ཀུན་མཁྱེན་ངག་གི་དབང་པོ་ལ་གསོལ་བ་འདེབས་པ་མོས་གུས་རྒྱ་མཚོའི་རླབས་ཕྲེང་།

༄༅། །ཀུན་མཁྱེན་ངག་གི་དབང་པོ་ལ་གསོལ་བ་འདེབས་པ་མོས་གུས་རྒྱ་མཚོའི་རླབས་ཕྲེང་བཞུགས། ན་མོ་གུ་རུ་ཤཱི་ལ་མ་ཏི་ཡེ། དཔལ་ལྡན་དགེ་ལེགས་བྱེ་བའི་ཆུ་གཏེར་ལས། །ཉེར་ཐོན་ཕུལ་བྱུང་མཁྱེན་བརྩེའི་འོད་ཟེར་གྱིས། །ཐུབ་བསྟན་པད་ཚལ་ཆེས་ཆེར་བཞད་མཛད་པ། །ཀུན་མཁྱེན་ངག་གི་དབང་པོར་གསོལ་བ་འདེབས། །ངེས་འབྱུང་འཛིན་མའི་གཞི་ལས་ཉེར་འཁྲུངས་པའི། །དྲི་མེད་བསླབ་གསུམ་འདབ་རྒྱས་པདྨ་དཀར། །ལེགས་བཤད་བདུད་རྩི་འབུམ་ཕྲག་འཇོ་བའི་དཔྱིད། །ཀུན་མཁྱེན་ངག་གི་དབང་༴ འགྲོ་སྒྲོལ་དམ་བཅའི་གོ་ཆ་རབ་བརྟན་ཅིང་། །ཚད་མེད་རྣམ་བཞིའི་ཡལ་འདབ་ཆེར་རྒྱས་ཏེ། །ཕྱིན་དྲུག་སྤྱོད་པ་རྒྱ་མཚོའི་འབྲས་སྨིན་པ། །ཀུན་མཁྱེན་ངག་གི་དབང་༴ ཐུན་མོང་ཐུན་མིན་གཙུག་ལག་ལམ་གསུམ་འབབ། །མ་ལུས་ཧུབ་ཀྱིས་དྲངས་པའི་དཔལ་ཡོན་གྱིས། །དྲི་མེད་ལུང་གི་ལུས་སྟོབས་ཆེར་རྒྱས་པ། །ཀུན་མཁྱེན་ངག་གི་དབང་༴ ཡང་དག་ཚད་མ་གསུམ་གྱི་རྣམ་དཔྱོད་ཀྱིས། །འཁྲུལ་པའི་ཆུ་བོ་མ་ལུས་རིང་དོར་ནས། །ཐེག་མཆོག་འོ་མའི་བཅུད་ལ་དགྱེས་རོལ་པའི། །ཀུན་མཁྱེན་ངག་གི་དབང་༴ རྒྱལ་བས་ལེགས་གསུངས་རྒྱུ་དང་འབྲས་བུ་ཡི། །གཞུང་ལུགས་མཐའ་དག་གདམས་པར་ཤར་བ་ཡི། །སྒོམ་བྱུང་ཀློང་ནས་རྡོལ་ལ་མཚུངས་མེད་པ། །ཀུན་མཁྱེན་ངག་གི་དབང་༴ རང་གི་ཐུགས་སུ་ཆུད་པའི་བདུད་རྩི་མཆོག །ཟང་ཟིང་མེད་པར་ཐུགས་བརྩེ་འབའ་ཞིག་གིས། གདུལ་འགྲོ་ཡོངས་ལ་ཅི་དགར་སྩོལ་མཛད་པ། །ཀུན་མཁྱེན་ངག་གི་དབང་༴ མང་དུ་ཐོས་པ་ལུང་གི་རྩལ་རྫོགས་ཤིང་། །ཕ་རོལ་རྒོལ་འཇོམས་རིགས་པའི་གད་རྒྱངས་ཀྱིས། །ལོག་སྨྲའི་ཝ་སྐྱེས་སྔངས་མཛད་ཁ་ལྔ་པ། །ཀུན་མཁྱེན་ངག་གི་དབང་༴ ངན་པ་དྲུག་དང་འཁྲུལ་པའི་དྲི་བྲལ་ཞིང་། །ཡོན་ཏན་གསུམ་རྫོགས་རྒྱལ་བ་དགྱེས་པའི་ལམ། །ལེགས་བཤད་ཆར་གྱིས་ས་གསུམ་ཁྱབ་མཛད་པ། །ཀུན་མཁྱེན་ངག་གི་དབང་༴ འཇམ་དཔལ་ཡབ་ཡུམ་མཁྱེན་བརྩེའི་འོད་ཟེར་གྱིས། །བློ་མཆོག་པད་ཚལ་ཅིག་ཅར་བཞད་པ་ལ། །དཔལ་ལྡན་གངས་རིའི་ཁྲོད་ན་ཟླ་མེད་པ། །ཀུན་མཁྱེན་ངག་གི་དབང་༴ མཁས་རློམ་བྲིས་པའི་མར་མེ་འབུམ་ཕྲག་གིས། །སེལ་བར་མ་ནུས་ཐུབ་བསྟན་རྒུད་པའི་མུན། །མཐའ་དག་སེལ་ལ་སྔོན་མེད་ཉིན་མོར་བྱེད། །ཀུན་མཁྱེན་ངག་གི་དབང་༴ མདོ་དང་སྔགས་ཀྱི་ཟབ་དགོངས་བརླིང་དྲགས་པས། །ཇི་བཞིན་མ་རྟོག་འགལ་བ་འཛིན་པའི་དྲི། །མཐའ་དག་འཁྲུད་མཛད་སྔར་མེད་ཤིང་རྟ་མཆོག །ཀུན་མཁྱེན་ངག་གི་དབང་༴ འཇིག་རྟེན་ལྷ་མིས་བཏུད་ཀྱང་ཁེངས་དྲེགས་བྲལ། །ཆོས་རྣམས་མཉམ་པར་རྟོགས་ཀྱང་ལས་འབྲས་ཞིབ། །ཆོས་བརྒྱད་འཆིང་བྲལ་ཡང་དག་སྤོང་བ་པ། །ཀུན་མཁྱེན་ངག་གི་དབང་༴ རབ་འབྱམས་ལྷག་པའི་ལྷ་ཡིས་རྗེས་བཟུང་ཞིང་། །བརྟུལ་ཞུགས་གྲུབ་པས་སྡེ་བརྒྱད་བྲན་དུ་བཀོལ། །མ་ཚོགས་ཌཱ་ཀིའི་ཚོགས་དཔོན་ཧེ་རུ་ཀཿ། །ཀུན་མཁྱེན་ངག་གི་དབང་༴ པད་འབྱུང་བི་མའི་ཐུགས་རྗེའི་སྤྲིན་ཆེན་ལས། །བྱིན་རླབས་ཆར་གྱི་ཀུན་ཏུ་བརླན་པའི་རྒྱུས། །འོད་གསལ་ཐུགས་གཏེར་ཀློང་ནས་རྡོལ་བའི་དཔལ། ཀུན་མཁྱེན་ངག་གི་དབང་༴ ཆོས་ཅན་རོལ་པ་སྣ་ཚོགས་སྣང་བའི་སྤྲིན། །ཆོས་ཉིད་ཀ་དག་ཀློང་དུ་དེངས་པ་ཡིས། །ཀུན་བཟང་དགོངས་ཀློང་མངོན་གྱུར་ཀློང་ཆེན་པ། །ཀུན་མཁྱེན་ངག་གི་དབང་༴ མདོར་ན་ཕྱོགས་བཅུའི་བདེ་གཤེགས་སྲས་བཅས་ཀྱི། །མཁྱེན་བརྩེ་ནུས་པའི་རྣམ་ཐར་གཅིག་བསྡོམས་པ། །སྲིད་པ་གསུམ་ན་དཔེ་མེད་ཡོན་ཏན་ཅན། །ཀུན་མཁྱེན་ངག་གི་དབང་པོར་གསོལ་བ་འདེབས། །གྲུབ་མཐའ་གཞན་གྱི་ཆེན་པོར་གྲགས་རྣམས་ཀྱིས། །ངལ་བརྒྱས་སྒྲུབ་པའི་བསྟན་བཅོས་མང་མཐོང་ཡང་། །བདག་བློ་དད་པའི་མུ་ཏིག་འ ཁྲི་ཤིང་ནི། །ཀུན་མཁྱེན་ཁྱེད་ལ་གཅིག་ཏུ་གུས་པར་གྱུར། །དེ་སླད་ཁ་ཙམ་མིན་པའི་གདུང་དབྱངས་ཀྱིས། །ཉིན་མཚན་ཀུན་ཏུ་གུས་པས་གསོལ་འདེབས་ན། །མཁྱེན་བརྩེའི་ཡེ་ཤེས་དགོངས་པའི་རྩལ་ཕྱུང་ལ། །དོན་གཉིས་ལྷུན་གྱིས་གྲུབ་པའི་དངོས་གྲུབ་སྩོལ། །ཡང་དག་ལམ་སྟོན་དགེ་བའི་བཤེས་གཉེན་དང་། །གོ ལ་འཕྱུགས་མེད་པའི་གདམས་ངག་དང་འཕྲད་ནས། །རང་དབང་དམ་པའི་ཆོས་ལ་སྤྱོད་པ་ཡི། །སྐལ་བཟང་ལ་འུར་སྩོལ་ཅིག་ཀུན་མཁྱེན་རྗེ། །མ་རིག་སྲིན་མོས་འདོད་ཡོན་བསླུ་བྲིད་ཀྱིས། །འཇིགས་རུང་སྲིད་པའི་བརྩོན་རར་འཆིང་གྱུར་ན། །རང་མཚང་ལྷག་པར་རྟོགས་པའི་གཞན་དབང་གིས། །བཅོས་མིན་ངེས་འབྱུང་སྐྱེད་ཅིག་ཀུན་མཁྱེན་རྗེ། །གཅིག་པུར་དབེན་པར་གནས་པའི་བཙུན་པ་ལ། །རྣམ་གཡེང་འདུ་འཛིའི་བར་ཆད་འབྱུང་སྲིད་ན། །མི་རྟག་འཆི་བ་སྙིང་ལ་ཞུགས་པ་ཡིས། །འབད་མེད་བརྩོན་འགྲུས་བསྐྱེད་ཅིག༴ ཡང་དག་བྱང་ཆུབ་སྒྲུབ་པའི་གེགས་གྱུར་པའི། །ནག་ཕྱོགས་གདུག་པའི་ཟེར་རླངས་འཐུལ་བའི་ཚེ། །ནུས་པའི་མཐུ་ཡིས་ཕྱེ་མར་བརླགས་ནས་ཀྱང་། །ཆོས་མཐུན་བསམ་དགུ་འགྲུབ་མཛོད༴ འཇིགས་རུང་བེ་ཅོན་ལག་ཐོགས་འཆི་བདག་གི། །མི་བཟད་དུས་ཀྱི་ཞགས་པས་ཟིན་ཉེ་ན། །དབང་བཅུ་མཐའ་རུ་ཕྱིན་པའི་དགེ་མཚན་གྱིས། །རྡོ་རྗེའི་ཚེ་མཆོག་སྩོལ་ཅིག༴ ཕྱོགས་ལྷུང་ཆགས་སྡང་མུན་པས་རབ་སྒྲིབ་སྟེ། །ཆོས་སྤང་ངན་འགྲོའི་གཡང་སར་ལྷུང་ཉེ་ན། །བསྟན་པ་འགལ་མེད་རྟོགས་པའི་ཤེས་རབ་ཀྱིས། །དག་པའི་སྣང་དཀར་བསྐྱེད་ཅིག༴ ཐོག་མེད་གོམས་པའི་མ་རིག་སྦུབས་འཐུམས་པས། །ཆོས་དང་ཆོས་མིན་འབྱེད་པའི་མཐུ་དམན་ན། །གཟུངས་སྒོ་སྤོབས་པའི་གཏེར་བརྒྱད་གྲོལ་བ་ཡི། །དྲི་མེད་བློ་གྲོས་བསྐྱེད་ཅིག༴ རང་དོན་ཡིད་བྱེད་ཀུན་རྟོག་ཆོམ་པོ་དག །ཐེག་ཆེན་ནོར་མཆོག་འཕྲོག་པར་ཆས་གྱུར་ན། །བདག་བས་གཞན་གཅེས་གོམས་པའི་རྟེན་འབྲེལ་གྱིས། །ཕྱིན་དྲུག་ལམ་ལ་སྦྱོར་ཅིག༴ གྲོགས་ངན་རྐྱེན་གྱིས་བསྒྱུར་སོགས་ཉོན་མོངས་པས། །སྡོམ་གསུམ་བསླབ་ཁྲིམས་ལྷོད་{ སློད}པོར་གྱུར་པའི་ཚེ། །གནང་བཀག་ཞིབ་མོར་འབྱེད་པའི་དཔལ་ཡོན་གྱིས། །རྩིང་སྤྱོད་དྲི་མ་སོལ་ཅིག༴ དམན་པའི་ལྟ་སྤྱོད་བཅོས་མས་མགོ་བསྐོར་ན། །སྣང་སྲིད་ཆོས་ཀུན་ཡེ་ནས་སངས་རྒྱས་པ། །དག་པ་རབ་འབྱམས་འཁོར་ལོའི་དཀྱིལ་འཁོར་ཆེར། །མཉམ་པའི་དོན་ལ་སྦྱོར་ཅིག༴ སྣང་བཅས་ལྷ་སྐུར་གསལ་བའི་བསྐྱེད་རིམ་དང་། །རང་བཞིན་འོད་གསལ་ལྷན་སྐྱེས་རྫོགས་རིམ་ཆེ། །ཡེ་ནས་ཟུང་འཇུག་མཉམ་པའི་རྒྱས་ཐེབས་པའི། །རིམ་གཉིས་ལམ་ལ་སྦྱོར་ཅིག༴ ཀ་དག་སྟོང་པའི་དབྱིངས་དང་དབྱེར་མེད་པའི། །འོད་གསལ་ལྷུན་གྲུབ་ཡེ་ཤེས་ཆེན་པོའི་གདངས། །མཁའ་འདྲ་འཕོ་འགྱུར་བྲལ་བའི་གདེང་རྙེད་ནས། །ཡིད་དཔྱོད་གྲུབ་མཐའ་གཞིག་མཛོད༴ སྣ་ཚོགས་སྣང་སེམས་འཁྲུལ་བའི་བུན་ལོང་གིས། །ཟང་ཐལ་རང་བྱུང་རིག་པའི་སྒོ་སྒྲིབ་ན། །སྲིད་ཞི་མཉམ་ཉིད་རྟོགས་པའི་རིག་མདངས་ཀྱིས། །བློ་འདས་རང་ངོ་སྤྲོད་ཅིག་ཀུན་མཁྱེན་རྗེ། །མདོར་ན་དོན་གཉིས་ལྷུན་གྲུབ་ཆོས་ཀྱི་རྒྱལ། །མཁྱེན་བརྩེ་ནུས་པའི་ཡོན་ཏན་དཔག་ཡས་གཏེར། །མཆོག་གི་གསང་གསུམ་ཡོན་ཏན་ཕྲིན་ལས་དང་། །ཀུན་ནས་མཉམ་པར་མཛོད་ཅིག་ཀུན་མཁྱེན་རྗེ། །ཀ་དག་ལྟ་བས་ཉམས་ཀྱི་འཛིན་སྟངས་བུད། །ལྷུན་གྲུབ་བསྒོམས་པས་ཟུང་འཇུག་འོད་སྐུར་གྲོལ། །དབྱིངས་སྣང་ནང་གསལ་གཞོན་ནུ་བུམ་སྐུའི་སྦུབས། །ཀུན་བཟང་ཆོས་སྐུའི་རྒྱལ་སྲིད་ཟིན་པར་ཤོག །སླར་ཡང་གཟུགས་སྐུའི་བཀོད་པ་འབྱམས་ཀླས་པས། །མ་རིག་འཁྲུལ་བས་བསླད་པའི་འགྲོ་བ་རྣམས། །རང་བྱུང་གདོད་མའི་གྲོལ་སར་དབུགས་ཕྱུང་སྟེ། །ཁམས་གསུམ་འཁོར་བ་དོང་ནས་སྤྲུགས་པར་ཤོག །བཀྲ་ཤིས་ཉི་མ་སྟོང་ཁམས་བརྡལ་བ་ཆེ། །ཀུན་མཁྱེན་བརྒྱུད་པའི་རིང་ལུགས་ཉིན་མོར་བྱེད། །སྲིད་མཐའི་བར་དུ་མི་ཉམས་དར་ཞིང་རྒྱས། །གྲོལ་བ་དྲུག་ལྡན་བཀྲ་ཤིས་འཕེལ་གྱུར་ཅིག །ཅེས་པའང་མོས་གུས་ལམ་དུ་བྱེད་པའི་བཙུན་ཆུང་པདྨ་བི་ཛས་རང་ལོ་ཉེར་བཞི་པར་དབེན་པའི་རི་བོར་རིམ་གཉིས་ཀྱི་ཐུན་མཚམས་སུ་རྩེ་གཅིག་གུས་པའི་ཡིད་ཀྱིས་གང་ཤར་ཤུགས་འབྱུང་དུ་གསོལ་བ་བཏབ་པ་སྟེ། འདིས་ཀྱང་རྟོགས་པའི་ཡོན་ཏན་ཡར་ཟླ་ལྟར་རྒྱས་པའི་རྒྱུར་གྱུར་ཅིག