བླ་མའི་གསོལ་འདེབས་དད་པའི་གསོས་སྨན།

༄༅། །བླ་མའི་གསོལ་འདེབས་དད་པའི་གསོས་སྨན་ཞེས་བྱ་བ་བཞུགས་སོ།། ན་མོ་གུ་རུ། དཔལ་ལྡན་ཡོན་ཏན་བྱེ་བའི་གཟི་འབར་ཞིང་། །དྲན་པ་ཙམ་གྱིས་གྲུབ་གཉིས་འདོད་དགུའི་ཆར། །ཅི་དགར་འཇོ་མཛད་མཚོ་སྐྱེས་རྡོ་རྗེ་འཆང་། །སྐྱབས་ཀུན་འདུས་ཞལ་རྗེ་ལ་གསོལ་བ་འདེབས། །བི་མ་བཻ་རོ་རྗེ་འབངས་ལོ་པཎ་ཚོགས། །རྨ་གཉགས་གནུབས་ཟུར་རོང་ཟོམ་དམ་གཙང་བྱམས། །ཉང་རལ་ཆོས་དབང་གླིང་ཆེན་བཅུ་གཉིས་སོགས། །བཀའ་གཏེར་བརྒྱུད་པའི་བླ་མར་གསོལ་བ་འདེབས། །འཕགས་བོད་མཁས་གྲུབ་རྒྱུ་སྐར་ཕྲེང་བའི་དབུས། །མཁྱེན་རྟོགས་ཆ་རྫོགས་སྔོན་མེད་རི་བོང་འཛིན། །ཐེག་མཆོག་བསྟན་པའི་ཤིང་རྟ་གཅིག་པུ་པ། །ཀློང་ཆེན་རབ་འབྱམས་ཞབས་ལ་གསོལ་བ་འདེབས། །བཻ་རོའི་རྣམ་འཕྲུལ་གཏེར་འབྱིན་གྲུབ་བརྒྱའི་གཙོ། །འགྲོ་འདུལ་ཕྲིན་ལས་ནམ་མཁའི་མཐའ་དང་མཉམ། །སྔ་འགྱུར་བསྟན་སྲོག་མཐུད་པའི་བཀའ་དྲིན་ཅན། །ཆོས་རྒྱལ་གཏེར་བདག་གླིང་པར༴ གཡུ་སྒྲ་དངོས་སྣང་སྐད་གཉིས་སྨྲ་བའི་དབང་། །བསླབ་གསུམ་རྣམ་དག་ངུར་སྨྲིག་འཛིན་པའི་ཏོག །དོན་གཉིས་མཐར་ཕྱིན་ལེགས་བཤད་བྱེ་བའི་གཏེར། །ངག་དབང་ཆོས་དཔལ་རྒྱ་མཚོར༴ མཁྱེན་རྟོགས་ཀློང་རྡོལ་དགོངས་པའི་རྩལ་ཆེན་རྫོགས། །སྙིང་ཐིག་བསྟན་པ་ནམ་མཁའི་ཁྱོན་ཡངས་བརྡལ། །མཚན་ཐོས་ཙམ་གྱིས་འགྲོ་ཀུན་སྨིན་ནུས་པའི། །ཀུན་མཁྱེན་འཇིགས་མེད་གླིང་པར༴ ལྷ་སྲས་རྣམ་རོལ་འགྲན་བྲལ་གྲུབ་པའི་དབང་། །ཐུགས་གཏེར་ཟབ་མོའི་བཀའ་བབ་ཆོས་ཀྱི་བདག །རྣམ་འཕྲུལ་དུ་མས་བསྟན་འགྲོའི་དོན་ཆེན་མཛད། །ཀུན་བཟང་གཞན་ཕན་ཞབས་ལ༴ ཕྱོགས་ལས་རྣམ་རྒྱལ་བརྟུལ་ཞུགས་སྤྱོད་པ་ཡིས། །གདུལ་དཀའ་དམུ་རྒོད་འགྲོ་བ་མ་ལུས་འདུལ། །ཧེ་རུ་ཀཿདཔལ་གྲུབ་བརྒྱའི་ཁྱུ་མཆོག་ཆེ། །ཡེ་ཤེས་རྡོ་རྗེའི་ཞབས་ལ༴ རྨད་བྱུང་བྱང་ཆུབ་སེམས་ཀྱི་གཏེར་མངའ་ཞིང་། །གཞན་ཕན་བསྡུ་དངོས་བཞི་ཡི་ཕྲིན་ལས་ཀྱིས། །འབྲེལ་ཚད་འདུན་མ་དགེ་ལ་སྦྱོར་བའི་དཔལ། །འཇིགས་མེད་རྒྱལ་བའི་མྱུ་གུ༴ རབ་འབྱམས་ཤེས་བྱའི་ཆོས་ཀུན་ཐུགས་སུ་ཆུད། །རིས་བྲལ་འགྲོ་བ་ཡོངས་ལ་བུ་ལྟར་བརྩེ། །སྤོང་ཀློག་བྱ་བས་བསྟན་འགྲོའི་དོན་ཆེན་མཛད། །འཇིགས་མེད་ཆོས་ཀྱི་དབང་པོར༴ བཀའ་བབ་རིན་ཆེན་བདུན་གྱིས་མདུན་བསུས་ནས། །ཐུབ་བསྟན་གླིང་བཞིའི་ཁྱོན་ལ་དབང་བསྒྱུར་བའི། །ཟླ་བྲལ་ཆོས་ཀྱི་རྒྱལ་པོ་ཐམས་ཅད་མཁྱེན། །འཇམ་དབྱངས་མཁྱེན་བརྩེའི་དབང་པོར༴ བཀའ་གཏེར་མདོ་རྒྱུད་ཀུན་ནས་ལུང་གིས་བསྔགས། །སྔོན་མེད་མཛོད་ལྔའི་ཤིང་རྟ་གསར་དུ་ཕྱེས། །ཡོངས་རྫོགས་བསྟན་པའི་ཉི་མ་རྡོ་རྗེ་འཆང་། །བློ་གྲོས་མཐའ་ཡས་ཞབས་ལ༴ མཁྱེན་པའི་འདབ་སྟོང་འཇམ་མགོན་ཉི་མས་བཞད། །མགྲིན་པའི་རྩ་མདུད་ངག་དབང་ལྷ་མོས་བཀྲོལ། །ཕྱོགས་ལས་རྣམ་རྒྱལ་སྨྲ་བའི་སེང་ཆེན་མཆོག །མི་ཕམ་འཇམ་དཔལ་རྡོ་རྗེར༴ བསླབ་གསུམ་སྦྱངས་ཡོན་བྱེ་བའི་དཔལ་གྱིས་འཕྱོར། །ངེས་གསང་ཐེག་མཆོག་སྙིང་པོའི་ཆོས་སྒོ་འབྱེད། །གསང་ཆེན་རྒྱུད་སྡེའི་མངའ་བདག་རྡོ་རྗེ་འཆང་། །མཁན་ཆེན་ཡོན་ཏན་རྒྱ་མཚོར༴ དྲི་མེད་བཤེས་གཉེན་ཡེ་ཤེས་སྒྱུ་མའི་གར། །རྨད་བྱུང་འཁོར་ལོ་གསུམ་གྱི་ཕྲིན་ལས་རྒྱས། །སྔ་འགྱུར་བསྟན་པའི་སྲོག་ཤིང་རྫོགས་ཆེན་པ། །ཐུབ་བསྟན་ཆོས་ཀྱི་རྡོ་རྗེར་གསོལ༴ མྱ་ངན་མེད་དཔལ་ཐུགས་རྗེའི་འོད་ཟེར་ལས། །ཉེར་སྣང་མཁྱེན་རྟོགས་རྩལ་རྫོགས་གྲུབ་པའི་དབང་། །འཁོར་ལོའི་མགོན་པོ་རྫོགས་ཆེན་རབ་འབྱམས་པ། །ཀུན་བཟང་བསྟན་པའི་ཉི་མར༴ ཟླ་བྲལ་སྐྱེས་ཆེན་དུ་མས་རྗེས་སུ་བཟུང་། །ཟབ་རྒྱས་སྨིན་གྲོལ་གདམས་པའི་བཅུད་ཀྱིས་གཏམས། །རིས་མེད་བསྟན་ལ་དག་པའི་སྣང་བ་ཅན། །འཇམ་དབྱངས་མཁས་གྲུབ་རྒྱ་མཚོར་གསོལ༴ དེ་ལྟར་མི་ཕྱེད་གུས་པས་གསོལ་བཏབ་མཐུས། །ཚེ་རབས་ཕྲེང་བར་དམ་པའི་མགོན་རྣམས་ཀྱིས། །རྗེས་བཟུང་ཐེག་མཆོག་རྩེ་མོའི་གསེང་ལམ་ནས། །དོན་གཉིས་མཐའ་རུ་ཕྱིན་པར་བྱིན་གྱིས་རློབས། །ཞེས་པའང་བསླབ་གསུམ་རྒྱན་མཛེས་གནམ་མཚོ་བླ་མ་དཔོན་གཡོག་གི་བཞེད་སྐོང་དུ་སྙོམ་ལས་པ་པདྨ་བི་ཛས་བྲིས་པ་དགེ།
༈ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྐུ་ལྔ་ལྷུན་གྲུབ་ཡེ་ཤེས་ལྔ་དང་ལྡན། །བདེ་གཤེགས་སྨིན་པ་རྒྱ་མཚོའི་འཁོར་གྱིས་བསྐོར། །གང་འདུལ་འཕྲུལ་མཚན་བཀོད་པ་བསམ་མི་ཁྱབ། །ཨོ་རྒྱན་རིན་པོ་ཆེ་ལ་གསོལ་བ་འདེབས། །རྒྱལ་རྣམས་སྤངས་རྟོགས་ཡོན་ཏན་རབ་མཉམ་ཡང་། །གདུལ་དཀའི་འགྲོ་བ་འདུལ་བའི་ཐུགས་རྗེ་ཅན། །སྙིགས་ལྔའི་རྒུད་སེལ་དྲིན་ཅན་སྤྲུལ་པའི་སྐུ། །ཨོ་རྒྱན་རིན་པོ་ཆེ་ལ༴ སྤྲེལ་ལོ་སྤྲེལ་ཟླ་ར་བའི་ཚེས་བཅུ་སོགས། །དུས་ཀྱི་རྒྱལ་པོ་ཚེས་བཅུ་ནམ་འཆར་ཚེ། །ངེས་པར་བོད་བྱོན་རྡོ་རྗེའི་ཐ་ཚིག་བཙན། །ཨོ་རྒྱན་རིན་པོ་ཆེ་ལ༴ བདག་སོགས་ཁྱོད་ཀྱི་གདུལ་བྱར་གྱུར་རྣམས་ལ། །སྐྱབས་གནས་རེ་ལྟོས་གཞན་ན་མ་འཚལ་བས། །ཐུགས་རྗེའི་ཁྱད་པར་ལྔ་ལྡན་བླ་མ་རྗེས། །འབྲལ་མེད་ཐུགས་རྗེས་ཟུངས་ཤིག་དྲིན་ཆེན་རྗེ། །གཞོམ་མེད་སྐུ་ཡི་བྱིན་རླབས་ལུས་ལ་ཞུགས། །བགྲེས་རྒུད་མེད་པའི་རྡོ་རྗེའི་ཚེ་མཆོག་སྩོལ། །ཡུལ་སྣང་གང་ཤར་ལྷ་སྐུའི་ཕྱག་རྒྱར་གྲོལ། །བུམ་དབང་ལམ་ཁྱེར་མཐའ་རུ་ཕྱིན་པར་ཤོག །འགགས་མེད་གསུང་གི་བྱིན་རླབས་ངག་ལ་ཞུགས། །ཚངས་དབྱངས་ཡན་ལག་དྲུག་ཅུའི་དཔལ་གྱིས་འཁྱུད། །འགྲོ་འོང་སྲོག་རྩོལ་དྷཱུ་ཏིའི་དབྱིངས་སུ་དག །གྲགས་སྟོང་གསང་དབང་ལམ་ཁྱེར་མཐར་ཕྱིན་ཤོག །འཁྲུལ་མེད་ཐུགས་ཀྱི་བྱིན་རླབས་སེམས་ལ་ཞུགས། །གཟུངས་སྤོབས་བློ་གྲོས་བྱེ་བའི་གཏེར་ཁ་འབྱེད། །འགྱུར་བཅས་ཟུག་རྔུ་འཕོ་བྲལ་དབྱིངས་སུ་ཐིམ། །བདེ་སྟོང་ཤེར་དབང་ལམ་ཁྱེར་མཐར་ཕྱིན་ཤོག །ཡེ་ཤེས་རྡོ་རྗེའི་དགོངས་པའི་གསང་མཛོད་འཕོས། །ཡིད་དཔྱོད་འཛིན་པའི་འཁྲུལ་བ་ཀུན་སངས་ནས། །ཀ་དག་ལྷུན་གྲུབ་དགོངས་པའི་རྩལ་ཆེན་རྫོགས། །རིག་སྟོང་བཞི་པའི་ལམ་ཁྱེར་མཐར་ཕྱིན་ཤོག །མདོར་ན་འདི་ནས་ཚེ་རབས་ཕྲེང་བ་རུ། །འབྲལ་བ་མེད་པར་གུ་རུས་རྗེས་བཟུང་མཐུས། །དོན་གཉིས་བསམ་པ་ཡིད་བཞིན་འགྲུབ་པ་དང་། །བསྟན་འགྲོའི་དགེ་མཚན་འཕེལ་བར་མཛད་དུ་གསོལ། །ཅེས་པའང་རབ་ཚེས་ལྕགས་སྤྲེལ་སྤྲེ་ཟླའི་ཚེས་བཅུའི་ཉིན་འོག་མིན་བླ་མའི་གཟིམས་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་གུ་རུ་བདེ་བ་ཆེན་པོའི་སྐུ་ཚབ་ཀྱི་སྤྱན་སྔར་བླ་མ་གསང་བ་འདུས་པའི་ཚོགས་ཀྱི་མཆོད་པ་ཕུལ་བའི་ཚེ་གང་ཤར་དུ་རྡོ་རྗེ་དབང་མཆོག་དགྱེས་པ་རྩལ་གྱིས་གསོལ་བ་བཏབ་པ་སིདྡྷིརསྟུ།
༈ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཀ་དག་སྤྲོས་མཚན་ཀུན་བྲལ་ཆོས་སྐུའི་རྩལ། །ལྷུན་གྲུབ་ངེས་པ་ལྔ་ལྡན་ལོངས་སྐུའི་འཕྲུལ། །གང་འདུལ་དེར་སྟོན་སྤྲུལ་སྐུའི་རོལ་རྩེད་ངོམ། །སྐུ་གསུམ་དབྱེར་མེད་ཨོ་རྒྱན་རྡོ་རྗེ་འཆང་། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །ནད་གདོན་བར་ཆད་བྱད་ཕུར་རྦོད་གཏོང་སོགས། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །དོན་གཉིས་བསམ་ཀུན་ཡིད་བཞིན་འགྲུབ་བྱིན་རློབས། །ༀ་ཨཱཿཧཱུྃ༴ སྤངས་རྟོགས་མཐར་ཕྱིན་དོན་གྱི་སངས་རྒྱས་དངོས། །ལུང་རྟོགས་ཆོས་ཕུང་རྒྱ་མཚོ་འབྱུང་བའི་དཔྱིད། །འཕགས་ཚོགས་དགེ་འདུན་ཡོངས་ཀྱི་གཙུག་གི་རྒྱན། །སྐྱབས་གསུམ་ཀུན་འདུས་ཨོ་རྒྱན་ཐོད་ཕྲེང་རྩལ། །གསོལ་བ་འདེབས་སོ༴ ནད་གདོན་བར༴ ཕྱི་ནང་༴ དོན་གཉིས༴ ༀ་ཨཱཿཧཱུྃ༴ བརྒྱུད་གསུམ་རིག་འཛིན་བླ་མའི་སྤྱི་དཔལ་མཆོག །རབ་འབྱམས་ཡི་དམ་ཞི་ཁྲོ་སྤྲོ་བསྡུའི་དཔྱིད། །མ་ཚོགས་ཌཱཀྐིའི་ཚོགས་དཔོན་ཧེ་རུ་ཀཿ། །རྩ་གསུམ་ཀུན་འདུས་ཨོ་རྒྱན་དུས་གསུམ་མཁྱེན། །གསོལ་བ༴ ནད་གདོན༴ ཕྱི་ནང་༴ དོན་གཉིས༴ ༀ་ཨཱཿཧཱུྃ༴ འཕགས་བོད་ཀུན་ཏུ་བསྟན་པའི་སྒྲོན་མེ་སྦར། །ཤིན་ཏུ་གདུལ་དཀའི་འགྲོ་རྣམས་ཐབས་ཀྱིས་བརྟུལ། །སྨོན་ལམ་དབང་གིས་གངས་ལྗོངས་གདུལ་བྱ་སྐྱོང་། །བཀའ་དྲིན་མཚུངས་མེད་ཨོ་རྒྱན་རིན་པོ་ཆེ། །གསོལ་བ༴ ནད་གདོན༴ ཕྱི་ནང་༴ དོན་གཉིས༴ ༀ་ཨཱཿཧཱུྃ༴ མཚན་ཐོས་ཙམ་གྱིས་འབྱུང་པོའི་བར་ཆད་སེལ། །སྐད་ཅིག་དྲན་པས་བྱང་ཆུབ་ལམ་སྣ་འདྲེན། །གསོལ་བ་འདེབས་ལ་གྲུབ་གཉིས་ཆར་དུ་འབེབས། །ངོ་མཚར་རྨད་བྱུང་ཨོ་རྒྱན་ཐུགས་རྗེ་ཅན། །གསོལ་བ༴ ནད་གདོན༴ ཕྱི་ནང་༴ དོན་གཉིས༴ ༀ་ཨཱཿཧཱུྃ༴ ཀྱེ་མ་ཀྱེ་ཧུད་ཨོ་རྒྱན་རིན་པོ་ཆེ། །གདུང་བས་འབོད་དོ་དྲིན་ཆེན་སྤྲུལ་པའི་སྐུ། །དེང་སང་དུས་ངན་སྙིགས་མའི་མཐའ་ལ་ཐུག །ཁྱེད་ཀྱི་རྗེས་འཇུག་རྒུད་པའི་དུས་ལ་བབས། །མི་མཐུན་བར་ཆད་ཆར་སྤྲིན་བཞིན་དུ་གཡོ། །མཐུན་རྐྱེན་ལེགས་ཚོགས་ཐན་སྤྲིན་བཞིན་དུ་ཡལ། །ལྷག་བསམ་བསྐྱེད་ཀྱང་བསྟན་ལ་ཕན་མཐུ་ཆུང་། །ཇི་ལྟར་བྱས་ཀྱང་བདེ་བའི་གོ་སྐབས་ཅི། །འདི་འདྲའི་དུས་སུ་ཐུགས་རྗེའི་དཔུང་བསྐྱེད་ནས། །མི་བསྲུན་རྒྱལ་འགོང་དམ་སྲིའི་ཁ་ཆིངས་ལ། །བྱད་ཕུར་རྦོད་གཏོང་ནད་གདོན་འཚེ་བ་ཟློགས། །རྩ་རླུང་འཁྲུགས་པའི་གེགས་ཚོགས་ཞི་བར་མཛོད། །སྲུང་བའི་རྫོང་གིས་ཕས་རྒོལ་འཚེ་བ་སྐྱོབས། །བཟློག་པའི་སྒྱོགས་ཀྱིས་བྱད་མ་རང་གཤེད་ཕོབ། །ནུས་མཐུའི་རླུང་གིས་འགལ་རྐྱེན་སྤྲིན་ཚོགས་གཏོར། །མཐུན་རྐྱེན་བསམ་ཀུན་ཡིད་བཞིན་འགྲུབ་བྱིན་རློབས། །རྡོ་རྗེའི་སྐུ་ཡི་གཟི་བྱིན་ལུས་ལ་ཕོབ། །གཞོམ་མེད་གསུང་གི་བྱིན་རླབས་ངག་ལ་ཞུགས། །འཁྲུལ་མེད་ཐུགས་ཀྱི་དགོངས་པ་ཡིད་ལ་འཕོས། །བསྟན་འགྲོའི་དོན་ཆེན་འགྲུབ་པར་མཛད་དུ་གསོལ། །མདོར་ན་འདི་ནས་བྱང་ཆུབ་མ་ཐོབ་བར། །མགོན་པོ་ཁྱོད་ལས་སྐྱབས་གཞན་མ་མཆིས་པས། །འབྲལ་མེད་ཐུགས་རྗེས་གཟིགས་ཤིག་དྲིན་ཆེན་རྗེ། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཅེས་པའང་གུ་རུའི་རྗེས་འཇུག་རྟགས་ཙམ་འཛིན་པ་ཨོ་རྒྱན་ཐུགས་མཆོག་རྡོ་རྗེས་སྤྲེལ་ལོ་སྤྲེལ་ཟླའི་དམར་ཕྱོགས་ཀྱི་ཚེས་བཅུ་ལ་འོག་མིན་བླ་མའི་གཟིམས་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་གང་དྲན་གསོལ་བ་བཏབ་པ་སྟེ། འདིས་ཀྱང་སྐྱེ་ཀུན་གུ་རུའི་རྗེས་སུ་འཛིན་པའི་རྒྱུར་གྱུར་ཅིག
༈ དུས་གསུམ་རྒྱལ་བ་ཐམས་ཅད་ཀྱི། །ཡེ་ཤེས་གཅིག་ཏུ་བསྡུས་པའི་དཔྱིད། །མཚོ་སྐྱེས་པདྨ་ཀུན་ཏུ་འཆང་། །འབྲལ་མེད་སྤྱི་བོའི་རྒྱན་བཞུགས་ནས། །རྟག་པར་བྱིན་གྱིས་བརླབས་པ་དང་། །ཡིད་ལ་ཡེ་ཤེས་མཆོག་སྩོལ་ནས། །རང་གཞན་དོན་གཉིས་འགྲུབ་པ་དང་། །བསྟན་འགྲོའི་དགེ་མཚན་འཕེལ་བ་ཡི། །བཀྲ་ཤིས་ཕྱོགས་ཀུན་ཁྱབ་གྱུར་ཅིག །སིདྡྷིརསྟུ།
༈ ཀུན་བཟང་རིགས་ལྔ་རིགས་གསུམ་དྲྭ་མ་ལྔ། །དགའ་རབ་ཤྲཱི་སེང་སྐལ་ལྡན་རྒྱལ་པོ་ཛཿ། །རིག་འཛིན་རྣམ་བརྒྱད་རྒྱལ་དབང་མཚོ་སྐྱེས་རྗེ། །རྗེ་འབངས་ལོ་པཎ་སྤྲུལ་པའི་གཏེར་འབྱིན་ཚོགས། །འཇམ་དཔལ་ཞི་ཁྲོ་བཀའ་གཏེར་བརྒྱུད་པ་ཡི། །རྩ་བརྒྱུད་བླ་མ་བཀའ་དྲིན་ཅན་རྣམས་དང་། །ཁྱད་པར་ཡེ་ཤེས་གཅིག་བསྡུས་འཁོར་ལོའི་མགོན། །འཇམ་དཔལ་དགྱེས་པའི་རྡོ་རྗེར་གསོལ་བ་འདེབས། །བརྒྱུད་གསུམ་བླ་མའི་བྱིན་རླབས་སྙིང་ལ་ཞུགས། །རིག་སྟོང་འཇམ་དཔལ་རྡོ་རྗེའི་རང་ཞལ་མཇལ། །འཛད་མེད་གཟུངས་སྤོབས་བློ་གྲོས་གཏེར་ཁ་འབྱེད། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཞེས་པའང་དམ་པ་ཟུང་གི་ཐུགས་བཞེད་བཞིན་པདྨ་བི་ཛས་བྲིས་པ་དགེ།
༈ ཀུན་བཟང་རྡོ་རྗེ་འཆང་དབང་གསང་བའི་བདག །པྲ་ཆེན་ཧ་སྟ་པདྨ་ཐོད་ཕྲེང་ནས། །འཇམ་དཔལ་རྡོ་རྗེའི་བར་དུ་བྱིན་རླབས་པའི། །ཕྲིན་ལས་བརྒྱུད་པའི་བླ་མར་གསོལ་བ་འདེབས། །སྣང་བ་ཐབས་མཆོག་བཛྲ་ཀཱི་ལ་ཡ། །སྟོང་པ་སྐྱེ་མེད་ཤེས་རབ་རྒྱས་འདེབས་ཡུམ། །ཟུང་འཇུག་རོལ་རྩལ་ཁྲོ་བཅུ་ཁྲ་ཕྱག་སྲས། །རབ་འབྱམས་དཀྱིལ་འཁོར་ལྷ་ལ་གསོལ་བ་འདེབས། །འདི་ནས་བཟུང་སྟེ་ཚེ་རབས་ཕྲེང་བ་རུ། །མི་འབྲལ་བླ་མ་ལྷ་ཡི་རྗེས་བཟུང་མཐུས། །ཐལ་འབྱིན་རྣམ་བཞིའི་དགོངས་པ་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཅེས་པའང་རིག་འཛིན་སྤྲུལ་པའི་སྐུ་མཆོག་གི་ཐུགས་བཞེད་བཞིན་པདྨ་རྣམ་པར་རྒྱལ་བས་གསོལ་བ་བཏབ་པ་དགེ།
༈ ༀསྭསྟིཔྲཛཱབྷྱཿ སྟོང་ཉིད་སྙིང་རྗེའི་རྩ་བ་རབ་བརླིང་བྱང་ཆེན་སྤྱོད་པའི་ཡལ་འདབ་རྒྱས། །སྤངས་རྟོགས་ཡོན་ཏན་མེ་འབྲས་ཁུར་དུད་ཐུགས་རྗེའི་གྲིབ་བསིལ་སྣུམ་པོ་ཡིས། །སྲིད་ལམ་དུབ་ལྡན་མགྲོན་པོའི་ངལ་འཚོའི་གཉེན་གྱུར་སྔོན་མེད་དཔག་བསམ་དབང་། །རྒྱལ་བའི་སྲས་མཆོག་དྲི་མེད་ཀུན་ལྡན་ཞབས་ལ་གུས་པས་ཕྱག་འཚལ་ལོ། །གང་གི་ཐུགས་ནི་སྙིང་རྗེའི་དབང་གྱུར་བསྐལ་མང་སྦྱིན་ལ་གོམས་བྱས་རྒྱུའི། །རྒྱལ་སྲིད་བྲན་འཁོར་ལོངས་སྤྱོད་ལྟ་ཅི་བུ་དང་བུ་མོ་ཆུང་མ་དང་། །དེ་བཞིན་རང་གི་ལུས་ཀྱང་གཏོང་ལ་མངོན་བརྩོན་ཆོས་དང་སྐྱབས་སྦྱིན་གྱིས། །དགྲ་གཉེན་རིས་མེད་འགྲོ་བའི་རེ་སྐོང་སེམས་དཔའ་མཆོག་ལ་ཕྱག་འཚལ་ལོ། །གཞན་གནོད་གཞིར་བཅས་སྤོང་ལ་ཡོངས་གོམས་སྡོམ་པའི་ཚུལ་ཁྲིམས་གསེར་སྦྱངས་ཁམས། །དགེ་བ་ཆོས་སྡུད་རྩིབས་སྟོང་རྣམ་བཀྲ་སྦྱིན་སྙན་དོན་མཐུན་དོན་སྤྱོད་ཀྱིས། །གཞན་ཕན་ཡོངས་སྒྲུབ་མུ་ཁྱུད་རྣམ་མཛེས་ཚོགས་གཉིས་དགེ་བའི་མཁའ་དབྱིངས་སུ། །ཆེས་ཆེར་བརྗིད་པ་སྔོན་མེད་གསེར་གྱི་འཁོར་ལོ་མཆོག་ལ༴ གང་གིས་མེ་ཏོག་མནྡ་ར་ཡི་སིལ་མས་བསྙེན་ཅིང་བསྔགས་བྱས་དང་། །ལ་ལ་ཁྲོ་བས་རབ་རྔམ་འཕྱ་སྨོད་མཚོན་ཆའི་ཆར་པ་འབེབས་པ་གཉིས། །ཁྱོད་ཀྱི་ཐུགས་ལ་མཉམ་པ་ཉིད་གྱུར་ཀུན་ལ་བྱམས་པའི་དཔལ་མངའ་བ། །ས་དང་མཁའ་འདྲ་བཟོད་པའི་ཕ་རོལ་ཕྱིན་རྫོགས་དེ་ལ༴ དུས་ལས་ཡོལ་མེད་ཕྲིན་ལས་ཟབ་མོས་འགྲོ་རྣམས་སྲིད་ལས་སྒྲོལ་བརྩོན་ཅིང་། །རླབས་ཆེན་རྒྱལ་སྲས་སྤྱོད་པའི་གྲུར་ཞུགས་ས་བཅུ་ལམ་ལྔའི་ཡོན་ཏན་ཆེར། །སྦྱོར་ལ་བདུད་དམག་བྱེ་བ་དྲུག་ཁྲིས་བརླག་ལྟ་རྩོམ་པར་ནུས་མིན་པ། །སེམས་དཔའ་ཆེན་པོ་བརྩོན་འགྲུས་ཕ་རོལ་ཕྱིན་རྫོགས་མཆོག་ལ༴ འཇིག་རྟེན་འཇིག་རྟེན་ལས་འདས་ཏིང་འཛིན་བྱེ་བ་ཕྲག་བརྒྱར་མངའ་འབྱོར་བས། །སེམས་ཅན་རྣམས་ཀྱི་མོས་དང་བསམ་པ་བསྐལ་བའི་ཁྱད་པར་རྗེས་འགྲོ་བའི། །གང་འདུལ་དེར་སྟོན་ངོ་མཚར་ཕྲིན་ལས་རྣམ་ཐར་བྱེ་བ་བསམ་ཡས་པས། །ཆོས་ཀྱི་དབྱིངས་ཁྱབ་ཡིད་བཞིན་ནོར་འདྲའི་རྒྱལ་སྲས་མཆོག་ལ༴ གང་གི་སོ་སོར་རྟོགས་པའི་ཤེས་རབ་རབ་རྣོན་རྡོ་རྗེ་ཕ་ལམ་གྱིས། །སྲིད་རྩའི་བདག་འཛིན་གཉིས་སྣང་འཁྲུལ་པའི་དྲྭ་བ་མ་ལུས་རབ་བཅོམ་ནས། །ཟབ་ཞི་སྤྲོས་བྲལ་འོད་གསལ་འདུས་མ་བྱས་གྱུར་བདེ་གཤེགས་སྙིང་པོའི་ཁམས། །མངོན་གྱུར་དོན་གཉིས་ལྷུན་རྫོགས་ཆོས་ཀྱི་རྒྱལ་པོ་མཆོག་ལ་ཕྱག་འཚལ་ལོ། །འཕགས་པའི་ཡོན་ཏན་མཁའ་ལྟར་རྒྱ་ཆེ་རྒྱ་མཚོ་བཞིན་ཏུ་གཏིང་ཟབ་པ། །ཚུར་མཐོང་བྱིས་བློས་གཞལ་བྱ་མིན་ཡང་བདག་བློ་དད་པ་འཕེལ་བའི་ངག །ཅུང་ཟད་བརྗོད་པ་འདིས་ཀྱང་བདག་དང་མཁའ་མཉམ་ཡིད་ཅན་རྒྱ་མཚོ་རྣམས། །བྱང་ཆུབ་སེམས་ཀྱི་བདུད་རྩིས་རྒྱུད་ཕྱུག་རྒྱལ་སྲས་ཁྱོད་འདྲ་ཉིད་གྱུར་ཅིག །ཅེས་པའང་ཀོང་ཡུལ་ས་ཡི་ཐིག་ལེ་བདུད་རི་ཧྭ་ཤང་ནག་པོ་བྱང་ཆུབ་སེམས་དཔའ་དྲི་མེད་ཀུན་ལྡན་གྱི་སྒྲུབ་ཕུག་ཏུ་རྩེ་གཅིག་གུས་པས་གསོལ་བ་འདེབས་པ་པོ་ནི། སྔགས་བཙུན་འགྱུར་མེད་པདྨ་རྣམ་རྒྱལ་ཏེ་འདིས་ཀྱང་འགྲོ་རྒྱུད་བྱང་ཆུབ་སེམས་ཀྱི་བདུད་རྩིས་ཕྱུག་པའི་རྒྱུར་གྱུར་ཅིག
༈ འོད་མཚན་སྟོང་འབར་ཐུགས་རྗེའི་མཁའ་ཀློང་ནས། །ཡོངས་ཤར་མཚོ་སྐྱེས་རྒྱལ་བའི་ཟློས་གར་མཆོག །བསྐལ་དུས་སྙིགས་མའི་འགྲོ་བ་སྐྱོབ་པའི་མགོན། །དཔལ་ལྡན་ཨ་ཏི་ཤ་ལ་གསོལ་བ་འདེབས། །རྨད་བྱུང་བྱང་ཆུབ་སེམས་ཀྱི་སྤྲིན་ཆེན་ལས། །གཞན་ཕན་ཕྲིན་ལས་ཟབ་མོའི་གྲུ་ཆར་གྱིས། །གདུལ་འགྲོའི་རྣམ་གྲོལ་མྱུ་གུ་བསྐྱེད་བསྲིངས་པའི། །པཎ་ཆེན་མར་མེ་མཛད་ལ་གསོལ་བ་འདེབས། །འཕགས་བོད་མཁས་གྲུབ་ཡོངས་ཀྱི་གཙུག་གི་རྒྱན། །ཉམ་ཐག་འགྲོ་བ་སྐྱོབ་པའི་ཐུགས་རྗེ་ཅན། །བཀའ་གདམས་བསྟན་པའི་ཆུ་མགོ་ཐམས་ཅད་མཁྱེན། །མཉམ་མེད་ཇོ་བོ་རྗེ་ལ་གསོལ་བ་འདེབས། །དེ་ལྟར་མི་ཕྱེད་གུས་པའི་གསོལ་བཏབ་མཐུས། །སྲིད་ལས་ངེས་འབྱུང་འདིར་སྣང་འཁྲི་བ་ཆོད། །བདག་བས་གཞན་གཅེས་བྱང་ཆུབ་སེམས་མཆོག་འབྱོངས། །རང་གཞན་དོན་གཉིས་མཐར་ཕྱིན་བྱིན་གྱིས་རློབས། །རྨད་བྱུང་སྙིང་རྗེ་ཆེན་པོའི་ཆུ་གཏེར་དབུས། །ཤེས་རབ་བདག་མེད་གཉིས་རྟོགས་རིན་ཆེན་ཁམས། །སྤངས་རྟོགས་ཡོན་ཏན་རྒྱ་མཚོའི་བང་རིམ་ཅན། །ཐུབ་དབང་ལྷུན་པོ་འགྲོ་འདིས་ཐོབ་གྱུར་ཅིག །ཅེས་པའང་ཁུ་སྟོན་བརྩོན་འགྲུས་གཡུང་དྲུང་གི་གདན་ས་སོལ་ནག་ཐང་པོ་ཆེར་ཇོ་བོ་བྱིས་དྲོད་མའི་སྤྱན་སྔར་པདྨ་བི་ཛས་གང་ཤར་གསོལ་བ་བཏབ་པ་དགེ།
༈ རྒྱལ་ཀུན་སྙིང་རྗེའི་རང་མདངས་པད་དཀར་ཅན། །རྩོད་དུས་འགྲོ་བ་འདྲེན་ཕྱིར་བཤེས་གཉེན་ཚུལ། །བྱང་ཆུབ་སེམས་ཀྱི་མངའ་བདག་འབྲོམ་སྟོན་པ། །རྒྱལ་བའི་འབྱུང་གནས་ཞབས་ལ་གསོལ་བ་འདེབས། །རླབས་ཆེན་ཐུགས་བསྐྱེད་འཛིན་མའི་ཁྱོན་ཡངས་པོར། །ཐེག་ཆེན་ལམ་གྱི་དཔག་བསམ་ཉེར་འཁྲུངས་པ། །རྒྱ་ཆེན་ཕན་བདེའི་གྲིབ་བསིལ་སྣུམ་པོ་ཅན། །འཕགས་ཆེན་འབྲོམ་སྟོན་པ་ལ་གསོལ་བ་འདེབས། །ཐུགས་བསྐྱེད་ཟླ་བ་གསར་པའི་འཛུམ་ཟེར་གྱིས། །འགྲོ་ཁམས་རང་དོན་ཡིད་བྱེད་ཚ་གདུང་འབུམ། །བཅིལ་དང་ཆབས་ཅིག་གཞན་ཕན་ཀུནྡའི་ཚལ། །བཞད་མཛད་རྒྱལ་སྲས་མཆོག་ལ་གསོལ་བ་འདེབས། །ཐུགས་ལ་བརྣག་པ་གཞན་ཕན་ཁོ་ན་སྟེ། །མཛད་པ་ཐམས་ཅད་བསྟན་འགྲོར་སྨན་པའི་ཐབས། །དོན་གཉིས་མཐར་ཕྱིན་རྒྱལ་བ་འབྲོམ་སྟོན་པར། །མི་ཕྱེད་མཆོག་ཏུ་གུས་པས་གསོལ་བ་འདེབས། །ཚེ་རབས་ཀུན་ཏུ་འབྲལ་མེད་རྗེས་འཛིན་མཐུས། །བྱང་ཆུབ་སེམས་གཉིས་ནོར་བུའི་གཏེར་ལ་དབང་། །ཕྱིན་དྲུག་སྤྱོད་པ་རྒྱ་མཚོའི་ཁྱད་ནོར་གྱིས། །འགྲོ་ཚོགས་སྲིད་པའི་དབུལ་བ་ཟད་བྱེད་ཤོག །ཅེས་པའང་དཔལ་སྟག་ལུང་ཐང་དུ་འབྲོོམ་སྟོན་འདྲ་ཞལ་དབུ་སྐྲ་འཕེལ་བའི་སྤྱན་སྔར་སྙོམ་ལས་པ་པདྨ་བི་ཛས་གསོལ་བ་བཏབ་པ་དགེ།
༈ ༀ་སྭསྟི། རྒྱ་བས་ལུང་བསྟན་འཛམ་གླིང་མཛེས་པའི་རྒྱན། །དཔལ་ལྡན་ནཱ་ག་རྫུ་ནའི་སྒྱུ་མའི་གར། །གངས་ཅན་མཁས་གྲུབ་ཡོངས་ཀྱི་འཁོར་ལོས་སྒྱུར། །སྐྱོབ་པ་འཇིག་རྟེན་གསུམ་གྱི་མགོན་ལ་འདུད། །ཕུལ་བྱུང་མཁྱེན་པའི་གངས་རི་ལས་འོངས་པའི། །དམིགས་མེད་བརྩེ་ཆེན་ཐུགས་རྗེའི་ཆུ་བོ་ཡིས། །ས་གསུམ་ཉེས་པའི་ཚད་གདུང་གཞི ལ་ནུས་པའི། །སྐྱོབ་པ་འཇིག་རྟེན༴ ཐུགས་བསྐྱེད་ཟླ་བ་གསར་པའི་འཛུམ་ཟེར་གྱིས། །སྒྲུབ་བརྒྱུད་སྙིང་པོའི་ཆུ་གཏེར་འཕེལ་བ་དང་། །ཆབས་ཅིག་ཕན་བདེའི་ཀུ་མུ ཏ་བཞད་མཛད་པའི། །སྐྱོབ་པ་འཇིག་རྟེན༴ སྟོང་ཕྲག་བརྒྱད་ཅུའི་དགེ་འདུན་འདུས་པའི་དབུས། །ཐེག་མཆོག་སེང་གེའི་སྒྲ་དབྱངས་ས་གསུམ་དུ། །སྒྲོགས་མཛད་རྩོད་པའི་དུས་ཀྱི་རྒྱལ་བ་མཆོག །སྐྱོབ་པ་འཇིག་རྟེན༴ འཆད་པའི་རལ་གྲིས་ཐེ་ཚོམ་དྲྭ་བ་གཅོད། །རྩོད་པའི་མདའ་ཡིས་ལོག་སྨྲའི་སྙིང་ལ་འབིག །རྩོམ་པའི་སྨན་གྱིས་ཐུབ་བསྟན་སྲོག་མཐུད་པའི། །སྐྱོབ་པ་འཇིག་རྟེན༴ བསླབ་གསུམ་ཡོན་ཏན་རྫོགས་པའི་ས་འཛིན་དབང་། །བསྔགས་འོས་ཡོན་ཏན་རྒྱ་མཚོའི་བང་རིམ་བརྗིད། །རླབས་ཆེན་ཕྲིན་ལས་ཉི་ཟླའི་གཟི་འབར་བའི། །སྐྱོབ་པ་འཇིག་རྟེན༴ བཤད་རྒྱུད་ལུང་གི་དར་ཤམ་གཡོ་བའི་རྩེར། །ཟབ་གསང་མན་ངག་རྟོགས་པའི་ཏོག་འབར་བས། །ཕས་རྒོལ་བྱེ་བའི་གཡུལ་ལས་རྣམ་རྒྱལ་བའི། །སྐྱོབ་པ་འཇིག་རྟེན༴ དྭགས་བརྒྱུད་མན་ངག་བྱེ་བའི་ཆུ་གཏེར་ཆེ། །གུ་རུའི་ཟབ་གཏེར་ནོར་བུས་ཡོངས་གཏམས་པའི། །ཡོངས་རྫོགས་བསྟན་པའི་མངའ་བདག་འབྲི་གུང་པ། །ཡབ་སྲས་བརྒྱུད་པར་བཅས་ལ་ཕྱག་འཚལ་ལོ། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་བཞིན་བསྐལ་བརྒྱར་བཞུགས་གསོལ་འདེབས། །དགེ་ཚོགས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །བརྒྱུད་ལྡན་བླ་མའི་བྱིན་རླབས་སྙིང་ལ་ཞུགས། །བཅོས་མིན་ངེས་འབྱུང་བྱང་སེམས་རྒྱུད་ལ་འབྱོངས། །རང་བྱུང་ལྷན་སྐྱེས་ཡེ་ཤེས་ཕྱག་རྒྱ་ཆེ། །མངོན་གྱུར་ཆོས་སྐུའི་རྒྱལ་སར་དབང་འབྱོར་ཤོག །ཐུབ་བསྟན་སྤྱི་དང་ཁྱད་པར་སྒྲུབ་བརྒྱུད་ཀྱི། །བསྟན་པའི་རྒྱལ་མཚན་མི་ནུབ་ཡུན་དུ་གནས། །བོད་ཁམས་མཐའ་དབུས་བདེ་སྐྱིད་ཆོས་ལ་སྤྱོད། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་པའང་དཔལ་འབྲི་གུང་མཐིལ་གྱི་གཙུག་ལག་ཁང་ཆེན་པོར་རྟེན་འཛམ་གླིང་རྒྱན་གྱི་སྤྱན་སྔར་གང་ཤར་གསོལ་བ་བཏབ་པ་པོ་ནི་རྙིང་བན་པདྨ་རྣམ་རྒྱལ་ལོ།། ༈ རྒྱལ་བའི་བསྟན་སྲུང་མཐུ་ལྡན་དབང་མོ་མཆོག །སྒྲུབ་མཆོག་བུ་བཞིན་སྐྱོང་བའི་དམ་ཚིག་ཅན། །ཨ་ཕྱི་ཆོས་སྒྲོན་འཁོར་དང་བཅས་པ་རྣམས། །གསོལ་ལོ་མཆོད་དོ་འདོད་དོན་ཀུན་འགྲུབ་མཛོད། །ཅེས་པའང་པདྨ་བི་ཛས་སོ།། ༈ རྣམ་པར་སྣང་མཛད་ཡེ་ཤེས་སྒྱུ་མའི་གར། །སྐད་གཉིས་སྨྲ་བའི་དབང་པོ་བཻ་རོ་རྗེའི། །རྣམ་འཕྲུལ་མཁས་གྲུབ་ཡོངས་ཀྱི་གཙུག་གི་རྒྱན། །ཁྱུང་པོ་རྣལ་འབྱོར་ཞབས་ལ་གསོལ་བ་འདེབས། །སྙིང་སྟོབས་ཆེན་པོས་འཕགས་ཡུལ་ལན་མང་བགྲོད། །ཡེ་ཤེས་མཁའ་འགྲོ་རྣམ་གཉིས་གཙོར་གྱུར་པའི། །མཁས་གྲུབ་ལྔ་བརྒྱའི་དགོངས་པའི་གསང་མཛོད་བརྟོལ། །ཁྱུང་པོ་རྣལ་འབྱོར༴ ཐོས་བསམ་སྒོམ་པའི་སྤྲིན་ཆེན་ལྷུན་འཐུག་ལས། །མཁས་ཚུལ་གསུམ་གྱི་ཆར་བཟང་འབུམ་འཇོ་བས། །སྒྲུབ་བརྒྱུད་སྙིང་པོའི་ཆུ་གཏེར་འཕེལ་མཛད་པའི། །ཁྱུང་པོ་རྣལ་འབྱོར༴ ངོ་མཚར་རྫུ་འཕྲུལ་བྱེ་བའི་བཀོད་པ་ཡིས། །སྟོང་ཕྲག་བརྒྱད་ཅུའི་སྐལ་ལྡན་འདུས་པའི་དབུས། །ངེས་དོན་སེང་གེའི་སྒྲ་དབྱངས་ཆེར་བསྒྲགས་པའི། །ཁྱུང་པོ་རྣལ་འབྱོར༴ འཆི་བདག་འཇིགས་པའི་མུན་ཚོགས་མཐར་བསྐྲད་ནས། །བརྒྱ་དང་ལྔ་བཅུར་བསྟན་པའི་སྒྲོན་མེ་སྦར། །ངོ་མཚར་སྙན་པས་འཛམ་གླིང་ཡོངས་ལ་ཁྱབ། །ཁྱུང་པོ་རྣལ་འབྱོར་ཞབས༴ དཀའ་བ་སྤྱད་པས་སྒྲིབ་གཉིས་མུན་པ་སངས། །ཚོགས་རྫོགས་མཐུ་ཡིས་རྟོགས་པ་ཀློང་ནས་ཤར། །རང་རིག་མ་བཅོས་ཕྱག་ཆེན་ཆོས་ཀྱི་སྐུ། །མངོན་གྱུར་མགོན་པོ་མཆོག་དང་མཚུངས་པར་ཤོག །ཅེས་པའང་ཤངས་ཞང་ཞུང་རྡོ་རྗེ་གདན་དུ་འདྲ་ཞལ་ང་འདྲ་མའི་སྤྱན་སྔར་པདྨ་བི་ཛས་གང་ཤར་གསོལ་བ་བཏབ་པ་དགེ། ༈ སྔོན་སྨོན་ཐུགས་བསྐྱེད་གསེར་སྦྱངས་སྙིང་པོའི་ཁམས། །བསྔགས་འོས་ཡོན་ཏན་རྒྱ་མཚོའི་རྩིབས་སྟོང་བཀྲ། །ངེས་གསང་ཐུབ་བསྟན་རྒྱལ་སྲིད་འདྲེན་མཁས་པའི། །དགྱེས་མཛད་ལོ་ཙཱའི་ཞབས་ལ་གསོལ་བ་འདེབས། །ན་རོ་མཻ་ཏྲིའི་གདམས་ཟབ་ཆུ་ཀླུང་འབུམ། །ཐོས་བསམ་སྒོམ་པའི་ལྟོ་བར་ལེགས་བསྐྱིལ་ནས། །ངེས་དོན་ཟབ་མོའི་བདུད་རྩི་སྐྱུག་མཛད་པའི། །མར་པ་ལོ་ཙཱའི་ཞབས་ལ༴ མཁྱེན་རྟོགས་ཡོན་ཏན་ཟབ་མོའི་འོད་སྟོང་གིས། །མཁས་གྲུབ་བྱེ་བའི་པད་ཚལ་བཞད་མཛད་པའི། །གངས་ལྗོངས་བསྟན་པའི་ཉི་མ་མར་སྟོན་རྗེ། །ཆོས་ཀྱི་བློ་གྲོས་ཞབས་ལ༴ བསིལ་ལྡན་བཤད་སྒྲུབ་ཆུ་བོ་བརྒྱ་ཕྲག་གི། །ཐོག་མའི་འབྱུང་གནས་མ་དྲོས་ཀླུ་ཡི་སྤུན། །ཕྲིན་ལས་ཀུན་ཁྱབ་དགྱེས་མཛད་མར་སྟོན་རྗེར། །མི་ཕྱེད་སྒོ་གསུམ་གུས་པས་གསོལ་བ་འདེབས། །མོས་གུས་སྟོབས་ཀྱིས་བྱིན་རླབས་རྒྱུད་ལ་ཞུགས། །རྟོགས་པ་དོན་བརྒྱུད་ཡེ་ཤེས་ཁོང་ནས་ཤར། །མ་བཅོས་ཐ་མལ་ཤེས་པ་ཆོས་ཀྱི་སྐུ། །མངོན་གྱུར་ཕྱག་ཆེན་གྲུབ་མཐའ་སྙེག་བྱིན་རློབས། །མཁའ་ལ་བཀའ་བརྒྱུད་བྱིན་རླབས་སྤྲིན་ཕུང་འཁྲིགས། །བར་ལ་གྲུབ་གཉིས་འདོད་དགུའི་ཆར་བཟང་འཇོ། །ས་ལ་སྒྲུབ་བརྒྱུད་བསྟན་པའི་པད་ཚལ་རྒྱས། །ཕུན་ཚོགས་བསམ་ཀུན་འགྲུབ་པའི་བཀྲ་ཤིས་ཤོག །ཅེས་པའང་སྲས་མཁར་སྤྲུལ་པའི་ཕོ་བྲང་དུ་རྗེ་ལོ་ཙཱ་བ་ཆེན་པོའི་འདྲ་ཞལ་རྩ་རིས་མའི་སྤྱན་སྔར་ཚོགས་གཉིས་འབྲེལ་འཇོག་བགྱིས་སྐབས་གང་ཤར་གསོལ་བ་འདེབས་བ་པོ་ནི་རྙིང་བན་པདྨ་བི་ཛས་སོ།།
༈ རྡོ་རྗེ་འཆང་གི་དགོངས་བཅུད་ཨ་མྲྀ་ཏས། །ཆེར་མྱོས་བསིལ་ལྡན་གྲུབ་པ་ཡོངས་ཀྱི་ཏོག །ཟབ་གསང་དོ་ཧས་འདོམ་མཛད་མི་ལ་རྗེ། །བཞད་པ་རྡོ་རྗེའི་ཞབས་ལ་གསོལ་བ་འདེབས། །མཚན་ཙམ་གྱིས་ཀྱང་སྲིད་པའི་འཇིགས་འཕྲོག་ཅིང་། །ལྷན་སྐྱེས་ཡེ་ཤེས་རྩོལ་མེད་བསྐྱེད་མཛད་པའི། །བྱང་ཆུབ་སེམས་ཀྱི་མངའ་བདག་སྒོམ་པོ་པ། །ཟླ་འོད་གཞོན་ནུའི་ཞབས་ལ་གསོལ་བ་འདེབས། །སྲོག་རྩོལ་ཉི་ཟླའི་བགྲོད་པ་དྷཱུ་ཏིའི་མཁར། །ཡོངས་ཐིམ་ར ས་དཀར་གཤོག་པའི་བླ་གོས་ཀྱིས། །མཁའ་སྤྱོད་གནས་སུ་གཤེགས་མཛད་རས་ཆུང་བ། །རྡོ་རྗེ་གྲགས་པའི་ཞབས་ལ་གསོལ་བ་འདེབས། །མཚུངས་མེད་གྲུབ་པའི་ཁྱུ་མཆོག་རྣམ་གསུམ་གྱིས། །ཚེ་རབས་ཕྲེང་བར་འབྲལ་མེད་རྗེས་བཟུང་མཐུས། །དོན་གཉིས་བསམ་པ་ཡིད་བཞིན་འགྲུབ་པ་དང་། །ཕྱག་ཆེན་མཆོག་དངོས་གྲུབ་པར་བྱིན་གྱིས་རློབས། །ཞེས་པའང་པདྨ་བི་ཛས་གསོལ་བ་བཏབ་པ་དགེ། ༀ་སྭསྟི། ཡིད་བཞིན་ནོར་དང་བུམ་བཟང་དཔག་བསམ་ཤིང་། །འདོད་འཇོའི་བ་མཆོག་མ་རྨོས་ལོ་ཏོག་བཞིན། །མཐའ་ཡས་འགྲོ་བའི་རེ་བ་སྐོང་མཛད་པ། །འབྲུག་སྨྱོན་ཀུན་དགའ་ལེགས་པའི་ཞབས་ལ་འདུད། །དྲི་མེད་ཐོས་པ་གསེར་རིའི་ཕྲེང་བའི་དབུས། །བསམ་པའི་ཤེས་རབ་བང་རིམ་ལྷུན་ཆགས་ཤིང་། །སྒོམ་བྱུང་བློ་གྲོས་སྲིད་པའི་བླ་ན་མཐོ། མཁས་པའི་ཡོན་ཏན་ས་འཛིན་དབང་པོ་བཞིན། །ཉེས་སྤྱོད་སྡོམ་པའི་མཚོ་ལས་ཉེར་འཁྲུངས་པའི། །དགེ་བ་ཆོས་སྡུད་གེ་སར་འདབ་ཕྲེང་མཛེས། །སེམས་ཅན་དོན་བྱིང་ཟིལ་དངར་འབུམ་འཇོ་བ། །བཙུན་པའི་ཚུལ་ཁྲིམས་པུཎྜ་རི་ཀར་འགྲན། །རབ་བརྟན་བཟོད་པའི་རྡོ་རྗེ་ཕ་ལམ་གྱིས། །ཞེ་སྡང་ལྷ་མིན་མཚོན་འཁོར་བཅོམ་བྱས་པས། །ལོག་སྒྲུབ་རྐྱེན་གྱིས་མི་འཁྲུགས་གོ་ཆ་ཅན། །བཟང་པོའི་ཡོན་ཏན་འཆི་མེད་དབང་པོར་མཐུན། །ཐུབ་གསུང་མདོ་རྒྱུད་སྙིང་པོ་འོ་མའི་བཅུད། །རང་བཟོའི་ཆབ་ཀྱིས་བསླད་པའི་གྲུབ་མཐའི་སྲོལ། །མ་འདྲེས་གསལ་བར་འབྱེད་པའི་རྣམ་དཔྱོད་ཅན། །མཁྱེན་རབ་འཇམ་དཔལ་གཞོན་ནུའི་ངང་ཚུལ་འཛིན། །བྱམས་དང་སྙིང་རྗེའི་གློག་ཕྲེང་དང་འགྲོགས་པའི། །རྨད་བྱུང་ཐུགས་རྗེ་ཆེན་པོའི་སྤྲིན་ཆེན་ལས། །ཀུན་ཕན་ཆར་གྱིས་སྲིད་པའི་ཚད་གདུང་བཅིལ། །བརྩེ་བའི་རང་བཞིན་དབྱར་གྱི་དཔལ་མོ་འདྲ། །ཕྲིན་ལས་རྣམ་བཞིའི་འོད་ཟེར་འབུམ་ཕྲག་གིས། །བསྟན་འགྲོའི་རྒུད་པའི་མུན་པ་ཀུན་བཅོམ་ནས། །ཕན་བདེའི་པད་ཚལ་ཅིག་ཅར་བཞད་མཛད་པའི། །ནུས་མཐུ་ཉིན་མོར་བྱེད་པའི་གཟི་བྱིན་ངོམ། །རྒྱུ་དང་འབྲས་བུའི་གཞུང་ལམ་འབྲུ་ཡི་མཆོག །བརྒྱུད་ལྡན་ཞལ་ལུང་ཕབས་ཀྱིས་བྲན་པའི་བཅུད། །ཉམས་མྱོང་མན་ངག་བདུད་རྩིའི་ཉིང་ཁུ་ཆེ། །འཆད་པས་བློ་ལྡན་བྱེ་བའི་ཉམས་སྟོབས་སྤེལ། །ཡང་དག་ཚད་མ་གསུམ་གྱི་མདའ་བོ་ཆེས། །ཕས་རྒོལ་ལོག་སྨྲའི་གྲོང་ཁྱེར་སུམ་བརྩེགས་ཀྱི། །རིགས་ལམ་ཐལ་བར་བྱེད་པའི་སྤོབས་པ་ཅན། །རྩོད་པའི་རྣམ་དཔྱོད་མ་ཧཱ་དེ་ཝར་གྲུབ། །བརྗོད་དོན་ཕུན་ཚོགས་དགོས་འབྱུང་ཡིད་བཞིན་དབང་། །རྗོད་བྱེད་མཛེས་པའི་སྲད་བུར་ལེགས་བརྒྱུས་པའི། །རྩོམ་པའི་ལེགས་བཤད་སྔོན་མེད་ནོར་བུའི་ཕྲེང་། །གཟུར་གནས་མཁས་མང་མགྲིན་པའི་རྒྱན་དུ་སྤུད། །གྲུབ་གཉིས་རྟོགས་པའི་སུ་རས་ཆེར་མྱོས་པས། །བསད་པ་གསོ་སོགས་ཡ་མཚན་རྨད་པོ་ཆེའི། །བརྟུལ་ཞུགས་སྤྱོད་པས་སྒྲོ་སྐུར་དྲི་མ་བསལ། །ཤ་བ་རི་པའི་རྣམ་ཐར་འཛིན་དེར་འདུད། །མེ་ཆུ་དུག་མཚོན་འབྱུང་པོའི་གཡུལ་ལས་རྒྱལ། །གདུལ་དཀའ་ཀློ་མོན་མུ་སྟེགས་ཆོས་ལ་བཀོད། །རྫུ་འཕྲུལ་མཐུ་ཡིས་འགྲོ་མང་རེ་སྐོང་བའི། །གྲུབ་པའི་ཁྱུ་མཆོག་ཁྱེད་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །ཡེ་ཤེས་དགོངས་པའི་བྱིན་རླབས་སྙིང་ལ་ཞུགས། །རྟོགས་གྲོལ་དུས་མཉམ་གདོད་མའི་རྒྱལ་ཐབས་ཆེར། །དབང་འབྱོར་དོན་གཉིས་མཐར་ཕྱིན་བྱིན་གྱིས་རློབས། །རྗེ་གྲུབ་ཐོབ་ཆེན་པོའི་གདན་ས་གཉལ་དྲེའུ་ལྷས་སུ་སྐུ་གདུང་རིན་པོ་ཆེའི་སྤྱན་སྔར་སྙོམ་ལས་པ་པདྨ་བི་ཛ་ཡས་བྲིས་ཤིང་གསོལ་བ་བཏབ་པ་དགེ། ༈ འཇམ་དཔལ་ཞལ་གཟིགས་ས་ཆེན་ཀུན་དགའ་སྙིང་། །རྒྱུད་སྡེ་རྒྱ་མཚོ་འགྲོལ་མཁས་གྲགས་པའི་མཚན། །མཁའ་སྤྱོད་གནས་བགྲོད་བསོད་ནམས་རྩེ་མོའི་ཞབས། །དཀར་པོ་རྣམ་གསུམ་ཞབས་ལ་གསོལ་བ་འདེབས། །ལོག་སྨྲ་ཚར་གཅོད་ཆོས་རྗེ་པཎྜི་ཏ། །གཞན་ཕན་ཐུགས་རྗེའི་མངའ་བདག་འཕགས་པའི་མཚན། །གསུང་རབ་རྒྱ་མཚོའི་མཛོད་འཆང་བསོད་རྒྱལ་པ། །དམར་པོ་རྣམ་གསུམ་ཞབས་ལ་གསོལ་བ་འདེབས། །ཕར་ཕྱིན་བཤད་པའི་ཆུ་མགོ་གཡག་རོང་གཉིས། །གསང་ཆེན་རྒྱུད་སྡེའི་མངའ་བདག་ངོར་རྫོང་རྗེ། །རིགས་ལམ་སེང་གེའི་སྒྲ་སྒྲོགས་གོ་ཤཱཀ་སོགས། །ལམ་འབྲས་བསྟན་འཛིན་ཡོངས་ལ་གསོལ་བ་འདེབས། །མདོ་སྔགས་བསྟན་པའི་བདག་པོ་ས་སྐྱ་པའི། །རིང་ལུགས་སྲིད་མཐའི་བར་དུ་རྒྱས་པ་དང་། །བདག་སོགས་འགྲོ་ཀུན་སྒྲིབ་གསུམ་ལས་གྲོལ་ནས། །རྡོ་རྗེ་འཆང་དབང་འགྲུབ་པར་བྱིན་གྱིས་རློབས། །ཞེས་པའང་པདྨ་བི་ཛས་གསོལ་བ་བཏབ་པ་དགེ། ༈ གསུང་གི་དབང་ཕྱུག་མཚོ་སྐྱེས་རྒྱལ་བ་ཡི། །རྣམ་རོལ་མ་འགགས་དཔལ་ལྡན་ཨ་ཏི་ཤ །སླར་ཡང་སྙིགས་འགྲོའི་མགོན་དུ་ཡོངས་ཤར་བའི། །བློ་བཟང་གྲགས་པའི་ཞབས་ལ་གསོལ་བ་འདེབས། །ངེས་འབྱུང་རྣམ་པར་དག་པའི་མཚོ་དབུས་སུ། །གཞན་ཕན་བྱང་ཆུབ་སེམས་ཀྱི་རི་དབང་བརྗིད། །བསླབ་གསུམ་གསེར་གྱི་བང་རིམ་མངོན་མཛེས་པའི། །བློ་བཟང་གྲགས༴ མཁྱེན་རབ་རལ་གྲི་འཆང་བའི་གཟི་བྱིན་གྱིས། །བློ་ཡི་མུན་པ་མ་ལུས་བསལ་བ་ཡིས། །ཇི་སྙེད་བཀའ་བསྟན་དབུ་མའི་དེ་ཉིད་གཟིགས། །བློ་བཟང་གྲགས༴ གསང་འཛིན་མགོན་པོའི་ཞལ་ལུང་རྫོགས་པ་ཆེ། །བདུད་རྩི་སྨན་མཆོག་སྙིང་པོའི་དོན་རྟོགས་པས། །གྲུབ་པའི་སར་གཤེགས་ཌཱ་ཀིའི་རྗེས་བསྔགས་པའི། །བློ་བཟང་གྲགས༴ སྒྲིབ་སྦྱོང་མཐུ་ཡིས་མཁྱེན་རྟོགས་ཀློང་དུ་གྱུར། །ཚོགས་གཉིས་རྫོགས་པས་ཕྲིན་ལས་མཁའ་དང་མཉམ། །གྲགས་པ་དོན་ལྡན་རྒྱལ་བ་ཙོང་ཁ་པ། །བློ་བཟང་གྲགས་པའི་ཞབས་ལ་གསོལ་བ་འདེབས། །དེ་ལྟར་མི་ཕྱེད་གུས་པའི་གསོལ་བཏབ་མཐུས། །ངེས་འབྱུང་ཞིང་སར་སྙིང་རྗེའི་མྱུ་གུ་འཁྲུངས། །ཚོགས་གཉིས་འབྲས་སྨིན་གཞན་ཕན་ཕྲིན་ལས་རྒྱས། །དོན་གཉིས་མཐར་ཕྱིན་ཐུབ་བསྟན་མཐའ་རྒྱས་ཤོག །ཅེས་པའང་འབྲོག་རི་བོ་དགེ་ལྡན་རྣམ་རྒྱལ་གླིང་དུ། སྐུ་གདུང་རིན་པོ་ཆེའི་སྤྱན་སྔར་སྔགས་བན་པདྨ་བི་ཛས་གསོལ་བ་བཏབ་པ་དགེ། ༈ ཆོས་ཀྱི་རྒྱལ་པོ་མཉམ་མེད་ཙོང་ཁ་པ། །རྒྱལ་མཁས་རྣམ་གཉིས་པཎ་ཆེན་དགེ་འདུན་གྲུབ། །ངག་གི་དབང་ཕྱུག་བློ་བཟང་རྒྱ་མཚོ་སོགས། །དགེ་ལྡན་བསྟན་འཛིན་ཡོངས་ལ་གསོལ་བ་འདེབས། །བདེན་གཉིས་ཟུང་འཇུག་ལྟ་བའི་ཟབ་གནད་རྟོགས། །ཚོགས་གཉིས་ཟུང་འབྲེལ་ལམ་མཆོག་མཐའ་རུ་ཕྱིན། །སྐུ་གཉིས་མངོན་གྱུར་འབྲས་བུའི་རྒྱལ་ཐབས་ཆེར། །བདག་གཞན་འགྲོ་ཀུན་འགོད་པར་མཛད་དུ་གསོལ། །པདྨ་བི་ཛས་སོ།།
༈ ༀ་སྭསྟི། ཆོས་དབྱིངས་མཁའ་ལ་མཁྱེན་བརྩེའི་ཆུ་འཛིན་འཁྲིགས། །གང་འདུལ་རྣམ་འཕྲུལ་མཛད་ཕྲིན་སྨན་ཆར་གྱིས། །བསྟན་འགྲོའི་རྒུད་པའི་དྲི་མ་ཀུན་བཀྲུས་ནས། །ཕན་བདེའི་མྱུ་གུ་བསྐྲུན་ལ་གསོལ་བ་འདེབས། །ཐུགས་རྗེ་ཆེ་དངོས་དྲི་མེད་ཀུན་ལྡན་གྱིས། །སྦྱིན་པའི་ཕར་ཕྱིན་ཡོངས་སུ་རྫོགས་མཛད་ཚེ། །བློ་སྟོབས་ཆེན་པོས་རྒྱལ་བུའི་སྐུ་སྲུང་བ། །ཆོས་བློན་ཟླ་བ་བཟང་པོར་གསོལ་བ་འདེབས། །དགའ་བ་བརྒྱ་ལྡན་འཆི་མེད་གྲོང་ཁྱེར་དུ། །ཀུན་དགའ་སྙིང་པོ་དམ་པ་ཏོག་དཀར་མདུན། །བརྫུས་སྐྱེས་ངོ་མཚར་བྱང་ཆུབ་ལུང་བསྟན་བརྙེས། །ལྷ་བུ་འོད་དཀར་སྙིང་པོར༴ ཐུབ་ཆེན་དྲུང་དུ་གང་གའི་ལྷ་མོ་ཞེས། །ཟབ་མོའི་བཟོད་ཐོབ་བྱང་སེམས་ལུས་སྟོབས་རྒྱས། །གསེར་གྱི་མེ་ཏོག་ཅེས་བྱའི་རྒྱལ་བ་རུ། །འབྱུང་འགྱུར་ལུང་བསྟན་ཐོབ་ལ༴ དུས་གསུམ་མཁྱེན་པ་པདྨ་འབྱུང་གནས་དཔལ། །ཀོ་ཤའི་མཚོ་གླིང་བརྫུས་ཏེ་སྐུ་འཁྲུངས་ཚེ། །ཐོག་མའི་ཞལ་མཇལ་ཆོས་ཀྱི་རྒྱལ་སྲིད་པ། །ཏྲི་ན་འཛིན་དུ་གྱུར་ལ༴ གུ་རུའི་བཀའ་སྒྲུབ་ཐབས་ལ་མཁས་པ་ཡིས། །ནམ་མཁའི་ཤུགས་ཅན་རྒྱལ་བློན་འབངས་འཁོར་བཅས། །རྟག་ཆད་ལས་བསྒྲལ་ནང་པའི་བསྟན་ལ་བཙུད། །ལྷ་ལྕམ་ཨ་ཐམ་རྒྱལ་མོར་གསོལ༴ བསིལ་བ་ཚལ་དུ་ཨོ་རྒྱན་ཆེན་པོ་ཡིས། །རྗེས་བཟུང་དབང་བསྐུར་གསང་སྔགས་ལམ་ལ་བཀོད། །དུར་ཁྲོད་ཀུན་ཏུ་བརྟུལ་ཞུགས་སྤྱོད་པ་མཛད། །སྨོན་ལམ་དབང་གི་རྡོ་རྗེར༴ དྲི་མེད་མདངས་ལྡན་གཡུ་ཡི་མཚོ་མོ་རུ། །གཉིས་འཐུང་ཚུལ་བཟུང་ཐོར་ཅོག་དགུ་ལྡན་བསྙེགས། །གུ་རུས་རྗེས་བཟུང་དབུགས་དབྱུང་ལུང་བསྟན་ནས། །ལྷ་ཡུལ་གཤེགས་པར་མཛད་ལ༴ གསོལ་སྨོན་བདེན་ཚིག་སྐྱ་རེངས་ཁ་ལོ་ཡིས། །ཉེར་དྲངས་ཕྱག་ན་པདྨ་ཉིན་མོར་བྱེད། །བསོད་ནམས་མཁའ་ལ་འཆར་བའི་དེ་མ་འདྲོགས། །དམྱལ་ཚོགས་སྨག་རུམ་སེལ་ལ༴ ངན་འགྲོའི་འདམ་ལས་སྐྱེས་ཀྱང་བློ་གྲོས་ཀྱི། །ཀེ་སར་མ་ཉམས་ཁྲི་སྙན་ཨུཏྤ་ལ། །གུ་རུའི་ཐུགས་རྗེའི་འོད་བརྒྱས་རེག་པའི་མོད། །རྣམ་གྲོལ་འདབ་སྟོང་གཡོ་ལ༴ མཚོ་སྐྱེས་འགྲོ་འདུལ་རྡོ་རྗེའི་གསང་བའི་ལྕམ། །བདེ་སྟོང་དགའ་བཞིའི་ཡེ་ཤེས་སྤེལ་བའི་གཉེན། །བྲམ་ཟེའི་རིགས་གྱུར་མཚར་སྡུག་རྫོགས་པའི་སྐུ། །ཡིད་འཕྲོག་མཛེས་མར་གྲགས་ལ༴ གང་ཐུགས་སྟོང་ཉིད་སྙིང་རྗེའི་སྤྲིན་ཆེན་ལས། །ལེགས་འོངས་བདེན་ཚིག་སྨོན་པའི་གྲུ་ཆར་གྱིས། །བདུད་རིགས་ཁྲོ་སེམས་མེ་ཚོགས་གཞིལ་མཛད་པ། །ཉེ་དབང་དྲི་མེད་ཟླ་བར༴ ཁྲི་སྲོང་དད་བསོད་རྒྱལ་མཚན་རྩེ་མོ་རུ། །ཐུབ་བསྟན་རིན་ཆེན་འགུགས་པའི་བྱ་མ་རྟ། །གུ་རུའི་ཐུགས་སྲས་སྐད་གཉིས་སྨྲ་བའི་ཕུལ། །སྦ་ལོ་རིན་ཆེན་བཟང་པོར༴ ཟབ་འུ་ལུང་དུ་མཚོ་རྒྱལ་རྗེ་དང་མཇལ། །གུ་རུས་རྗེས་བཟུང་གསང་བའི་དགྱེས་སྡེར་བརྟེན། །དབང་བསྐུར་བྱིན་རླབས་སྨིན་གྲོལ་དངོས་གྲུབ་བརྙེས། །ཤེལ་བཟའ་མགོན་སྐྱིད་ཞབས་ལ༴ ཨོ་ཌཱི་ཡ་ནར་ཡེ་ཤེས་ཌཱ་ཀི་ནི། །སེང་གེའི་ཞལ་གྱིས་དབང་བསྐུར་བྱིན་གྱིས་རླབས། །རྟོགས་གྲོལ་དུས་མཉམ་བརྟུལ་ཞུགས་རྩལ་ཆེན་རྫོགས། །བླ་མེད་མཆོག་གི་རྡོ་རྗེར༴ ཚ་བ་རོང་དུ་གཡུ་སྒྲས་རྗེས་སུ་བཟུང་། །རྫོགས་ཆེན་སྡེ་གསུམ་སྙིང་པོའི་གསང་མཛོད་གཏད། །ཕྲིན་ལས་ཟབ་མོའི་བསྟན་འགྲོའི་བདེ་སྐྱིད་སྤེལ། །རྡོ་རྗེ་དྲག་པོ་ཧཱུྃ་མཛད་ལ༴ ཀཿཐོག་རྡོ་རྗེ་གདན་གྱི་ཆོས་གྲྭ་རུ། །ཡོ་ག་རྣམ་གསུམ་ཆོས་ཀྱི་འཁོར་ལོ་བསྐོར། །མཁས་གྲུབ་གྲགས་པས་གངས་རིའི་ཁྱོན་ཀུན་ཁྱབ། །ནམ་མཁའ་རྡོ་རྗེའི་ཞབས་ལ༴ ལས་ཀྱི་འཕྲོ་སད་ཟབ་མོའི་གཏེར་དང་མཇལ། །ལས་འབྲེལ་རྩལ་གྱིས་སྙིང་ཐིག་གདམས་པ་གཏད། །ལས་ཅན་སྐྱེ་བོའི་ཚོགས་རྣམས་སྨིན་གྲོལ་མཛད། །ལེགས་པ་རྒྱལ་མཚན་ཞབས་ལ༴ ཡེ་ཤེས་ཌཱ་ཀིའི་ལུང་གིས་བསྐུལ་བ་བཞིན། །ཀུན་ཏུ་བཟང་པོ་དྲི་མེད་འོད་ཟེར་མཇལ། །སྙིང་ཐིག་རྣམ་གཉིས་གདམས་པའི་ཕ་ཕོག་ཐོབ། །འོད་ཟེར་གོ་ཆའི་ཞབས་ལ༴ གྲུབ་པ་མཐར་ཕྱིན་སྒྱུ་མའི་རོལ་རྩེད་ཀྱིས། །དཔའ་བོ་མཁའ་འགྲོའི་ཚོགས་རྣམས་དབང་བསྡུས་ཤིང་། །ལྷ་སྲིན་དམ་བཏགས་ཆོས་ཀྱི་རྒྱལ་སྲིད་སྐྱོང་། །བལ་པོ་རཏྣ་མ་ཏིར་གསོལ་བ༴ ཚ་བ་རོང་དུ་རང་བྱུང་སྤྲུལ་པའི་སྐུ། །འོད་གསལ་ཐེག་མཆོག་སྙིང་པོའི་གསང་ལམ་ནས། །སྣང་བཞིའི་ཡེ་ཤེས་མཐར་ཕྱིན་དངོས་གྲུབ་བརྙེས། །གསང་བ་རྡོ་རྗེ་སྙིང་པོར་གསོལ༴ སྙེ་བའི་རིགས་འཁྲུངས་སྔོན་སྦྱངས་ལས་འཕྲོ་སད། །གུ་རུས་རྗེས་བཟུང་ཟབ་གཏེར་སྒོ་འཕར་ཕྱེས། །འབྲེལ་ཚད་དོན་ལྡན་བསྟན་པའི་སྒྲོན་མེ་སྦར། །གར་དབང་ལས་འཕྲོ་གླིང་པར་གསོལ་བ་འདེབས། །སླར་ཡང་གང་འདུལ་སྒྱུ་འཕྲུལ་བཀོད་པ་བརྒྱས། །རྒྱལ་བསྟན་སྤེལ་ཞིང་ལས་ཅན་གདུལ་འགྲོ་སྐྱོང་། །སྙིགས་ལྔའི་རྒུད་སྐྱོབ་འབྲེལ་ཚད་ཐར་པ་འདྲེན། །རྣམ་ཐར་བསམ་མི་ཁྱབ་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །ཚེ་རབས་ཕྲེང་བར་འབྲལ་མེད་རྗེས་བཟུང་ནས། །སྲིད་དང་ཞི་བའི་དཔལ་འབྱོར་ཀུན་འཕེལ་ཞིང་། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཞེས་གར་དབང་ལས་འཕྲོ་གླིང་པའི་སྐྱེ་འཕྲེང་གསོལ་འདེབས་འདིའང་། མགོན་པོ་གང་གི་སྐྱེས་རབས་རྟོགས་བརྗོད་ཆེན་མོ་མཇལ་བའི་རྐྱེན་ལས་མི་ཕྱེད་པའི་དད་པ་སྙིང་ནས་རྒྱས་པའི་དབང་གིས་སྔགས་བཙུན་འགྱུར་མེད་པདྨ་རྣམ་རྒྱལ་གྱིས་བྱང་སྟོད་ཚུགས་སོར་བྲིས་པ་དགེ། ༈ སྐྱེ་མེད་སྤྲོས་བྲལ་བོན་སྐུ་ཀུན་ཏུ་བཟང་། །རིག་པར་རང་གསལ་རྫོགས་སྐུ་གཤེན་ལྷ་འོད། །ཟུང་འཇུག་རང་རྩལ་སྤྲུལ་སྐུ་གཤེན་རབ་རྗེ། །འབྲལ་མེད་རོ་གཅིག་རིག་པའི་ངང་དུ་འདུ། །སྔོན་བསགས་མཐུ་ཡིས་དག་པའི་བག་ཆགས་སད། །དཀའ་སྤྱད་བསྒྲུབས་པས་གོང་མའི་རྗེས་སུ་སྙེགས། །མཁྱེན་རྟོག་ཀློང་རྡོལ་དོན་གཉིས་མཐའ་རུ་ཕྱིན། །མེ་སྟོན་ཉི་མ་རྒྱལ་མཚན་ཞབས་ལ་འདུད། །གང་གི་རྣམ་ཐར་རྟོགས་བརྗོད་དབྱར་གྱི་རྔ། །ཐོས་པས་རབ་དགའ་མྱོས་པའི་གཙུག་སྒྲོ་ཅན། །སོར་བཅུའི་ཟློས་གར་བསྒྱུར་དང་ཆབས་ཅིག་པར། །སྤྲོ་སེམས་མགྲིན་པ་བཏེགས་ནས་འདི་སྐད་སྒྲོགས། །ཐབས་མཁས་ཐུགས་རྗེའི་བདག་ཉིད་རྒྱལ་བ་མཆོག །གང་འདུལ་འགྲོ་ངོར་རབ་འབྱམས་སྐུར་བཞེངས་ནས། །བརྒྱད་ཁྲི་བཞི་སྟོང་ཆོས་བོན་ཐེག་པའི་སྒོ། །གསུངས་ཀུན་མཐར་ཐུག་དོན་ལ་རྣམ་དབྱེར་མེད། །སཾ་ཀྲྀ་ཏ་དང་ཞང་ཞུང་སྐད་ལ་སོགས། །འགྱུར་དང་བརྡ་ཆད་སོ་སོར་སྣང་ནའང་། །ཆུ་ཀླུང་མཐའ་དག་རྒྱ་མཚོར་རོ་གཅིག་བཞིན། །དགོངས་པའི་སྐྱེལ་སོ་མཐར་ཐུག་གཅིག་ཏུ་བབས། །བསླུ་མེད་མཆོག་གསུམ་སྐྱབས་སུ་འཛིན་པ་དང་། །ལྟ་སྤྱོད་བཀའ་རྟགས་ཕྱག་རྒྱ་བཞི་འཆང་ན། །ང་ཡི་རྗེས་འཇུག་ཡིན་ཞེས་ཐུབ་པས་གསུངས། །ཚུལ་འདི་དེང་སང་བོན་དཀར་ལུགས་ལ་ཡོད། །ངེས་པར་འབྱུང་ལྡན་ཚུལ་ཁྲིམས་རྣམ་དག་ངོས། །སྙིང་རྗེ་ཆེན་པོས་འགྲོ་བ་སྒྲོལ་སླད་དུ། །ཐབས་ཤེས་ཟུང་འབྲེལ་ཚོགས་གཉིས་རླབས་པོ་ཆེ། །གསོག་ལ་བན་བོན་དགོངས་བཞེད་གཅིག་པ་ལགས། །བོན་ཉིད་སྐྱེ་བ་མེད་པའི་མཁའ་ཀློང་དུ། །བོན་ཅན་མཚན་མའི་སྤྲིན་ཚོགས་ཅིར་སྣང་ཡང་། །འཛིན་མེད་རང་གྲོལ་གཤིས་ལ་ཕན་གནོད་བྲལ། །ངེས་དོན་སྙིང་པོའི་གནད་ཀུན་གཅིག་པར་གོ །དེ་སླད་བཻ་རོ་དྲན་པ་ནམ་མཁའ་སོགས། །སྔོན་བྱོན་ཚད་མའི་སྐྱེས་བུ་དུ་མ་ཡིས། །ཆོས་བོན་ཟུང་འབྲེལ་བསྟན་པའི་སྒྲོན་མེ་སྦར། །རིས་མེད་གདུལ་བྱ་རྒྱ་མཚོ་སྨིན་གྲོལ་མཛད། །མཁན་སློབ་ཆོས་རྒྱལ་ལོ་པཎ་གདན་འཛོམས་སྐབས། །བརྩེ་བྲལ་སྲོག་གཅོད་མཆོད་སྦྱིན་དགེ་རློམ་པའི། །ཕྱི་རོལ་གཞུང་དང་འདྲེས་པ་སྡིག་པའི་བོན། །བསྣུབས་མོད་ཆོས་བོན་ཡང་དག་ལྟ་སྤྱོད་ཅན། །རྒྱལ་བའི་ཕྲིན་ལས་འཛིན་རྣམས་དམས་པ་མེད། །རྡོར་གླིང་རྒོད་ལྡེམ་ཀུ་ས་སྨན་པ་སོགས། །གུ་རུའི་རྒྱལ་ཚབ་རྩོད་བྲལ་དུ་མ་ཡིས། །བོན་གཏེར་མཐའ་ཡས་བཞེས་པའི་ཚུལ་ལ་ལྟོས། །བློ་ལྡན་ཀུན་གྲོལ་སངས་རྒྱས་གླིང་ལ་སོགས། །བོན་གྱི་རིག་འཛིན་ཆེན་པོ་དག་གིས་ཀྱང་། །ངོ་མཚར་ཆོས་གཏེར་ནོར་བུའི་སྒོ་ཕྱེས་ནས། །བསྟན་གཉིས་ཉི་ཟླའི་སྒྲོན་མེ་འདེགས་པར་མཛད། །ཁྱད་པར་གུ་རུ་ཏ་པི་ཧྲི་ཙ་རུ། །སྤྲུལ་ནས་ཞང་ཞུང་ཡུལ་དུ་གསུངས་པའི་ཆོས། །རྫོགས་ཆེན་སྙན་བརྒྱུད་ཟབ་མོའི་གསང་ལམ་ནས། །གདོས་ལུས་འོད་སྐུར་དེངས་པའི་ངོ་མཚར་འབར། །དེ་ཕྱིར་བོན་དཀར་ཆོས་དང་དབྱེར་མེད་པས། །ཕྱི་རབས་སྐལ་བཟང་སྐྱེ་དགུའི་ཚོགས་རྣམས་ཀྱིས། །བན་བོན་གྲུབ་མཐའི་ཁ་འཛིན་མ་བྱེད་པར། །ཀུན་ལ་དག་སྣང་ཕྱོགས་མེད་སྦྱོངས་མཛོད་དང་། །དོན་འབྲས་མི་བསླུ་རྣམ་མཁྱེན་རྒྱུར་འགྱུར་ངེས། །དེ་སྐད་སྔགས་བཙུན་ཞེ་ཆེན་རྒྱལ་ཚབ་པས། ཁྱི་ལོ་ཟླ་བ་བརྒྱད་པའི་གྲལ་ཚེས་ལ། །ཁྱུང་གསེར་བཀྲ་ཤིས་གླིང་གི་ཞོལ་དུ་བྲིས། །དགེ་བས་བསྟན་གཉིས་མི་ནུབ་མཐར་རྒྱས་ཤོག །