ཀུན་མཁྱེན་རྒྱལ་བ་གཉིས་པའི་གསུང་རབ་རིན་པོ་ཆེར་རྒྱུ་མཚན་ཤེས་པའི་བསྔགས་བརྗོད་ཉུང་ངུ་དད་བརྒྱའི་ཆུ་གཏེར་འཕེལ་བའི་ཟླ་གཞོན།

༄༅། །ཀུན་མཁྱེན་རྒྱལ་བ་གཉིས་པའི་གསུང་རབ་རིན་པོ་ཆེར་རྒྱུ་མཚན་ཤེས་པའི་བསྔགས་བརྗོད་ཉུང་ངུ་དད་བརྒྱའི་ཆུ་གཏེར་འཕེལ་བའི་ཟླ་གཞོན་ཞེས་བྱ་བ། དཔལ་བསམ་ཡས་པ་ཀུན་མཁྱེན་ངག་གི་དབང་པོ་ལ་ཕྱག་འཚལ་ལོ། །མཁྱེན་རབ་རལ་གྲི་རྣོན་པོས་རྨོངས་པའི་དྲྭ་བ་མ་ལུས་གཅོད་པ་པོ། །བརྩེ་ཆེན་ཐུགས་རྗེའི་པད་དཀར་བཞད་པས་སྲིད་ལམ་དུབ་པ་ངལ་གསོའི་གཉེན། །མཐུ་སྟོབས་རྩེ་བརྒྱ་འབར་བའི་མཚོན་ཆས་བདུད་སྡེའི་ཀླད་པ་འགེམས་མཛད་པ། །རིགས་གསུམ་གཅིག་གྱུར་འཛམ་གླིང་མཛེས་རྒྱན་ཀུན་མཁྱེན་ལྷ་ཡི་ལྷ་དེས་སྐྱོངས། ༡ །དེང་སང་དུས་འདིར་སྤྲིན་བྲལ་འོད་ཟེར་སྟོང་གི་དྲྭ་བས་མངོན་མཛེས་པས། །ས་གསུམ་མུན་པ་མ་ལུས་མཐར་བྱེད་ཉིན་མོར་བྱེད་པོ་འདི་དོར་ནས། །སྲིན་བུ་མེ་ཁྱེར་མདངས་ལ་མཚར་འཛིན་རྨོངས་པ་འདི་དག་མཐོང་གྱུར་ཚེ། །དྲི་མེད་ཐུབ་བསྟན་མཆོག་ཀྱང་ཇི་ལྟར་འགྱུར་སྙམ་བདག་བློ་སྐྱོ་བ་སྐྱེས། ༢ །རྒྱུད་ལུང་མན་ངག་བྱེ་བའི་རིན་ཆེན་གསེར་སྦྱངས་བཞུས་པའི་སྙིང་པོ་ལ། །འཐད་ལྡན་ལུང་རིགས་ཚད་མའི་རྩིབས་སྟོང་རྣམ་བཀྲ་ཡང་དག་རྟོན་པ་བཞིའི། །མུ་ཁྱུད་མཛེས་འབར་དོན་བརྒྱུད་བྱིན་རླབས་འོད་ཟེར་བྱེ་བའི་པ་ཏྲ་ཅན། །ཀུན་མཁྱེན་གསུང་རབ་ཆོས་ཀྱི་འཁོར་ལོ་ཐུབ་བསྟན་མཛེས་པའི་རྒྱན་དུ་སྤུད། ༣ །སྒྲ་དོན་གབ་ཚིག་སྔོན་མེད་པཉྩ་ལི་ཀའི་འཕྱོར་གོས་ཀྱིས་བ ཀླུབས་ཤིང་། མངོན་བརྗོད་གསེར་གྱི་སྐེ་རག་ལེགས་མཛེས་སྡེབ་སྦྱོར་ནོར་བུའི་ཅོད་པཎ་ཅན། །སྒྲ་ཚད་ཟབ་མོའི་སྒྱུ་ཡིས་མཁས་མང་ཡིད་དབང་བརྟན་པ་འཕྲོག་བྱེད་པའི། །ཀུན་མཁྱེན་གསུང་རབ་ངེས་དོན་བཙུན་མོ་ཐུབ་བསྟན་མཛེས་པའི་རྒྱན་དུ་སྤུད། ༤ །ཆོས་ཕུང་བརྒྱད་ཁྲི་བཞི་སྟོང་གཅིག་ཏུ་འཁྱིལ་བའི་རིན་ཆེན་འབྱུང་གནས་ཆེ། །རྣམ་དག་ཐོས་བསམ་སྒོམ་པའི་གྲུ་ཡིས་ཕ་མཐར་བརྒལ་བའི་དཔལ་ཡོན་གྱིས། །མཁས་གྲུབ་ཀླུ་མཆོག་བྱེ་བའི་གཙུག་ནོར་ཐོབ་དེས་བསྟན་འགྲོའི་རྒུད་པ་བཅིལ། །ཀུན་མཁྱེན་གསུང་རབ་འདོད་འབྱུང་ནོར་བུ་ཐུབ་བསྟན་མཛེས་པའི་རྒྱན་དུ་སྤུད། ༥ །ཆོས་དང་ཆོས་མིན་རྣམ་པར་འབྱེད་པའི་རྣམ་དཔྱོད་བློ་གྲོས་མཆོག་ཏུ་ཡངས། །ཇི་ལྟ་ཇི་སྙེད་དེ་བཞིན་ལེགས་གཟིགས་བློ་མཆོག་སྤོོབས་པའི་གཏེར་གྱིས་ཕྱུག །ངེས་གསང་ཐེག་མཆོག་སྙིང་པོའི་རྒྱལ་སྲིད་མ་ལུས་སྲུང་ཞིང་སྐྱོང་མཛད་པའི། །ཀུན་མཁྱེན་གསུང་རབ་ཟླ་བྲལ་བློན་པོ་ཐུབ་བསྟན་མཛེས་པའི་རྒྱན་དུ་སྤུད། ༦ །སྲིད་པ་གསུམ་ན་དཔེ་མང་ཡོན་ཏན་མཁྱེན་རྟོགས་ཟབ་མོའི་ལུས་སྟོབས་རྒྱས། །གཞན་ཕན་ཐུག་རྗེའི་སྣ་ལྗགས་གཡོ་བཞིན་རྣམ་དཀར་ཕྲིན་ལས་མཆེ་ཟུང་རྫོགས། །ཡོངས་རྫོགས་བསྟན་པའི་ཁུར་ཆེན་འདེགས་བཟོད་སྙིང་སྟོབས་ནོར་བུའི་དྲྭ་བ་ཅན། །ཀུན་མཁྱེན་གསུང་རབ་སྟོབས་ཀྱི་གླང་པོ་ཐུབ་བསྟན་མཛེས་པའི་རྒྱན་དུ་སྤུད། ༧ །སྨིན་བྱེད་དབང་བཞིའི་རྐང་པ་ལེགས་མཛེས་མདོ་སྔགས་ཟུང་འབྲེལ་རྣ་མཆོག་ཅན། །གྲོལ་བྱེད་རིམ་གཉིས་རྣལ་འབྱོར་ཟབ་མོའི་དར་སྟན་རིན་ཆེན་རྒ་སྲབ་སྤྲས། །སྲིད་ཞིའི་ཆུ་བོའི་ཕ་མཐའ་བརྒལ་ལ་དཀའ་བ་མེད་པའི་རླུང་ཤུགས་ཅན། །ཀུན་མཁྱེན་གསུང་རབ་ཅང་ཤེས་དབང་པོ་ཐུབ་བསྟན་མཛེས་པའི་རྒྱན་དུ་སྤུད། ༨ །ཐེག་བརྒྱད་བློ་ཡིས་གཞོམ་དུ་མི་གཏུབ་འོད་གསལ་རྡོ་རྗེ་སྙིང་པོ་ཡི། །དྲང་སྲོང་རུས་པའི་མཚོན་ཆའི་འཁོར་ལོ་ཆེས་ཆེར་བསྐོར་བའི་ངོ་མཚར་གྱིས། །ལོག་སྨྲའི་དཔུང་ཚོགས་སྡེར་བཅས་མིང་གི་ལྷག་མར་བྱེད་པ་དུས་དགྲའི་དབང་། །ཀུན་མཁྱེན་གསུང་རབ་དམག་དཔོན་རིན་ཆེན་ཐུབ་བསྟན་མཛེས་པའི་རྒྱན་དུ་སྤུད། ༩ །མཐོང་བ་ཙམ་གྱིས་དད་བརྒྱའི་འདབ་སྟོང་ཅིག་ཅར་བཞད་མཛད་ཉིན་མོའི་མགོན། །ཐོས་པས་བློ་ཡི་དྲྭ་བ་མ་ལུས་གཅོད་བྱེད་ཡེ་ཤེས་མཚོན་ཆ་ཆེ། །བསམ་དང་སྒོམ་པས་གཟུང་འཛིན་འཁོར་བའི་གཅོང་ནད་གཞིལ་ནུས་སྨན་གྱི་མཆོག །ཀུན་མཁྱེན་གསུང་རབ་ཡིད་བཞིན་གཏེར་མཚུངས་འདི་འདྲ་སྲིད་པ་གསུམ་ན་དབེན། ༡༠ །ཚང་ལ་མ་ནོར་རིག་འཛིན་བརྒྱུད་པའི་ཞལ་གྱི་དྲོད་རླངས་ཐོལ་ལེ་བ། །མན་ངག་ཟབ་ཁྱད་རོ་མཆོག་སྟོང་གིས་ཁྱད་པར་བྱས་པ་འདི་ཡོད་བཞིན། །རྟོག་གེའི་ཚིག་གི་སྦང་སྐམ་བསིར་བས་གདམས་ཟབ་དྲི་རོས་ཡོངས་བཏང་ཞིང་། །བྱིན་རླབས་ངད་བྲལ་ཆུ་ལ་བཏུང་རྣམས་ཀྱེ་མ་བདུད་ཀྱིས་བསླུས་པར་སེམས། ༡༡ །བསམ་བཞིན་རྟོག་པའི་དྲྭ་བ་འཕེལ་བྱེད་རང་གཞན་གཉིས་བསྲེག་རྟོག་གེའི་གཞུང་། །ལྷག་མཐོང་སྣང་བས་ཡོངས་བཏང་བླུན་སྒོམ་མུན་ནང་རྡོ་འཕེན་འཆལ་གཏམ་ཕྲེང་། །ཕྱོགས་ཞེན་དུག་ཆུས་མྱོས་པས་ལུང་རྟོགས་སྙིང་པོར་རེ་བའི་ཡུས་སྤངས་ལ། །མཁས་དང་གྲུབ་པར་འདོད་པ་ཡོངས་ཀྱིས་ཀུན་མཁྱེན་གསུང་རབ་སྤྱི་བོས་ལོངས། ༡༢ །བདག་ནི་རྒྱ་ཆེན་ཐོས་དང་བསམ་དང་སྒོམ་པའི་བློ་གྲོས་མི་ལྡན་ཡང་། །ཚེ་རབས་སྔོན་ནས་རྣམ་དཀར་བསགས་པ་མི་དམན་དུས་སུ་སྨིན་པའི་མཐུས། །ཆུང་ངུ་ཉིད་ནས་ཀུན་མཁྱེན་མཆོག་དང་དེ་ཡི་བཀའ་སྲོལ་ཟོལ་མེད་ལ། །མི་འཕྲོག་གུས་པ་བརྟན་པོ་ལྡན་དེས་དལ་རྟེན་དོན་ཡོད་བྱས་པ་ལགས། ༡༣ །དགེ་བ་འདི་ཡིས་བདག་དང་མཁའ་མཉམ་འགྲོ་བ་ཇི་སྙེད་མཆིས་པ་ཀུན། །ཀུན་མཁྱེན་ཆོས་ཀྱི་རྒྱལ་པོ་མཆོག་གིས་འབྲལ་བ་མེད་པར་རྗེས་བཟུང་མཐུས། །རང་རིག་ཀུན་བཟང་དགོངས་ཀློང་མངོན་གྱུར་སྲིད་པའི་འཁྲུལ་འཁོར་ཡུད་ཀྱིས་ཞིག །གདོད་མའི་ས་ལ་གཏན་གྱི་སྲིད་ཟིན་ཁམས་གསུམ་འཁོར་བ་དོང་སྤྲུགས་ཤོག །ཅེས་པའང་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་རང་སྣང་ལོངས་སྐུའི་ཞིང་ཁམས་ལ་མངའ་དབང་འབྱོར་པའི་གནས་མཆིམས་ཕུ་རི་མོ་ཅན་གྱི་ཉེ་འདབས་སུ། མདོ་ཁམས་ཟེ་སྤྲུལ་མིང་འཛིན་ཨོ་རྒྱན་མི་འགྱུར་ཀུན་བཟང་བསྟན་པའི་རྒྱལ་མཚན་གྱིས་དད་པ་རྣམ་པར་འཕེལ་བའི་ངག་གིས་གང་དྲན་ཤུགས་འབྱུང་དུ་གསོལ་བ་བཏབ་པ་སྟེ། འདིས་ཀྱང་འགྲོ་ཀུན་རང་རིག་ཀུན་ཏུ་བཟང་པོའི་རང་ཞལ་མངོན་དུ་གྱུར་ཏེ། འཁོར་འདས་གཞི་ཟད་ཀྱི་ས་ལ་མངོན་པར་བྱང་ཆུབ་པའི་རྒྱུར་གྱུར་ཅིག། །།