ཨོ་རྒྱན་བརྒྱུད་པར་བཅས་པ་ལ་གསོལ་བ་འདེབས་པ་མོས་གུས་ཀྱི་དབྱངས་སྙན།

༄༅། །ཨོ་རྒྱན་བརྒྱུད་པར་བཅས་པ་ལ་གསོལ་བ་འདེབས་པ་མོས་གུས་ཀྱི་དབྱངས་སྙན་ཞེས་བྱ་བ་བཞུགས་སོ།། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྐུ་ལྔ་ལྷུན་གྲུབ་དུས་གསུམ་རྒྱལ་བའི་སྲས། །སྐྱེ་འཆི་མི་མངའ་རྡོ་རྗེ་ལྟ་བུའི་སྐུ། །སྙིགས་མའི་འགྲོ་ཀུན་སྐྱོབ་པའི་མགོན་གཅིག་པུ། །ཨོ་རྒྱན་རྡོ་རྗེ་འཆང་ལ་གསོལ་བ་འདེབས། །སྣང་བ་མཐའ་ཡས་ཐུགས་རྗེའི་འོད་ཟེར་ལས། །འོ་མ་ཅན་མཚོར་པདྨའི་གེ་སར་རྩེར། །བརྫུས་སྐྱེས་ངོ་མཚར་རང་བྱུང་སྤྲུལ་པའི་སྐུ། །པདྨ་འབྱུང་གནས་ཞབས་ལ༴ གཏོང་ལ་རབ་གོམས་ཨིནྡྲ་བོ་དྷི་ཆེ། །སེམས་བསྐྱེད་བཟང་པོས་དབྱིག་མཆོག་ལེན་ཕྱིན་ཚེ། །མཇལ་བས་ངོ་མཚར་སྤྱན་དྲངས་རྒྱལ་སར་བསྐུར། །སྤྲུལ་སྐུ་མཚོ་སྐྱེས་རྡོ་རྗེར༴ འོད་འཆང་མ་སོགས་བཙུན་མོ་ཁབ་ཏུ་བཞེས། །སྣ་ཚོགས་ཐབས་མཁས་ཐུགས་རྗེའི་ཕྲིན་ལས་ཀྱིས། །རྒྱལ་ཁམས་མ་ལུས་ཐེག་ཆེན་ཆོས་ལ་བཀོད། །རྒྱལ་བུ་ཐོར་ཅོག་ཅན་ལ༴ བརྟུལ་ཞུགས་སྤྱོད་པས་རྒྱལ་སྲིད་ཐབས་ཀྱིས་བོར། །བསིལ་བ་ཚལ་བྱོན་ཏན་གཎ་སྤྱོད་པ་བསྐྱངས། །མ་མོ་མཁའ་འགྲོའི་ཚོགས་རྣམས་དབང་དུ་བསྡུས། །ཤནྟ་རཀྵི་ཏ་ལ༴ དགའ་བྱེད་ཚལ་སོགས་ཕྱོགས་བཞིའི་དུར་ཁྲོད་དུ། །ཡེ་ཤེས་མཁའ་འགྲོས་བྱིན་རླབས་དབང་བསྐུར་ཞིང་། །ནུས་མཐུའི་རྩལ་རྫོགས་གཟའ་ཀླུ་དམ་ལ་བཏགས། །རྡོ་རྗེ་དྲག་པོ་རྩལ་ལ༴ རྡོ་རྗེ་གདན་དུ་ངོ་མཚར་སྤྲུལ་བསྒྱུར་བསྟན། །པྲ་བྷ་ཧ་སྟིའི་སྤྱན་སྔར་རབ་ཏུ་བྱུང་། །ཡོ་གའི་རྒྱུད་གསན་ལྷ་ཚོགས་མ་སྒྲུབ་འགྲུབ། །ཤཱཀྱ་སེངྒེའི་ཞབས་ལ༴ ཀུན་དགའ་མོ་ཡི་དབང་བཞི་རྫོགས་པར་བསྐུར། །རིག་འཛིན་གྲུབ་ཐོབ་མང་པོའི་སྤྱན་སྔར་བྱོན། །ཡོ་ག་རྣམ་གསུམ་ཆོས་ཀྱི་སྒྲོ་འདོགས་བཅད། །རིག་འཛིན་བློ་ལྡན་མཆོག་སྲེད་ལ༴ ལྷ་ལྕམ་ཡུམ་བཅས་འཆི་བ་མཐར་བྱེད་དུ། །ཚེ་འོད་དཔག་མེད་མགོན་གྱིས་དབང་བསྐུར་བས། །སྐྱེ་འཆིའི་འཇིགས་བྲལ་ཚེ་དབང་རིག་འཛིན་བརྙེས། །འཆི་མེད་པདྨ་འབྱུང་གནས་ལ༴ ཟ་ཧོར་རྒྱལ་པོས་ཆད་པས་མེར་བསྲེགས་ཚེ། །མེ་དབུས་མཚོ་དཀྱིལ་པད་སྡོང་རྩེར་བཞུགས་ནས། །རྒྱལ་པོ་འཁོར་བཅས་མི་ལྡོག་ས་ལ་བཀོད། །པདྨ་སམྦྷའི་ཞབས་ལ༴ ཨོ་རྒྱན་ཡུལ་བྱོན་བདུད་བློན་འདུན་དྲིལ་ནས། །མེར་བསྲེགས་མཚོར་བསྒྱུར་ཡ་མཚན་རྫུ་འཕྲུལ་གྱིས། །རྒྱལ་བློན་འབངས་འཁོར་དད་པའི་གནས་ལ་བཀོད། །པདྨ་ཐོད་ཕྲེང་རྩལ་ལ༴ བཅུ་གསུམ་བར་དུ་ཡབ་ཀྱི་མཆོད་གནས་མཛད། །བཀའ་འདུས་ཆོས་ཀྱི་རྒྱ་མཚོ་ཞལ་ཕྱེ་བས། །ལས་ཅན་རྒྱལ་པོ་ཚོམ་བུ་རིག་འཛིན་གྲུབ། །སྲས་མཆོག་པདྨ་རྒྱལ་པོར༴ མཚོ་སྐྱེས་རྡོ་རྗེ་མདའ་བསྣུན་བི་རཱུ་པ། །ཌོམྦི་ནག་པོ་སྤྱོད་པ་མཁའ་ལྡིང་རྩལ། །སྣ་ཚོགས་མཚན་དང་ཕྲིན་ལས་བསམ་མི་ཁྱབ། །གུ་རུ་ཉི་མ་འོད་ཟེར་ལ༴ རྡོ་རྗེ་གདན་དུ་མུ་སྟེགས་རྩོད་པ་བཅོམ། །བདུད་འདུལ་མ་ཡིས་བྱིན་རླབས་རིག་སྔགས་བསྟན། །ནུས་པའི་མཐུ་ཡིས་ཕས་རྒོལ་ཕྱེ་མར་བརླག །སེངྒེ་སྒྲ་སྒྲོག་ཞབས་ལ༴ ཡང་ལེ་ཤོད་དུ་ཤཱཀྱ་དེ་ཝིར་བཅས། །ཡང་ཕུར་གཉན་པོའི་དཀྱིལ་འཁོར་ཞལ་ཕྱེས་ནས། །བར་ཆད་བགེགས་བཏུལ་ཕྱག་ཆེན་མཆོག་དངོས་གྲུབ། །གུ་རུ་སྤྲུལ་པའི་སྐུ་ལ༴ དྷ་ན་ཀོ་ས་རུགྨ་ཏི་ར་ཧུ། །ཀཱ་མ་རཱུ་དང་ཀཉྩི་འགྲོ་ལྡིང་སོགས། །མཐའ་དབུས་ཀུན་ཏུ་བསྟན་པའི་སྒྲོན་མེ་སྦར། །མཚོ་སྐྱེས་རྒྱལ་བ་གཉིས་པར་གསོལ་བ༴ རྒྱ་ཧོར་འདུལ་སླད་རྒྱལ་པོ་མངོན་ཤེས་ཅན། །ཞང་ཞུང་ཡུལ་དུ་ཏ་པི་ཧྲི་ཙ་སོགས། །ངོ་མཚར་སྐུ་དང་རྣམ་ཐར་བསམ་མི་ཁྱབ། །གང་འདུལ་སྒྱུ་འཕྲུལ་དྲྭ་བར༴ འཇམ་དཔལ་དབྱངས་དངོས་ཁྲི་སྲོང་སྡེའུ་བཙན་ལ། །མཁན་པོས་ལུང་བསྟན་སྤྱན་དྲངས་བོད་ཡུལ་ཕེབས། །ལྷ་སྲིན་དམ་བཏགས་བསམ་ཡས་ས་གཞི་བརླབས། །དྲིན་ཆེན་སྤྲུལ་པའི་སྐུ་ལ༴ ལྷ་སྲིན་བྲན་བཀོལ་དཔལ་གྱི་བསམ་ཡས་བཞེངས། །རབ་གནས་མངའ་གསོལ་ཡ་མཚན་ཆོ་འཕྲུལ་བསྟན། །མདོ་སྔགས་ཐེག་ཆེན་ཆོས་ཀྱི་སྒྲོན་མེ་སྦར། །གངས་ལྗོངས་མུན་སེལ་མཆོག་ལ༴ རྒྱལ་པོར་བཀའ་བསྒོས་ཆོས་ཀྱི་ཁྲིམས་སྲོལ་བཏོད། །བཻ་རོ་ནམ་སྙིང་འཕགས་ཡུལ་ཆོས་འཚོལ་བཏང་། །བི་མ་ལ་སོགས་པཎ་གྲུབ་མང་སྤྱན་དྲངས། །བོད་ཡུལ་ཆོས་ཀྱིས་འགེངས་ལ༴ མངའ་བདག་རྒྱལ་པོས་གསོལ་བ་བཏབ་པའི་ངོར། །བསམ་ཡས་མཆིམས་ཕུར་བཀའ་བརྒྱད་དཀྱིལ་འཁོར་དུ། །ལས་ཅན་རྗེ་འབངས་སྨིན་གྲོལ་དངོས་གྲུབ་བརྙེས། །གྲུབ་པའི་ཁྱུ་མཆོག་ཁྱེད་ལ༴ མཁར་ཆུ་ཏི་གྲོ་ལ་སོགས་གནས་རྣམས་སུ། །རྗེ་འབངས་ཉེར་ལྔ་གཙོར་གྱུར་འདུས་པ་ལ། །ཡོ་ག་རྣམ་གསུམ་ཆོས་ཀྱི་འཁོར་ལོ་བསྐོར། །བཀའ་དྲིན་བསམ་མི་ཁྱབ་ལ༴ སྟག་ཚང་གནས་སུ་དྲེགས་ཚོགས་དམ་ལ་བཞག །གངས་བྲག་མཚོ་སོགས་སྒྲུབ་གནས་བྱིན་གྱིས་བརླབས། །ཆོས་ནོར་རྫས་ཀྱི་གཏེར་ཁ་གྲངས་མེད་སྦས། །གུ་རུ་རྡོ་རྗེ་གྲོ་ལོད་ལ༴ སྙིགས་དུས་བོད་ཁམས་སྡུག་པའི་དུས་བྱུང་ཚེ། །གྲངས་མེད་སྤྲུལ་པས་ཟབ་གཏེར་སྒོ་ཕྱེས་ནས། །གདུལ་དཀའི་འགྲོ་བ་འདུལ་བའི་ལུང་བསྟན་སྩལ། །ཐུགས་རྗེ་རྒྱུན་ཆད་མེད་ལ༴ ཁྲ་འབྲུག་གནས་སུ་འདུས་པའི་ཕྱི་མ་ལ། །བཀའ་འདུས་ཡོངས་རྫོགས་དཀྱིལ་འཁོར་ཞལ་ཕྱེས་ནས། །གདམས་པའི་གཏད་རྒྱ་རྒྱལ་སྲས་ལྷ་རྗེར་སྩལ། །ལུང་བསྟན་དབུགས་དབྱུང་མཛད་ལ༴ བོད་ཁམས་ཡོངས་ལ་བརྩེ་བའི་ཞལ་ཆེམས་བཞག །སྐུ་དངོས་གདུལ་དཀའ་སྲིན་པོ་འདུལ་དུ་གཤེགས། །བརྩེ་བའི་ཐུགས་རྗེས་དུས་དྲུག་བོད་ལ་གཟིགས། །བཀའ་དྲིན་འཁོར་མེད་རྗེ་ལ༴ རྒྱལ་བས་ལུང་བསྟན་འཇམ་མགོན་ས་འོད་བཟང་། །བདེ་གཤེགས་འདུས་པ་རྩ་བའི་བཀའ་བབས་པས། །ཏིང་འཛིན་མི་གཡོ་ལྷུན་གྲུབ་དགོངས་པ་སྐྱེས། །ཚངས་པ་ལྷ་ཡི་མེ་ཏོག་ལ༴ འཇམ་དཔལ་སྐུ་ཡི་བཀའ་བབས་སྔགས་པའི་རྒྱལ། །སྒྲགས་ཀྱི་ཡང་རྫོང་དངོས་གྲུབ་རྣམ་གཉིས་ཐོབ། །གྲུབ་རྟགས་བྲག་ལ་ཕུར་བཏབ་འོད་སྐུར་ཡལ། །གནུབས་ཆེན་སངས་རྒྱས་ཡེ་ཤེས་ལ༴ པདྨ་གསུང་གི་བཀའ་བབས་བཙུན་པའི་མཆོག །དབེན་རྩར་བསྒྲུབས་པས་ཡུལ་གསུམ་གྱད་དུ་གྱུར། །གྲུབ་རྟགས་རྟ་སྐད་གཙུག་སྟོན་ཚེ་ལ་དབང་། །ངན་ལམ་རྒྱལ་བ་མཆོག་དབྱངས་ལ༴ ཡང་དག་ཐུགས་ཀྱི་བཀའ་བབས་དགེ་སློང་ཆེ། །ལྷོ་བྲག་མཁར་ཆུར་ཕྱག་ཆེན་རིག་འཛིན་བརྙེས། །གྲུབ་རྟགས་ཉི་ཟེར་ལ་ཆིབས་མཁའ་སྤྱོད་གཤེགས། །གནུབས་སྟོན་ནམ་མཁའི་སྙིང་པོར༴ བདུད་རྩིའི་བཀའ་བབས་བཀའ་བཞིན་ཆུ་བོ་འཛིན། །ཡར་ལུང་ཤེས་གྱི་བྲག་ནས་དངོས་གྲུབ་བརྙེས། །གྲུབ་རྟགས་སྒྲུབ་ཆུ་བཏོན་ཞིང་འཇའ་སྐུར་ཡལ། །གཉགས་ལོ་ཡེ་ཤེས་གཞོན་ནུར༴ ཕུར་པའི་བཀའ་བབས་གུ་རུའི་དགྱེས་སྡེ་མཆོག །སེངྒེ་རྫོང་ནས་མཆོག་ཐུན་དངོས་གྲུབ་གྲུབ། །གྲུབ་རྟགས་བསད་གསོ་འཕོ་ཆེན་འཇའ་སྐུ་བརྙེས། །མཁར་ཆེན་ཡེ་ཤེས་མཚོ་རྒྱལ་ལ༴ མ་མོའི་བཀའ་བབས་སྔགས་འཆང་ལོ་ཙཱ་བ། །ཤམ་པོ་གངས་རར་བླ་མེད་དཀྱིལ་འཁོར་གཟིགས། །གྲུབ་རྟགས་སྣང་སྲིད་མ་མོ་བྲན་དུ་ཁོལ། །འབྲོག་མི་དཔལ་གྱི་ཡེ་ཤེས་ལ༴ མཆོད་བསྟོད་བཀའ་བབས་སྔགས་འཆང་རྡོ་རྗེ་འཛིན། །སྤ་གྲོ་སྟག་ཚང་དྲེགས་འདུལ་ལྷ་ཞལ་མཐོང་། །གྲུབ་རྟགས་འཇིག་རྟེན་དྲེགས་ཚོགས་ལས་ལ་འགྱེད། །རླང་ཆེན་དཔལ་གྱི་སེངྒེར༴ དྲག་སྔགས་བཀའ་བབས་དགེ་སློང་ཐམས་ཅད་མཁྱེན། །གཡའ་མ་ལུང་དུ་ནུས་མཐུའི་རྩལ་ཆེན་རྫོགས། །གྲུབ་རྟགས་ཡེ་ཤེས་སྤྱན་ལྡན་ཟུང་འཇུག་གྲུབ། །པ་གོར་བཻ་རོ་ཙཱ་ན༴ གཡུ་སྒྲ་སྙིང་པོ་བདུད་འཇོམས་ཡེ་ཤེས་དབྱངས། །ལྷ་དཔལ་སྣ་ནམ་ཡེ་ཤེས་དཔལ་དབང་ཕྱུག །ལྡན་མ་རྩེ་མང་དཔལ་བརྩེགས་དཔལ་སེངྒེ། །རྒྱལ་བའི་བློ་གྲོས་རྣམས་ལ༴ ཁྱེའུ་ཆུང་ལོ་ཙཱ་དྲན་པ་ནམ་མཁའི་ཞབས། །འོ་བྲན་དཔལ་དབང་རྨ་བན་རིན་ཆེན་མཆོག །ལྷ་ལུང་དཔལ་རྡོར་ལང་གྲོ་དཀོན་མཆོག་འབྱུང་། །རྒྱལ་བ་བྱང་ཆུབ་རྣམས་ལ༴ བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་དུ། །སྨིན་གྲོལ་མཆོག་བརྙེས་གྲུབ་པའི་འཁོར་ལོས་བསྒྱུར། །རྡོ་རྗེ་འཛིན་པ་མཆོག་གྲུབ་རྒྱལ་པོ་སོགས། །བཀའ་བབས་ལས་ཅན་ཉེར་གཅིག་ལ༴ ཀ་དག་ཀུན་ཏུ་བཟང་པོའི་མཁའ་ཀློང་དུ། །ལྷུན་གྲུབ་སྣང་བཞིའི་ཡེ་ཤེས་མཐར་ཕྱིན་པས། །ཟག་བཅས་གདོས་ལུས་དྭངས་མའི་སྐུར་སྨིན་པའི། །ཡེར་པའི་གྲུབ་ཆེན་བརྒྱད་ཅུར༴ ལྟ་བའི་རྩེ་མོ་བློ་འདས་རྫོགས་པ་ཆེ། །སྒོམ་པའི་སྙིང་པོ་དབྱིངས་རིག་སྣང་སེམས་འདྲེས། །མཉམ་རྗེས་རིས་མེད་ཆོས་སྐུའི་རྒྱལ་ས་ཟིན། །སྒོམ་ཆེན་བརྒྱ་རྩ་བརྒྱད་ལ༴ འོད་གསལ་ཀློང་ཡངས་ཐིག་ལེ་ཉག་གཅིག་ཏུ། །འཁོར་འདས་སྤང་བླང་ཆོས་རྣམས་ཡོངས་གྲོལ་བས། །བྱར་མེད་ལྷུན་རྫོགས་གདེང་བཞིའི་དྲོད་ཚད་བརྙེས། །ཤེལ་བྲག་རྟོགས་ལྡན་ང་ལྔ་ལ༴ དབང་བཞི་རྒྱུད་སྨིན་དམ་ཚིག་སྲོག་ཏུ་བཟུང་། །རིམ་གཉིས་མཐར་ཕྱིན་ལྷག་ལྷས་བྱིན་གྱིས་བརླབས། །ནུས་མཐུའི་རྩལ་རྫོགས་ལས་བཞི་ཐོགས་མེད་གྲུབ། །ཡང་རྫོང་སྔགས་པ་སུམ་ཅུར༴ དབྱིངས་ཕྱུག་ཡེ་ཤེས་ཌཱ་ཀིའི་སྒྱུ་མའི་གར། །བདེ་སྟོང་དགའ་བཞིའི་ཡེ་ཤེས་མཐར་ཕྱིན་པས། །སྣང་སེམས་རོ་མཉམ་གང་འདུལ་རོལ་གར་སྟོན། །མཁའ་འགྲོ་ཉི་ཤུ་རྩ་ལྔར༴ ཐ་མལ་སྣང་ཞེན་བསྐྱེད་པའི་རིམ་པས་སྦྱངས། །ལས་རླུང་འཆིང་དག་ས་ལམ་དབུ་མར་རྫོགས། །རིག་འཛིན་བཞི་བརྙེས་དོན་གཉིས་གཏེར་ཁ་འབྱེད། །གུ་རུའི་རྗེས་འཇུག་ཡོངས་ལ༴ དཔལ་ཆེན་དངོས་སྣང་ཟུར་པ་མེས་དབོན་གསུམ། །མཁས་གྲུབ་བྱེ་བའི་གཙུག་ནོར་རོང་ཟོམ་པ། །འོད་གསལ་སྙིང་པོའི་བསྟན་བདག་ཀློང་ཆེན་རྗེ། །རིག་འཛིན་བརྒྱུད་པར་བཅས་ལ༴ ལས་ཀྱི་འཕྲོ་སད་ཟབ་མོའི་གཏེར་ཞལ་ཕྱེས། །བརྟུལ་ཞུགས་སྤྱོད་པས་སྒྲོ་སྐུར་གཡང་ས་བཅད། །སྣ་ཚོགས་ཐབས་ཀྱིས་བསྟན་འགྲོའི་བདེ་སྐྱིད་སྤེལ། །རྩོད་བྲལ་གཏེར་སྟོན་རྣམས་ལ༴ འཕགས་རྣམས་ཐུགས་བསྐྱེད་ཟབ་མོའི་ཆུ་གཏེར་ལས། །ཉེར་ཐོན་མཁྱེན་བརྩེའི་འོད་ཟེར་སྟོང་འབར་བས། །ས་གསུམ་དགེ་ལེགས་པད་ཚལ་བཞད་མཛད་པའི། །རིས་བྲལ་མཁས་གྲུབ་ཡོངས་ལ༴ ཐུགས་བསྐྱེད་ཆེན་པོས་རྩོད་དུས་གདུར་བྱར་དགོངས། །མཛད་ཕྲིན་བཟང་པོས་སྔ་འགྱུར་བསྟན་སྲོག་མཐུད། །བཀའ་དྲིན་རྨད་བྱུང་མྱོས་རིགས་རྡོ་རྗེ་འཛིན། །ཡབ་སྲས་བརྒྱུད་པར་བཅས་ལ༴ གཟོད་ནས་ཞི་ཡང་སྲིད་པར་རྗེས་ཆགས་གར། །གདུལ་དཀའ་འདུལ་སླད་དགེ་བའི་བཤེས་གཉེན་དུ། །ཡོངས་ཤར་སྙིགས་མའི་འགྲོ་བ་སྐྱོབ་པའི་མགོན། །མཚུངས་མེད་བླ་མའི་ཞབས་ལ༴ ཡེ་ཤེས་ཀློང་དགུའི་རྩལ་ལས་རང་ཤར་བའི། །འདས་དང་མ་འདས་ཆ་མཉམ་ཚོམ་བུ་དགུ། །ཞི་དང་ཁྲོ་བོའི་རོལ་གར་འབྱམས་ཀླས་པ། །བདེ་གཤེགས་འདུས་པའི་ལྷ་ཚོགས་ལ༴ རྡོ་རྗེ་ལུས་ཀྱི་གཞལ་ཡས་གནས་ཡུལ་ན། །རྩ་རླུང་ཐིག་ལེའི་རང་བཞིན་གནས་དག་པའི། །ལྷན་སྐྱེས་ཞིང་སྔགས་དཔའ་བོ་མཁའ་འགྲོའི་སྤྲིན། །འབུམ་ཕྲག་ཡངས་པའི་ཚོགས་ལ་གསོལ་བ་འདེབས། །གསོལ་བ་འདེབས་སོ་རྩ་བརྒྱུད་བླ་མའི་ཚོགས། །བྱིན་གྱིས་རློབས་ཤིག་ཡི་དམ་བཀའ་བརྒྱད་ལྷ། །དངོས་གྲུབ་སྩོལ་ཅིག་དཔའ་བོ་མཁའ་འགྲོའི་ཚོགས། །ཡིད་དཔྱོད་འཛིན་པ་དག་པར་བྱིན་གྱིས་རློབས། །ཉམས་སྣང་སེམས་ཀྱི་གོས་བྲལ་རིག་པའི་གཤིས། །ཀ་དག་རྫོགས་ཆེན་དགོངས་པ་མངོན་གྱུར་ནས། །ལྷུན་གྲུབ་སྣང་བཞིའི་ཉེ་ལམ་མཐར་ཕྱིན་ཏེ། །འཕོ་ཆེན་འཇའ་ལུས་འགྲུབ་པའི་དངོས་གྲུབ་སྩོལ། །གསལ་བརྟན་དག་གསུམ་འཛོམས་པའི་བསྐྱེད་རིམ་གྱིས། །ཐ་མལ་དངོས་མཚན་སྣང་ཞེན་ཀུན་བྱང་ནས། །གདན་གསུམ་ཡོངས་རྫོགས་ལྷ་ཡི་འཁོར་ལོ་ཆེར། །འགྱུར་མེད་སྐུ་ཡི་རྡོ་རྗེ་མངོན་བྱེད་ཤོག །རྩ་རླུང་ཐིག་ལེའི་ལམ་ལ་གནད་བསྣུན་པས། །ཐ་མལ་ལས་རླུང་འཆིང་བ་དྷཱུ་ཏིར་དག །ས་ལམ་ཡོངས་བགྲོད་ནམ་མཁའ་འཁོར་ལོ་ཆེར། །གྲགས་སྟོང་གསུང་གི་རྡོ་རྗེ་མངོན་བྱེད་ཤོག །ཁྲེགས་ཆོད་ལྟ་བས་ཉམས་ཀྱི་འཛིན་སྟངས་བུད། །ལྷུན་གྲུབ་བསྒོམས་པས་ཆོས་ཉིད་ཟད་སར་འཁྱོལ། །དབྱིངས་སྣང་ནང་གསལ་གཞོན་ནུ་བུམ་སྐུའི་སྦུབས། །སྤྲོས་བྲལ་ཐུགས་ཀྱི་རྡོ་རྗེ་མངོན་བྱེད་ཤོག །རྒྱལ་བའི་བསྟན་དར་བསྟན་འཛིན་ཞབས་བརྟན་ཅིང་། །སྙིགས་མའི་རྒུད་སེལ་རྫོགས་ལྡན་དཔལ་འབྱོར་རྒྱས། །འགྲོ་ཀུན་གཟུང་འཛིན་འཁྲུལ་པའི་མུན་སངས་ནས། །ཕྱམ་གཅིག་འོད་སྐུར་གྲོལ་བའི་བཀྲ་ཤིས་ཤོག །ཅེས་པའང་ཤིང་རྟ་ཟླ་བ་དྲུག་པའི་ཚེས་བཅུ་གཉིས། པདྨའི་རྗེས་འཇུག་རྟགས་ཙམ་འཛིན་པ་ཨོ་རྒྱན་ཐུགས་མཆོག་རྡོ་རྗེས་རྩེ་གཅིག་གུས་པའི་ཡིད་ཀྱིས་གང་ཤར་ཤུགས་འབྱུང་དུ་གསོལ་བ་བཏབ་པ་སྟེ་འདིས་ཀྱང་རང་གཞན་ཀུན་གྱི་རྒྱུད་ལ་དཔལ་ཨོ་རྒྱན་ཆེན་པོའི་བྱིན་རླབས་རྩོལ་མེད་དུ་འཇུག་པའི་རྒྱུར་གྱུར་ཅིག། །།