རྒྱལ་ཀུན་འདུས་ཞལ་མཚོ་སྐྱེས་རྡོ་རྗེའི་རྣམ་ཐར་གསོལ་འདེབས་མོས་གུས་སྤྲིན་གྱི་རོལ་མོ།

༄༅། །རྒྱལ་ཀུན་འདུས་ཞལ་མཚོ་སྐྱེས་རྡོ་རྗེའི་རྣམ་ཐར་གསོལ་འདེབས་མོས་གུས་སྤྲིན་གྱི་རོལ་མོ་བཞུགས་སོ།། ༀ་སྭསྟི་པྲ་ཛཱབྷྱཿ བསྐལ་བཟང་སྒྲོན་མེ་བཞི་པ་ཤཱཀྱ་ཡི་སྲས་པོས། །རིམ་གསུམ་ཆོས་ཀྱི་བདུད་རྩི་གདུལ་ཞིང་ལ་དབབ་ནས། །ངེས་གསང་འབྲས་བུའི་ལོ་ཏོག་སྐྱེད་མཛད་ཀྱི་སྤྲུལ་སྐུར། །འབྱུང་འགྱུར་ལུང་གིས་བསྔགས་པའི་མཚོ་སྐྱེས་རྗེ་མཁྱེན་ནོ། །འགྲོ་བསོད་དགེ་བའི་སྐྱ་རེངས་ཁ་ལོ་ཡིས་བསྐུལ་བས། །འོད་མཚན་སྟོང་འབར་མགོན་གྱི་ཐུགས་རྗེ་ཡི་ཉིན་བྱེད། །སིནྡྷུའི་དྭངས་མཚོར་པདྨའི་གེ་སར་ལ་ཆགས་པས། །བརྫུས་སྐྱེས་ངོ་མཚར་མཚོ་སྐྱེས་རྡོ་རྗེ་དེ་མཁྱེན་ནོ། །ཨིཎྜ་བྷོ་དྷིའི་དད་བསོད་རྒྱལ་མཚན་གྱི་རྩེ་མོར། །ཉེ་བར་ཐོབ་པའི་རྒྱལ་སྲས་ཡིད་བཞིན་གྱི་ནོར་བུ། །བསྟན་འགྲོའི་དགེ་ལེགས་འདོད་དགུའི་གྲུ་ཆར་མཆོག་འབེབས་མཛད། །སྒྱུ་རྩལ་མཐར་ཕྱིན་རྒྱལ་བུ་ཐོར་ཅོག་ཅན་མཁྱེན་ནོ། །རིགས་ཀུན་བདག་པོ་བཛྲ་ས་ཏྭ་ཡིས་བསྐུལ་བཞིན། །ངེས་འབྱུང་བློ་ཡིས་རྒྱལ་སྲིད་ཐལ་བ་བཞིན་བོར་ནས། །བརྟུལ་ཞུགས་སྤྱོད་པས་འཇིགས་རུང་དུར་ཁྲོད་ཀུན་ཉུལ་མཛད། །མཁའ་འགྲོ་དབང་སྡུད་ཤཱནྟ་རཀྵི་ཏ་མཁྱེན་ནོ། །རྒྱལ་ཡུམ་ཝ་ར་ཧཱི་ལི་བྱིན་རླབས་ཀྱི་ཉི་གཞོན། །གང་ཐུགས་པདྨའི་ཚལ་ལ་ཆགས་པ་ཡི་རྐྱེན་ལས། །ལྟ་སྒོམ་སྤྱོད་འབྲས་ཟབ་མོའི་བདུད་རྩི་མཆོག་འཇོ་མཛད། །རྡོ་རྗེ་དྲག་པོ་རིག་འཛིན་རྩལ་འཆང་དེ་མཁྱེན་ནོ། །འོད་ཟེར་གླང་པོའི་ཞལ་ལུང་རྣལ་འབྱོར་གྱི་བདུད་རྩིས། །ཆེར་མྱོས་སྟོན་པའི་ཞམ་རིམ་མང་ཐོས་ཀྱི་མཆོག་གྱུར། །ཀུན་དགའ་བོ་ལས་རབ་བྱུང་བསླབ་གསུམ་གྱི་རྒྱལ་མཚན། །ཐུབ་དབང་གཉིས་པ་ཤཱཀྱ་སེང་གེ་དེ་མཁྱེན་ནོ། །འཕགས་ཡུལ་མཁས་ཚོགས་དྲི་བཟང་ཁང་པ་ཡི་ཚལ་ལས། །ཐུན་མོང་ཐུན་མིན་གཙུག་ལ་ཟིལ་དངར་གྱི་ཚོགས་རྣམས། །མ་ལུས་གཞིབ་པའི་བུང་བ་ཆོས་ཆེན་གྱི་དབྱངས་སྒྲོགས། །ཤེས་བྱ་ཀུན་མཁྱེན་བློ་ལྡན་མཆོག་སྲེད་དེ་མཁྱེན་ནོ། །གྲུབ་མཆོག་ཀླུ་དབང་སྟོང་ལས་གདམས་ཟབ་ཀྱི་ནོར་བུ། །མཐའ་དག་སུག་པར་སོན་པའི་རིག་འཛིན་གྱི་སྤྱི་རྗེ། །སྒྲུབ་པ་སྡེ་བརྒྱད་ཡི་དམ་ལྷ་ཚོགས་དང་དབྱེར་མེད། །འོད་ལུས་མངོན་རྫོགས་ཉི་མ་འོད་ཟེར་དེ་མཁྱེན་ནོ། །བདེ་སྐྱོང་ཌཱ་ཀིའི་གཙོ་བོ་མནྡ་ཡི་ར་བ། །ཚེ་ལམ་གསང་བའི་གྲོགས་བསྟེན་མཱ་ར་ནི་ཏི་ཀར། །འཆི་མེད་མགོན་པོས་བྱིན་རླབས་འཆི་བདག་གི་བདུད་བཅོམ། །རྡོ་རྗེའི་སྐུ་བརྙེས་པདྨ་འབྱུང་གནས་དེ་མཁྱེན་ནོ། །སྣ་ཚོགས་སྒྱུ་འཕྲུལ་བཀོད་པ་རྡོ་རྗེ་ཡི་ཆར་གྱིས། །མེ་ཆུ་དུག་མཚོན་འབྱུང་པོའི་གཡོ་སྦྱོར་གྱི་འབྲས་ཚོགས། །ལྷག་མེད་བཅོམ་པའི་གྲགས་སྙན་འབྲུག་སྒྲ་སྟོང་ལྡིར་བའི། །ངོ་མཚར་འཕྲུལ་ལྡན་པདྨ་སམ་བྷ་དེ་མཁྱེན་ནོ། །འཕུར་འགྲོའི་གླིང་གི་གདུལ་བྱའི་ཞིང་ས་ནི་གཤིན་པོར། །བཀའ་འདུས་ཆོས་ཀྱི་རྒྱ་མཚོའི་སྤྲིན་བཅུད་ཆེར་དབབ་པས། །རྣམ་གྲོལ་སྙེ་མ་སྐུ་བཞིའི་འབྲས་བཟང་དུ་སྨིན་མཛད། །རྒྱལ་སྲས་མཆོག་གྱུར་པདྨ་རྒྱལ་པོ་དེ་མཁྱེན་ནོ། །ལུང་རིགས་ཚད་མ་གསུམ་གྱི་སྒྲ་བརྒྱ་འབུམ་བསྒྲགས་པས། །ལྟ་བ་ངན་ཞེན་ངང་མོའི་ཀླད་རྒྱ་ཆེར་དབྲལ་ཏེ། །མཐུ་སྟོབས་གནམ་ལྕགས་ཐོག་གིས་ཕྱེ་མ་རུ་འཐག་མཛད། །ཏརྐའི་དཔུང་བཅོམ་སེང་གེ་སྒྲ་སྒྲོགས་དེ་མཁྱེན་ནོ། །ཡང་ལེ་ཤོད་ཀྱི་སྒྲུབ་གནས་གཡའ་རི་ཡི་ནགས་སུ། །ཕྱག་ཆེན་གྲུབ་པའི་རྩལ་རྫོགས་གདོང་ལྔ་ཡི་དབང་པོས། །ཀཱི་ལ་ཡ་ཡི་ང་རོས་ལོག་འདྲེན་གྱི་ཝ་ཚོགས། །ཟིལ་གནོན་དཔའ་བོ་རྡོ་རྗེ་ཐོད་ཕྲེང་རྩལ་མཁྱེན་ནོ། །འཇམ་མགོན་ཁྲི་སྡེའི་ཐུགས་བསྐྱེད་སྐྱ་རེངས་ཀྱིས་བསུས་པས། །གངས་ལྗོངས་འགྲོ་བའི་དད་བསོད་ལྷ་ལམ་དུ་ཤར་ཚེ། །འགལ་བྱེད་ལྷ་འདྲེའི་ཆོ་འཕྲུལ་བ་མོའི་ཚོགས་བཅོམ་ནས། །བདེ་སྐྱིད་དགེ་བཅུའི་པད་ཚལ་རྒྱས་མཛད་དེ་མཁྱེན་ནོ། །ཡོན་ཏན་བྱེ་བའི་སྣང་འབར་ཡིད་བཞིན་གྱི་ནོར་བུ། །ཆོས་རྒྱལ་དད་བསོད་རྒྱལ་མཚན་རྩེ་མོ་རུ་མཆོད་པས། །ཟན་ཡང་མི་འགྱུར་ལྷུན་གྲུབ་གཙུག་ལག་ཁང་འགྲུབ་སོགས། །དགེ་ལེགས་འདོད་དགུའི་གྲུ་ཆར་འབེབས་མཛད་དེ་མཁྱེན་ནོ། །མཁན་སློབ་ཆོས་རྒྱལ་སྤྲུལ་པའི་ལོ་པཎ་གྱི་ཚོགས་ཀྱིས། །འཕགས་ཡུལ་ཐུབ་བསྟན་ལུང་རྟོགས་རིན་ཆེན་གྱི་མཚོ་ཆེན། །བསིལ་ལྡན་འཛིན་མའི་གཞི་ལ་ལྷག་མེད་དུ་དྲངས་ཏེ། །བཤད་སྒྲུབ་ཆུ་གཏེར་སྤེལ་མཛད་དྲིན་ཆེན་དེ་མཁྱེན་ནོ། །གསང་ཆེན་རྡོ་རྗེ་རྩེ་མོའི་སྨིན་གྲོལ་གྱིས་བསྐྱངས་པས། །མ་རིག་གཟུང་འཛིན་འཁྲུལ་པའི་སྒོང་རྒྱ་ལས་གྲོལ་ཏེ། །གྲུབ་གཉིས་གཤོག་རྩལ་རྫོགས་པའི་མཁའ་ལྡིང་གི་དབང་པོ། །རྗེ་འབངས་སྐལ་ལྡན་འདུས་པའི་སྟོན་འཁོར་དེ་མཁྱེན་ནོ། །སྐལ་བཟང་རྣམ་འདྲེན་ལས་ལྷག་ཡོན་ཏན་གྱི་གོང་བུ། །ངོ་མཚར་བསམ་མི་ཁྱབ་པའི་རྫུ་འཕྲུལ་གྱི་བཀོད་པས། །མི་དང་མི་མིན་གདུལ་བྱ་སྨིན་གྲོལ་ལ་འགོད་མཛད། །རྣམ་ཐར་དཔག་ཡས་ཨོ་རྒྱན་བླ་མ་དེ་མཁྱེན་ནོ། །གངས་བྲག་རི་མཚོ་ཕལ་ཆེར་སྒྲུབ་གནས་སུ་བྱིན་རླབས། །ཆོས་ནོར་རྫས་ཀྱི་གཏེར་ཁ་གྲངས་མེད་དུ་སྦས་ནས། །སྡེ་བརྒྱད་དྲེགས་ཚོགས་དམ་བཏགས་གངས་ཅན་གྱི་བླ་མ། །བཀའ་དྲིན་འཁོར་མེད་རྡོ་རྗེ་གྲོ་ལོ་དེ་མཁྱེན་ནོ། །ལྷོ་ནུབ་རྔ་ཡབ་གླིང་ཕྲན་དཔལ་རི་ཡི་རྩེ་མོར། །རིག་འཛིན་མཁའ་འགྲོ་རྒྱ་མཚོའི་སྤྱི་རྗེ་རུ་བཞུགས་ནས། །གདུལ་དཀའི་སྲིན་པོ་འདུལ་མཛད་རྒྱལ་ཀུན་གྱི་ཞལ་ཚབ། །ལྷུན་གྱིས་གྲུབ་པའི་རིག་འཛིན་ཆེན་པོ་དེ་མཁྱེན་ནོ། །བོད་ལ་རྒྱུན་ཆད་མེད་པའི་ཐུགས་རྗེ་ཡིས་གཟིགས་ནས། །རྣམ་མང་སྤྲུལ་པའི་ཟློས་གར་འགོག་མེད་དུ་འཆར་བས། །ཟབ་གཏེར་སྒོ་འབྱེད་སྙིགས་ལྔའི་རྒུད་པ་ཀུན་བཅིལ་ནས། །བདེ་ལེགས་ཕན་བདེའི་སྒོ་འབྱེད་གུ་རུ་རྗེ་མཁྱེན་ནོ། །གསོལ་བ་སྙིང་ནས་འདེབས་སོ་ཨོ་རྒྱན་གྱི་མཁན་པོ། །ཐུགས་དམ་ཞལ་བཞེས་དགོངས་པའི་རྩལ་ཆེན་དེ་ཕྱུང་ནས། །རྡོ་རྗེའི་ཡེ་ཤེས་ཟབ་མོའི་དབང་མཆོག་དེ་བསྐུར་ལ། །དོན་གཉིས་ལྷུན་གྱིས་འགྲུབ་པའི་བྱིན་རླབས་ཤིག་སྩོལ་ཅིག །ཅེས་པའང་གྲགས་པའི་མཚོ་ཆེན་བཞིའི་ཡ་གྱལ། མ་ཧཱ་གུ་རུའི་ཕྱག་རྟགས་མངོན་དུ་གསལ་བའི་བྲག་གསུམ་ལྷ་ཡི་མཚོ་སྙིང་། ཟངས་མདོག་དཔལ་རིའི་ཕོ་བྲང་དུ། ཚོགས་ཀྱི་མཆོད་པ་དང་རྗེས་སུ་འབྲེལ་བར་གང་ཤར་གསོལ་བ་འདེབས་པ་པོ་ནི། གུ་རུའི་རྗེས་འཇུག་རྟགས་ཙམ་འཛིན་པ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོ་སྟེ། འདིས་ཀྱང་སྐྱེ་ཀུན་རྗེ་བཙུན་མ་ཧཱ་གུ་རུའི་བྱིན་རླབས་རྒྱུད་ལ་འཇུག་པའི་རྒྱུར་གྱུར་ཅིག། །།
༄༅། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། དཔལ་ལྡན་པདྨ་ལས་འཁྲུངས་རྫོགས་སངས་རྒྱས། །ཐེག་གསུམ་དམ་ཆོས་མ་ལུས་འབྱུང་བའི་གནས། །ཡིད་བཞིན་ནོར་ལྟར་འགྲོ་བའི་རེ་སྐོང་བ། །པདྨ་འབྱུང་གནས་ཞབས་ལ་གསོལ་བ་འདེབས། །མཁའ་དང་རབ་མཉམ་འགྱུར་མེད་རྡོ་རྗེའི་སྐུ། །ཕུལ་བྱུང་མཚན་དཔེའི་དཔལ་འབར་ལྷམ་མེ་བ། །དད་པ་ཅན་ངོར་གང་འདུལ་རོལ་གར་སྟོན། །ཤཱཀྱ་སེང་གེའི་ཞབས་ལ་གསོལ་བ་འདེབས། །དབྱངས་ཀྱི་ཡན་ལག་རྫོགས་པ་རྡོ་རྗེའི་གསུང་། །གདུལ་འགྲོའི་ཁམས་དབང་བསམ་པའི་རྗེས་འགྲོ་བས། །བསྒྲང་ཡས་ཐེག་པའི་སྒོ་འཕར་འབྱེད་པའི་དཔལ། །པདྨ་སམྦྷའི་ཞབས་ལ༴ སྒྲིབ་གཉིས་འཆིང་བའི་དྲི་བྲལ་རྡོ་རྗེའི་ཐུགས། །མཁྱེན་བརྩེའི་ཡེ་ཤེས་ལྷག་པར་རྒྱས་པའི་དཔལ། །མཁའ་དང་རབ་མཉམ་ཡོངས་ལ་བརྡལ་བ་ཆེ། །བློ་ལྡན་མཆོག་སྲེད་ཞབས་ལ༴ རབ་འབྱམས་ཕྱོགས་བཅུའི་རྒྱལ་བ་སྲས་བཅས་ཀྱི། །དཔག་ཡས་མཁྱེན་བརྩེ་ནུས་པའི་ཡོན་ཏན་འབུམ། །གཅིག་ཏུ་བསྡོམས་པའི་རང་མདངས་ལས་ཤར་མགོན། །པདྨ་རྒྱལ་པོའི་ཞབས་ལ༴ ཞི་རྒྱས་དབང་དྲག་ཕྲིན་ལས་རྣམ་པ་བཞིས། །མཁའ་མཉམ་འགྲོ་བའི་རེ་བ་རྫོགས་མཛད་པའི། །ཐུགས་རྗེའི་ཕྲིན་ལས་གཞན་ལས་མྱུར་བའི་མགོན། །ཉི་མ་འོད་ཟེར་ཞབས་ལ༴ བདུད་དང་མུ་སྟེགས་ལོག་འདྲེན་དམ་སྲིའི་དཔུང་། །ཕས་རྒོལ་གདུག་པའི་ཚོགས་རྣམས་ཚར་གཅོད་ཅིང་། །ངེས་གསང་བསྟན་འགྲོའི་ཕན་བདེ་སྤེལ་བའི་མགོན། །སེང་གེ་སྒྲ་སྒྲོགས་ཞབས་ལ༴ གངས་ལྗོངས་བླ་མའི་སྐལ་བ་གཅིག་པུ་ཉིད། །རྣམ་ཐར་བཀའ་དྲིན་གཞན་ལས་ཁྱད་འཕགས་པ། །དྲན་པས་སྲི་ཞིའི་འཇིགས་འཕྲོག་དྲིན་ཆེན་རྗེ། །རྡོ་རྗེ་གྲོ་ལོད་ཞབས་ལ༴ གསོལ་བ་འདེབས་སོ་གུ་རུ་སྤྲུལ་པའི་སྐུ། །གདུང་བས་འབོད་དོ་ཐུགས་རྗེའི་སྤྱན་གྱིས་གཟིགས། །ཐུགས་དམ་ཞལ་བཞེས་དགོངས་པའི་རྩལ་ཕྱུང་ལ། །མཆོག་ཐུན་དངོས་གྲུབ་མ་ལུས་དེང་སྩོལ་ཅིག །མ་ཧཱ་གུ་རུའི་རྡོ་རྗེའི་གསང་གསུམ་དང་། །བདག་གི་སྒོ་གསུམ་མཉམ་པ་ཉིད་གྱུར་ནས། །རྒྱལ་བའི་གདུང་འཚོབ་འགྲོ་བའི་མགོན་གྱུར་པའི། །རྡོ་རྗེའི་གསང་མཆོག་དེང་འདིར་འགྲུབ་གྱུར་ཅིག །ཅེས་པའང་ཤིང་ལུག་སྤྲེའུ་ཟླ་བའི་ཚེས་བཅུའི་ཉིན་གང་ཤར་ཤུགས་འབྱུང་དུ་གསོལ་བ་བཏབ་པ་པོ་ནི་པདྨ་དགྱེས་པ་ཕྱོགས་ལས་རྣམ་རྒྱལ་ཏེ་འདིས་ཀྱང་རང་གཞན་ཀུན་གྱི་རྒྱུད་ལ་མ་ཧཱ་གུ་རུའི་བྱིན་རླབས་རྩོལ་མེད་དུ་འདུག་པའི་རྒྱུ་གྱུར་ཅིག
༄༅། །ཀ་དག་སྤྲོས་པ་ཀུན་བྲལ་ཆོས་སྐུ་ཡི་ཀློང་ནས། །ལྷུན་གྲུབ་ངེས་པ་ལྔ་རྫོགས་ལོངས་སྐུ་ཡི་རོལ་པ། །རིག་རྩལ་མ་འགགས་གང་འདུལ་སྤྲུལ་སྐུ་རུ་ཤར་བའི། །སྐུ་གསུམ་འདུས་ཞལ་དྲིན་ཆེན་མཚོ་སྐྱེས་རྗེ་མཁྱེན་ནོ། །བྲལ་སྨིན་ཡོན་ཏན་འབུམ་ལྡན་ངེས་དོན་གྱི་སངས་རྒྱས། །ལུང་རྟོགས་ཐེག་དགུའི་འབྱུང་གནས་དམ་ཆོས་ཀྱི་གཏེར་མཛོད། །རིག་འཛིན་རྣམ་བཞི་མཐར་ཕྱིན་ཐེག་ཆེན་གྱི་དགེ་འདུན། །སྐྱབས་ཀུན་འདུས་ཞལ་དྲིན་ཆེན་མཚོ་སྐྱེས་རྗེ་མཁྱེན་ནོ། །བརྒྱུད་གསུམ་བླ་མའི་ངོ་བོ་རིག་འཛིན་གྱི་གཙོ་མཆོག །རིགས་རྣམས་སྤྲོ་བསྡུའི་བྱེད་པོ་ཧེ་རུ་ནི་ཀ་དཔལ། །མ་ཚོགས་ཌཱ་ཀིའི་ཚོགས་དཔོན་ཟླ་བྲལ་གྱི་དཔའ་བོ། །རྩ་གསུམ་འདུས་ཞལ་དྲིན་ཆེན༴ དྲི་མེད་པདྨའི་སྡོང་པོ་རང་བྱུང་གི་རྒྱལ་མཆོག །བརྟུལ་ཞུགས་ཕྱོགས་བྲལ་སྐྱོང་བ་གྲུབ་ཐོབ་ཀྱི་དབང་ཕྱུག །བསྟན་གཉིས་ཉི་ཟླ་གསལ་མཛད་ཟླ་མེད་ཀྱི་སྟོན་པ། །འཛམ་གླིང་མཛེས་པའི་རྒྱན་གྱུར་མཚོ་སྐྱེས༴ ནག་ཕྱོགས་བདུད་སྡེའི་དཔུང་བཅོམ་འཇིགས་མེད་ཀྱི་དཔའ་བོ། །གངས་ཅན་བོད་ན་རྣམ་ཐར་བཀའ་དྲིན་ནི་ཟླ་མེད། །སྙིགས་མའི་རྒུད་པ་སྐྱོབ་མཛད་ཨོ་རྒྱན་གྱི་མཁན་པོ། །སྣ་ཚོགས་མཚན་དང་བཀོད་ལྡན་མཚོ་སྐྱེས་རྗེ་མཁྱེན་ནོ། །གང་གི་བསམ་མི་ཁྱབ་པའི་ཡོན་ཏན་དང་བཀའ་དྲིན། །ཡང་ཡང་ཡིད་ལ་ཤར་བས་དད་མོས་ཀྱི་ཆུ་གཏེར། །དེང་འདིར་གཅིག་ཏུ་འཕེལ་བའི་རྒྱུ་རྐྱེན་གྱི་མཐུ་ལས། །གསོལ་འདེབས་གདུང་བའི་ང་རོས་ལྷང་ལྷང་དུ་འབོད་ན། །མཁྱེན་བརྩེའི་ཡེ་ཤེས་གཟིགས་པ་ཟླ་མེད་ཀྱི་དགོངས་ཏེ། །དེང་འདིར་མོས་ལྡན་བུ་ལ་བྱིན་གྱིས་རང་རློབས་ཤིག །རེ་ས་ཁྱེད་ལས་མེད་དོ་ཨོ་རྒྱན་གྱི་མཁན་པོ། །མི་མཐུན་འགལ་རྐྱེན་ཉེས་བརྒྱའི་གཡུལ་ངོ་ལས་རྒྱལ་ཏེ། །མཐུན་རྐྱེན་འདོད་དགུའི་དངོས་ཀུན་ཡིད་བཞིན་དུ་འགྲུབ་པས། །རང་གཞན་དོན་གཉིས་འགྲུབ་པའི་བྱིན་རླབས་ཤིག་སྩོལ་ཅིག །ཆོས་ཉིད་གཤིས་ཀྱི་གནས་ལུགས་གཡིད་དཔྱོད་དང་ཕྲལ་ཏེ། །མངོན་སུམ་སྙིང་པོའི་དོན་ལ་རྩོལ་མེད་དུ་གོམས་པས། །གང་ཤར་རྟོག་ཚོགས་སྦྲུལ་མདུད་རང་ས་རུ་གྲོལ་བཞིན། །ཀ་དག་གཏན་སྲིད་ཟིན་པའི་དངོས་གྲུབ་ཞིག་ཞུའོ། །ཅེས་པའང་གསེར་འཕྱང་གི་ལོ་སྤྲེལ་ཟླའི་ཚེས་བཅུའི་ཉིན་གུ་རུའི་སྒྲུབ་གནས་ཡོན་ཏན་གནས་ལྔ་འདུས་པའི་སྙིང་པོ་རྫོང་ཤོད་བདེ་གཤེགས་འདུས་པའི་གནས་ཀྱི་ལྟེ་བ་འོད་གསལ་རྡོ་རྗེ་ཐུགས་ཀྱི་རྫོང་དུ་གནས་འབྲེལ་ཚོགས་མཆོད་བགྱིས་པའི་སྐབས་པདྨ་བི་ཛས་གང་ཤར་ཐོལ་བྱུང་དུ་གསོལ་བ་བཏབ་པ་སྟེ། འདིས་ཀྱང་གུ་རུའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག
༈ སྐྱབས་དཀོན་མཆོག་རྩ་གསུམ་རྒྱ་མཚོ་ཡི་སྤྱི་གཟུགས། །བོད་གངས་ལྗོངས་བླ་མ་མཚོ་སྐྱེས་ཀྱི་རྡོ་རྗེ། །མཚན་དྲན་པས་སྲིད་ཞིའི་འཇིགས་པ་ཀུན་འཕྲོག་མཛད། །བདག་གསོལ་འདེབས་བུ་ལ་ཐུགས་རྗེ་ཡིས་གཟིགས་ཤིག །རྟེན་དལ་འབྱོར་རྫོགས་པའི་མི་ལུས་ནི་རིན་ཆེན། །སྔོན་བསོད་ནམས་བསགས་པས་ལན་གཅིག་ཏུ་རྙེད་ཀྱང་། །ཚེ་འདིར་སྣང་སྲིན་མོའི་འཇོ་སྒེག་གིས་བསླུས་བསླུས། །ཆོས་རྣམ་དག་སྒྲུབ་པའི་སྐལ་བ་ཡིས་ཕོངས་འདུག །ཕ་ཐུགས་རྗེས་གཟིགས་ཤིག་ཨོ་རྒྱན་གྱི་མཁན་པོ། །བུའི་བློ་སྣ་དམ་པའི་ཆོས་ཕྱོགས་སུ་དྲོངས་ཤིག །དུས་ནམ་ཞིག་འཆི་ངེས་ཡིད་ཡུལ་ན་ཡོད་ཀྱང་། །རྒྱུན་རིང་དུ་སྡོད་གྲབ་རྟག་འཛིན་གྱིས་བསླུས་བསླུས། །གཞོན་སོ་དཀར་ལང་ཚོ་དོན་མེད་དུ་ཡོལ་སོང་། །དགྲ་འཆི་བདག་བདུད་པོས་ནམ་ཟིན་ནི་མི་ཤེས། །ཕ་ཐུགས་རྗེས་གཟིགས༴ བུའི་འཁྲུལ་པའི་བློ་སྣ་བཙན་ཐབས་སུ་སྟུངས་མཛོད། །ལས་རྒྱུ་འབྲས་གོ་བ་ར་རི་ཞིག་ཡོད་ཀྱང་། །བློ་ལས་སུ་མ་རུང་སྙིགས་སྤྱོད་ཀྱི་ཡང་ཐ། །དོན་བླང་དོར་ཚུལ་ལ་ལག་ལེན་ནི་འཛོལ་བས། །སྔར་བྱས་པ་དོན་མེད་སྡིག་སྡུག་གི་རང་བཞིན། །ཕ་ཐུགས་རྗེས་གཟིགས་ཤིག༴ ལམ་ལོག་པར་མ་བཏང་ཐུགས་རྗེ་ཡིས་ཟུངས་མཛོད། །ཚུལ་འཁོར་བའི་འཁྲུལ་སྣང་སྡུག་བསྔལ་གྱི་ཡོ་ལང་། །ཚིག་ཙམ་དུ་མ་ཡིན་རང་ཐོག་ཏུ་ཁེལ་ཀྱང་། །ཞེ་གཏིང་ནས་མི་འགྱུར་འདིར་སྣང་ལ་ཞེན་པས། །ལས་ཅི་བྱེད་ཚེ་འདིའི་འདུན་མ་རུ་ཤོར་འདུག །ཕ་ཐུགས་རྗེ༴ ལམ་དམན་པར་མ་བཏང་ཐུགས་རྗེ་ཡིས་ཟུངས་མཛོད། །སྐྱབས་མཆོག་གསུམ་བརྟེན་ཡང་ཡིད་ཆེས་ཀྱི་གདེང་ཞན། །ལམ་ཐེག་ཆེན་ཞུགས་ཀྱང་གཞན་ཕན་གྱི་རྩིས་བཏང་། །རྒྱུད་སྡོམ་གསུམ་ནོད་ཀྱང་ངོ་ལྐོག་གི་ཚུལ་འཆོས། །སེམས་ཉོན་མོངས་མ་ཞི་ཆོས་པ་རུ་རློམ་འདུག །ཕ་ཐུགས་རྗེས༴ རྒྱུད་སྨིན་ཅིང་གྲོལ་བའི་བྱིན་རླབས་ཤིག་སྩོལ་ཤོག །གཞི་སྟོང་དང་སྙིང་རྗེ་ཟུང་འབྲེལ་གྱི་མཁའ་ལ། །ལམ་ཚོགས་གཉིས་སྤྱོད་པའི་འདབ་གཤོག་དེ་བརྐྱངས་ནས། །འབྲས་སྐུ་བཞི་ལྷུན་གྲུབ་ཚང་མལ་དུ་སྙོག་པའི། །ཕ་ཁྱུང་ཆེན་རྒྱལ་པོའི་བརྟུལ་ཞུགས་དང་སྤྲོད་ཅིག །ཞེ་གཏིང་ནས་འབྱུང་བའི་སྨྲེ་སྔགས་ཀྱི་འོ་དོད། །ངག་མགྲིན་པའི་རྒྱུད་ནས་ལྷང་ལྷང་དུ་འབོད་ན། །ཕ་ཐུགས་བརྩེའི་གཏེར་ཆེན་བཏང་སྙོམས་སུ་མ་བཞུགས། །བུའི་དོན་གཉིས་འགྲུབ་པའི་བྱིན་རླབས་ཤིག་སྩོལ་ཤོག །ཅེས་པ་འདིའང་དུས་བཟང་ཚེས་བཅུའི་ཉིན་སྤྲུལ་མིང་པད་རྣམ་མིང་གིས་གདུང་ཤུགས་དྲག་པོས་གསོལ་བ་བཏབ་པ་སིདྡྷི་རསྟུ།
༈ རྣམ་ཀུན་མཆོག་ལྡན་སྟོང་ཆེན་ཆོས་སྐུའི་རྩལ། །ངེས་པ་ལྔ་ལྡན་ལོངས་སྤྱོད་རྫོགས་སྐུའི་འཕྲུལ། །མཁྱེན་པ་གཉིས་ལྡན་སྤྲུལ་སྐུར་ཡོངས་ཤར་བའི། །མཚོ་སྐྱེས་རྡོ་རྗེ་འཆང་ལ་གསོལ་བ་འདེབས། །རབ་འབྱམས་རྒྱལ་ཀུན་འདུས་པའི་སྤྱི་དཔལ་མཆོག །ལུང་རྟོགས་ཐེག་གསུམ་དམ་ཆོས་འབྱུང་བའི་གནས། །བསྟན་འཛིན་དགེ་འདུན་བྱེ་བའི་གཙུག་ནོར་ཆེ། །མཚོ་སྐྱེས༴ བརྒྱུད་གསུམ་རིག་འཛིན་བླ་མའི་རྣམ་རོལ་གར། །ཡི་དམ་ཞི་དང་ཁྲོ་བོའི་ཁྱབ་བདག་ཆེ། །མ་ཚོགས་ཌཱ་ཀི་འབུམ་གྱི་ཚོགས་དཔོན་མཆོག །མཚོ་སྐྱེས༴ བགྲེས {བསྒྲེས་འདིའི་རིགས་འདི་ལྟར་ཞུས། }རྒུད་འཕོ་འགྱུར་བྲལ་བ་རྡོ་རྗེའི་སྐུ། །མཚན་དཔེ་ཉིན་བྱེད་སྟོང་གིས་འཁྱུད་པ་ཡིས། །སྲིད་མཐའི་བར་དུ་འགྲོ་ཀུན་སྐྱོབ་པའི་མགོན། །མཚོ་སྐྱེས༴ གཞོམ་མེད་ཡན་ལག་དྲུག་ཅུའི་གསུང་དབྱངས་ཀྱིས། །རིས་སུ་མ་ཆད་གདུལ་བྱ་རྗེས་འཛིན་ཕྱིར། །ཟབ་རྒྱས་ཐེག་མཆོག་ཆོས་འཁོར་བསྐོར་མཛད་པའི། །མཚོ་སྐྱེས༴ ནམ་མཁའ་བཞིན་ཏུ་མཁྱེན་རབ་ཕ་མཐའ་བྲལ། །མུ་མེད་འགྲོ་ལ་ཐུགས་བརྩེས་བུ་བཞིན་དགོངས། །ཇི་སྙེད་རྒྱལ་བའི་མཛད་པ་བདག་གིར་བཞེས། །མཚོ་སྐྱེས༴ ཡིད་བཞིན་ནོར་ལྟར་འགྲོ་བའི་རེ་སྐོང་ཞིང་། །སྐད་ཅིག་དྲན་པས་བྱང་ཆུབ་མྱུ་གུ་བསྐྱེད། །ཡ་མཚན་རྨད་བྱུང་དུས་གསུམ་གཤེགས་པའི་འཕྲུལ། །མཚོ་སྐྱེས༴ རྒྱ་མཚོའི་རླབས་བཞིན་དུས་ལས་ཡོལ་མེད་པའི། །ཞི་རྒྱས་དབང་དྲག་གང་ལ་གང་འདུལ་གྱིས། །འགྲོ་བ་སྒྲོལ་བའི་ཕྲིན་ལས་དཔག་ཡས་པ། །མཚོ་སྐྱེས༴ ཕ་དང་མ་མེད་པད་སྡོང་རྩེ་ལས་འཁྲུངས། །འཕགས་བོད་ཀུན་ཏུ་རྒྱལ་བ་གཉིས་པར་གྱུར། །གདུལ་དཀའ་རྨུ་རྒོད་སྲིན་པོའི་ཁ་གནོན་མཛད། །མཚོ་སྐྱེས༴ གང་འདུལ་མོས་ངོར་ཐོད་ཕྲེང་སྡེ་ལྔ་དང་། །གུ་རུ་མཚན་བརྒྱད་འཕྲུལ་ཚན་ཉེར་ལྔ་སོགས། །བསམ་ཡས་སྒྱུ་འཕྲུལ་དྲྭ་བའི་རྣམ་རོལ་ཆེ། །མཚོ་སྐྱེས༴ གསོལ་བ་འདེབས་སོ་གུ་རུ་ཆོས་ཀྱི་རྗེ། །ཐུགས་རྗེས་གཟིགས་ཤིག་པདྨ་ཐོད་ཕྲེང་རྩལ། །བྱིན་གྱིས་རློབས་ཤིག་རིག་འཛིན་པདྨ་འབྱུང་། །དངོས་གྲུབ་སྩོལ་ཅིག་སྤྲུལ་སྐུ་པདྨ་རྒྱལ། །བདག་སོགས་དུས་ངན་སྙིགས་མའི་འགྲོ་རྣམས་ལ། །མགོན་པོ་ཁྱེད་ལས་སྐྱབས་གཞན་མ་མཆིས་པས། །རྨད་བྱུང་ཡེ་ཤེས་གཟིགས་པས་རྗེས་དགོངས་ལ། །འཇིགས་དང་སྡུག་བསྔལ་ཀུན་ལས་བསྐྱབ་ཏུ་གསོལ། །ཆོས་མཐུན་བསམ་སྦྱོར་གེགས་མེད་ཡོངས་འགྲུབ་ཅིང་། །འོད་གསལ་རྫོགས་པ་ཆེན་པོའི་དོན་རྟོགས་ནས། །མགོན་པོ་ཁྱེད་དང་རྣམ་ཐར་མཚུངས་པ་ཡིས། །འགྲོ་ཀུན་སྲིད་པའི་མཚོ་ལས་སྒྲོལ་བྱེད་ཤོག །ཅེས་པའང་རྨོངས་བཙུན་པདྨ་རྣམ་རྒྱལ་གྱིས་ཆུ་འབྲུག་ཁྲུམས་ཟླའི་ཚེས་བཅུའི་ཉིན་རྫོང་ཤོད་བདེ་གཤེགས་འདུས་པའི་སྒྲུབ་གནས་ཆེན་པོར་རྩེ་གཅིག་གུས་པས་གསོལ་བ་བཏབ་པ་སྟེ། འདིས་ཀྱང་སྐྱེ་ཀུན་ཐོད་ཕྲེང་རྩལ་གྱིས་རྗེས་སུ་བཟུང་བའི་རྒྱུར་གྱུར་ཅིག
༄༅། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ངོ་བོ་ཀ་དག་སྤྲོས་པ་བྲལ་བའི་ཀློང་། །ལྷུན་གྲུབ་ནང་གསལ་གཞོན་ནུ་བུམ་པའི་སྐུ། །ཆོས་སྐུའི་སྟོན་མཆོག་པདྨ་ཀུན་ཏུ་འཆང་། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །འབྱུང་བཞིའི་གཡོ་འཁྲུགས་གནོད་བྱེད་ཕྱི་ཡི་དགྲ །རྩ་རླུང་ཐིག་ལེའི་གེགས་ཆག་ནང་གི་གདོན། །གཟུང་འཛིན་སེམས་ཀྱི་རྟོག་ཚོགས་གསང་བའི་བདུད། །ཐམས་ཅད་ཀ་དག་ཆོས་དབྱིངས་ཀློང་དུ་བཟློག །ༀ་ཨཱཿཧཱུྃ༴ རང་སྣང་ལྷུན་གྲུབ་འོད་གསལ་ཞིང་ཁམས་སུ། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །བདེ་བ་ཆེན་པོ་པདྨ་བཛྲ་རྩལ། །གསོལ་བ་འདེབས༴ འབྱུང་བཞིའི་གཡོ༴ རྩ་རླུང་ཐིག༴ གཟུང་འཛིན་སེམས༴ ཐམས་ཅད་ཀ་དག༴ ༀ་ཨཱཿཧཱུྃ༴ རིག་རྩལ་མ་འགགས་གང་འདུལ་སྤྲུལ་པའི་སྐུ། །འདུལ་བ་བཞི་ཡི་ཕྲིན་ལས་བསམ་མི་ཁྱབ། །སྣང་སྲིད་དབང་སྡུད་པདྨ་རྒྱལ་བོའི་ཞབས། །གསོལ་བ་འདེབས༴ འབྱུང་བཞིའི་གཡོ༴ རྩ་རླུང་ཐིག༴ གཟུང་འཛིན་སེམས༴ ཐམས་ཅད་ཀ་དག༴ ༀ་ཨཱཿཧཱུྃ༴ དགོངས་བརྡ་སྙན་བརྒྱུད་བླ་མའི་ཚོགས་རྣམས་ཀྱི། །ཡེ་ཤེས་གཅིག་ཏུ་བསྡོམས་པའི་སྤྱི་དཔལ་མཆོག །ལྷུན་གྲུབ་རིག་འཛིན་པདྨ་ཐོད་ཕྲེང་རྩལ། །གསོལ་བ་འདེབས༴ འབྱུང་བཞིའི༴ རྩ་རླུང་ཐིག་ལེ༴ གཟུང་འཛིན༴ ཐམས་ཅད་ཀ་དག༴ ༀ་ཨཱཿཧཱུྃ༴ ཡེ་ཤེས་ཀློང་དགུའི་རོལ་རྩལ་འགགས་མེད་ལས། །འདས་དང་མ་འདས་ཆ་སྙོམས་ཚོམ་བུ་དགུའི། །དཀྱིལ་འཁོར་སྤྲོ་བསྡུའི་བྱེད་པོ་པདྨ་འབྱུང་། །གསོལ་བ་འདེབས༴ འབྱུང་བཞིའི༴ རྩ་རླུང་༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ རྩ་རླུང་ཐིག་ལེའི་རང་བཞིན་གནས་དག་པའི༴ ལྷན་སྐྱེས་ཞིང་སྔགས་དཔའ་བོའི་མཁའ་འགྲོའི་སྤྲིན། །འབུམ་ཕྲག་ཡངས་པའི་ཚོགས་དཔོན་ཧེ་རུ་ཀཿ། །གསོལ་བ་འདེབས༴ འབྱུང་བཞིའི༴ རྩ་རླུང་ཐིག༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ དཔལ་ལྡན་པདྨ་ལས་འཁྲུངས་རྫོགས་སངས་རྒྱས། །མཐའ་ཀླས་གདུལ་དཀའ་འདུལ་བའི་ཕྲིན་ལས་ཅན། །གངས་ཅན་བོད་ཀྱི་སྐྱབས་གཅིག་རྡོ་རྗེ་འཆང་། །གསོལ་བ་འདེབས༴ འབྱུང་བཞིའི༴ རྩ་རླུང་༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ ཐེག་གསུམ་དམ་ཆོས་མ་ལུས་འབྱུང་བའི་དབྱིངས། །ཡིད་བཞིན་ནོར་ལྟར་འགྲོ་བའི་རེ་སྐོང་བའི། །རྣམ་ཐར་བཀའ་དྲིན་འགྲན་བྲལ་མཚོ་སྐྱེས་རྗེར། །གསོལ་བ་འདེབས༴ འབྱུང་བཞིའི༴ རྩ་རླུང་༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ ཐེག་གསུམ་དགེ་འདུན་འདུས་པའི་གཙུག་རྒྱན་ཆེ། །འཕགས་བོད་ཀུན་ཏུ་བསྟན་པའི་སྒྲོན་མེ་སྦར། །རྡོ་རྗེའི་སྐུ་བརྙེས་གུ་རུ་ཨོ་རྒྱན་རྗེར། །གསོལ་བ་འདེབས༴ འབྱུང་བཞིའི༴ རྩ་རླུང་༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ སྐྱབས་ཀུན་འདུས་ཞལ་དྲིན་ཆེན་སྤྲུལ་པའི་སྐུ། །གངས་ལྗོངས་བླ་མའི་སྐལ་བ་གྲོ་བོ་ལོད། །སྙིགས་ལྔའི་རྒུད་པ་སྐྱོབ་པའི་ཐུགས་རྗེ་ཅན། །གསོལ་བ་འདེབས༴ འབྱུང་བཞིའི༴ རྩ་རླུང༴ གཟུང་འཛིན༴ ཐམས་ཅད༴ ༀ་ཨཱཿཧཱུྃ༴ ཉམ་ཐག་འགྲོ་བའི་སྐྱབས་གཅིག་པད་འབྱུང་རྗེར། །མི་ཕྱེད་སྙིང་ནས་གུས་པས་གསོལ་འདེབས་ན། །ཐུགས་དམ་ཞལ་བཞེས་དགོངས་པའི་རྩལ་ཕྱུང་ལ། །དབང་བསྐུར་བྱིན་རློབས་མཆོག་ཐུན་དངོས་གྲུབ་སྩོལ། །འབྱུང་བཞིའི་གཡོ་འཁྲུགས་གནོད་བྱེད་ཕྱི་ཡི་དགྲ། །རྩ་རླུང་ཐིག་ལེའི་གེགས་ཆག་ནང་གི་གདོན། །གཟུང་འཛིན་སེམས་གྱི་རྟོག་ཚོགས་གསང་བའི་བདུད། །ཐམས་ཅད་ཀ་དག་ཆོས་དབྱིངས་ཀློང་དུ་བཟློག །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྣོད་བཅུད་རྒུད་ཞི་ཚེ་དཔལ་འབྱོར་དྲུག་རྒྱས། །རྒྱལ་བའི་བསྟན་དར་བསྟན་འཛིན་ཞབས་པད་བརྟན། །དགེ་འདུན་སྡེ་འཕེལ་བཤད་སྒྲུབ་ཕྲིན་ལས་ཀྱིས། །རང་གཞན་དོན་གཉིས་འགྲུབ་པའི་བཀྲ་ཤིས་ཤོག །ཅེས་ཨོ་རྒྱན་རིན་པོ་ཆེའི་ཐུགས་དམ་གནད་ནས་བསྐུལ་བའི་གསོལ་འདེབས་བར་ཆད་རྐྱེན་བཟློག་འདིའང་ཕྱི་ནང་གི་རྟགས་མཚན་ཅུང་ཟད་འཁྲུགས་པ་ལ་བརྟེན་ནས་མེ་སྤྲེལ་རྒྱལ་ཟླའི་ཚེས་བཅུའི་ནུབ་བཙུན་ཆུང་པདྨ་བི་ཛས་གང་ཤར་ཤུགས་འབྱུང་དུ་བྲིས་པ་སྟེ་འདིས་ཀྱང་འགྲོ་ཀུན་བདུད་བཞིའི་གཡུལ་ལས་རྣམ་པར་རྒྱལ་བའི་རྒྱུར་གྱུར་ཅིག