གྲུབ་མཆོག་རྣལ་འབྱོར་གྱི་དབང་ཕྱུག་ལྕགས་ཟམ་པ་ཆེན་པོའི་ཐུགས་དམ་གནད་ནས་བསྐུལ་བའི་གླུ་བུ་ཆུང་མ་ལ་འབོད་པའི་གདུང་དབྱངས།

༄༅། །གྲུབ་མཆོག་རྣལ་འབྱོར་གྱི་དབང་ཕྱུག་ལྕགས་ཟམ་པ་ཆེན་པོའི་ཐུགས་དམ་གནད་ནས་བསྐུལ་བའི་གླུ་བུ་ཆུང་མ་ལ་འབོད་པའི་གདུང་དབྱངས་ཞེས་བྱ་བ་བཞུགས་སོ།། ན་མོ་གུ་རུ། མཚོ་སྐྱེས་རྒྱལ་བའི་ཐུགས་སྤྲུལ་ཟླ་མེད་ཀྱི་སྐྱེས་མཆོག །གྲུབ་གཉིས་རྩལ་གསུམ་རྫོགས་པ་གདོང་ལྔ་ཡི་དབང་པོ། །སྒྲུབ་བརྒྱུད་གངས་རིའི་རྩེ་མོར་ཐེག་མཆོག་གི་གད་རྒྱངས། །སྒྲོགས་མཛད་བརྩོན་འགྲུས་སེངྒེ་སྙིང་དབུས་ནས་དྲན་ནོ། །ཚེ་དབང་གྲུབ་པའི་རིགས་སྔགས་ཉི་འབུམ་གྱི་གཟི་ཡིས། །འཆི་བདག་གཏུམ་པོའི་མུན་ཚོགས་ལྷག་མེད་དུ་བཅོམ་ནས། །དབང་བཅུ་མཐའ་རུ་ཕྱིན་པའི་རྩེ་འཇོ་ཡིས་སྒེག་པའི། །གྲུབ་མཆོག་ཐང་སྟོང་རྒྱལ་པོ་སྙིང་དབུས་ནས་དྲན་ནོ། །གང་གསུང་རྡོ་རྗེའི་བདེན་ཚིག་ནོར་བུ་ཡི་ཞགས་པས། །སྡེ་བརྒྱད་དྲི་ཟའི་བུ་མོ་དབང་མེད་དུ་བཅིངས་ནས། །གང་བཅོལ་རྣམ་བཞིའི་ལས་ལ་བྲན་བཞིན་དུ་བཀོལ་མཛད། །རྣལ་འབྱོར་ལུང་སྟོང་སྨྱོན་པ་སྙིང་དབུས་ནས་དྲན་ནོ། །གཟུང་འཛིན་སྤྲིན་ཚོགས་དེངས་པའི་འོད་གསལ་གྱི་མཁའ་ལ། །མཁྱེན་བརྩེའི་ཉི་ཟླ་གསར་པའི་དཀྱིལ་འཁོར་གྱིས་མཛེས་པས། །མཆོག་ཐུན་འདོད་དགུའི་སྣང་འབུམ་ཅི་དགའ་རུ་སྤྲོ་མཛད། །གྲུབ་པའི་བཅུད་ལེན་མཁན་དེ་སྙིང་དབུས་ནས་དྲན་ནོ། །གང་གི་དད་བརྒྱའི་ཡིད་མཁར་ཡུད་ཙམ་དུ་ཤར་ཡང་། །བརྒྱད་གཉིས་འཇིགས་པའི་མུན་ཚོགས་གཞིལ་བ་དང་ཆབས་ཅིག །ལེགས་ཚོགས་ཡོན་ཏན་བྱེ་བའི་པད་ཚལ་མཆོག་བཞད་ནུས། །དབང་ཕྱུག་ལྕགས་ཟམ་པ་དེ་སྙིང་དབུས་ནས་དྲན་ནོ། །མོས་གུས་གྱེན་མིག་བལྟ་བའི་དགེ་བློ་ཙམ་ཡོད་ཀྱང་། །བརྟུལ་ཞུགས་ལུས་ཤེད་མ་རྫོགས་ཀུན་མཉམ་གྱི་མལ་ནས། །གདུང་དབྱངས་ཁ་འོ་ཙ་རེ་འབོད་པ་འདི་གཟིགས་ལ། །ཐུགས་རྗེའི་ཕྱག་ཡངས་མ་ཐོགས་ད་ལྟ་རུ་རྐྱོངས་ཤོག །ཐོག་མེད་ངན་གོམས་བག་ཆགས་སྐོར་ཕུར་གྱི་རྩ་ན། །འདིར་སྣང་ཆོས་བརྒྱད་ཞེན་པའི་འཆིང་ཐག་འདི་སྲ་བས། །ཡང་དག་ལམ་དུ་བགྲོད་པའི་བློ་མཐུ་དང་བྲལ་འདི། །ངེས་འབྱུང་རལ་གྲི་རྣོན་པོས་ད་ལྟ་རུ་ཕྲོལ་མཛོད། །དངོས་འཛིན་དྷ་དུ་ར་ཡིས་ཐོག་མེད་ནས་མྱོས་པས། །ཟབ་མོའི་གནས་ལ་ལྟ་བའི་རྣམ་དཔྱོད་ཀྱི་བློ་མིག །ལོག་རྟོག་སྐྲ་ཤད་འཛག་པའི་སྣང་ཚུལ་གྱིས་ཁེབས་འདི། །བྱིན་རླབས་གྲུབ་པའི་སྨན་གྱིས་ད་ལྟ་རུ་སོལ་ཅིིག །དེད་དཔོན་མཁས་པའི་ཞལ་ལུང་མཛེས་མ་ཡི་འགྲམ་ཆང་། །དོན་གཉེར་བ་ཀུ་ལ་ཡི་མེ་ཏོག་ལ་རེག་པས། །བསླབ་གསུམ་ཟིལ་དངར་འཇོ་བའི་ཀེེ་སར་གྱི་ལང་ཚོ། །ཐུབ་བསྟན་སྐྱེད་ཚལ་མཛེས་པའི་རྒྱན་མཆོག་ཏུ་བསྐྲུན་མཛོད། །སྨིན་གྲོལ་བསྐྱེད་རྫོགས་ཟབ་མོའི་བ་དན་གྱིས་མཛེས་པའི། །བསྙེན་སྒྲུབ་རྣམ་བཞིའི་གྲུ་བོ་ལེགས་ལམ་དུ་བསྒྱུར་བས། །རིག་འཛིན་རྣམ་བཞིའི་དབྱིག་མཆོག་རང་དབང་དུ་ཐོབ་པས། །དོན་གཉིས་འདོད་པ་འཇོ་བའི་དགའ་སྟོན་ལ་སྦྱོར་ཅིག །རྨད་བྱུང་བྱང་ཆུབ་སེམས་མཆོག་འཇོག་པོ་ཡི་གཙུག་ནོར། །གཞན་ཕན་བསྡུ་བཞིའི་རྒྱལ་མཚན་རྩེ་མོ་རུ་བསྙེན་ལས། །ཕན་བདེ་འདོད་དགུའི་གྲུ་ཆར་ས་གསུམ་དུ་ཕབ་པས། །ལུས་ཅན་སྲིད་པའི་དབུལ་ཀུན་མིང་མཐའ་རུ་མཛོད་ཅིག །མདོར་ན་སྙིགས་འགྲོའི་སྐྱོབ་པ་ཟླ་བྲལ་གྱི་རྣལ་འབྱོར། །གང་གི་གསང་གསུམ་བྱིན་རླབས་ཡེ་ཤེས་ཀྱི་ཆུ་རྒྱུན། །བདག་སོགས་སྒོ་གསུམ་ཞིང་སར་ད་ལྟ་རུ་ཕབ་ནས། །མཁྱེན་ནུས་རྗེ་དང་མཉམ་པའི་བྱིན་རླབས་ཤིག་སྩོལ་ཅིག །དེ་སྐད་གྲུབ་མཆོག་རྣལ་འབྱོར་དབང་ཕྱུག་ལ། །མི་ཕྱེད་མོས་པའི་རྒྱུ་ལ་སྐལ་བཟང་ཞིང་། །དཔལ་འབྱོར་དགེ་བའི་གྲོགས་ཀྱིས་བསྐུལ་བ་ཡི། །རྐྱེན་གྱིས་མཚམས་སྦྱར་ཐུགས་དམ་བསྐུལ་བའི་གླུ། །བུ་ཆུང་མ་ལ་འབོད་པའི་གདུང་དབྱངས་འདི།། བག་ཡངས་པདྨ་དགྱེས་པས་མགྲིན་རྟར་བསྐྱོན། །དགེ་བས་འགྲོ་ཀུན་རྣལ་འབྱོར་དབང་ཕྱུག་གིས། །རྗེས་བཟུང་དོན་གཉིས་མཐར་ཕྱིན་བཀྲ་ཤིས་སྩོལ།།
༄༅། །ན་མོ་གུ་རུ། རབ་འབྱམས་ཕྱོགས་དུས་སྲས་བཅས་རྒྱལ་བའི། །དཔག་མེད་མཁྱེན་བརྩེ་ནུས་པའི་ཡེ་ཤེས། །མ་ལུས་གཅིག་ཏུ་བསྡུས་པའི་སྤྱི་གཟུགས། །དྲན་པས་སྲིད་ཞིའི་འཇིགས་ཀུན་འཕྲོག་མཛད། །ཡིད་བཞིན་ནོར་ལྟར་ཕན་བདེའི་རེ་སྐོང་། །རྩ་གསུམ་འདུས་ཞལ་ཨོ་རྒྱན་ཐོད་ཕྲེང་། །དབྱེར་མེད་དྲིན་ཆེན་རྩ་བའི་བླ་མར། །མི་ཕྱེད་སྙིང་ནས་གུས་པས་འདུད་དོ། །སྙིགས་མའི་གདུལ་བྱ་རྒྱལ་བས་སྤངས་རྣམས། །འདུལ་སླད་སྲས་བཅས་རྣམ་འདྲེན་ཡོངས་ཀྱིས། །ཁྱོད་གཅིག་ཁོ་ན་བསྐུལ་བ་ལགས་ཕྱིར། །ཐུགས་རྗེ་བཏང་སྙོམས་ངང་དུ་མ་བཞུགས། །དེང་འདིར་མོས་ལྡན་བུ་ལ་དགོངས་ཤིག །རྙེད་དཀའི་དལ་འབྱོར་མི་ལུས་ཐོབ་ཀྱང་། །མི་རྟག་འཆི་བ་སྙིང་ནས་མ་དྲན། །ཅི་བྱེད་ཚེ་འདིའི་འདུན་མ་འབའ་ཞིག །མདོ་མེད་སྟོང་ལོག་མཁན་ལ་གཟིགས་ཤིག །མཚན་ལྡན་བཤེས་གཉེན་དུ་མ་མཇལ་ཞིང་། །གདམས་པའི་གནད་གསང་མང་དུ་ཐོས་ཀྱང་། །ཆ་ཙམ་རང་གི་རྒྱུད་ལ་མ་འབྱོར། །བླུན་རྨོངས་ཆོས་དྲེད་མཁན་ལ་གཟིགས་ཤིག །བྱས་བྱས་ཡོང་ཡོང་རྣམ་གྲངས་མང་པོས། །ཡིན་ཡིན་གློ་བ་བདེ་མདོག་ཁ་ཡང་། །རྐྱེན་དང་འཕྲད་ཚེ་ཐ་མལ་བས་ཐུ། །ལོ་འདོད་མཁན་ལ་ཐུགས་རྗེས་གཟིགས་ཤིག །དྲན་དང་ཤེས་བཞིན་འཁར་བས་གཏོང་རྒྱུས། །བག་མེད་འཆལ་སྤྱོད་མལ་ན་ལྷུང་ཞིང་། །ལེ་ལོ་ཆོས་བརྒྱད་སྒྲོག་གིས་བཅིང་བའི། །ཉམ་ཐག་བདག་གི་གདུང་བའི་ང་རོས། །འབོད་འདི་ཐུགས་རྗེའི་གཏེར་གྱིས་གསན་ནམ། །དམན་ལ་བརྩེ་བའི་ཐུགས་རྗེ་མེད་ན། །བློ་མཆོག་རྣམས་ལ་དགོངས་ཀྱང་ཅི་དགོས། །དེ་སླད་དེང་འདིར་ཐུགས་རྗེས་གཟིགས་ལ། །དབང་བསྐུར་སྨིན་གྲོལ་དངོས་གྲུབ་སྩོལ་ཅིག །ནད་གདོན་གེགས་རྐྱེན་ཕྱི་ཡི་བར་ཆད། །རྩ་རླུང་འཁྲུགས་པ་ནང་གི་ཆོ་འཕྲུལ། །གཟུང་འཛིན་རྣམ་རྟོག་གསང་བའི་གེགས་རྐྱེན། །ཐམས་ཅད་ཀ་དག་དབྱིངས་སུ་སོལ་ཅིག །ངེས་འབྱུང་འཛིན་མའི་གཞི་ལས་འཁྲུངས་པའི། །གཞན་ཕན་བྱང་ཆུབ་སེམས་ཀྱི་མེ་ཏོག །བསླབ་གསུམ་སྦྲང་རྩིའི་བཅུད་ཀྱིས་གཏམས་པས། །དོན་གཉིས་དགའ་སྟོན་འཕེལ་བར་མཛོད་ཅིག །སྨིན་བྱེད་དབང་བཞིས་དུལ་བའི་གཤེགས་སྙིང་། །གྲོལ་བྱེད་རིམ་གཉིས་ཆར་གྱིས་བརླན་པས། །སྐུ་བཞི་གསེར་གྱི་སྙེ་མར་འཁྲུངས་པའི། །གྲུབ་འབྲས་ཚེ་འདིར་སྨིན་པར་མཛོད་ཅིག །ཡེ་ནས་བཅིངས་གྲོལ་མེད་པའི་རིག་པ། །ཡོངས་གྲོལ་སྒོམ་གྱི་འཛིན་པས་མ་བཅིངས། །རང་བབས་ཆུ་བོའི་རྒྱུན་བཞིན་གོམས་པས། །གདོད་མའི་གསང་མཆོག་གྲུབ་པར་མཛོད་ཅིག །མདོར་ན་དགོངས་རྒྱུད་བྱིན་རླབས་འཕོས་པས། །ཅིར་སྣང་བླ་མའི་རོལ་པར་ཤར་ཏེ། །རང་གཞན་ཕན་བདེའི་སྒོ་འཕར་བརྒྱ་ཕྲག །འབྱེད་ལ་མཆོག་དང་མཚུངས་པར་མཛོད་ཅིག །འདི་ཕྱི་བར་དོའི་གནས་སྐབས་ཀུན་ཏུ། །ཁྱོད་མིན་བདག་ལ་སྐྱབས་གཞན་མ་མཆིས། །འབྲལ་མེད་བྱིན་རླབས་སྙིང་གི་བདུད་རྩིར། །སྨིན་པའི་དགའ་སྟོན་དེང་འདིར་སྩོལ་ཅིག །ཅེས་འདི་ཆོས་གྲོགས་དུ་མ་ཡིས། །བསྐུལ་ངོར་པདྨ་དགྱེས་པ་ཡི། །ཡིད་ལ་གང་དྲན་སྨྲས་པའི་དགེས། །འགྲོ་ཀུན་བླ་མས་རྗེས་འཛིན་ཤོག།
༄༅། །ན་མོ་གུ་རུ། བསྒྲང་ཡས་སྲས་བཅས་རྒྱལ་བའི་ཡེ་ཤེས་ཀྱི་སྤྱི་གཟུགས། །དྲན་པས་སྲིད་ཞིའི་འཇིགས་འཕྲོག་མཚོ་སྐྱེས་ཀྱི་བླ་མ། །དབྱེར་མེད་དྲིན་ཆེན་ཆོས་རྗེའི་ཞབས་སེན་གྱི་ནོར་བུ། །ཚངས་གནས་དད་པའི་པདྨོར་འབྲལ་མེད་དུ་བཞུགས་ཤིག །ཀྱེ་མ་རྙེད་དཀའི་རྟེན་བཟང་ཡུད་ཙམ་དུ་ཐོབ་ཀྱང་། །འཆི་བ་སྙིང་ནས་མ་དྲན་འདིར་སྣང་ལ་ཞེན་པས། །ཅི་བྱེད་ཚེ་འདིའི་འདུན་མ་ཆོས་བརྒྱད་ཀྱི་ཁོལ་པོ། །སྤྲང་འཆལ་དྲེད་པོའི་བློ་སྣ་ཆོས་ཕྱོགས་སུ་དྲོངས་ཤིག །སོ་ཐར་སྡོམ་པ་ནོས་ཀྱང་ངེས་འབྱུང་གིས་མ་ཟིན། །བྱང་སེམས་བསྐྱེད་ལོ་བྱས་ཀྱང་གཞན་ཕན་གྱི་རྩིས་གཏོང་། །སྔགས་སུ་ཞུགས་པར་བརླམས་ཀྱང་འདུ་ཤེས་ནི་ཐ་མལ། །རང་མགོ་རང་གཡོགས་མཁན་ལ་ཐུགས་རྗེ་ཡིས་གཟིགས་ཤིང་། །བསྐྱེད་རིམ་ལྷ་སྐུ་བསྒོམས་ཀྱང་ཨ་འཐས་ཀྱི་འཛིན་པ། །རྫོགས་རིམ་སྟོང་ཉིད་བསྒོམས་ཀྱང་ཡིད་དཔྱོད་ཀྱི་རྒྱས་འདེབས། །བཟླས་བརྗོད་འབག་འབུག་བཏོན་ཀྱང་འཕྲོ་འདུ་ཡི་གནད་མེད། །བྱས་མང་འབྲས་ཉུང་མཁན་ལ་ཐུགས་རྗེ་ཡིས་གཟིགས་ཤིག །རང་དོན་སྒྲུབ་པར་བརླམས་ཀྱང་འདིར་སྣང་གི་ཁེ་གྲགས། །གཞན་དོན་བརྩོན་པར་བརླམས་ཀྱང་རང་འདོད་ཀྱི་རྙེད་ཚོལ། །གཉིས་མགོ་མི་ཐོན་བེ་སྦྲེལ་གཡང་ལྷུང་གི་གཞི་མ། །བསམ་བརླག་ཡུག་པ་བརྐྱང་ལ་ཐུགས་རྗེ་ཡིས་གཟིགས་ཤིག །རང་སྐྱོན་རང་གི་བལྟས་ན་ཡི་མུག་གི་གཞི་མ། །གཞན་སྐྱོན་ཀུན་ཏུ་བརྟགས་ན་ཁྲེལ་བརྡས་ཀྱི་རང་བཞིན། །ད་ནི་ཅི་ལ་བསམས་ཀྱང་སྐྱོ་ཤས་ཀྱི་བསྐུལ་འདེབས། །ཐུགས་རྗེའི་ཕྱག་ཡངས་རྐྱོངས་ཤོག་རྒྱུད་གསུམ་གྱི་བླ་མ། །དགོངས་བརྒྱུད་བྱིན་རླབས་དབང་མཆོག་ད་ལྟ་རུ་བསྐུར་ལ། །རྟོགས་གྲོལ་འདུས་མཉམ་ཆེན་པོའི་རྒྱལ་ཐབས་ལ་སྦྱར་ནས། །རིས་བྲལ་བསྟན་འགྲོའི་ཕན་བདེ་ཅི་དགའ་རུ་བཞད་པའི། །ཕྲིན་ལས་རྗེ་དང་མཉམ་པའི་བྱིན་རླབས་ཤིག་སྩོལ་ཅིག །ཅེས་འདི་མོས་ལྡན་བཻ་ཥ་ཛྱ། །ཡང་ཡང་གསུང་ནན་ཆེ་བའི་ངོར། །མདོ་མེད་པདྨ་བི་ཛ་ཡས། །གར་ཤར་ལྷུག་པར་སྨྲས་པ་དགེ།།
༄༅། །ན་མོ་གུ་རུ། བསྒྲང་ཡས་སྲས་བཅས་རྒྱལ་བའི་ཡེ་ཤེས་ཀྱི་རང་གཟུགས། །གདུལ་དཀའི་སྙིགས་འགྲོའི་སྐྱོབ་པ་ཟླ་མེད་ཀྱི་བཤེས་གཉེན། །དྲན་པ་ཙམ་གྱིས་བདེ་ཆེན་ཡེ་ཤེས་མཆོག་བསྐྱེད་མཛད། །སྐྱབས་གཅིག་དྲིན་ཆེན་བླ་མ་སྙིང་དབུས་ནས་དྲན་ནོ། །དྭ་ཕྲུག་ཐང་ལ་བོར་འདྲའི་ཉམ་ཐག་གི་ང་རོ། །མི་སྡུག་ཁ་ཆུ་ཛ་རེ་འབོད་ཚུལ་འདི་ཨི་གཟིགས། །མོས་གུས་ལག་པ་གཡོབ་པའི་གནས་ཚུལ་ནི་འདི་ལགས། །ཐུགས་རྗེའི་ཕྱག་ཡངས་རྐྱོངས་མཛོད་རྗེ་བཙུན་གྱི་བླ་མ། རྙེད་དཀའི་དལ་འབྱོར་ཐོབ་ཀྱང་སྙིང་པོ་ནི་མ་ལོན། །ཟབ་དགུའི་གདམས་ངག་ཐོས་ཀྱང་རང་རྒྱུད་ལ་མ་འབྱོར། །སྐབས་རེར་དགེ་བློ་སྐྱེས་ཀྱང་བར་ཆད་ཀྱི་རྐྱེན་མང་། །གཉེན་པོའི་སྒོ་ལྕགས་ཞིག་པའི་ཉམ་ཐག་ལ་དགོངས་ཤིག །རྒྱུ་འབྲས་ཁ་ལ་ཡོད་ཀྱང་ལག་ལེན་ལ་མི་འདུག །ཆོས་ཚུལ་ཕྱི་ནས་གཡོགས་ཀྱང་རང་རྒྱུད་ནི་ཐ་མལ། །མི་རྟག་མཆུ་སྒོར་འདོན་ཡང་ཞེ་གཏིང་ལ་མེད་པའི། །ཕྱི་ཚུལ་ཨ་སྨྲའི་འབྲས་འདྲའི་གཡོན་ཅན་ལ་གཟིགས་མཛོད། །དེ་རིང་འཆི་བར་ཤེས་ཀྱང་ལོ་བརྒྱ་ཡི་འདུག་ཆུས། །ནམ་ཕུག་ཕུང་པར་གོ་ཡང་ཚེ་འདི་ཡི་བྱ་གཞག །དོན་མེད་དགྲ་འདུལ་གཉེན་སྐྱོང་བྲེལ་གཡེང་གི་ངང་ནས། །མི་ཚེ་སྟོང་ཟད་མཁན་ལ་ཐུགས་རྗེ་ཡིས་གཟིགས་ཤིག །བྱས་བྱས་རྣམ་གྲངས་མང་ཡང་དོན་འབྲས་ནི་གཅིག་མེད། །སྒྲུབ་སྒྲུབ་སྣ་ཁ་མང་ཡང་སེམས་རྒྱུད་ནི་ཐ་མལ། །སྙན་སྙན་མི་ལ་བཤད་ཀྱང་རང་མདོ་ཡིས་སྟོར་བའི། །རང་མགོ་རང་གཡོགས་མཁན་ལ་ཐུགས་རྗེ་ཡིས་དགོངས་མཛོད། །མགོ་ལ་སྐྲ་དཀར་གཤིན་རྗེའི་ཕྲིན་པ་ནི་བསླེབས་ཟིན། །གདོང་ལ་དཔྲལ་རིས་འཆི་ལྟས་གྲིབ་སོ་ནི་ལམ་ལམ། །འཆི་བ་གློ་བུར་བསླེབས་ན་བློ་གདེང་ནི་མི་འདུག །རེ་ས་གཞན་ན་མེད་དོ་བླ་མ་རྗེ་མཁྱེན་ནོ། །སེམས་རྒྱུད་ཆོས་དང་འདྲེས་པའི་བྱིན་རླབས་ཤིག་སྩོལ་ཅིག །བཅོས་མིན་ངེས་འབྱུང་རླུང་གིས་ཤུགས་དྲག་ཏུ་བསྐུལ་བའི། །བརྩོན་འགྲུས་མེ་ཆེན་སྦར་བས་རྣམ་གཡེང་གི་ཚང་ཚིང་། །མ་ལུས་ཁམས་སུ་ཟོས་པའི་ངོ་མཚར་གྱི་གར་གྱིས། །འཇིག་ལྟའི་སྦྲུལ་ཚང་སྟོང་པའི་བྱིན་རླབས་ཤིག་སྩོལ་མཛོད། །གདམས་ཟབ་ཐོང་བཤོལ་སྟོང་གིས་བདག་འཛིན་གྱི་ཐ་བ། །དུལ་བྱས་གཞན་ཕན་བྱང་སེམས་ས་ལུ་ཡི་ས་བོན། །རྨད་བྱུང་རྒྱལ་སྲས་སྤྱོད་པའི་སྙེ་མ་རུ་འཁྲུངས་ཏེ། །དོན་གཉིས་འབྲས་ཁུར་ལྕི་བའི་དགའ་སྟོན་ལ་སྦྱོར་མཛོད། །དམ་གཙང་འཛིན་མའི་གཞི་ལས་དད་གསུམ་གྱི་སྐྱེ་ཤིང་། །དག་པ་རབ་འབྱམས་འཁོར་ལོའི་ཡལ་འདབ་ཀྱིས་མཛེས་ཚེ། །སྨིན་གྲོལ་བསྐྱེད་རྫོགས་ཟབ་མོའི་ལོ་འབྲས་ཀྱི་སྙིང་པོ། །རིག་འཛིན་རྣམ་བཞིར་སྨིན་པའི་སྐལ་བཟང་ལ་སྦྱོར་མཛོད། །ཡེ་ནས་བཅིངས་གྲོལ་མེད་པའི་ཀ་དག་གི་རིག་པ། །ཡིན་ལུགས་ཅོག་བཞག་དགོངས་པའི་རང་གནད་ལ་སྐྱེལ་ཚེ། །འཁྲུལ་རྟོག་སེམས་དང་སེམས་བྱུང་རྙོག་མ་ཡིས་བསླད་མིན། །གདོད་མའི་གྲོལ་ས་རྙོག་པའི་བྱིན་རླབས་ཤིག་སྩོལ་མཛོད། །མདོར་ན་འདི་ནས་བཟུང་སྟེ་བྱང་ཆུབ་ཀྱི་བར་དུ། །འབྲལ་མེད་ཡེ་ཤེས་གཟིགས་པས་བྱིན་གྱིས་རང་རློབས་ལ། །ཆོས་མིན་རྟོག་པ་རྒྱུན་ཆད་ཆོས་མཐུན་གྱི་བསམ་སྦྱོར། །གེགས་མེད་ཡོངས་གྲུབ་བཀྲ་ཤིས་དགའ་སྟོན་ནི་སྩོལ་ཅིག །ཅེས་པ་འདིའང་རང་དང་གཞན་གྱིས་ཀྱང་བསྐུལ་བའི་ངོར། བཙུན་ཆུང་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་རྩེ་གཅིག་གིས་གསོལ་བ་བཏབ་པའི་དགེ་བས་དཔལ་ལྡན་བླ་མའི་བྱིན་རླབས་རྒྱུད་ལ་འཇུག་པའི་རྒྱུར་གྱུར་ཅིག