རྡོ་རྗེ་འཆང་མཁྱེན་བརྩེའི་དབང་པོ་ལ་བརྟེན་པའི་བླ་མ་རྒྱང་འབོད་མདོར་བསྡུས་བྱིན་རླབས་སྤྲིན་ཕུང་།

༄༅། །རྡོ་རྗེ་འཆང་མཁྱེན་བརྩེའི་དབང་པོ་ལ་བརྟེན་པའི་བླ་མ་རྒྱང་འབོད་མདོར་བསྡུས་བྱིན་རླབས་སྤྲིན་ཕུང་ཞེས་བྱ་བ་བཞུགས་སོ།། བླ་མ་མཁྱེན་ནོ། །ལན་གསུམ། གཞི་གྲོལ་ཀ་དག་སྤྲོས་བྲལ་ཆོས་སྐུ་ཡི་རང་རྩལ། །ལྷུན་གྲུབ་ངེས་པ་ལྔ་ལྡན་ལོངས་སྐུ་ཡི་སྤྲིན་ཕུང་། །རོལ་རྩལ་མ་འགགས་གང་འདུལ་སྤྲུལ་སྐུ་རུ་སྣང་བ། །དབྱེར་མེད་ངོ་བོ་ཉིད་སྐུའི་བླ་མ་དེ་མཁྱེན་ནོ། །མོས་གུས་བྱས་སོ་རྗེ་བཙུན་ཐུགས་རྗེ་ཡི་གཏེར་ཆེན། །ཡེ་ཤེས་གཟིགས་པས་དགོངས་མཛོད་མཁྱེན་བརྩེ་ཡི་དབང་པོ། །ཆོས་མིན་དྲེད་པོའི་བློ་སྣ་ཆོས་ཕྱོགས་སུ་བསྒྱུར་ནས། །རྟོགས་པ་ཕ་དང་མཉམ་པའི་དངོས་གྲུབ་ཅིག་སྩོལ་ཤོག །རབ་འབྱམས་རྩ་གསུམ་ལྷ་ཡི་ཡེ་ཤེས་ཀྱི་རོལ་གར། །དྲི་མེད་ལུང་རྟོགས་བསྟན་པ་རིན་ཆེན་གྱི་བང་མཛོད། །རིས་བྲལ་བསྟན་འགྲོའི་དཔལ་མགོན་ཟླ་མེད་ཀྱི་བཤེས་གཉེན། །སྐྱབས་ཀུན་འདུས་ཞལ་དྲིན་ཆེན་བླ་མ་དེ་མཁྱེན་ནོ། །མོས་གུས་བྱས་སོ་རྗེ་བཙུན་ཐུགས་རྗེ་ཡི་གཏེར་ཆེན། །ཡེ་ཤེས་གཟིགས་པས་དགོངས་མཛོད་མཁྱེན་བརྩེ་ཡི་དབང་པོ། །ཆོས་མེད་དྲེད་པོའི་བློ་སྣ་ཆོས་ཕྱོགས་སུ་བསྒྱུར་ནས། །རྟོགས་པ་ཕ་དང་མཉམ་པའི་དངོས་གྲུབ་ཞིག་སྩོལ་ཤོག །བི་མའི་རྣམ་འཕྲུལ་དཔལ་ལྡན་པདྨ་ཡི་སྲས་གཅིག །འོད་གསལ་སྙིང་པོའི་བཀའ་བབས་འཕགས་ནོར་གྱི་གྲངས་ལྡན། །མདོ་སྔགས་བསྟན་མཆོག་འཛམ་གླིང་ཕྱོགས་མཐའ་རུ་རྒྱས་མཛད། །བསྟན་པ་རྒྱ་མཚོའི་མགོན་གྱུར་བླ་མ་དེ་མཁྱེན་ནོ། །མོས་གུས་བྱས༴ ཡེ་ཤེས་གཟིགས༴ ཆོས་མེད་དྲེད་པོའི༴ རྟོགས་པ་ཕ༴ གང་ཐུགས་འགྱུར་མེད་ཡོངས་གྲུབ་འོད་གསལ་གྱི་མཁའ་ལ། །གཟུང་འཛིན་གཉིས་སྣང་འཁྲུལ་པའི་སྤྲིན་ཚོགས་ཀུན་དེངས་པས། །མཁྱེན་གཉིས་ཡེ་ཤེས་ཉི་ཟླ་སྒྲིབ་མེད་དུ་གསལ་བའི། །ཀུན་མཁྱེན་ཆོས་རྗེ་འགྲོ་བའི་བླ་མ་དེ་མཁྱེན་ནོ། །མོས་གུས་བྱས༴ ཡེ་ཤེས་གཟིགས༴ ཆོས་མེད༴ རྟོགས་པ་ཕ་དང་༴ མཐའ་མེད་སྲིད་མཚོར་དུབ་པའི་ཉམ་ཐག་གི་འགྲོ་ལ། །ཕུལ་བྱུང་བྱམས་བརྩེའི་སྤྱན་གྱིས་དུས་དྲུག་ཏུ་གཟིགས་ནས། །ཐབས་མཁས་ཕྲིན་ལས་ཟབ་མོས་བྱང་གྲོལ་ལ་འགོད་མཛད། །བརྩེ་ཆེན་ཐུགས་རྗེའི་དབང་ཕྱུག་བླ་མ་དེ་མཁྱེན་ནོ། །མོས་གུས༴ ཡེ་ཤེས༴ ཆོས་མེད༴ རྟོགས་པ་ཕ༴ རྨད་བྱུང་ཐུགས་རྗེ་ཆེན་པོའི་དཔྱང་ཐག་གིས་བཏབ་སྟེ། །འདུ་འཛི་འཁོར་བའི་གཅོང་རོང་ཉམ་ཐག་ལས་དྲངས་ནས། །ཐེག་ཆེན་བྱང་ཆུབ་སེམས་ཀྱི་བདུད་རྩི་མཆོག་སྩོལ་མཛད། །བཀའ་དྲིན་བསམ་མི་ཁྱབ་པའི་བླ་མ་དེ་མཁྱེན་ནོ། །མོས་གུས༴ ཡེ་ཤེས༴ ཆོས་མེད༴ རྟོགས་པ༴ གཞི་རྒྱུད་བདེ་གཤེགས་སྙིང་པོ་སྐུ་གསུམ་གྱི་ས་བོན། །ལམ་རྒྱུད་ཐབས་ཤེས་ཟུང་འཇུག་དྲོད་གཤེར་གྱིས་བསྐྱངས་པས། །འབྲས་རྒྱུད་སྐུ་དང་ཡེ་ཤེས་རང་ཆས་སུ་སྨིན་བྱེད། །དབང་བཞི་རྫོགས་པར་བསྐུར་བའི་བླ་མ་དེ་མཁྱེན་ནོ། །མོས་གུས༴ ཡེ་ཤེས༴ ཆོས་མེད༴ རྟོགས་པ༴ ཀུན་བཟང་རྡོ་རྗེ་སེམས་དཔའི་ཞལ་ལུང་གི་ཉིང་ཁུ། །གྲུབ་མཆོག་རིག་འཛིན་རྒྱ་མཚོའི་ཐུགས་བུམ་དུ་བསྐྱིལ་པའི། །མཐའ་དྲུག་ཚུལ་བཞིས་བཅིངས་པ་རྡོ་རྗེ་ཡི་གནས་རྣམས། །མ་སྦས་ལྷུག་པར་བཀྲལ་བའི་བླ་མ་དེ་མཁྱེན་ནོ། །མོས་གུས༴ ཡེ་ཤེས༴ ཆོས་མེད༴ རྟོགས་པ༴ གཞི་གནས་རིག་པ་ཀ་དག་སྤྲོས་བྲལ་གྱི་ཆོས་སྐུ། །ཡིད་དཔྱོད་འཛིན་པ་བྲལ་བར་མངོན་སུམ་དུ་བསྟན་ནས། །ལྷུན་གྲུབ་སྣང་བཞིའི་ཉེ་ལམ་འཆུགས་མེད་ལ་སྦྱོར་མཛད། །མཐར་ཐུག་ངེས་པ་དོན་གྱི་བླ་མ་དེ་མཁྱེན་ནོ། །མོས་གུས༴ ཡེ་ཤེས༴ ཆོས་མེད༴ རྟོགས་པ༴ ཀྱེ་མ་དལ་འབྱོར་རྙེད་ཀྱང་དམ་ཆོས་ནི་མ་འགྲུབ། །མི་རྟག་འཆི་བར་ཤེས་ཀྱང་འདིར་སྣང་ལ་ཞེན་ཅིང་། །འཁོར་བའི་སྡུག་བསྔལ་མཐོང་ཡང་བློ་ཁ་ནི་མ་ལྡོག །རྒྱུ་འབྲས་ཚིག་ཏུ་ཁྱེར་ཡང་ལག་ལེན་ནི་འཛོལ་འདུག །མོས་གུས༴ ཡེ་ཤེས༴ ཆོས་མེད༴ རྟོགས་པ༴ དབེན་གནས་རི་ཁྲོད་འགྲིམས་ཀྱང་རྣམ་གཡེང་ནི་མ་ཞི། །གྲོགས་མེད་གཅིག་པུར་གནས་ཀྱང་རང་སེམས་ནི་མ་དུལ། །ལྟར་སྣང་ཆོས་ལྟར་བཅོས་ཀྱང་ཆོས་བརྒྱད་ཀྱི་སྣོན་མ། །སྤྲང་པོའི་འདུན་མ་རང་མགོ་རང་གཡོགས་ལ་འབྱམས་འདུག །མོས་གུས༴ ཡེ་ཤེས༴ ཆོས་མེད༴ རྟོགས་པ༴ སོ་ཐར་འདུལ་ཁྲིམས་ནོས་ཀྱང་ཚུལ་འཆོས་ཀྱི་སྣོན་མ། །བྱང་སེམས་བསྐྱེད་ལོ་བྱས་ཀྱང་ཡིད་བྱེད་ནི་མ་བྲལ། །གསང་སྔགས་དབང་བཞི་ཞུས་ཀྱང་སྒོ་གསུམ་ནི་ཐ་མལ། །བརྩམས་པ་ཐམས་ཅད་ཉོན་མོངས་ཁ་སྣོན་དུ་གྱུར་འདུག །མོས་གུས༴ ཡེ་ཤེས༴ ཆོས་མེད༴ རྟོགས་པ༴ བསྐྱེད་རིམ་བསྒོམས་ཀྱང་ཨ་འཐས་བདེན་འཛིན་ལ་ཞེན་ཅིང་། །ལྷ་ཛབ྄་སྙིང་པོ་བསྒྲངས་ཀྱང་འཕྲོ་འདུ་ཡི་གཟེར་བྲལ། །རྫོགས་རིམ་སྟོང་ཉིད་བསྒོམས་ཀྱང་བློས་བྱས་ཀྱི་རྒྱས་འདེབས། །བྱས་མང་འབྲས་ཉུང་འཁྲུལ་རྟོག་རྒྱ་ཡན་ལ་འབྱམས་འདུག །མོས་གུས༴ ཡེ་ཤེས༴ ཆོས་མེད༴ རྟོགས་པ༴ ཀ་དག་ལྟ་བ་ཡིད་དཔྱོད་འཛིན་པ་ཡིས་བསླད་ཅིང་། །ལྷུན་གྲུབ་སྒོམ་པ་གཟུང་འཛིན་བདེན་ཞེན་གྱིས་བཅིངས་ཏེ། །ཤུགས་འབྱུང་སྤྱོད་པ་ཚུལ་འཆོས་ཞགས་པ་ཡིས་བསྡམས་ནས། མ་བཙལ་ལྷུན་རྫོགས་འབྲས་བུ་རེ་དོགས་ཀྱི་སྒྲིབ་འདུག །མོས་གུས༴ ཡེ་ཤེས༴ ཆོས་མེད༴ རྟོགས་པ༴ བློ་ལྡོག་རྣམ་བཞིས་དུལ་བའི་ཞིང་ས་ནི་གཤིན་པོར། །ཚུལ་ཁྲིམས་རྣམ་པར་དག་པའི་དཔག་བསམ་གྱི་སྙེ་མ། །གཞན་ཕན་བྱང་ཆུབ་སེམས་ཀྱི་འབྲས་བཟང་ཆེར་སྨིན་པས། །ལམ་གོལ་གཡང་ལས་གྲོལ་བའི་དངོས་གྲུབ་ཅིག་སྩོལ་ཤོག །བསྐྱེད་པའི་རིམ་པས་སྣང་ཞེན་ལྷ་སྐུ་རུ་བྱང་ཞིང་། །རླུང་སྔགས་རྡོ་རྗེའི་བཟླས་པས་ལས་རླུང་གི་འཆིང་དག །བསྙེན་བསྒྲུབ་རིག་འཛིན་རྣམ་བཞིའི་གསང་ལམ་ལ་བརྟེན་ནས། །གདོད་མའི་རྒྱལ་ས་ཟིན་པའི་དངོས་གྲུབ་ཅིག་སྩོལ་ཤོག །བདེ་གསལ་མི་རྟོག་ཉམས་ཀྱི་ཤུན་པ་དང་བྲལ་ཞིང་། །སེམས་དང་སེམས་བྱུང་རྙོག་པའི་དྲི་མ་ཀུན་སངས་ཏེ། །རང་རིག་ཀ་ནས་དག་པ་ཁྲེགས་ཆོད་ཀྱི་དགོངས་པ། །མངོན་གྱུར་སྒོམ་མེད་ཆེན་པོའི་དངོས་གྲུབ་ཅིག་སྩོལ་ཤོག །གནད་གསུམ་ཆོས་ཉིད་འཁོར་ལོའི་མན་ངག་ལ་བརྟེན་ནས། །རིག་གདངས་དབང་པོས་མངོན་སྣང་གོང་འཕེལ་དུ་གྱུར་ཏེ། །ཚད་ཕེབས་ལོངས་སྐུའི་ཞིང་ཉུལ་ཟད་ས་ལ་འཁྱོལ་ནས། །འཕོ་ཆེན་འཇའ་ལུས་འགྲུབ་པའི་དངོས་གྲུབ་ཅིག་སྩོལ་ཤོག །བརྩེ་ཆེན་ཐུགས་རྗེའི་སྒྱུ་འཕྲུལ་ཡེ་ཤེས་ཀྱི་ཉི་མ། །མཐའ་ཀླས་འགྲོ་བའི་མོས་མཁར་འགོག་མེད་དུ་གསལ་ནས། །མ་རིག་གཟུང་འཛིན་འཁྲུལ་རྟོག་ལྷག་མེད་དུ་བསལ་ཏེ། །གདོད་མའི་གྲོལ་སར་འགོད་ནུས་བྱིན་རླབས་ཤིག་སྩོལ་ཤོག །མོས་གུས་བྱས་སོ་རྗེ་བཙུན་ཐུགས་རྗེ་ཡི་གཏེར་ཆེན། །བརྩེ་ཆེན་ཐུགས་རྗེས་གཟིགས་ཤིག་དྲིན་ཆེན་གྱི་བླ་མ། །དགོངས་རྒྱུད་བྱིན་རླབས་འཕོ་བའི་དབང་བསྐུར་གྱི་མཐུ་ལས། །ལྟ་དགོངས་ཕ་དང་མཉམ་པའི་དངོས་གྲུབ་ཅིག་སྩོལ་ཤོག །ཅེས་མོས་གུས་འཆི་མ་འཁྲུགས་པའི་གདུང་བའི་དབྱངས་ཀྱིས་གསོལ་བ་བཏབ་པའི་མཐར་བླ་མ་དང་རང་སེམས་གཉིས་མེད་དུ་བསྲེས་ནས་གཤིས་བདེ་བ་ཆེན་པོའི་ངང་ལ་གསལ་སྟོང་འཛིན་བྲལ་དུ་འཇོག་པ་ནི་གནད་དམ་པའོ། །ཞེས་པའང་སྲིད་འབྱོར་འཁོར་བའི་ལོངས་སྤྱོད་མཆིལ་མའི་ཐལ་བ་བཞིན་བོར་ནས་ངེས་མེད་དབེན་པའི་རི་བོར་སྒྲུབ་པ་སྙིང་པོར་དྲིལ་བའི་གླིང་རྗེ་བཙུན་མ་འཇམ་དབྱངས་ཚུལ་ཁྲིམས་དབང་མོའི་བཀས་བསྐུལ་མ་གནང་བ་ལྟར། མགོན་པོ་གང་གི་ཚད་མེད་པའི་ཐུགས་རྗེས་བསྐྱངས་པའི་བཀའ་འབངས་ཀྱི་ཐ་ཤལ་བྷུ་སུ་ཀུ་འཇམ་དབྱངས་མཁས་གྲུབ་རྒྱ་མཚོའི་སྡེས་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་སྟེ། འདིས་ཀྱང་རང་གཞན་ཀུན་གྱི་རྒྱུད་ལ་དཔལ་ལྡན་བླ་མའི་བྱིན་རླབས་རྩོལ་མེད་དུ་འཇུག་པའི་རྒྱུར་གྱུར་ཅིག། །།