ཟེ་ཆེན་བླ་བརྒྱུད་གསོལ་འདེབས།
༄༅། །ཟེ་ཆེན་བླ་བརྒྱུད་གསོལ་འདེབས། ན་མོ་གུ་རུ། འཇམ་དཔལ་བཤེས་གཉེན་ཐུགས་རྗེའི་འོད་ཟེར་ལས། །ཡོངས་ཤར་ལུང་རིགས་སེང་གེའི་ང་རོ་ཡིས། །ལྟ་དམན་རི་དྭགས་སྐྲག་མཛད་རབ་འབྱམས་པ། །བསྟན་པའི་རྒྱལ་མཚན་ཞབས་ལ་གསོལ་བ་འདེབས། །མཁྱེན་རྟོགས་མཐར་ཕྱིན་གཞན་ཕན་སྒོ་བརྒྱ་འབྱེད། །འཆད་རྩོད་རྩོམ་པས་ངེས་གསང་བསྟན་མཆོག་འཛིན། །རླབས་ཆེན་ཕྲིན་ལས་ཟླ་བྲལ་ཟེ་ཆེན་པ། །ཀུན་བཟང་རྣམ་རྒྱལ་ཞབས་ལ༴ བསླབ་གསུམ་རྣམ་དག་མཁྱེན་བརྩེ་ནུས་པའི་གཏེར། །སྨིན་གྲོལ་བདུད་རྩིས་སྐལ་བཟང་གདུལ་བྱའི་ཚོགས། །ཡོངས་སུ་སྨིན་མཛད་དོན་གྱི་རིག་པ་འཛིན། །དཔལ་འབྱོར་རྒྱ་མཚོའི་ཞབས་ལ༴ ཨོ་རྒྱན་ལུང་བསྟན་ཟབ་མོའི་གཏེར་ལ་དབང་། །བརྟུལ་ཞུགས་སྤྱོད་པས་སྦས་པའི་གནས་ཞལ་འབྱེད། །བསྐྱེད་རྫོགས་གདེང་ལྡན་སྔགས་སྤྱོད་གར་གྱི་དབང་། །ཆོས་ཀྱི་རྒྱལ་མཚན་ཞབས་ལ༴ འཇམ་དཔལ་གཤིན་རྗེ་གཤེད་ཀྱིས་རྗེས་སུ་བཟུང་། །གཞན་ཕན་བསྡུ་བཞིའི་ཕྲིན་ལས་བསམ་མི་ཁྱབ། །འབྲེལ་ཚད་དོན་ལྡནའགྱུར་མེད་བདེན་དོན་གཟིགས། །ཀུན་བཟང་བསྟན་པའི་ཉི་མར༴ རླབས་ཆེན་རྒྱལ་བའི་སྲས་ཀྱི་སྤྱོད་པ་ཡིས། །བསྟན་པ་རིན་ཆེན་འཛིན་སྐྱོང་སྤེལ་བའི་གཉེན། །སྙིགས་མའི་གདུལ་བྱ་འདུལ་མཛད་སྤྲུལ་པའི་སྐུ། །བསྟན་པའི་ཉི་མའི་ཞབས་ལ༴ སྔ་འགྱུར་བསྟན་པའི་ཉི་མ་གཏེར་ཆེན་རྗེའི། །ཐུགས་བསྐྱེད་དུས་བབས་རྣམས་བཞིའི་ཕྲིན་ལས་ཀྱིས། །ངེས་གྲོལ་ཆུ་གཏེར་བསྐྱིལ་བའི་མགོན་གཅིག་པུ། །བསྟན་འཛིན་ཆོས་ཀྱི་རྒྱལ་པོར༴ མཁྱེན་རྟོགས་ཀློང་རྡོལ་ནུས་མཐུའི་རྩལ་ཆེན་རྫོགས། །སྡེ་བརྒྱད་བྲན་ཁོལ་བསྟན་འགྲོའི་བདེ་སྐྱིད་སྤེལ། །གདུལ་དཀའ་དམུ་རྒོད་འདུལ་བའི་ཐུགས་རྗེ་ཅན། །ཨོ་རྒྱན་རང་བྱུང་རྡོ་རྗེར༴ སྐྱེ་བ་གསུམ་དུ་རྫོགས་ཆེན་རབ་འབྱམས་པའི། །ཕྲིན་ལས་རྗེས་བསྒྲུབས་བླ་མ་སངས་རྒྱས་སུ། །ལེགས་མཐོང་དགོས་པའི་བྱིན་རླབས་ཉེར་ཐོབ་པ། །འཇམ་དབྱངས་བློ་གྲོས་རྒྱ་མཚོར༴ གཡུ་སྒྲའི་རྣམ་འཕྲུལ་དྷརྨ་ཤྲཱི་ཡི། །ཡེ་ཤེས་རང་རྩལ་ངེས་གསང་བསྟན་པའི་བདག །ཤེས་བྱ་ཀུན་མཁྱེན་མ་ཧཱ་པཎྜི་ཏ། །བསྟན་འཛིན་འཕེལ་རྒྱས་ཞབས་ལ༴ འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་། །སྒོམ་བྱུང་ཀློང་རྡོལ་སྣང་བཞི་མཐའ་རུ་ཕྱིན། །བཻ་རོའི་རྣམ་འཕྲུལ་གྲུབ་པ་ཡོངས་ཀྱི་རྗེ། །ཤེས་རབ་ཡར་འཕེལ་ཞབས་ལ༴ རྒྱལ་བས་ལུང་བསྟན་རྩོད་བྲལ་སྤྲུལ་པའི་སྐུ། །མཛོད་ཆེན་རྣམ་ལྔའི་སྲོལ་འབྱེད་ཤིང་རྟ་ཆེ། །ཡོངས་རྫོགས་བསྟན་པའི་ཉི་མ་ཐམས་ཅད་མཁྱེན། །བློ་གྲོས་མཐའ་ཡས་ཞབས་ལ༴ རྣམ་འཕྲུལ་ཚད་མེད་གདུལ་བྱའི་མཁའ་ལ་ཤར། །འཕགས་པའི་རིགས་སད་གཞན་ཕན་བྱང་སེམས་འབྱོངས། །གང་འབྲེལ་དོན་ལྡན་བསྟན་པའི་སྒྲོན་མེ་སྦར། །ཕྲིན་ལས་འོད་ཟེར་ཞབས་ལ༴ དེ་ལྟར་མི་ཕྱེད་གུས་པས་གསོལ་བཏབ་མཐུས། །ཚེ་རབས་ཕྲེང་བར་དམ་པའི་མགོན་རྣམས་ཀྱིས། །རྗེས་བཟུང་མཉེས་པ་གསུམ་གྱིས་ལེགས་བསྟེན་རྒྱུས། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཞེས་པའང་བསླབ་གསུམ་ནོར་བུའི་མཛོད་འཆང་འབྲོག་པ་བླ་མ་ཚུལ་ཁྲིམས་རྣམ་དག་གི་བཞེད་སྐོང་དུ་རྒན་པོ་བི་ཛས་བྲིས་པ་དགེ།