འོད་གསལ་ཀློང་ཆེན་སྙིང་ཐིག་གི་བརྒྱུད་པ་གཙོར་གྱུར་གྱི་བླ་མ་རྒྱང་འབོད་བྱིན་རླབས་སྤྲིན་གྱི་མེ་ཏོག །

༄༅། །འོད་གསལ་ཀློང་ཆེན་སྙིང་ཐིག་གི་བརྒྱུད་པ་གཙོར་གྱུར་གྱི་བླ་མ་རྒྱང་འབོད་བྱིན་རླབས་སྤྲིན་གྱི་མེ་ཏོག་ཅེས་བྱ་བ། བླ་མ་མཁྱེན་ནོ། ལན་གསུམ། གཞི་གྲོལ་ཀ་ནས་དག་པ་སྤྲོས་བྲལ་གྱི་སྦུབས་སུ། །ལྷུན་གྲུབ་ནང་གསལ་གཞོན་ནུ་བུམ་སྐུ་རུ་བཞུགས་པའི། །གདོད་མའི་མགོན་པོ་ཀུན་ཏུ་བཟང་པོ་དང་དབྱེར་མེད། །ཆོས་སྐུའི་བླ་མ་དྲི་མེད་འོད་ཟེར་དེ་མཁྱེན་ནོ། །དད་མོས་སྙིང་ནས་བྱས་སོ་ཀུན་མཁྱེན་ནི་ཆོས་རྗེ། །གདུང་བའི་དབྱངས་ཀྱིས་འབོད་དོ་མཁྱེན་བརྩེ་ཡིས་དགོངས་ལ། །བྱིན་རླབས་འཕོ་བ་ཆེན་པོའི་དབང་བསྐུར་གྱི་མཐུ་ལས། །ལྟ་དགོངས་རྗེ་དང་མཉམ་པའི་དངོས་གྲུབ་ཞིག་སྩོལ་ཤོག །ཡེ་ཤེས་ལྷུན་གྲུབ་རང་སྣང་གངས་ཅན་མཚོས་བརྒྱན་པའི། །བདེ་ཆེན་ཁ་སྦྱོར་བདུན་ལྡན་ལྔ་རྫོགས་ཀྱི་སྟོན་པ། །རིགས་ཀུན་བདག་པོ་རྡོ་རྗེ་སེམས་དཔའ་དང་དབྱེར་མེད། །ལོངས་སྐུའི་བླ་མ་མཁྱེན་བརྩེའི་འོད་ཟེར་དེ་མཁྱེན་ནོ། །དད་མོས་སྙིང་ནས་བྱས་སོ་འཇིགས་མེད་ནི་གླིང་པ། །གདུང་བའི་དབྱངས༴ བྱིན་རླབས་འཕོ༴ ལྟ་དགོངས་རྗེ༴ རོལ་རྩལ་མ་འགགས་གང་འདུལ་དེར་སྣང་དུ་སྟོན་པས། །འདུལ་བ་བཞི་ཡི་ཕྲིན་ལས་རྟག་ཁྱབ་ལ་དབང་འབྱོར། །འོད་གསལ་སྙིང་པོའི་སྟོན་མཆོག་དགའ་རབ་དང་དབྱེར་མེད། །སྤྲུལ་སྐུའི་བླ་མ་ཕྲིན་ལས་འོད་ཟེར་དེ་མཁྱེན་ནོ། །དད་མོས་སྙིང་ནས་བྱས་སོ་ཀུན་བཟང་ནི་གཞན་ཕན། །གདུང་བའི་དབྱངས༴ བྱིན་རླབས༴ ལྟ་དགོངས༴ ཆོས་ཉིད་སྤྲོས་མཚན་ཀུན་བྲལ་དོན་དམ་གྱི་མཁའ་ལ། །ཆོས་ཅན་གཉིས་འཛིན་འཁྲུལ་པའི་སྤྲིན་ཚོགས་ཀུན་དེངས་པའི། །རིག་འཛིན་གཙུག་རྒྱན་ཤྲཱི་སེདྷ་དང་དབྱེར་མེད། །མི་འགྱུར་འཕོ་མེད་ནམ་མཁའི་རྡོ་རྗེ་དེ་མཁྱེན་ནོ། །དད་མོས་སྙིང་ནས་བྱས་སོ་ཚེ་དབང་ནི་གྲུབ་རྩལ། །གདུང་བའི༴ བྱིན་རླབས༴ ལྟ་དགོངས༴ སྐྱེ་འཆི་བགྲེས་རྒུད་བྲལ་བ་རྡོ་རྗེ་ཡི་སྐུ་བརྙེས། །དབང་བཅུ་མཐར་ཕྱིན་དུས་གསུམ་རྒྱལ་བ་ཡི་གདུང་འཚོབ། །བཀའ་དྲིན་ཟླ་བྲལ་མཚོ་སྐྱེས་རྡོ་རྗེ་དང་དབྱེར་མེད། །གྲུབ་དབང་འཇིགས་མེད་ཡེ་ཤེས་རྡོ་རྗེ་དེ་མཁྱེན་ནོ། །དད་མོས་སྙིང་ནས་བྱས་སོ་གྲུབ་ཐོབ་ཀྱི་ཁྱུ་མཆོག །གདུང་བའི༴ བྱིན་རླབས༴ ལྟ་དགོངས༴ འཕོ་ཆེན་ཡེ་ཤེས་འཇའ་ལུས་རྡོ་རྗེའི་སྐུར་བཞེངས་ནས། །འོད་གསལ་སྙིང་པོའི་བསྟན་མཆོག་ཕྱོགས་མཐའ་རུ་རྒྱས་མཛད། །ཤིང་རྟ་ཆེན་པོ་བི་མ་མི་ཏྲ་དང་དབྱེར་མེད། །པདྨ་ཐེག་མཆོག་རོལ་པའི་རྡོ་རྗེ་དེ་མཁྱེན་ནོ། །དད་མོས་སྙིང་ནས་བྱས་སོ་དམ་ཆོས་ཀྱི་འོད་ཟེར། །གདུང་བའི༴ བྱིན་རླབས༴ ལྟ་དགོངས༴ མཁྱེན་རབ་དབང་ཕྱུག་མཁྱེན་བརྩེའི་གཏེར་ཆེན་ལས་འཁྲུངས་པའི། །ཏིང་འཛིན་མི་གཡོ་ལྷུན་རྫོགས་དགོངས་པ་ལ་མངའ་འབྱོར། །གངས་ཅན་མིག་གཅིག་འཇམ་མགོན་ཁྲི་ལྡེ་དང་དབྱེར་མེད། །ཀློང་ཆེན་འོད་གསལ་སྤྲུལ་པའི་རྡོ་རྗེ་དེ་མཁྱེན་ནོ། །དད་མོས་སྙིང་ནས་བྱས་སོ་མཁྱེན་བརྩེ་ཡི་དབང་པོ། །གདུང་བའི༴ བྱིན་རླབས༴ ལྟ་དགོངས༴ བསིལ་ལྡན་འཛིན་མའི་གཞི་ལ་ཟླ་མེད་ཀྱི་མཁས་གྲུབ། །སྡེ་གསུམ་སྙིང་པོའི་ཉི་གཞོན་འདྲེན་བྱེད་ཀྱི་ཤིང་རྟ། །སྐད་གཉིས་སྨྲ་བའི་དབང་ཕྱུག་བཻ་རོ་དང་དབྱེར་མེད། །གདོད་མའི་མགོན་པོ་པདྨ་གར་དབང་དེ་མཁྱེན་ནོ། །དད་མོས་སྙིང་ནས་བྱས་སོ་བློ་གྲོས་ནི་མཐའ་ཡས། །གདུང་བའི༴ བྱིན་རླབས༴ ལྟ་དགོངས༴ འགྲོ་སྒྲོལ་དམ་བཅའི་གོ་ཆ་གཡོ་མེད་དུ་བརྟན་ནས། །རྨད་བྱུང་རྒྱལ་སྲས་སྤྱོད་པའི་གཞུང་ལམ་ལ་བརྟེན་ཏེ། །མཐའ་ཡས་སྐྱེ་དགུ་འབྲེལ་ཚད་དོན་ལྡན་ལ་སྦྱོར་མཛད། །ཨོ་རྒྱན་འཇིགས་མེད་ཆོས་ཀྱི་དབང་པོ་དེ་མཁྱེན་ནོ། །དད་མོས་སྙིང་ནས་བྱས་སོ་རྒྱལ་བ་ཡི་སྲས་པོ། །གདུང་བའི༴ བྱིན་རླབས༴ ལྟ་དགོངས༴ རིག་འཛིན་གྲུབ་ཐོབ་རྒྱ་མཚོའི་གཤེགས་ཤུལ་ནི་ཟླ་མེད། །ཐེག་ཀུན་རྩེ་རྒྱལ་གསང་བ་སྙིང་ཐིག་གི་ལམ་ནས། །སྦས་ཚུལ་འགྲོ་དོན་སྐྱོང་བ་རྣལ་འབྱོར་གྱི་དབང་ཕྱུག །བདེ་བ་ཆེན་པོའི་འོད་ཟེར་མཐའ་ཡས་དེ་མཁྱེན་ནོ། །དད་མོས་སྙིང་ནས་བྱས་སོ་སྒྲུབ་བརྩོན་གྱི་རྣལ་འབྱོར། །གདུང་བའི༴ བྱིན་རླབས༴ ལྟ་དགོངས༴ ཀུན་བཟང་རྡོ་རྗེ་སེམས་དཔའི་ཞལ་ལུང་གི་ཉིང་ཁུ། །འོད་གསལ་རྡོ་རྗེ་སྙིང་པོའི་གསང་ལམ་ལ་བརྟེན་ནས། །འདི་ཕྱི་བར་དོར་གྲོལ་བའི་གདེང་ཚད་མཆོག་བརྙེས་པའི། །དུས་གསུམ་བླ་མ་རིག་འཛིན་རྩལ་འཆང་རྣམས་མཁྱེན་ནོ། །དད་མོས་སྙིང་ནས་བྱས་སོ་རྩ་བརྒྱུད་ཀྱི་བླ་མ། །གདུང་བའི་དབྱངས་ཀྱིས་འབོད་དོ་མཁྱེན་བརྩེ་ཡིས་དགོངས་ལ། །བྱིན་རླབས་འཕོ་བ་ཆེན་པོའི་དབང་བསྐུར་གྱི་མཐུ་ལས། །ལྟ་དགོངས་རྗེ་དང་མཉམ་པའི་དངོས་གྲུབ་ཅིག་སྩོལ་ཤོག །ཀྱེ་མ་རྙེད་དཀའི་དལ་འབྱོར་རིན་ཆེན་ནི་ཐོབ་ཀྱང་། །ཐོག་མེད་མ་རིག་བག་ཆགས་ངན་གོམས་ཀྱི་མཐུ་ལས། །གཙང་བདག་རྟག་པར་འཛིན་པའི་བློ་ངན་འདིས་བསླུས་ཏེ། །མི་ཚེ་ཕལ་ཆེར་འཇིག་རྟེན་འཁྲུལ་ལས་ལ་འབྱམས་སོང་། །མཚན་ལྡན་བླ་མའི་དྲིན་གྱིས་བསྟན་སྒོ་རུ་ཚུད་ཀྱང་། །ལྟར་སྣང་མིག་སྔར་ལེགས་པའི་ཨོ་ཟོབ་ལ་ཞེན་ཅིང་། །དྲན་དང་ཤེས་བཞིན་ཉམས་པའི་ཆོམ་རྐུན་གྱིས་གཙེས་པས། །བསླབ་གསུམ་ནོར་བུའི་མཛོད་ཀྱིས་འབྱོར་དུས་ནི་མི་འདུག །ཐོས་པ་གནད་དུ་མ་སོང་ང་རྒྱལ་གྱི་ཁ་སྣོན། །སྐབས་རེར་བསམ་ལོ་བྱས་ཀྱང་ཐེ་ཚོམ་ནི་ཇེ་ཆེ། །སྒོམ་བྱུང་རྒྱུད་ལ་མ་སྐྱེས་དུག་ལྔ་ནི་མེ་འབར། །སྤྲང་པོའི་འདུན་མ་རང་མགོ་རང་གཡོགས་ལ་འབྱམས་སོ། །གཅིག་པུར་དབེན་གནས་འགྲིམས་ཀྱང་རྣམ་གཡེང་ནི་མ་ཞི། །མཚམས་སྒྲུབ་ལོ་ཟླར་བྱས་ཀྱང་དྲོད་ཚད་ནི་མ་རྙེད། །གཞན་གྱི་དམ་པར་བཟུང་ཡང་རང་རྒྱུད་ནི་ཐ་མལ། །གང་བྱས་ཚེ་འདིར་སོང་བས་གཏན་འདུན་ནི་གཡེལ་འདུག །ཀ་དག་ལྟ་བ་ཡིད་དཔྱོད་འཛིན་པ་ཡིས་ལྷད་ཅིང་། །ལྷུན་གྲུབ་སྒོམ་པ་གཟུང་འཛིན་བདེན་ཞེན་གྱིས་བཅིངས་ཏེ། །ཤུགས་འབྱུང་སྤྱོད་པ་ཚུལ་འཆོས་ཞགས་པ་ཡིས་བསྡམས་ནས། །མ་བཙལ་ལྷུན་རྫོགས་འབྲས་བུ་རེ་དོགས་ཀྱིས་སྒྲིབ་འདུག །ད་ནི་སྤྲ་སྤྲོ་མང་པོའི་མགོ་སྐོར་དེ་དོར་ནས། །མི་ཕྱེད་སྙིང་ནས་གསོལ་བ་ཕུར་ཚུགས་སུ་འདེབས་ན། །དོན་བརྒྱུད་རྟོགས་པའི་ཡེ་ཤེས་བཙན་ཐབས་སུ་འཕོས་ཏེ། །མཁྱེན་རྟོགས་རྗེ་དང་མཉམ་པའི་བྱིན་རླབས་དེ་སྩོལ་ཤོག །ངེས་འབྱུང་རྣམ་པར་དག་པའི་ཆུ་གཏེར་ལས་འཁྲུངས་པའི། །རྣམ་དག་ཚུལ་ཁྲིམས་གཙང་མའི་ཉ་གང་གི་ཟླ་བ། །གཞན་ཕན་ཕྱིན་དྲུག་ལམ་གྱི་སྣང་བ་འབུམ་གྲོལ་བས། །ས་ལམ་ཡོངས་གསལ་བྱང་ཆུབ་ནོར་གླིང་དང་སྤྲོད་ཅིག །དབང་བཞིའི་བདུད་རྩིས་བྲན་པའི་གཤེགས་སྙིང་གི་ས་བོན། །དམ་ཚིག་རྣམ་དག་རིམ་གཉིས་དྲོད་གཤེར་གྱིས་བསྐྱངས་པས། །རིག་འཛིན་རྣམ་བཞིའི་འབྲས་བཟང་གོང་འཕེལ་དུ་སྨིིན་ནས། །དོན་གཉིས་ལྷུན་གྲུབ་སྐུ་བཞིའི་རྒྱལ་ཐབས་ལ་སྦྱོར་ཅིག །ཉམས་སྣང་སེམས་ཀྱི་གོས་བྲལ་རིག་སྟོང་ནི་རྗེན་པ། །ཀ་དག་ཁྲེགས་ཆོད་མངོན་གྱུར་ཐོད་རྒལ་གྱི་ཡེ་ཤེས། །ལྷུན་གྲུབ་སྣང་བཞིའི་ཡེ་ཤེས་བཙན་ཐབས་སུ་བགྲོད་ནས། །འཕོ་ཆེན་འཇའ་སྐུར་འགྲུབ་པའི་བྱིན་རླབས་ཤིག་སྩོལ་ཅིག །གལ་སྲིད་ཚེ་འདིར་གྲོལ་བའི་སྐལ་བ་ཡི་ཕོངས་ན། །ནམ་མཁའ་སུམ་ཕྲུགས་དགོངས་པའི་མན་ངག་ལ་བསྟེན་ནས། །འོད་གསལ་མ་བུ་འདྲེས་པའི་སྐད་ཅིག་ནི་དང་པོར། །འཆི་སྲིད་ཆོས་སྐུར་གྲོལ་བའི་དངོས་གྲུབ་ཞིག་སྩོལ་ཅིག །དེར་ཡང་མ་རིག་གཟུང་འཛིན་གོམས་རྐྱེན་གྱིས་སྒྲིབ་ན། །ཆོས་ཉིད་བར་དོའི་སྣང་བ་རང་རྩལ་དུ་ཤེས་ཏེ། །གྲོལ་ལུགས་གསུམ་གྱི་ཀ་དག་ནང་དབྱིངས་སུ་ཐིམ་ནས། །མཐའ་ཡས་སྤྲུལ་པས་གཞན་དོན་ལྷུན་གྲུབ་ཏུ་མཛོད་ཅིག །གལ་ཏེ་སྲིད་པ་བར་དོར་རྨི་ལམ་བཞིན་འཁྱལ་ན། །ཆོས་ཉིད་མངོན་སུམ་མཐོང་བའི་བདེན་པ་ཡི་མཐུ་དང་། །རིག་འཛིན་བརྒྱུད་པའི་བྱིན་རླབས་ལྷན་ཅིག་ཏུ་འཚོགས་ནས། །རང་བཞིན་སྤྲུལ་སྐུའི་ཞིང་དུ་དབུགས་འབྱིན་ནི་མཛོད་ཅིག །མདོར་ན་འདི་བཟུང་བྱང་ཆུབ་མ་ཐོབ་ཀྱི་བར་དུ། །རེ་ས་གཞན་ན་མེད་དོ་ཐུགས་རྗེ་ཡིས་དགོངས་ཏེ། །ཚེ་རབས་ཕྲེང་བར་འབྲལ་མེད་སྤྱི་བོ་རུ་བཞུགས་ནས། །དོན་གཉིས་ལྷུན་གྱིས་གྲུབ་པའི་དངོས་གྲུབ་ཞིག་སྩོལ་ཅིག །དད་མོས་སྙིང་ནས་བྱས་སོ་རྩ་བརྒྱུད་ཀྱི་བླ་མ། །གདུང་བའི་དབྱངས་ཀྱིས་འབོད་དོ་མཁྱེན་བརྩེ་ཡི་དགོངས་ལ། །བྱིན་རླབས་འཕོ་བ་ཆེན་པོའི་དབང་བསྐུར་གྱི་མཐུ་ལས། །མཁྱེན་རྟོགས་ཕ་དང་མཉམ་པའི་དངོས་གྲུབ་ཞིག་སྩོལ་ཅིག །ཅེས་མོས་གུས་མཆི་མ་འཁྲུགས་པའི་གདུང་བའི་དབྱངས་ཀྱིས་གསོལ་བ་བཏབ་པའི་མཐར་བླ་མ་དང་རང་སེམས་དབྱེར་མེད་དུ་བསྲེས་ནས། ཀ་དག་རིག་སྟ ོང་ཆོས་ཟད་རྗེན་པའི་ངང་བསྐྱངས་པ་ནི་དོན་གྱི་གནད་དམ་པའོ། །ཞེས་པའང་ཟབ་གསང་རྟོགས་པའི་བསྟན་འཛིན། སྒྲུབ་བརྩོན་རྣལ་འབྱོར་གྱི་དབང་ཕྱུག་དམ་པ་བླ་མ་སྨན་བླའི་གསུང་བསྐུལ་ངོར། ཆགས་སྡང་ཆོས་བརྒྱད་ལ་ཞེན་པའི་བན་སྡོམ་པདྨ་རྣམ་རྒྱལ་གྱིས་ཤིང་རྟ་རྒྱལ་ཟླའི་དམར་ཕྱོགས་ཀྱི་རྒྱལ་བ་དང་པོ། ཀུན་མཁྱེན་ཆེན་པོའི་དུས་ཆེན་ཉིན་སེང་བྲག་ནམ་མཁའ་རྫོང་གི་དབེན་ཁྲོད་དུ་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་སྟེ། འདིས་ཀྱང་རང་གཞན་ཀུན་གྱི་རྒྱུད་ལ་རིག་འཛིན་བརྒྱུད་པའི་བྱིན་རླབས་རྩོལ་མེད་དུ་ཞུགས་ནས་ཟབ་གསང་རྟོགས་པའི་ཡོན་ཏན་ཡར་ཟླ་ལྟར་རྒྱས་པའི་རྒྱུར་གྱུར་ཅིག། །།