ཀུན་མཁྱེན་བློ་གྲོས་མཐའ་ཡས་ཀྱི་ཐུགས་དམ་གནད་ནས་བསྐུལ་བའི་གསོལ་འདེབས་མོས་གུས་ཀྱི་དབྱངས་སྙན།

༄༅། །ཀུན་མཁྱེན་བློ་གྲོས་མཐའ་ཡས་ཀྱི་ཐུགས་དམ་གནད་ནས་བསྐུལ་བའི་གསོལ་འདེབས་མོས་གུས་ཀྱི་དབྱངས་སྙན་ཞེས་བྱ་བ་བཞུགས་སོ།། ན་མོ་གུ་རུ། མཐའ་བརྒྱད་སྤྲོས་པའི་དྲྭ་བ་དབུ་མ་རུ་བསྡོམས་པའི། །སྙིང་དབུས་ཤནྟ་པུ་རི་བློ་བྲལ་གྱི་གྲོང་དུ། །ཀ་དག་ཆོས་ཟད་ཆེན་པོའི་རྒྱལ་ཐབས་ལ་རོལ་བའི། །ཆོས་སྐུའི་སྟོན་པ་གུ་ཎ་ས་མུ་དྲ་མཁྱེན་ནོ། །ཡིད་དཔྱོད་གྲུབ་མཐའ་ཞིག་པར་བྱིན་གྱིས་རང་རློབས་ཤིག །ནང་དབྱིངས་ཁྱད་ཆོས་དྲུག་ལྡན་འོད་གསལ་གྱི་འཆར་སྒོ། །ལྷུན་གྲུབ་ངེས་པ་ལྔ་ལྡན་ཡེ་ཤེས་ཀྱི་རོལ་རྩེད། །བདེ་ཆེན་ཁ་སྦྱོར་བདུན་གྱི་གསང་མཛོད་ཀྱིས་ཕྱུག་པའི། །ལོངས་སྐུའི་བླ་མ་གུ་ཎ༴ འོད་གསལ་སྣང་བཞི་མཐར་ཕྱིན་བྱིན་གྱིས་རང༴ རིག་རྩལ་ཐུགས་རྗེའི་རོལ་པ་འགག་མེད་ཀྱི་འཆར་སྒོ། །གང་འདུལ་འགྲོ་བའི་མོས་ངོར་དེ་སྙེད་དུ་སྟོན་པའི། །འདུལ་བ་བཞི་ཡི་ཕྲིན་ལས་རྟག་ཁྱབ་ལ་དབང་འབྱོར། །མཆོག་གི་སྤྲུལ་སྐུ་གུ་ཎ༴ དོན་གཉིས་ལྷུན་གྱིས་འགྲུབ་པར་བྱིན་གྱིས་རང༴ སྒྱུ་ལུས་ལྷ་སྐུར་སྨིན་པའི་འཇོ་སྒེག་དང་སྦྲགས་ནས། །སྲོག་རྩོལ་དབུ་མར་ཐིམ་པའི་ངོ་མཚར་གྱི་བཀོད་པས། །ཟུང་འཇུག་སྐུ་བཞིའི་རྒྱལ་སར་ངལ་གསོ་ལ་ཕེབས་པའི། །གྲུབ་བརྒྱའི་སྤྱི་མོས་གུ་ཎ༴ ཚེ་འདིར་གྲུབ་མཐའ་སྙོག་པར་བྱིན་གྱིས་རང་༴ སྲིད་རྩ་ཤེས་བྱར་འཁོན་པའི་དགྲ་སྡེ་ཡི་མུན་ཚོགས། །མཁྱེན་རབ་ཡེ་ཤེས་རལ་གྲིའི་གཟི་འོད་ཀྱིས་བཅོམ་པའི། །སྔོན་མེད་སྨྲ་བའི་སེང་གེ་མཚོ་བྱུང་གི་ལང་ཚོ། །ཤེས་བྱ་ཀུན་མཁྱེན་གུ་ཎ༴ སྤོབས་པའི་གཏེར་བརྒྱད་གྲོལ་བར་བྱིན་གྱིས་རང་༴ བསྒྲང་ཡས་བསྐལ་པར་གོམས་པའི་སྙིང་རྗེ་ཡི་དཔྱིད་ཐིག །སྲིད་མཐར་གཟིགས་པ་མི་གཏོང་དམ་བཅའ་ཡི་གོ་ཆ། །དབྲལ་མིན་གངས་ཅན་མགོན་པོའི་ཡེ་ཤེས་ཀྱི་རང་གཟུགས། །ཐུགས་རྗེའི་དབང་ཕྱུག་གུ་ཎ༴ གཞན་ཕན་ལྷག་བསམ་འབྱོར་པར་བྱིན་གྱིས་རང་༴ ངེས་གསང་བཀའ་ཡི་སྡུད་པོ་རིག་འཛིན་གྱི་རྩལ་འཆང་། །མངོན་སྣང་མཛོད་ལྔའི་སྲོལ་འབྱེད་སྔོན་མེད་ཀྱི་ཤིང་རྟ། །བློ་གྲོས་སྤོབས་པ་མཐའ་ཡས་རྒྱལ་རྣམས་ཀྱིས་བསྔགས་པའི། །རྒྱལ་བ་གཉིས་པ་གུ་ཎ༴ གྲུབ་གཉིས་འདོད་དགུར་འཕྲུལ་བར་བྱིན་གྱིས་རང་༴ སྔོན་མེད་ཐུགས་བསྐྱེད་བཙན་པོ་དུས་སྨིན་གྱི་ཕྲག་པས། །སྒྲུབ་བརྒྱུད་ཤིང་རྟ་བརྒྱད་སྲོལ་དགོས་འབྱུང་གི་ནོར་བུ། །འཆད་རྩོམ་རྒྱལ་མཚན་རྩེ་མོར་ནུབ་མེད་དུ་བསྒྲེངས་པའི། །རིགས་ཀུན་ཁྱབ་བདག་གུ་ཎ༴ དག་སྣང་ཕྱོགས་མེད་འབྱོངས་པར་བྱིན་གྱིས་རང་༴ རིས་སུ་མ་ཆད་གདུལ་བྱ་རྒྱ་མཚོ་ཡི་མགོན་གཅིག །ཕྱོགས་སུ་མ་ལྷུང་ཐུབ་བསྟན་ཡོངས་རྫོགས་ཀྱི་མངའ་བདག །ཕྱོགས་རེར་མ་སོང་རྣམ་ཐར་ཆོས་དབྱིངས་དང་མཉམ་པའི། །འཇིག་རྟེན་མིག་གཅིག་གུ་ཎ༴ རྣམ་ཐར་རྗེས་སུ་སྙོག་པར་བྱིན་གྱིས་རང་༴ འཇིག་རྟེན་ལྷ་མིས་བཏུད་ཀྱང་ཁེངས་དྲེགས་ནི་མི་མངའ། །སྲིད་ཞི་མཉམ་ཉིད་རྟོགས་ཀྱང་རྩིང་སྤྱོད་ནི་མི་མཛད། །ཞི་བའི་གོ་འཕང་བརྙེས་ཀྱང་ཞི་མཐའ་ལ་མི་གནས། །སྙིགས་འགྲོའི་སྐྱབས་གཅིག་གུ་ཎ༴ ཆོས་བརྒྱད་འཆིང་བ་ཞིག་པར་བྱིན་གྱིས་རང་༴ བདག་རྒྱུད་སྨིན་བྱེད་དབང་བཞིའི་བདུད་རྩི་ཡིས་བརླན་ཏེ། །གྲོལ་བྱེད་རིམ་གཉིས་གདམས་པའི་དྲོད་གཤེར་གྱིས་བསྐྱངས་པས། །མཐར་ལམ་སྐུ་བཞིའི་སྙེ་མ་འཁྲུང་རུང་དུ་མཛད་པའི། །བཀའ་དྲིན་འཁོར་མེད་གུ་ཎ༴ དབང་བཞིའི་རྟོགས་པ་གོང་འཕེལ་བྱིན་གྱིས༴ བློ་དང་ཡིད་དཔྱོད་ཉམས་ཀྱི་འཛིན་སྟངས་དང་བྲལ་བའི། །ཀ་དག་ཕྱོགས་ཡན་ཆེན་པོའི་གཤིས་ལུགས་དང་སྤྲད་ནས། །ལྷུན་གྲུབ་སྣང་བཞིའི་ཉམས་ལེན་འཆུགས་མེད་ལ་སྦྱོར་མཛད། །གདོད་མའི་མགོན་པོ་གུ་ཎ༴ ཐུགས་ཡིད་དབྱེར་མེད་འདྲེས་པར་བྱིན་གྱིས་རང་༴ ཀྱེ་མ་གཟུང་འཛིན་བདེན་ཞེན་སྦྲུལ་གདུག་གིས་ཟིན་པས། །མི་བཟད་སྡུག་བསྔལ་བརྒྱ་ཕྲག་རིམས་ནད་ཀྱིས་གཙེས་པའི། །གདུང་གླུ་ལག་པ་གཡོབ་པའི་ངང་ཚུལ་འདི་གཟིགས་ལ། །ཐུགས་རྗེའི་ཕྱག་ཡངས་རྐྱོངས་ཤིག་དྲིན་ཆེན་གྱི་བླ་མ། །ཆོས་བརྒྱད་རླུང་དམར་འཁྲུགས་པའི་རྣམ་གཡེང་གི་རྦ་ལ། །དལ་འབྱོར་རིན་ཆེན་གྲུ་བོ་ཉམས་ཉེ་རུ་ཕྱོགས་པའི། །ཕྱི་ཚིས་འཆིང་བ་མི་གཏོང་ཆོས་མེད་ཀྱི་དྲེད་པོའི། །བློ་སྣ་བཙན་ཐབས་སྟུངས་མཛོད་དྲིན་ཆེན་གྱི་བླ་མ། །སྲིད་པའི་ཕུན་ཚོགས་སྲིན་མོའི་འཇོ་སྒེག་གིས་བསླུས་ཏེ། །བཟོད་དཀའ་ངན་འགྲོའི་ལྕགས་ཁང་དོ་ར་རུ་ཆུད་ཉེའི། །རང་མཚང་མངོན་སུམ་རྟོགས་པའི་ཞེན་ལོག་གི་རྟ་ཕོས། །ངེས་ལེགས་གྲོང་དུ་སྦྱོར་མཛོད་དྲིན་ཆེན་གྱི་བླ་མ། །ཐོས་བསམ་མིག་རྒྱང་ཐུང་ངུའ་ིརང་ལྟ་ལ་ཆགས་ཤིང་། །གཞན་ཕྱོགས་དེ་ལས་ལྡོག་པའི་ཕྱོགས་ལྷུང་གི་ཆང་གིས། །རབ་མྱོས་ཆོས་སྤོང་གཡང་ས་དམྱལ་མེ་ཡི་དོང་ཁར། །འཁྱོལ་བའི་གོམ་པ་ཟློགས་ཤིག་དྲིན་ཆེན་གྱི་བླ་མ། །རང་སྐྱོན་རི་བོས་ནོན་ཡང་ཡོན་ཏན་དུ་རློམ་ཞིང་། །གཞན་སྐྱོན་ཕྲ་མོའི་རྡུལ་ཡང་སྒྲིམ་བློ་ཡིས་འཚོལ་བའི། །དམ་པ་མིན་པའི་ཀུན་རྟོག་སྐྲ་ཤད་ཀྱིས་འཛིང་འདི། །དག་སྣང་ཐུར་མས་སོལ་ཅིག་དྲིན་ཆེན་གྱི་བླ་མ། །ངེས་འབྱུང་གཏིང་ནས་མ་སྐྱེས་དགེ་སྦྱོང་གི་འདྲ་ཅོག །གཞན་ཕན་ལྷག་བསམ་མ་འབྱོངས་བྱང་སེམས་ཀྱི་ཁ་སྦྱང་། །དབང་བཞིའི་ལམ་ཁྱེར་མི་ལྡན་སྔགས་སྤྱོད་དུ་རློམ་པའི། །ལམ་གོལ་གཡང་ལས་སྲུངས་ཤིག་དྲིན་ཆེན་གྱི་བླ་མ། །དག་རྫོགས་སྨིན་གསུམ་མི་ལྡན་ཨ་འཐས་ཀྱི་བསྐྱེད་རིམ། །སྲོག་སྡོམ་གཟེར་བཞིའི་གནད་མེད་ལྷག་ཆད་ཀྱི་བཟླས་བརྗོད། །རང་གྲོལ་གནད་དང་མི་ལྡན་སྡུག་བཙིར་གྱི་སེམས་འཛིན། །དམན་ལམ་གོལ་སྒྲིབ་སངས་ཤིག་དྲིན་ཆེན་གྱི་བླ་མ། །རང་དོན་སྒྲུབ་ལ་ཞུགས་ཚེ་གཞན་དོན་གྱི་བྲེལ་གཡེངས། །གཞན་དོན་གྲོང་དུ་རྒྱུ་ཚེ་རང་རྒྱུད་ནི་ཐ་མལ། །གཉིས་དོན་མི་འགྲུབ་གྲུབ་འབྲས་ཁྱིམ་པ་ལས་ལོད་པའི། །འདིར་སྣང་ཞེན་པ་ཕྲོལ་ཅིག་དྲིན་ཆེན་གྱི་བླ་མ། །གཞོན་ཆུང་སེམས་ཤེད་མ་རྫོགས་གཞན་དབང་ལ་བསྙད་བསྙད། །དར་བབས་ལང་ཚོས་དྲེགས་ཚེ་འདོད་ཡོན་གྱིས་བསླུས་བསླུས། །རྒས་འཁོགས་ན་འཆིའི་གཏུགས་ཚེ་ཅི་ཙུག་རང་བྱེད་ཨང་། །བློ་སྣ་ཆོས་ལ་དྲོངས་ཤིག་དྲིན་ཆེན་གྱི་བླ་མ། །གདུལ་རྒྱུའི་དགྲ་བོ་ཟད་མེད་ཞེ་སྡང་གི་བུད་ཤིང་། །བསྐྱང་རྒྱུའི་གཉེན་གྲོགས་མགུ་མེད་ཆགས་སྡང་གི་ཚང་ཚིང་། །སྡེ་དགོན་འདུ་འཛིའི་བྲེལ་དོ་རྣམ་གཡེང་གི་ཆུ་རིས། །མཐུན་འཇུག་ཐག་པ་ཆོད་ཅིག་དྲིན་ཆེན་གྱི་བླ་མ། །ཕུན་ཚོགས་རྒྱལ་བས་ལེགས་བསྔགས་ཐར་འདོད་ཀྱི་བསྟི་གནས། །འདུ་འཛིའི་སྤྱོད་པས་ཡོངས་གཏོང་ལྕུག་ཕྲན་གྱི་དོ་རར། །དབེན་གསུམ་བདུད་རྩིའི་དགའ་སྟོན་ཆད་མེད་དུ་སྤྱོད་པའི། །བསྐལ་བཟང་ལ་འུར་སྩོལ་ཅིག་དྲིན་ཆེན་གི་བླ་མ། །བདག་རྟོག་དབྱིངས་སུ་བསྒྲལ་པའི་རྗེས་ཐོབ་ཀྱི་རོལ་རྩེད། །གཞན་ཕན་བྱང་ཆུབ་སེམས་ཀྱི་འཇོ་སྒེག་དང་སྦྲགས་ནས། །བསྡུ་བཞིའི་ཕྲིན་ལས་ཟབ་མོས་མ་གྱུར་གྱི་འགྲོ་ཀུན། །རྣམ་གྲོལ་དཔལ་ལ་སྦྱོར་ནུས་བླ་མ་རྗེས་མཛོད་ཅིག །ཀྱེ་ཧུད་སྙིགས་སྤྱོད་གདུག་པའི་མུན་པ་ཡི་དྲྭ་བས། །ཡོངས་ཁེབས་ཐུབ་བསྟན་པད་ཚལ་རྙིང་ཚུལ་འདི་གཟིགས་ལ། །སྤྲོས་བྲལ་ཆོས་སྐུའི་བླ་མ་སྟོང་གཟུགས་སུ་མ་བཞུགས། །ངོ་མཚར་མཚན་དཔེའི་ཉི་གཞོན་ལ་འུར་དུ་འཆར་རན། །སྲིད་པར་ཉིང་མཚམས་སྦྱར་བའི་སྲེད་ལེན་གྱི་འཆིང་བྱེད། །གཟོད་ནས་རྣམ་པར་གྲོལ་མོད་ཐུགས་རྗེ་ཡི་དཔྱང་ཐག །འགྲོ་ཁམས་རྒྱ་མཚོར་འཇུག་པ་མི་བསླུ་ཡི་ཐ་ཚིག །སྒྲིབ་བྲལ་སྤྲུལ་པའི་ཟླ་སྣང་མྱུར་འཆར་དུ་མཛོད་ཅིག །ཡེ་ཤེས་དབྱིངས་ལས་ཤར་བའི་རྩ་གསུམ་དང་ཆོས་སྲུང་། །མཐུ་ལྡན་དཀར་ཕྱོགས་སྐྱོང་རྣམས་དམ་ཚིག་ལ་དགོངས་ཏེ། །རྗེ་བཙུན་བླ་མ་དགྱེས་པའི་ངོ་མཚར་གྱི་ཟློས་གར། །འགོག་མེད་མྱུར་དུ་གསལ་བའི་ཕྲིན་ལས་ལ་བརྩོན་མཛོད། །ངོ་མཚར་མཆོག་གི་སྤྲུལ་སྐུ་སྔོན་མེད་ཀྱི་ཉི་གཞོན། །བསྟན་འགྲོའི་ལེགས་བྱས་མཁའ་ལ་གཡོ་མེད་དུ་བརྟན་ཅིང་། །གསང་གསུམ་བགྲེས་རྒུད་བྲལ་བ་རྡོ་རྗེ་ཡི་རང་བཞིན། །བར་ཆད་ཉེར་འཚེའི་སྒྲ་གཅན་སྤྲིན་ཚོགས་དང་བྲལ་ནས། །འཁོར་ལོ་གསུམ་གྱི་ཕྲིན་ལས་འོད་སྟོང་གི་དྲྭ་བས། །སྙིགས་ལྔའི་རྒུད་པའི་མུན་ཚོགས་ལྷག་མེད་དུ་བཅོམ་ནས། །ཐུབ་བསྟན་པད་ཚལ་བཞད་པའི་གེ་སར་གྱི་ལང་ཚོ། །ལུང་རྟོགས་སྦྲང་རྩིས་དུད་པའི་སྐལ་བཟང་གི་དྲི་བསུང་། །ཐར་འདོད་རྐང་དྲུག་ཡིད་ཀྱི་གསོས་སྨན་དུ་གྱུར་པའི། །དགེ་མཚན་ཕན་བདེའི་སྣང་བས་ཕྱོགས་དུས་ཀུན་ཁྱབ་སྟེ། །སྔོན་མེད་རྫོགས་ལྡན་གསར་པའི་དུས་སྟོན་གྱི་དགའ་བ། །ནུབ་མེད་ཉམས་སུ་མྱོང་བའི་སྨོན་ལམ་ཞིག་ཞུའོ། །དེ་སྐད་བླ་མ་དྲན་པའི་མོས་གུས་ཀྱི་གསོལ་འདེབས། །དད་གསུམ་མགྲིན་པའི་རྒྱུད་ནས་ལྷང་ལྷང་དུ་བླངས་པས། །ཡིད་ལ་ཡེ་ཤེས་ཟབ་མོའི་འཇུག་པ་ཡིས་བསྲུངས་ཏེ། །འགྲོ་ཀུན་རྣམ་གྲོལ་ས་ལ་དབུགས་འབྱིན་དུ་ཤོག་ཅིག །ཅེས་པའང་མགོན་པོ་གང་གི་ཚད་མེད་པའི་བཀའ་དྲིན་ཆེན་པོས་རྗེས་སུ་བསྐྱངས་པའི་སློབ་ཐ་འདུ་གསུམ་པ་འགྱུར་མེད་པདྨ་རྣམ་རྒྱལ་གྱིས་བཀའ་བརྒྱུད་བསྟན་པའི་གཞི་མ་གཅིག་པུར་གྱུར་པ་དཔལ་སྤུངས་ཐུབ་བསྟན་ཆོས་འཁོར་གླིང་གི་ཆོས་གྲྭ་ཆེན་པོར་མཁན་ཆེན་བཀྲ་ཤིས་འོད་ཟེར་གྱི་ཞལ་སྔ་ནས་ཟབ་མོ་གདམས་ངག་མཛོད་ཀྱི་སྨིན་གྲོལ་ཟབ་མོ་བཀའ་དྲིན་དུ་ནོད་པའི་སྐབས་སུ་བྲིས་ཤིང་གསོལ་བ་བཏབ་པ་དེ་དེ་བཞིན་དུ་འགྲུབ་པའི་རྒྱུར་གྱུར་ཅིག། །།
༄༅། །བླ་མ་མཁྱེན་ནོ། །ལན་གསུམ། ཀ་དག་སྤྲོས་པ་བྲལ་བ་ཡེ་གཞི་ཡི་ཀློང་དུ། །སྣ་ཚོགས་ལྷུན་གྲུབ་འཆར་སྒོ་ཕྱི་གསལ་ཀུན་ཐིམ་པས། །ནང་དབྱིངས་གཞོན་ནུ་བུམ་པའི་རྒྱལ་ཐབས་ལ་རོལ་བའི། །ཆོས་སྐུའི་བླ་མ་རྡོ་རྗེ་གཟི་བརྗིད་དེ་མཁྱེན་ནོ། །ནང་དབྱིངས་འཕོ་འགྱུར་བྲལ་བའི་འོད་གསལ་གྱི་འཆར་སྒོ། །མ་འགགས་ཞིང་སྐུའི་བཀོད་པ་ཆོས་དབྱིངས་ཀྱི་རྒྱན་གྱུར། །ཁ་སྦྱོར་ཡན་ལག་བདུན་གྱི་བང་མཛོད་ཀྱིས་ཕྱུག་པའི། །ལོངས་སྐུའི་བླ་མ་མཁྱེན་བརྩེའི་དབང་པོ་དེ་མཁྱེན་ནོ། །བརྩེ་ཆེན་ཐུགས་རྗེེའི་འཇུག་པ་ཟླ་མེད་ཀྱི་འཆར་སྒོ། །གང་འདུལ་འགྲོ་བའི་ཤེས་ངོར་དེ་སྙེད་དུ་སྟོན་པའི། །འདུལ་བ་བཞི་ཡི་ཕྲིན་ལས་རྟག་ཁྱབ་ལ་དབང་འབྱོར། །སྤྲུལ་སྐུའི་བླ་མ་མདོ་སྔགས་གླིང་པ་དེ་མཁྱེན་ནོ། །དགོངས་བརྡ་སྙན་བརྒྱུད་རིག་འཛིན་བླ་མ་ཡི་ངོ་བོ། །རྒྱུད་སྡེ་བཞི་དྲུག་ཡི་དམ་སྤྲོ་བསྡུ་ཡི་བྱེད་པོ། །མ་ཚོགས་ཌཱ་ཀི་འབུམ་སྡེའི་ཚོགས་དཔོན་གྱི་དཔའ་བོ། །རྩ་གསུམ་འདུས་ཞལ་སྤྲུལ་པའི་རྡོ་རྗེ་དེ་མཁྱེན་ནོ། །རབ་འབྱམས་ཕྱོགས་དུས་རྒྱལ་བའི་ཡེ་ཤེས་ཀྱི་སྤྱི་གཟུགས། །རིན་ཆེན་བདུན་ལྡན་ལུང་རྟོགས་དམ་ཆོས་ཀྱི་འབྱུང་གནས། །བསྟན་འཛིན་དགེ་འདུན་བྱེ་བའི་གཙུག་ནོར་དུ་ཐོབ་པའི། །སྐྱབས་གསུམ་དབྱེར་མེད་ཀུན་མཁྱེན་བླ་མ་དེ་མཁྱེན་ནོ། །བདག་རྒྱུད་སྨིན་བྱེད་དབང་བཞིའི་ས་བོན་མཆོག་བཞག་ནས། །གྲོལ་བྱེད་རིམ་གཉིས་གདམས་པའི་བདུད་རྩི་ཡིས་བརླན་ཏེ། །མཐར་ཕྱིན་འབྲས་བུ་སྐུ་བཞིའི་རྒྱལ་ཐབས་ལ་འགོད་མཛད། །བཀའ་དྲིན་འཁོར་མཐའ་བྲལ་བའི་བླ་མ་དེ་མཁྱེན་ནོ། །མོས་གུས་སྙིང་ནས་ཤར་བའི་གསོལ་འདེབས་ཀྱི་གདུང་དབྱངས། །མགོན་ཁྱོད་སྙན་གྱིས་པདྨོར་ཡུད་ཙམ་ལ་དེངས་ནས། །རྨད་བྱུང་ཐུགས་རྗེའི་ཉི་གཞོན་བདག་ཡིད་ལ་འཆར་ཏེ། །ངེས་དོན་རྟོགས་པའི་པད་ཚལ་རྒྱས་པ་རུ་མཛོད་ཅིག །ཅེས་ཆུ་འབྲུག་དགུན་ར་བའི་ཚེས་ཀྱི་དུས་དྲན་མཆོད་འབུལ་སྐབས་སློབ་ཐ་པདྨ་བི་ཛས་དད་པའི་ངག་གིས་གསོལ་བ་བཏབ་པ་སྐྱེ་བ་ཀུན་ཏུ་དཔལ་ལྡན་བླ་མ་དམ་པས་རྗེས་སུ་འཛིན་པའི་རྒྱུར་གྱུར་ཅིག
༄༅། །ཨ་ཧོོཿ། བསིལ་ལྡན་འཛིན་མའི་གཞི་ལ་ཉི་ཟླ་ལྟར་གསལ་བའི། །བསྟན་པ་རྒྱ་མཚོའི་མགོན་གྱུར་མཁྱེན་བརྩེ་ཡི་དབང་པོ། །མཁས་གྲུབ་བྱེ་བའི་གཙུག་ནོར་བློ་གྲོས་ནི་མཐའ་ཡས། །ས་སྟེང་འགྲན་ཟླ་བྲལ་བའི་སློབ་དཔོན་ཟུང་དྲན་ནོ། །སྙིང་ཁུང་རུས་པའི་གཏིང་ནས་གསོལ་འདེབས་ཀྱི་བུ་ལ། །མཁྱེན་བརྩེའི་ཡེ་ཤེས་གཟིགས་པ་དྲི་མེད་ཀྱིས་དགོངས་མཛོད། །གྲངས་མེད་བསྐལ་པའི་གོང་ནས་བྱང་ཆུབ་ནི་བརྙེས་ཀྱང་། །རྨད་བྱུང་ཐུགས་རྗེ་ཆེན་པོས་སྲིད་པ་རུ་རྗེས་ཆགས། །སྒྱུ་འཕྲུལ་རྡོ་རྗེའི་རོལ་མོ་གང་འདུལ་དུ་སྟོན་པའི། །མཚུངས་བྲལ་ངེས་པ་དོན་གྱི་མཆོག་སྤྲུལ་ཟུང་དྲན་ནོ། །སྙིང་ནས་གསོལ་འདེབས་བུ་ལ་བྱིན་རླབས་རེ་སྩོལ་ཤོག །ཐོས་པའི་མཐའ་རྒྱ་ཆོད་པས་ཕྱོགས་ལྷུང་ནི་མི་མངའ། །བསམ་བྱུང་གཏན་ལ་ཕེབས་པས་ཐེ་ཚོམ་གྱི་མདུད་གྲོལ། །སྒོམ་བྱུང་ཀློང་ནས་རྡོལ་བས་གཟུང་འཛིན་གྱི་འཕྲང་ཞིག །གངས་ལྗོངས་མཛེས་པའི་རྒྱན་གྱུར་པཎ་ཆེན་ཟུང་དྲན་ནོ། །དད་མོས་སྙིང་ནས་ཤོར་རོ་ཐུགས་རྗེ་ཡིས་དགོངས་མཛོད། །མདོ་རྒྱུད་རྒྱ་མཚོ་འཆད་ཀྱང་ཟོང་དུ་ནི་མི་འཚོང་། །རྩོད་པ་ཕུལ་དུ་ཕྱིན་ཀྱང་བསྟན་སེལ་ནི་མི་འཇུག །རྩོམ་པའི་ལེགས་བཤད་མང་ཡང་མཁས་འདོད་ནི་མ་ཡིན། །མཚུངས་མེད་ཐུབ་པའི་བསྟན་འཛིན་ཆེན་པོ་ཟུང་དྲན་ནོ། །བསམ་རྒྱུ་ཁྱེད་ལས་མེད་དོ་བྱིན་གྱིས་རང་རློབས་ཤིག །མཁྱེན་རབ་ཤིན་ཏུ་རྒྱ་ཆེ་ཀུན་གསལ་གྱི་མཁའ་ལ། །བརྩེ་ཆེན་ཐུགས་རྗེའི་སྤྲིན་ཕུང་ལང་ལིང་དུ་གཡོ་བས། །ནུས་མཐུ་ཕུན་ཚོགས་ཕན་བདེའི་གྲུ་ཆར་མཆོག་འབེབས་མཛད། །རིས་བྲལ་བསྟན་འགྲོའི་དཔལ་མགོན་ཆོས་རྗེ་ཟུང་དྲན་ནོ། །དག་པའི་སྣང་དཀར་རྒྱས་པའི་དངོས་གྲུབ་ཞིག་སྩོལ་ཤོག །འཇིག་རྟེན་ལྷ་མིས་བཏུད་ཀྱང་ཁེངས་དྲེགས་ནི་མི་མངའ། །ཆོས་ཀུན་སྒྱུ་མར་རྟོགས་ཀྱང་རྩིང་སྤྱོད་ནི་མི་མཛད། །གཞན་ཕན་ཕར་ཕྱིན་དྲུག་གི་གཞུང་ལམ་ལ་བསྟེན་པའི། །བཀའ་གདམས་དྲང་སྲོང་ཡོངས་ཀྱི་ཁྱུ་མཆོག་ཟུང་དྲན་ནོ། །བློ་སྦྱོང་མཐའ་རུ་ཕྱིན་པའི་བྱིན་རླབས་ཤིག་སྩོལ་ཤོག །རང་གི་ཡོན་ཏན་རྒྱ་མཚོ་རྐུན་ནོར་བཞིན་སྦས་ནས། །གཞན་གྱི་བཟང་སྤྱོད་ཕྲ་མོ་ཁྱབ་བདལ་དུ་བསྔགས་ཀྱང་། །འཇིག་རྟེན་མཐུན་འཇུག་བྱ་བའི་ངོ་སྲུང་ནི་མ་ཡིན། །ཆོས་བརྒྱད་རོ་སྙོམས་རྟོགས་པའི་རྣལ་འབྱོར་ཟུང་དྲན་ནོ། །བདག་འཛིན་འགོང་པོ་ཐུལ་བའི་དངོས་གྲུབ་ཞིག་སྩོལ་ཤོག །ཆོས་ཉིད་དོན་དམ་ཡངས་པའི་ཀ་དག་གི་ཀློང་དུ། །ཆོས་ཅན་གཟུང་འཛིན་མཚན་མའི་སྤྲོས་པ་ཀུན་ཐིམ་པས། །ཀུན་བཟང་གདོད་མའི་རྒྱལ་སར་མངའ་དབང་མཆོག་འབྱོར་པའི། །ཀློང་ཆེན་ནམ་མཁའི་རྣལ་འབྱོར་མཚུངས་མེད་ཟུང་དྲན་ནོ། །ཡིད་དཔྱོད་འཛིན་པ་དག་པའི་དངོས་གྲུབ་ཞིག་ཞུ་འོ། །ལྟ་དགོངས་ཚད་དུ་གྱུར་པའི་རྟེན་འབྲེལ་གྱི་མཐུ་ལས། །བརྟུལ་ཞུགས་ཕྱོགས་བྲལ་སྐྱོང་བ་སྔགས་སྤྱོད་ཀྱི་རྒྱལ་པོ། །ཟབ་མོའི་ཆོས་གཏེར་འཛད་མེད་དགོངས་ཀློང་ནས་རྡོལ་བའི། རིག་འཛིན་པདྨའི་སྲས་གཅིག་གྲུབ་ཆེན་ཟུང་དྲན་ནོ། །དགག་སྒྲུབ་འཛིན་སྟངས་ཞིག་པའི་བྱིན་རླབས་རེ་སྩོལ་ཅིག །མཁོས་མེད་རོ་དང་འདྲ་བའི་ཉམ་ཆུང་གི་དམན་བུར། །བརྩེ་ཆེན་ཐུགས་རྗེའི་གཟིགས་པ་དྲི་མེད་ཀྱིས་དགོངས་ནས། །དབང་བསྐུར་རྒྱུད་བཤད་མན་ངག་ཟབ་དགུ་ནི་སྩོལ་མཛད། །བཀའ་དྲིན་འགྲན་ཟླ་མེད་པའི་སྐྱབས་མཆོག་ཟུང་དྲན་ནོ། །དགོངས་བརྒྱུད་བྱིན་རླབས་འཕོ་བའི་དབང་བསྐུར་ཞིག་ཞུ་འོ། །བསྟན་པ་འགལ་མེད་རྟོགས་པའི་མཁས་གྲུབ་ཀྱི་ཞལ་སློབ། །ཕྱོགས་ལྷུང་ཆགས་སྡང་ཆོས་སྤོང་ལམ་གོལ་དུ་འཕྱན་ན། །ཐུགས་རྗེ་ཟླ་བསིལ་བདུད་རྩིས་དབུགས་དབྱུང་ཞིག་གནང་ནས། །དག་སྣང་དཀར་པོའི་བློ་མིག་གསལ་རྒྱས་སུ་མཛོད་ཅིག །བདག་བས་གཞན་གཅེས་འབྱོངས་པའི་རྒྱལ་སྲས་ཀྱི་ཞལ་སློབ། །རང་དོན་ཡིད་བྱེད་འཛིན་པའི་བློ་ངན་གྱིས་བསླུས་ན། །རྨད་བྱུང་བྱང་ཆུབ་སེམས་ཀྱི་བདུད་རྩི་ཡིས་བརླན་ནས། །བཅོས་མིན་གཞན་ཕན་ལྷག་བསམ་འབྱོངས་པ་རུ་མཛོད་ཅིག །དུས་གསུམ་ཤེས་བྱ་ཀུན་མཁྱེན་པཎ་ཆེན་གྱི་ཞལ་སློབ། །མ་རིག་གཏི་མུག་མུན་པའི་ཁང་བུ་རུ་ཚུད་ན། །མཁྱེན་བརྩེའི་ཡེ་ཤེས་ཉི་གཞོན་སྙིང་དབུས་ལ་ཤར་ནས། །བློ་གྲོས་ཕྱོགས་བྲལ་རྒྱས་པའི་དངོས་གྲུབ་ནི་སྩོལ་མཛོད། །ཆོས་ཟད་བློ་ལས་འདས་པའི་གྲུབ་ཆེན་གྱི་ཞལ་སློབ། །སྣང་སེམས་འཁྲུལ་པའི་བག་ཆགས་ཁོར་ཡུག་ཏུ་འབྱམས་ན། །རང་གནས་ཆོས་ཉིད་ཟབ་མོ་ཡིད་དཔྱོད་དང་ཕྲལ་ནས། །སྣང་སེམས་འཛིན་པ་དག་པའི་བྱིན་རླབས་ཤིག་སྩོལ་ཅིག །གདོད་མའི་རྒྱལ་སར་གཤེགས་པའི་ཀློང་ཆེན་གྱི་ཞལ་སློབ། །ལས་ཉོན་གཟུང་འཛིན་ཞགས་པས་སྲིད་པ་རུ་འཆིང་ན། །འཕོ་ཆེན་ཡེ་ཤེས་བྱིན་རླབས་དབང་བསྐུར་གྱི་མཐུ་ལས། །རྟོགས་གྲོལ་དུས་མཉམ་གདོད་མའི་ཟད་ས་ལ་སྐྱོལ་ཅིག །ངེས་དོན་སྙིང་པོ་ཆོས་སྐད་རྣ་བ་ལ་སྙན་ཞིང་། །དོན་བཟང་ཉམས་སུ་མྱོང་འདོད་དད་མོས་ཞིག་ཡོད་ཀྱང་། །ཐོག་མེད་མ་རིག་གཟུང་འཛིན་བག་ཆགས་འདི་འཐུག་པས། །གཤིས་ལུགས་འགྱུར་བ་མེད་པའི་ཡོངས་གྲུབ་ནི་མ་མཐོང་། །རང་བྱུང་གཞི་གནས་རིག་པ་སྐུ་གསུམ་གྱི་དགོངས་པ། །བྱས་ཤིང་བཅོས་མེད་གདོད་ནས་རང་ཆས་སུ་གནས་ཀྱང་། །འཁྲུལ་སྣང་སེམས་ཀྱི་ཤུན་པས་བར་མེད་དུ་བསྒྲིབས་ཏེ། །བློ་བྲལ་རིག་པའི་རང་ཚུགས་ཟིན་པ་ཞིག་མི་འདུག །མ་བཅོས་ཅོག་གེར་བཞག་པ་ཀུན་བཟང་གི་དགོངས་པ། །ཡིད་དཔྱོད་བཅོས་མའི་ལྟ་སྒོམ་འཁྲུལ་རྟོག་ཏུ་གསུངས་ཀྱང་། །ཨ་འཐས་བག་ཆགས་རེ་དོགས་དགག་སྒྲུབ་ཀྱི་སྤྲོས་པས། །རང་གྲོལ་གཉུག་མའི་གཏན་སྲིད་ཟིན་དུས་ནི་མི་འདུག །ད་ནི་བྱ་བྱེད་མང་པོའི་སྤྲ་སྤྲོ་དེ་དོར་ནས། །མི་ཕྱེད་སྙིང་ནས་གསོལ་བ་ཕུར་ཚུགས་སུ་འདེབས་ན། །སྣང་སེམས་རོ་མཉམ་རྟོགས་པའི་མཁས་གྲུབ་ནི་ཟུང་གིས། །བྱིན་རླབས་འཕོ་བ་ཆེན་པོའི་དབང་མཆོག་དེ་བསྐུར་ནས། །གཉུག་མའི་གཏན་སྲིད་ཟིན་པའི་དངོས་གྲུབ་ཞིག་སྩོལ་མཛོད། །སེམས་དང་སེམས་བྱུང་རྙོག་པའི་དྲི་མ་ཀུན་སངས་པའི། །རིག་སྟོང་མི་ཤིགས་སྐུ་གསུམ་ལྷུན་རྫོགས་ཀྱི་དགོངས་པ། །མ་བཅོས་ཅོག་བཞག་བཞི་ཡི་མན་ངག་ལ་བརྟེན་ནས། །གདོད་མའི་རྒྱལ་སར་གྲོལ་བའི་བྱིན་རླབས་རེ་གནང་ཤོག །གནད་གསུམ་ཆོས་ཉིད་འཁོར་ལོའི་གསང་ལམ་ལ་བརྟེན་ཏེ། །ལྷུན་གྲུབ་དག་པའི་སྣང་བཞི་ལྟད་མོ་ལ་གཡེངས་ནས། །བདེ་ཆེན་སྙིང་རྗེའི་རང་རྩལ་འཕོ་ཆེན་གྱི་འཇའ་ལུས། །འཁོར་བ་དོང་ནས་སྤྲུག་ནུས་དངོས་གྲུབ་ཞིག་སྩོལ་ཅིག །གལ་སྲིད་ཚེ་འདིར་གྲོལ་བའི་སྐལ་བ་ཡིས་ཕོངས་ཏེ། །གློ་བུར་འཆི་བའི་འཇིགས་པ་བཙན་ཐབས་སུ་བྱུང་ན། །ནམ་མཁའ་སུམ་ཕྲུགས་དགོངས་པའི་མན་ངག་ལ་བརྟེན་ཏེ། །འཆི་སྲིད་ཆོས་སྐུར་གྲོལ་བའི་བྱིན་རླབས་ཤིག་གནང་མཛོད། །དཀར་དམར་རླུང་གི་བྱེད་པ་དྷཱུ་ཏི་རུ་དག་པའི། །འོད་གསལ་བསམ་མི་ཁྱབ་པའི་ཡེ་ཤེས་ཀྱི་རྗེས་ཐོབ། །ཆོས་ཉིད་བར་དོའི་སྣང་ཆ་རང་རྩལ་དུ་ཤེས་ནས། །རང་སྣང་ལོངས་སྐུར་གྲོལ་བའི་བྱིན་རླབས་ཤིག་སྩོལ་ཤོག །གལ་ཏེ་སྲིད་པ་བར་དོར་རྨི་ལམ་བཞིན་འཁྱམས་ན། །ཆོས་ཉིད་མངོན་སུམ་ངོ་སྤྲོད་བདེན་པ་ཡི་མཐུ་དང་། །རིག་འཛིན་བླ་མའི་བྱིན་རླབས་ལྷན་ཅིག་ཏུ་ཚོགས་ནས། །རང་བཞིན་སྤྲུལ་པའི་ཞིང་དུ་དབུགས་འབྱིན་ནི་མཛོད་ཅིག །གཞོན་ནུ་བུམ་སྐུར་བརྟན་པ་མ་ཐོབ་ཀྱི་བར་དུ། །སྐྱབས་གཅིག་མཆོག་ཟུང་འབྲལ་མེད་སྤྱི་བོ་རུ་བཞུགས་ནས། །ཟབ་གསང་རྟོགས་པའི་ཡོན་ཏན་ཡར་ཟླ་ལྟར་རྒྱས་ཏེ། །རང་གཞན་དོན་གཉིས་ལྷུན་གྲུབ་དངོས་གྲུབ་ཅིག་སྩོལ་མཛོད། །མེད་སྣང་སྲིད་པའི་ཐང་ལ་རྨི་ལམ་བཞིན་འཁོར་བའི། །མ་རྣམས་གཟུང་འཛིན་འཁྲུལ་སྣང་སྐད་ཅིག་ལ་སངས་ནས། །མ་སྐྱེས་གཉུག་མའི་ངང་དུ་ལ་ཆེན་དེ་བཟླས་ནས། །གདོད་མའི་རྒྱལ་སར་གྲོལ་བའི་བཀྲ་ཤིས་མཆོག་སྩོལ་ཅིག །ཅེས་འགྲན་གྱི་དོ་མེད་སྐྱབས་མཆོག་ཟུང་གི་ཐུགས་དམ་བསྐུལ་བའི་གདུང་དབྱངས་འདི་ཡང་། ལེགས་ཉེས་གང་བྱུང་བླ་མའི་དྲིན་དུ་བལྟ་བའི་བན་སྤྲང་པདྨ་རྣམ་རྒྱལ་གྱིས་རང་ལོ་ཉེར་གསུམ་པར་སེང་བྲག་ནམ་མཁའ་རྫོང་གི་དབེན་གནས་སུ་ཐོག་མར་སྒྲུབ་པར་ཞུགས་པའི་སྐབས་སུ་བྲིས་པ་དགེ།
༅། །ཨ་ཧོཿ གདོད་མའི་མགོན་པོ་མི་ཡི་ཤ་ཚུགས་སུ་བཞུགས་པའི། །ངོ་མཚར་བཀའ་བབས་བདུན་ལྡན་མདོ་སྔགས་ནི་གླིང་པ། །སྔོན་མེད་མཛོད་ལྔའི་ཤིང་རྟ་བློ་གྲོས་ནི་མཐའ་ཡས། །ས་སྟེང་འགྲན་ཟླ་བྲལ་བའི་སྐྱེས་མཆོག་ཟུང་དྲན་ནོ། །བདག་རྒྱུད་རིགས་ཁམས་དགེ་བའི་གཤེགས་སྙིང་གི་ས་བོན། །ཟབ་རྒྱས་སྨིན་གྲོལ་གདམས་པའི་གྲུ་ཆར་གྱིས་བརླན་པས། །ཉམས་རྟོགས་མྱུ་གུ་བསྐྱེད་མཛད་དྲིན་ཆེན་གྱི་བླ་མ། །བཀའ་དྲིན་འཁོར་མཐའ་མེད་པའི་མགོན་པོ་ཟུང་དྲན་ནོ། །མགོན་པོ་ཟུང་གི་མཚན་དཔེའི་དཀྱིལ་འཁོར་གྱི་ཞལ་རས། །གང་འདུལ་ཆོས་དབྱིངས་སྙན་པོའི་གསུང་གསང་གི་འགྱུར་བ། །ངོ་མཚར་སྟོན་འཁོར་ཚོམ་བུའི་མཛེས་སྡུག་གི་བཀོད་པ། །བསམ་བཞིན་མོས་གུས་གདུང་བས་ཚུགས་ཐབས་རང་མི་འདུག །མཉེས་གསུམ་ཞབས་ཏོག་འགྲུབ་པའི་ཧམ་ཆེན་ཞིག་མིན་ཡང་། །མོས་གུས་རྡོ་ཡི་རི་མོ་འགྱུར་བ་ནི་མི་འདུག །རྟག་ཏུ་གསོལ་འདེབས་བུ་ལ་ཡེ་ཤེས་ཀྱི་གཟིགས་པས། །ནམ་ཡང་འབྲལ་མེད་སྐྱོང་བའི་ངེས་ཤེས་ནི་ཡོད་དོ། །དང་པོར་མགོན་པོ་ཟུང་གི་ཞབས་པད་ནི་བསྙེན་བསྙེན། །བར་དུ་གསོལ་འདེབས་གདུང་བའི་གླུ་དབྱངས་ཀྱིས་བསྐུལ་བསྐུལ། །ད་ལྟ་མཆོག་སྤྲུལ་ཟུང་གི་ཞབས་པད་ཀྱི་ཟླ་ཚེས། །གུས་པས་སྤྱི་བོར་ལེན་པའི་སྐལ་བཟང་འདི་དགའ་འོ། །སྔོན་སྨོན་དད་དམ་དཀར་པོའི་ཉེར་ལེན་གྱི་རྒྱུ་ལས། །ད་ལྟ་ཐུགས་བརྩེས་མི་འདོར་རྟེན་འབྱུང་གི་ཆོས་ཉིད། །མ་འོངས་ཚོམ་བུ་གཅིག་ཏུ་རིག་འཛིན་གྱི་ཚོགས་གྲལ། །དགའ་སྟོན་གླུ་གར་བསྒྱུར་ལ་ཐེ་ཚོམ་རང་ཅི་ཡོད། །མཁའ་ལ་རིག་འཛིན་བརྒྱུད་པའི་བྱིན་རླབས་ནི་ཐིབས་ཐིབས། །བར་ན་གྲུབ་གཉིས་འདོད་དགུའི་གྲུ་ཆར་ནི་སིམ་སིམ། །ས་ལ་དམ་ལྡན་སློབ་མའི་འདུ་ཚོགས་ནི་རྒྱས་རྒྱས། །དོན་གཉིས་བསམ་ཀུན་འགྲུབ་པའི་བཀྲ་ཤིས་ནི་སྩོལ་ཅིག །ཅེས་པའང་མགོན་པོ་ཟུང་གི་བཀོད་པས་བྱིན་གྱིས་བརླབས་པའི་གཟིམས་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ། འདྲེན་མཆོག་ཟུང་གི་ཡང་སྤྲུལ་རྣམ་གསུམ་གདན་འཛོམས་ཀྱི་དགའ་སྟོན་ཚོགས་ཀྱི་འཁོར་ལོ་ལ་ཐོག་མར་ལོངས་སྤྱོད་པའི་སྐལ་བཟང་ཉམས་སུ་མྱོང་བའི་ཚེ་གང་ཤར་ཤུགས་འབྱུང་དུ་རྒན་པོ་བི་ཛས་སྨྲས་པ་དགེ།