གཏེར་གསར་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་བླ་མ་སྨྲ་བའི་སེང་གེའི་དཀྱིལ་འཁོར་ལ་བསྟོད་པ་གྲུབ་པ་ངག་གི་དཔལ་སྐྱེད།

༄༅། །གཏེར་གསར་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་བླ་མ་སྨྲ་བའི་སེང་གེའི་དཀྱིལ་འཁོར་ལ་བསྟོད་པ་གྲུབ་པ་ངག་གི་དཔལ་སྐྱེད་ཅེས་བྱ་བ། གུ་རུ་བློ་ལྡན་མཆོག་སྲས་ལ་ཕྱག་འཚལ་ལོ། །རྒྱལ་ཀུན་ཡེ་ཤེས་གཅིག་བསྡུས་ཟ་མ་ཏོག །དྲན་པས་བློ་ཡིས་མུན་ཀུན་སེལ་བའི་དཔལ། །ཡང་ལེ་ཤོད་ཀྱི་པཎ་ཆེན་སརྦ་ཛྙཱ། །རབ་འབྱམས་ཞིང་གི་རྒྱལ་རྣམས་མགྲིན་གཅིག་བསྔགས། །གང་གིས་ལུས་པ་མེད་པའི་ཞིང་ཀུན་ན། །རྒྱལ་བ་རྒྱ་མཚོའི་རྣམ་ཐར་ཁུར་བཞེས་ནས། །ཀུན་བཟང་སྤྱོད་པ་རྒྱ་མཚོ་རྗེས་སྒྲུབ་པས། །ཕྱོགས་རེར་གཞལ་བའི་བློ་འདི་རྨོངས་པའི་མཚང་། །རྒྱལ་བའི་ཡོན་ཏན་རྒྱལ་བ་ཉིད་ཀྱིས་མཁྱེན། །གཞན་དུ་ས་བཅུའི་དབང་ཕྱུག་ངག་གིས་ཀྱང་། །རྟོགས་པ་མིན་ན་བྱིས་བློས་ཇི་ལྟར་གཞལ། །རྣམ་ཐར་བསམ་མི་ཁྱབ་ལ་ཡིད་རབ་གཡོ། །མི་མཇེད་ཞིང་དུ་ཐུབ་པའི་བསྟན་པ་ལ། །རྒྱ་མཚོར་སྐུ་འཁྲུངས་ཨོ་རྒྱན་རྒྱལ་སྲས་ཚུལ། །བརྟུལ་ཞུགས་སྤྱོད་པས་སྒྲོར་སྐུར་གཡང་ས་བཅད། །གྲུབ་གཉིས་རྩལ་རྫོགས་མི་ཡི་སེང་གེར་གྲགས། །མདོ་རྒྱུད་ཤེས་བྱའི་ཆོས་ཀུན་ཐུགས་སུ་ཆུབ། །ཕས་རྒོལ་གདུག་པའི་ཚོགས་རྣམས་ཕྱེ་མར་བརླག །འཕགས་བོད་ཀུན་ན་སྟོན་པ་གཉིས་པར་གྲུབ། །རྣམ་ཐར་བཀའ་དྲིན་བསམ་མི་ཁྱབ་ལ་དད། །རྡོ་རྗེ་སྐུ་ནི་བགྲེས་རྒུད་མཚན་མ་བྲལ། །ཚངས་པའི་གསུང་དབྱངས་འགྲོ་ལ་ཆོས་སྒྲ་སྒྲོགས། །མཁྱེན་བརྩེའི་ཡེ་ཤེས་གཏིང་མཐའ་བྲལ་བའི་ཐུགས། །ཡོན་ཏན་ཕྲིན་ལས་མཁའ་མཉམ་བརྡལ་བ་ཆེ། །དངོས་གཅིག་དུ་མར་འཆར་བའི་རོལ་རྩེད་ནི། །འགྲོ་བློའི་མོས་པའི་རྗེས་འགྲོ་འདུལ་བ་བཞིས། །གནས་སྐབས་མཐར་ཐུག་རེ་ཞིང་འདོད་པའི་དོན། །ཅི་དགར་སྦྱིན་འདི་འཕགས་པའི་རང་གཤིས་ལགས། །གང་ལ་རང་དོན་སེམས་པ་ཡོད་མིན་པས། །སྐུ་ཉིད་གཞན་ཕན་ཁོ་ནས་བསྐྲུན་པའི་ཕྱིར། །འཁོར་མཚོ་དོང་སྤྲུགས་རང་གི་མཛད་པ་ལ། །ངང་གིས་འཇུག་པའི་ཆོས་ཉིད་སུ་ཡིས་འགོག །སྣང་ཚུལ་དབང་གིས་སུ་ཞིག་དད་དམ་ཁྲོ། །བསྟོད་དང་སྨད་སོགས་གང་ལྟར་བྱས་ཀྱང་རུང་། །ཁྱོད་ནི་བུ་གཅིག་མ་ལྟར་ཀུན་ལ་སྙོམས། །དེ་དག་སྡིག་ཟད་ཉོན་མོངས་མེད་ལ་སྦྱོར། །ཁྱད་པར་ཐུགས་རྗེས་བཟུང་བ་བྷོ་ཊའི་ལྗོངས། །སྣང་མུན་དུས་དྲུག་གཟིགས་པའི་ཉེར་ལེན་གྱིས། །དོན་གཉིས་ནོར་བུའི་གཏེར་མཛོད་འདི་འོ་ཞེས། །སྦྱིན་པའི་ཕྱག་ཡངས་བརྐྱང་འདི་མ་མཐོང་ནོངས། །དུས་གསུམ་སྒྲིབ་མེད་གཟིགས་པའི་ཡེ་ཤེས་ཀྱིས། །སྐུ་ཚབ་ལུང་བསྟན་གསུང་ཚབ་གཏེར་དུ་སྦས། །ཐུགས་ཀྱི་དགོངས་པས་ལས་ཅན་སྨིན་གྲོལ་མཛད། །སྐུ་དྲིན་འཁོར་མཐའ་བྲལ་འདི་བསམ་གྱིན་དང་། །གསང་ཆེན་རྒྱུད་སྡེའི་ཟབ་གནད་མཐར་ཐུག་པ། །ལམ་ཟབ་བླ་མ་སྒྲུབ་ལ་མ་འདུས་ཅི། །ཏིང་འཛིན་དམིགས་པའི་སྒྱུར་ཁ་ཕྲ་མོས་ཀྱང་། །དོན་གཉིས་འདོད་པ་འཇོ་ལ་སུ་ཡིས་བསྙོན། །གང་མཚན་ཐོས་དང་དྲན་པ་ཙམ་གྱིས་ཀྱང་། །ཡིད་ལ་ཡེ་ཤེས་སྣང་བ་མཆོག་སྦྱིན་པས། །མ་འབད་པར་ཡང་གཟུངས་སྤོབས་བློ་གྲོས་གཏེར། །མངོན་དུ་འབྱིན་གང་རྟེན་འབྱུང་ཟབ་མོའི་མཐུ། །སྣང་སྟོང་སྒྱུ་འཕྲུལ་དྲྭ་བའི་རོལ་རྩེད་ནི། །གཅིག་དང་དུ་མར་མི་གནས་ཕྱག་རྒྱའི་གར། །འཇམ་པའི་རྡོ་རྗེ་སྟངས་དཔྱལ་དཀྱིལ་འཁོར་སྤྲིན། །ལྷ་སྔགས་སྙིང་པོར་ཤར་བའི་ངོ་མཚར་འབར། །ཉེས་ཟད་སྐུ་ནི་གངས་རི་ལྟར་དཀར་ཞིང་། །ཟུང་བཞིའི་ན་ཚོད་མཛེས་འཛུམ་བཞད་པའི་ཞལ། །རྡོ་རྗེའི་འབྲུ་དྲུག་བཟླས་པས་རྒྱུད་བསྐུལ་ན། །རྩོམ་པའི་བློ་གྲོས་ཟད་མི་ཤེས་ལ་སྦྱོར། །གསེར་མདོག་ལང་ཚོས་སྒེག་པའི་ཟུར་ཕུད་ཅན། །ངག་གི་དབང་ཕྱུག་གྲུབ་པ་ཡོངས་ཀྱི་དཔྱིད། །སྙིང་དབུས་དཔལ་བེའུ་དབྱངས་གསལ་འཕྲོ་འདུ་ཡིས། །ཉན་པར་འདོད་ལ་མི་བརྗེད་གཟུངས་དངོས་སྟེར། །དམར་སེར་ལི་ཁྲིའི་མདངས་འཕྲོག་གླེགས་རལ་ཅན། །སྨྲ་བའི་སེང་གེ་མཚུངས་པ་མེད་པའི་དཔལ། །མགྲིན་པ་ཆོས་ཀྱི་དུང་གི་སྒྲ་དབྱངས་ཀྱིས། །འཆད་པར་འདོད་ལ་འཛད་མེད་སྤོབས་པ་སྦྱིན། །གནམ་སྔོན་ཞུན་མའི་མདངས་ལ་ཅོ་འདྲི་བའི། །རྡོ་རྗེ་རྣོན་པོ་ཕས་རྒོལ་འཇོམས་པའི་གཤེད། །གླེགས་བམ་རལ་གྲི་གདེངས་པའི་འཕྲུལ་གཅིག་གིས། །ཕྱོགས་ལས་རྣམ་རྒྱལ་གྲགས་པའི་རྔ་ཆེན་སྙན། །རྡོ་རྗེ་དབྱངས་ཅན་པུཎྜ་རཱི་ཀའི་མདངས། །ཞི་འཛུམ་གཡོ་བའི་སྤྱན་གྱི་ཟུར་མིག་གིས། །ཤེས་བྱར་སྲིད་ཚད་མཁྱེན་པས་སྡུད་ཅིང་སྤྲོ། །སྒྲུབ་ལ་དངོས་གྲུབ་རྣོ་བའི་བློ་གྲོས་སྦྱིན། །རིན་ཆེན་དབྱངས་ཅན་གུར་གུམ་གཞོན་ནུའི་དཔལ། །ནོར་བུའི་རྒྱུད་མང་སྦྲེང་བའི་དབྱངས་གཅིག་གིས། །བརྟན་གཡོའི་དྭངས་བཅུད་མི་ཤིགས་ཐིག་ལེར་བཟླུམ། །སྒྲུབ་ལ་བློ་གྲོས་བརྟན་པའི་དངོས་གྲུབ་སྦྱིན། །པདྨ་དབྱངས་ཅན་བྱེ་རུའི་འཁྲི་ཤིང་རྩེར། །སིནྡྷུ་ཝ་རའི་མེ་ཏོག་བཞད་པའི་ཞལ། །སྲིད་ཞིའི་བློ་གྲོས་དཔལ་ཀུན་སྡུད་ཅིང་འཆིང་། །སྒྲུབ་ལ་ཤེས་རབ་ཟབ་པའི་དངོས་གྲུབ་སྦྱིན། །ལས་ཀྱི་དབྱངས་ཅན་ཨིཎྜ་ནི་ལའི་མདོག །རང་འདྲའི་ལྷ་མོ་དུ་མའི་འཕྲོ་འདུ་ཡིས། །དག་པའི་སྣོད་བཅུད་ལྷ་ཡི་འཁོར་ལོར་སྦྱངས། །སྒྲུབ་ལ་རྒྱ་ཆེན་མཁྱེན་རབ་སྣང་བ་སྦྱིན། །དཔལ་རྒྱས་འཇིག་རྟེན་སྐྱོང་བ་ཆེན་པོ་བཞི། །རང་སྡེ་བཅས་པའི་སྟོབས་དཔལ་གཟི་བརྗིད་ཀྱིས། །བརྟན་གཡོའི་དྭངས་བཅུད་དགེ་མཚན་མ་ལུས་སྡུད། །མི་འཇིགས་སྤོབས་པ་སྒྲུབ་པའི་ཆོ་ག་རྨད། །ཏིང་འཛིན་ནམ་མཁའ་མཛོད་ཀྱི་ཁྱད་པར་ལས། །ཟག་མེད་བདེ་སྟོང་ཡེ་ཤེས་རོལ་པའི་རྩལ། །སྤོབས་པའི་གཏེར་ཆེན་བརྒྱད་ཀྱི་སྒོ་འཕར་བཟང་། །འབྱེད་པའི་ལྡེའུ་མིག་འདི་མཚུངས་གཞན་སུ་ཞིག །སྔོན་ཡང་བློ་མཆོག་སྨྲ་བའི་དབང་ཕྱུག་རྣམས། །ཁྱོད་ཞབས་ཀུནྡའི་གེ་སར་བསྟེན་པས་འཚེངས། །གྲགས་པའི་དྲི་བསུང་མ་རྨས་སྲིད་ན་གསལ། །དེ་སླད་བདག་བློ་མཆོག་ཏུ་གུས་པར་གྱུར། །མ་ཧཱ་གུ་རུའི་ཞལ་ལུང་ཟབ་དགུའི་བཅུད། །ཌཱ་ཀིའི་ཞལ་གྱི་དྲོད་རླངས་ཐུལ་ལེ་བ། །དམ་ཉམས་འདྲེས་ཁྱེར་དུག་ཆུས་བསླད་མིན་པར། །མངོན་དུ་སྤྱོད་ཡོད་སྐལ་བ་ཤིན་ཏུ་བཟང་། །ཚེ་རབས་དུ་མར་བ སྒྲུབས་པའི་ལེགས་བྱས་མཐུས། །དེད་དཔོན་མཚུངས་མེད་མ་མ་སྡུ་གུ་དེས། །གདམས་ཟབ་ནུ་ཞོ་སྣུན་པའི་དུས་འདི་ལགས། །རྣམ་གྲོལ་ལུས་ཟུང་གསོ་ལ་ཅིས་མི་བརྩོན། །དེ་ཕྱིར་དགའ་དང་མཆོག་ཏུ་གུས་པའི་བློས། །རྩེ་གཅིག་བསྙེན་དང་སྒྲུབ་པའི་དཔུང་བསྐྱེད་དེ། །བསྟོད་དབྱངས་ཡན་ལག་རྒྱ་མཚོ་རྗེས་སྒྲོགས་ན། །ངག་གི་དབང་ཕྱུག་དམ་པ་དེང་འདིར་སྩོལ། །མི་བརྗེད་གཟུངས་ཀྱིས་ཤེས་བྱའི་ཆོས་ཀུན་འཛིན། །ཤེས་རབ་ཟབ་མོས་གནས་ཚུལ་གཏན་ལ་དབབ། །རྩེ་གཅིག་བསྒོམས་པས་དེ་ཉིད་མངོན་དུ་བྱས། །སྲིད་ཞིར་མི་གནས་མྱ་ངན་འདའ་ཐོབ་ཤོག །འཆད་པས་ཟབ་རྒྱས་ཤེས་བྱའི་དེ་ཉིད་བཀྲལ། །རྩོད་པས་ཕས་རྒོལ་སྨྲ་བྱེད་རྨང་ནས་གཅོད། །རྩོམ་པས་ཐུབ་བསྟན་ཡུན་རིང་གསལ་ནུས་པའི། །ས་གསུམ་འཇིག་རྟེན་སྣང་བའི་སྒྲོན་མེར་ཤོག །ཕུན་ཚོགས་སྡེ་བཞིའི་རྩ་བ་རབ་ཏུ་བརླིང་། །རྨད་བྱུང་འཁོར་ལོ་གསུམ་ཀྱི་ཡལ་འདབ་རྒྱས། །དོན་གཉིས་མེ་ཏོག་འབྲས་བུ་ཆེར་སྨིན་པའི། །བཀྲ་ཤིས་དཔལ་གྱིས་ཕྱོགས་ཀུན་བདེ་ལེགས་ཤོག །མེ་རྟ་ཟླ་བ་དང་པོའི་ཚེས་བརྒྱད་ལ་བདེ་ཆེན་པདྨ་འོད་གླིང་དུ་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་གསོལ་བ་བཏབ་པ་འགྲོ་བ་ཀུན་གྱི་སྙིང་ལ་ཡེ་ཤེས་ཀྱི་སྣང་བ་རྒྱས་པའི་རྒྱུར་གྱུར་ཅིག