རྒྱལ་པོ་ཆེན་པོ་རྣམ་ཐོས་སྲས་ལ་བསྟོད་ཅིང་ཕྲིན་ལས་སུ་གསོལ་བ་འདོད་འབྱུང་ཡོངས་འདུས་འཁྲི་ཤིང་།

༄༅། །རྒྱལ་པོ་ཆེན་པོ་རྣམ་ཐོས་སྲས་ལ་བསྟོད་ཅིང་ཕྲིན་ལས་སུ་གསོལ་བ་འདོད་འབྱུང་ཡོངས་འདུས་འཁྲི་ཤིང་ཞེས་བྱ་བ་བཞུགས་སོ།། ན་མོ་བཻ་ཤྲ་བ་ཎཱ་ཡ་སིངྷིརྦྷབ་ཏུ། ཚོགས་གཉིས་ནོར་བུ་རྒྱས་པའི་སྤྲིན་ཆེན་ལས། །དགེ་ལེགས་འདོད་དགུའི་གྲུ་ཆར་འཇོ་བ་ཡིས། །ས་གསུམ་སྐྱེ་དགུའི་རེ་བ་སྐོང་མཛད་པའི། །རྒྱལ་ཆེན་རྣམ་ཐོས་སྲས་ལ་བསྟོད་པར་བགྱི། །ཁྱོད་ནི་འདས་པའི་སངས་རྒྱས་རིན་ཆེན་མང་། །སྨོན་ལམ་དབང་གིས་ས་བརྒྱད་སེམས་དཔར་སྤྲུལ། །མ་འོངས་མེ་ཏོག་བཀོད་པའི་ཞིང་ཁམས་སུ། །ཡང་འཚང་རྒྱ་བའི་ལུང་བསྟན་བདག་གིར་བཞེས། །སྔོན་ཚེ་འོད་སྲུང་བསྟན་པའི་ཐ་མ་ལ། །མཆེད་གྱུར་ཐུགས་བསྐྱེད་སྨོན་པས་འབྲེལ་བའི་རྒྱུས། །ད་ལྟར་ཀུན་མཁྱེན་ཤཱཀྱའི་བསྟན་པ་འདིར། །བསྟན་སྐྱོང་རྒྱུ་སྐར་ཁྲོད་ན་ཟླ་བཞིན་འཕགས། །སྐྱོབ་པ་མཆོག་དེས་མཛད་པ་ཐ་མའི་ཚེ། །འཁོར་གྱི་ནང་ན་མི་བསྙེངས་སེང་གེའི་སྒྲས། །བསྐལ་མང་ཐུགས་ལ་བརྣག་པའི་དམ་ཆོས་ཀྱི། །རྒྱལ་སྲིད་མཆོག་དེ་ཁྱོད་ལ་གཏད་པར་མཛད། །ལྷ་ཀླུ་གནོད་སྦྱིན་ནོར་ལྷ་གཏེར་གྱི་བདག །བསགས་པ་རྒྱ་ཆེན་སྲིད་ན་མཆིས་ཀུན་གྱི། །གཙུག་ནོར་འོད་ཀྱིས་རྐང་རྟེན་བརྒྱན་བྱས་པའི། །དབང་ཕྱུག་དམ་པའི་དཔལ་དེ་ཁྱོད་ལ་མངའ། །ཕོངས་པ་གང་གི་གདུང་བའི་ང་རོའི་ཚིག །ལན་གཅིག་ཁྱོད་སྙན་པདྨོར་སོན་པའི་མོད། །སེར་སྣ་འཕགས་མིན་རྒྱུ་དང་འབྲས་བུའི་ཚོགས། །གནས་པའི་གོ་སྐབས་བྲལ་བའི་དགེ་མཚན་སྦྱིན། །དུས་ལས་གཡོལ་མེད་གཟིགས་པའི་སྤྱན་ཡངས་ཀྱིས། །རེ་བའི་མོད་ལ་ཡིད་ཀྱི་ཤིང་རྟའི་དཔལ། །འགེངས་ལ་ཁྱོད་མཚུངས་འགའ་ཡང་མ་འཚལ་ཞེས། །གྲགས་པའི་མུ་ཁྱུད་ཚངས་པའི་ཡུལ་ལས་བརྒལ། །ལྷ་དབང་ལྷ་ཡི་ལོངས་སྤྱོད་རྒྱ་ཆེན་དང་། །མི་དབང་རིན་ཆེན་བདུན་གྱི་འབྱོར་པ་ཡིས། །ཆ་ཙམ་མི་མཚོན་ནམ་མཁའ་མཛོད་ཀྱི་དཔལ། །སྦྱིན་པའི་ཕར་ཕྱིན་རྫོགས་པ་ཁྱོད་ལ་མངའ། །སྲིད་ཞིའི་དཔལ་ཀུན་བསྡོམས་ལས་འཕྲུལ་བ་ལྟའི། །ངོ་མཚར་རིན་ཆེན་ཕོ་བྲང་གཏེར་ལ་སོགས། །ཕུན་ཚོགས་བདོག་པའི་ཁྱད་པར་བགྲང་ཡས་ཕུལ། །བློ་ཆེན་ཚངས་པས་གཞལ་ཡང་དཔོག་ནུས་མིན། །སྟོབས་རྩལ་འགྲན་མེད་གདོང་ལྔའི་ཁྲི་སྟེང་ན། །གནོད་སྦྱིན་དབང་པོ་ཁྲོ་ཆགས་སྒེག་པའི་ཉམས། །རིན་ཆེན་རྒྱན་མང་ནོར་བུའི་སྲོག་ཞུ་ཅན། །རྡོ་རྗེ་ཕ་ལམ་ཡ་ལད་སྲ་བརྟན་མཚར། །ཕྱག་གཡས་མདུང་དམར་རྒྱལ་མཚན་སྲིད་རྩེ་རུ། །བསྒྲེངས་པས་ཕྱོགས་ལས་རྣམ་རྒྱལ་དགེ་མཚན་གསལ། །གཡོན་པས་ནོར་སྐྱུག་མགྲིན་པ་བཅིལ་བའི་མོད། །སྒྲུབ་པོར་འདོད་རྒུའི་དངོས་ཀུན་ཆར་བཞིན་འབེབས། །ལྷ་ཀླུའི་དབང་མོ་ནོར་བུའི་གདེངས་ཀ་ཅན། །གཙུག་ན་པདྨའི་ཕྲེང་བས་བརྒྱན་པ་དང་། །རིགས་མྱུག་རྨུགས་འཛིན་མཆེད་ལྔ་གཏེར་མཛོད་ཀྱི། །སྒོ་འཕར་བྱེ་བའི་བདག་པོའང་མདུན་སྔར་བརྡལ། །རྟ་བདག་བརྒྱད་དང་སྡེ་དཔོན་ཉི་ཤུ་བརྒྱད། །སྟོབས་ཆེན་སོ་གཉིས་གནོད་གནས་སུམ་ཁྲི་དང་། །དྲུག་འབུམ་འཁོར་གྱི་དབུས་ན་གསེར་རི་བཞིན། །བསོད་ནམས་ཆེན་པོའི་དཔལ་གྱིས་མངོན་པར་བརྗིད། །ཞི་ཆགས་ཁྲོ་བོའི་རྣམ་འགྱུར་སྣ་ཚོགས་པའི། །གང་སྐུ་འདོད་དགུར་འཕྲུལ་བའི་གཟི་བརྗིད་དཔལ། །བརྒྱ་ཕྲག་ཉི་ཟླའི་སྣང་བས་མཚོན་མིན་པས། །རང་ཉིད་དཔེ་ཟླར་བཞག་ལས་སྲིད་ན་སུ། །གང་འདུལ་ཕྲིན་ལས་རྣམ་བཞིའི་རོལ་རྩེད་ཀྱིས། །སྐྱེ་རྒུ་ཀུན་ལ་དབུགས་འབྱིན་བསྩལ་པའི་མཚན། །ངལ་བསོས་བུ་ཞེས་གྲགས་པའི་སྤྲིང་ཡིག་གིས། །ཕྱོགས་ཀྱི་བུ་མོའི་རྣ་ལུང་མཛེས་བྱས་རྨད། །རྒྱལ་དབང་པདྨའི་བཀའ་ལུང་ནོར་བུའི་ཐོད། །གཙུག་ན་ཆེས་བརླིང་གྲུབ་པའི་དགེ་མཚན་གྱིས། །མཐའ་བཞིའི་རཱ་ཛ་དབང་འདུས་ཆོས་སྲིད་བརྟན། །གངས་ལྗོངས་སྣང་བའི་སྒོ་འབྱེད་ཁྱོད་ཀྱི་མཐུ། །ཁྱོད་ནི་རྐང་འཐུང་ནང་ནས་ཡོངས་འདུའི་ལྗོན། །རིན་ཆེན་ཕལ་ལས་འཇོག་པོའི་གཙུག་གི་རྒྱན། །སྣང་བར་བྱེད་ལས་ཉིན་མོའི་མགོན་པོ་སྟེ། །གཅན་གཟན་ཁྲོད་ན་རི་དྭགས་རྒྱལ་པོ་དངོས། །སྲིད་ན་ནོར་སྦྱིན་བྱེད་པོ་ཆེས་མང་ཡང་། །འཕགས་པ་ཁྱོད་དང་རྣམ་ཐར་མཉམ་པ་སུ། །དབྱིག་འཛིན་འདམ་སྐྱེས་ཕྲེང་བས་མཛེས་མོད་ཀྱི། །ཨུ་དུམྦཱ་ར་གཉིས་པ་ཡོད་མ་ཡིན། །དེ་སླད་རྒྱུ་མཚན་ཤེས་པའི་དྭངས་པའི་ཡིད། །དགའ་དང་གུས་པའི་རླབས་ཕྲེང་གཡོ་བཞིན་དུ། །བསྟོད་དབྱངས་མེ་ཏོག་སིལ་མས་རྗེས་བསྐུལ་ན། །ཐུགས་བསྐྱེད་ལྷག་པར་དགོངས་མཛོད་བསྟན་སྲུང་གཙོ། །དེང་སང་སྐྱེ་བོ་སྙིགས་མའི་རྒུད་པས་མནར། །བསྟན་པའི་མངའ་ཐང་ཉམས་ལ་ཕྱོགས་པའི་ཚེ། །འཛད་མེད་ནམ་མཁའ་མཛོད་ཀྱི་སྒོ་ཕྱེས་ལ། །འདོད་དགུ་ཆར་དུ་བསྐྱིལ་བར་མཛད་དུ་གསོལ། །ལྷ་ཀླུའི་གཙུག་ནོར་བྱེ་བས་མཚོན་མིན་པའི། །ཕན་བདེའི་འདོད་པ་འཇོ་བའི་ཡིད་བཞིན་གཏེར། །ཀུན་མཁྱེན་ཐུབ་པའི་བསྟན་པ་རིན་པོ་ཆེ། །སྲིད་མཐའི་བར་དུ་རྒྱས་པར་མཛད་དུ་གསོལ། །གངས་ལྗོངས་སྣང་བའི་སྒོ་ཆེན་འབྱེད་པའི་དཔལ། །བཤད་བརྒྱུད་ཀ་ཆེན་བཅུ་དང་སྒྲུབ་བརྒྱུད་བརྒྱད། །ཤིང་རྟའི་ལམ་སྲོལ་མ་བསླད་གཙང་མའི་རྒྱུན། །ཉན་བཤད་སྒོམ་སྒྲུབ་འཕེལ་བར་མཛད་དུ་གསོལ། །དྲི་མེད་མཁས་ཚུལ་དགུ་ཡི་བྱ་བ་ཡིས། །བསྟན་པ་རིན་ཆེན་གསལ་བྱེད་བཤེས་གཉེན་རྣམས། །གསང་གསུམ་རྡོ་རྗེའི་ཁམས་སུ་རྟག་བརྟན་ངོས། །བསྡུ་བ ཞིས་ཕྲིན་ལས་རྒྱས་པར་མཛད་དུ་གསོལ། །དད་པའི་མྱུ་གུ་ཆོས་སུ་སྨིན་པའི་འབྲས། །བསླབ་གསུམ་གསེར་གྱི་སྙེ་མའི་ཁུར་ལྕི་ཞིང་། །གཞན་ཕན་འདོད་དགུར་འཇོ་བའི་དགེ་འདུན་སྡེ། །མཐུན་ཞིང་དོན་འགྲུབ་འཕེལ་རྒྱས་མཛད་དུ་གསོལ། །བཤད་པའི་ཆུ་གཏེར་ལུང་རིགས་རླབས་ཕྲེང་མཛེས། །སྒྲུབ་པའི་རི་བོ་ཉམས་རྟོགས་རྩི་སྨན་རྒྱས། །བཟང་པོའི་ཕྲིན་ལས་དབྱར་རྔ་སྲིད་ན་སྙན། །སྲིད་ཞིའི་དཔལ་ཀུན་འདུ་བར་མཛད་དུ་གསོལ། །ཆོས་ལྡན་རྒྱལ་པོའི་མངའ་ཐང་ཆབ་སྲིད་བརྟན། །ཡ་རབས་མཛངས་བློན་དྲ་མའི་བློ་རྩལ་དར། །དགེ་བཅུའི་ཁྲིམས་སྲོལ་ཉེ་འཁོན་མེད་པར་ལྕི། །སྡེ་བཞིའི་དཔལ་འབྱོར་རྒྱས་པར་མཛད་དུ་གསོལ། །རྗེ་བོའི་ཡོན་གྱིས་འབངས་ལ་བདེ་བ་སྦྱིན། །འབངས་འཁོར་སྤྱོད་པས་རྗེ་བོའི་མངའ་ཐང་འཕེལ། །ཀུན་ཀྱང་ལས་འབྲས་ཡིད་ཆེས་གནས་ལ་དད། །བསྟན་ལ་སྲི་ཞུ་འཕེལ་བར་མཛད་དུ་གསོལ། །འབྱོར་ལྡན་སྐྱེ་བོའི་ཚོགས་ཀྱིས་ཁྱིམ་ཀུན་གང་། །རིགས་བཟང་ཤེས་རབ་ལྡན་པས་ཕྱོགས་རྣམས་ཁྱབ། །ནད་མུག་མཚོན་སྐལ་མི་ཤིས་མིང་མི་གྲགས། །བདེ་སྐྱིད་ལོངས་སྤྱོད་འཕེལ་བར་མཛད་དུ་གསོལ། །དཀར་ཕྱོགས་དགའ་བས་དུས་སུ་ཆར་འབེབས་ཤིང་། །ལེགས་སྤྱོད་མཐུ་ཡིས་རྩི་སྨན་འབྲས་བཟང་སྨིན། །རང་འབྱོར་གྱིས་འཚེངས་གཞན་འཚེའི་བསམ་སྦྱོར་བྲལ། །ཀུན་དགའི་དུས་སྟོན་རྒྱས་པར་མཛད་དུ་གསོལ། །བཅུད་ཀྱི་སྤྱོད་པས་སྣོད་ཀྱི་དགེ་མཚན་སྤེལ། །སྣོད་ཀྱི་དཔལ་ཡོན་བཅུད་ཀྱིས་གསོས་སྨན་གྲུབ། །ཕན་ཚུན་རྟེན་འབྱུང་མཐུ་ཡིས་ལེགས་དགུ་འདུ། །རྫོགས་ལྡན་གསར་དུ་འདྲེན་པར་མཛད་དུ་གསོལ། །དཀོན་མཆོག་བྱིན་རླབས་འགྲོ་བའི་རྒྱུད་ལ་ཞུགས། །འགྲོ་བའི་སྐྱབས་གནས་དཀོན་མཆོག་གསུམ་ལ་འཚོལ། །རྟེན་འབྲེལ་རྒྱུ་རྐྱེན་དམ་པའི་ཆོས་ཕྱོགས་འགྲིགས། །དོན་གཉིས་ལྷུན་གྲུབ་བཀྲ་ཤིས་མཛད་དུ་གསོལ། །ཅེས་པ་འདིའང་ཟིལ་གནོན་མེ་རྟ་ལོའི་ཆོ་འཕྲུལ་ཟླ་བའི་ཡར་ཚེས་དགེ་བར་དབེན་སྤྱི ལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བྱང་ཆུབ་སེམས་དཔའི་མིང་གིས་སྙན་པ་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་ཕྲིན་ལས་སུ་བཅོལ་པ་དོན་དང་ལྡན་ཞིང་བརྟན་གཡོའི་དགེ་མཚན་རླབས་པོ་ཆེ་འཕེལ་ཞིང་བརྟན་པའི་རྒྱུར་གྱུར་ཅིག
༄༅། །ༀ་སྭསྟི། འཕགས་མཆོག་ནམ་མཁའ་མཛོད་ལ་མངའ་བརྙེས་པས། །སྲིད་གསུམ་དབུལ་བའི་གདུང་བ་རྒྱུན་གཅོད་ཅིང་། །ཕན་བདེའི་འདོད་པ་འཇོ་བའི་དཔག་བསམ་དབང་། །རྒྱལ་ཆེན་རྣམ་ཐོས་སྲས་ལ་བསྟོད་པར་བགྱི། ༡ །རི་རབ་བྱང་ཕྱོགས་ཕོ་བྲང་ལྕང་ལོ་ཅན། །སྟོང་གསུམ་བདག་པོས་སྲིད་པའི་ཕུན་ཚོགས་བཅུད། །གཅིག་ཏུ་བསྡོམས་པའི་འཕྲུལ་གྱིས་བཀོད་འདྲ་བས། །འཕྲུལ་དགའི་ཞིང་ཡང་བྲིས་པའི་རི་མོར་བྱས། ༢ །ཉིན་བྱེད་བྱེ་བས་མི་མཚོན་གཟི་ཡིས་འཁྱུད། །ལྷ་ཡི་ཆ་ལུགས་རིན་ཆེན་རྒྱལ་མཚན་དང་། །ནོར་སྐྱུག་ནེའུ་ལེ་ལེགས་འཛིན་གདོང་ལྔའི་ཁྲིར། །རབ་བརྗིད་ཁྱོད་སྐུའི་སྤུན་ཟླར་རང་ཉིད་ཙམ། ༣ །བཞི་ཡིས་ལྷག་པའི་བཅུ་ཕྲག་དྲུག་ལྡན་གསུང་། །གཉིས་མེད་ཡེ་ཤེས་ཉི་དཀྱིལ་གསལ་བའི་ཐུགས། །ཆེ་བའི་ཡོན་ཏན་གཏིང་མཐའ་དཔོག་མིན་པ། །ཁྱོད་དང་མཉམ་པ་སྲིད་པའི་ཁོངས་ན་སུ། ༤ །སྣ་ཚོགས་མཚན་དང་སྐུ་ཡི་བཀོད་པ་ཡིས། །རྣམ་བཞིའི་ཕྲིན་ལས་ཟབ་མྱུར་སྒོ་འཕར་འབུམ། །འགྱེད་མཐོང་དཔལ་གྱི་མགྲིན་ཅན་སྐྱེངས་པའི་ཡིད། །གངས་རིར་དཀའ་ཐུབ་ཟོལ་གྱི་ངལ་བ་བརྟེན། ༥ །ཁྱོད་སྲས་གར་མཁན་མཆོག་དང་ཕྲིན་སྒྲུབ་གསུམ། །ཁྱད་པར་པ་བཞི་ཐུན་མོང་དགུ་བཅུ་གཅིག །ཀུན་ཀྱང་བསོད་ནམས་དཔུང་པ་དར་དྲགས་པས། །བརྒྱ་བྱིན་མིག་སྟོང་བགྲད་ནས་འདར་བ་འདྲ། ༦ །རྟ་བདག་ཕྱོགས་སྐྱོང་ཆོས་སྤུན་སྟོབས་ཆེན་རིགས། །ལྗོངས་གནས་ཡུལ་སྐྱོང་འཕྲོག་མ་མ་སྲིན་དང་། །གནོད་གནས་ལ་སོགས་གྲངས་མེད་འཁོར་གྱི་ཚོགས། །ཕན་ཚུན་དྲེགས་པས་སྟོབས་འབྱོར་འགྲན་པ་བཞིན། ༧ །ཁྱོད་ནི་ཐུན་མོང་ཐེག་པར་འོད་སྲུང་དྲུང་། །བསླབ་པའི་གཞི་མནོས་ཤཱཀྱའི་བསྟན་པ་འདིར། །བདེན་མཐོང་བསྟན་པ་རིན་ཆེན་མཛོད་ཀྱི་གཉེར། །རེ་ལྟར་ཐོགས་ཀྱང་སྲིད་པ་བདུན་པར་གྲགས། ༨ །ཐུན་མིན་ཐེག་ཆེན་མདོ་ལས་གྲངས་མེད་སྔོན། །ཐུགས་བསྐྱེད་ས་བརྒྱད་ལ་གནས་སེམས་དཔའ་ཆེ། །མ་འོངས་རིན་ཆེན་གདུགས་ཞེས་རྒྱལ་བ་རུ། །བྱང་ཆུབ་ལུང་བསྟན་ཐུབ་པ་མཆོག་གིས་བསྩལ། ༩ །ཁྱད་པར་བྱ་སྤྱོད་རྣལ་འབྱོར་བླ་མེད་ཀྱི། །རྒྱུད་སྡེ་རྒྱ་མཚོར་དབང་བསྐུར་དམ་ནོས་པའི། །ངེས་གསང་བསྟན་པའི་གཉེར་འཛིན་གཅིག་པུ་པ། །རྣམ་ཐར་བསམ་མི་ཁྱབ་ལ་སུ་མི་རང་། ༡༠ །བརྟན་གཡོ་སྲིད་ཞིའི་ཕུན་སུམ་ཚོགས་པའི་དཔལ། །དབང་ལྔ་སིམ་བྱེད་ངོ་མཚར་མཆོད་པའི་སྤྲིན། །མ་ལུས་བློས་བླངས་དྭངས་པས་འབུལ་བགྱིད་ན། །བསྟན་འགྲོའི་དགེ་མཚན་སྤེལ་སླད་བདག་གིར་མཛོད། ༡༡ །ལྟུང་སྒོ་བཞི་ཡིས་སྒྲིབ་པའི་རབ་རིབ་མིག །སྡོམ་པ་གསུམ་སོགས་སྤྱི་དང་བྱེ་བྲག་གི། །དམ་ཚིག་ཉམས་པའི་མཆི་མས་ནོན་པའི་བཞིན། །སྟོབས་བཞིའི་ཁྲུས་རས་གཙང་མས་བྱི་དོར་བགྱིད། ༡༢ །སྔོན་ཚེ་སེམས་དཔའ་ཁྱོད་ཀྱིས་རྒྱལ་རྣམས་དྲུང་། །ཞལ་འཆེས་དམ་ཚིག་གཉན་པོ་རྗེས་དགོངས་ལ། །རིས་བྲལ་བསྟན་དང་འགྲོ་ལ་ཕན་བདེའི་དཔལ། །མཐའ་ཡས་སྦྱིན་པའི་ཕྱག་ཡངས་དེང་བསྐྱོད་འཚལ། ༡༣ །རེ་བའི་མོད་ལ་སྡེ་བཞིའི་འབྲས་མང་གིས། །དོན་གཉེར་སྙིམ་པ་འགེང་བར་མི་མཛད་ན། །ཁྱོད་ཀྱི་གྲགས་པ་རྫུན་དུ་མི་འགྱུར་རམ། །དེ་བས་དུས་འདིར་དགོངས་མཛོད་མགོན་པོ་ཀྱཻ། ༡༤ །རྣམ་བཞིའི་ཕྲིན་ལས་གང་འདུལ་རོལ་རྩེད་བརྒྱས། །དོན་གཉིས་བསམ་ཀུན་སུག་མཐིལ་གཏེར་བཞིན་དུ། །མངོན་སྣང་རྫོགས་ལྡན་དང་པོའི་དགའ་བ་བཞིན། །ལེགས་ཚོགས་དཔལ་གྱིས་ཕྱོགས་ཀུན་བརྒྱན་པར་མཛོད། ༡༥ །ཅེས་པའང་མོས་ལྡན་དམ་པ་མཆོག་གི་བཞེད་སྐོང་དུ་རྙིང་བན་གྱི་ན་བ་འགྱུར་མེད་པདྨ་བསྟན་འཛིན་གྱིས། མཁས་པ་བུ་སྟོན་གྱི་གསུང་གི་རྗེས་སུ་འབྲངས་ནས་བླ་བྲང་ཕུན་ཚོགས་ཡོངས་འདུའི་སྟེང་ཤག་ཏུ་བྲིས་པ་སརྦ་དཱ་མངྒལཾ་བྷ་ཝནྟུ། ༈ བཻ། ལྷུན་པོའི་བྱང་ཕྱོགས་ལྕང་ལོ་ཅན་ཞེས་ཕོ་བྲང་དམ་པ་ཉམས་དགའ་བར། །བཻ་ལས་སྐྱེས་པའི་རྒྱལ་པོ་ཆེན་པོ་ས་བརྒྱད་སེམས་དཔའ་རྣམ་ཐོས་སྲས། །གསེར་མདོག་བརྗིད་ཆགས་སྒེག་འཛུམ་ཁྲོ་བོའི་ཉམས་ལྡན་རྒྱལ་མཚན་ནེའུ་ལེ་འཛིན། །ཕྲག་གོང་ཉི་མ་ཟླ་བས་རབ་བརྒྱན་ཞལ་ནས་རིན་ཆེན་ཆར་པ་འབེབས། །མི་འཛད་ནམ་མཁའ་མཛོད་ལ་མངའ་བརྙེས་རབ་བརྗིད་གདོང་ལྔའི་སྟེང་ན་རོལ། །རྣམ་འཕྲུལ་དཔག་ཡས་འགྲོ་བའི་རེ་སྐོང་དུས་གསུམ་རྒྱལ་བའི་ཕྲིན་ལས་མཛོད། །ཁྱོད་ནི་དོན་གྱི་སངས་རྒྱས་ལགས་མོད་དགོས་པའི་དབང་གིས་ནོར་སྦྱིན་ཚུལ། །དེ་སླད་ཁྱོད་ལ་གུས་པས་འདུད་དོ་ཕུན་ཚོགས་སྡེ་བཞིའི་དཔལ་སྩོལ་ཅིག །ཛཾ་ཡིག་ལས་འཁྲུངས་གསེར་རི་ལྟར་བརྗིད་ནོར་གྱི་བདག་པོ་ཛམྦྷ་ལ། །དར་དང་རིན་ཆེན་ཨུཏྤལ་གྱིས་བརྒྱན་ནོར་བུ་དང་ནི་ནེའུ་ལེ་བསྣམས། །གཏེར་གྱི་བུམ་པའི་གདན་ལ་དགྱེས་རོལ་ཁམས་གསུམ་ནོར་སྦྱིན་ཡོངས་ལ་དབང་། །ཁྱོད་ལ་གུས་པས་འདུད་དོ་རིན་ཆེན་ནོར་གྱི་ཆར་པ་འདིར་ཕོབ་ཅིག །ཧྲཱིཿལས་སྐྱེས་པའི་ནོར་རྒྱུན་ལྷ་མོ་རབ་མཛེས་གསེར་སྦྱངས་བརྟན་པ་འཕྲོག །ཞལ་གཅིག་ཕྱག་གཉིས་ཞི་འཛུམ་སྒེག་ཉམས་ཕྱག་ན་འབྲས་ཀྱི་སྙེ་མ་བསྣམས། །ཞབས་གཉིས་བརྐྱང་བསྐུམ་ཕྱེད་སྐྱིལ་གྱིས་བཞུགས་སྲིད་ཞིའི་ཟས་གཡང་མ་ལུས་སྡུད། །ཁྱོད་ལ་གུས་པས་འདུད་དོ་དེང་འདིར་ཟས་ནོར་གོས་ཀྱི་ཆར་སྐྱིལ་ཅིག །ཛམྦྷ་ལ་དང་གང་བ་བཟང་པོ་ནོར་བུ་བཟང་དང་ཀུ་བེ་ར། །ཡང་དག་ཤེས་དང་འབྲོག་གནས་ལྔས་རྩེན་ཀུཎྜ་ལཱི་སྟེ་རྟ་བདག་བརྒྱད། །གཡས་པ་རང་རང་ཕྱག་མཚན་དང་ནི་གཡོན་པ་གཏེར་གྱི་ནེའུ་ལེ་འཛིན། །ཁྱོད་ལ་གུས་པས་འདུད་དོ་རང་རང་ལས་ལ་དབང་བའི་ཕྱྭ་ཁུག་ཅིག །སྟོབས་ཀྱིས་རྒྱུ་དང་པདྨ་པད་ཆེ་ནོར་རྒྱས་དུང་སྐྱོང་མཐའ་ཡས་དང་། །རིགས་ལྡན་དང་ནི་འཇོག་པོ་ལ་སོགས་ཀླུ་ཡི་ནོར་ལྷ་ཆེན་པོ་རྣམས། །སྦྲུལ་མགོའི་གདེངས་ཀ་བདུན་བདུན་དང་ལྡན་ཕྱག་ན་ནོར་རྐྱལ་ནེའུ་ལེ་བསྣམས། །ཁྱོད་ལ་གུས་པས་འདུད་དོ་སྐྱེ་དགུའི་ཕོངས་པ་མ་ལུས་སེལ་མཛོད་ཅིག །གཞན་ཡང་རྒྱལ་ཆེན་བཞི་དང་སྡེ་དཔོན་ཉེར་བརྒྱད་སྟོབས་ཆེན་སུམ་ཅུ་གཉིས། །གཡང་གི་ལྷ་མོ་མཛེས་ལྡན་སྲས་བཞི་བློན་བརྒྱད་མ་མོ་བྱེ་བའི་འཁོར། །ལྷ་སྲིན་སྡེ་བརྒྱད་སྤྲུལ་འཁོར་བཅས་དང་ཕྱྭ་གཡང་འགུགས་བསྟིམ་ལྷ་མོའི་ཚོགས། །ཁྱོད་ལ་གུས་པས་འདུད་དོ་ཕྱྭ་གཡང་ཚེ་དཔལ་དགོས་འདོད་ཆར་ཕོབ་ཅིག །ཁྱེད་རྣམས་ཡེ་ཤེས་འཇིག་རྟེན་སྣ་ཚོགས་ཚུལ་གྱིས་འགྲོ་ལ་ཕན་སྦྱིན་མོད། །དོན་དམ་གདོད་མའི་འོད་གསལ་ཆེན་པོ་རོ་མཉམ་ཆོས་དབྱིངས་གཅིག་གི་རྩལ། །དེ་སླད་རབ་ཏུ་དགའ་དང་གུས་པའི་ཡིད་ཀྱིས་རྩེ་གཅིག་བསྔགས་བགྱི་ན། །བུམ་བཟང་དཔག་བསམ་ཤིང་བཞིན་ཡིད་ལ་རེ་བའི་དཔལ་ཀུན་དེང་སྩོལ་ཅིག །འཆི་མེད་ཚེ་དང་རྒས་མེད་ལང་ཚོ་རྒུད་མེད་རྣམ་དཔྱོད་བློ་གྲོས་དང་། །འཛད་མེད་ལོངས་སྤྱོད་མངའ་ཐང་སྙན་གྲགས་འཁོར་སློབ་གདུལ་བྱ་ཕྲིན་ལས་རྒྱུན། །བཅུད་ཆེན་ཟས་དང་བརྗིད་ཆེན་གོས་སོགས་སྲིད་དང་ཞི་བའི་ཕུན་ཚོགས་དཔལ། །མ་ལུས་དབང་དུ་བསྡུས་ལ་དེང་སྩོལ་ཕྱོགས་ལས་རྣམ་རྒྱལ་མཆོག་བྱིན་ཅིག །ཅེས་པའང་པདྨ་དབང་ཆེན་གྱི་བཞེད་ངོར། ཕྱྭ་ཕྲིན་གཞུང་ནས་འབྱུང་བ་བཞིན་སྔགས་བན་འགྱུར་མེད་པད་མ་བསྟན་འཛིན་གྱིས་བྲིས་པ་དགེ་ལེགས་ཀྱི་སྣང་བ་ཆེན་པོས་ས་གསུམ་ཁྱབ་པའི་རྒྱུར་གྱུར་ཅིག སརྦ་དཱ་མདྒལཾ། །དགེའོ། །དགེའོ། །དགེའོ།།