བདེ་གཤེགས་ཟུར་མེས་དབོན་རྣམ་གསུམ་གྱི་ཡོན་ཏན་རྗེས་དྲན་གྱི་བསྔགས་བརྗོད་ཉུང་ངུ་དད་གསུམ་ནོར་བུའི་ཏམྦུ་ར།

༄༅། །བདེ་གཤེགས་ཟུར་མེས་དབོན་རྣམ་གསུམ་གྱི་ཡོན་ཏན་རྗེས་དྲན་གྱི་བསྔགས་བརྗོད་ཉུང་ངུ་དད་གསུམ་ནོར་བུའི་ཏམྦུ་ར་ཞེས་བྱ་བ། བདེ་གཤེགས་ཟུར་མེས་དབོན་རྣམ་གསུམ་གྱི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ། །དཔལ་ལྡན་ཡོན་ཏན་མཁྱེན་བརྩེའི་འོད་ཟེར་སྟོང་གི་དྲྭ་བས་མངོན་མཛེས་པས། །ས་གསུམ་རྒུད་པའི་མུན་པ་མ་ལུས་མིང་མཐར་བྱས་དང་ཆབས་ཅིག་པར། །མདོ་སྒྱུ་སེམས་ཕྱོགས་སྙིང་པོའི་པད་ཚལ་ཆེས་ཆེར་བཞད་པའི་དཔལ་ཡོན་ཅན། །བདེ་གཤེགས་ཟུར་ཆེན་ཟུར་ཆུང་སྒྲོ་ཕུག་པ་སོགས་དད་བརྒྱའི་གཙུག་ན་མཆོད། ༡ །ཇི་ལྟ་ཇི་སྙེད་ཇི་བཞིན་ལེགས་གཟིགས་མཁྱེན་རབ་ནོར་བུའི་ཏོག་གིས་མཛེས། །མ་ལུས་འགྲོ་ལ་བུ་གཅིག་ལྟར་བརྩེ་ཐུགས་རྗེའི་དར་ཤམ་འབུམ་ཕྲག་གཡོ། །འགྲོ་ཀུན་ཉེས་བརྒྱའི་ཚད་གདུང་མཐའ་དག་ཅིག་ཅར་གཞིལ་ནུས་ངོ་མཚར་ཕུལ། །བདེ་གཤེགས་ཟུར་པ་ཡབ་སྲས་བཀྲ་ཤིས་གདུགས་དཀར་དད་བརྒྱའི་གཙུག་ན་མཆོད། ༢ །མང་ཐོས་དྲི་མེད་ལུང་གི་རླབས་ཕྲེང་འབུམ་ཕྲག་གཡོ་བའི་ཆུ་གཏེར་ཆེར། །བསམ་བྱུང་རླུང་གཤོག་རྩལ་རྫོགས་སྒོམ་པའི་བློ་གྲོས་གསེར་གྱི་མིག་ལྡན་པས། །ཆོས་རྣམས་ཀུན་ལ་མ་ཆགས་ཐོགས་མེད་ངོ་མཚར་བྱེ་བའི་ཟློས་གར་མཁན། །བདེ་གཤེགས་ཟུར་པ་ཡབ་སྲས་བཀྲ་ཤིས་གསེར་ཉ་དད་བརྒྱའི་གཙུག་ན་མཆོད། ༣ །རྒྱ་ཆེན་དྲི་མེད་མདོ་རྒྱུད་ངེས་གསང་སྙིང་པོ་བཀའ་ཡི་ཀ་ལཱ་ཤ །རིག་འཛིན་བརྒྱུད་པའི་མན་ངག་ཟབ་མོའི་ལུང་གི་རྒྱན་གྱིས་སྒེག་པ་ལས། །ཉམས་མྱོང་རོ་བཅུད་སྟོང་གིས་བརྒྱན་པའི་བདུད་རྩི་འགྲོ་ལ་སྟེར་མཛད་པའི། །བདེ་གཤེགས་ཟུར་པ་ཡབ་སྲས་བཀྲ་ཤིས་བུམ་བཟང་དད་བརྒྱའི་གཙུག་ན་མཆོད། ༤ །སྨིན་བྱེད་དབང་བཞིས་ཆེས་ཆེར་བརླན་བྱས་དམ་ཚིག་རྣམ་དག་ཆུ་བ་བརླིང་། །བསྙེན་སྒྲུབ་ཡན་ལག་བཞི་ལྡན་བསྐྱེད་རྫོགས་ཟབ་མོའི་འདབ་སྟོང་རྒྱས་པའི་རྩེར། །རིག་འཛིན་རྣམ་བཞིའི་གེ་སར་ཆེས་མཐོ་ཐུབ་བསྟན་མཚོ་ཆེན་མཛེས་པའི་རྒྱན། །བདེ་གཤེགས་ཟུར་པ་ཡབ་སྲས་བཀྲ་ཤིས་པདྨ་དད་བརྒྱའི་གཙུག་ན་མཆོད། ༥ །རྣམ་ཀུན་མཆོག་ལྡན་སྟོང་ཆེན་དེ་བཞིན་ཉིད་དབྱིངས་ཆུ་གཏེར་ལས་འཁྲུངས་པའི། །བདེ་ཆེན་ཁ་སྦྱོར་བདུན་གྱི་རི་མོ་གཡས་འཁྱིལ་དཔལ་ཆེན་སྒྱུ་མའི་གར། །མཁྱེན་གཉིས་སྐྱེ་བ་ལྔ་པའི་སྒྲ་ཡིས་མཐའ་ཀླས་ཆོས་ཀུན་དབྱངས་སུ་ལེན། །བདེ་གཤེགས་ཟུར་པ་ཡབ་སྲས་བཀྲ་ཤིས་དུང་དཀར་དད་བརྒྱའི་གཙུག་ན་མཆོད། ༦ །མ་རིག་གཟུང་འཛིན་འཁྲུལ་པའི་དྲི་མ་མ་ལུས་དབྱིངས་སུ་སངས་པ་ལས། །ཕུལ་བྱུང་མཁྱེན་བརྩེའི་ཡོན་ཏན་རབ་རྒྱས་སྲིད་དང་ཞི་བའི་ཆོས་སོ་ཅོག །མི་འགྱུར་འཕོ་མེད་བདེ་ཆེན་རྡོ་རྗེའི་ཕྱག་རྒྱ་མཆོག་གིས་རབ་བསྡམས་པའི། །བདེ་གཤེགས་ཟུར་པ་ཡབ་སྲས་བཀྲ་ཤིས་དཔལ་བེའུ་དད་བརྒྱའི་གཙུག་ན་མཆོད། ༧ །སྣང་སྲིད་དཀྱིལ་འཁོར་གསུམ་དུ་ཡོངས་ཤར་མ་ཧཱ་ཡོ་གའི་ཡུ་བ་བརླིང་། །དབྱིངས་དང་ཡེ་ཤེས་གཉིས་སུ་མི་དམིགས་ཨ་ནུ་ཡོ་གའི་དར་ཤམ་བརྗིད། །བྱ་བྲལ་ལྷུན་རྫོགས་ཨ་ཏིའི་ཏོག་འབར་ཕས་རྒོལ་བྱེ་བས་མི་བརྫི་བའི། །བདེ་གཤེགས་ཟུར་པ་ཡབ་སྲས་བཀྲ་ཤིས་རྒྱལ་མཚན་དད་བརྒྱའི་གཙུག་ན་མཆོད། ༨ །སྤངས་རྟོགས་ཡོན་ཏན་དཔག་གིས་མི་ལང་དྲི་བྲལ་གསེར་སྦྱངས་སྙིང་པོའི་ཁམས། །གཞན་ཕན་ཐབས་མཁས་ཐུགས་རྗེའི་ཕྲིན་ལས་རྩིབས་སྟོང་རྣམ་པར་བཀྲ་བ་ཡིས། །ཐེག་མཆོག་ཆོས་ཀྱི་རྒྱལ་སྲིད་གླིང་བཞིའི་ཁྱོན་ལ་འདྲེན་པའི་ཁ་ལོ་མཆོག །བདེ་གཤེགས་ཟུར་པ་ཡབ་སྲས་བཀྲ་ཤིས་འཁོར་ལོ་དད་བརྒྱའི་གཙུག་ན་མཆོད། ༩ །ལྷ་དབང་ཀླུ་མཆོག་དྲང་སྲོང་གྲུབ་པའི་ཚོགས་ཀྱིས་གུས་པས་ཕྱག་བྱས་ཤིང་། །སྟོབས་མཆོག་སྟོབས་ཀྱིས་བདུད་དང་ལོག་འདྲེན་ཕས་ཀྱི་རྒོལ་ཀུན་ཚར་བཅད་ནས། །ངེས་གསང་བསྟན་པའི་ཉི་མ་གསལ་མཛད་ཐ་སྙད་ཙམ་མིན་གསང་བདག་དངོས། །དཔལ་ལྡན་གངས་རིའི་ཁྲོད་ན་ཟླ་བྲལ་ཟུར་པ་ཡབ་སྲས་གསུམ་ལ་འདུད། ༡༠ །གང་གི་རིང་ལུགས་ཤིན་ཏུ་རྨད་བྱུང་ཉིན་མོར་བྱེད་པའི་ཤིང་རྟ་མཆོག །འགྲོ་བསོད་ཡངས་པའི་མཁའ་ལ་འདྲེན་བཟོད་སྲས་སློབ་བརྒྱུད་པར་བཅས་ཀུན་དང་། །ཁྱད་པར་ལྔ་བདོའི་མཐར་ཡང་ཐུགས་བསྐྱེད་བརྩོན་པས་ཆེས་ཆེར་གསལ་མཛད་པ། །མྱོས་རིགས་སྐུ་མཆེད་བཀའ་དྲིན་བསམ་གྱིན་བ་སྤུའི་འཁྲི་ཤིང་རྣམ་པར་གཡོ། ༡༡ །སྐྱེས་ཐོབ་སྦྱང་དང་གོམས་པའི་ཡོན་ཏན་པདྨའི་སྣལ་མ་ཆེས་ཕྲ་ཡང་། །དད་དང་ལྷག་བསམ་སྨོན་པའི་བརླན་གྱི་རྩ་བ་ཀུན་ནས་བཏང་མིན་རྒྱུས། །མཆོག་བྱིན་ཉི་འོད་འཇུག་པའི་ཡུལ་གྱུར་རིང་མིན་ལུང་རྟོགས་སྦྲང་རྩི་ཡིས། །ཡོངས་གཏམས་རླབས་ཆེན་བརྩོན་པའི་དྲི་ཡིས་བསྙེན་པར་ནུས་པའི་དཔལ་སྩོལ་ཅིག ༡༢ །འཕགས་པའི་ཡོན་ཏན་མཁའ་ལྟར་རྒྱ་ཆེ་ཚུལ་མཐོང་བྱིས་བློའི་ཡུལ་མིན་ཡང་། །སྙིང་གི་པདྨོ་དད་གསུམ་ཉི་མས་བཞད་ལས་བསྟོད་བསྔགས་བདུད་རྩིའི་ཟེགས། །ཆ་ཙམ་འཐོར་དགས་སྔ་འགྱུར་བརྒྱུད་འཛིན་རྐང་དྲུག་དགའ་བའི་གླུ་ལེན་བཞིན། །རིག་འཛིན་རྣམ་བཞིའི་མཁའ་ལ་བསྐྱོད་པས་ཆོས་ཀྱི་དབྱིངས་ཀུན་མཛེས་གྱུར་ཅིག ༡༣ །ཅེས་སྔ་འགྱུར་བསྟན་པའི་ཤིང་རྟ་ས་གསུམ་ན་འགྲན་ཟླ་དང་བྲལ་བ་བདེ་གཤེགས་ཟུར་མེས་དབོན་གསུམ་གྱི་ཡོན་ཏན་རྗེས་དྲན་གྱི་བསྔགས་བརྗོད་ཉུང་ངུ་དད་གསུམ་ནོར་བུའི་ཏམྦུ་ར་འདིའང་། ལྷ་རྗེ་ཟུར་པོ་ཆེ་ཟུང་འཇུག་གི་སྐུ་མངོན་དུ་མཛད་ས་ཤངས་མདའི་དཔལ་ཆེན་གྱི་སྤྱན་སྔར་སྔགས་བཙུན་རྡོ་རྗེ་དབང་མཆོག་དགྱེས་པ་རྩལ་གྱིས་བྲིས་ཤིང་གསོལ་བ་བཏབ་པ་ཛ་ཡནྟུ།