སྤྲུལ་པའི་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་མཆོག་གྱུར་བདེ་ཆེན་གླིང་པར་གསོལ་འདེབས་རྒྱང་འབོད་གྲུབ་གཉིས་འདོད་དགུའི་ཆར་འབེབས།

༄༅། །སྤྲུལ་པའི་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་མཆོག་གྱུར་བདེ་ཆེན་གླིང་པར་གསོལ་འདེབས་རྒྱང་འབོད་གྲུབ་གཉིས་འདོད་དགུའི་ཆར་འབེབས་ཞེས་བྱ་བ་བཞུགས། བླ་མ་མཁྱེན་ནོ། །ལན་གསུམ། གཞི་གྲོལ་ཀ་ནས་དག་པ་ཆོས་སྐུ་ཡི་ཀློང་ནས། །ལྷུན་གྲུབ་ངེས་པ་ལྔར་བཞེངས་ལོངས་སྐུ་ཡི་རོལ་རྩལ། །གང་འདུལ་མཚན་དཔེའི་སྐུར་སྣང་ཟླ་མེད་ཀྱི་སྤྲུལ་སྐུ། །འགྲོ་འདུལ་མཆོག་གྱུར་བདེ་ཆེན་གླིང་པ་དེ་མཁྱེན་ནོ། །མོས་གུས་སྙིང་ནས་བྱས་སོ་དྲིན་ཆེན་གྱི་བླ་མ། །གདུང་བའི་དབྱངས་ཀྱིས་འབོད་དོ་རྩོད་བྲལ་གྱི་གཏེར་ཆེན། །རེ་ས་གཞན་ན་མེད་དོ་འགྲོ་འདུལ་གྱི་སྤྲུལ་སྐུ། །དོན་གཉིས་ལྷུན་གྱིས་གྲུབ་པའི་བྱིན་རླབས་རེ་སྩོལ་ཤོག །གང་ཐུགས་སྒྲིབ་གསུམ་དྲི་བྲལ་ངེས་དོན་གྱི་སངས་རྒྱས། །གང་གསུང་བདེན་གཉིས་ངོ་བོ་དམ་ཆོས་ཀྱི་འབྱུང་གནས། །གང་སྐུ་མཐོང་བས་ཡིད་འཕྲོག་རིག་འཛིན་གྱི་གཙོ་མཆོག །འགྲོ་འདུལ་མཆོག་གྱུར་བདེ་ཆེན་གླིང་པ་དེ་མཁྱེན་ནོ། །མོས་གུས་སྙིང་༴ གདུང་བའི་དབྱངས༴ རེ་ས་གཞན༴ དོན་གཉིས་ལྷུན༴ དགོངས་བརྡ་སྙན་བརྒྱུད་རིག་འཛིན་བླ་མ་ཡི་ངོ་བོ། །རིགས་རྣམས་སྤྲོ་བསྡུའི་བྱེད་པོ་ཧེ་རུ་ནི་ཀ་དཔལ། །མ་ཚོགས་ཌཱ་ཀི་འབུམ་གྱི་ཚོགས་དཔོན་དུ་ཐོབ་པའི། །འགྲོ་འདུལ་མཆོག༴ མོས་གུས་སྙིང་༴ གདུང་བའི་དབྱངས༴ རེ་ས་གཞན༴ དོན་གཉིས་ལྷུན༴ བརྟུལ་ཞུགས་ཕྱོགས་བྲལ་སྐྱོང་བ་གྲུབ་ཐོབ་ཀྱི་རྒྱལ་པོ། །སྙིགས་ལྔའི་རྒུད་པ་སྐྱོབ་མཛད་ཟབ་གཏེར་གྱི་མངའ་བདག །གུ་རུ་པདྨའི་ཞལ་ཚབ་བཀའ་བབ་ནི་བདུན་ལྡན། །འགྲོ་འདུལ་མཆོག༴ མོས་གུས་སྙིང་༴ གདུང་བའི་དབྱངས༴ རེ་ས་གཞན༴ དོན་གཉིས་ལྷུན༴ ཆོས་དབྱིངས་མཁའ་ལ་མཁྱེན་བརྩེའི་ཆུ་འཛིན་ནི་ལྷུན་སྟུག །ངོ་མཚར་མཛད་འཕྲིན་ཟབ་མོའི་ཆར་བཟང་ཆེར་ཕབ་པས། །རིས་བྲལ་བསྟན་འགྲོའི་བདེ་སྐྱིད་ལོ་འབྲས་ཚོགས་བསྐྱེད་མཛད། །འགྲོ་འདུལ་མཆོག༴ མོས་གུས་སྙིང་༴ གདུང་བའི་དབྱངས༴ རེ་ས་གཞན༴ དོན་གཉིས་ལྷུན༴ ད་ལྟ་བདེ་ལྡན་པདྨོ་བཀོད་པ་ཡི་ཞིང་ན། རྒྱལ་སྲས་པདྨའི་མྱུ་གུ་འགྲོ་འདུལ་གྱི་སྐུ་ཡིས། །ཐེག་མཆོག་སེང་གེའི་སྒྲ་དབྱངས་རྒྱུན་ཆགས་སུ་སྒྲོགས་མཛད། །འགྲོ་འདུལ་མཆོག༴ མོས་གུས་སྙིང་༴ གདུང་བའི་དབྱངས༴ རེ་ས་གཞན༴ དོན་གཉིས་ལྷུན༴ ཀྱཻ་མ་སྙིགས་ལྔའི་རང་མཚང་ལྷག་པར་དུ་བདོ་བས། །མི་མཐུན་འགལ་རྐྱེན་ཉེས་བརྒྱའི་དཔུང་ཚོགས་ཀྱིས་གཙེས་པས། །མོས་ལྡན་རེ་བ་སྐོང་བའི་ཐུགས་རྗེ་ཡིས་དགོངས་ཏེ། །ཆོས་མཐུན་བསམ་དགུ་འགྲུབ་པའི་བྱིན་རླབས་དེ་སྩོལ་ཤོག །ཐོག་མེད་དུས་ནས་བག་ཆགས་ངན་གོམས་ཀྱི་མཐུ་ལས། །ཕྱིན་ཅི་ལོག་བཞིའི་འཇིགས་པའི་རྐུང་འཕྲང་དུ་ཚུད་འདུག །ད་ནི་འགྲོ་འདུལ་ཐབས་མཁས་ཐུགས་རྗེ་ཡིས་དགོངས་ལ། །ཆོས་ཀྱི་སྡོམ་བཞི་རྟོགས་པའི་བྱིན་རླབས་དེ་སྩོལ་ཤོག །འདིར་སྣང་ཆོས་བརྒྱད་ཞེན་པའི་ལྕགས་སྒྲོག་གིས་བསྡམས་པས། །ཡང་དག་ལམ་བཟང་བགྲོད་པའི་ནུས་མཐུ་ཞིག་མི་འདུག །སྣང་སྲིད་སྒྱུ་མར་རྟོགས་པའི་ཆོས་རྗེ་ཡི་བྱིན་མཐུས། །བདག་བློ་ཆོས་སུ་འགྲོ་བའི་བྱིན་རླབས་དེ་སྩོལ་ཤོག །རང་དོན་ཡིད་བྱེད་འཛིན་པའི་བློ་ངན་འདིས་བསླུས་པས། །རྨད་བྱུང་བྱང་ཆུབ་སེམས་མཆོག་འབྱོང་དུས་ནི་མི་འདུག །ད་ནི་རྒྱལ་བའི་སྲས་ཀྱི་ཐུགས་རྗེ་ཡིས་ཟུངས་ལ། སྨོན་འཇུག་ལམ་མཐར་ཕྱིན་པའི་དངོས་གྲུབ་དེ་སྩོལ་ཤོག །ཐ་མལ་འཁྲུལ་འཛིན་ཞེན་པའི་མུན་སྟུག་གིས་བསྒྲིབས་ནས། །གསང་སྔགས་འབྲས་བུའི་པད་ཚལ་བཞད་དུས་ནི་མི་འདུག །ད་ནི་མཆོག་བྱིན་ཉིན་བྱེད་སྙིང་དབུས་སུ་ཤར་བས། །བསྐྱེད་རྫོགས་ལམ་མཐར་ཕྱིན་པའི་བྱིན་རླབས་དེ་སྩོལ་ཤོག །མདོར་ན་འདི་ནས་བཟུང་སྟེ་བྱང་ཆུབ་ཀྱི་བར་དུ། །རེ་ས་གཞན་ན་མེད་དོ་དྲིན་ཆེན་གྱི་བླ་མ། །ཚེ་རབས་ཕྲེང་བར་མི་འབྲལ་རྗེས་འཛིན་གྱི་མཐུ་ལས། །དོན་གཉིས་ལྷུན་གྱིས་འགྲུབ་པའི་བྱིན་རླབས་དེ་སྩོལ་ཤོག །ཅེས་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་མཆོག་གྱུར་བདེ་ཆེན་གླིང་པར་གསོལ་འདེབས་གདུང་དབྱངས་ཀྱིས་འབོད་པ་གྲུབ་གཉིས་འདོད་དགུའི་ཆར་འབེབས་ཞེས་བྱ་བ་འདི་ནི། ཆོས་སྲིད་ཕྲིན་ལས་ཀྱི་མངོན་པར་མཐོ་བ་སྤྱི་ཁྱབ་མཛོད་པ་ཆེན་པོ་ལྷ་རྒྱལ་གྱིས་ལྷ་རྫས་ཀྱི་སྐྱེས་དང་བཅས་བསྐུལ་ངོར། ཞེ་ཆེན་རྒྱལ་ཚབ་སྤྲུལ་མིང་འཛིན་པ་འགྱུར་མེད་པདྨ་རྣམ་རྒྱལ་དཔལ་བཟང་པོས་གདན་ས་ཆེན་པོ་དཔལ་རི་བོ་ཆེར་བྲིས་པའི་དགེ་བས་རང་གཞན་ཀུན་གྱི་རྒྱུད་ལ་གཏེར་ཆེན་ཆོས་ཀྱི་རྒྱལ་པོའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག