བླ་མ་རྒྱང་འབོད་ཀྱི་གསོལ་འདེབས་མོས་གུས་སྙིང་གི་གཟེར་འདེབས་ཀྱི་ཞལ་སབ།
༄༅། །བླ་མ་རྒྱང་འབོད་ཀྱི་གསོལ་འདེབས་མོས་གུས་སྙིང་གི་གཟེར་འདེབས་ཀྱི་ཞལ་སབ་ནི། བསྟན་གཉིས་གཡུང་དྲུང་གླིང་པའི་རྗེས་སུ། མཆོག་གྱུར་བདེ་ཆེན་གླིང་པ་མཁྱེན་ནོ། །ཟུང་འཇུག་གྲུབ་པའི་ཀློང་ནས་གཟིགས་ཤིག །སྨིན་གྲོལ་བསྐྱེད་རྫོགས་ཟབ་མོའི་ལམ་ནས། །དོན་གཉིས་ལྷུན་གྱིས་འགྲུབ་པར་མཛོད་ཅིག །ཨོ་རྒྱན་ཆོས་ཀྱི་དབང་པོ་མཁྱེན་ནོ། །གཞན་ཕན་མཁའ་ཁྱབ་ཀློང་ནས་གཟིགས་ཤིག །རང་དོན་ཡིད་བྱེད་བློ་ངན་ཞི་ནས། །བྱང་ཆུབ་སེམས་མཆོག་འབྱོང་བར་མཛོད་ཅིག །མི་ཕམ་འཇམ་དབྱངས་རྣམ་རྒྱལ་མཁྱེན་ནོ། །ཤེས་བྱ་ཀུན་མཁྱེན་ཀློང་ནས་གཟིགས་ཤིག །ངེས་དོན་ཟབ་མོའི་དགོངས་དོན་རྟོགས་ནས། །གཟུངས་སྤོབས་བློ་གྲོས་སྒོ་འབྱེད་མཛོད་ཅིག །རྒྱལ་སྲས་བཀྲ་ཤིས་འོད་ཟེར་མཁྱེན་ནོ། །གཞན་ཕན་ཐུགས་རྗེའི་ཀློང་ནས་གཟིགས་ཤིག །བསླབ་གསུམ་སྦྱངས་ཡོན་མཐར་རུ་ ཕྱིན་ནས། །གཞན་ཕན་མཁའ་དང་མཉམ་པར་མཛོད་ཅིག །རིག་འཛིན་སྣ་ཚོགས་རང་གྲོལ་མཁྱེན་ནོ། །རིམ་གཉིས་ཟབ་མོའི་ཀློང་ནས་གཟིགས་ཤིག །རྩ་བ་ཡན་ལག་དམ་ཚིག་རྣམ་དག །དབང་བཞིའི་རྟོགས་པ་གོང་འཕེལ་མཛོད་ཅིག །གྲུབ་མཆོག་ཤཱཀྱ་ཤྲཱི་མཁྱེན་ནོ། །སྣང་བཞི་མཐར་ཕྱིན་ཀློང་ནས་གཟིགས་ཤིག །བླ་མ་སངས་རྒྱས་ཆོས་སྐུར་མཐོང་ནས། །དོན་བརྒྱུད་དགོངས་པ་འཕོ་བར་མཛོད་ཅིག །དྲིན་ཆེན་རྩ་བའི་བླ་མ་མཁྱེན་ནོ། །ཞེས་སོགས་གཞུང་དཀྱུས་ལྟར་རོ། །ཞེས་པའང་བླ་མ་སངས་རྒྱས་སུ་མཐོང་བའི་མོས་གུས་ཅན་དགེ་སློང་ཞིང་སྐྱོང་ལགས་ཀྱི་བཞེད་ངོར། སྐྱེ་ཀུན་བླ་མའི་བྲན་དུ་སྨོན་པ་གཞན་ཕན་ཆོས་ཀྱི་བློ་གྲོས་ཀྱིས་ཙ་འདྲ་རིན་ཆེན་བྲག་གི་མགུལ་འོག་མིན་བླ་མའི་གཟིམས་སྤྱིལ་དུ་བྲིས་ཤིང་གསོལ་བ་བཏབ་པ་དགེ། ༈ གཞན་ཡང་། ཀུན་བཟང་བསྟན་པའི་ཉི་མ་མཁྱེན་ནོ། །འབྲེལ་ཚད་དོན་ལྡན་ཀློང་ནས་གཟིགས་ཤིག །དད་དམ་མོས་གུས་མཐའ་རུ་ཕྱིན་ནས། །ཐུགས་ཡིད་དབྱེར་མེད་འདྲེས་པར་མཛོད་ཅིག །གཞན་ཕན་ཆོས་ཀྱི་བློ་གྲོས་མཁྱེན་ནོ། །བརྩེ་ཆེན་ཐུགས་རྗེས་ཀློང་ནས་གཟིགས་ཤིག །ཐུགས་བརྒྱུད་བྱིན་རླབས་འཕོ་བའི་དབང་གིས། །ཟོལ་མེད་ལྷག་བསམ་འབྱོར་པར་མཛོད་ཅིག །ཀུན་བཟང་གཞན་ཕན་བློ་གྲོས་མཁྱེན་ནོ། །འབྲལ་མེད་ཐུགས་རྗེ་ཆེན་པོས་གཟིགས་ཤིག །སྙིང་དབུས་དད་པའི་ཁྲི་ལ་བཞུགས་ནས། །རྟག་ཏུ་བདག་རྒྱུད་བྱིན་རློབས་མཛོད་ཅིག །འདི་ཡང་མོས་ལྡན་འགའ་ཡི་བཞེད་ངོར་བྲིས་པ་དགེ།
༈ རབ་འབྱམས་རྩ་གསུམ་རྒྱལ་བའི་ཡེ་ཤེས་འཕྲུལ། །སྙིགས་ལྔའི་རྒུད་པ་སྐྱོབ་མཛད་ཨོ་རྒྱན་རྗེ། །གང་དང་དབྱེར་མེད་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མི་རྟག་སྐྱོ་ཤས་ངེས་འབྱུང་གཏིང་ནས་འབྱོངས། །གཞན་ཕན་བྱང་ཆུབ་སེམས་ཀྱིས་གཞི་བཟུང་སྟེ། །རིམ་གཉིས་ལམ་ལ་བརྟན་པ་མཐར་ཕྱིན་ནས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཅེས་པའང་གནམ་མཚོ་དབུ་རྒན་ཚུལ་ཁྲིམས་བཞེད་ངོར་བི་ཛས་བྲིས་པ་དགེ།