གུ་རུ་རིན་པོ་ཆེའི་ཐུགས་དམ་གནད་ནས་བསྐུལ་བའི་གསོལ་འདེབས་འདོད་འབྱུང་ནོར་བུའི་སྤྲིན་ཕུང་།

༄༅། །གུ་རུ་རིན་པོ་ཆེའི་ཐུགས་དམ་གནད་ནས་བསྐུལ་བའི་གསོལ་འདེབས་འདོད་འབྱུང་ནོར་བུའི་སྤྲིན་ཕུང་ཞེས་བྱ་བ་བཞུགས་སོ།། ཨེ་མ་ཧོ། སྐྱབས་ཀུན་འདུས་ཞལ་རང་བྱུང་སྤྲུལ་པའི་སྐུ། །དྲན་པ་ཙམ་གྱིས་སྲིད་ཞིའི་འཇིགས་འཕྲོག་ཅིང་། །ཕན་བདེའི་དངོས་ཀུན་ཅིག་ཅར་སྩོལ་མཛད་པའི། །ཕ་གཅིག་པདྨར་འབོད་དོ་བརྩེ་བས་དགོངས། །གང་གི་ཐུགས་བསྐྱེད་རྫོགས་ལྡན་སྤྲིན་ཆེན་ལས། །ཚེ་དཔལ་འབྱོར་པ་འདོད་དགུའི་གྲུ་ཆར་གྱིས། །ལུས་ཅན་ཕན་བདེའི་རེ་བ་ཡོངས་སྐོང་ཞིང་། །རྣམ་གྲོལ་དཔལ་ལ་སྦྱོར་ཅིག་པདྨ་འབྱུང་། །མཆོག་བྱིན་ཟླ་བ་གསལ་བའི་འཛུམ་ཟེར་གྱིས། །གངས་ལྗོངས་ཐུབ་བསྟན་པུཎྜ་རི་ཀའི་ཚལ། །ལུང་རྟོགས་ཀེ་སར་རྒོད་པའི་ལང་ཚོ་ཡིས། །རྫོགས་ལྡན་མགྲོན་དུ་ཁུགས་ཅིག་པདྨ་འབྱུང་། །ལྟ་ངན་ཆང་གི་རབ་མྱོས་གླང་པོའི་དཔུང་། །སྡང་བའི་མཚོན་འཁོར་བསྐྱོད་པ་ཀླ་ཀློའི་སྡེ། །མཆོག་བྱིན་གདོང་ལྔ་ཁྲོས་པའི་སྡེར་མོ་ཡིས། །མིང་གི་ལྷག་མར་མཛོད་ཅིག་པདྨ་འབྱུང་། །སྣ་ཚོགས་འདུ་བ་འཁྲུགས་པའི་ཚ་དབལ་གྱིས། །ལུས་སེམས་མྱ་ངན་ཐང་ལ་དུབ་པའི་ཚེ། །སྨན་རྒྱལ་དཔག་བསམ་དབང་པོའི་གྲིབ་བསིལ་དུ། །ངལ་འཚོའི་དབུགས་འབྱིན་མཛོད་ཅིག་པདྨ་འབྱུང་། །སྣོད་བཅུད་རྒུད་པའི་གདུང་བས་ཉམ་ཉེས་ཚེ། །བྱིན་རླབས་ནོར་བུ་རྒྱས་པའི་སྤྲིན་ཆེན་ལས། །འདོད་དགུ་ཆར་དུ་བསྙིལ་བའི་དཔལ་ཡོན་གྱིས། །མོས་ལྡན་རེ་བ་སྐོང་༴ སྔོན་སྨོན་སྐྱ་རེངས་ཁ་ལོས་བསུས་པའི་མགྲོན། །གཏེར་འབྱིན་གྲུབ་ཐོབ་ལས་ཅན་ཉིན་བྱེད་ཀྱི། །ཕྲིན་ལས་འོད་ཟེར་སྟོང་གི་དྲྭ་བ་ཡི། །ས་གསུམ་ཁྱབ་པར་མཛོད༴ སྦས་ཡུལ་པདྨའི་ཚལ་ན་མངོན་རྒྱུ་བའི། །སྐལ་ལྡན་སྐྱེས་བུ་རྐང་པ་དྲུག་པའི་ཚོགས། །མི་མཐུན་གྲང་རེག་ཀུན་བྲལ་འདོད་དགུ་ཡི། །སྦྲང་རྩིས་མྱོས་པར་མཛོད༴ ལུས་ཅན་ཁྲག་གི་སྦགས་པའི་མཆེ་སྡེར་ཅན། །མི་བསྲུན་འཚེ་ལ་གོམས་པའི་སྲོག་ཆགས་རྣམས། །དཔའ་བོ་གིང་ཆེན་རྔམས་པའི་རྔ་སྒྲ་ཡི། །ཕ་མཐར་སྐྲོད་པར་མཛོད༴ འབྱུང་བཞི་འཁྲུགས་པ་སྲིན་མོའི་ཁམ་ཟས་སུ། །སྟོང་ཁམས་ཟ་བར་ཆས་ལ་རིངས་པའི་ཚེ། །མཆོག་བྱིན་རིགས་སྔགས་འབར་བའི་མཚོན་ཆ་ཡིས༴ ལུས་ཅན་འཇིགས་ལས་སྲུངས་ཤིག༴ སྲེད་པས་ཟིལ་གནོན་ཙོ་ར་གདུག་པའི་མདའ། །ཟང་ཟིང་ནོར་གྱི་འབེན་ལ་གཟས་པའི་ཚེ། །མཐུ་སྟོབས་རླུང་དམར་འཁྲུགས་པའི་སྒྱུ་ཐབས་ཀྱི། །མ་རུངས་སྐྲོད་པར་མཛོད༴ ཞེ་སྡང་མཚོན་འཁོར་སྐྱོད་པའི་ཕས་རྒོལ་གྱིས། །དཔལ་འབྱོར་སྲོག་ལ་རྔམས་པའི་དུས་བྱུང་ཚེ། །བྱིན་རླབས་རྡོ་རྗེའི་མཁར་གྱིས་རབ་བ སྲུངས་ནས། །འཇིགས་མེད་དངོས་པོ་བྱིན་ཅིག༴ ལས་ཀྱི་རླུང་དམར་འཁྲུགས་པའི་གཡོ་འཕྲུལ་གྱིས། །ཚེ་སྲོག་མར་མེ་བཅོམ་ལ་མངོན་ཕྱོགས་ཚེ། །ཐུགས་རྗེ་ཆེན་པོའི་ཕྱག་ཡངས་ལེགས་བརྐྱངས་ནས། །བདེ་ལྡན་ཞིང་དུ་དྲོངས་ཤིག༴ སྒྱུ་ལུས་ལྗོན་ཤིང་བོར་བའི་རྣམ་ཤེས་སྦྲེལ། །རྟེན་མེད་ལས་རླུང་འཚུབ་མས་ཉམ་ཉེས་ཚེ། །མཆོག་བྱིན་ཚ་ཟེར་བརྒྱ་པའི་རོལ་རྩེད་ཀྱིས། །འཁྲུལ་སྣང་དབྱིངས་སུ་སོལ་ཅིག༴ མ་རིག་སྤྲི་མས་གཡོགས་པའི་མཐོང་བྱེད་སྒོར། །བག་ཆགས་གསུམ་གྱི་སྐྲ་ཤད་འཛག་པའི་ཚེ། །རང་གྲོལ་གསེར་གྱི་ཐུར་མས་སྒོ་ཕྱེས་ལ། །འོད་གསལ་རང་ངོ་སྤྲོད་ཅིག༴ གཟུང་འཛིན་ལྕགས་སྒྲོག་གིས་བསྡམས་སྲིད་པའི་གྲོང་། །སྡུག་བསྔལ་གསུམ་གྱི་ཆད་པས་མནར་བ་རྣམས། །དགེ་བཅུའི་བཀའ་ཁྲིམས་བཙན་པོའི་སྤྲིང་ཡིག་གིས། །ཁྲི་མུན་གནས་ནས་ཕྱུངས་ཤིག་པདྨ་འབྱུང་། །མདོར་ན་འདི་ནས་བཟུང་སྟེ་བྱང་ཆུབ་བར། །སྐྱིད་སྡུག་ལེགས་ཉེས་ཤི་གསོན་ཅི་བྱུང་ཡང་། །མགོན་པོ་མཆོག་ལས་སྐྱབས་གཞན་མ་མཆིས་པས། །འབྲལ་མེད་རྗེས་སུ་ཟུངས་ཤིག་པདྨ་འབྱུང་། །འབྱུང་བཞིའི་གཡོ་འཁྲུགས་ནད་མཚོན་དུག་སྦྱོར་སོགས། །ཕྱི་ནང་གསང་བའི་བར་ཆད་ཀུན་ཞི་ཞིང་། །ཚེ་བསོད་དཔལ་འབྱོར་ལུང་རྟོགས་ཡོན་ཏན་སོགས། །ཆོས་མཐུན་བསམ་སྦྱོར་འགྲུབ་པར་བྱིན་གྱིས་རློབས། །མཐོ་རིས་ཡོན་ཏན་བདུན་གྱིས་བརྒྱན་པའི་ལུས། །བདེན་བཞིའི་འཇུག་ལྡོག་ཟབ་མོའི་གོས་ཀྱིས་ཀླུབས། །བསླབ་གསུམ་རྒྱན་ཆས་སྒེག་པའི་མཛའ་ན་མོ། །རྣམ་མཁྱེན་གྲོང་ཁྱེར་མཆོག་ཏུ་འཇུག་གྱུར་ཅིག །སྙིང་རྗེའི་བ་དན་གཡོ་བའི་སྟོང་ཉིད་གྲུབ། །ཚོགས་གཉིས་རླུང་གིས་བསྐུལ་བའི་སྒྱུ་ཐབས་ཀྱིས། །སྲིད་ཞིའི་ཆུ་གཏེར་ཕ་མཐར་རབ་བརྒལ་ནས། །དོན་གཉིས་ནོར་བུའི་གླིང་ལ་དབང་བསྒྱུར་ཤོག །ཅེས་པའང་རབ་དཀར་བསོད་ནམས་ཀྱི་ལས་ལ་མངོན་པར་སྤྲོ་བ་མཚོ་སྣ་རྫོང་དྲུང་དོན་འགྲུབ་ཕུན་ཚོགས་ནས་ནན་གྱིས་བསྐུལ་བའི་རྐྱེན་ལས། མོན་ཡུལ་སའི་ཐིག་ལེ། གུ་རུའི་སྒྲུབ་གནས་དམ་ཚང་། སྟག་ཚང་། ཤ་འུག་སྟག་སྒོ་རྣམས་སུ་ཚོགས་ཀྱི་མཆོད་པ་དང་རྗེས་སུ་འབྲེལ་བར་གང་ཤར་གསོལ་བ་འདེབས་པ་པོ་ནི་མདོ་ཁམས་ཞེ་ཆེན་པ་སྔགས་བཙུན་འགྱུར་མེད་པདྨ་རྣམ་རྒྱལ་ཏེ། འདིས་ཀྱང་འགྲོ་ཀུན་མ་ཧཱ་གུ་རུས་རྗེས་སུ་འཛིན་པའི་རྒྱུར་གྱུར་ཅིག
༈ ཨེ་མ་ཧོ། ཀ་དག་སྤྲོས་བྲལ་ཀོ་ཤའི་མཚོ་གླིང་དུ། །ལྷུན་གྲུབ་རང་གསལ་འདབ་ལྡན་པདྨའི་རྩེར། །རིག་རྩལ་རོལ་པ་མ་འགགས་སྤྲུལ་པའི་གར། །སྐྱེ་འཆི་མི་མངའ་རྡོ་རྗེ་ལྟ་བུའི་སྐུ། །ཚངས་པའི་གསུང་དབྱངས་འགྲོ་ལ་ལྷམ་མེ་བ། །མཁྱེན་བརྩེའི་ཡེ་ཤེས་ཉི་འོད་འབུམ་བརྡལ་ཐུགས། །ཡིད་བཞིན་ནོར་ལྟར་འགྲོ་བའི་རེ་སྐོང་ཞིང་། །ཕྲིན་ལས་རྒྱ་མཚོའི་རླབས་ལྟར་ཡོལ་མེད་པ། །འཕགས་བོད་ཀུན་ཏུ་བསྟན་པའི་སྒྲོན་མེ་སྦར། །གདུལ་དཀའ་དམུ་རྒོད་སྲིན་པོའི་ཁ་གནོན་མཛད། །ལས་ཅན་བུ་ལ་བརྩེ་བའི་ཐུགས་ཀྱིས་དགོངས། །བཀའ་དྲིན་མཉམ་མེད་ཨོ་རྒྱན་རིན་པོ་ཆེ། །ད་ལྟ་དུས་ངན་སྙིགས་མའི་མཐའ་ལ་ཐུག །སྐྱེ་བོ་ཐམས་ཅད་བསམ་སྦྱོར་ཕྱིན་ཅི་ལོག །བསྟན་འགྲོའི་བདེ་སྐྱིད་པད་ཚལ་སྟོང་ལ་ཉེ། །འདི་ལས་སྐྱོབས་ཤིག་རྗེ་བཙུན་པདྨ་འབྱུང་། །མཐའ་དམག་དབུས་ལྷགས་བོད་ཁམས་སྡུག་པའི་ཚེ། །གུ་རུ་ལྷ་སྲིན་སྡེ་བརྒྱད་འཁོར་བཅས་ཀྱི། །མཐུ་སྟོབས་གནམ་ལྕགས་ཐོག་གི་སྒྱུ་ཐབས་ཀྱིས། །མིང་གི་ལྷག་མར་མཛོད་ཅིག་པདྨ་འབྱུང་། །སྣ་ཚོགས་འདུ་འཁྲུགས་ནད་ཀྱིས་ཉམ་ཉེས་ཚེ། །གུ་རུ་སྨན་གྱི་བླ་མའི་སྐུར་བཞེངས་ནས། །བྱིན་རླབས་བདུད་རྩིའི་ཆར་རྒྱུན་འབུམ་འཇོ་བས། །ཉེར་འཚེའི་ཚད་གདུང་སོལ་ཅིག༴ ལོ་ཉེས་སད་སེར་མུ་གེ་ཉམ་ཐག་ཚེ། །ནོར་ལྷ་དབང་གི་རྒྱལ་པོའི་སྐུར་བཞེངས་ནས། །འདོད་དགུ་ཆར་དུ་འབེབས་པའི་དགེ་མཚན་གྱིས། །སྣོད་བཅུད་དབུལ་བ་སོལ་ཅིག༴ ལས་ཅན་ཟབ་མོའི་གཏེར་ལ་སྤྱོད་པའི་ཚེ། །ཡི་དམ་དབང་གི་རྒྱལ་པོའི་སྐུར་བཞེངས་ནས། །བྱིན་རླབས་དབང་བསྐུར་བཀའ་གཏད་རྒྱ་བཀྲོལ་བས། །འགྲོ་ཕན་སྒོ་འཕར་ཕྱེས་ཤིག༴ སྐལ་བཟང་སྐྱེས་བུའི་དབེན་གནས་སྙོགས་པའི་ཚེ། །གུ་རུ་སྒྲུབ་པོའི་རེ་སྐོང་སྐུར་བཞེངས་ནས། །འགལ་རྐྱེན་བར་གཅོད་ཁ་ཆར་འཚུབས་མ་ཞི། །ཆོས་མཛད་ལམ་སྣ་དྲོངས་ཤིག༴ །སྲོག་ཆགས་གདུག་པས་འཚོ་བ་བསྟུང་ཉེའི་ཚེ། །གུ་རུ་དཔའ་བོ་གིང་གཙོའི་སྐུར་བཞེངས་ནས། །གདུག་པའི་སེམས་ཅན་སྐྲོད་པའི་སྦྱོར་བ་ཡིས། །འཇིགས་མེད་དངོས་པོ་བྱིན་ཅིག༴ འབྱུང་བཞི་འཁྲུགས་པས་བོད་ཁམས་སྡུག་པའི་ཚེ། །འབྱུང་བཞི་དབང་སྒྱུར་རྒྱལ་གྱི་སྐུར་བཞེངས་ནས། །རྨད་བྱུང་ཐུགས་རྗེ་ཆེན་པོའི་རིགས་སྔགས་གཟིས། །རང་སར་ཞི་བར་མཛོད་ཅིག༴ སྲེད་ལྡན་ཆོམ་རྐུན་གདུག་པས་གཙེས་པའི་ཚེ། །གུ་རུ་མ་རུངས་སྐྲོད་མཛད་སྐུར་བཞེངས་ནས། །དབྱེ་བསྐྲད་གཟིར་སོགས་རབ་འབྱམས་ཕྲིན་ལས་ཀྱི། །རྔམ་སེམས་ཞི་བར་མཛོད་ཅིག༴ བརྩེ་བྲལ་གཤེད་མའི་དཔུང་གིས་མཐའ་བསྐོར་ཚེ། །གུ་རུ་རྡོ་རྗེ་གོ་ཆའི་སྐུར་བཞེངས་ནས། །ཕས་རྒོལ་གཡུལ་ངོ་བཟློག་པའི་ཕྲིན་ལས་ཀྱིས། །རང་གཤེད་རང་ལ་ཕོབ་ཅིག༴ དབང་མེད་དུས་ཀྱི་ཞགས་པས་ཟིན་པའི་ཚེ། །གུ་རུ་འཆི་བའི་མུན་སེལ་སྐུར་བཞེངས་ནས།། མེད་སྣང་གློ་བུར་འཁྲུགས་རྟོགས་དབྱིངས་སངས་ཏེ། །འོད་གསལ་རང་ངོ་སྤྲོད་ཅིག་པདྨ་འབྱུང་། །སྡུག་བསྔལ་བརྒྱ་ཕྲག་རིམ་གྱིས་མནར་བའི་ཚེ། །གུ་རུ་སྐྱེ་བའི་སྡུག་སྦྱོང་སྐུར་བཞེངས་ནས། །ཕན་བདེའི་ཨུཏྤལ་བཞད་པའི་དགེ་མཚན་གྱིས། །དོན་གཉིས་སྦྲང་རྩི་སྩོལ་ཅིག་པདྨ་འབྱུང་། །སྲིད་གསུམ་ལས་ཉོན་འཆིང་བས་རབ་བཅིངས་ཚེ། །གུ་རུ་འགྲོ་དྲུག་ཀུན་སྐྱོབ་སྐུར་བཞེངས་ནས། །གང་འདུལ་ཐུགས་རྗེའི་ཕྲིན་ལས་རྨད་པོ་ཆེས། །རྣམ་གྲོལ་དཔལ་ལ་སྦྱོར་ཅིག་པདྨ་འབྱུང་། །མདོར་ན་འདི་ནས་བཟུང་སྟེ་བྱང་ཆུབ་བར། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང་། །མགོན་པོ་མཆོག་ལས་སྐྱབས་གཞན་མ་མཆིས་པས། །དོན་གཉིས་མཐའ་རུ་ཕྱིན་པར་བྱིན་གྱིས་རློབས། །རྒྱལ་བའི་བསྟན་དར་བསྟན་འཛིན་ཞབས་པད་བརྟན། །བཤད་སྒྲུབ་སྡེ་རྒྱས་ཆོས་སྤྱོད་བྱ་བ་འཕེལ། །གངས་ལྗོངས་བདེ་སྐྱིད་ནད་མུག་འཁྲུགས་རྩོད་ཞི། །རྫོགས་ལྡན་ལང་ཚོ་དར་བའི་བཀྲ་ཤིས་ཤོག །ཅེས་པའང་བསམ་ཡས་བར་ཁང་གཡུ་ཞལ་ཅན་དུ་ཐུགས་སྒྲུབ་བསམ་པ་ལྷུན་འགྲུབ་ཀྱི་ཚོགས་ཀྱི་འདུ་བ་ལ་ལོངས་སྤྱོད་སྐབས། པདྨ་བི་ཛས་གང་ཤར་ཤུགས་འབྱུང་དུ་གསོལ་བ་བཏབ་པ་དགེ།
༈ ༀ་སྭསྟི། ཆོས་དབྱིངས་འོད་གསལ་ལྷ་ལམ་ཡངས་པའི་ངོགས། །ཕུལ་བྱུང་མཚན་དཔེ་དབང་པོའི་གཞུ་ཡིས་སྤྲས། །མཁྱེན་གཉིས་ཆར་གྱིས་ས་གསུམ་ཁྱབ་མཛད་པའི། །བཅོམ་ལྡན་ཐུབ་པ་མཆོག་ལ་ཕྱག་འཚལ་ལོ། །མཁྱེན་རབ་རལ་གྲི་འབར་བའི་གཟི་བརྗིད་ཀྱིས། །རྨོངས་པའི་དྲྭ་བ་མ་ལུས་བཅོམ་པ་ལས། །ཡེ་ཤེས་སྣང་བ་དམ་པས་མཛེས་བྱེད་པའི། །བཅོམ་ལྡན་འཇམ་དཔལ་དབྱངས་ལ་ཕྱག་འཚལ་ལོ། །མཐུ་སྟོབས་རྩེ་བརྒྱ་འབར་བའི་མཚོན་ཆ་ཡིས། །ལོག་འདྲེན་ལྷ་མིན་ཚོགས་རྣམས་མཐར་བྱས་ནས། །ཐེག་མཆོག་ཆོས་ཀྱི་རྒྱལ་སྲིད་སྐྱོང་བ་པོ། །བཅོམ་ལྡན་ཕྱག་ན་རྡོ་རྗེར་ཕྱག་འཚལ་ལོ། །བརྩེ་ཆེན་ཐུགས་རྗེའི་འདབ་སྟོང་གཡོ་བ་ལས། །དགེ་ལེགས་ཕན་བདེའི་སྦྲང་རྩི་སྐྱུག་པ་ཡིས། །རིས་བྲལ་འགྲོ་ཚོགས་བུང་བའི་རེ་སྐོང་མཆོག །བཅོམ་ལྡན་སྤྱན་རས་གཟིགས་ལ་ཕྱག་འཚལ་ལོ། །ཚོགས་གཉིས་ནོར་བུ་རྒྱས་པའི་སྤྲིན་ཆེན་ལས། །ཕུན་ཚོགས་འདོད་དགུའི་གྲུ་ཆར་འཇོ་བ་ཡིས། །འགྲོ་ཀུན་སྲིད་པའི་དབུལ་བ་སེལ་མཛད་པ། །བཅོམ་ལྡན་ས་ཡི་སྙིང་པོར་ཕྱག་འཚལ་ལོ། །དཀར་མིན་ལས་ཀྱི་མུན་ཚོགས་གཏན་བཅོམ་ཞིང་། །བཟློག་དཀའ་ཤུགས་དྲག་ཉོན་མོངས་ཆུ་ཀླུང་སྐེམ། །ཤེས་སྒྲིབ་ས་ཆེན་སྲེག་མཛད་དུས་ཀྱི་མེ། །བཅོམ་ལྡན་སྒྲིབ་པ་རྣམ་སེལ་ལ་ཕྱག་འཚལ། །ཉེས་པའི་སྐྱོན་བྲལ་ཀེ་ལ་ཤ་རིའི་རྩེར། །མཁྱེན་བརྩེའི་ཟླ་གཞོན་བྱེ་བས་མངོན་འཁྱུད་པས། །འགྲོ་ཚོགས་སྲིད་པའི་ཚད་གདུང་བཅིལ་བའི་སྨན། །བཅོམ་ལྡན་ནམ་མཁའི་སྙིང་པོར་ཕྱག་འཚལ་ལོ། །རླབས་ཆེན་ཐུགས་བསྐྱེད་འཛིན་མའི་གཞི་ལས་འཁྲུངས། །ཕ་རོལ་ཕྱིན་བཅུའི་ཡལ་འདབ་མེ་ཏོག་རྒྱས། །ས་བཅུ་ལམ་ལྔའི་འབྲས་བཟང་ཆེར་སྨིན་པའི། །བཅོམ་ལྡན་བྱམས་པ་མགོན་ལ་ཕྱག་འཚལ་ལོ། །སྤངས་པ་ཕུན་ཚོགས་དྲི་བྲལ་གསེར་སྦྱངས་ཁམས། །རྟོགས་ཆོས་ཕུན་ཚོགས་མཆོད་སྡོང་བཀོད་ལེགས་ཤིང་། །ཕྲིན་ལས་ཕུན་ཚོགས་ནོར་བུའི་རྒྱན་གྱིས་སྤྲས། །བཅོམ་ལྡན་ཀུན་ཏུ་བཟང་ལ་ཕྱག་འཚལ་ལོ། །གྲགས་པའི་གཏེར་གྱུར་ཡོན་ཏན་རླབས་ཕྲེང་གིས། །ཉེས་པའི་དྲི་མ་མ་ལུས་འཁྲུད་མཛད་པའི། །བདེ་གཤེགས་སྲས་ཀྱིས་བསྐོར་བའི་མགོན་རྣམས་ལ། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །མཆོག་བྱིན་ཡན་ལག་བརྒྱད་ལྡན་གངྒཱའི་རྒྱུན། །དད་གསུམ་ཡུར་བར་དྲངས་པའི་དགེ་མཚན་གྱིས། །ཚོགས་ཟུང་ལྦུ་བའི་འཛུམ་དཀར་གྲོལ་བ་ལ། །དོན་གཉིས་ཡུལ་འཁོར་སྲུང་རྣམས་རྩེན་གྱུར་ཅིག །མཆོག་གསུམ་ཐུགས་རྗེའི་ཆར་རྒྱུན་འབུམ་འཇོ་ཞིང་། །དཀར་ཕྱོགས་ལྷ་ཀླུ་དགྱེས་པའི་སྤྲིན་གྱི་སྒྲས། །དགེ་བཅུའི་རྨ་བྱ་དགའ་བའི་ཟློས་གར་གྱིས། །རྫོགས་ལྡན་དབྱར་དུས་དར་བའི་བཀྲ་ཤིས་ཤོག །ཅེས་པའང་དཔལ་གཡོ་རུ་ཁྲ་འབྲུག་བཀྲ་ཤིས་བྱམས་སྙོམས་ཀྱི་གཙུག་ལག་ཁང་དུ་ཐུབ་དབང་ཉེ་སྲས་བརྒྱད་ཀྱི་མཆོད་ཆོག་དང་འབྲེལ་བར་ཚོགས་གཉིས་འབྲེལ་འཇོག་བགྱིས་པའི་སྐབས། རྨོངས་བཙུན་འགྱུར་མེད་པདྨ་རྣམ་རྒྱལ་གྱིས་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་སིདྡྷི་རསྟུ།
༄༅། །ཇི་སྙེད་རྒྱལ་ཀུན་བསྐྱེད་པའི་ཡབ་གྱུར་ཀྱང་། །འགྲོ་ལ་རྗེས་བརྩེས་གཞོན་ནུའི་སྐུ་ལུས་འཆང་། །ཡེ་ཤེས་ཉི་མས་རྨོངས་པའི་མུན་པ་འཇོམས། །བྱང་སེམས་མཁྱེན་པའི་གཏེར་ལ་ཕྱག་འཚལ་ལོ། །གང་སྐུ་ཟླ་བ་གཞོན་ནུའི་བསིལ་ཟེར་གྱིས། །འགྲོ་བའི་ཉོན་མོངས་ཚད་གདུང་གཏན་བཅིལ་ཞིང་། །ཕན་དང་བདེ་བའི་ཆུ་གཏེར་རྒྱས་མཛད་པ། །ཉེ་སྲས་པདྨའི་སྤྱན་ལ་ཕྱག་འཚལ་ལོ། །མཐུ་སྟོབས་རྡོ་རྗེ་འབར་བའི་གཟི་བྱིན་གྱིས། །ལོག་འདྲེན་བདུད་ཀྱི་སྡེ་ཚོགས་དཔའ་བཀོང་ནས། །གསང་ཆེན་འབྲས་བུའི་ཐེག་པ་རྒྱས་མཛད་པའི། །རྒྱལ་སྲས་གསང་འཛིན་མགོན་པོར་ཕྱག་འཚལ་ལོ། །རྒྱལ་བ་ཀུན་གྱིས་མཁྱེན་བརྩེ་ནུས་པའི་སྟོབས། །གཅིག་བསྡོམས་བླ་མ་རིགས་གསུམ་སེམས་དཔའ་ལ། །མི་ཕྱེད་སྙིང་ནས་གུས་པས་གསོལ་བཏབ་མཐུས། །མཆོག་དང་ཐུན་མོངས་དངོས་གྲུབ་འབད་མེད་སྩོལ། །རང་དོན་ཐོས་བསམ་སྒོམ་པའི་ཤེས་རབ་རྒྱས། །གཞན་དོན་བྱམས་དང་སྙིང་རྗེ་མཐའ་རུ་ཕྱིན། །གཉིས་དོན་མཐུ་སྟོབས་ནུས་པའི་རྩལ་ཆེན་རྫོགས། །བསྟན་འགྲོའི་ཕུན་ཚོགས་དགེ་འགྲུབ་བཀྲ་ཤིས་ཤོག །ཅེས་པའང་རང་གནས་བཀྲ་ཤིང་ཁང་གསར་ནང་ཐོག་མར་ཞག་ལ་ཕེབས་ཚེ་རྟེན་འབྲེལ་གྱི་ཚིགས་སུ་བཅད་པ་བརྗོད་པའོ།།
༈ ན་མོ་གུ་རུ་བུདྡྷ་བོ་དྷི་ས་ཏྭ་ཡ། རྣམ་འདྲེན་རྒྱུ་སྐར་ཕྲེང་བའི་དབུས་ན། །ཐུགས་བསྐྱེད་ཟླ་བ་རྒྱས་པའི་དཀྱིལ་འཁོར། །སྙིགས་ལྔའི་རྒུད་པའི་གདུང་བ་བཅིལ་མཛད། །བླ་མ་ཐུབ་པའི་དབང་པོ་མཁྱེན་ནོ། །དོན་གཉིས་མཐའ་རུ་ཕྱིན་པར་མཛོད་ཅིག །གང་སྐུའི་རྣམ་འགྱུར་ཡུད་ཙམ་དྲན་པས། །རྨོངས་ཆེན་བློ་ཡི་མུན་ཚོགས་བསལ་ནས། །མཁྱེན་རབ་ཡེ་ཤེས་སྣང་བ་རྒྱས་མཛད། །བླ་མ་འཇམ་དཔལ་དཔའ་བོ་མཁྱེན་ནོ། །སྤོོབས་པའི་གཏེར་བརྒྱད་གྲོལ་བར་མཛོད་ཅིག །གང་མཚན་ལན་གཅིག་ཐོས་པ་ཙམ་གྱིས། །ལྡོག་དཀའ་སྲིད་པའི་ཆུ་ཀླུང་བཟློག་ཅིང་། །ཐེག་ཆེན་ལམ་གྱི་ངལ་སྟེགས་ལ་སྦྱོར། །བླ་མ་སྤྱན་རས་གཟིགས་དབང་མཁྱེན་ནོ། །བྱང་ཆུབ་སེམས་ཆོག་འབྱོང་བར་མཛོད་ཅིག །གང་ཞིག་དྲན་ན་ཆུ་སྲིན་རྒྱལ་མཚན། །ཁྲོས་པའི་རུ་མཚོན་འབུམ་ཕྲག་བསྙིལ་མཛད། །གསང་སྔགས་རིགས་སྔགས་ཀུན་གྱི་བདག་པོ། །བླ་མ་ལག་ན་རྡོ་རྗེ་མཁྱེན་ནོ། །བྱང་ཆུབ་ལམ་གྱི་འགལ་རྐྱེན་སོལ་ཅིག །བྱམས་པའི་ཏིང་འཛིན་ནོར་བུའི་ཞགས་པ། །གཅིག་པུ་ཉིད་དེས་རྣམ་གྲོལ་ཡོན་ཏན། །ཁྲག་ཁྲིག་སྡུད་ལ་མི་ངལ་ཐབས་མཁས། །བླ་མ་མ་ཕམ་མགོན་པོ་མཁྱེན་ནོ། །བསླབ་གསུམ་མཐའ་རུ་ཕྱིན་པར་མཛོད་ཅིག །བློ་ཆེན་གཞན་ལ་བསྐལ་པར་བོས་ལས། །ཁྱོད་མཚན་ལན་གཅིག་དྲན་གང་དོན་ཆེར། །བདེན་གསུང་སེངྒེའི་སྒྲ་ཡིས་བསྔགས་པའི། །བླ་མ་ས་ཡི་སྙིང་པོ་མཁྱེན་ནོ། །སྣོད་བཅུད་དགེ་མཚན་སྤེལ་བར་མཛོད་ཅིག །འགྲོ་ཀུན་འཇམ་དཔལ་དཔའ་བོའི་སྤོབས་པ། །ཐོབ་ཀྱང་གང་གི་ཏིང་འཛིན་རྣམ་གྲངས། །ཆ་ཙམ་དཔོག་དཀར་ཐུབ་པས་རྗེས་བསྔགས། །བླ་མ་སྒྲིབ་པ་རྣམ་སེལ་མཁྱེན་ནོ། །སྒྲིབ་པའི་འཆིང་བ་མ་ལུས་ཁྲོལ་ཅིག །དུས་དྲུག་གཟིགས་པ་འགྲོ་ལ་བཙའ་བས། །སུ་ཞིག་རྒུད་པས་མནར་བ་རྗེས་འཛིན། །ལྟུང་ལྡན་རྣམས་ཀྱི་འཁར་བ་གཅིག་པུ། །བླ་མ་ནམ་མཁའི་སྙིང་པོ་མཁྱེན་ནོ། །ལྟུང་བའི་རི་བོ་རྨང་ནས་འགྱེལ་མཛོད། །ཆོས་དབྱིངས་དང་མཉམ་སྨོན་ལམ་སྤྲིན་ལས། །དོན་གཉིས་འདོད་པ་འཇོ་བའི་ཆར་བཟང་། །སྲིད་མཐའི་བར་དུ་ཅི་དགར་འབད་མཛད། །བླ་མ་ཀུན་ཏུ་བཟང་པོ་མཁྱེན་ནོ། །སྨོན་ལམ་མཐའ་རུ་ཕྱིན་པར་མཛོད་ཅིག །བདག་སོགས་འགྲོ་ཀུན་སྐྱེ་ཞིང་སྐྱེ་བར། །དལ་འབྱོར་རྟེན་ཐོབ་ཐེག་ཆེན་རིགས་སད། །མཚན་ལྡན་བཤེས་བསྟེན་བསླབ་གསུམ་རྣམ་དག །ཐོས་བསམ་སྒོམ་པ་མཐར་ཕྱིན་མཛོད་ཅིག །རླབས་ཆེན་རྫོགས་སྨིན་སྦྱངས་པ་རྒྱ་མཚོ། །དཔའ་ཆེན་རྣམས་ཀྱི་རྣམ་ཐར་རྗེས་སྙོགས། །མུ་མེད་འགྲོ་ཀུན་བདག་ཉིད་གཅིག་པུས། །འདྲེན་པའི་ནུས་པ་མྱུར་དུ་སྩོལ་མཛོད། །སྲིད་ན་ཕན་བདེ་ཀུན་གྱི་གཞི་གཅིག །དྲི་མེད་རྒྱལ་བསྟན་ལུང་དང་རྟོགས་པ། །སྲིད་མཐའི་བར་དུ་བཤད་དང་སྒྲུབ་པས། །མི་ཉམས་ཡར་ཟླའི་དཔལ་ལྟར་མཛོད་ཅིག །གྲངས་མེད་དུས་ནས་གཉེན་གྱུར་འགྲོ་ཚོགས། །སྡུག་བསྔལ་ཀུན་འབྱུང་རྒྱུར་བཅས་བྱང་ནས། །ལམ་བདེན་ཐེག་མཆོག་བཞོན་པ་ལ་བརྟེན། །རྣམ་མཁྱེན་གྲོང་དུ་དབུགས་དབྱུང་མཛོད་ཅིག །གནས་སྐབས་སུ་ཡང་མི་མཐུན་དུས་ཀྱི། །རྒུད་པའི་གྲང་རེག་མ་ལུས་རྒྱུན་ཆད། །རྫོགས་ལྡན་དབྱར་གྱི་དུས་སྟོན་བཟང་པོས། །ཕྱོགས་དུས་ཀུན་ཏུ་ཁྱབ་པར་མཛོད་ཅིག །ཅེས་པའང་རྒྱལ་སྲས་གཞན་ཕན་ཆོས་ཀྱི་བློ་གྲོས་ཀྱི་ལྷག་བསམ་རྩེ་གཅིག་པས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག
༈ ཨེ་མ་ཧོ། ཁྱད་ཆོས་དྲུག་ལྡན་སྟོན་པ་ཀུན་ཏུ་བཟང་། །བདེ་ཆེན་ཁ་སྦྱོར་བདུན་ལྡན་རྡོ་རྗེ་སེམས། །ངེས་གསང་བཀའ་ཡི་སྡུད་པོ་རྡོ་རྗེ་ཅན། །སྐུ་གསུམ་སྟོན་འཁོར་རྣམས་ལ་གསོལ་བ་འདེབས། །ཏནྟྲ་བཅོ་བརྒྱད་སྙིང་པོའི་ལམ་བཟང་ཆེ། །གསལ་མཛད་སྨྲ་བའི་ཉི་མ་ལི་ཙཱ་བི། །དྲི་མེད་གྲགས་སོགས་ལྷ་ཀླུ་གནོད་སྦྱིན་སྲིན། །རིགས་ཅན་དྲྭ་མ་ལྔ་ལ་གསོལ་བ་འདེབས། །རྒྱུད་སྡེ་རྒྱ་མཚོའི་ཤིང་རྟ་རྒྱལ་པོ་ཛཿ། །ཟབ་གཏེར་སྒྲུབ་སྡེའི་སྒོ་འབྱེད་རིག་འཛིན་བརྒྱད། །ཐེག་མཆོག་བསྟན་པའི་མངའ་བདག་དགའ་རབ་རྗེ། །རིག་འཛིན་གྲུབ་མཆོག་ཡོངས་ལ་གསོལ་བ་འདེབས། །དུས་གསུམ་རྒྱལ་ཀུན་ངོ་བོ་པདྨ་འབྱུང་། །ཐུགས་སྲས་ལས་ཅན་སྙིང་གི་བུ་དགུ་དང་། །བཀའ་བབས་ཉེར་གཅིག་འབངས་རིགས་ཉེར་ལྔ་སོགས། །རྣལ་འབྱོར་དབང་ཕྱུག་རྣམས་ལ་གསོལ་བ་འདེབས། །རྣམ་གསུམ་ཡོ་གའི་བབས་སོ་རྨ་གཉགས་གནུབས། །གསང་བདག་དངོས་བྱོན་ཟུར་པ་མེས་དབོན་གསུམ། །སྨྲ་བའི་ཉི་མ་རོང་ཀློང་མྱོས་སྟོན་སོགས། །བརྒྱུད་འཛིན་སློབ་མར་བཅས་ལ་གསོལ་བ་འདེབས། །གསོལ་བ་འདེབས་སོ་སྐུ་གསུམ་སྟོན་འཁོར་ཚོགས། །བྱིན་གྱིས་རློབས་ཤིག་རིག་འཛིན་རྩལ་འཆང་རྣམས། །བདག་སོགས་འགྲོ་ལ་སྨིན་གྲོལ་དབང་བསྐུར་ཞིང་། །རྣམ་བཞིའི་རིག་འཛིན་གྲུབ་པའི་དངོས་གྲུབ་སྩོལ། །ཕུང་ཁམས་སྐྱེ་མཆེད་ལྷ་ཡི་འཁོར་ལོར་དག །རྩ་རླུང་ཐིག་ལེའི་བྱེད་བཅིང་དབུ་མར་ཐིམ། །སྣང་བཞི་མཐར་ཕྱིན་འཕོ་ཆེན་རྡོ་རྗེའི་སྐུ། །མངོན་གྱུར་དོན་གཉིས་མཐར་ཕྱིན་བྱིན་གྱིས་རློབས། །ཞེས་པའང་མཁན་ཆེན་རྡོ་རྗེ་འཛིན་པའི་སྐུ་ཚ་གར་དབང་བསྟན་འཛིན་གྱིས་བཞེད་སྐོང་དུ་བནྡེ་འཇམ་དབྱངས་བློ་གྲོས་རྒྱ་མཚོས་བྲིས་ཤིང་གསོལ་བ་བཏབ་པ་དགེ།
༈ བསྟན་པའི་བདག་པོ་མཉམ་མེད་ཤཱཀྱའི་ཏོག །དེ་སྲས་མཚུངས་མེད་རྒྱལ་ཚབ་མ་ཕམ་མགོན། །རིགས་གསུམ་སེམས་དཔའ་གནས་བརྟན་བཅུ་དྲུག་སོགས། །སྟོན་དང་བསྟན་འཛིན་ཚོགས་ལ་གསོལ་བ་འདེབས། །མཁྱེན་པའི་གཏེར་གྱུར་འཇམ་མགོན་དགྱེས་པའི་སྲས། །ཆོས་ཉིད་བདེན་མཐོང་རྣམ་གསུམ་བཀའ་འཁོར་འགྲེལ། །རྒོལ་ངན་དཔུང་བཅོམ་འཕགས་པ་ཀླུ་སྒྲུབ་ཅེས། །ཟབ་མོ་ལྟ་བའི་རྒྱན་ལ༴ དེ་གཞུང་ཟབ་བརླིང་སྔོན་མེད་མཚོ་ཆེན་མཆོག །མཁྱེན་དཔྱོད་ལྷུན་པོས་བསྲུབས་ལས་ཉེར་ཐོན་པའི། །དགོངས་འགྲེལ་ཉི་ཟླའི་དཀྱིལ་འཁོར་སྣང་མཛད་པ། །ཨཱཪྱ་དེ་ཝའི་ཞབས་ལ༴ བྱམས་པས་རྗེས་བཟུང་ས་གསུམ་མངོན་རྟོགས་བརྙེས། །ཐེག་མཆོག་སེང་གེའི་ང་རོ་སྲིད་ན་བསྒྲགས། །རྒྱལ་བས་ལུང་བསྟན་འཕགས་པ་ཐོགས་མེད་ཅེས། །རྒྱ་ཆེན་སྤྱོད་པའི་རྒྱན་ལ༴ བྱམས་གཞུང་སྔོན་མེད་རྡུལ་བྲལ་མ་ཎི་ཀ །འཆད་རྩོད་རྒྱལ་མཚན་རྩེ་མོར་ལེགས་མཆོད་པས། །ས་གསུམ་ཆོས་ཀྱི་དབུལ་བ་གཏན་བཅིལ་མཛད། །སློབ་དཔོན་དབྱིག་གཉེན་ཞབས་ལ༴ མཁྱེན་པའི་འདབ་སྟོང་འཇམ་མགོན་ཉི་མས་བཞད། །རིགས་པའི་མཚོན་རྣོན་རྒོལ་ངན་ལྕེ་ལ་འདེབས། །རིག་སྔགས་མཆོག་གྲུབ་ཕྱོགས་ཀྱི་གླང་པོ་ཞེས། །རྣམ་དག་རིགས་པའི་རྒྱན་ལ༴ ཕས་རྒོལ་གླང་པོ་སྟོང་གི་སྤྱི་བོ་རུ། །འཇིགས་བྲལ་བདེ་བར་རྩེན་པའི་མིའི་སེང་གེ། །ལུང་རིགས་ང་རོས་ས་གསུམ་གཡོ་མཛད་པ། །དཔལ་ལྡན་ཆོས་ཀྱི་གྲགས་པར༴ འདུལ་བ་བདུད་རྩིའི་རྒྱན་གྱུར་ཡོན་ཤཱཀ་ཟུང་། །བྱང་ཆུབ་སེམས་ཀྱི་མངའ་བདག་རྨད་བྱུང་གཉིས། །ཕུལ་བྱུང་གྲགས་པའི་གཏེར་གྱུར་ཆེན་པོ་བཞི། །འཕགས་ཡུལ་བསྟན་སྐྱོང་རྣམས་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །ཚེ་རབས་ཀུན་ཏུ་འབྲལ་མེད་རྗེས་བཟུང་ཞིང་། །ཟབ་དང་རྒྱ་ཆེའི་ཐེག་མཆོག་སྙིང་པོའི་དོན། །ཇི་བཞིན་ལེགས་རྟོགས་སྲིད་མཐར་འཛིན་བྱེད་ཤོག །སྤྲོས་བྲལ་ལྟ་བའི་ཟབ་གནད་ཇི་བཞིན་རྟོགས། །རྒྱ་ཆེན་སྤྱོད་གཞུང་རྒྱ་མཚོའི་ཕ་མཐར་ཕྱིན། །སོ་སོ་ཡང་དག་རིག་བཞིས་ཆོས་སྒོ་འབྱེད། །དོན་གཉིས་མཐའ་རུ་ཕྱིན་པའི་བཀྲ་ཤིས་ཤོག །ཅེས་པའང་བཙུན་ཆུང་ཐུབ་བསྟན་ཆོས་འཕེལ་གྱི་བཞེད་ངོར་བནྡེ་འཇམ་དབྱངས་བློ་གྲོས་རྒྱ་མཚོས་བྲིས་ཤིང་གསོལ་བ་བཏབ་པ་སིདྡྷིརསྟུ།
༈ དཔལ་ལྡན་ཚོགས་གཉིས་ནོར་བུའི་སྤྲིན་ཆེན་ལས། །དགེ་ལེགས་འདོད་དགུའི་གྲུ་ཆར་འཇོ་བ་ཡིས། །ས་གསུམ་སྐྱེ་རྒུའི་རེ་བ་སྐོང་མཛད་པ། །ཐུབ་ཆེན་འགྲོ་བའི་བླ་མར་གསོལ་བ་འདེབས། །བསྟན་པ་ཡུན་རིང་གནས་པར་མཛད་དུ་གསོལ། །གཟོད་མ་ཉིད་ནས་མངོན་པར་བྱང་ཆུབ་ཀྱང་། །སྙིང་རྗེ་ཆེན་པོས་སྲིད་པ་ཇི་སྲིད་པར། །རྒྱལ་སྲས་ཚུལ་གྱིས་འགྲོ་དོན་མཛད་པ་ཡི། །འཕགས་པ་ཉེ་སྲས་བརྒྱད་ལ་གསོལ་བ་འདེབས། །བསྟན་པ་ཡུན་རིང་གནས་པར་མཛད་དུ་གསོལ། །ལྷ་མིའི་སྟོན་པ་ཤཱཀྱ་སེང་གེ་ཡི། །བསྟན་པ་རིན་ཆེན་གང་ལ་གཉེར་གཏད་པས། །སྣ་ཚོགས་ཐབས་ཀྱིས་བསྟན་འགྲོའི་ཕན་བདེ་སྤེལ། །དགྲ་བཅོམ་གནས་བརྟན་ཚོགས་ལ་གསོལ་བ་འདེབས། །བསྟན་པ་ཡུན་རིང་གནས་པར་མཛད་དུ་གསོལ། །འཛམ་གླིང་མཛེས་པའི་རྒྱན་མཆོག་རྨད་བྱུང་གཉིས། །རིག་འཛིན་རྣམ་བརྒྱད་གྲུབ་ཆེན་བརྒྱད་ཅུ་སོགས། །མཆོག་གི་སར་གནས་པཎ་གྲུབ་རིག་པ་འཛིན། །འཕགས་ཡུལ་བསྟན་སྐྱོང་རྣམས་ལ་གསོལ་བ་འདེབས། །བསྟན་པ་ཡུན་རིང་གནས་པར་མཛད་དུ་གསོལ། །རིགས་གསུམ་སྒྱུ་འཕྲུལ་མཁན་སློབ་ཆོས་རྒྱལ་དང་། །སྤྲུལ་པའི་ལོ་པཎ་རིག་འཛིན་བརྒྱུད་པར་བཅས། །ཟབ་གཏེར་སྒོ་འབྱེད་མཁས་གྲུབ་རིམ་བྱོན་ཚོགས། །སྔ་འགྱུར་བརྒྱུད་འཛིན་རྣམས་ལ༴ བསྟན་པ་ཡུན་རིང་གནས་པར༴ གཞན་ཡང་བཀའ་གདམས་གསར་རྙིང་ལམ་འབྲས་པ། །མར་ཤངས་བཀའ་བརྒྱུད་ཞི་གཅོད་སྦྱོར་བ་དྲུག །ཨོ་རྒྱན་བསྙེན་སྒྲུབ་ཤིང་རྟ་ཆེ་བརྒྱད་ཀྱི། །རིང་ལུགས་གསལ་མཛད་རྣམས་ལ༴ བསྟན་པ་ཡུན་རིང་གནས་པར༴ ཁྱད་པར་ཡེ་ཤེས་སྐུ་ཅན་འཁོར་ལོའི་མགོན། །རིས་བྲལ་བསྟན་པའི་ཉི་མ་གཅིག་པུ་པ། །རྣམ་ཐར་བསམ་ཡས་ཆོས་ཀྱི་དབྱིངས་ཁྱབ་པའི། །རྩ་བའི་བླ་མ་རྣམས་ལ༴ བསྟན་པ་ཡུན་རིང་གནས༴ གཞན་ཡང་རྒྱལ་བའི་སྤྱན་སྔར་ཞལ་བཞེས་ཤིང་། །བསྟན་པ་རིན་ཆེན་མཛོད་ཀྱི་གཉེར་འཛིན་པ། །ཚངས་དང་བརྒྱ་བྱིན་རྒྱལ་ཆེན་བཞི་ལ་སོགས། །དཀར་ཕྱོགས་སྐྱོང་བ་རྣམས་ལ༴ བསྟན་པ་ཡུན་རིང་༴ ཀྱེ་མ་བདག་འདྲ་སྙིགས་སྤྱོད་གདུལ་དཀའི་འགྲོ། །མ་རིག་དབང་གིས་ཆོས་ཀྱི་གནད་མ་རྟོགས། །ཐེ་ཚོམ་ཆེ་བས་བཀའ་ལ་ཡིད་གཉིས་ཟ། །སྐྱོན་རྟོག་རགས་པས་དག་སྣང་སྒོ་མོ་འགགས། །གྲོགས་ངན་རྐྱེན་གྱིས་གྲུབ་མཐའི་ཕྱོགས་ཞེན་ཤོར། །ཆོས་སྤོང་ངན་འགྲོའི་གཡང་སར་འཕྱན་ལ་ཉེ། །འདི་ལས་སྐྱོབས་ཤིག་རྒྱལ་བ་སྲས་དང་བཅས། །བྱིན་གྱིས་རློབས་ཤིག་རིག་འཛིན་བརྒྱུད་པའི་ཚོགས། །ཆོས་དྲེད་འདི་ལས་མྱུར་དུ་བསྒྲལ་དུ་གསོལ། །ཆོས་དང་སེམས་རྒྱུད་འདྲེས་པའི་ཉམས་ལེན་གྱིས། །བདག་འཛིན་ཁོང་དུ་སོད་པར་བྱིན་གྱིས་རློབས། །མཚུངས་མེད་བླ་མའི་ཞབས་པད་སྐལ་བརྒྱར་བརྟན། །དགེ་འདུན་སྡེ་འཕེལ་སྤང་ཀློག་ཕྲིན་ལས་རྒྱས། །ཀླ་ཀློའི་འཇིགས་ཞི་འགྲོ་ཚོགས་བསྟན་ལ་གུས། །ཐུབ་བསྟན་ཡུན་རིང་གནས་པའི་བཀྲ་ཤིས་ཤོག །ཅེས་པའང་འཇམ་དབྱངས་བློ་གྲོས་རྒྱ་མཚོས་རྩེ་གཅིག་ཏུ་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག