འོད་གསལ་བསྟན་པའི་ཤིང་རྟ་ཀློང་ཆེན་ནམ་མཁའི་རྣལ་འབྱོར་ལ་བསྔགས་པ་རིན་པོ་ཆེ་སྤྲིན་གྱི་ཕྲེང་།

༄༅། །འོད་གསལ་བསྟན་པའི་ཤིང་རྟ་ཀློང་ཆེན་ནམ་མཁའི་རྣལ་འབྱོར་ལ་བསྔགས་པ་རིན་པོ་ཆེ་སྤྲིན་གྱི་ཕྲེང་བ་ཞེས་བྱ་བ། ཀློང་ཆེན་ནམ་མཁའི་རྣལ་འབྱོར་འཇིགས་མེད་གླིང་པའི་ཞབས་ལ་ཕྱག་འཚལ་ལོ། །རྒྱལ་རྣམས་ཡེ་ཤེས་གཅིག་བསྡམས་དཔལ་ལྡན་སངས་རྒྱས་པདྨ་ལས་འཁྲུངས་དང་། །རྒྱལ་བ་གཉིས་པ་དྲི་མེད་འོད་ཟེར་སྟོང་དུ་འབར་དེས་རྗེས་བཟུང་འཐུས། །རྒྱལ་ཀུན་སྤྱི་མེས་ཀུན་བཟང་དགོངས་ཀློང་མངོན་གྱུར་འོད་གསལ་ཐེག་པ་མཆོག །རྒྱལ་བསྟན་ཡོངས་ཀྱི་རྩེ་མོར་སྤུད་མཛད་འཇིགས་མེད་གླིང་པས་རྗེས་སྐྱོངས་ཤིག ༡ །གྲགས་པའི་གཏེར་གྱུར་མཁས་གྲུབ་ཀླུ་མཆོག་བྱེ་བའི་ཚོགས་ཀྱིས་ཉེར་བསྟེན་པའི། །རྨད་བྱུང་འཁོར་ལོ་གསུམ་གྱི་རླབས་ཕྲེང་འབུམ་ཕྲག་གཡོ་བའི་དགེ་མཚན་གྱིས། །ས་གསུམ་རྒུད་པའི་དྲི་མ་མ་ལུས་གཅིག་ཅར་འཁྲུད་དང་ཆབས་ཅིག་པར། །དགེ་ལེགས་ཕན་བདེའི་མྱུ་གུ་བསྐྱེད་བསྲིང་འཇིགས་མེད་གླིང་པས་རྗེས་སྐྱོངས་ཤིག ༢ །ཐོས་བསམ་རྟོག་གེའི་རིགས་པ་རྣོན་པོའི་ཉག་ཕྲན་འཁྲུལ་འཁོར་བསྐོར་མིན་ཞིང་། །བླུན་སྒོམ་ཞི་གནས་ཉམས་ཀྱི་སི་ཏ་འགུགས་ལ་མི་ཚེ་མ་བསྐྱལ་བར། །ཐུབ་བསྟན་ལུང་རྟོགས་སྙིང་པོའི་ས་ཆེན་ཡོངས་ལ་མངའ་དབང་བསྒྱུར་བའི་བཀའ། །ཆེ་དགུའི་རལ་པའི་རྩེ་ན་མངོན་བརླིང་འཇིགས་མེད་གླིང་པས་རྗེས་སྐྱོངས་ཤིག ༣ །ངེས་འབྱུང་མུ་ཁྱུད་བརྟན་ལྡན་བསྙེན་སྒྲུབ་ཡན་ལག་བཞི་ཡི་དག་བྱེད་གཏེར། །རིམ་གཉིས་ལྷུན་པོས་བསྲུབས་ལས་ཉེར་ཐོན་རྣམ་སྨིན་རིག་འཛིན་ཆུ་ཤེལ་ཁམས། །འཕགས་པའི་བདེན་པ་མངོན་གཟིགས་ཆ་ཤས་ཡོངས་གང་སྣང་བཞིའི་བསིལ་ཟེར་ཅན། །ཚོགས་གཉིས་དགེ་བའི་མཁའ་ལ་སྣང་གྱུར་འཇིགས་མེད་གླིང་པས་རྗེས་སྐྱོངས་ཤིག ༤ །གང་ཐུགས་མཁྱེན་རྟོགས་ཡོན་ཏན་ཟབ་མོའི་འདབ་སྟོང་རྣམ་པར་བཞད་པ་དང་། །སྲས་བཅས་རྒྱལ་བ་དགྱེས་པའི་ཉི་འོད་དུས་གཅིག་ལྷུང་བ་བཞིན་གྱུར་པས། །ཟབ་མོའི་ཆོས་གཏེར་ངོ་མཚར་ཟིལ་དངར་འབུམ་ཕྲག་འཇོ་བའི་དཔལ་ཡོན་གྱིས། །ཐེག་མཆོག་གདུལ་བྱའི་རྐང་དྲུག་དགའ་མཛད་འཇིགས་མེད་གླིང་པས་རྗེས་སྐྱོངས་ཤིག ༥ །རྒྱལ་བས་ལེགས་གསུངས་བརྒྱད་ཁྲི་བཞི་སྟོང་གཏིང་ཟབ་འོ་མའི་ཆུ་གཏེར་ཆེ། །རླབས་ཆེན་ཐོས་བསམ་སྒོམ་གྱིས་བསྲུབས་པའི་ངེས་དོན་སྙིང་པོ་མར་གྱི་བཅུད། །ཚང་ལ་མ་ནོར་ལམ་མཆོག་ཡོན་ཏན་རིན་པོ་ཆེ་ཡི་མཛོད་ལ་སོགས། །ལེགས་བཤད་སྣང་བས་ཐུབ་བསྟན་གསལ་མཛད་འཇིགས་མེད་གླིང་པས་རྗེས་སྐྱོངས་ཤིག ༦ །མཁྱེན་བརྩེའི་འོད་ཟེར་སྟོང་གི་དྲྭ་བས་ཀུན་ནས་མཛེས་འབར་རྟ་བདུན་གཟིས། །ཡིད་དཔྱོད་གྲུབ་མཐའི་ཤེ་མུན་གཏན་བཅོམ་འོད་གསལ་རྡོ་རྗེ་རྩེ་མོ་ཡི། །རིང་ལུགས་དྲི་བཟང་ཁང་པ་ཆེས་བཞད་དཔལ་ལྡན་གངས་རིའི་ཁྲོད་འདི་འང་། །འོག་མིན་ཞིང་བཞིན་བསྔགས་འོས་མཆོག་གྱུར་འཇིགས་མེད་གླིང་པས་རྗེས་སྐྱོངས་ཤིག ༧ །འཛམ་གླིང་མཛེས་པའི་རྒྱན་དྲུག་མཆོག་གཉིས་རྨད་བྱུང་ཆེན་པོ་བཞི་སོགས་ཀྱི། །སྤངས་རྟོགས་ཕྲིན་ལས་ནོར་བུའི་མཛོད་རྣམས་གཅིག་ཏུ་བསྡོམས་ལ་ཅོ་འདྲི་བའི། །སྲིད་པ་གསུམ་ན་དཔེ་མེད་ཡོན་ཏན་གལ་ཏེ་གཟུགས་སུ་མཆིས་གྱུར་ན། །ནམ་མཁའ་འདི་ཡང་སྣོད་དུ་ཆུང་གྱུར་འཇིགས་མེད་གླིང་པས་རྗེས་སྐྱོངས་ཤིག ༨ །གང་གི་གསུང་སྐྱེས་ལུང་རྟོགས་ནོར་བུའི་རྒྱན་གྱིས་ཆེར་སྒེག་བརྒྱ་ཕྲག་གིས། །བཤད་སྒྲུབ་ཕྲིན་ལས་ཟབ་མོའི་དཔུང་པས་ངེས་གསང་བསྟན་མཆོག་འཛིན་པའམ། །ཅི་སྟེ་འོག་མིན་གསང་ཆེན་ཕོ་བྲང་བསིལ་ལྡན་གཞི་འདིར་འཕོས་སམ་ཞེས། །བདག་བློ་ཐེ་ཚོམ་ཁྱོགས་ལ་འཕྱང་བྱས་འཇིགས་མེད་གླིང་པས་རྗེས་སྐྱོངས་ཤིག ༩ །ཞིང་ཁམས་རྒྱ་མཚོའི་འདྲེན་མཆོག་མཐའ་དག་ཁྱོད་གཅིག་ཁོ་ནའི་སྒྱུ་འཕྲུལ་ཏེ། །རྣམ་ཐར་རྒྱ་མཚོའི་སྤྲིན་ཆེན་ཆོས་ཀྱི་དབྱིངས་ཀུན་ཁྱབ་པར་དཀྲིགས་པ་ལས། །འགྲོ་ཚོགས་རྒྱ་མཚོའི་དོན་གཉིས་དགེ་བའི་ཆུ་གཏེར་བསྐྱེད་མཛད་གྲུ་ཆར་ཅན། །ཡོན་ཏན་རྒྱ་མཚོའི་གཏེར་མངའ་ཀུན་མཁྱེན་འཇིགས་མེད་གླིང་པས་རྗེས་སྐྱོངས་ཤིག ༡༠ །མདོར་ན་དུས་གསུམ་གཤེགས་པའི་མི་མཆོག་སྟོབས་བཅུ་མངའ་བ་ཇི་སྙེད་ཀྱི། །གསང་གསུམ་ཡོན་ཏན་ཕྲིན་ལས་མ་ལུས་མགོན་པོ་མཆོག་དང་ཐུན་མོང་ཉིད། །དེ་སླད་ལྷར་བཅས་སྐྱེ་དགུ་ཡོངས་ཀྱིས་ཁྱོད་གཅིག་ཁོ་ནའི་བསྔགས་པ་སྒྲོགས། །སྙན་ངག་ཆུ་བོ་སྟོང་གི་འབབས་སྟེགས་འཇིགས་མེད་གླིང་པས་རྗེས་སྐྱོངས་ཤིག ༡༡ །གཟུང་འཛིན་དགག་སྒྲུབ་སྤྲོས་པའི་མཚན་ཀུན་ཡེ་ནས་རྣམ་གྲོལ་ཀ་དག་དབྱིངས། །རང་གསལ་མི་གཡོ་ཡེ་ཤེས་ལྔ་ལྡན་ལྷུན་གྲུབ་འདུས་མ་བྱས་པའི་བདག །འཁོར་འདས་ཆོས་རྣམས་མ་སྤངས་གཞིར་རྫོགས་རིག་པ་བྱང་ཆུབ་སེམས་ཀྱི་ཁམས། །བློ་བྲལ་གཉུག་མ་དོན་གྱི་བླ་མ་འཇིགས་མེད་གླིང་པས་རྗེས་སྐྱོངས་ཤིག ༡༢ །མཆོག་གི་ཡོན་ཏན་ཤིན་ཏུ་རྨད་བྱུང་ངོ་མཚར་ནོར་བུའི་ཏམྦུ་ར། །ཆ་ཙམ་དད་གསུམ་སོར་མོའི་རྩེ་ཡིས་ཉེ་བར་བསྐུལ་བའི་དགེ་མཚན་གྱིས། །རྗེས་བརྩེའི་སྤྱན་གྱི་བུང་བ་བདག་ཡིད་ཨུཏྤལ་གཞོན་ནུར་རྟག་ཆགས་པས། །དོན་གཉིས་འདོད་དགུའི་བསམ་ཀུན་ཡིད་བཞིན་འགྲུབ་པའི་བྱིན་རླབས་དེང་འདིར་རྩོལ། ༡༣ །ངེས་འབྱུང་འཛིན་མའི་གཞི་ལས་ཉེར་འཁྲུངས་སོ་ཐར་ཁྲིམས་ཀྱི་ལྗོན་བཟང་བརླིང་། །གཞན་ཕན་སྦྲང་རྩིའི་བཅུད་ཀྱིས་ཡོངས་གཏམས་བྱང་ཆུབ་སེམས་ཀྱི་འདབ་སྟོང་རྒྱས། །སྨིན་གྲོལ་འདོད་དགུའི་ཆར་འབེབས་གསང་སྔགས་འབྲས་བུའི་སྤྲིན་ཚོགས་ལྷུན་སྟུག་པའི། །ཡོན་ཏན་ཀུན་གྱི་གཞི་རྟེན་ཚུལ་ཁྲིམས་ཕུང་པོ་ཡོངས་སུ་དག་གྱུར་ཅིག །༡༤ ཐུན་མོངས་ཐུན་མིན་གཙུག་ལག་བྱེ་བའི་མང་ཐོས་ཡུ་བ་མཆོག་ཏུ་བརླིང་། །ངེས་འབྱུང་དད་དང་སྙིང་རྗེ་བྱང་སེམས་བསམ་བྱུང་ལྷབ་ལྷུབ་དར་གོས་བརྗིད། །ཟབ་གསང་སྒོམ་པའི་ཉམས་རྟོགས་ཡོན་ཏན་ནོར་བུའི་ཏོག་གིས་མངོན་མཛེས་པས། །སྲིད་ཞིའི་འཇིགས་བྲལ་ཟག་མེད་དགེ་བའི་རྒྱལ་མཚན་རྟག་པར་བསྒྲེངས་གྱུར་ཅིག ༡༥ །མཐའ་དྲུག་ཚུལ་བཞིའི་གནད་རྣམས་ལེགས་བཀྲལ་འཆད་པས་བློ་གསལ་ཡིད་དབང་འཕྲོག །ལུང་རིགས་ཚད་མ་གསུམ་འབྲེལ་རྩོད་པའི་རལ་གྲིས་ཕས་རྒོལ་སྨྲ་བྱེད་གཅོད། །འཆོས་སྐྱོབ་ཡོན་ཏན་བརྒྱད་ལྡན་རྩོམ་གྱིས་ཐུབ་བསྟན་སྙིང་པོ་གསལ་ནུས་པའི། །ངེས་གསང་བསྟན་འགྲོའི་དཔུང་གཉེན་མཚུངས་མེད་མཆོག་དང་རྣམ་ཐར་མཚུངས་གྱུར་ཅིག ༡༦ །ཕན་བདེའི་གཞིར་གྱུར་ཐུབ་བསྟན་ཉིན་བྱེད་འགྲོ་བསོད་མཁའ་ལ་རྟག་འཆར་བས། །ས་གསུམ་རྒུད་པའི་གྲང་རེག་གཏན་བཅོམ་དགེ་ལེགས་སྣང་བས་ཀུན་ཁྱབ་ཅིང་། །ཐར་གྲོལ་པད་ཚལ་ཆེས་བཞད་སྔོན་མེད་རྫོགས་ལྡན་དབྱར་གྱི་ལང་ཚོ་མཆོག །ཀུན་ནས་དར་བའི་ངོ་མཚར་འབྲུག་སྒྲས་ཆོས་ཀྱི་དབྱིངས་ཀུན་འགེངས་གྱུར་ཅིག ༡༧ །ཅེས་པའང་ཀུན་མཁྱེན་ཆོས་ཀྱི་རྒྱལ་པོ་འཇིགས་མེད་གླིང་པས་ཐེག་མཆོག་ཆོས་ཀྱི་སྒྲ་དབྱངས་ཆེས་ཆེར་བསྒྲགས་པའི་གནས། ཚེ་རིང་ལྗོངས་བྱང་ཆུབ་ཤིང་གི་གནས་ཁྲོད་པདྨ་འོད་གསལ་ཐེག་མཆོག་གླིང་དུ་སྐུ་གདུང་རིན་པོ་ཆེའི་སྤྱན་སྔར་མདོ་ཁམས་ཞེ་སྤྲུལ་མིང་འཛིན་ཨོ་རྒྱན་མི་འགྱུར་ཀུན་བཟང་བསྟན་པའི་རྒྱལ་མཚན་དཔལ་བཟང་པོས་བྲིས་ཤིང་གསོལ་བ་བཏབ་པ་སྟེ། འདིས་ཀྱང་འོད་གསལ་རྡོ་རྗེ་རྩེ་མོའི་བསྟན་མཆོག་ཡུན་དུ་གནས་པའི་རྒྱུར་གྱུར་ཅིག། །། ༈ ན་མོ་གུ་རུ་བཛྲ་ཀྵ་རཱ་ཡ། ཀ་མ་ལ་ལྟར་ཉེས་པའི་སྐྱོན་བྲལ་མཁས་གྲུབ་བྱེ་བའི་གཙུག་གི་རྒྱན། །ཁ་བ་དུང་ལྟར་རྣམ་དཀར་གྲགས་པའི་སྙན་པས་ས་གསུམ་ཀུན་ཁྱབ་ཅིང་། །ག་ནས་བསམས་ཀྱང་རྩོད་པའི་དུས་འདིར་རྒྱལ་བ་གཉིས་པའི་ཕྲིན་ལས་ཅན། །ང་ཡི་སྐྱབས་གཅིག་གཏེར་ཆེན་བླ་མས་བྱང་ཆུབ་བར་དུ་རྗེས་སྐྱོངས་ཤིག །ཅ་ཅོ་གྲགས་པའི་རྗེས་འབྲང་ཙམ་མིན་དོན་གྱི་སྣང་མཛད་ལོ་ཙཱ་དངོས། །ཆ་ཤས་མཁྱེན་རྟོགས་ཡོན་ཏན་ཀུན་ནས་ཡོངས་རྫོགས་སྔོན་མེད་ཨུ་དུམྦཱར། །ཇ་རིལ་མགོ་བོའི་རྒྱན་བསྟེན་འབྲལ་མེད་སྙིང་ནས་གུས་པས་གསོལ་འདེབས་ན། །ཉ་རྒྱས་ཟླ་འདྲའི་བློ་གྲོས་མཆོག་སྩོལ་བྱང་ཆུབ་བར་དུ་རྗེས་སྐྱོངས་ཤིག །ཏ་ཐཱ་ག་ཏའི་རིང་ལུགས་ཟླ་བྲལ་མདོ་དང་སྔགས་ཀྱི་ཆོས་ཚུལ་འབུམ། །ཐ་དག་ཁྱོད་ཐུགས་བུམ་པར་བསྐྱིལ་དེས་ངེས་གསང་ཐེག་མཆོག་སྙིང་པོའི་སྲོལ། །ད་ལྟའི་དུས་ཀྱང་བཤད་སྒྲུབ་ཕྲིན་ལས་མ་ཉམས་ཕན་བདེའི་འཛུམ་དཀར་གྱིས། །ནཱ་ག་རྫུ་ནའི་རྣམ་ཐར་འཛིན་མཛད་མཆོག་གིས་བྱང་ཆུབ་བར་དུ་སྐྱོངས། །པ་སངས་ཟླ་ལྟར་ཆེས་དཀར་འཁོར་ལོ་གསུམ་གྱི་ཕྲིན་ལས་རྨད་པོ་ཆེས། །ཕ་གཅིག་པདྨའི་རིང་ལུགས་རྣམ་གསུམ་ཡོ་གའི་བསྟན་མཆོག་ཉིན་མོར་བྱེད། །བ་མཆོག་དཔག་བསམ་གཏེར་བཞིན་སྐྱེ་དགུའི་འདོད་པ་འཇོ་ཕྱིར་དད་བསོད་མཁར། །མ་ལུས་ཀུན་ནས་གསལ་མཛད་མཆོག་གིས་བྱང་ཆུབ་བར་དུ་རྗེས་སྐྱོངས་ཤིག །ཙཱ་རི་ཏྲ་སོགས་གནས་ཡུལ་ཞིང་སྐྱོང་མཐུ་ལྡན་མ་ལུས་བྲན་དུ་བཀོལ། །ཚ་དབལ་སྙིགས་ལྔའི་རྒུད་པ་སེལ་བྱེད་ཆོས་ནོར་རྫས་གཏེར་དཔག་མེད་བཞེས། །ཛ་ཡའི་དགོངས་པ་མཐར་ཐུག་ལེགས་བཀྲལ་འཆོས་སྐྱོབ་བྱེ་བའི་སྒོ་དབྱེ་སོགས། །ཝ་ཆུའི་རྒྱུན་བཞིན་འཛད་མེད་ཐུགས་རྗེའི་གཏེར་དེས་བྱང་ཆུབ་བར་དུ་སྐྱོངས། །ཞ་ཏོག་ཆེ་ལྡིར་ཁོ་ནར་འདག་གྲོལ་རེ་བའི་སྟོན་ཆེན་ཕལ་གཅིག་དང་། །ཟ་ཟིའི་ཉམས་སྣང་རྫུན་རིས་ལ་ཞེན་བླུན་སྒོམ་བདེན་ཡུལ་ཅན་རྣམས་ཀྱི། །འ་འུར་ཆོས་བརྒྱད་སྒྲུབ་པའི་སྙིགས་སྤྱོད་དྲིས་བཏང་ས་གསུམ་སྐྱེ་དགུའི་མགོན། །ཡ་མཚན་རྨད་བྱུང་རྣམ་ཐར་བསྒྲང་ཡས་མཆོག་གིས་བྱང་ཆུབ་བར་དུ་སྐྱོངས། །ར་བ་གངས་རིའི་ཁྲོད་ན་མངོན་འཕགས་སྒྲུབ་བརྒྱུད་ཤིང་རྟ་བརྒྱད་ཀྱི་སྲོལ། །ལ་ལ་ཙམ་མིན་ཡོངས་རྫོགས་བསྟན་པའི་སྲོག་རྩ་མཐུད་པའི་ཕྲིན་ལས་ཅན། །ཤ་ཚུགས་མི་ལ་དོན་གྱི་དགོངས་པ་སངས་རྒྱས་རྣམས་དང་དབྱེར་མེད་པའི། །ས་གསུམ་སྐྱེ་དགུའི་མཆོད་སྡོང་མཚུངས་བྲལ་མཆོག་གི་བྱང་ཆུབ་བར་དུ་སྐྱོངས། །ཧ་བོ་གངས་ལས་ཆེས་དཀར་དད་དམ་མོས་གུས་ཟབ་མོས་ཀུན་བསླངས་ནས། །ཨ་ཏིའི་བསྟན་འཛིན་མཆོག་ལ་བསྔགས་ཤིང་རྩེ་གཅིག་གསོལ་བཏབ་འབྲས་བུ་ཡིས། །ཧ་ཧ་དགྱེས་པའི་གསུང་དབྱངས་དང་བཅས་འབྲལ་མེད་རྗེས་སུ་བཟུང་བའི་མཐུས། །ཨ་དོན་སྐྱེ་མེད་རྟོགས་པའི་སྣང་བ་མཆོག་གིས་དུས་ཀུན་སྲུང་གྱུར་ཅིག །ཅེས་པའང་ཆོས་ཀྱི་རྒྱལ་པོ་སྨིན་གླིང་པ་ཡབ་སྲས་བརྒྱུད་པ་དང་བཅས་པའི་གདུལ་བྱ་ཙམ་དུ་གཏོགས་པའི་སྙོམ་ལས་པ་འཇམ་དབྱངས་བློ་གྲོས་རྒྱ་མཚོས་དུས་དགེ་བར་གསོལ་བ་བཏབ་པ་སིདྡྷིརསྟུ།། །།
༄༅། །ༀ་སྭསྟི་སིདྡྷི། ཀ་དག་ལྷུན་གྲུབ་རིག་སྟོང་ཟུང་འཇུག་ཀུན་བཟང་དགོངས་ཀློང་མངོན་གྱུར་མཆོག །ཁ་ཙམ་མ་ཡིན་སྒོམ་མེད་རྒྱལ་པོའི་ཁྲི་ལ་མངོན་བསྒྱིངས་མཁས་གྲུབ་ཕུལ། །ག་ནས་བསམས་ཀྱང་འོད་གསལ་བསྟན་པའི་ཤིང་རྟ་མཚུངས་བྲལ་བཻ་རོ་དངོས། །ང་བདག་འཛིན་བྲལ་ཤེས་རབ་ཡར་འཕེལ་མཆོག་གིས་བྱང་ཆུབ་བར་དུ་སྐྱོངས། །ཅ་ཅོ་གྲགས་པའི་རྗེས་ཟློས་ཙམ་མིན་སྒོམ་བྱུང་རྟོགས་པ་ཉམས་མྱོང་གཏམ། །ཆ་ཙམ་འཁྲུལ་བའི་དྲི་བྲལ་རྟོན་པ་བཞི་ལྡན་རྗེས་འཇུག་ལྟ་བའི་མིག །ཇ་དངུལ་རྙེད་བཀུར་ཆོས་བརྒྱད་འཆིང་བྲལ་ཡང་དག་དོན་གྱི་སྤོང་བ་པ། །ཉ་རྒྱས་ཟླ་ལྟའི་གྲགས་དཀར་རྨད་བྱུང་གྲུབ་པ་མཆོག་གིས་རྗེས་སྐྱོངས་ཤིག །ཏ་རེའི་སྐུ་ཡི་རྣམ་གྱུར་ལེགས་གསལ་ལྷག་ལྷས་ལུང་བསྟན་དབེན་གནས་སུ། །ཐ་མལ་སྣང་ཞེན་ལྷ་སྐུར་ཡོངས་སྦྱངས་རིག་འཛིན་རྣམ་བཞིའི་གསེང་ལམ་ནས། །ད་ལྟ་དྲུག་པ་རྡོ་རྗེ་འཆང་གི་རྒྱལ་ཚབ་མཆོག་ལ་མངའ་འབྱོར་བའི། །ན་རོ་ཏེ་པའི་མཆེད་གྱུར་དཔལ་ལྡན་གྲུབ་པ་མཆོག་གིས་རྗེས་སྐྱོངས་ཤིག །པ་པཾ་ཁུར་ལྕིས་ནོན་པའི་འགྲོ་ཚོགས་ཐུགས་རྗེས་མི་གཏོང་སྤྲུལ་པའི་གར། །ཕ་གཅིག་བློ་གྲོས་མཐའ་ཡས་ལ་སོགས་གང་འདུལ་ཆུ་ཟླའི་རོལ་རྩེད་ཀྱིས། །བ་གླང་སྤྱོད་སོགས་ནམ་མཁའི་མཐས་གཏུགས་འགྲོ་ཁམས་རྒྱ་མཚོ་སྒྲོལ་མཛད་པའི། །མ་འདྲིས་མཛའ་བཤེས་མཚུངས་བྲལ་གྲུབ་པ་མཆོག་གིས་བྱང་ཆུབ་བར་དུ་སྐྱོངས། །ཙ་ཏུར་ལས་དང་གྲུབ་པ་མཐར་ཕྱིན་ཕུལ་བྱུང་ཤུགས་སྒྲོལ་དམོད་པའི་མཚོན། །ཚ་ངར་ལྕེ་འབབ་དང་མཚུངས་གང་ལ་ཆས་གང་མིང་གི་མཐར་བྱས་མཐུས། །ཛ་ལང་གདུག་པའི་སེམས་འཆང་མི་དང་མི་མིན་ལོག་འདྲེན་འབྱུང་པོའི་དཔུང་། །ཝ་ལྟར་ཞུམ་ནས་ཁྱོད་ཞབས་བཏུད་གྱུར་གྲུབ་པ་མཆོག་གིས་རྗེས་སྐྱོངས་ཤིག །ཞྭ་ལྟར་འབྲལ་མེད་ཚངས་གནས་པདྨོར་ལེགས་མཆོད་སྐལ་བ་མཆོག་རྣམས་ལ། །ཟ་མ་ཙམ་ཡང་མི་བསྙེལ་ཐུགས་བརྩེས་ཆེས་དགོངས་ངོ་མཚར་རྟོགས་པའི་ཕུལ། །འ་འུར་སྩལ་དང་མཚན་ཐོས་ཙམ་གྱིས་སྲིད་པའི་འཆིང་བ་འདྲལ་ལ་སོགས། །ཡ་མཚན་རྨད་བྱུང་འབྲེལ་ཚད་དོན་ལྡན་གྲུབ་པ་མཆོག་གིས་རྗེས་སྐྱོངས་ཤིག །ར་བ་བརྒལ་དཀའ་སྲིད་པའི་གྲོང་ཁྱེར་ཧྲུལ་པོར་གཏོང་ལ་མི་ངལ་ཞིང་། །ལ་བའི་ཞབས་སོགས་གྲུབ་པ་ཡོངས་ཀྱི་རྣམ་ཐར་མ་ལུས་བདག་གིར་བཞེས། །ཤ་རུས་སྙིགས་མ་ཙམ་གྱིས་འབྱུང་བཞི་འཇིག་པ་དཔུང་ཡང་གཞིལ་ནུས་པའི། །ས་གསུམ་འགྲན་བྲལ་གྲུབ་པ་མཆོག་གིས་བྱང་ཆུབ་བར་དུ་རྗེས་སྐྱོངས་ཤིག །ཧ་ཅང་མཆོག་ཏུ་དགའ་དང་གུས་པའི་ཡིད་ཀྱི་རྫིང་བུ་ལས་ཐོན་པའི། །ཨ་ཏིའི་རྣལ་འབྱོར་མཆོག་ཁྱོད་རྗེས་བསྔགས་ཆུ་སྐྱེས་ཕྲེང་བར་བསྟར་བ་འདིས། །ཡིད་ལ་ཡེ་ཤེས་ཟབ་མོས་རྗེས་སྐྱོང་དོན་གཉིས་འདོད་པ་འཇོ་བ་ཡིས། །འཁོར་བ་དོང་སྤྲུག་བཀྲ་ཤིས་སྣང་བས་ཕྱོགས་དུས་ཀུན་ཏུ་ཁྱབ་གྱུར་ཅིག །ཅེས་པའང་གྲུབ་པ་མཆོག་གི་རོལ་རྩེད་རྫོགས་པའི་སངས་རྒྱས་བློ་གྲོས་མཐའ་ཡས་ཀྱི་ཞབས་ཀྱི་ཆུ་སྐྱེས་སྤྱི་བོས་ལེན་པའི་བནྡེ་འཇམ་དབྱངས་བློ་གྲོས་རྒྱ་མཚོས་བྲིས་པ་འགྲོ་ཀུན་བླ་མ་མཆོག་གིས་རྗེས་སུ་འཛིན་པའི་རྒྱུར་གྱུར་ཅིག། །།
༄༅། །ༀ་བདེ་ལེགས་སུ་གྱུར་ཅིག རྒྱལ་ཀུན་མཁྱེན་རབ་ཁྱིམ་གྱི་མེའི། །རྣམ་དཔྱོད་འབུམ་ཕྲག་གཅིག་བསྡུས་གཟིས། །མུན་གླིང་དཀར་པོ་བསྒྱུར་མཛད་པ། །འཇམ་མགོན་ཨ་ནུས་ཤིས་པ་སྩོལ། །ཁྱོད་དང་གཞོན་ནུ་ཟུར་ཕུད་ཅན། །རྣམ་པ་ཀུན་ཏུ་མཚུངས་ཐ་དད། །དེ་ནི་སྐལ་མེད་ལ་མི་སྣང་། །ཁྱོད་ནི་མུན་པས་ལོང་བའི་མིག །བོད་ལྗོངས་སྣང་བ་དཀར་པོའི་སྒོ། །འབྱེད་བྱེད་ཁྱོད་འདྲ་གཅིག་ཀྱང་མེད། མཁའ་ལ་ཉིན་མོར་བྱེད་པའི་དཔལ། །གཉིས་པ་ངེས་པར་ཡོད་མ་ཡིན། །ཟླ་བ་བདེ་འབྱུང་གཙུག་ན་བརྒྱན། །ཁྱོད་ཞབས་ཐར་འདོད་ཡོངས་ཀྱིས་བརྟེན། །དེ་ནི་རྟག་ཏུ་གང་མིན་ཡང་། །ཁྱོད་མཁྱེན་དཀྱིལ་འཁོར་ཡོངས་རྫོགས་ཉིད། །གང་ཞིག་ཁྱིམ་པའི་གཟུགས་ཀྱིས་ནི། །སྤོབས་པས་ས་གསུམ་དབང་བྱེད་འདི། །དྲི་མེད་གྲགས་སམ་ཨ་ནུ་ཞེས། །བདག་ཡིད་ཐེ་ཚོམ་ཕྱོགས་ལ་འཕྱན། །ཞིབ་པར་བརྟགས་ཚེ་བསླབ་གསུམ་དང་། །རིག་བྱེད་མིང་ཚིག་བརྗོད་ཀུན་གཞི། །ལྗོངས་འདིར་གསལ་བའི་ཁྱད་ཆོས་གང་། །ལཱི་ཙའི་དགེ་བསྙེན་ལ་མཆིས་སམ། །ཁྱོད་ནི་ཟབ་པས་དག་བྱེད་གཏེར། །བརྟན་པས་འབྱུང་པོ་འཛིན་མའི་གཞི། །ཕན་བདེའི་གྲིབ་མ་སྣུམ་ལྡན་པས། །ཡོངས་འདུའི་ལྗོན་པའི་མཐུན་ཕྱོགས་ཉིད། །འོན་ཀྱང་རྒྱ་མཚོའི་ལག་འགྲོའི་གནས། །ནོར་འཛིན་དམན་སོགས་འགོམ་བྱའི་གཞི། །རྐང་འཐུང་སེམས་མེད་བེམ་པོའི་དངོས། །དེ་སླད་ཁྱོད་ལ་འགྲན་ནུས་ཅི། །རྨད་བྱུང་སྙིང་རྗེའི་གཞན་དབང་གིས། །གངས་ལྗོངས་ཐེག་པ་ཆེན་པོའི་ལམ། །གསལ་ན་གནས་བརྟན་ཤཱ་རིའི་བུ། །ཁྱོད་ཀྱི་རྣམ་དཔྱོད་སྤུན་ཟླར་རུང་། །གང་གི་ཕྲིན་ལས་ནོར་བུའི་ཏོག །འགྲོ་བསོད་ཤེར་བརྩོན་རྒྱལ་མཚན་རྩེར། །ཐོབ་དེས་ཀུན་ཏུ་རྨོངས་པའི་དགྲས། །བརྫི་མིན་དགའ་སྟོན་རྒྱལ་བར་གྱུར། །ཁྱོད་ཞབས་ནོར་བུ་ཀེ་ཏ་ཀས། །མ་དག་ཉེས་ཚོགས་བགྲུང་བའི་རྒྱུས། །ས་ལའི་ནགས་ཀྱི་ལྗོངས་འདི་ཡང་། །དགའ་བ་བརྒྱ་ལྡན་གྲོང་ལས་འཕགས། །ཁྱོད་ཀྱི་མཁྱེན་རབ་མཛོད་ཁང་ཆེར། །ཆུད་མིན་ཤེས་བྱའི་དངོས་པོ་འགའ། །མཆིས་སམ་འོན་ཏེ་མི་མཆི་ཞེས། །བདག་བློ་སོམ་ཉིའི་དྲྭ་བར་ཆུད། །འོན་ཀྱང་ཁྱོད་ནི་ས་བཅུ་པའི། །དབང་ཕྱུག་ཉིད་དུ་སྟོན་དེའི་ཕྱིར། །རྒྱུན་མཐའི་ཡེ་ཤེས་རྡོ་རྗེ་ཡིས། །གཞོམ་བྱ་ཕྲ་མོའང་ལུས་པར་ཤེས། །དེ་ལྟ་ན་ཡང་འཕགས་པའི་ཚུལ། །ཟབ་མོ་བསམ་བྱ་མ་ཡིན་པས། །བྱིས་བློ་ཕྱེ་ལེབ་{བྱེ་ལྷེབ}གཤོག་རྩལ་གྱིས། །ནམ་མཁའི་གཏིང་ཕུག་འཚོལ་འདི་ནོངས། །ཁྱོད་ཀྱི་གསང་གསུམ་ཡོན་ཏན་ནི། །རྒྱལ་བ་ཀུན་དང་མཉམ་པ་ཉིད། །ཕྱོགས་རེར་འདྲེན་འདོད་བྱིས་པའི་མཚང་། །བརྗོད་པ་ལྕེ་ལ་ངོ་ཚ་བཞིན། །འོན་ཀྱང་བཀའ་དྲིན་དྲན་པའི་ངག །སྙན་ཚིག་ཨུཏྤལ་གསར་པའི་ཕྲེང་། །དད་པའི་སོར་མོས་བརྒྱུས་པ་ལ། །ནོངས་པ་མེད་སྙམ་བརྩོན་པ་ལགས། །དེ་ལས་བྱུང་བའི་དགེ་ཚོགས་རྒྱུན། །དུང་དང་པད་རྩ་ལྟར་དཀར་དེས། །འགྲོ་བ་མི་ཁོམ་གཏན་སྤངས་ནས། །ངག་གིས་དབང་ཕྱུག་འགྲུབ་གྱུར་ཅིག །ཅེས་པའང་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེས་སྨྲས་པ་ཛ་ཡནྟུ།
༄༅། །ༀ་སྭ་སྟི། ཁྱོད་ཐུགས་མཁྱེན་མཁར་མ་ཆུད་ཤེས་བྱའི་ཆོས། །ཀུན་མཁྱེན་མཛོད་དུ་ཡོད་མེད་སོམ་ཉིའི་རྒྱ། །འགྲོལ་ལ་འཕགས་ཆེན་རྣམས་ཀྱང་ངལ་འཛིན་པའི། །ངག་དབང་ཆོས་དཔལ་རྒྱ་མཚོས་དགེ་ལེགས་སྩོལ། །ཁྱོད་ནི་དོན་དམ་རྣམ་ཀུན་མཆོག་ལྡན་གྱི། །སྟོང་ཆེན་ཨེ་དབྱིངས་ཤེས་རབ་ཕར་ཕྱིན་མར། །ཝཾ་ཡིག་བདེ་ཆེན་འགགས་མེད་རྗེས་ཆགས་མདངས། །ཞིང་ཁམས་རྒྱ་མཚོར་སྙེམ་མའི་བདག་པོར་གྲགས། །ཁྱོད་ནི་བརྟན་གཡོ་ཀུན་ཁྱབ་ཡེ་ཤེས་ཆེ། །ཁྱོད་ཀྱི་ཕྱག་རྒྱས་མ་བཏབ་སྲིད་ཞིའི་ཆོས། །སྲིད་མིན་ཆ་མེད་ཀུན་འགྲོ་ཁྱབ་བའི་བདག །གཙང་རྟག་བདེ་བ་དམ་པའི་ཕར་ཕྱིན་ཉིད། །འོད་གསལ་རང་བཞིན་ཆོས་དབྱིངས་འདུས་མ་བྱས། །ཉི་མཁའ་བཞིན་དུ་དཀོར་བདུན་འབྲས་བུའི་ཆོས། །མ་བཙལ་ལྷུན་རྫོགས་མཉམ་ཉིད་བྱང་ཆུབ་སེམས། །ཟབ་པའི་ཚུལ་དེ་འཕགས་པའི་སྤྱོད་ཡུལ་ལགས། །ཕུང་ཁམས་སྐྱེ་མཆེད་གདན་གསུམ་ཡོངས་རྫོགས་ལྷར། །ཡེ་ནས་སངས་རྒྱས་དག་རྟོགས་མཉམ་པའི་ཚུལ། །ལེགས་པར་ཤེས་ནས་གོམས་པ་ལྷུར་ལེན་ལ། །འབྲས་བུ་དུས་ལ་ལྟོས་མིན་དངོས་པོའི་གཤིས། །དེ་ལྟ་ན་ཡང་གཉིས་འཛིན་ཀུན་རྟོག་སྐྲས། །གནས་ཚུལ་མི་མཐོང་འཁྲུལ་སྣང་ཆར་བཞིན་འབབས། །དེ་བསལ་སླད་དུ་འཆད་དང་སྡུད་པོ་དང་། །འཛིན་དང་སྤེལ་ཕྱིར་འབུམ་ཕྲག་རོལ་རྩེད་སྟོན། །དེ་ལས་མི་མཇེད་བྱང་ཕྱོགས་ཁ་བའི་རིར། །ཐེག་མཆོག་ང་རོས་ལྟ་དམན་ཝ་སྐྱེས་ཚོགས། །སྐྲག་བྱེད་སྔོན་མེད་གདོང་ལྔའི་དབང་པོ་ཞིག །མྱོས་རིགས་གྲུབ་པའི་དཔྱིད་དུ་ལེགས་འཁྲུངས་རྨད། །ཆུང་ནས་ཐེག་མཆོག་རིགས་ཁམས་ས་ལུའི་སོན། །དད་བརྩེ་ཤེས་བརྩོན་བཟང་པོའི་མྱུ་གུའི་ཚལ། །རྒྱས་དེས་གཟུར་གནས་མཁས་མང་མགྲིན་གཅིག་ཏུ། །བསྔགས་པའི་པུཥྤེ་འཐོར་དེ་འབྲས་ལྡན་ཉིད། །སྡོམ་གསུམ་གནང་བཀག་གཙང་མའི་པད་སྡོང་རྩེར། །རླབས་ཆེན་མཁས་ཚུལ་དགུ་ཡི་འདབ་སྟོང་བཞད། །བསྡུ་བཞིའི་དྲི་བསུང་ཞིམ་པོས་བྷོ་ཊའི་ལྗོངས། །འོག་མིན་ལས་ཀྱང་བསྔགས་འོས་མཆོག་ཏུ་བྱས། །ཁྱབ་པར་དཀྲིགས་སོ་ཆོས་དབྱིངས་རབ་འབྱམས་ཞིང་། །ངོ་མཚར་གསང་གསུམ་བཀོད་པའི་རོལ་མོས་ཏེ། །དབྱིག་འཛིན་ཁྱོན་ཀུན་ཁྱོད་སྲས་འཕགས་པའི་ཚོགས། །རྣམ་གསུམ་ངུར་སྨྲིག་གསར་པའི་ཕྲེང་བས་ཀྱང་། །ཟབ་དང་རྒྱ་ཆེའི་མཁྱེན་པས་འཇམ་པའི་དབྱངས། །མ་ལུས་འགྲོ་ལ་བརྩེ་བས་པད་དཀར་འཆང་། །མི་བསྲུན་གདུལ་དཀའ་འདུལ་བས་གསང་བའི་བདག །རྣམ་ཐར་གཙང་མས་ཐུབ་རྣམས་རྗེས་སུ་འཆིང་། །ཟབ་མོ་ལྟ་བའི་གནས་ལ་ནཱ་ག་རྫུ། །རྒྱ་ཆེན་སྤྱོད་པའི་གཞུང་ལ་ཐོགས་མེད་ཞབས། །རྣམ་དག་རིགས་པའི་ལམ་ལ་ཕྱོགས་ཀྱི་གླང་། །རྣམ་གསུམ་མཁྱེན་པའི་མདངས་ལས་བརྐུས་པར་ངེས། །ཁྱོད་ནི་མང་དུ་ཐོས་པས་དབྱིག་གི་གཉེན། །རྣམ་དག་བརྗོད་པ་གཙང་བས་ཟླ་བའི་ཞབས། །རྩོམ་པའི་ལེགས་བཤད་སྙན་པས་དཔའ་བོ་སྟེ། །ཕྱོགས་ལས་རྣམ་རྒྱལ་ཆོས་ཀྱི་གྲགས་པའང་ཡིན། །སྒྲ་ཚད་མཐར་ཕྱིན་ཨཱཪྱ་དེ་ཝ་དངོས། །འདུལ་ལུང་འཆད་ལ་ཡོན་ཤཱཀ་སླར་བྱོན་བཞིན། །རྒྱལ་སྲས་སྤྱོད་སྟོན་ཞི་ལྷའི་ངང་ཚུལ་འཛིན། །རྒྱུད་སྡེའི་མངའ་བདག་མདའ་སྣུན་ཞབས་ཀྱང་ངོ་། །རྣམ་གསུམ་ཡོ་གའི་རིང་ལུགས་ཉིན་བྱེད་གཟིས། །བསིལ་ཁྲོད་གདུང་བ་བཅིལ་ལ་པད་འབྱུང་དང་། །མཚུངས་མོད་གོང་དེ་མཚོ་དཀྱིལ་པད་སྦུབས་དང་། །ཁྱོད་ནི་ལྷ་རིགས་མི་མོའི་མངལ་རྒྱའི་ཁྱད། །སྡེ་གསུམ་རྫོགས་པ་ཆེན་པོའི་གསེང་ལམ་ནས། །འགྲོ་ཀུན་གདོད་གཞིར་འཁྲིད་པ་འདི་ཁོ་ནས། །ཁྱོད་དང་བི་མ་མཚུངས་ཞེས་བརྗོད་མིན་ཏེ། །སྒྱུ་འཕྲུལ་སྙིང་པོའི་རིང་ལུགས་གསལ་འདིས་ཀྱང་། །མདོར་ན་འཕགས་བོད་མཁས་གྲུབ་མཆིས་ཀུན་གྱི། །ཕུལ་བྱུང་མཁྱེན་བརྩེ་ནུས་པའི་ཡོན་ཏན་ཆ། །མཐའ་དག་གཅིག་ཏུ་བསྡོམས་ལས་འཕྲུལ་འདྲ་བའི། །རྣམ་ཐར་ཟབ་མོ་རང་ཉིད་དཔེ་ཟླར་མཚོན། །དེ་སླད་ཁྱོད་མིན་སྐྱབས་གཞན་རྨི་ལམ་ན། །འཚོལ་བའི་གོ་སྐབས་དབེན་པའི་དམན་བདག་ལ། །ཡེ་ཤེས་གཟིགས་པའི་བྱིན་ཆེན་དེང་ཕོབ་ལ། །མཆོག་དང་རྣམ་ཐར་མཚུངས་པར་མཛོད་ཅིག་ཀྱཻ། །ཅེས་པའང་བློ་གྲོས་རྒྱ་མཚོས་སོ།།