང་ལས་ལྡང་བའི་འཁར་བ་སྟེ། །ཀུན་དཀྲིས་འཆིང་བ་གཅོད་པའི་རལ་གྲི་ནོར་བ་རྣམས་ཀྱི་ས་མཁན་མཆོག །འཇིགས་ལ་སྐྱེལ་མ་བརྒལ་འདོད་གྲུ་ཆེན་ཐར་འདོད་ཡོངས་ལ་མིག་སྦྱིན་པ། །སྒྲིབ་པ་ཐམས་ཅད་རྣམ་པར་སེལ་བས་བདག་བློའི་ཀུན་འབྱུང་འཆིང་བ་ཁྲོལ། །ཀྱེ་ཧུད་ཐོག་མ་མེད་ནས་ལུས་ཅན་སྙིང་ལ་ཉལ་བའི་མུན་པ་ཡིས། །ཡོངས་སུ་ཁེབས་པས་སྒྲིབ་པའི་ཁུར་པོ་ཤིན་ཏུ་ལྕི་བས་གནོན་པ་བདག །གདུང་གླུ་ལག་པ་གཡོབ་པའི་སྣང་ཚུལ་འདི་ལགས་སློང་བའི་དུས་ཀྱང་དེང་། །དུས་མཁྱེན་ཆེན་པོས་དགོངས་མཛོད་དུས་ལས་ཡོལ་མེད་ཐུགས་རྗེའི་ཕྱག་རྐྱོངས་ཤིག །སྒྲིབ་གསུམ་འཆིང་རྒྱ་དམ་པོས་བཅིང་གང་ཡེ་ཤེས་རལ་གྲི་རྣོན་པོས་ཆོད། །སྟོང་ཉིད་སྙིང་རྗེའི་བ་གམ་གསར་པ་རིག་པའི་ཁྱེའུ་ཆུང་གྲོགས་སུ་བྱིན། །གཟུགས་སྤོབས་ཏིང་འཛིན་རྣམ་འཕྲུལ་དཔག་ཡས་གཏེར་མཆོག་བྱེ་བའི་སྒོ་ཕྱེས་ལ། །སྒྲིབ་སེལ་ཆོས་ཀྱི་རྒྱལ་པོའི་སྲིད་ལ་དེ་རིང་ཉིད་ནས་འགོད་མཛོད་ཀྱཻ། །གང་མཚན་གྲགས་པའི་སྤྲིང་ཡིག་བཟང་པོས་སྐྱེ་དགུའི་རྣ་ལུང་མཛེས་བྱས་མཐུས། །ཕྲ་རྒྱས་མུན་པའི་གདོན་ཚོགས་མཐར་བསྐྲད་ཕྱིན་ལམ་རྒྱུ་བ་ཡོངས་སུ་བཅད། །རྣམ་གྲོལ་ཡོན་ཏན་བདུད་རྩིས་མི་ཤིགས་སྲོག་གི་ཀ་བ་བརླིང་བྱས་མཐུས། །བཀྲ་ཤིས་སྐྱེ་ལྔའི་སྒྲ་ཡིས་ས་གསུམ་འཇིག་རྟེན་ཀུན་ནས་སྙན་གྱུར་ཅིག། ༈ ན་མོ་ཨཱ་ཀཱ་ཤ་གརྦྷཱ་ཡ། གྲགས་པའི་གཏེར་མངའ་ཡོན་ཏན་བྱེ་བའི་རླབས་ཕྲེང་ཀུན་ནས་མཛེས་པ་ཅན། །ཆོས་ཀྱི་རྒྱལ་པོ་རྒྱལ་བའི་གདུང་འཛིན་ས་གསུམ་སྐྱེ་དགུ་སྐྱོང་བའི་གཉེན། །སངས་རྒྱས་ཆོས་རྣམས་ལྐོག་ཏུ་གྱུར་མིན་ཡེ་ཤེས་ཟབ་མོའི་སྤྱོད་ཡུལ་འཆང་། །དཔའ་ཆེན་ནམ་མཁའི་སྙིང་པོས་ལྟུང་བའི་རི་བོ་རྨང་ནས་བསྒྱེལ་མཛོད་ཀྱཻ། །རྒྱལ་སྲས་པདྨའི་དགའ་ཚལ་དབུས་ན་ཨུ་དུམྦཱར་ལྟར་འཕགས་ཤིང་། །དམུས་ལོང་དམིག་བུ་མེད་པ་བྱེ་བ་ཁྲག་ཁྲིག་སྒྲོལ་བའི་ལམ་སྟོན་མཆོག །ལྟུང་ལྡན་རྣམས་ཀྱི་འཁར་བ་གཅིག་པུ་བྱམས་བརྩེའི་དཀྱིལ་འཁོར་གང་བའི་ཟླ། །དཔའ་ཆེན་ནམ་མཁའི་སྙིང་པོས་ལྟུང་བའི་རི་བོ་རྨང་ནས་བསྒྱེལ་མཛད་ཀྱཻ། །ལྟ་ངན་ཆུ་སྲིན་གཏུམ་པོའི་ཁར་ཆུད་ཁོམ་མིན་རྦ་ལ་ཆེར་གཡེང་ཞིང་། །སྡུག་བསྔལ་གསུམ་གྱི་ཅ་ཅོ་ཆེར་སྒྲོགས་ཐར་པའི་སྲོག་རྩ་ཕྲར་གྱུར་གང་། །ཐུགས་བརྩེའི་ཕྱག་གིས་བདེ་བའི་ངལ་སྟེགས་མཆོག་ལ་དབུགས་དབྱུང་སྩལ་མཛད་པའི། །དཔའ་ཆེན་ནམ་མཁའི་སྙིང་པོས་ལྟུང་བའི་རི་བོ་རྨང་ནས་བསྒྱེལ་མཛོད་ཀྱཻ། །གདུལ་བྱའི་བློ་མཚོའི་ཁྱད་པར་དང་འཚམས་དམན་ཕལ་མཆོག་གི་གཟུགས་ཀྱིས་ནི། །དཔག་ཡས་ཐབས་ཚུལ་འཁྲུལ་འཁོར་བསྟན་དེས་ལྟུང་བའི་རྩ་བ་རྨང་ནས་འབྱིན། །སྐད་ཅིག་རེར་ཡང་གྲངས་མཐའ་ཡས་པའི་འགྲོ་ཁམས་རྒྱ་མཚོ་སྨིན་མཛད་པ། །དཔའ་ཆེན་ནམ་མཁའི་སྙིང་པོས༴ བསོད་ནམས་ཁྱུང་སྔོན་སྐྱེས་ཀྱི་ཤིང་རྟས་ཐུབ་བསྟན་ཉིན་བྱེད་དྲངས་མིན་པའི། །མཐའ་འཁོབ་མུན་ཁྲོད་མཚན་གྱི་པདྨོ་བཞིན་དུ་རྒུད་གྱུར་འགྲོ་རྣམས་ལ། །རྗེས་བརྩེའི་ཐུགས་རྗེའི་འོད་སྟོང་འགྱེད་པས་རྣམ་གྲོལ་གེ་སར་དགོད་མཛད་པ། །དཔའ་ཆེན་ནམ་མཁའི་སྙིང་པོས༴ གང་མཚན་ཏོག་གི་བློ་གྲོས་དད་བསོད་རྒྱལ་མཚན་རྩེ་མོར་ལེགས་མཆོད་ན། །སྲིད་པའི་ཟུག་རྔུ་བརྒྱ་ཕྲག་འབྱིན་དང་ལྷན་ཅིག་རྣམ་གྲོལ་ཡོན་ཏན་ཆར། །ཅི་དགར་འཇོ་བས་འགྲོ་བློའི་རེ་བའི་བང་མཛོད་མི་འགེངས་སྲིད་མ་ལགས། །དཔའ་ཆེན་ནམ་མཁའི་སྙིང་པོས༴ སངས་རྒྱས་ཉག་གཅིག་ལས་གཞན་བློ་མཆོག་སྨྲ་བའི་ཟླ་བ་མཆིས་ཀུན་གྱི། །བསྟི་བསྟང་བདུད་རྩིའི་ཟེར་གྱིས་ཁྱོད་ཞབས་ཀུན་དཱའི་གེ་སར་བསྙེན་འོས་པར། །ཐུབ་པས་རྗེས་བསྔགས་སྲིད་པ་གསུམ་གྱི་མཆོད་སྡོང་ཟླ་མེད་གཅིག་པུ་པ། །དཔའ་ཆེན་ནམ་མཁའི་སྙིང་པོས༴ སྡིག་སེམས་མེ་དཔུང་གཞིལ་ལ་ཆུ་བོ་བག་ཆགས་ཚང་ཚིང་གཏོར་བའི་རླུང་། །བསླབ་གསུམ་དྲི་མ་བགྲུང་ལ་ནོར་བུ་ཁྲེལ་དང་ངོ་ཚས་གཅེར་ལ་གོས། །མཐོ་རིས་བགྲོད་པའི་ཐེམ་སྐས་སྲིད་ལས་བརྒལ་འདོད་རྣམས་ཀྱི་ཟམ་པ་མཆོག །དཔའ་ཆེན་ནམ་མཁའི་སྙིང་པོས་ལྟུང་བའི་རི་བོ་རྨང་ནས་བསྒྱེལ་མཛོད་ཀྱཻ། །ཀུན་རྨོངས་མུན་པའི་དྲྭ་བས་ཡོངས་ཁེབས་ཉོན་མོངས་དགྲ་ཡི་སྐབས་བཙལ་ཞིང་། །བག་ཡོད་དགེ་བའི་གྲོགས་བྲལ་ལྟུང་བའི་གཡང་སར་འཛེམ་མེད་རྒྱུ་བ་བདག །ཁྱོད་མཚན་རྗེས་སུ་དྲན་པའི་འཁར་བ་ཙམ་ལ་བརྟེན་འདི་གཟིགས་ལགས་སམ། །ཚད་མེད་ཐུགས་རྗེ་ཆེན་པོའི་དཔྱང་ཐག་ལ་འུར་རྐྱོངས་མཛོད་ས་བཅུའི་དབང་། །ཤིན་ཏུ་རྒྱས་པའི་ཞལ་རས་དྲི་མེད་མིག་གི་བདུད་རྩིར་སོན་པ་དང་། །ཆབས་ཅིག་ཐབས་ཚུལ་ཟབ་མོའི་ཐུར་མས་ཉེས་ལྟུང་རབ་རིབ་འབུམ་བསལ་ནས། །བློ་མིག་དག་པའི་མཁའ་ལ་ཡེ་ཤེས་ཉི་མའི་དཀྱིལ་འཁོར་ཡོངས་བརྡལ་ཏེ། །འཕགས་པ་དགྱེས་པའི་རྣམ་ཐར་གཙང་མས་སྐྱེ་བ་ཀུན་ཏུ་མཛེས་བྱིན་རློབས། །འགྲོ་སེམས་གཙང་མའི་མཁའ་ལ་ནམ་སྙིང་ཐུགས་རྗེའི་སྤྲིན་ཆེན་རབ་དཀྲིགས་ཏེ། །བྱིན་རླབས་བདུད་རྩིའི་ཆར་གྱིས་སྡིག་ལྟུང་ཉོན་མོངས་དྲི་ཚོགས་འཁྲུད་བྱས་ནས། །རྨད་བྱུང་བྱང་ཆུབ་སེམས་ཀྱི་ལང་ཚོ་ཀུན་ནས་དར་བའི་མཛའ་ན་མོ། །བཀྲ་ཤིས་རྣམ་གྲོལ་ཡོན་ཏན་འབྱོར་པས་ཕྱོགས་ཀུན་བདེ་ལེགས་བྱེད་གྱུར་ཅིག། ༈ ན་མསྶམནྟ་བྷ་དྲཱ་ཡ། ཆོས་དབྱིངས་མཁའ་མཐའ་སེམས་ཅན་ཁམས་དང་ཇི་སྲིད་ལས་ཉོན་མཐས་གཏུགས་པ། །དེ་སྲིད་མི་སྐྱོའི་བརྩོན་པའི་གོ་བགོས་འབུམ་ཕྲག་བཅུ་ཡི་སྨོན་ལམ་དཔུང་། །རྗེས་བསྐུལ་དཔའ་བོ་ཁྱོད་ནི་གྲགས་མཆོག་ཉེ་དབང་དབུས་ན་རྡོ་རྗེ་ཅན། །བློ་ཆེན་ཀུན་ཏུ་བཟང་པོས་རྣམ་ཐར་རྗེས་སུ་སྙོགས་ནུས་བྱིན་རླབས་སྩོལ། །དུས་གསུམ་གཤེགས་དང་བཞུགས་ལ་འབྱོན་འགྱུར་དཔལ་ལྡན་སྟོབས་བཅུ་མངའ་རྣམས་ཀྱི། །རླབས་ཆེན་རྫོགས་སྨིན་སྦྱངས་པ་རྒྱ་མཚོའི་རྣམ་ཐར་ཆུ་ཀླུང་བྱེ་བ་སྙེད། །མ་ལུས་ཀུན་ནས་ཡོངས་བསྡོམས་སྔོན་མེད་གངས་ཆེན་མཚོ་ཡི་བཀོད་པ་ཅན། །བློ་ཆེན་ཀུན་ཏུ་བཟང་པོས་རྣམ་ཐར་རྗེས་སུ་སྙོགས་ནས་བྱིན་རླབས་སྩོལ། །ཕྱོགས་བཅུའི་ཞིང་ཁམས་བརྗོད་དུ་མེད་པའི་ཕྲ་རབ་རྡུལ་གྱི་གྲངས་མཉམ་ཞིང་། །ཆོས་ཀྱི་དབྱིངས་ཆེན་རྒྱས་པར་དཀྲིགས་པའི་ཕུལ་བྱུང་མཆོད་པའི་སྤྲིན་ཆེན་པོས། །མི་མཆོག་སློབ་མར་བཅས་ཀུན་བསྙེན་དང་དམ་ཆོས་རིན་ཆེན་མཛོད་འཛིན་པ། །བློ་ཆེན་ཀུན་ཏུ་བཟང་པོས་རྣམ་ཐར་རྗེས་སུ་སྙོགས་ནུས་བྱིན་རླབས་སྩོལ། །བསྐལ་པ་རྒྱ་མཚོར་མི་སྐྱོ་བརྩོན་པས་ཞིང་ཁམས་རྒྱ་མཚོ་ཡོངས་བཟུང་ཞིང་། །སྤྱོད་པ་རྒྱ་མཚོས་ས་ཀུན་ཡོངས་རྫོགས་གདུལ་བྱ་རྒྱ་མཚོ་སྨིན་མཛད་པའི། །སྨོན་ལམ་རྒྱ་མཚོ་རྗེས་སུ་སྒྲོགས་པའི་རྣམ་ཐར་རྒྱ་མཚོའི་སྤྲིན་བཀོད་པ། །བློ་ཆེན་ཀུན་ཏུ་བཟང་པོས༴ སྐུ་གཅིག་གིས་ཀྱང་ཞིང་ཁམས་ཀུན་འགེངས་དབྱངས་གཅིག་འགྲོ་ཀུན་རྣ་བར་འཇེབས། །ཏིང་འཛིན་གཅིག་གིས་འགྲོ་ཀུན་སྨིན་མཛད་ཡེ་ཤེས་གཅིག་གིས་ཆོས་ཀུན་གཟིགས། །ཁྱོད་གཅིག་ཁོ་ནའི་ཡོན་ཏན་བསྔགས་པ་ཕྱོགས་བཅུའི་འདྲེན་པ་ཡོངས་ཀྱིས་སྒྲོགས། །བློ་ཆེན་ཀུན་ཏུ་བཟང་པོས༴ ཁྱོད་ནི་འབྱུང་བ་རྣམས་ལས་མཁའ་སྟེ་སྣང་བ་རྣམས་ལས་ཉིན་མོར་བྱེད། །མི་དབང་རྣམས་ལས་འཁོར་ལོས་སྒྱུར་མཆོག་རྒྱལ་སྲས་ནང་ནས་ཐུ་བོ་སྟེ། །ཡོན་ཏན་ཕྲ་བའི་ཆ་ཤས་ཙམ་ཡང་བརྗོད་ལ་འཕགས་རྣམས་ངལ་བ་འཛིན། །བློ་ཆེན་ཀུན་ཏུ་བཟང་པོས༴ ཁྱོད་ཀྱི་རྣམ་ཐར་ཟབ་མོ་བསྒྲུབས་པས་ལམ་མཐར་ཕྱིན་རྣམས་གདོད་གཞིར་གཤེགས། །ལམ་ཞུགས་ཀུན་ཀྱང་བྱང་ཆུབ་ཕྱོགས་ཆོས་གསེར་གྱི་པདྨོ་རྣམ་པར་བཞད། །མོས་པས་སྤྱོད་པའང་དད་པའི་སྲབ་སྐྱོགས་དགེ་ལ་བསྒྱུར་བའི་གནས་གཅིག་པུ། །བློ་ཆེན་ཀུན་ཏུ་བཟང་པོས༴ སྲིད་འགྲོར་བྱིང་བ་རྣམས་ཀྱི་མགོན་གཅིག་ཕོངས་པ་ཡོངས་ཀྱི་གཏེར་གཅིག་པུ། །དགེ་རྩ་ཆུང་བ་རྣམས་ཀྱི་རྟེན་གཅིག་ལམ་གོལ་ཡོངས་ཀྱི་མིག་གཅིག་པུ། །ལམ་འཚོལ་གསར་བུ་རྣམས་ཀྱི་བཤེས་གཅིག་སར་གནས་ཡོངས་ཀྱི་གྲོགས་གཅིག་པུ། །བློ་ཆེན་ཀུན་ཏུ་བཟང་པོས་རྣམ་ཐར་རྗེས་སུ་སྙོགས་ནུས་བྱིན་རླབས་སྩོལ། །ཇི་ལྟར་མཚན་མོ་མུན་ནག་སྤྲིན་རུམ་གློག་འགྱུ་སྐད་ཅིག་སྣང་བ་ལྟར། །ཁྱོད་མཚན་ཐོས་པའི་སྐལ་བཟང་ཡུད་ཙམ་དད་པའི་སྤུ་ལོང་གཡོ་བྱེད་ཀྱང་། །ཐོག་མེད་གོམས་པའི་བག་ཆགས་གདོན་གྱིས་ཀུན་ནས་གཙེས་གྱུར་ཉམ་ཐག་བདག །སྨོན་པའི་ཤིང་རྟས་ཉེར་དྲངས་ཀུན་བཟང་སྤྱོད་པ་རྒྱ་མཚོར་སྦྱོར་མཛོད་ཀྱཻ། །དད་པའི་མཚོ་ཆུང་སྨོན་ལམ་བསིར་བུས་བསྐྱོད་པའི་རླབས་ཕྲེང་འདི་ལགས་ན། །འཕགས་པའི་བྱིན་རླབས་གདེངས་ཅན་དབང་པོས་ཉེ་བར་བརྟེན་པའི་གནས་ཐོབ་ནས། །རྫོགས་སྨིན་སྦྱངས་པའི་ཡོན་ཏན་ཡོངས་གང་རྣམ་ཐར་རྒྱ་མཚོར་རོ་གཅིག་ཏུ། །ཟླུམ་པའི་སྐལ་བཟང་ལ་འུར་སྩོལ་མཛོད་ཀུན་ཏུ་བཟང་དངོས་བླ་མ་རྗེ། །མཐའ་ཀླས་འགྲོ་ཀུན་སྲིད་ལམ་རྒྱུན་ཆད་བདེ་ལྡན་པདྨའི་གེ་སར་རྩེར། །སངས་རྒྱས་སྲས་ཀྱིས་བསྐོར་བའི་མགོན་མཐོང་བྱང་ཆུབ་ལུང་བསྟན་བསྩལ་ནས་ཀྱང་། །དོན་མཐུན་སེམས་དཔའ་རྣམས་དང་སྤྱོད་པ་གཅིག་པས་ལམ་ལྔའི་རྩེར་གཤེགས་པའི། །བཀྲ་ཤིས་ངོ་མཚར་འབུམ་གྱི་སྒྲ་དབྱངས་རྒྱུན་མི་འཆད་པར་སྒྲོགས་གྱུར་ཅིག །ཅེས་སྙིགས་ལྔའི་འགྲོ་བ་ཡོངས་ལ་བཀའ་དྲིན་དང་རྣམ་ཐར་བསམ་མི་ཁྱབ་པའི་བདག་ཉིད་ཅན། བསྐལ་པ་བྱེ་བ་དུ་མར་མཚན་གྱི་སྒྲ་ཙམ་ཡང་ཐོས་པར་དཀའ་བ། མཉམ་མེད་ཤཱཀྱའི་རྒྱལ་པོ་དང་བྱང་ཆུབ་སེམས་དཔའ་ཉེ་བའི་སྲས་ཆེན་བརྒྱད་ཀྱི་རྣམ་ཐར་ཕྱོགས་གཅིག་གི་ཆ་ཤས་ལ་བསྔགས་ཤིང་གསོལ་བ་འདེབས་པའི་ཚིགས་སུ་བཅད་པ་ཉུང་ངུ་འདི་དག་ཀྱང་དགེ་བའི་བཤེས་གཉེན་སྐུ་དྲིན་དང་ལྡན་པ་པདྨ་དབང་ཆེན་གྱིས་བསྐུལ་བའི་རྐྱེན་ལས་མི་ཕྱེད་པའི་དད་པས་ཀུན་ནས་བསླངས་ཏེ། ཤིང་རྟ་ཆེན་པོ་ཀུན་མཁྱེན་བློ་གྲོས་མཐའ་ཡས་ཀྱི་ཞབས་ཀྱི་ཆུ་སྐྱེས་སྤྱི་བོས་ལེན་པའི་བཙུན་པ་གཞན་ཕན་ཆོས་ཀྱི་བློ་གྲོས་དབྱངས་ཅན་དགྱེས་པའི་སྡེས་བདེ་ཆེན་པདྨ་འོད་གླིང་གི་དབེན་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བྲིས་ཤིང་གསོལ་བ་བཏབ་པ་སངས་རྒྱས་སྲས་དང་བཅས་པའི་ཡེ་ཤེས་ཆེན་པོའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག། །།