ཡེ་ཤེས་མཁའ་འགྲོ་སེང་གེའི་གདོང་པ་ཅན་ལ་བསྟོད་ཅིང་གསོལ་བ་འདེབས་པ་བདུད་ལས་རྣམ་པར་རྒྱལ་བའི་དགའ་སྟོན།

༄༅། །ཡེ་ཤེས་མཁའ་འགྲོ་སེང་གེའི་གདོང་པ་ཅན་ལ་བསྟོད་ཅིང་གསོལ་བ་འདེབས་པ་བདུད་ལས་རྣམ་པར་རྒྱལ་བའི་དགའ་སྟོན་ཞེས་བྱ་བ། ན་མོ་ཛྙཱ་ན་ཌཱ་ཀི་སེདྷ་མུ་ཁ་ཡཻ། མཚན་རྟོག་སྤྲོས་དང་མཛའ་མིན་དེ་བཞིན་ཉིད། །གདུལ་དཀའི་འགྲོ་ལ་ལྷག་པར་རྗེེས་བརྩེའི་གར། །དྲན་པས་བདུད་བཞིའི་འཇིགས་འཕྲོག་སེང་ཞལ་ཅན། །འབྲལ་མེད་མི་ཤིགས་དྭངས་མའི་ཐིག་ལེར་བསྟི། ༡ །དག་པ་གཉིས་ལྡན་སྟོང་དབྱིངས་ཌཱ་ཀི་ནི། །ཡེ་ཤེས་རང་གསལ་ཐབས་ཀྱི་དཔའ་བོ་དང་། །ཡེ་ནས་འབྲལ་མེད་ཉིད་དང་འོད་ཟེར་བཞིན། །ཐིག་ལེ་ཉག་གཅིག་སྤྲོས་པའི་སྤྱོད་ཡུལ་ཅི། ༢ །ངེས་དོན་རྡོ་རྗེ་བཙུན་མོའི་བྷ་ག་ནས། །ཆགས་མེད་ཆགས་པ་ཆེན་པོའི་ཡེ་ཤེས་མདངས། །རབ་འབྱམས་རྩ་གསུམ་འཁོར་ལོའི་སྤྲིན་ཆེན་པོ། །སྤྲོ་དང་སྡུད་པའི་ངང་ཚུལ་བསམ་མི་ཁྱབ། ༣ །ཞི་ལ་ཞི་ཚུལ་སྒེག་པའི་ལང་ཚོ་ཅན། །ཁྲོ་ལ་ཁྲོ་ཚུལ་རྔམས་པའི་གད་རྒྱངས་ཀྱིས། །སྲིད་པའི་དམ་བཅའ་རྡུལ་དུ་གཞིག་མོད་ཀྱི། །ཆོས་ཉིད་གཤིས་ལས་གཞར་ཡང་མ་གཡོས་མཚར། ༤ །གནམ་སྔོོན་བཞུས་པའི་ཁུ་བས་ལན་སྟོང་དུ། །བྱུགས་པའི་བཻཌཱུར་ལྷུན་པོར་ཉི་འབུམ་གྱི། །གཟི་དང་དུས་མེས་འཁྱུད་འདྲའི་འཇིགས་རུང་གར། །ལོག་འདྲེན་སྙིང་གི་མུན་པ་གཅིག་ཏུ་གྱུར། ༥ །འཇིགས་རུང་གནམ་ས་གདང་འདྲའི་སེང་ཞལ་ལས། །འབྲུག་སྟོང་ལྡིར་བས་མཚོན་མིན་ང་རོའི་སྒྲས། །བདུད་རིས་ཝ་སྐྱེས་བྱེ་བའི་དོན་སྙིང་ཚོགས། །ཁྱུར་ཁྱུར་ཁ་སྒོར་འཕེན་པའི་ཆོ་ག་སྒྲུབ། ༦ །གཞན་སྡེའི་མགོ་བོ་འདམ་བུའི་ཚལ་བུ་བཞིན། །འབྲེག་བྱེད་ཁོང་ཁྲག་གིས་དམར་གྲི་གུག་དང་། །སྙིང་ཁྲག་དྲོད་རླངས་འཕྱུར་བའི་དུང་ཞལ་མཆོག །དྲན་ཚེ་ཡིད་སྲུབ་བསོད་ནམས་མངལ་གནས་ལྷུང་། ༧ །ཁྲོས་པའི་ཞལ་རས་ཆར་སྤྲིན་སྟུག་པོའི་ངོགས། །སྡང་མིག་གློག་ཕྲེང་གཡོ་བའི་གར་སྟབས་བཅས། །རྡོ་རྗེའི་ཚྭ་ཚྭ་འཕྲོ་བས་ཏརྐའི་སྡེ། །རྩ་སྦུར་ཕྲ་ལ་དུས་མཐའི་མེ་ཆེན་བཞིན། ༨ །ཁྱོད་མཚན་དྲན་པས་བྱད་མ་འབུམ་གྱི་སྙིང་། །དུམ་བུ་སྟོང་དུ་འཐོར་བའི་དཔལ་མངའ་ན། །ག་ཤ་མི་མགོའི་ཕྲེང་བ་སྟག་ཤམ་སོགས། །འཇིགས་གཟུགས་རྔམ་པའི་ཆས་ཀྱི་དགོས་པ་གང་། ༩ །མཚོ་སྐྱེས་རྡོ་རྗེ་བ་རི་ལོ་ཙཱ་བ། །སངས་རྒྱས་མགོན་སོགས་གྲུབ་མཆོག་བྱེ་བ་ཡིས། །ཁྱོད་ཞབས་བརྟེན་པས་བདུད་བཞི་ལས་རྒྱལ་གཏམ། །སྒྲོག་འདིས་ས་འདི་འཕུར་འགྲོའི་ཞིང་ལས་ལྷག ༡༠ །དུག་ལྔ་དག་པ་ཡེ་ཤེས་ལྔ་ཡི་འཕྲུལ། །དཀར་སེར་དམར་ལྗང་སྣ་ཚོགས་བཀོད་པ་ཡིས། །གྲུབ་གཉིས་འདོད་དགུར་སྦྱིན་ལ་མི་མཚར་ཡང་། །སློང་བར་སྤྲོ་བའི་འགྲོ་འདི་སྐལ་བ་བཟང་། ༡༡ །ཨེ་མ་གཅན་གཟན་ཁྲོད་ན་རི་དྭགས་རྒྱལ། །འདབ་བཟང་ནང་ན་ཀླུ་རྒྱལ་ཟིལ་གནོན་ལེན། །རིན་ཆེན་ཕལ་ལས་རྡོ་རྗེ་ཕ་ལམ་བཞིན། །རིགས་སྔགས་ཀུན་ལས་ཁྱོད་ཀྱི་སྙིང་པོ་མཆོག ༡༢ །དམ་བཅའ་བདུན་ལྡན་བརྒྱ་བྱིན་ལག་ཉལ་དང་། །དྲང་སྲོང་ཁྲོས་པའི་དམོད་པའི་དུག་ཆུ་ཡང་། །འདི་དང་འཕྲད་ན་བྱེ་མའི་ཆང་བུ་བཞིན། །འཇིལ་བར་ནུས་ན་གཞན་ལྟ་སྨོས་ཅི་འཚལ། ༡༣ །ཞི་ལ་གནས་ཀྱང་འབར་བའི་ཕྱག་རྒྱར་བཞེངས། །དྲག་པོར་ཁྲོས་ཀྱང་སྙིང་རྗེའི་གཞན་དབང་ཅན། །དུ་མར་འཕྲོ་ཡང་ཆོས་དབྱིངས་གཅིག་གི་རྩལ། །ཁྱོད་ཀྱི་སྒྱུ་མའི་ཚུལ་འདི་སུ་ཡིས་ཤེས། ༡༤ །ལོག་པར་བལྟ་རྣམས་ཞི་བའི་སྲིང་མོ་མཆོད། །བདག་གིས་བཅོམ་ལྡན་འདས་མ་ཁྱོད་ཁོ་ན། །དེ་ནི་བརྩེ་མེད་བ་ལང་གསོད་ལ་དགའ། །ཁྱོད་ནི་འགྲོ་ཀུན་འཇིགས་ལས་སྲུང་ལ་བརྩོན། ༡༥། ཉི་སྲས་འཛུམ་ཀྱང་ཕ་རོལ་སྲོག་ལ་གཟན། །མ་ཁྱོད་དྲག་པོར་ཁྲོས་ཀྱང་ཕན་པ་སྦྱིན། །ཀིམ་པ{ཀིམྦཱ}འི་འབྲས་བུ་ཞིམ་ཡང་ཕུང་ཀྲོལ་དང་། །རྩུབ་མོའི་དཔྱད་ཀྱིས་ཟུག་རྔུ་འབྱིན་མིན་ནམ། ༡༦ །རྒྱལ་རྣམས་ཐུགས་རྗེའི་ཕྱག་གིས་ཡོངས་བཏང་བའི། །ལོག་སྲེད་དུག་གི་འབྲས་བུ་སྨིན་པ་རྣམས། །དྲག་པོའི་མཚོན་གྱིས་སྲིན་རྩའི་མྱུ་གུའི་རྒྱུན། །གཅོད་འདི་ཐབས་ཀྱི་ནང་ནས་ཐབས་ཆེན་ལགས། ༡༧ །རིགས་ཆད་འགྲོ་ལ་ལྷག་པར་གཟིགས་པའི་སྤྱན། །སྙིང་རྗེའི་ནང་ནས་སྙིང་རྗེ་ཆེན་པོ་སྟེ། །མེ་ཏོག་ནང་ནས་པདྨ་དཀར་པོ་བཞིན། །འདི་དང་མཉམ་པའི་ཕྲིན་ལས་གཞན་ཡོད་མིན། ༡༨ །ཨེ་མ་ཨེ་མ་ངོ་མཚར་རྨད་ཀྱི་ཆོས། །གདུལ་དཀའི་སྙིགས་འགྲོ་རྒྱལ་བས་སྤངས་རྣམས་ལ། །ལྷག་པར་རྗེས་བརྩེས་དྲག་ཏུ་ཁྲོས་པའི་མ། །ཁྱོད་ཉིད་བཞུགས་པས་མགོན་དང་བཅས་པ་ལགས། ༡༩ །ཁྱོད་ཞབས་བསྟེན་པའི་སྐྱེ་བོ་སྐལ་བཟང་ལ། །ནམ་ཡང་བདུད་དགྲའི་འཚེ་བ་མི་སྲིད་ཀྱང་། །སྐལ་ཉེས་བདག་ནི་རང་གི་ནོངས་པ་ཡིས། །གྲིབ་བསིལ་མཆོག་ཀྱང་བསྐལ་པ་བཞིན་དུ་གྱུར། ༢༠ །དུས་དྲུག་འགྲོ་ལ་གཟིགས་པའི་རྗེས་བརྩེའི་སྤྱན། །སྟོང་ཁམས་ཡོངས་ལ་སྙོམས་པོར་སྤྲོ་ལགས་ཀྱང་། །བདག་འདྲ་སྙིགས་མའི་རྒུད་པས་ནོན་པ་འདི། །མ་གཟིགས་ཀྱེ་མ་བདག་ནི་སྡུག་བསྔལ་ལོ། ༢༡ །འདི་ན་སྐྱེ་བོ་ཕལ་དག་སློང་བའི་ངག །ཐོས་ན་སྦྱིན་པའི་གོ་སྐབས་བགྱིད་ལགས་ན། །བདག་འདྲ་ཉམ་ཆུང་གདུང་བའི་སྨྲེ་སྔགས་ཚིག །ཀྱེ་མ་མ་ཡིས་ཅི་ཕྱིར་གསན་མ་གྱུར། ༢༢ །བདག་ནི་རྟག་པར་བཅོམ་ལྡན་མ་ཁྱོད་ལས། །རྨི་ལམ་དུའང་སྐྱབས་གཞན་མི་འཚོལ་ན། །མི་མཐུན་ཕྱོགས་ལས་རྣམ་པར་རྒྱལ་བ་ཡི། །མཆོག་དེ་དེ་རིང་ཉིད་ནས་སྩལ་དུ་གསོལ། ༢༣ །འབར་བའི་མིག་གིས་བདུད་ཚོགས་ཕྱེ་མར་རློགས། །འཇིགས་པའི་རྐུང་འཕྲང་དྲག་པོའི་ང་རོས་ཆོམས། །རིགས་སྔགས་དབལ་གྱིས་བྱད་མ་རང་གཤེད་ཕོབས། །ཞིང་བཅུའི་ལོག་འདྲེན་སྙིང་ཁྲག་ལྷག་མེད་རོལ། ༢༤ །བྱམས་པའི་སྤྱན་གྱིས་སྒྲུབ་པ་པོ་ལ་གཟིགས། །ཐུགས་རྗེའི་ཟེར་གྱིས་ཉེས་བརྒྱའི་མུན་པ་སོལ། །གྲུབ་གཉིས་ཆར་གྱིས་ཡིད་ཀྱི་ཤིང་རྟ་ཁོངས། །ཡེ་ཤེས་ཟེགས་མ་སྙིང་ལ་སིམ་པར་མཛོད། ༢༥ །སྣང་གྲགས་རྟོག་གསུམ་རྡོ་རྗེ་གསུམ་དུ་སྨིན། །རྩ་རླུང་ཐིག་ལེ་ཡེ་ཤེས་ཆེན་པོར་གྲོལ། །སྤྱོད་དང་ཉེ་རྒྱུའི་བརྟུལ་ཞུགས་མཐར་ཕྱིན་ནས། །ཟུང་འཇུག་འབྲས་བུ་ཚེ་འདིར་འབྱིན་པར་མཛོད། ༢༦ །གནས་སྐབས་ཀུན་ཏུ་ཁྱོད་ཞབས་གེ་སར་རྡུལ། །གནས་ལྔའི་ལྕུག་ཕྲན་རྩེ་ནས་གཡོ་མིན་པར། །འཇིག་རྟེན་འཇིག་རྟེན་འདས་པའི་དགེ་མཚན་གྱིས། །མཐའ་ཀླས་སྐྱེ་དགུའི་བུང་བ་དགའ་བྱེད་ཤོག ༢༧ །ཅེས་པའང་ལྷག་པའི་ལྷ་མོ་ཉིད་ལ་རྟག་པར་གུས་པའི་བཙུན་པ་འགྱུར་མེད་པདྨ་རྣམ་རྒྱལ་གྱིས་བྲིས་ཤིང་གསོལ་བ་བཏབ་པ་འབྲེལ་བཅས་བདུད་བཞིའི་གཡུལ་ལས་རྣམ་པར་རྒྱལ་བའི་རྒྱུར་གྱུར་ཅིག