རྗེ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་ལ་བཀའ་དྲིན་རྗེས་དྲན་གྱི་བསྔགས་པ་ཡོན་ཏན་རྒྱ་མཚོའི་རླབས་ཕྲེང་།

༄༅། །རྗེ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་ལ་བཀའ་དྲིན་རྗེས་དྲན་གྱི་བསྔགས་པ་ཡོན་ཏན་རྒྱ་མཚོའི་རླབས་ཕྲེང་ཞེས་བྱ་བ། ན་མོ྅ཀྵར་བཛྲཱ་ཡ། མགོན་པོ་གདོད་ནས་མངོན་པར་བྱང་ཆུབ་སྲིད་ཞི་ཀུན་གྱི་དཔལ་གྱུར་པ། །ཡེ་ཤེས་ངོ་མཚར་བཀོད་པ་འབྱམས་ཀླས་རྣམ་པར་སྣང་མཛད་གངས་ཆེན་མཚོ། །ཆོས་དབྱིངས་དང་མཉམ་རྒྱལ་བའི་ཞིང་ཀུན་ཡོངས་འགེང་རྣམ་འཕྲུལ་བསམ་མི་ཁྱབ། །དཔག་མེད་ཡོན་ཏན་ཕན་བདེའི་ཆར་འབེབས་གཏེར་ཆེན་བླ་མས་རྗེས་སྐྱོངས་ཤིག ༡ །འོག་མིན་ཆེན་པོར་གསང་ཆེན་རྒྱུད་སྡེ་མཐའ་ཡས་སྟོན་དང་ཞུ་པོ་དང་། །སྡུད་དང་སྤེལ་སོགས་ངོ་མཚར་རབ་འབྱམས་ཡེ་ཤེས་སྒྱུ་འཕྲུལ་ཟད་མི་ཤེས། །མཚན་ཙམ་གྱིས་ཀྱང་རྡོ་རྗེའི་ཡེ་ཤེས་སྙིང་ལ་འབེབས་བྱེད་བདུད་ཀྱི་དགྲ། །བགེགས་རྣམས་ཕམ་བྱེད་རྡོ་རྗེ་ཅན་ཞལ་གཏེར་ཆེན་བླ་མས་རྗེས་སྐྱོངས་ཤིག ༢ །མི་མཇེད་ཞིང་གི་སྟོན་པ་མཚུངས་མེད་ཤཱཀྱའི་སྲས་ཀྱི་བསྟན་འདིར་ཡང་། །བདུད་དང་མུ་སྟེགས་གདུལ་དཀའ་འགྲོ་རྣམས་དཔའ་བོ་ཁྱོད་ལ་བརྟེན་ནས་བརྟུལ། །བསྟན་པ་རིན་ཆེན་འཛིན་དང་སྡུད་པར་བྱེད་པའང་ཁྱོད་ཉིད་འབའ་ཞིག་སྟེ། །དེས་ན་ཁྱོད་མཚུངས་འགའ་ཡང་ཡོད་མིན་གཏེར་ཆེན་བླ་མས་རྗེས་སྐྱོངས་ཤིག ༣ །ཐུབ་མཆོག་ཞབས་ཀྱིས་མ་བཅགས་མཐའ་འཁོབ་ཁ་བ་ཅན་གྱི་ལྗོངས་འདིར་ཡང་། །སྣང་བའི་སྒོ་ཆེན་ཐོག་མར་འབྱེད་དང་རྒྱས་པར་སྤེལ་ཞིང་སྐྱོང་མཛད་པའི། །སྐྱེས་མཆོག་མཐའ་དག་ཁྱོད་གཅིག་ཁོ་ནའི་སྒྱུ་འཕྲུལ་བཀོད་པའི་རོལ་མོ་སྟེ། །དེ་སླད་བཀའ་དྲིན་མཚུངས་ཟླས་དབེན་གྱུར་གཏེར་ཆེན་བླ་མས་རྗེས་སྐྱོངས་ཤིག ༤ །ཁྱད་པར་ལྔ་བདོའི་རྒུད་པས་ཐུབ་བསྟན་སྤྱི་དང་ཁྱད་པར་སྔ་འགྱུར་གྱི། །རིང་ལུགས་དགུན་གྱི་ཆུ་བྲན་བཞིན་དུ་མིང་ཙམ་འགྱུར་ལ་ཉེ་བའི་ཚེ། །ལྷ་རིགས་མྱོས་ཀྱི་གདུང་ལ་ཉེར་ཞུགས་ཐུགས་བསྐྱེད་བཙོན་པའི་ཨ་གསྟི། །རིག་གྲོལ་ཆུ་གཏེར་ཆེས་ཆེར་བསྐྱེད་མཛད་གཏེར་ཆེན་བླ་མས་རྗེས་སྐྱོངས་ཤིག ༥ །ཕུལ་བྱུང་མཁྱེན་པའི་རལ་གྲི་མཆོག་གང་རྡོ་རྗེ་རྣོན་པོས་ཁྱོད་ལ་གཏད། །བརྩེ་ཆེན་ཐུགས་རྗེའི་པདྨ་དཀར་པོ་གངས་ཅན་བླ་མས་དབུ་ལ་བཅིངས། །ནུས་མཐུ་རྩེ་བརྒྱ་འབར་བའི་མཚོན་གང་ནམ་ཡང་འབྲལ་མེད་ཆོས་ཉིད་ཕྱིར། །ས་གསུམ་འགྲན་བྲལ་མཁས་གྲུབ་དབང་པོ་གཏེར་ཆེན་བླ་མས་རྗེས་སྐྱོངས་ཤིག ༦ །དེང་དུས་རྣམ་གསུམ་ཡོ་གའི་རྒྱུན་བཟང་བཤད་སྒྲུབ་ལྦུ་ཕྲེང་འཛུམ་དཀར་ཅན། །ཇི་སྙེད་མཆིས་ཀུན་ཁྱོད་ཞལ་འཆད་པའི་མཚོ་ཆེན་ལས་འོང་འབའ་ཞིག་སྟེ། །ལུང་རིགས་སེང་གེའི་སྒྲ་དང་མན་ངག་ལག་ལེན་ཟབ་དགུའི་གཅེས་ནོར་རིགས། །ཁྱོད་ཀྱི་འཆད་རྩོམ་ཕྲིན་ལས་རྒྱུན་ངེས་གཏེར་ཆེན་བླ་མས་རྗེས་སྐྱོངས་ཤིག ༧ །མཁས་པའི་འདབ་ཡངས་བཙུན་པའི་གེེ་སར་བཟང་པོའི་དྲི་བསུང་རྒྱ་ཆེ་ཞིང་། །བསླབ་གསུམ་སྦྲང་རྩིའི་བཅུད་ཀྱིས་ལེགས་གཏམས་འདུས་ཚོགས་པདྨ་དཀར་པོའི་ཕྲེང་། །དེང་དུས་མ་ཉམས་སྔ་འགྱུར་བསྟན་པའི་སྐྱེད་ཚལ་མཛེས་བྱེད་གང་མཆིས་ཀུན། །མཆོག་གི་ཐུགས་བསྐྱེད་དྲིན་ལས་གཞན་མིན་གཏེར་ཆེན་བླ་མས་རྗེས་སྐྱོངས་ཤིག ༨ །དྲུག་ལྡན་བརྒྱུད་པའི་གངས་རི་ལས་འོངས་རིང་བརྒྱུད་གདམས་ཟབ་ཆུ་ཀླུང་འབུམ། །ཡོངས་བསྐྱིལ་པད་འབྱུང་བི་མ་བཻ་རོ་མཚོ་རྒྱལ་ཉང་ཆོས་ཀུན་མཁྱེན་སོགས། །རིག་འཛིན་བྱེ་བས་རྗེས་བཟུང་ཉེ་བརྒྱུད་བྱིན་རླབས་བདུད་རྩིའི་ངད་ལྡང་བ། །མཆོག་གི་རིང་ལུགས་སྲིད་ན་ཟླ་བྲལ་གཏེར་ཆེན་བླ་མས་རྗེས་སྐྱོངས་ཤིག ༩ །ཁྱད་པར་སྔོན་སྨོན་མཐུ་ཡིས་ཟབ་མོའི་གཏེར་བཞེས་བསྟན་འགྲོའི་དགེ་མཚན་སྤེལ། །རྩུབ་འགྱུར་རྒུད་པ་ཀུན་བཅིལ་ངོ་མཚར་སྙན་པས་འཛམ་གླིང་ཡོངས་ལ་ཁྱབ། །འཁོར་ལོ་གསུམ་གྱི་ཕྲིན་ལས་རླབས་ཆེན་ཉི་ཟླའི་འགྲོས་ལྟར་ཀུན་ལ་གསལ། །རྣམ་ཐར་དཔག་ཡས་གྲགས་པའི་གཏེར་གྱུར་གཏེར་ཆེན་བླ་མས་རྗེས་སྐྱོངས་ཤིག ༡༠ །ཁྱོད་གསུང་ལས་སྐྱེས་མཁས་དང་གྲུབ་པའི་ཚོགས་ཀྱིས་ས་སྟེང་ཡོངས་ཁྱབ་ཅིང་། །བཤད་སྒྲུབ་དཔུང་པས་ཐུབ་བསྟན་རྒྱལ་མཚན་སྲིད་མཐར་མི་ཉམས་སྒྲེང་བའི་ཚུལ། །ལེགས་པར་སེམས་ན་ཁྱོད་འདྲའི་གནས་དུས་སྟོན་འཁོར་དུས་གསུམ་འབྱུང་དཀའ་བ། །ཨུ་དུམྦཱ་རའི་མེ་ཏོག་མཆེད་གྱུར་གཏེར་ཆེན་བླ་མས་རྗེས་སྐྱོངས་ཤིག ༡༡ །སྙིགས་མ་ལས་ཀྱང་ཆེར་སྙིགས་དུས་ཀྱི་མཐར་སྐྱེས་རྨུ་རྒོད་བདག་སོགས་ཀྱང་། །ཡལ་བར་འདོར་མིན་ཐུགས་བསྐྱེད་བརྩོན་པའི་གོ་ཆ་ཆེན་པོ་ཉེར་བཞེས་ཏེ། །ཐུབ་བསྟན་བདག་པོར་ཐུབ་པས་ལུང་བསྟན་རྒྱལ་བ་གཉིས་པར་ཡོངས་བཞེངས་ནས། །སྔོན་མེད་མཛོད་ལྔའི་ཤིང་རྟའི་སྲོལ་འབྱེད་གཏེར་ཆེན་བླ་མས་རྗེས་སྐྱོངས་ཤིག ༡༢ །སླད་མའི་དུས་ཀྱང་མི་མཇེད་ཞིང་འདིའི་རྣམ་འདྲེན་ཇི་སྙེད་མཆིས་ཀུན་གྱི། །རྣམ་ཐར་རྒྱ་མཚོ་གཅིག་ཏུ་བསྡོམས་བྱས་མཐའ་ཀླས་གདུལ་བྱ་རྒྱ་མཚོའི་ཚོགས། །ཐེག་གསུམ་ལམ་གྱིས་ཡོངས་སུ་སྨིན་མཛད་སྲིད་པ་གསུམ་ན་དཔེ་མེད་མཆོག །ཁམས་གསུམ་ཆོས་ཀྱི་རྒྱལ་པོ་གཅིག་གྱུར་གཏེར་ཆེན་བླ་མས་རྗེས་སྐྱོངས་ཤིག ༡༣ །བདག་ཀྱང་འདི་ནས་ཚེ་རབས་ཕྲེང་བར་མགོན་པོ་མཆོག་དང་ཁྱོད་ཀྱི་སྲས། །གང་ན་སུ་ཞིག་བཞུགས་པ་དེ་ཀུན་ཞལ་བཟང་བལྟ་དང་ཆོས་བཟང་མཉན། །མཉེས་པས་བསྙེན་དང་གསང་མཛོད་ཟབ་མོ་མཐའ་དག་འཛིན་ལ་ཆེས་སྤྲོ་བས། །དེ་ལྟར་འགྲུབ་པའི་མཐུན་འགྱུར་བདེན་གསུང་ཤིས་པའི་མེ་ཏོག་སྩོལ་མཛོད་ཀྱཻ། ༡༤ །དེ་ལྟར་མགོན་པོ་ཁྱོད་ཀྱི་ཡོན་ཏན་བཀའ་དྲིན་རྗེས་སུ་དྲན་པའི་ངག །ཐོལ་བྱུང་མགྲིན་པའི་གདངས་སུ་འཕོས་པའི་ལེགས་བྱས་རྣམ་དཀར་གང་མཆིས་དེས། །ངེས་གསང་བསྟན་པའི་རྒྱལ་མཚན་སྲིད་མཐར་མི་ཉམས་དར་རྒྱས་ཡུན་བརྟན་ཞིང་། །མ་ལུས་འགྲོ་ཀུན་སྒྲིབ་གསུམ་འཆིང་རྒྱ་ལས་གྲོལ་སྐྱོབ་པ་ཁྱོད་འདྲར་ཤོག །ཅེས་པའང་མགོན་པོ་གང་གི་བཀའ་དྲིན་རྗེས་སུ་དྲན་པའི་བློས་སྐྱེ་ཀུན་མགོན་པོ་མཆོག་གི་རྗེས་འཇུག་ཏུ་སྨོན་ལམ་འདེབས་པའི་བྱ་བྲལ་བ་རྒན་པོ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བྲིས་ཤིང་སྨོན་ལམ་དུ་བཏབ་པ་དགེ། །།