མཚོ་སྐྱེས་རྒྱལ་བ་གཉིས་པའི་ཐུགས་དམ་གནད་བསྐུལ་གྱི་གསོལ་འདེབས་མཆོག་བྱིན་འགུགས་པའི་ལྕགས་ཀྱུ།

༄༅། །མཚོ་སྐྱེས་རྒྱལ་བ་གཉིས་པའི་ཐུགས་དམ་གནད་བསྐུལ་གྱི་གསོལ་འདེབས་མཆོག་བྱིན་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ།། ན་མོ་པདྨ་ཀ་རཱ་ཡཻ། ཡེ་ཤེས་ཆེན་པོས་སྲིད་ཞིའི་ཆོས་ཀུན་ཁྱབ། །སྙིང་རྗེ་ཆེན་པོས་འཁོར་མཐའ་དོང་ནས་སྤྲུགས། །ནུས་མཐུ་ཆེན་པོས་སྙིགས་ལྔའི་རྒུད་པ་སྐྱོབ། །བདེ་བ་ཆེན་པོ་པདྨའི་ཞབས་ལ་འདུད། །ཁྱོད་ནི་རང་བྱུང་ཡེ་ཤེས་འདུས་མ་བྱས། །ཆ་མེད་ཀུན་འགྲོ་ཁྱབ་པའི་བདག་ཆེན་པོས། །འཁོར་འདས་ཆོས་ཀུན་མ་བཅིངས་ཡོངས་མི་མངའ། །རྣམ་ཐར་བསམ་མི་ཁྱབ་ལ་སུ་མི་རང་། །ཕྱི་ལྟར་རང་བྱུང་སྤྲུལ་སྐུའི་ཆ་ལུགས་འཆང་། །ནང་དུ་ཁ་སྦྱོར་བདུན་ལྡན་བདེ་བ་ཆེ། །གསང་བ་ཡེ་གྲོལ་གདོད་མའི་རྒྱལ་ཐབས་འཛིན། །སྐུ་གསུམ་དབྱེར་མེད་ཁྱོད་འདྲ་སྲིད་ན་སུ། །བྱིན་རླབས་ཆར་ཆེན་འབེབས་བྱེད་གུ་རུ་རྗེ། །གྲུབ་གཉིས་འདོད་དགུར་སྦྱིན་པའི་ཡི་དམ་དབང་། །བདེ་ཆེན་ཡེ་ཤེས་སྐྱེད་བྱེད་ཌཱ་ཀིའི་གཙོ། །རྩ་གསུམ་འདུས་ཞལ་མཆོག་ཁྱོད་སྙིང་ནས་དྲན། །རིག་འཛིན་བྱེ་བའི་གཙུག་གི་རྒྱན་གཅིག་པུ། །ཟབ་རྒྱས་ཐེག་པའི་སྒོ་འཕར་འབྱེད་པའི་གཉེན། །སྤངས་རྟོགས་མཐར་ཕྱིན་དོན་གྱི་སངས་རྒྱས་དངོས། །སྐྱབས་གསུམ་ཡོངས་འདུས་ཁྱོད་མིན་སྐྱབས་གཞན་སུ། །འགྲོ་དྲུག་འདུལ་ཕྱིར་རིག་པའི་སྐྱེས་བུ་དྲུག །མི་མཇེད་ཞིང་ན་རྣམ་འཕྲུལ་བྱེ་བ་བརྒྱ། །གླིང་འདིར་འཕྲུལ་ཚན་ཉི་ཤུ་མཚན་མཆོག་བརྒྱད། །བསམ་ཡས་སྒྱུ་འཕྲུལ་དྲྭ་བའི་རོལ་རྩེད་ངོམ། །སྐྱེ་འཆི་གཉིས་སྤངས་རྡོ་རྗེ་ལྟ་བུའི་སྐུ། །རྣམ་ཐར་དཔག་ཡས་ཆོས་དབྱིངས་ཁྱབ་པར་དཀྲིགས། །གདུལ་དཀའི་འགྲོ་བ་འདུལ་བའི་གཡར་དམ་ཅན། །ཁྱོད་འདྲའི་སྟོན་པ་དུས་གསུམ་འབྱོན་པར་དཀའ། །སྣང་མུན་དུས་དྲུག་བོད་ཀྱི་གདུལ་བྱར་དགོངས། །དད་ལྡན་མི་རེའི་མདུན་ན་རྣམ་འཕྲུལ་རེ། །སྐལ་བ་ཅན་ལ་དངོས་སུ་ཞལ་ཡང་སྟོན། །བཀའ་དྲིན་འཁོར་མེད་མ་ཧཱ་གུ་རུ་མཁྱེན། །སྔར་ཡང་སྐུ་དྲིན་ཆེ་འོ་མཚོ་སྐྱེས་རྗེ། །ད་ཡང་ཐུགས་རྗེ་གཟིགས་ཤིག་པདྨ་འབྱུང་། །རེ་ས་གཞན་ན་མེད་དོ་ཐུགས་རྗེ་ཅན། །ཐུགས་དམ་གནད་ནས་བསྐུལ་ལོ་བརྩེ་བས་དགོངས། །ལྗོངས་འདིར་གོམ་འགྲོས་འཁྱོལ་བའི་བྱིས་པ་ཡན། །ཕ་གཅིག་ཁྱོད་ལ་སྙིང་ནས་འབོད་བྱེད་ན། །མེ་ཡིས་བཀླུབས་པའི་བུ་ལ་མ་བཞིན་དུ། །ཐུགས་རྗེ་ལྷག་པར་དགོངས་ཤིག་དྲིན་ཆེན་རྗེ། །ཕྱོགས་རྣམས་ཐམས་ཅད་མཚོན་ཆ་གདེངས་པས་བསྐོར། །འབྲོས་པའི་ལམ་མེད་ལྡང་བའི་སྟོབས་ཀྱང་ཞན། །ཀྱི་ཧུད་མཐའ་ལ་སྐྱུར་བའི་རི་དྭགས་བཞིན། །སྙིང་རྗེ་ཅན་ཁྱོད་བརྩེ་བར་མི་མཛད་དམ། །བཅད་གཏུབ་འབིགས་གཤོག་དམྱལ་བའི་སེམས་ཅན་བཞིན། །བཀྲེས་པས་ཉམ་ཐག་ཡི་དྭགས་ལྟ་བུའི་ལུས། །བཀོལ་སྤྱད་བརྡེག་འཚོག་དུད་འགྲོའི་འགྲོ་བ་དངོས། །ཉམ་ང་འདི་ལས་སྐྱོབ་པར་མི་མཛད་དམ། །བསྟན་འགྲོའི་བདེ་སྐྱིད་འཆི་ཁའི་ནད་པ་བཞིན། །མི་མཐུན་འགལ་རྐྱེན་ལྷོ་སྤྲིན་བཞིན་དུ་འཚུབ། །ཁྱོད་ཀྱི་རྗེས་འཇུག་རྒུད་པའི་དུས་ལ་བབས། །སྐྱབས་མེད་བདག་ལ་རེ་ས་ཁྱེད་ལས་སུ། །ལས་ངན་དབང་གིས་ཁྱོད་ལ་གསོལ་འདེབས་ཀྱི། །ལས་ཟད་ན་ནི་ཁྱོད་ལ་གསོལ་ཅི་འཚལ། །དེ་སླད་གློག་ལྟར་མྱུར་བའི་ཐུགས་རྗེ་ཡིས། །ཉམ་ངའི་གནས་ལས་ད་ལྟ་ཉིད་དུ་སྐྱོབས། །ཉིན་བསམ་མཚན་བསམ་པད་འབྱུང་ཁྱོད་ཉིད་དྲན། །གསོལ་འདེབས་གདུང་བའི་རྒྱང་གླུ་དེ་ཙམ་བླངས། །ཐུགས་རྗེའི་ཁྱད་པར་ལྔ་ལྡན་བླ་མ་དེས། །ད་ནི་ཐུགས་རྗེའི་ཞགས་པས་འཛིན་རན་ལགས། །དངོས་སུ་མཇལ་བའི་སྐལ་བས་ཕོངས་ནའང་། །ཉམས་རྨིས་ཚུལ་དུ་ཞལ་གཟིགས་ལུང་སྟོན་སྩོལ། །སྤྲང་པོའི་ལེགས་ཉེས་སྐྱིད་སྡུག་ཁྱེར་རང་མཁྱེན། །དབང་བཅུའི་གྲིབ་མ་སྣུམ་པོར་ངལ་འཚོ་བྱིན། །རྒྱལ་ཁམས་ཀུན་ཏུ་ནད་མུག་མཚོན་འཁྲུགས་ཞི། །ལོ་ལེགས་སྐྱ་རྒྱལ་མི་ཤིས་སྒྲ་མི་གྲགས། །དགེ་ལེགས་བསམ་པ་ཡིད་བཞིན་འགྲུབ་པ་དང་། །བྱམས་དང་སྙིང་རྗེ་ཤེས་རྒྱུད་བརླན་པར་མཛོད། །ཁྱད་པར་བདག་དང་བདག་ལ་ལྟོས་པའི་འགྲོ། །སྐྱེ་ཀུན་ལུས་སེམས་རྡོ་རྗེ་ལྟ་བུར་བརྟན། བདུད་དགྲའི་འཚེ་བྲལ་རང་དབང་ཆོས་ལ་སྤྱོད། །ཐེག་ཆེན་ལམ་གྱི་རྟེན་འབྲེལ་མཐའ་དག་སྒྲིགས། །ཡེ་ཤེས་ཉི་མས་མ་རིག་མུན་པ་སོལ། །སྙིང་རྗེའི་ཆུ་བོས་དུག་ལྔའི་མེ་དཔུང་གཞིལ། །བྱིན་རླབས་བདུད་རྩིས་སྙིང་གི་བུམ་པ་འགེངས། །ལམ་ལྔའི་ཡོན་ཏན་ཉིན་བཞིན་གོང་འཕེལ་བྱོས། །སྟོབས་བཅུའི་སྟོབས་ཀྱིས་མི་མཐུན་གཡུལ་ལས་རྒྱལ། །དབང་བཅུའི་དཔུང་པས་མཁའ་ཁྱབ་འགྲོ་ཀུན་སྲུངས། །ཕྱིན་བཅུའི་མེ་འབྲས་གདུལ་བྱའི་ཞིང་སར་བསྐྲུན། །ཁྱོད་ཀྱི་རྣམ་ཐར་རྒྱ་མཚོར་འཇུག་བྱིན་རློབས། །མདོར་ན་འདི་ནས་ཚེ་རབས་ཕྲེང་བ་རུ། །གུ་རུ་པདྨ་དགྱེས་པའི་བྲན་གྱུར་ཏེ། །སྐྱེ་འཆི་བར་དོར་སྡུག་བསྔལ་སྒྲ་མི་གྲགས། །རང་གཞན་དོན་གཉིས་འགྲུབ་པའི་དཔལ་སྩོལ་ཅིག །རྒྱལ་བསྟན་སྤྱི་དང་ཁྱད་པར་སྔ་འགྱུར་སྲོག །ཞིང་འདིའི་གདུལ་བྱའི་དཔལ་ལས་སྲིད་མཐར་ཡང་། །ཉམས་མེད་མཁས་བཙུན་གྲུབ་པའི་ཚང་རྡོལ་ནས། །གྲོལ་བ་དྲུག་གི་ཕྲིན་ལས་རྟག་ཁྱབ་མཛོད། །བཀྲ་ཤིས་ཉི་མ་ཕན་བདེའི་འོད་པོ་ཆེ། །གུ་རུ་པདྨའི་ཐུགས་རྗེའི་བདེན་བྱིན་གྱིས། །ས་གསུམ་དགེ་ལེགས་པད་ཚལ་བཞད་པའི་རྒྱུད། །དཀར་ཕྱོགས་བུང་བའི་དགའ་སྟོན་འཕེལ་གྱུར་ཅིག །ཅེས་པའང་མི་བསྲུན་དུས་ཀྱི་འགྱུར་བ་སྣ་ཚོགས་ལ་བརྟེན་ནས་སྣང་བ་སྐྱོ་ཆད་དེ་བའི་ངང་ནས་ལེགས་ཉེས་གང་བྱུང་གུ་རུ་རིན་པོ་ཆེ་ལ་རེ་བའི་བན་སྡོམ་པདྨ་བི་ཛས་གང་ཤར་གསོལ་བ་བཏབ་པ་དེ་དེ་བཞིན་དུ་འགྲུབ་པར་མཛད་དུ་གསོལ།། །།