མཁན་ཆེན་རྡོ་རྗེ་འཆང་ལ་བརྟེན་པའི་བླ་མ་རྒྱང་འབོད་བྱིན་རླབས་མྱུར་འཇུག །

༄༅། །མཁན་ཆེན་རྡོ་རྗེ་འཆང་ལ་བརྟེན་པའི་བླ་མ་རྒྱང་འབོད་བྱིན་རླབས་མྱུར་འཇུག་བཞུགས་སོ།། བླ་མ་མཁྱེན་ནོ། །ལན་གསུམ། རབ་འབྱམས་རྩ་གསུམ་རྒྱལ་བའི་ཡེ་ཤེས་ཀྱི་སྤྱི་གཟུགས། །ཐེག་གསུམ་ལུང་རྟོགས་བསྟན་པ་རིན་ཆེན་གྱི་བང་མཛོད། །མཐའ་ཡས་སྐྱེ་དགུའི་འདྲེན་པ་ཟླ་མེད་ཀྱི་བཤེས་གཉེན། །སྐྱབས་ཀུན་འདུས་ཞལ་པདྨ་བཛྲ་དེ་མཁྱེན་ནོ། །ཚུལ་ཁྲིམས་འདབ་རྒྱས་ཏིང་འཛིན་གེ་སར་ནི་ཆེས་མཐོ། །ཤེས་རབ་ཟིལ་མངར་མཆོག་ལྡན་གཞན་ཕན་གྱི་དྲི་བསུང་། །སྐལ་བཟང་རྐང་དྲུག་ཚོགས་ཀྱི་ངལ་འཚོ་རུ་གྲུབ་པའི། །རྒྱལ་བའི་ཞལ་ཚབ་པདྨ་བཛྲ་དེ་མཁྱེན་ནོ། །མཐའ་ཡས་ཤེས་བྱ་ཀུན་མཁྱེན་འཇམ་དཔལ་ནི་གཞོན་ནུ། །བརྩེ་ཆེན་ཐུགས་རྗེའི་གཏེར་གཅིག་གངས་ཅན་གྱི་མགོན་པོ། །ནུས་མཐུའི་རྩལ་རྫོགས་བཛྲ་པཱ་ཎི་དང་དབྱེར་མེད། །བསྟན་འགྲོའི་དཔལ་མགོན་པདྨ༴ ཕྱི་རུ་འདུལ་ཁྲིམས་རྣམ་དག་ཉན་ཐོས་ཀྱི་དགེ་སློང་། །ནང་དུ་བྱང་ཆུབ་སེམས་འབྱོངས་ཐེག་ཆེན་གྱི་རྒྱལ་སྲས། །གསང་བ་རིམ་གཉིས་རྩལ་རྫོགས་སྔགས་སྤྱོད་ཀྱི་རྣལ་འབྱོར། །འཇིག་རྟེན་མིག་གཅིག་པདྨ༴ ཆོས་བརྒྱད་ཞེན་པ་རང་གྲོལ་བྱ་བཏང་གི་རྒྱལ་པོ། །འདུ་འཛིའི་གཡེང་བ་རྒྱང་བསྲིངས་སྒྲུབ་བརྩོན་གྱི་དབང་ཕྱུག །སྣང་སེམས་རོ་མཉམ་རྟོགས་པ་འཁྲུལ་ཞིག་གི་སྒོམ་ཆེན། །སྙིང་པོའི་བསྟན་འཛིན་པདྨ༴ ཐོག་མར་བསྟན་སྒོར་འཇུག་མཛད་སོ་ཐར་གྱི་མཁན་པོ། །བར་དུ་བྱང་སྡོམ་འབོགས་པ་ཐེག་ཆེན་གྱི་སློབ་དཔོན། །ཐ་མར་སྨིན་གྲོལ་མཆོག་རྩོལ་གསང་སྔགས་ཀྱི་བླ་མ། །བཀའ་དྲིན་འཁོར་མེད་པདྨ༴ རང་རིག་ཀ་ནས་དག་པ་ཀུན་བཟང་གི་དགོངས་པ། །མ་བཅོས་ཅོག་བཞག་བཞི་ཡི་གསང་ལམ་ལ་བརྟེན་ནས། །བློ་དང་ཡིད་དཔྱོད་བྲལ་བར་རྗེན་པ་རུ་སྟོན་མཛད། །གདོད་མའི་མགོན་པོ་པདྨ༴ མོས་གུས་སྙིང་ནས་ཤོར་རོ་དྲིན་ཆེན་གྱི་བླ་མ། །གདུང་བའི་དབྱངས་ཀྱིས་འབོད་དོ་པདྨ་ནི་བཛྲ། །རེ་ས་གཞན་ན་མེད་དོ་ཐུགས་རྗེ་ཡིས་དགོངས་ལ། །བྱིན་རླབས་འཕོ་བའི་དབང་བསྐུར་ད་ལྟ་རང་སྩོལ་ཅིག །སྔོན་གོམས་རྟག་འཛིན་བག་ཆགས་ཨ་འཐས་ཀྱིས་བཅིངས་པས། །རང་རྒྱུད་དམ་པའི་ཆོས་དང་འདྲེས་དུས་ཞིག་མི་འདུག །ད་ནི་བླ་མའི་ཐུགས་རྗེས་བླ་ོངན་དེ་ཐུལ་ལ། །བདག་བློ་ཆོས་དང་འདྲེས་པའི་བྱིན་རླབས་ཤིག་སྩོལ་ཤོག །རང་དོན་ཡིད་བྱེད་བློ་ངན་མུན་སྟུག་གིས་སྒྲིབ་པས། །ཐེག་ཆེན་རྒྱལ་སྲས་ལམ་བཟང་སྣང་དུས་ཤིག་མི་འདུག །ད་ནི་བླ་མའི་ཐུགས་རྗེ་ཉི་འོད་ཀྱིས་བསྐྱངས་པས། །སྨོན་འཇུག་ལམ་མཐར་ཕྱིན་པའི༴ ཐ་མལ་འཁྲུལ་རྟོག་འཛིན་པའི་བག་ཆགས་ཀྱི་སྦུབས་ནས། །ལྟ་སྒོམ་འབྲས་བུས་དྲོད་ཚད་རྙེད་དུས་ཞིག་མི་འདུག །ད་ནི་བླ་མའི་ཐུགས་རྗེས་རིམ་གཉིས་ཀྱི་རྩལ་རྫོགས། །རིག་འཛིན་རྣམ་བཞིའི་འབྲས་སྦྱོར༴ བློ་དང་ཡིད་དཔྱོད་གཟུང་འཛིན་དགག་སྒྲུབ་ཀྱི་སྤྲོས་པས། །ཟང་ཐལ་གཉུག་མའི་གཏན་སྲིད་ཟིན་དུས་ཞིག་མི་འདུག །ད་ནི་བླ་མའི་ཐུགས་རྗེས་སེམས་འཛིན་གྱི་འཕྲང་ཞིག །བྱར་མེད་ཀློང་དུ་གྱུར་པའི༴ བདེ་གསལ་མི་རྟོགས་ཉམས་སྣང་རིག་རྩལ་གྱི་འཆར་སྒོ། །གེགས་དང་གོལ་ས་མཐའ་དག་གཟུང་འཛིན་གྱི་ཆོ་འཕྲུལ། །ཡིན་མིན་བློ་ལས་འདས་ན་གཉུག་མ་ཡི་གཤིས་ལུགས། །དགག་སྒྲུབ་འཛིན་པ་དག་པའི༴ ནམ་ཞིག་བཟློག་མེད་འཆི་བ་བཙན་ཐབས་སུ་བྱུང་ན། །རང་རིག་འོད་ཀྱི་གོང་བུ་སྐར་མདའ་བཞིན་འཕངས་ཏེ། །རིགས་བདག་བླ་མའི་ཐུགས་དང་དབྱེར་མེད་དུ་བསྲེ་ཚེ། །འཆི་སྲིད་ཆོས་སྐུར་གྲོལ་བའི༴ འོད་གསལ་ཆོས་ཉིད་བར་དོའི་སྒྲ་འོད་དང་ཟེར་ཐག །མཚུངས་མེད་བླ་མའི་ཐུགས་རྗེས་རང་གདངས་སུ་ཤེས་པས། །ངོ་མཚར་ཐིམ་ལུགས་བརྒྱད་ཀྱིས་གདོད་མ་ཡི་གྲོལ་སར། །དབང་བསྒྱུར་ལོངས་སྐུར་གྲོལ་བའི་བྱིན་རླབས་ཤིག་སྩོལ་ཅིག །གལ་ཏེ་ལས་ཀྱི་དབང་གི་སྲིད་པ་རུ་འཁྱམས་ན། །རིགས་བདག་བླ་མའི་སྣང་བས་མདུན་མཁའ་ནས་བསུས་ཏེ། །ངོ་མཚར་བདེ་ལྡན་ཞིང་དུ་སྐད་ཅིག་ལ་བརྫུས་ནས། །ལུང་བསྟན་དབུགས་དབྱུང་ཐོབ་པའི༴ མདོར་ན་འདི་ནས་བཟུང་སྟེ་བྱང་ཆུབ་ཀྱི་བར་དུ། །རེ་ས་གཞན་ན་མེད་དོ་བླ་མ་ཡིས་མཁྱེན་མཛོད། །ལམ་གོལ་ངན་འགྲོའི་གཡང་ས་བཙན་ཐབས་སུ་ཆོད་ལ། །ལེགས་ཚོགས་མཐའ་རུ་ཕྱིན་པའི་དངོས་གྲུབ་མཆོག་སྩོལ་ཅིག །དེ་ལྟར་མོས་གུས་གདུང་བའི་ང་རོ་ཡིས། །རྩེ་གཅིག་གསོལ་བ་བཏབ་མཐར་བླ་མ་མཆོག །རང་གི་སེམས་དང་དབྱེར་མེད་གཅིག་བསྲེས་ནས། །གསལ་སྟོང་འཛིན་མེད་སྤྲོས་བྲལ་ངང་དུ་བཞག །བློ་དང་ཡིད་དཔྱོད་འཛིན་པས་མ་བཅིང་ཞིང་། །བདེ་གསལ་མི་རྟོག་ཉམས་ཀྱིས་མ་བསླད་པའི། །ཟང་མ་ཐལ་གྱུར་རང་རིག་རྗེན་པ་འདི། །དུས་གསུམ་སངས་རྒྱས་ཀུན་གྱི་དགོངས་པ་སྟེ། །བླ་མའི་ཐུགས་དང་ཡེ་ནས་རྣམ་དབྱེར་མེད། །དེ་ཡི་ངང་དུ་མཉམ་པར་བཞག་མཁས་ན། །ནམ་ཡང་བླ་མ་མཆོག་དང་འབྲལ་མི་སྲིད། །དེ་ཕྱིར་བློ་ལྡན་དགེ་བའི་མཆེད་རྣམས་ཀྱིས། །གཉུག་མའི་ངང་དེར་གཏན་སྲིད་ཟིན་པར་མཛོད། །ཚུལ་འདི་སྐྱབས་གཅིག་དཔལ་ལྡན་བླ་མ་ལ། །མི་ཕྱེད་དད་མོས་སྲོག་ཏུ་ཡོངས་གྲུབ་པའི། །འདུལ་འཛིན་དཔོན་སློབ་ཟུང་གི་བཞེད་སྐོང་དུ། །ཨ་གྲོ་བན་ཆུང་པདྨ་རྣམ་རྒྱལ་གྱིས། །འོག་མིན་སེང་བྲག་དཔལ་གྱི་ནགས་ཁྲོད་དུ། །ཡིད་ལ་གང་ཤར་བཟོ་མེད་ལྷུག་པར་བྲིས། །དགེ་བས་འགྲོ་ཀུན་བླ་མས་རྗེས་འཛིན་ཤོག།
༄༅། ན་མོ་གུ་རུ། དབྱིངས་དག་པ་གཉིས་ལྡན་སྤྲོས་བྲལ་གྱི་རྒྱལ་ཁབ། །མདངས་འོད་གསལ་ལྷུན་གྲུབ་ལྔ་ལྡན་གྱི་ཚོམ་བུ། །ཚུལ་མ་འགགས་གང་འདུལ་ཆུ་ཟླ་ཡི་གར་མཁན། །དོན་སྐུ་གསུམ་མཉམ་ཉིད་བླ་མ་དེ་མཁྱེན་ནོ། །མགོན་རྒྱལ་བ་ཀུན་གྱི་ཡེ་ཤེས་ཀྱི་སྤྱི་གཟུགས། །ཆོས་ལུང་རྟོགས་{པ་ལྷག}བསྟན་པ་རིན་ཆེན་གྱི་བང་མཛོད། །དུས་སྙིགས་མའི་འགྲོ་འདྲེན་རིག་གྲོལ་གྱི་ཚོགས་རྗེ། །སྐྱབས་ཀུན་འདུས་མཚུངས་མེད་བླ་མ་དེ་མཁྱེན་ནོ། །དཔལ་རིགས་ཀུན་ཁྱབ་བདག་དྲིན་ཆེན་གྱི་བླ་མ། །དོན་གདན་གསུམ་ཡོངས་རྫོགས་རྩ་གསུམ་གྱི་སྤྱི་དཔལ། །ཚུལ་དྲན་པས་བདེ་ཆེན་ཡེ་ཤེས་མཆོག་སྦྱིན་མཛད། །མགོན་བཀྲ་ཤིས་བྱེ་བའི་འོད་ཟེར་དེ་མཁྱེན་ནོ། །སྐུ་མཐོང་བས་ཐ་མལ་འཁྲུལ་ཞེན་གྱི་མདུད་འགྲོལ། །གསུང་ཐོས་པས་སྲོག་རྩོལ་དབུ་མ་རུ་སྡོམ་མཛད། །ཐུགས་དྲན་པས་ཡིད་ལ་ཡེ་ཤེས་ཀྱི་སྣང་སྟེར། །སྐྱབས་མཚུངས་མེད་ཞི་བའི་སྙིང་པོ་དེ་མཁྱེན་ནོ། །ཆོས་ངེས་གསང་སྙིང་པོ་སྒྲུབ་བརྒྱུད་ནི་རྣམ་བརྒྱད། །མགོན་རྡོ་རྗེ་འཆང་གི་དགོངས་བཅུད་ཀྱི་ཡང་ཞུན། །སྤྲང་དད་བསོད་སྙིམ་པར་ཅི་དགའ་རུ་སྩོལ་མཛད། །དྲིན་འཁོར་མཐའ་བྲལ་བའི་བླ་མ་དེ་མཁྱེན་ནོ། །རྗེའི་ཀུན་རྫོབ་ཞལ་རས་མཐོང་སྐལ་གྱིས་དབེན་ཡང་། །ཐུགས་སྲིད་ཞི་ཀུན་ཁྱབ་བདེ་ཆེན་གྱི་ཡེ་ཤེས། །དོན་རིག་སྟོང་དབྱེར་མེད་ལྷན་སྐྱེས་ཀྱི་ངོ་བོར། །དུས་འབྲལ་མེད་བསྙེན་ནོ་ཐུགས་རྗེ་ཡིས་དགོངས་མཛོད། །གཟུགས་སྣང་སྟོང་ཞེན་བྲལ་བསྐྱེད་རིམ་གྱི་རྣལ་འབྱོར། །སྒྲ་གྲགས་སྟོང་འཛིན་བྲལ་སྐྱེ་མེད་ཀྱི་བཟླས་པ། །ཡིད་འགྱུ་སྟོང་རང་གྲོལ་རྫོགས་རིམ་གྱི་འོད་གསལ། །དོན་རྡོ་རྗེ་གསུམ་གྱི་ངོ་བོ་རུ་བསྙེན་ནོ། །དབྱིངས་ཀ་དག་སྤྲོས་བྲལ་ཆོས་སྐུ་ཡི་གཤིས་ལུགས། །མདངས་མ་འགགས་འོད་གསལ་ལྷུན་གྲུབ་ཀྱི་ལོངས་སྐུ། །རྩལ་ཤར་གྲོལ་རྗེས་མེད་སྤྲུལ་སྐུ་རུ་ལམ་ལམ། །ཚུལ་དབྱེར་མེད་ངོ་བོར་གསོལ་བ་རང་འདེབས་སོ། །ཕྱི་ཚོགས་དྲུག་ཡུལ་སྣང་སྒྱུ་མ་རུ་ལམ་ལམ། །ནང་དུག་ལྔ་རང་གྲོལ་ཡེ་ཤེས་སུ་རྗེན་རྗེན། །བར་ཟུང་འཇུག་བློ་བྲལ་མཐའ་གྲོལ་དུ་ཤིག་ཤིག །ཕ་རྗེ་བཙུན་བླ་མས་བྱིན་གྱིས་རང་རློབས་ཤིག །དུས་འདི་ནས་བྱང་ཆུབ་མ་ཐོབ་ཀྱི་བར་དུ། །གནས་སྙིང་དབུས་དད་པའི་པདྨོ་རུ་བསྙེན་ན། །དོན་འཕོ་ཆེན་རྡོ་རྗེའི་ཡེ་ཤེས་ནི་འབེབས་པས། །རྗེ་ཁྱེད་དང་མཉམ་པའི་བྱིན་རླབས་དེ་སྩོལ་ཅིག །ཅེས་པའང་མགོན་པོ་གང་གི་བཀའ་དྲིན་རྗེས་སུ་དྲན་པའི་ངང་ནས། དུས་མཐའི་སྔགས་བན་རྡོ་རྗེ་དབང་མཆོག་དགྱེས་པ་རྩལ་གྱིས་བྲིས་ཤིང་གསོལ་བ་བཏབ་པ་སིདྡྷི་རསྟུ།
༈ ༀ་སྭསྟི། རྒྱལ་ཀུན་བརྩེ་ཆེན་ཐུགས་རྗེའི་རང་མདངས་ལས། །ཡོངས་ཤར་ཐུགས་རྗེའི་དབང་ཕྱུག་སྤྱན་རས་གཟིགས། །སྙིགས་དུས་དགེ་བའི་བཤེས་སུ་མངོན་སྣང་བ། རྗེ་བཙུན་བླ་མ་བསྟན་འཛིན་དར་རྒྱས་མཁྱེན། །ཕྱི་ཚུལ་སོ་ཐར་ཁྲིམས་ཀྱི་རྩ་བ་བརྟན། །ནང་དུ་བྱང་སེམས་ལམ་གྱི་ཡལ་འདབ་རྒྱས། །གསང་བ་རིམ་གཉིས་འབྲས་བུའི་ཁུར་དུད་པའི། །རྡོ་རྗེ་འཛིན་པ་བསྟན་འཛིན་དར་རྒྱས་མཁྱེན། །ཐོས་དང་བསམ་པའི་ཡོན་ཏན་རྒྱ་ཆེ་ཞིང་། །རྩེ་གཅིག་བསྒོམས་པས་གྲུབ་པའི་ས་མཐོར་གཤེགས། །ཐུགས་རྗེ་ཆེན་པོས་གཞན་ཕན་མཐའ་ཡས་པ། །འགྲོ་བའི་མགོན་པོ་བསྟན་འཛིན་དར་རྒྱས་མཁྱེན། །སྨིན་གྲོལ་གདམས་པའི་འདོད་དགུའི་གྲུ་ཆར་གྱིས། །གདུལ་འགྲོའི་ལས་ཉོན་མེ་ཚོགས་ཀུན་བཅིལ་ནས། །ཐར་གྲོལ་ས་ལུའི་མྱུ་གུ་བསྐྱེད་མཛད་པ། །བཀའ་དྲིན་འཁོར་མེད་བསྟན་འཛིན་དར་རྒྱས་མཁྱེན། །མོས་གུས་སྙིང་ནས་ཤོར་རོ་དྲིན་ཆེན་རྗེ། །ཡེ་ཤེས་གཟིགས་པས་དགོངས་མཛོད་བརྩེ་བ་ཅན། །བྱིན་རླབས་ཐུགས་རྗེའི་དབང་མཆོག་དེང་བསྐུར་ལ། །ཉིད་དང་དབྱེར་མེད་འགྲུབ་པར་མཛད་དུ་གསོལ། །དལ་འབྱོར་རྙེད་དཀའ་རྙེད་ཀྱང་ཆོས་མ་དྲན། །ནམ་འཆི་ངེས་མེད་ཤེས་ཀྱང་ཚེ་འདིར་ཞེན། །རྒྱུ་འབྲས་དབྱེ་གསལ་རྟོགས་ཀྱང་ལག་ལེན་འཛོལ། །བདག་འདྲ་བློ་དམན་འགྲོ་ལ་ཐུགས་རྗེས་གཟིགས། །བློ་སྣ་ཆོས་ལ་བསྒྱུར་ཅིག་དྲིན་ཆེན་རྗེ། །སོ་ཐར་སྡོམ་ཁྲིམས་ནོས་ཀྱང་འཆལ་སྤྱོད་མང་། །བྱང་སེམས་བསྐྱེད་ལོ་བྱས་ཀྱང་རང་དོན་གཉེར། །སྔགས་ལ་ཞུགས་ཀྱང་སྒོ་གསུམ་ཐ་མལ་པ། །བདག་འདྲ་སྙིགས་མའི་འགྲོ་ལ་ཐུགས་རྗེས་གཟིགས། །ལམ་མཆོག་མཐའ་རུ་ཕྱིན་པའི་དངོས་གྲུབ་སྩོལ། །རང་རིག་ཀུན་བཟང་ཡིན་ཡང་ཞལ་མ་མཇལ། །སྒོམ་པ་བློ་བྲལ་ཡིན་ཡང་འཛིན་པས་ལྷད། །ཆོས་ཀུན་མཉམ་པ་ཉིད་ཀྱང་ཕྱོགས་རེར་ཞེན། །བདག་འདྲ་ལམ་གོལ་འགྲོ་ལ་ཐུགས་རྗེས་གཟིགས། །གཉུག་མའི་གཏན་སྲིད་ཟིན་པའི་དངོས་གྲུབ་སྩོལ། །མདོར་ན་འདི་ནས་བྱང་ཆུབ་མ་ཐོབ་བར། །རེ་ས་གཞན་ན་མེད་དོ་དགོངས་མཛོད་ལ། །འབྲལ་བ་མེད་པར་རྟག་པར་རྗེས་བཟུང་སྟེ། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཞེས་པའང་དད་དམ་ལྡན་པའི་བཙུན་པ་མགོན་ཚེ་ནས་བསྐུལ་ངོར། རྗེ་འདི་ཉིད་ལས་ཟབ་ཆོས་ཀྱི་འབྲེལ་བ་ཐོབ་པའི་ཟེ་ཆེན་པ་པདྨ་རྣམ་རྒྱལ་གྱིས་མཆོག་ཏུ་གུས་པའི་བློས་གསོལ་བ་བཏབ་པ་སྟེ་འདིས་ཀྱང་འགྲོ་ཀུན་དགེ་བའི་བཤེས་ཀྱིས་རྗེས་སུ་འཛིན་པར་གྱུར་ཅིག
༄༅། །ན་མོ་གུ་རུ། སྐུ་མཐོང་བས་ཐ་མལ་འཁྲུལ་སྣང་འགགས། །གསུང་ཐོས་པས་བདེ་ཆེན་ཡེ་ཤེས་སྐྱེད། །ཐུགས་དྲན་པས་གཟུང་འཛིན་བདེན་ཞེན་འཇིགས། །ཕ་སངས་རྒྱས་ལས་ལྷག་བཀའ་དྲིན་ཅན། །རྗེ་དྲན་ནོ་མཁྱེན་བརྩེའི་དབང་པོ་དྲན། །བུའི་གདུང་དབྱངས་ཐལ་ལོ་དྲིན་ཆེན་རྗེ། །སྤྱིར་ཐུབ་དབང་བསྟན་པའི་རྒྱན་གཅིག་པུ། །དགོས་ཤིང་རྟ་ཆེ་བརྒྱད་རིང་ལུགས་སྐྱོང་། །དོན་བཀའ་བབ་བདུན་གྱི་གསང་མཛོད་འཛིན། །མགོན་སངས་རྒྱས་དངོས་བྱོན་སྤྲུལ་པའི་སྐུ། །རྗེ་དྲན་ནོ༴ བུའི་གདུང་དབྱངས༴ ཕྱི་གནས་ལྔ་རིག་པའི་པཎྜི་ཏ། །ནང་གྲུབ་གཉིས་རྩལ་རྫོགས་རིག་འཛིན་གཙོ། །དོན་སྣང་བཞི་མཐར་ཕྱིན་གྲུབ་པའི་མཆོག །ཕ་ནམ་མཁའ་ལྟ་བུའི་རྣལ་འབྱོར་པ། །རྗེ་དྲན་ནོ༴ བུའི་གདུང་དབྱངས༴ བཤད་བརྒྱུད་ཀྱི་ལྷ་ལམ་ཡངས་པའི་ངོགས། །མཁྱེན་རབ་ཀྱི་ཆ་རྫོགས་རི་བོང་ཅན། །ཆོས་ལུང་རིགས་ཚད་མའི་འོད་དཀར་གྱིས། །ཐེ་ཚོམ་གྱི་མུན་ཚོགས་དྲུང་ནས་བཅིལ། །རྗེ་དྲན་ནོ༴ བུའི་གདུང་དབྱངས༴ སྒྲུབ་བརྒྱུད་ཀྱི་གངས་རི་མཐོན་པོའི་སྤོར། །ཉམས་རྟོགས་པའི་རྩལ་རྫོགས་གདོང་ལྔ་པ། །ཆོས་རྡོ་རྗེ་རྩེ་མོའི་ང་རོ་ཡི། །ཐེག་དམན་གྱི་ཝ་སྐྱེས་སྔངས་མཛད་པ། །རྗེ་དྲན་ནོ༴ བུའི་གདུང་དབྱངས༴ སྤྱིར་ལྷར་བཅས་སྐྱེ་དགུའི་ཞིང་ས་ལ། །ཐུགས་རྗེ་ཡི་འོད་ཟེར་འབུམ་སྤྲོ་བས། །ཐར་གྲོལ་གྱི་པད་ཚལ་བཞད་མཛད་པ། །ཕ་ཉི་མ་ལྟ་བུའི་ངོ་མཚར་ཅན། །རྗེ་དྲན་ནོ༴ བུའི་གདུང་དབྱངས༴ དགོས་བུ་སློབ་འཚོགས་པའི་ཚོགས་དབུས་སུ། །མགོན་ཡིད་བཞིན་ནོར་འདྲའི་གཟི་བརྗིད་ཅན། །འཕོ་ཆེན་གྱི་བྱིན་རླབས་འདོད་དགུ་ཡིས། །ཉམས་རྟོགས་ཀྱི་བང་མཛོད་འགེང་མཛད་པ། །རྗེ་དྲན་ནོ༴ བུའི་གདུང་དབྱངས༴ དགོངས་ཀློང་གི་ནམ་མཁའ་ཡངས་པ་རུ། །མཁྱེན་བརྩེ་ཡི་ཆུ་འཛིན་ལྷུན་སྟུག་ལས། །ཟབ་དགུ་ཡི་གདམས་པའི་ཆར་བཟང་གིས། །དམན་བློ་ཡི་རྫིང་བུ་འགེང་མཛད་པ། །རྗེ་དྲན་ནོ༴ བུའི་གདུང་དབྱངས༴ ཕ་ཁྱེད་ཐུགས་དོན་དམ་ཆོས་ཀྱི་སྐུ། །མ་འགྲོ་བའི་རྒྱུད་ལ་རྟག་གནས་པ། །དོན་སྤྲོས་བྲལ་ཐིག་ལེ་ཉག་གཅིག་དེ། །དུས་ནམ་ཡང་འབྲལ་བ་མ་མཆིས་མོད། །ཀུན་རྫོབ་ཀྱི་མཚན་མའི་གཟུགས་སྐུ་དང་། །དུས་ཡུན་རིང་འབྲལ་བས་སྣང་ཤེས་སྐྱོ། །བུའི་ཚུགས་ཐབས་མེད་དོ་དྲིན་ཆེན་རྗེ། །ངོ་མཚར་གྱི་སྒྱུ་འཕྲུལ་མྱུར་སྟོན་མཛོད། །རྒྱུད་དད་དམ་དག་པའི་མཎྜ་ལ། །གཞན་ཕན་བྱང་སེམས་ཀྱི་ཆག་ཆག་གདབ། །ལམ་རིམ་གཉིས་ཟབ་མོའི་ཚོམ་བུ་བཀོད། །འོད་གསལ་རྩེ་མོ་ཡི་ཏོག་གིས་སྤྲས། །ཕ་བླ་མ་དགྱེས་པའི་གསོས་སུ་འབུལ། །དབྱིངས་ཆོས་སྐུའི་ཀློང་ནས་བྱིན་གྱིས་རློབས། །མོས་གུས་ལམ་ཁྱེར་གྱི་སློབ་ཐ་ངས། །སེམས་སྐྱེ་འགག་གནས་བྲལ་གཉུག་མའི་གཤིས། །ཚིག་དཔེ་ལས་འདས་པའི་ཡེ་ཤེས་ཆེ། །དོན་རིག་སྟོང་རྗེན་པའི་རང་ཞལ་མཆོག །བློ་ཡིད་དཔྱོད་བྲལ་བར་གཅེར་མཐོང་དུ། །ངོ་འཕྲོད་ཙམ་བྱུང་འདི་བླ་མའི་དྲིན། །ཨ་ལ་ལ་སྣང་བའི་བདེ་ཆ་ལ། །ཨ་ལ་ལ་ཉམས་ཀྱི་སྐྱིད་པ་ལ། །སྐྱིད་པ་འདི་མཚུངས་མེད་བླ་མའི་དྲིན། །ངེས་ཤེས་དེ་བླ་མ་རྗེ་ལ་འབུལ། །ད་དུང་ཡང་གསོལ་བ་སྙིང་ནས་འདེབས། །ཐུགས་ཡིད་གཅིག་འདྲེས་ཀྱི་བྱིན་རླབས་སྩོལ། །ཀ་དག་ཁྲེགས་ཆོད་ཀྱི་ལྟ་བ་རྟོགས། །ལྷུན་གྲུབ་ཐོད་རྒལ་གྱི་གསང་ལམ་ནས། །འཕོ་ཆེན་གྱི་འཇའ་ལུས་རྡོ་རྗེའི་སྐུ། །ཚེ་འདི་རུ་འགྲུབ་པའི་དངོས་གྲུབ་སྩོལ། །ཚུལ་དེ་སྐད་པདྨ་བི་ཛ་ཡས། །དཔལ་པདྨ་འོད་ཀྱི་ནགས་ཁྲོད་དུ། །ཕ་བླ་མའི་དུས་དྲན་མཆོད་པའི་ཉིན། །མོས་གུས་ཀྱི་གསོལ་འདེབས་གླུ་རུ་བླངས། །དགེ་དེས་ཀྱང་འགྲོ་ཀུན་ཡོངས་གྲོལ་ཤོག །