སྐྱབས་རྗེ་དྲུང་པ་རིན་པོ་ཆེའི་གསོལ་འདེབས་བཀྲ་ཤིས་སྐྱེ་བ་ལྔ་པའི་སྒྲ་དབྱངས།

༄༅། །སྐྱབས་རྗེ་དྲུང་པ་རིན་པོ་ཆེའི་གསོལ་འདེབས་བཀྲ་ཤིས་སྐྱེ་བ་ལྔ་པའི་སྒྲ་དབྱངས་བཞུགས་སོ།། ན་མོ་གུ་རུ། ཟབ་གསལ་གཉིས་མེད་ཡེ་ཤེས་ཆེན་པོའི་ཁམས། །གློ་བུར་འཁྲུལ་པའི་སྦུབས་རྒྱ་ལས་གྲོལ་བས། །ཀ་དག་གདོད་མའི་གྲོལ་སར་བྱང་ཆུབ་པ། །མཚུངས་བྲལ་དཔལ་ལྡན་བླ་མར་གསོལ་བ་འདེབས། །སྤྲོས་ལས་འདས་ཀྱང་སྤྲོས་པའི་རོལ་གར་ནི། །གང་འདུལ་འགྲོ་ངོར་དབང་ཕྱུག་མི་ལ་རྗེ། །ཀུན་དགའ་རྒྱལ་མཚན་ཀུན་དགའ་རྣམ་རྒྱལ་སོགས། །མཚན་ཙམ་གྱིས་ཀྱང་སྲིད་ལམ་རྒྱུན་གཅོད་པའི། །སྐྱེ་འཕྲེང་ཚར་དུ་དངར་ལ་གསོལ་བ་འདེབས། །ཁྱད་པར་རྒྱལ་ཀུན་འདུས་ཞལ་ཀརྨ་པའི། །རིང་ལུགས་སྒྲུབ་བརྒྱུད་སྙིང་པོའི་པད་ཚལ་མཆོག །བཞེད་མཛད་བཤད་སྒྲུབ་ཆོས་ཀྱི་ཉིན་མོར་བྱེད། །ས་གསུམ་འགྲན་བྲལ་མཆོག་ལ་གསོལ་བ་འདེབས། །ངེས་འབྱུང་མཐར་ཕྱིན་ཆོས་བརྒྱད་འཆིང་བ་ཞིག །སྦྱངས་པ་མཐར་ཕྱིན་ཆོས་ཀུན་དེ་ཉིད་གཟིགས། །མཁྱེན་རྟོགས་མཐར་ཕྱིན་དོན་བརྒྱུད་རྒྱལ་ས་འཛིན། །དོན་གཉིས་མཐར་ཕྱིན་རྗེ་ལ་གསོལ་བ་འདེབས། །རྣམ་དག་ཚུལ་ཁྲིམས་གསེར་སྦྱངས་སྙིང་པོའི་ཁམས། །ཏིང་འཛིན་དཔག་མེད་ཞི་བའི་མུ་ཁྱུད་བརླིང་། །ཤེས་རབ་ཟབ་མོའི་རྩིབས་སྟོང་རྣམ་བཀྲ་བའི། །བསླབ་གསུམ་འཁོར་ལོས་སྒྱུར་ལ་གསོལ་བ་འདེབས། །ཟབ་རྒྱས་གླིང་གྲོལ་གཟི་འོད་འབུམ་བརྡལ་བས། །འགྲོ་རྒྱུད་སྒྲིབ་བཞིའི་མུན་པ་མཐར་བྱས་ནས། །སྐུ་དང་ཡེ་ཤེས་འདོད་དགུ་སྦྱིན་པའི་དཔལ། །ཡིད་བཞིན་ནོར་བུ་མཆོག་ལ་གསོལ་བ་འདེབས། །སྦྱིན་པའི་ཟུར་མིག་ས་གསུམ་ཡིད་དབང་འཕྲོག །སྙན་པར་སྨྲ་བའི་འདོད་པའི་སྒྱུ་རྩལ་མཁས། །དོན་མཐུན་དོན་སྤྱོད་རེག་ན་བདེ་བ་སྟེར། །བསྡུ་བཞིའི་བཙུན་མོས་འཁྱུད་དེར་གསོལ་བ་འདེབས། །མང་དུ་ཐོས་པ་ལྷ་ཡི་སྤྱན་དང་ལྡན། །རྟོན་པ་བཞི་ལྡན་བསམ་བྱུང་རྟོག་པ་མཁས། །སྒོམ་པའི་ཤེས་རབ་ངེས་དོན་ཆོས་མཛོད་སྲུང་། །མཁྱེན་མཆོག་བློན་པོས་བསྐོར་དེར་གསོལ་བ་འདེབས། །འཆད་ལ་མི་བསྙེངས་ལུང་གི་སྣ་ཤལ་རིང་། །རྩོད་པའི་རིགས་རྣོན་ཕས་རྒོལ་གཡུལ་ངོ་བཟློག །རྩོམ་པའི་ལེགས་བཤད་གསེར་གྱི་དྲྭ་བས་མཛེས། །ཐེག་མཆོག་གླང་པོས་མཚན་དེར་གསོལ་བ་འདེབས། །མཁས་པའི་རྣམ་དཔྱོད་ལེགས་བཤད་མགྲིན་དབྱངས་འཁྲོལ། །བཙུན་པའི་ཡོན་ཏན་སྤུ་སྡུག་རྒྱན་གྱིས་བརྒྱན། །བཟང་པོའི་ཕྲིན་ལས་གླིང་བཞི་ཡུད་ཀྱིས་བསྐོར། །དམ་པ་ཅང་ཤེས་དབང་པོར་གསོལ་བ་འདེབས། །ཕུལ་བྱུང་མཁྱེན་པའི་མཚོན་རྣོན་ཕྱག་ན་བསྣམས། །མི་འཁྲུགས་བརྩེ་བའི་རྡོ་རྗེའི་གོ་ཁྲབ་བརླིང་། །ནུས་མཐུ་ཚད་མེད་སྲིད་པའི་འཁྲུལ་འཁོར་གཞིག །སྔོན་མེད་དམག་དཔོན་མཆོག་ལ་གསོལ་བ་འདེབས། །མདོར་ན་མཁས་བཙུན་གྲུབ་པའི་རྣམ་ཐར་གྱིས། །ས་གསུམ་སྐྱེ་དགུའི་རེ་བ་ཡོངས་སྐོང་ཞིང་། །དྲི་མེད་ཐུབ་བསྟན་རྒྱལ་མཚན་སྒྲེང་མཛད་པ། །མཚུངས་བྲལ་དཔལ་ལྡན་བླ་མར་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །གསང་གསུམ་རྡོ་རྗེའི་ཁམས་སུ་རྟག་བརྟན་ཅིང་། །ལེགས་མཛད་ཕྲིན་ལས་ཟབ་མོས་གླིང་བཞིའི་ཁྱོན། །ཡོངས་ཁྱབ་བསྟན་འགྲོའི་དགེ་མཚན་རྒྱས་བྱིན་རློབས། །རྣམ་དག་དད་དམ་མོས་པོའི་ཨ་དཪྴར། །མཆོག་བྱིན་པྲ་ཕབ་གཟུགས་བརྙན་ལེགས་འཕོས་ཏེ། །དོན་བརྒྱུད་དགོངས་པའི་གསང་མཛོད་བརྟོལ་བ་ཡིས། །རྟོགས་གྲོལ་དུས་མཉམ་ཆེན་པོར་བྱིན་གྱིས་རློབས། །དེ་མ་ཐོབ་ཀྱི་ཚེ་རབས་ཕྲེང་བར་ཡང་། །མགོན་ཁྱོད་རིགས་ཀྱི་བདག་པོར་ཉེར་ཐོབ་ཅིང་། །ཡང་དག་ལམ་གྱི་རྟེན་འབྲེལ་ཀུན་འགྲིགས་ནས། །མཐར་ཐུག་ཚོམ་བུ་གཅིག་ཏུ་གྲོལ་བར་ཤོག །མགོན་པོ་མཆོག་གི་ཐུགས་བསྐྱེད་རྣམ་ཐར་དང་། །མཛད་པ་ཕྲིན་ལས་གསང་བ་ཟབ་མོའི་ཚུལ། །མ་ལུས་བདག་གིས་སྒྲུབ་པའི་མཐུ་ཐོབ་ནས། །དོན་གཉིས་བསམ་ཀུན་འགྲུབ་པའི་བཀྲ་ཤིས་སྩོལ། །ཅེས་སྐྱབས་གཅིག་འཁོར་ལོའི་མགོན་པོ་བཀའ་དྲིན་མཚུངས་བྲལ་དྲུང་སྤྲུལ་རིན་པོ་ཆེའི་གསོལ་འདེབས་ཉུང་ངུ་འདི་ཡང་། རང་ཉིད་ཀྱི་དད་པའི་གསོས་དང་སྐལ་བཟང་རྡོ་རྗེའི་མཆེད་པོ་དུ་མའི་གསུང་གིས་བསྐུལ་བའི་ངོར་སྙོམ་ལས་འདུ་གསུམ་སྤྱོད་པ་འགྱུར་མེད་པདྨ་བསྟན་འཛིན་གྱིས་བྲིས་ཤིང་གསོལ་བ་བཏབ་པ་སིདྡྷིརསྟུ། མངྒལཾ། དགེའོ། །དགེའོ། །དགེའོ།། ༈ སྐྱབས་ཀུན་འདུས་ཞལ་གཅིག་ཆོག་ཆོས་ཀྱི་རྗེ། །དྲན་པ་ཙམ་གྱིས་སྲིད་ཞིའི་འཇིགས་འཕྲོག་ཅིང་། །ལྷན་སྐྱེས་བདེ་ཆེན་རྩོལ་མེད་སྐྱེད་མཛད་པའི། །མཚུངས་བྲལ་དྲིན་ཆེན་བླ་མར་གསོལ་བ་འདེབས། །སངས་རྒྱས་ཐམས་ཅད་བླ་མའི་ངོ་བོ་སྟེ། །དམ་ཆོས་ཐམས་ཅད་བླ་མའི་རང་བཞིན་ཡིན། །དགེ་འདུན་ཐམས་ཅད་བླ་མའི་རོལ་པ་ཉིད། །སྐྱབས་ཀུན་འདུས་ཞལ་བླ་མར་གསོལ་བ་འདེབས། །རྩ་བརྒྱུད་བླ་མའི་དགོངས་ཀློང་འདུ་འབྲལ་མེད། །ཡི་དམ་ཞི་ཁྲོ་བླ་མའི་ཡེ་ཤེས་ཏེ། །མཁའ་འགྲོ་ཆོས་སྐྱོང་ཕྲིན་ལས་རང་མདངས་ཡིན། །རྩ་གསུམ་སྤྱི་དཔལ་བླ་མར་གསོལ་བ་འདེབས། །བླ་མའི་ཐུགས་ནི་འགྱུར་མེད་ཆོས་ཀྱི་སྐུ། །བླ་མའི་གསུང་ནི་འགགས་མེད་ལོངས་སྤྱོད་རྫོགས། །བླ་མའི་སྐུ་ནི་གང་འདུལ་སྤྲུལ་སྐུ་དངོས། །སྐུ་བཞི་ལྷུན་གྲུབ་བླ་མར་གསོལ་བ་འདེབས། །གང་གིས་གཡེངས་པ་སྤངས་ནས་ལོ་སྟོང་དུ། །རྩེ་གཅིག་ལྷ་སྐུའི་རྣལ་འབྱོར་སྒོམ་པ་བས། །བླ་མ་སྐད་ཅིག་དྲན་པ་ཁྱད་པར་འཕགས། །དེ་སླད་བླ་མ་རྗེ་ལ་གསོལ་བ་འདེབས། །གང་གིས་རྒྱུད་སྡེ་བཞི་ཡི་ཡི་དམ་ལྷའི། །ལྷ་ཛབ྄་སྙིང་པོ་བྱེ་བ་འབུམ་བཟླས་ལས། །བླ་མའི་གསོལ་འདེབས་ལན་གཅིག་ཁྱད་པར་འཕགས། །དེ་ཕྱིར་བླ་མ་རྗེ་ལ་གསོལ་བ་འདེབས། །གང་གིས་ཞི་གནས་གནས་ཆའི་བསམ་གཏན་དང་། །རྫོགས་རིམ་སྟོང་རྐྱང་ལོ་བརྒྱར་སྒོམ་པ་བས། །ཐུགས་ཡིད་སྐད་ཅིག་འདྲེས་པ་ཁྱད་པར་འཕགས། །དེ་སླད་བླ་མ་རྗེ་ལ་གསོལ་བ་འདེབས། གང་གིས་རིན་ཆེན་བདུན་གྱི་སྙིང་པོ་ཡིས། །ལྷ་སྐུ་བྱེ་བ་འབུམ་ཕྲག་བཞེངས་པ་བས། །བླ་མའི་སྐུ་གཟུགས་རི་མོར་བྲིས་པ་མཆོག །དེ་སླད་བླ་མ་རྗེ་ལ་གསོལ་བ་འདེབས། །གང་གིས་གསུང་རབ་ཡན་ལག་བཅུ་གཉིས་པོ། །བྲིས་ཤིང་བཅངས་ཏེ་ཀུན་ལ་བསྟན་པ་བས། །བླ་མའི་གསུང་སྒྲོས་ཚིག་གཅིག་འཛིན་པ་མཆོག །དེ་སླད་བླ་མ་རྗེ་ལ་གསོལ་བ་འདེབས། །ཞིང་ཁམས་རྒྱ་མཚོའི་རྡུལ་སྙེད་རྒྱལ་རྣམས་ལ། །སྣ་ཚོགས་མཆོད་པའི་སྤྲིན་གྱིས་མཆོད་པ་བས། །བླ་མའི་བ་སྤུ་གཅིག་མཆོད་བསོད་ནམས་འཕགས། །དེ་སླད་བླ་མ་རྗེ་ལ་གསོལ་བ་འདེབས། །བླ་མའི་སྐུ་ལ་བསྡོ་{བརྡོ} བའི་གདུག་བྱེད་རྣམས། །སྙིང་སྟོབས་ཆེན་པོའི་མཐུ་ཡིས་བསྒྲལ་བྱས་ན། །ཁམས་གསུམ་སེམས་ཅན་སྲོག་བཏོན་ལས་འཕགས་གསུངས། །དེ་སླད་བླ་མ་རྗེ་ལ་གསོལ་བ་འདེབས། །བསྐྱེད་རིམ་སེམས་འཛིན་མང་པོ་བློས་མི་ལྕོགས། །བསྙེན་སྒྲུབ་བཟླས་བརྗོད་མང་པོ་གྲངས་མི་སོག །རྫོགས་རིམ་ཏིང་འཛིན་མང་པོ་བློར་མ་ལོངས། །དེ་སླད་གཅིག་ཆོག་བླ་མར་གསོལ་བ་འདེབས། །བསྲུང་བཟློག་སྐུ་རིམ་མང་པོའི་ལང་མ་བྱུང་། །ཁ་བསྒྱུར་དམིགས་པ་མང་པོ་བློར་མ་ངེས། །ཙབ་ཙུབ་བློ་མང་གཡེངས་པའི་སྣོན་མར་གོ །དེ་སླད་བདག་ནི་བླ་མར་གསོལ་བ་འདེབས། །བསྐྱེད་རྫོགས་སྙིང་པོ་བླ་མའི་མོས་གུས་ཡིན། །བཟླས་བརྗོད་སྙིང་པོ་བླ་མའི་གསོལ་འདེབས་ཡིན། །ཉམས་ལེན་སྙིང་པོ་བླ་མ་འབྲལ་མེད་མཆོག །དེ་ཕྱིར་བླ་མ་རྗེ་ལ་གསོལ་བ་འདེབས། །སྣང་བ་རང་གསལ་འཛིན་མེད་བླ་མའི་སྐུ། །གྲགས་སྟོང་སྐྱེ་མེད་བརྗོད་བྲལ་བླ་མའི་གསུང་། །དྲན་པ་རང་དག་རིག་སྟོང་བླ་མའི་ཐུགས། །རྡོ་རྗེ་གསུམ་གྱི་ངོ་བོར་གསོལ་བ་འདེབས། །རང་སེམས་བླ་མར་རྟོགས་པ་ལྟ་བའི་རྩེ། །ཐུགས་ཡིད་དབྱེར་མེད་བསྲེ་བ་སྒོམ་གྱི་བཅུད། །བླ་མའི་རྣམ་ཐར་སྐྱོང་བ་སྤྱོད་པའི་མཆོག །ལྟ་སྤྱོད་དབྱེར་མེད་ངང་ནས་གསོལ་བ་འདེབས། །ཚེ་འདིའི་བར་ཆད་བླ་མ་བསྒྲུབས་པས་སེལ། །ཕྱི་མའི་ས་ལམ་བླ་མའི་མཐུ་ཡིས་བགྲོད། །མཆོག་ཐུན་དངོས་ཀུན་བླ་མ་རྗེ་ལ་རག །དེ་ལྟར་ཤེས་པས་གསོལ་བ་རྒྱུན་དུ་འདེབས། །སྐྱིད་སྡུག་ལེགས་ཉེས་ཤི་གསོན་གང་བྱུང་ཡང་། །བདག་ལ་རེ་ས་བླ་མ་རྗེ་ལས་མེད། །ཉིན་མཚན་ཀུན་ཏུ་མི་བརྗེད་གསོལ་འདེབས་ན། །དོན་གཉིས་ལྷུན་གྱིས་འགྲུབ་པའི་བྱིན་རླབས་སྩོལ། །དགོངས་བརྒྱུད་བླ་མའི་བྱིན་རླབས་སྙིང་ལ་ཞུགས། །རྟོགས་པ་དོན་གྱི་ཡེ་ཤེས་ནང་ནས་ཤར། །ཅེར་གྲོལ་ཅོག་བཞག་ཆེན་པོར་འགག་སྡོམ་པས། །དཔལ་ལྡན་བླ་མའི་ཐུགས་དང་རོ་གཅིག་ཤོག །ཅེས་རྒྱུ་མཚན་ཤེས་པའི་གསོལ་འདེབས་ཉུང་ངུ་འདིའང་རྨོངས་བཙུན་པདྨ་རྣམ་རྒྱལ་གྱིས་དད་པ་རྣམ་པར་འཕེལ་བའི་ངག་གིས་བརྗོད་པ་དགེ། མངྒལཾ། ༈ ཐུགས་རྗེའི་དབང་ཕྱུག་འཕགས་པ་སྤྱན་རས་གཟིགས། །མགོན་མེད་བདག་ལ་བརྩེ་བས་རྗེས་དགོངས་ཏེ། །སྐྱེ་ཀུན་སྡིག་སེམས་ཡིད་ལ་མི་འགྱུ་བར། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །ཚེ་འདིའི་ལྟོ་གོས་ཇི་ལྟར་བྱས་ཀྱང་འཕྱིད། །ཕྱི་མར་ཕན་པ་དམ་པའི་ཆོས་ལས་མེད། །རང་དབང་རྟེན་གྱི་འབྱོར་པ་ད་རེས་ཙམ། །བློ་སྣ་ཆོས་ལ་འགྱུར་བར་བྱིན་གྱིས་རློབས། །སྐད་ཅིག་རེ་བཞིན་འཆི་ལ་ཕར་ཕར་ཉེ། །མ་ཚོར་ངང་དུ་མི་ཚེ་ཡུད་ཀྱིས་ཟད། །དེ་རིང་ཙམ་ཡང་མི་འཆིའི་བློ་གཏད་ཅི། །ལོང་མེད་རྒྱུད་ལ་སྐྱེ་བར་བྱིན་གྱིས་རློབས། །སྔར་བྱས་ཐམས་ཅད་དོན་མེད་སྡུག་བསྔལ་རྒྱུ། །མྱོང་གྱུར་ལས་རྣམས་རང་གི་ཐོག་ཏུ་སྨིན། །ངན་སོང་འཁོར་བའི་སྡུག་བསྔལ་བཟོད་གླགས་{བླག}མེད། །བཅོས་མིན་ངེས་འབྱུང་སྐྱེ་བར་བྱིན་གྱིས་རློབས། །སྐྱིད་པ་གང་བྱུང་དཀོན་མཆོག་ཐུགས་རྗེའི་མཐུ། །སྡུག་བསྔལ་ཐམས་ཅད་སྔོན་བསགས་ངན་པའི་འབྲས། །གང་བྱུང་ལམ་ཁྱེར་ལས་འབྲས་གོ་བའི་གནད། །བསགས་སྦྱང་གནད་དུ་སྨིན་པར་བྱིན་གྱིས་རློབས། །བདག་བདེ་འདོད་ལས་འགྲོ་རྣམས་སྲིད་པར་འཆིང་། །གཞན་ཕན་གོམས་པས་ཐུབ་རྣམས་མངོན་སངས་རྒྱས། །དེ་ཕྱིར་བདག་བས་གཞན་གཅེས་གོམས་པའི་ཤུགས། །བྱམས་དང་སྙིང་རྗེ་འབྱོང་བར་བྱིན་གྱིས་རློབས། །འགྲོ་སྒྲོལ་སླད་དུ་རྫོགས་བྱང་དོན་གཉེར་བློ། །བསམ་དང་སྦྱོར་བས་སྨོན་དང་འཇུག་པའི་ཚུལ། །སྲོག་ལ་བབས་ཀྱང་མི་གཏོང་སྐྱེ་ཀུན་ཏུ། །རྒྱལ་སྲས་སྤྱོད་ལ་འཇུག་པར་བྱིན་གྱིས་རློབས། །སྒོ་གསུམ་རྩོམ་པ་རྟག་ཏུ་དོན་ཡོད་ཅིང་། །ཐབས་ལ་མཁས་པས་རྫོགས་སྨིན་སྦྱངས་མཐར་ཕྱིན། །དོན་གཉིས་ལྷུན་གྲུབ་མངོན་པར་སངས་རྒྱས་ནས། །སྲིད་མཚོ་དོང་ནས་སྤྲུགས་པར་བྱིན་གྱིས་རློབས། །མདོར་ན་འཕགས་མཆོག་སྙིང་རྗེའི་ལྷ་ཁྱོད་ཀྱིས། །སྐྱེ་ཀུན་བདག་གི་དགེ་བའི་བཤེས་མཛད་ནས། །རྣམ་ཐར་རྒྱ་མཚོར་མཉམ་པར་འཇུག་ནུས་པའི། །བྱིན་དངོས་མཐའ་དག་དེང་འདིར་སྩལ་ཏུ་གསོལ། །ཅེས་པའང་དད་ལྡན་ངོར་གཞན་ཕན་བློ་གྲོས་ཀྱིས་བྲིས་པ་དགེ། ༈ ན་མོ་གུ་རུ་མཉྫུ་ཤྲཱི་ཡེ། དོན་བཅུ་ཡང་དག་ཐུགས་སུ་ཆུད་གྱུར་ཅིང་། །ཕྱག་རྒྱ་བཞི་ཡི་དོན་ནི་འགྲོ་ལ་སྟོན། །ཚིག་དོན་དྲི་མེད་ཆོས་རབ་སྣང་བའི་གཏེར། །སྨྲ་བའི་ཉི་མ་སྙིང་ལ་འཇུག་པར་མཛོད། །ཁྱོད་ནི་སྒྱུ་འཕྲུལ་དྲྭ་བའི་རོལ་གར་མཁན། །ནམ་མཁའི་མཐའ་དང་སེམས་ཅན་གནས་ཇི་སྲིད། །གསང་བ་བསམ་མི་ཁྱབ་པའི་བཀོད་པའི་སྤྲིན། །ཆོས་ཀྱི་དབྱིངས་དང་མཉམ་པར་འཇུག་པ་ལགས། །དེ་སླད་ཕྱོགས་རེར་ཞེན་པའི་ཀུན་རྟོག་གི། །སྤྲོས་པས་ཅི་བྱ་བསམ་མི་ཁྱབ་པ་ཡི། །རྣམ་ཐར་ཟབ་མོའི་ཚུལ་ལ་དད་བྱས་ནས། །འདོད་པའི་དོན་འགའ་ཁྱེད་ལ་གསོལ་བར་བགྱི། །དཔག་བསམ་ཤིང་དང་འདོད་འབྱུང་ནོར་བུའི་གཏེར། །འབྱུང་ཆེན་ཁམས་བཞིན་མཐའ་ཡས་འགྲོ་ཀུན་ལ། །ཁྱོད་ནི་རྣམ་མང་ཉེར་འཚོའི་གཞིར་གྲགས་ན། །དམན་པ་བདག་ལའང་ཤས་ཙམ་སྩལ་པར་འོས། །སྡུག་བསྔལ་མང་ལྡན་སྲིད་པའི་བརྩོན་ར་འདིར། །ལས་ཉོན་ལྕགས་སྒྲོག་སྲ་བས་བསྡམས་པ་བདག །མགོན་པོ་ཁྱོད་ལས་སྐྱབས་གཞན་མི་འཚལ་ན། །འཇིགས་ལས་དབུགས་དབྱུང་སྩོལ་ཅིག་འཇམ་པའི་དབྱངས། །ཤིན་ཏུ་རྙེད་དཀའི་དལ་འབྱོར་རྟེན་ཐོབ་ཀྱང་། །དམན་པ་བདག་ནི་དོན་མེད་བྱ་བས་གཡེངས། །རིན་ཆེན་གླིང་ནས་སྟོང་ལོག་བྱེད་ལ་ཉེ། །ངེས་འབྱུང་རྒྱུད་ལ་སྐྱེད་ཅིག་འཇམ་པའི་དབྱངས། །སངས་རྒྱས་མཐུ་ཡིས་བརྒྱ་ལམ་རེ་འགའ་ཙམ། །རྙེད་པའི་དགེ་བློ་ཤིན་ཏུ་ཉམ་ཆུང་ཞིང་། །ཐོག་མེད་ངན་གོམས་བག་ཆགས་ཤུགས་དྲག་པས། །འཕགས་པའི་ནོར་དང་སྤྲོད་ཅིག་འཇམ་པའི་དབྱངས། །ངན་འགྲོའི་སྒོ་འགགས་མཐོ་རིས་སྒོ་དབྱེ་ཞིང་། །རྒ་ཤི་མེད་པར་འདྲེན་མཛད་བྱང་ཆུབ་སེམས། །སྐྱེ་བའི་གེགས་གྱུར་རང་དོན་ཡིད་བྱེད་ཀྱི། །བློ་ངན་འདི་ལས་སྐྱོབས་ཤིག་འཇམ་པའི་དབྱངས། །དགེ་བའི་བཤེས་དང་དགེ་བའི་གྲོགས་པོ་དང་། །ཆོས་མཐུན་གནས་མལ་འཚོ་བ་ལ་སོགས་པའི། །མཐུན་པའི་ཡོ་བྱད་ཀུན་གྱིས་མི་བྲེལ་ཞིང་། །རང་དབང་ཆོས་ལ་སྦྱོར་ཅིག་འཇམ་པའི་དབྱངས། །རིགས་ཁམས་མཐུ་ལས་མོས་པའི་རླུང་ཤུགས་ཀྱིས། །ཚད་མེད་རྣམ་བཞིའི་ཤིང་རྟ་ལེགས་བསྒྱུར་བས། །སྨོན་འཇུག་བྱང་ཆུབ་སེམས་ཀྱི་ཉི་ཟླའི་དལ། །ཡིད་མཁར་གསལ་བར་མཛོད་ཅིག་འཇམ་པའི་དབྱངས། །ཐོས་ལ་མི་མོས་བསམ་པར་གཡེལ་བ་དང་། །སྒོམ་པར་ལྷོད་དང་སྦྱོར་བར་ལེ་ལོ་ཆེ། །ཀུན་སློང་སྙིང་རྗེ་མེད་སོགས་འགལ་རྐྱེན་རིགས། །ནམ་ཡང་མི་འབྱུང་མཛོད་ཅིག་འཇམ་པའི་དབྱངས། །མི་ཉམས་རྒྱུ་གསུམ་འཕེལ་བའི་རྐྱེན་དགུ་སོགས། །མཐུན་སྐྱེན་ཀུན་ཚང་དྲན་ཤེས་བག་ཡོད་པས། །རྒྱལ་བའི་སྲས་ཀྱི་བསླབ་པ་རྒྱ་མཚོ་ལ། །ཚུལ་བཞིན་སློབ་ནུས་མཛོད་ཅིག་འཇམ་པའི་དབྱངས། །རྩ་ལྟུང་གཅིག་བཞི་བཅོ་བརྒྱད་ཉི་ཤུའི་གྲང་། །ནག་པོའི་ཆོས་བཞི་ཡན་ལག་ཉེས་བྱས་རིགས། །སྤངས་པ་ཉེས་སྤྱོད་སྡོམ་པའི་ཚུལ་ཁྲིམས་ལ། །འཆལ་སྤྱོད་དྲི་མ་སོལ་ཅིག་འཇམ་པའི་དབྱངས། །ཁྱད་ཆོས་བཞི་ལྡན་སྦྱིན་སོགས་དྲུག་ཚན་དྲུག །ཡོན་ཏན་བཞི་ལྡན་ཆགས་བདུན་སྤོང་ཚུལ་གྱིས། །སྒྲུབ་པ་དགེ་བ་ཆོས་སྡུད་ཚུལ་ཁྲིམས་ལ། །ཚུལ་བཞིན་སློབ་ནུས་མཛོད་ཅིག་འཇམ་པའི་དབྱངས། །ལུས་དང་ལོངས་སྤྱོད་དུས་གསུམ་དགེ་རྩར་བཅས། །གཏོང་སེམས་དགེ་བ་ཡོངས་སུ་གོམས་པའི་མཐུས། །ཆོས་ནོར་མི་འཇིགས་སྐྱབས་ཀྱི་སྦྱིན་པ་ཡིས། །འགྲོ་ཚོགས་རེ་སྐོང་མཛོད་ཅིག་འཇམ་པའི་དབྱངས། །སྤོང་སེམས་དགེ་བ་བསིལ་བ་ཐོབ་པའི་གཞི། །ས་ཆེན་བཞིན་དུ་ཡོན་ཏན་ཀུན་གྱི་རྟེན། །སྡོམ་དང་ཆོས་སྡུད་སེམས་ཅན་དོན་བྱེད་པའི། །ཚུལ་ཁྲིམས་གསུམ་ལ་སྦྱོར་མཛོད་འཇམ་པའི་དབྱངས། །དཀའ་ཐུབ་ཀུན་གྱི་མཆོག་གྱུར་མི་འཁྲུགས་སེམས། །ཁྲོ་བའི་དགྲ་འཇོམས་སྡུག་བསྔལ་དང་དུ་ལེན། །གནོད་བྱེད་ཇི་མི་སྙམ་དང་ཟབ་མོ་ཡི། །བཟོད་པ་གསུམ་ལ་སྦྱོར་ཅིག་འཇམ་པའི་དབྱངས། །སྙིང་སྟོབས་མི་ཞུམ་མཆོག་གི་གནས་ལ་སྦྱོར། །བསམ་པ་གོ་ཆ་ཆེ་དང་སྦྱོར་བས་ཞུགས། །གཞན་དོན་མཆོག་ལ་སྤྲོ་བའི་བརྩོན་འགྲུས་ཀྱིས། །ལེ་ལོའི་གཡུལ་ངོ་བཟློག་ཅིག་འཇམ་པའི་དབྱངས། །ཉེས་བརྒྱའི་འབྱུང་གནས་གཡེང་བའི་དགྲ་གཞོམ་པའི། །ཏིང་འཛིན་མི་གཡོ་ཡོན་ཏན་ཀུན་འབྱུང་གཞི། །འཇིག་རྟེན་འཇིག་རྟེན་འདས་པའི་བསམ་གཏན་གསུམ། །རྒྱུད་ལ་སྐྱེད་པར་མཛོད་ཅིག་འཇམ་པའི་དབྱངས། །ཆོས་རབ་རྣམ་འབྱེད་ནོར་བུའི་སྒྲོན་མེ་མཆོག །མཐར་འཛིན་ལྟ་བའི་རབ་རིབ་སེལ་བའི་སྨན། །དྲི་མེད་ཐོས་བསམ་སྒོམ་པའི་ཤེས་རབ་གསུམ། །རྩོལ་མེད་རྒྱུད་ལ་སྐྱེད་ཅིག་འཇམ་པའི་དབྱངས། །ཀུན་ཀྱང་རྟེན་དང་དངོས་པོ་ཆེད་དུ་བྱ། །ཐབས་དང་བསྔོ་བ་རྣམ་དག་དམ་པ་སྟེ། །དམ་པ་དྲུག་ལྡན་གནས་སྐབས་མཐར་ཐུག་གི། །རང་འབྲས་མཆོག་ལ་སྦྱོར་ཅིག་འཇམ་པའི་དབྱངས། །སྦྱིན་པས་འཁོར་སྡུད་དམ་ཆོས་སྙན་པར་བཤད། །དོན་སྤྱོད་གྲོས་གདབ་དོན་མཐུན་སྒྲུབ་པ་སྟེ། །བསྡུ་དངོས་བཞི་ལྡན་སེམས་ཅན་དོན་བྱེད་ཀྱི། །ཚུལ་ཁྲིམས་མཆོག་སྦྱོར་མཛོད་ཅིག་འཇམ་པའི་དབྱངས། །གནས་སྐབས་མི་ཤེས་མ་གུས་བག་མེད་རྐྱེན། །ཉོན་མོངས་དབང་གིས་རྙོགས་པར་གྱུར་ན་ཡང་། །སྟོབས་བཞིའི་ཆོ་གས་མོད་ལ་སྦྱངས་བྱས་ནས། །ལྷན་ཅིག་མི་གནས་མཛོད་ཅིག་འཇམ་པའི་དབྱངས། །དྲན་པ་ཉེར་བཞག་བཞི་སོགས་བྱང་ཕྱོགས་ཆོས། །སུམ་ཅུ་རྩ་བདུན་མངོན་རྟོགས་ལ་བརྟེན་ནས། །དཀའ་བ་མེད་པར་ལམ་ལྔའི་ཡོན་ཏན་མཆོག །མྱུར་དུ་རྫོགས་པར་མཛོད་ཅིག་འཇམ་པའི་དབྱངས། །ཁྱད་པར་དུའང་ཅུང་ཟད་བལྟ་བ་དང་། །འདྲི་བར་འདོད་ཚེ་མགོན་པོ་འཇམ་པའི་དབྱངས། །ཁྱོད་ནི་དགེ་བའི་བཤེས་སུ་མངོན་སྣང་ནས། །སྤོབས་པའི་གཏེར་བརྒྱད་གྲོལ་བར་མཛད་དུ་གསོལ། །ཟབ་མོ་ལྟ་བའི་གནས་ལ་བློ་མིག་ཐོབ། །རྒྱ་ཆེན་སྤྱོད་གཞུང་རྒྱ་མཚོར་རང་དབང་སྒྱུར། །རྣམ་དག་རིགས་ལམ་སེང་གེའི་ང་རོ་ཡིས། །ཐེ་ཚོམ་དྲྭ་བ་ཆོད་པར་མཛད་དུ་གསོལ། །ཐུབ་གསུང་མཐའ་དག་ངེས་དོན་ཀློང་དུ་གཅིག །གནས་སྐབས་གདུལ་བྱ་དཀྲི་ཚུལ་བསམ་མི་ཁྱབ། །ཀུན་ཀྱང་ཐབས་མཁས་མཛད་པར་ངེས་རྙེད་ནས། །ཀུན་ལ་དག་སྣང་འཕེལ་བར་མཛད་དུ་གསོལ། །ཅུང་ཟད་ཐོས་ཚེ་རང་རྒྱུད་མི་དྲེགས་ཅིང་། །ཕྱོགས་ཙམ་གོ་ཚེ་གཞན་སྐྱོན་མི་འཚོལ་བར། །གང་ཤེས་རང་གི་རྒྱུད་ལ་དྲིལ་བ་ཡིས། །ཆོས་དང་སེམས་རྒྱུད་འདྲེས་པར་མཛད་དུ་གསོལ། །བླང་དོར་ཚུལ་བཞིན་སྟོན་པའི་མཁན་སློབ་དང་། །དེས་བསྟན་ཆོས་དང་དེར་བརྩོན་གྲོགས་རྣམས་ལ། །མ་དད་ལོག་ལྟ་སྐད་ཅིག་མི་སྐྱེ་བར། །གུས་པས་སྤྱི་བོས་ལེན་པར་མཛད་དུ་གསོལ། །བསྟོད་དང་གྲགས་པས་རློམ་སེམས་མི་སྐྱེ་ཞིང་། །སྨད་ཀྱང་ཞུམ་དང་སྡང་སེམས་མི་སྐྱེ་བར། །ཆོས་བརྒྱད་མགོ་སྙོམས་རང་སེམས་ཡོངས་སུ་འདུལ། །ནང་གི་ཡོན་ཏན་འཕེལ་བར་མཛད་དུ་གསོལ། །རྒྱལ་སྲས་རྣམས་ཀྱིས་གང་ལ་མི་བསླབ་པའི། །ཤེས་བྱའི་དངོས་དེ་འགའ་ཡང་ཡོད་མིན་ཕྱིར། །སྒྲ་ཚད་བཟོ་གསོ་ནང་རིག་ཡན་ལག་བཅས། །མ་ལུས་ཐོས་ཤིང་ཆུབ་པར་མཛད་དུ་གསོལ། །སྣང་བ་ཀུན་རྫོབ་རྟེན་འབྱུང་སྒྱུ་མ་དང་། །སྟོང་པ་དོན་དམ་སྤྲོས་བྲལ་གནས་ལུགས་མཆོག །ལེགས་པར་གཞལ་བའི་ཚད་མ་རྣམ་གཉིས་ཀྱིས། །གནས་སྣང་གཏན་ལ་ཕབ་པར་མཛད་དུ་གསོལ། །མཐར་ཐུག་སྟོང་དང་རྟེན་འབྱུང་ཟུང་འཇུག་པའི། །སྤྲོས་པ་ཀུན་བྲལ་ཆོས་དབྱིངས་ཟབ་མོའི་ཚུལ། །ཇི་བཞིན་རྟོགས་ནས་བསལ་བཞག་བྲལ་བ་ཡི། །སྒོམ་བྱུང་བློ་གྲོས་བསྐྱེད་པར་མཛད་དུ་གསོལ། །མི་བརྗེད་གཟུངས་ཀྱིས་ཆོས་ཀུན་འཛིན་ནུས་ཤིང་། །སྤོབས་པ་ཟབ་མོས་ཐོགས་མེད་འབྱིན་ལ་དབང་། །རྩོད་འཆད་རྩོམ་པའི་བློ་གྲོས་དྲི་མེད་ཀྱིས། །བསྟན་ལ་བྱ་བ་ནུས་པར་མཛད་དུ་གསོལ། །མཐའ་ཀླས་སྐྱེ་དགུའི་དད་བསོད་གོས་བཟང་རྩེར། །དྲི་མེད་ཐུབ་བསྟན་ནོར་བུའི་ཏོག་འབར་ཞིང་། །རྒོལ་ངན་ཀླ་ཀློའི་དཔུང་གིས་བརྫི་མིན་པའི། །དགའ་སྟོན་རྒྱལ་མཚན་བརྟན་པར་མཛད་དུ་གསོལ། །བསྟན་འཛིན་མཆོག་རྣམས་སྐུ་ཚེ་རྡོ་རྗེ་ལྟར། །རབ་བརྟན་ཐུགས་ཀྱི་བཞེད་དོན་གེགས་མེད་འགྲུབ། །འཁོར་ལོ་གསུམ་གྱི་ཕྲིན་ལས་ཟབ་མོའི་ཚུལ། །དུས་ཀྱི་མཐར་ཡང་ཉམས་མེད་མཛད་དུ་གསོལ། །རྒྱལ་ཁམས་ཀུན་ཏུ་ནད་མུག་འཁྲུག་རྩོད་ཞི། །རྫོགས་ལྡན་དུས་བཞིན་སྣོད་བཅུད་དཔལ་འབྱོར་རྒྱས། །ལས་འབྲས་ཡིད་ཆེས་ལྟ་བས་རྒྱུད་གྲོལ་ནས། །ཀུན་ཀྱང་དགེ་ལ་གཞོལ་བར་མཛད་དུ་གསོལ། །རྨད་བྱུང་བྱང་ཆུབ་སེམས་ཀྱི་རྟེན་འབྲེལ་གྱིས། །བདག་སྣང་དབང་འདུས་གཞན་སྣང་ཟིལ་གྱིས་ནོན། །འབྲེལ་ཚད་དོན་ལྡན་རྣམ་དཀར་ཕྲིན་ལས་རྒྱས། །དོན་གཉིས་བསམ་ཀུན་འགྲུབ་པར་མཛད་དུ་གསོལ། །ཅེས་ཀུན་མཁྱེན་བླ་མའི་རྡོ་རྗེའི་གསུང་བྱིན་རླབས་ཀྱི་གཟི་བྱིན་འབར་བ་མཁས་པ་ལ་འཇུག་པའི་སྒོའི་བརྗོད་ཀྱི་ཤླ་ཀའི་གཤམ་དུ་གསར་དུ་བསྣན་ནས་འདོད་པའི་དོན་ལ་གསོལ་བ་བཏབ་པ་ཚིགས་སུ་བཅད་པ་བྱང་ཕྱོགས་ཀྱི་གྲངས་ལྡན་འདི་ནི་རབ་ཚེས་མེ་འབྲུག་ལོ་སློབ་གྲྭ་གསར་འཛུགས་ཀྱི་སྐབས་སུ་མཆེད་གྲོགས་འགའ་ཞིག་གིས་བསྐུལ་ངོར་ཤཱཀྱའི་བཙུན་པ་རྒན་པོ་གཞན་ཕན་ཆོས་ཀྱི་བློ་གྲོས་ཀྱིས་བསྟན་གཉིས་དར་རྒྱས་གླིང་གི་ཆོས་གྲྭར་བྲིས་ཤིང་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་མཛད་དུ་གསོལ། དགེའོ། །དགེའོ། །དགེའོ།།
༄༅། །སྭསྟི་པྲ་ཛཱབྷྱཿ དགེ་ལེགས་བྱེ་བའི་དཔལ་གྱིས་མངོན་མཐོ་ཞིང་། །ཚངས་པའི་གསུང་དབྱངས་འགྲོ་ལ་ལྷང་ངེ་བ། །མཁྱེན་བརྩེའི་ཡེ་ཤེས་གཏིང་མཐའ་མི་དཔོག་པའི། །ཐུབ་ཆེན་འགྲོ་བའི་བླ་མར་ཕྱག་བགྱི་འོ། །གང་ཁྱོད་བསྐལ་མང་གོང་ནས་བྱང་ཆུབ་ཀྱང་། །སྙིང་རྗེ་ཆེན་པོས་སྲིད་པར་རྗེས་ཆགས་གར། །ལྔ་བདོའི་འགྲོ་བ་སྐྱོབ་པའི་ཐུགས་བསྐྱེད་དཔལ། །པད་དཀར་ལྟར་བསྔགས་གྲགས་པའི་མུ་ཁྱུད་བརླིང་། །གང་ཚེ་སློབ་པ་ལམ་ཞུགས་སྐབས་སུ་ཡང་། །ཕ་རོལ་ཕྱིན་བཅུས་ས་བཅུ་རིམ་བགྲོད་ཚུལ། །དཔལ་གྱི་མགུལ་ལས་ལེགས་གསུང་ངོ་མཚར་དབྱངས། །ས་གསུམ་རྣ་བའི་བཅུད་ལེན་ཉིད་དུ་གྲུབ། །དེང་འདིར་རྫོགས་སྨིན་སྦྱངས་པ་མཐར་ཕྱིན་ནས། །གདུལ་བྱ་འདུལ་སླད་ཚེ་ལོ་བརྒྱ་པའི་དུས། །རྡོ་རྗེ་གདན་དྲུང་བྱང་ཆུབ་ཚུལ་བསྟན་ནས། །ཐེག་གསུམ་ཆོས་ཆར་གདུལ་བྱའི་ཞིང་ལ་ཕབ། །གང་དག་མེད་པར་ལྟ་བའི་བློ་ཅན་རིགས། །དེ་ལ་ཐར་པ་ནམ་ཡང་ཡོད་མིན་ཕྱིར། །བདེན་བཞིའི་རྒྱུ་འབྲས་བླང་དོར་ཡོད་ལྟ་བའི། །བཀའ་འཁོར་དང་པོར་དཀྲི་འདི་ཐབས་མཁས་སྒོ། །གང་ལ་མཚན་མར་འཛིན་པའི་བློ་ཡོད་པ། །དེ་སྲིད་སྲིད་རྩའི་འ ཁྲི་ཤིང་གཅོད་དཀའ་བས། །གཟུགས་ནས་རྣམ་མཁྱེན་བར་གྱི་ཆོས་མཐའ་དག །སྟོང་པའི་ཚུལ་འདི་འཁོར་ལོ་བར་པར་བསྟན། །ཡང་དག་དོན་ལ་སྤྲོས་མཚན་ཀུན་བྲལ་དབྱིངས། །སྣང་སྟོང་ཟུང་འཇུག་བདེ་གཤེགས་སྙིང་པོས་ཁམས། །རྟག་ཆད་ལས་འདས་འདུས་མ་བྱས་པའི་བདག །ཟབ་པའི་ཚུལ་དེ་ཐ་མར་བསྟན་པ་ལགས། །ཀུན་ཀྱང་གནས་སྐབས་གདུལ་བྱ་དཀྲི་ཚུལ་ལས། །མཐར་ཐུག་དགོངས་ཟབ་གཅིག་ཏུ་འབབས་པའི་གནད། །ངེས་དོན་འཁོར་ལོ་གསུམ་པར་ཡོད་དོ་ཞེས། །འཇིགས་མེད་སེང་གེའི་སྒྲ་ཡིས་རྗེས་སུ་བསྔགས། །ཤིན་ཏུ་ཟབ་པ་མཐར་ཐུག་སྙིང་པོའི་སྒོ། །རྒྱུ་འབྲས་གཞན་དུ་མི་ཚོལ་འབྲས་བུའི་ཐེག །དབང་རྣོན་ཚེ་གཅིག་གྲོལ་བའི་ཉེ་ལམ་ཀྱང་། །རིང་མིན་འབྱུང་བའི་རྡོ་རྗེའི་ལུང་ཡང་སྩལ། །ཕན་བདེའི་གཞིར་གྱུར་བསྟན་པ་རིན་ཆེན་མཛོད། །གནས་བརྟན་བཅུ་དྲུག་རྒྱལ་ཆེན་བཞི་ལ་སོགས། །དབང་ཐོབ་ལྷ་མིའི་འཁོར་ལ་ལེགས་གཏད་ནས། །བསྟན་འཛིན་འཕགས་པའི་ཚོགས་ཀྱང་ལུང་བསྟན་མཛད། །ཨེ་མ་ངོ་མཚར་ཆེ་འོ་ལྷ་ཡི་ལྷ། །ཨ་ཧོ་བཀའ་དྲིན་ཆེ་འོ་ཤཱཀྱའི་སྲས། །མགོན་པོ་གང་གི་བཀའ་དྲིན་རྗེས་དྲན་བློས། །ཕྱི་མཐར་དམ་ཆོས་འཛིན་པའི་གཡར་དམ་འཆའ། །མཐུ་ལྡན་དཀར་ཕྱོགས་སྐྱོང་བའི་ཚོགས་རྣམས་ཀྱིས། །ཐུགས་དམ་རྗེས་དགོངས་བསྟན་དང་བསྟན་འཛིན་ཚོགས། །གང་དུ་བཞུགས་དེར་སྲུང་སྐྱོབ་སྒོ་ཕྱེས་ལ། །བསྟན་པ་རིན་ཆེན་ཡུན་དུ་རྒྱས་པར་མཛོད། །བསྟན་ལ་འཚེ་བའི་མཐའ་དམག་འབྱུང་པོ་སོགས། །བསྟན་སེལ་འཇུག་པའི་བསམ་སྦྱོར་གདུག་པའི་དཔལ། །བསྟན་སྲུང་དབང་པོ་རྣམས་ཀྱིས་ཞི་མཛོད་ལ། །བསྟན་དང་བསྟན་འཛིན་མངའ་ཐང་དགུང་དུ་སྤེལ། །ཁྱད་པར་འདིར་འདུས་བདག་ཅག་དཔོན་སློབ་ཚོགས། །ལུས་སེམས་རྡོ་རྗེ་ལྟ་བུར་རབ་བརྟན་ཅིང་། །འཁོར་ལོ་གསུམ་འབྲེལ་ཆོས་ལྡན་བགྱི་འོས་རིགས། །ཡིད་ལ་བསམ་པ་མཐའ་དག་འགྲུབ་པར་མཛོད། །མདོར་ན་དམ་པ་རྣམས་ཀྱིས་ཡོངས་བསྔགས་པའི། །ལེགས་ཚོགས་དཔལ་གྱིས་ཕྱོགས་དུས་ཀུན་ཁྱབ་ཅིང་། །འགྲོ་ཀུན་ཐེག་པ་ཆེན་པོ་རྒྱུད་གྲོལ་ནས། །ཕྱམས་ཅིག་རྣམ་གྲོལ་ཡོན་གྱིས་འབྱོར་གྱུར་ཅིག །ཅེས་པའང་རབ་ཚེས་ས་རྟ་གནམ་ལོ་གསར་དུ་འཆར་བའི་ཆོ་འཕྲུལ་ཟླ་བའི་ཚེས་གཅིག་ལ་འཇམ་དབྱངས་བློ་གྲོས་རྒྱ་མཚོས་རྟེན་འབྱུང་དུ་བརྗོད་པ་དགེ་ལེགས་འཕེལ། ༈ ༀ་སྭ སྟི། དཔལ་ལྡན་ཚོགས་གཉིས་ལྗོན་པའི་ཡལ་འདབ་རྩེར། །ཕུན་ཚོགས་སྐུ་བཞིའི་ལོ་འབྲས་གཡུར་སྨིན་པས། །ས་གསུམ་སྐྱེ་དགུའི་རེ་བ་སྐོང་བའི་གཉེན། །མཚོ་སྐྱེས་པདྨ་རྒྱལ་པོར་ཕྱག་བགྱི་འོ། །གང་གི་ཡོན་ཏན་ཀུན་གསལ་ཡངས་པའི་མཐའ། །བློ་ཆེན་འདབ་བཟང་དབང་པོས་བགྲོད་མིན་ན། །བདག་ལྟ་ཕྱེ་ལེབ་རྩལ་གྱིས་ག་ལ་ཞིག །དེ་སླད་བསམ་མི་ཁྱབ་ལ་བདག་དགའ་འོ། །སྟོབས་བཅུའི་སྟོབས་ཀྱིས་མི་མཐུན་ཕྱོགས་གཞོམ་ཞིང་། །དབང་བཅུའི་དཔལ་མང་ལུས་ཅན་ངལ་གསོའི་སྨན། །ཐུགས་རྗེའི་ཁྱད་པར་ལྔ་ལྡན་བླ་མ་མཆོག །གངས་ཅན་འགྲོ་བའི་སྐྱབས་གནས་གཅིག་པུ་ཉིད། །བྲལ་སྨིན་ཡོན་ཏན་རྒྱལ་དང་རབ་མཉམ་ཡང་། །གདུལ་དཀའ་འདུལ་ལ་ཕྲིན་ལས་ཁྱོད་གཅིག་འཕགས། །ལྔ་བདོའི་རྒུད་པས་མནར་བའི་འགྲོ་རྣམས་ལ། །བྱིན་རླབས་བཀའ་དྲིན་ལྷག་པར་འཇུག་པ་མྱུར། །དེ་སླད་གཅམ་བུ་མིན་པའི་གདུང་དབྱངས་ཀྱིས། །སྙིང་ནས་གསོལ་འདེབས་བུ་ལ་ཐུགས་རྗེས་དགོངས། །ཡིད་ལ་ཡེ་ཤེས་གཟིགས་པ་མྱུར་ཞུགས་ནས། །དོན་གཉིས་བསམ་པ་ཡིད་བཞིན་འགྲུབ་པར་མཛོད། །ཀྱེ་མ་དེང་དུས་བསྟན་པའི་མཐའ་ལ་ཐུག །བསྟན་འཛིན་སྐྱེས་མཆོག་ཕལ་ཆེར་ཞི་དབྱིངས་མནལ། །བསྟན་བཤིག་འཁྱམས་པོས་ས་སྟེང་གང་དུས་འདིར། །ཁྱེད་ཀྱི་རྗེས་འཇུག་རྒུད་པའི་དུས་ལ་བབས། །མཐའ་མི་དབུས་ལྷགས་འཁྲུག་རྩོད་ཆུ་ལྟར་ཁོལ། །བོད་ཁམས་བདེ་སྐྱིད་དགུང་ལ་ཡལ་ཉེ་ཞིང་། །སྟོན་དང་བསྟན་འཛིན་རྒུད་པའི་དུས་བྱུང་བས། །ཡེ་ཤེས་གཟིགས་པས་ལ་འུར་དགོངས་པར་མཛོད། །ས་གསུམ་དབང་བྱེད་སྲིད་གསུམ་བྲན་དུ་འཁོལ། །ཁྱོད་ཀྱི་མཐུ་སྟོབས་དུས་མཐའི་ཞུགས་ལས་ཆེ། །དེ་སླད་ཐུགས་རྗེ་ནུས་པའི་སྟོབས་བསྐྱེད་ལ། །ནག་པོའི་རྩ་ལག་མ་ལུས་མིང་མཐར་བྱོས། །བདག་སོགས་ཁྱེད་ཀྱི་གདུལ་བྱར་གྱུར་པ་རྣམས། །སྲུང་སྐྱོབ་རྡོ་རྗེའི་རྭ་གུར་བརྟན་མཛོད་ལ། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །དགེ་ལེགས་བསམ་ཀུན་ཡིད་བཞིན་འགྲུབ་པར་མཛོད། །མགོན་པོ་གང་ལ་བྱས་པ་གཟོ་འདོད་བློས། །མཆོག་གི་རིང་ལུགས་ཚུལ་བཞིན་འཛིན་འདོད་ཀྱི། །ལྷག་བསམ་ཡོད་ཀྱང་ནུས་པའི་སྟོབས་ཞན་པའི། །དམན་པ་བདག་ལ་ཐུགས་རྗེས་ལྷག་པར་དགོངས། །ལུས་ངག་ཡིད་ལ་རྡོ་རྗེའི་བྱིན་ཆེན་ཕོབ། །འབྲེལ་ཚད་དོན་ལྡན་བསམ་དོན་ཆོས་བཞིན་འགྲུབ། །བགེགས་དང་བར་ཆད་ནམ་ཡང་མི་འབྱུང་ཞིང་། །དོན་གཉིས་བས མ་ཀུན་འགྲུབ་པར་བྱིན་གྱིས་རློབས། །ཨོ་རྒྱན་རིག་འཛིན་བརྒྱུད་པའི་སྤྱན་སྔ་རུ།། ཐ་ཚིག་རྡོ་རྗེའི་དམ་བཞེས་བསྟན་སྲུང་ཚོགས། །དེང་འདིར་དགོས་པ་བྱུང་ངོ་ཐུགས་དམ་བསྐུལ། །བསྟན་དང་བསྟན་འཛིན་སྲུང་སྐྱོབས་མངའ་ཐང་སྤེལ། །སྤྲེལ་ཚ་གདོང་དམར་བོད་ཀྱི་སེམས་ཅན་རྣམས། །ཐུགས་རྗེས་ཡལ་བར་མ་དོར་ཐུགས་རྗེ་ཅན། །ཉམ་ཐག་བུ་ལ་ཕ་ཡིས་མི་བརྩེའམ། །སྙིགས་མའི་རྒུད་ཞི་བདེ་སྐྱིད་འཕེལ་བར་མཛོད། །མདོར་ན་བདག་སོགས་འདི་ནས་བྱང་ཆུབ་བར། །མ་ཧཱ་གུ་རུ་མཆོག་ལས་སྐྱབས་གཞན་སུ། །དེ་སླད་འདི་ཕྱི་བར་དོའི་གནས་ཀུན་ཏུ། །འབྲལ་མེད་ཐུགས་རྗེས་ཟུངས་ཤིག་དྲིན་ཆེན་རྗེ། །པདྨའི་ཐུགས་རྗེ་གདུལ་བྱའི་སྣོད་ལ་ཤར། །འགྲོ་བའི་དད་བསོད་མོས་དགེ་གཅིག་ཏུ་བརྟན། །ལེགས་པའི་རྟེན་འབྱུང་འབུམ་ཕྲག་ལྷན་ཅིག་འཚོགས། །རྫོགས་ལྡན་དུས་སྟོན་ངོམ་པའི་བཀྲ་ཤིས་ཤོག །ཅེས་པའང་རབ་ཚེས་ས་རྟ་ག ནམ་ལོ་གསར་འཆར་གྱི་ཚེས་ལ་སྔགས་བཙུན་པདྨ་བསྟན་འཛིན་གྱིས་གསོལ་བ་བཏབ་པ་དགེ་ལེགས་འཕེལ། ༈ ༀ་སྭསྟི། གང་མཚན་ཉིན་མོར་བྱེད་པའི་གཟི་འོད་ཀྱིས། །འཆི་བདག་འཇིགས་པའི་མུན་ཚོགས་མཐར་བསྐྲད་ནས། །ཚེ་དང་ཡེ་ཤེས་པད་ཚལ་བཞད་མཛད་པའི། །བཅོམ་ལྡན་གཟི་འོད་དཔག་མེད་མགོན་ལ་འདུད། །རྒྱལ་བ་ཀུན་གྱི་མཚན་བཟང་གཙུག་ཏོར་ལས། །ཉེར་ཐོན་རིགས་སྔགས་ལྷ་མོ་ཕྱག་བརྒྱད་མ། །གང་གིས་དྲན་ལ་ཚེ་དཔལ་དངོས་གྲུབ་མཆོག །སྩོལ་མཛད་རྣམ་པར་རྒྱལ་མར་གུས་པས་འདུད། །སྲས་བཅས་རྒྱལ་བའི་ཕྲིན་ལས་གཅིག་བསྡུས་དཔལ། །བརྒྱད་གཉིས་འཇིགས་པའི་དཔུང་འཕྲོག་འཕགས་མ་རྗེ། །རབ་དཀར་ཟླ་བའི་མདངས་ལྡན་ཚེ་སྦྱིན་མ། །ཡིད་བཞིན་འཁོར་ལོའི་ཞབས་ལ་གུས་པས་འདུད། །གང་མཚན་ལན་གཅིག་ཐོས་དང་དྲན་པས་ཀྱང་། །དུས་མིན་འཆི་བའི་ཉེས་པ་ཀུན་ཞི་ཞིང་། །རྡོ་རྗེའི་ཚེ་མཆོག་གྲུབ་མཛད་ལྷག་པའི་ལྷར། །རབ་གུས་དྭངས་པས་ཕྱག་འཚལ་སྐྱབས་སུ་མཆི། །ལུས་དང་ལོངས་སྤྱོད་དུས་གསུམ་དགེ་ཚོགས་འབུལ། །སྲོག་གཅོད་ལ་སོགས་མི་དགེ་བགྱིས་ཀུན་བཤགས། །འཕགས་སྐྱེའི་རྣམ་དཀར་ལས་ལ་ཡི་རང་འབུལ། །འགྲོ་ལ་བདུད་རྩིའི་སྒོ་འཕར་འབྱེད་པར་གསོལ། །རྒྱལ་དང་རྒྱལ་སྲས་འཕགས་པ་ཆེན་པོའི་ཚོགས། །ཞབས་པད་རྡོ་རྗེའི་ཁམས་སུ་རྟག་བརྟན་ཅིང་། །བདག་གཞན་དུས་གསུམ་བསགས་པའི་དགེ་ཚོགས་ཀྱིས། །འགྲོ་ཀུན་འཆི་མེད་མགོན་པོའི་སྐུ་ཐོབ་ཤོག །བཀྲ་ཤིས་སྲོག་གི་ཀ་བ་མི་འགྱུར་བརྟན། །མི་ཤིགས་ཚེ་ཡི་གཡུང་དྲུང་གཞོམ་གཞིག་བྲལ། །ཕུན་ཚོགས་སྡེ་བཞིའི་ཆུ་གཏེར་ཟབ་ལ་འཁྱིལ། །དོན་གཉིས་བསམ་པ་ཡིད་བཞིན་འགྲུབ་གྱུར་ཅིག །ཅེས་པའང་ས་རྟ་གནམ་ལོ་གསར་འཆར་ལ་སྡོང་བན་ཚེ་རིང་འབྲུག་རྒྱལ་གྱིས་རྟེན་འབྱུང་དུ་སྨོན་པ་དགེ། ༈ བརྒྱུད་ལྡན་བླ་མའི་གདམས་ཟབ་བདུད་རྩིའི་ཀླུང་། །ངོམས་མེད་གསོལ་ནས་སྐལ་བཟང་གདུལ་བྱ་ལ། །ལེགས་པར་སྩོལ་མཛད་གཞན་ཕན་ལྷག་བསམ་ཅན། །ཆོས་ཀྱི་བློ་གྲོས་ཞབས་ལ་གསོལ་བ་འདེབས། །ཞེན་ལོག་མཐར་ཕྱིན་ཆོས་བརྒྱད་འཆིང་བ་ཞིག །སྦྱངས་པ་མཐར་ཕྱིན་ཆོས་ཀུན་དེ་ཉིད་གཟིགས། །འགྲོ་དོན་མཐར་ཕྱིན་ཀརྨའི་བཀའ་བརྒྱུད་སྐྱོང་། །ཆོས་ཀྱི་ཉིན་བྱེད་ཞབས་ལ་གསོལ་བ་འདེབས། །ཅེས་པའང་དད་ལྡན་ཀརྨ་ཡིད་བཞིན་ངོར་གཞན་ཕན་ཆོས་ཀྱི་བློ་གྲོས་ཀྱིས་བྲིས་པ་དགེའོ།། ༈ སྐྱབས་གནས་ཀུན་འདུས་ཀྱི་ངོ་བོ། །མཁྱེན་བརྩེ་ནུས་གསུམ་གྱི་གཏེར་ཆེན། །བྱིན་རླབས་དངོས་གྲུབ་ཀྱི་འབྱུང་གནས། །རྩ་བའི་བླ་མ་ཁྱེད་མཁྱེན་ནོ། །མ་རིག་མུན་སེལ་གྱི་སྒྲོན་མེ། །ཡང་དག་ཐར་ལམ་གྱི་ས་མཁན། །འབྲེལ་ཚད་དོན་ལྡན་གྱི་སྐྱེས་མཆོག །རྩ་བའི་བླ་མ་ཁྱེད་མཁྱེན་ནོ། །གཞི་དབང་གཤེགས་སྙིང་གི་ས་བོན། །ལམ་དབང་བརྡ་ཐབས་ལ་བརྟེན་པ། །འབྲས་དབང་སྐུ་བཞི་རུ་སྨིན་མཛད། །རྩ་བའི་བླ་མ་ཁྱེད་མཁྱེན་ནོ། །ཀུན་བཟང་རྡོར་སེམས་ཀྱི་དགོངས་བཅུད། །མཐའ་དྲུག་ཚུལ་བཞི་ཡིས་བཅིངས་པའི། །གསང་བའི་ཏནྟྲ་མཆོག་འགྲོལ་མཛད། །རྩ་བའི་བླ་མ་ཁྱེད་མཁྱེན་ནོ། །དྲུག་ལྡན་བརྒྱུད་པ་ཡི་མན་ངག །ཟབ་གསང་གདམས་ངག་གི་བདུད་རྩིས། །བདག་བློའི་བུམ་བཟང་མཆོག་འགེངས་མཛད། །རྩ་བའི་བླ་མ་ཁྱེད་མཁྱེན་ནོ། །བདག་རྒྱུད་ཉེས་ལྟུང་གི་རྙོག་མ། །མཆོག་སྦྱིན་ཀེ་ཏ་ཀས་བགྲུང་ནས། །གྲུབ་གཉིས་འདོད་དགུ་རུ་སྦྱིན་མཛད། །རྩ་བའི་བླ་མ་ཁྱེད་མཁྱེན་ནོ། །དགོངས་པ་སངས་རྒྱས་དང་མཉམ་ཡང་། །བཀའ་དྲིན་རྒྱལ་ལས་ཀྱང་ལྷག་པའི། །ལེགས་ཚོགས་མཐའ་དག་གི་འབྱུང་ཁུངས། །རྩ་བའི་བླ་མ་ཁྱེད་མཁྱེན་ནོ། །འདི་ནས་བྱང་ཆུབ་ཀྱི་བར་དུ། །ཁྱོད་མིན་སྐྱབས་གཞན་ནི་མ་དམིགས། །འབྲལ་མེད་ཐུགས་རྗེ་ཡིས་ཟུངས་ལ། །བདག་རྒྱུད་བྱིན་གྱིས་རང་རློབས་ཤིག །ཅེས་པའང་མོས་ལྡན་དམ་པའི་གསུང་གིས་བསྐུལ་ངོར། བི་ཛ་ཡས་བརྗོད་པ་བླ་མའི་བྱིན་རླབས་སེམས་ལ་འཇུག་པའི་རྒྱུར་གྱུར་ཅིག
༄༅། །ༀ་སྭསྟི། དོན་འགྲུབ་བསམ་ཀུན་རྫོགས་བྱེད་པའི། །ཡིད་བཞིན་ནོར་བུ་དཔག་བསམ་མཆོག །བླ་མ་རྒྱལ་བ་སྲས་བཅས་ལ། །གསོལ་བ་འདེབས་སོ་ཐུགས་རྗེས་དགོངས། །བདག་ཅག་སྙིགས་མར་སྐྱེས་པའི་འགྲོས། །ཉམ་ཆུང་ཆོས་ལྟར་སྤྱོད་རྣམས་ལ། །ཁྱོད་མིན་སྐྱབས་གཞན་མི་འཚལ་བས། །དུས་ཀུན་ཐུགས་རྗེས་བཟུང་དུ་གསོལ། །མི་མཐུན་འགལ་རྐྱེན་ཀུན་ཞི་ཞིང་། །མཐུན་རྐྱེན་བསམ་པ་ཡིད་བཞིན་འགྲུབ། །བཤད་སྒྲུབ་བསྟན་པའི་མངའ་ཐང་རྒྱས། །དོན་གཉིས་ཕུན་སུམ་ཚོགས་པར་མཛོད། །ཕྱི་རོལ་བགེགས་དང་བར་ཆད་ཞི། །ནང་དུ་རྩ་རླུང་འདུ་བ་སྙོམས། །གསང་བ་དབྱིངས་རིག་བཅུད་དུ་སྨིན། །ཡེ་ཤེས་ཆེན་པོ་མངོན་བྱེད་ཤོག །བསྟན་འཛིན་སྐྱེས་བུའི་སྐུ་ཚེ་བརྟན། །དགེ་འདུན་མཐུན་ཞིང་དོན་རྣམས་འགྲུབ། །རྟག་པར་ཆོས་སྤྱོད་བྱ་བ་འཕེལ། །བསྟན་འགྲོའི་དོན་ཆེན་འགྲུབ་པར་ཤོག །འཇིག་རྟེན་རྒུད་པ་མིང་མི་གྲགས། །སྣོད་བཅུད་དཔལ་དང་འབྱོར་པས་ཕྱུག །ལས་འབྲས་ཡིད་ཆེས་བསྟན་ལ་དད། །རྫོགས་ལྡན་དུས་སྟོན་གསར་འཆར་ཤོག །བཀྲ་ཤིས་བྱེ་བའི་སྤྲིན་ཆེན་ལས། །བཀྲ་ཤིས་འདོད་དགུའི་ཆར་འཇོ་བས། །བཀྲ་ཤིས་ཕན་བདེའི་མྱུ་གུའི་ཚལ། །བཀྲ་ཤིས་ཕྱོགས་མཐར་རྒྱས་གྱུར་ཅིག །རབ་ཚེས་ལྕགས་བྱ་གསར་དུ་བཞད་པའི་ཆོ་འཕྲུལ་ཟླ་བའི་ཚེས་གཅིག་ཉིན་བི་ཛ་ཡས་སྨོན་པ་དགེ། ༈ ༀ་སྭསྟི་སིདྡྷཾ། འབར་བ་ཆེན་པོའི་སྐུ་ཡི་གཟི་བྱིན་གྱིས། །ལོག་འདྲེན་འབྱུང་པོའི་སྙིང་ཁྲག་འདྲེན་མཛད་ཅིང་། །སྒྲུབ་ལ་མཆོག་ཐུན་དངོས་ཀུན་སྩོལ་མཛད་པའི། །རབ་འབྱམས་རྩ་གསུམ་ཆོས་སྲུང་བཅས་ཀུན་རྒྱལ། །ཁྱོད་ནི་རྣལ་འབྱོར་བདག་གི་མགོན་ལགས་ཀྱི། །རྩེ་གཅིག་བསྙེན་སྒྲུབ་མཆོད་ཅིང་གསོལ་ལགས་ན། །རྒྱལ་མཚན་དམ་པ་ཁྱེད་རྣམས་དཔུང་བསྐྱེད་ལ། །དེང་འདིར་མི་མཐུན་གཡུལ་ལས་རྒྱལ་བར་མཛོད། །ཞི་རྒྱས་དབང་དང་མངོན་སྤྱོད་ལ་སོགས་པ། །གང་ལ་གང་གིས་འདུལ་བ་དེར་སྟོན་པའི། །རབ་འབྱམས་ཕྲིན་ལས་ནོར་བུའི་ཞགས་པ་ཡིས། །རྣལ་འབྱོར་ཡིད་ལ་བསམ་ཀུན་འགྲུབ་པར་མཛོད། །རྟག་པར་ལུས་སེམས་རྡོ་རྗེ་ལྟ་བུར་བརྟན། །བརྒྱུད་འཛིན་བུ་སློབ་ཡར་ངོའི་ཟླ་ལྟར་རྒྱས། །བཤད་སྒྲུབ་ཐོས་བསམ་སྒོམ་པའི་དགའ་སྟོན་གྱིས། །ངེས་གསང་བསྟན་འགྲོའི་དགེ་མཚན་རྒྱས་པར་མཛོད། །ཁྱད་པར་བདག་ལ་ལྟོས་པ་འཁོར་དང་བཅས། །མི་མཐུན་བགེགས་དགྲའི་འཚེ་བ་མི་འབྱུང་ཞིང་། །ཚེ་བསོད་དཔལ་འབྱོར་ཡར་ངོའི་ཟླ་ལྟར་འཕེལ། །སྡེ་བཞིའི་དཔལ་ཡོན་མི་ཉམས་གོང་འཕེལ་མཛོད། །བསྟན་འགྲོའི་དཔལ་མགོན་བླ་མའི་ཞབས་པད་བརྟན། །བསྟན་འཛིན་ཐུགས་མཐུན་བསླབ་གསུམ་ཡོན་གྱིས་འབྱོར། །བསྟན་པའི་སྦྱིན་བདག་མངའ་ཐང་འབྱོར་པ་རྒྱས། །བསྟན་པ་རིན་ཆེན་སྲིད་མཐར་འཕེལ་རྒྱས་མཛོད། །མཁའ་ལ་རྩ་གསུམ་རྒྱལ་བའི་སྤྲིན་ཆེན་འཁྲིགས། །བར་ལ་སྨིན་གྲོལ་ཟབ་མོའི་གྲུ་ཆར་འཇོ། །ས་ལ་དམ་ལྡན་སློབ་མའི་འདུ་ཚོགས་རྒྱས། །ཀུན་ལ་ཀུན་ཏུ་དགེ་བའི་བཀྲ་ཤིས་ཤོག །ཅེས་པའང་གོང་ཚེས་ལའོ།། ༈ རྡོ་རྗེའི་སྐུ་ནི་སྐྱེ་འཆི་བགྲེས་རྒུད་བྲལ། །རྡོ་རྗེའི་གསུང་ནི་གཞོམ་མེད་ནཱ་དའི་སྒྲ། །རྡོ་རྗེའི་ཐུགས་ནི་རང་བྱུང་ཡེ་ཤེས་མཆོག །རྩ་གསུམ་ཚེ་ཡི་ལྷ་ལ་གསོལ་བ་འདེབས། །དུས་མིན་འཆི་བའི་མཚན་མ་མི་འབྱུང་ཞིང་། །རྡོ་རྗེའི་ཚེ་དང་རྣམ་དཔྱོད་བློ་གྲོས་དཔལ། །ཕྱོགས་ལས་རྣམ་རྒྱལ་གྲུབ་པའི་དགེ་མཚན་གྱིས། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཚེས་དེ་ཉིད་ལའོ།། ༈ གང་གི་མཚན་ཙམ་ཐོས་དང་དྲན་པས་ཀྱང་། །སྡུག་བསྔལ་སྲིད་པའི་འཇིགས་པ་ཀུན་སེལ་བའི། །བླ་མ་སངས་རྒྱས་ཆོས་དང་དགེ་འདུན་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །སྲིད་གསུམ་མི་རྟག་སྒྱུ་མའི་སྤྲིན་རུམ་ན། །སྡུག་བསྔལ་གསུམ་གྱི་གློག་ཕྲེང་དྲག་གཡོ་བའི། །ངང་ཚུལ་རྟོགས་ནས་གང་ལ་ཡང་ཞེན་མེད་པའི། །ངེས་འབྱུང་བློ་སྣ་སྐྱེད་པར་བྱིན་གྱིས་རློབས། །དེ་ལྟའི་བདེ་སྡུག་སྔོན་བསགས་ལས་ཀྱི་མཐུ། །ཕྱི་མ་ཅིར་འགྱུར་ད་ལྟའི་ལས་ལ་རག །དཀར་ནག་མི་འགྱུར་ཨུཏྤལ་པདྨ་བཞིན། །ལག་ལེན་གནད་དུ་དྲིལ་བར་བྱིན་གྱིས་རློབས། །འཁྲུལ་སྣང་མི་བདེན་སྒྱུ་མ་ལྟ་བུ་སྟེ། །གང་ལའང་སྙིང་པོ་མེད་པའི་ཚུལ་རིག་ནས། །མྱ་ངན་སྡུག་བསྔལ་སྐད་ཅིག་ཉིད་ལ་སངས། །བདེ་ཆེན་བདེ་བས་འཚོ་བར་བྱིན་གྱིས་རློབས། །སྐྱིད་པ་གང་བྱུང་དཀོན་མཆོག་བླ་མའི་དྲིན། །སྡུག་བསྔལ་གང་བྱུང་སྔོན་བསགས་ལས་ཀྱི་མཐུར། །ལེགས་པར་རྟོགས་ནས་བསགས་སྦྱང་དཔུང་བསྐྱེད་དེ། །གང་བྱུང་ལམ་དུ་ཁྱེར་ནུས་བྱིན་གྱིས་རློབས། །མདོར་ན་འདི་ཕྱི་བར་དོའི་གནས་སྐབས་ཀུན། །སྐྱབས་གནས་དཀོན་མཆོག་མ་གཏོགས་རེ་ས་མེད། །འབྲལ་བ་མེད་པར་ཐུགས་རྗེས་རྗེས་བཟུང་ལ། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཞེས་པའང་དད་ལྡན་མའི་ངག་འདོན་རྒྱུར་བི་ཛས་བརྗོད་པ་དོན་དང་ལྡན་པར་གྱུར་ཅིག ༈ ཕྱོགས་བཅུ་དུས་བཞིར་གཤེགས་ཤིང་བཞུགས་པ་ཡི། །བླ་མ་རྒྱལ་བ་སྲས་དང་སློབ་མར་བཅས། །སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །འདི་ནས་བཟུང་སྟེ་ཚེ་རབས་ཕྲེང་བ་རུ། །འབྲལ་བ་མེད་པར་རྟག་པར་རྗེས་བཟུང་ནས། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །མཐུན་རྐྱེན་བསམ་ཀུན་འགྲུབ་པར་བྱིན་གྱིས་རློབས།། ༈ སྐྱབས་འོས་རྣམས་ལ་གུས་པས་གསོལ་བ་འདེབས། །ཚུལ་ཁྲིམས་ཕུང་པོ་ཡོངས་སུ་དག་པ་དང་། །ཉིན་མཚན་བརྩོན་པ་ཆོས་ཀྱི་འདའ་བ་ཡིས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་པའང་མོས་ལྡན་རྡོ་བའི་ངོར་བི་ཛས་སོ།། ༈ གང་མཚན་ཐོས་པས་དུས་མིན་འཆི་བའི་དཔུང་། །ཅིག་ཅར་གཞོམ་མཛད་བཅོམ་ལྡན་ཚེ་དཔག་མེད། །ཁྱེད་ལ་སྐྱབས་མཆི་སྙིང་ནས་གསོལ་བ་འདེབས། །རྡོ་རྗེའི་ཚེ་མཆོག་འགྲུབ་པར་བྱིན་གྱིས་རློབས། །ༀ་ཨ་མཱ་ར་ཎི་ཛི་ཝནྟི་ཡེ་སྭཱ་ཧཱ། །ཞེས་པའང་བི་ཛས་སོ།། ༈ གང་མཚན་ཐོས་པས་དུག་གསུམ་རྒྱུ་འབྲས་ནད། །གཞིལ་མཛད་བཅོམ་ལྡན་སྨན་པའི་རྒྱལ་པོ་དང་། །དབྱེར་མེད་གྲུབ་བརྒྱའི་སྤྱི་མེས་གཡུ་ཐོག་པ། །ཡོན་ཏན་མགོན་པོའི་ཞབས་ལ་གསོལ་བ་འདེབས། །བདག་སོགས་ཁྱེད་ཀྱི་གདུལ་བྱར་གྱུར་རྣམས་ལ། །འབྲལ་མེད་ཐུགས་རྗེ་ཆེན་པོས་རྗེས་དགོངས་ཏེ། །སྒོ་གསུམ་རྡོ་རྗེ་གསུམ་དུ་བྱིན་རླབས་ནས། །དོན་གཉིས་བསམ་ཀུན་འགྲུབ་པར་མཛད་དུ་གསོལ། །ཅེས་པའང་ཚེ་ཡི་རིག་བྱེད་འཛིན་པ་གང་གི་བཞེད་ངོར་འཇམ་དབྱངས་བློ་གྲོས་རྒྱ་མཚོས་བྲིས་ཤིང་གསོལ་བ་བཏབ་པ་དགེ། ༈ ཧཱུྃ། དགོངས་ཤིག་བླ་མ་རིག་འཛིན་པདྨ་འབྱུང་། །བཞེངས་ཤིག་རབ་འབྱམས་རྩ་གསུམ་སྲུང་མའི་ཚོགས། །ཡེ་ཤེས་དབྱིངས་ལས་དགོངས་པའི་རྩལ་བསྐྱེད་ལ། །སྐལ་ལྡན་བུ་ཡི་ཤེས་རྒྱུད་བྱིན་གྱིས་རློབས། །ཕུང་ཁམས་སྐྱེ་མཆེད་གདན་གསུམ་ཡོངས་རྫོགས་ལྷ། །ཡེ་ནས་དག་མཉམ་ཆོས་སྐུའི་རོལ་པ་ལ། །བརླབ་དང་རློབ་པར་བྱ་བ་མི་དམིགས་ཀྱང་། །ཀུན་རྫོབ་རྟེན་འབྱུང་སྒྱུ་མའི་རོལ་རྩེད་བཞིན། །ལུས་ལ་འགྱུར་མེད་སྐུ་ཡི་བྱིན་ཆེན་ཕོབ། །ངག་ལ་ཚངས་དབྱངས་གསུང་གི་བྱིན་ཆེན་ཕོབ། །ཡིད་ལ་འཁྲུལ་མེད་ཐུགས་ཀྱི་བྱིན་ཆེན་ཕོབ། །སྒོ་གསུམ་རྡོ་རྗེ་གསུམ་དང་མཉམ་སྦྱོར་མཛོད། །རང་དོན་ཐོས་བསམ་སྒོམ་པའི་ཡོན་ཏན་རྫོགས། །གཞན་དོན་འཆད་རྩོད་རྩོམ་པའི་སྤོབས་པ་མཐོ། །གཉིས་དོན་འཁོར་ལོ་གསུམ་གྱི་ཕྲིན་ལས་རྒྱས། །དོན་གཉིས་ལྷུན་གྱིས་འགྲུབ་པར་མཛད་དུ་གསོལ། །མི་ཤིགས་སྲོག་གི་ཀ་བ་ལོ་བརྒྱར་བརྟན། །ངོ་མཚར་སྙན་གྲགས་ཆེན་པོས་ས་སྟེང་ཁྱབ། །ལེགས་དགུའི་རྟེན་འབྲེལ་མཐའ་དག་གཅིག་ཏུ་ཚོགས། །འབྲེལ་ཚད་དོན་ལྡན་གཞན་ཕན་མཁའ་མཉམ་ཤོག །ཅེས་པའང་རྟེན་འབྱུང་ཤིན་ཏུ་དགེ་བར་འགྱུར་མེད་པདྨ་བསྟན་འཛིན་དོན་ཐམས་ཅད་འགྲུབ་པའི་སྡེས་བྲིས་པ་མངྒལཾ། ༈ ༀ་སྭསྟི། བཀྲ་ཤིས་ཕུན་ཚོགས་དཔལ་ཀུན་འབྱུང་བའི་གཞི། །རྩ་གསུམ་རྒྱལ་བ་སྲས་བཅས་བདེན་པའི་མཐུས། །མི་ཤིས་མཚན་མ་འགའ་ཡང་མི་འབྱུང་ཞིང་། །དགེ་ལེགས་བསམ་པ་ཡིད་བཞིན་འགྲུབ་གྱུར་ཅིག །ནོར་བུ་བུམ་བཟང་དཔག་བསམ་ལྗོན་པ་བཞིན། །སེམས་ཅན་ཀུན་གྱི་རེ་བ་སྐོང་མཛད་པའི། །སྐྱབས་ཀྱི་མཆོག་རྣམས་དེང་འདིར་དགོངས་མཛོད་ལ། །དོན་གྲུབ་བསམ་པ་འགྲུབ་པའི་མཆོག་སྩོལ་ཅིག །ཟུག་རྔུ་ཀུན་འབྱིན་སྨན་པ་ཆེན་པོ་སྟེ། །མ་རིག་མུན་སེལ་ཡེ་ཤེས་ཉི་མ་མཆོག །ཀུན་ལ་ཕན་པར་བཞེད་པའི་བྱམས་ཆེན་མ། །དེང་འདིར་བདག་གི་དཔལ་དང་མགོན་མཛོད་ཅིག །གཞི་རུ་བདེ་སྐྱིད་བྱེས་སུ་བཀྲ་ཤིས་ཤིང་། །ཆོས་ནོར་འདོད་ཐར་སྡེ་བཞིའི་དཔལ་འབྱོར་དང་། །སྙན་པའི་དར་ཕྱར་གྲགས་པའི་དུང་བུས་ལ། །ཕྱོགས་ལས་རྣམ་པར་རྒྱལ་བའི་དཔལ་སྩོལ་ཅིག །ཕྱི་སྣོད་བརྟན་དགེ་གཡང་ཆགས་རྩི་སྨན་རྒྱས། །ནང་བཅུད་བདེ་སྐྱིད་དཔལ་འཕེལ་ཆོས་ལ་སྤྱོད། །ལེགས་སྨོན་རྟེན་འབྱུང་དཀར་པོའི་ཕྱོགས་སུ་འགྲིགས། །དོན་གཉིས་འབྱོར་པས་ས་གསུམ་ཁྱབ་གྱུར་ཅིག །ཅེས་པའང་ཡོངས་འཛིན་ཆུ་བྱི་ལོ་ཆོ་འཕྲུལ་ཅན་གྱི་དུས་ཚེས་དགེ་བར་འགྱུར་མེད་པདྨ་བསྟན་འཛིན་གྱིས་བྲིས་པ་སུ་ཛ་ཡནྟུ། ༈ ༀཿ བཀྲ་ཤིས་དཔལ་འབར་སྲིད་ཞིའི་གཙུག་གི་རྒྱན། །དོན་གཉིས་མཐར་ཕྱིན་ཆགས་བྲལ་ཚོགས་ཀྱི་མཆོག །བླ་མེད་དཀོན་མཆོག་གསུམ་གྱི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་དམ་པའི་བྱིན་རླབས་སྤྲིན་ཆེན་ལས། །གྲུབ་གཉིས་ཆར་འབེབས་ཕྲིན་ལས་འབྲུག་སྒྲ་སྙན། །རྩ་གསུམ་དཀྱིལ་འཁོར་རྒྱ་མཚོའི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་གང་ཞིག་ཡེ་ཤེས་འཇིག་རྟེན་ཚུལ། །རྣམ་བཞིའི་ལས་རྣམས་ཅི་བཅོལ་ཐོགས་པ་མེད། །རྒྱུད་གསུམ་དམ་ཅན་སྲུང་མའི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་བསོད་ནམས་བསམ་མི་ཁྱབ་པའི་གཏེར། །སྦྱིན་པའི་འབྲས་མང་འདོད་འབྱིན་དཔག་བསམ་ཤིང་། །དཀར་ཕྱོགས་ལྷ་ཀླུ་ནོར་བདག་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་རྨད་བྱུང་ཆོས་དབྱིངས་བཀོད་པའི་སྤྲིན། །འོད་གསལ་རང་བཞིན་སྐུ་དང་ཡེ་ཤེས་ཁམས། །བདེ་ཆེན་འདུ་འབྲལ་མེད་པའི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་མི་ཟད་དཀོན་མཆོག་གསུམ་གྱི་གདུང་། །སྲིད་མཐར་མི་འཆད་ཕན་བདེ་འབྱུང་བའི་གཞི། །རིན་ཆེན་བྱང་ཆུབ་སེམས་ཀྱི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་རྣམ་མང་ས་གསུམ་འབྱོར་པའི་གཞི། །དགེ་ལེགས་ཡོན་ཏན་ཟད་མི་ཤེས་པའི་གནས། །ལེགས་སྨོན་རྟེན་འབྱུང་ཟབ་མོའི་བདེན་བྱིན་གྱིས། །མི་མཐུན་ཀུན་ཞི་མཐུན་རྐྱེན་བསམ་འགྲུབ་ཤོག །བཀྲ་ཤིས་མཆོག་གྱུར་བླ་མའི་ཞབས་པད་བརྟན། །བཀྲ་ཤིས་ངོ་བོ་བསྟན་པའི་མངའ་ཐང་དར། །བཀྲ་ཤིས་གཞི་མ་རྒྱལ་ཁམས་བདེ་ཞིང་སྐྱིད། །བཀྲ་ཤིས་སྣང་བས་ཕྱོགས་དུས་རྟག་ཁྱབ་ཤོག །ཅེས་ཤིས་པ་བརྗོད་པ་བཀྲ་ཤིས་རྟགས་¡eབརྒྱད་ཞུ་མཆན། ¡fཀྱི་གྲངས་ལྡན་འདིའང་། ཡོངས་འཛིན་ཆུ་བྱི་དུས་ཚེས་དགེ་བར་འཇམ་དབྱངས་མཁས་གྲུབ་རྒྱ་མཚོས་བྲིས་པ་མངྒལཾ། ༈ ༀ་སྭསྟི། རྟག་བརྟན་འཕོ་འགྱུར་བྲལ་བ་གཉུག་མའི་གཤིས། །གློ་བུར་གཟུང་འཛིན་སྤྲོས་པའི་སྦུབས་རྒྱ་ལས། །ཡོངས་གྲོལ་རྩ་གསུམ་ཚེ་ལྷའི་ངོ་བོ་རུ། །མཆོག་གི་སྤྲུལ་སྐུ་ཞབས་པད་བརྟན་གྱུར་ཅིག ༡ །རྣམ་དག་ཚུལ་ཁྲིམས་གསེར་སྦྱངས་དྲི་བྲལ་ཁམས། །ཟག་མེད་ཏིང་འཛིན་ལྟེ་བ་ཀུན་ནས་ཟླུམ། །རྣམ་གསུམ་ཤེས་རབ་རྩིབས་སྟོང་རབ་བཀྲ་བའི། །འཁོར་ལོ་རིན་ཆེན་མཆོག་ཏུ་ཞབས་བརྟན་གསོལ། ༢ །ཤེས་བྱའི་ཆོས་ཀུན་མཁྱེན་པའི་ཟུར་མིག་གཡོ། །བརྩེ་ཆེན་ཐུགས་རྗེའི་སྒྱུ་རྩལ་ཕུལ་དུ་བྱུང་། །ནུས་མཐུ་ཚད་མེད་རེག་ན་བདེ་བ་སྟེར། །བཙུན་མོ་རིན་ཆེན་མཆོག་ཏུ་ཞབས་བརྟན་གསོལ། ༣ །མཁས་པའི་རྣམ་དཔྱོད་ཡོངས་སྦྱངས་བཻཌཱུཪྱ། །བཙུན་པའི་ཡོན་ཏན་འཆལ་སྤྱོད་མུན་པ་སེལ། །བཟང་པོའི་ཕྲིན་ལས་ཕན་བདེའི་གྲུ་ཆར་འཇོ། །ནོར་བུ་རིན་ཆེན་མཆོག་ཏུ་ཞབས་བརྟན་གསོལ། ༤ །བཤད་ཀ་བཅུ་ཡི་ལུང་རིགས་མཛོད་ཀྱིས་ཕྱུག །སྒྲུབ་བརྒྱུད་མན་ངག་བྱེ་བའི་གཏེར་ཁ་འབྱེད། །རྟོན་པ་བཞི་ལྡན་ངེས་དོན་རྒྱལ་ཐབས་སྐྱོངས། །བློན་པོ་རིན་ཆེན་མཆོག་ཏུ་ཞབས་བརྟན་གསོལ། ༥ །ཐུབ་བསྟན་ཡོངས་རྫོགས་འདེགས་པའི་ཐག་པ་ཆེ། །ཕུལ་བྱུང་རྩོད་འཆད་རྩོམ་པའི་སྣ་ཤལ་རིངས། །དོན་བརྒྱུད་རྟོགས་པའི་ནོར་བུའི་དྲྭ་བས་གཡོགས། །གླང་པོ་རིན་ཆེན་མཆོག་ཏུ་ཞབས་བརྟན་གསོལ། ༦ །གཞན་ཕན་བསྡུ་དངོས་བཞི་ཡི་ཡན་ལག་མཛེས། །དོན་གཉིས་ལྷུན་གྱིས་གྲུབ་པའི་རླུང་གཤོག་ངོམ། །རླབས་ཆེན་ཕྲིན་ལས་གླིང་བཞི་ཡོངས་ལ་བསྒྱུར། །རྟ་མཆོག་རིན་ཆེན་མཆོག་ཏུ་ཞབས་བརྟན་གསོལ། ༧ །ཡང་དག་ཚད་མ་གསུམ་གྱི་མཚོན་རྣོན་གྱིས། །ལོག་སྨྲའི་ཕས་རྒོལ་དཔུང་ཚོགས་ཚར་བཅད་ནས། །ཕྱོགས་ལས་རྣམ་རྒྱལ་མཛོད་ལྔའི་རྒྱལ་སྲིད་སྲུང་། །དམག་དཔོན་རིན་ཆེན་མཆོག་ཏུ་ཞབས་བརྟན་གསོལ། ༨ །དོན་བརྒྱུད་རིན་ཆེན་བདུན་ལ་དབང་བསྒྱུར་བའི། །ངེས་དོན་ཆོས་ཀྱི་འཁོར་ལོས་སྒྱུར་བ་མཆོག །ལྷར་བཅས་སྐྱེ་དགུའི་གཙུག་ནོར་ཅོད་པཎ་རྩེར། །ཞབས་པད་བསྐལ་པ་རྒྱ་མཚོར་བརྟན་གྱུར་ཅིག ༩ །བཀྲ་ཤིས་དཔལ་མངའ་བླ་མའི་ཞབས་པད་བརྟན། །བཀྲ་ཤིས་མཛད་མེད་འཁོར་སློབ་འདུ་བ་རྒྱས། །བཀྲ་ཤིས་རྨད་བྱུང་བཤད་སྒྲུབ་མངའ་ཐང་དར། །བཀྲ་ཤིས་ཕྱོགས་དུས་ཀུན་ན་ཁྱབ་གྱུར་ཅིག ༡༠ །ཅེས་བཀའ་དྲིན་མཚུངས་བྲལ་འཁོར་ལོའི་དབང་ཕྱུག་གི་མཆོག་གི་སྤྲུལ་པའི་ཟློས་གར། དཔལ་ལྡན་ཆོས་ཀྱི་དབང་ཕྱུག་བློ་གྲོས་དྲི་མེད་པདྨ་མྱུ་གུ་མཁྱེན་བརྩེའི་འོད་ཟེར་རྒྱས་པའི་སྡེའི་ཞབས་པད་བསྐལ་པ་རྒྱ་མཚོར་བརྟན་ཞིང་གསན་བསམ་སྒོམ་པའི་ཡོན་ཏན་མཐར་ཕྱིན་ཅིང་བསྟན་འགྲོའི་དོན་རྒྱ་ཆེན་པོ་མཛད་པར་གསོལ་བ་འདེབས་པའི་རྟེན་འབྱུང་སྨོན་ཚིག་གུས་སློབ་རྒན་བུ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་ཕུལ་བ་དགེ། ༈ ༀ་སྭསྟི། རྟག་བརྟན་འཕོ་འགྱུར་བྲལ་བ་གཉུག་མའི་གཤིས། །གང་འདུལ་མཚན་དཔེའི་དཔྱིད་དུ་ལེགས་ཤར་བ། །ལོག་རྟོག་དབང་གིས་ནམ་ཡང་སྒྲིབ་མིན་པར། །ཚེ་མཐའ་ཡས་པའི་ངོ་བོར་བརྟན་པར་མཛོད། །སྔོན་སྨོན་ཐུགས་བསྐྱེད་གསེར་སྦྱངས་སྙིང་པོའི་ཁམས། །འགྲོ་ཕན་ཕྲིན་ལས་རྩིབས་སྟོང་རྣམས་བཀྲ་ཞིང་། །འབྲེལ་ཚད་ཁ་ལོ་དགེ་ལ་བསྒྱུར་བའི་གཉེན། །འཁོར་ལོ་རིན་ཆེན་མཆོག་ཁྱོད་ཞབས་བརྟན་གསོལ། །ཕུལ་བྱུང་ཡོན་ཏན་འབུམ་ཕྲག་གཟི་ཡིས་འཁྱུད། །ས་གསུམ་ཉེས་པའི་མུན་པ་གཏན་བཅིལ་ཞིང་། །ཕན་བདེ་འདོད་དགུའི་གྲུ་ཆར་འབེབས་མཛད་པའི། །ནོར་བུ་རིན་ཆེན་མཆོག་ཁྱོད་ཞབས་བརྟན་གསོལ། །ཐུགས་རྗེའི་ཟུར་མིག་གཡོ་བའི་མདའ་རྣོན་གྱིས། །སྐལ་བཟང་གདུལ་བྱའི་ཡིད་དབང་འགུགས་བྱས་ནས། །ཉེས་པའི་གདུང་སེལ་བསིལ་བའི་རེག་བྱ་སྟོབས། །བཙུན་མོ་རིན་ཆེན་མཆོག་ཁྱོད་ཞབས་བརྟན་གསོལ། །སྲས་བཅས་རྒྱལ་བའི་དགོངས་པ་སྐོང་མཛད་ཅིང་། །དམ་ཆོས་རིན་ཆེན་མཛོད་ཀྱི་གཉེར་ཁ་པ། །མཐར་འཛིན་ཞལ་ལྕེ་དབུ་མའི་དབྱིངས་སུ་གཅོད། །བློན་པོ་རིན་ཆེན་མཆོག་ཁྱོད་ཞབས་བརྟན་གསོལ། །ཐེག་པ་རིམ་དགུར་བགྲོད་པའི་སྟོབས་ཤུགས་བརླིང་། །འཕགས་ནོར་ཡོན་ཏན་གསེར་གྱི་དྲྭ་བས་བརྒྱན། །བསྡུ་བཞིའི་སྣ་ལྗགས་རིང་པོར་རྐྱོང་མཛད་པའི། །གླང་པོ་རིན་ཆེན་མཆོག་ཁྱོད་ཞབས་བརྟན་གསོལ། །གསན་བསམ་སྒོམ་པའི་ཡན་ལག་རབ་ཏུ་རྫོགས། །མཁྱེན་བརྩེ་ནུས་པའི་རྫུ་འཕྲུལ་རྐང་པས་མཛེས། །འཆད་རྩོད་རྩོམ་པས་གླིང་བཞི་ཡུད་ཀྱིས་བསྐོར། །རྟ་མཆོག་རིན་ཆེན་མཆོག་ཁྱོད་ཞབས་བརྟན་གསོལ། །རང་དོན་ལྟ་དགོངས་ཟབ་མོའི་སྒྱུ་རྩལ་མཁས། །གཞན་དོན་ཕྲིན་ལས་རྣམ་བཞིའི་དཔུང་གིས་ཕྱུག །བདུད་བཞིའི་ཕྲུ་མ་གཞོམ་ལ་གཅིག་ཏུ་དཔའ། །དམག་དཔོན་རིན་ཆེན་མཆོག་ཁྱོད་ཞབས་བརྟན་གསོལ། །དོན་གཉིས་ལྷུན་གྲུབ་ཆོས་ཀྱིས་རྒྱལ་པོ་མཆོག །ཟག་མེད་ཡོན་ཏན་རིན་ཆེན་བདུན་གྱིས་འབྱོར། །ངེས་གསང་སྙིང་པོའི་ཆབ་སྲིད་མཁའ་དང་མཉམ། །སྙན་པའི་འབྲུག་སྒྲས་ཕྱོགས་དུས་ཀུན་ཁྱབ་ཤོག །བླ་མ་ལྷག་པའི་ལྷ་ཡི་ཐུགས་རྗེ་དང་། །བདག་ཅག་དད་མོས་ལྷག་བསམ་དཀར་བའི་མཐུས། །ཇི་ལྟར་གསོལ་ཞིང་སྨོན་པའི་གནས་འདི་དག །གེགས་མེད་ཡོངས་སུ་འགྲུབ་པའི་རྒྱུར་གྱུར་ཅིག །ཅེས་པའང་ཤཱཀྱའི་དགེ་སློང་འདུ་གསུམ་སྤྱོད་པ་འགྱུར་མེད་པདྨ་རྣམ་རྒྱལ་གྱིས་གུས་ཤིང་དྭངས་པའི་བློས་བརྗོད་པ་དོན་དང་ལྡན་པར་གྱུར་ཅིག་སརྦ་མངྒལཾ། ༈ ༀ་སྭསྟི་པྲ་ཛཱ་བྷྱཿ རྟག་བརྟན་གཞོམ་བྲལ་རྡོ་རྗེའི་ཡེ་ཤེས་ཆེ། །གང་འདུལ་མཚན་དཔེ་འབར་བའི་སྐུར་བཞེངས་ནས། །འགྲོ་ཀུན་འཆི་བདག་གཡུལ་ལས་རྒྱལ་མཛད་པའི། །རྩ་གསུམ་ཚེ་ལྷའི་ཚོགས་རྣམས་དགོངས་སུ་གསོལ། །གཟོད་ནས་རྣམ་གྲོལ་ཡོན་ཏན་མཆོག་བརྙེས་ཀྱང་། །འགྲོ་ཁམས་རྒྱ་མཚོ་སྨིན་སླད་བཤེས་གཉེན་ཚུལ། །རྒྱལ་བས་ལུང་བསྟན་མཛོད་ལྔའི་ཤིང་རྟ་མཆོག །བློ་གྲོས་མཐའ་ཡས་བསྐལ་བརྒྱར་ཞབས་བརྟན་གསོལ། །འཇམ་དཔལ་དཔའ་བོའི་མཁྱེན་རབ་ཉི་མའི་གཟིས། །བློ་གྲོས་སྤོབས་པའི་པད་ཚལ་ཆེར་བཞད་པས། །འཆད་རྩོད་རྩོམ་པའི་ཟིལ་དངར་འབུམ་འཇོ་བའི། །མི་ཕམ་རྒྱ་མཚོ་བསྐལ་བརྒྱར་ཞབས་བརྟན་གསོལ། །རབ་འབྱམས་རྒྱལ་ཀུན་འདུས་ཞལ་པདྨ་འབྱུང་། །གང་གི་རིང་ལུགས་ངེས་གསང་ཐེག་པ་མཆོག །ཡོ་ག་རྣམ་གསུམ་བསྟན་པའི་རྒྱལ་མཚན་ཆེ། །འཛིན་མཛད་དཔལ་ལྡན་བླ་མ་ཞབས་བརྟན་གསོལ། །རླབས་ཆེན་ཐུགས་བསྐྱེད་འཛིན་མའི་གཞི་ལས་འཁྲུང་། །སྤངས་རྟོགས་ཡོན་ཏན་ཡལ་འདབ་མེ་འབྲས་རྒྱས། །ཐུགས་རྗེའི་གྲིབ་བསིལ་བསྟན་འགྲོའི་ངལ་འཚོའི་སྨན། །རིས་བྲལ་སྐྱེས་ཆེན་ཚོགས་རྣམས་ཞབས་བརྟན་གསོལ། །དྲི་མེད་ཚུལ་ཁྲིམས་གསེར་གྱི་ས་གཞི་ལ། །དཔག་ཡས་ཏིང་འཛིན་རི་གླིང་བཀོད་ལེགས་ཤིང་། །རྣམ་གསུམ་ཤེས་རབ་ཉི་ཟླའི་གོ་ཆ་ཅན། །བསྟན་འཛིན་འཇིག་རྟེན་རྒྱན་རྣམས་ཞབས་བརྟན་གསོལ། །ལུང་རིགས་མན་ངག་ཟབ་མོའི་འབྲུག་སྒྲ་ཡིས། །ལོག་སྨྲ་ངང་མོའི་ཀླད་རྒྱ་དབྲལ་བ་དང་། །ཆབས་ཅིག་སྐལ་བཟང་རྨ་བྱ་དགའ་བའི་གཉེན། །བཤེས་གཉེན་ཆར་སྤྲིན་དབང་པོ་ཞབས་བརྟན་གསོལ། །དྲན་ཤེས་བག་ཡོད་རིན་ཆེན་རྒྱན་ཆས་སྒེག །དད་སོགས་འཕགས་ནོར་བདུན་གྱི་བང་མཛོད་ཕྱུག །ཚོགས་གཉིས་ཤིང་རྟའི་ཁ་ལོ་བསྒྱུར་མཁས་པའི། །འཕགས་ཚོགས་འཕྲུལ་གྱི་བློན་པོ་ཞབས་བརྟན་གསོལ། །དབང་བཞིའི་དུལ་བའི་གཞི་རྒྱུད་གསེར་སྦྱངས་ཁམས། །གྲོལ་བྱེད་རིམ་གཉིས་མཆོད་སྡོང་བཀོད་མཛེས་པར། །རིག་འཛིན་རྣམ་བཞིའི་ཉི་ཟླའི་རྒྱན་འབར་བའི། །སྔགས་སྤྱོད་གྲུབ་པའི་ཚོགས་རྣམས་ཞབས་བརྟན་གསོལ། །ངེས་འབྱུང་སྙིང་ལ་ཞུགས་པའི་རླུང་ཤུགས་ཀྱིས། །སྲིད་པའི་བདེ་འབྱོར་མཚོ་ལ་མ་ཆགས་པར། །ཞི་བའི་ནགས་ཁྲོད་རིན་ཆེན་གླིང་ཉུལ་བའི། །རྣལ་འབྱོར་དེད་དཔོན་མཆོག་རྣམས་ཞབས་བརྟན་གསོལ། །དགེ་བཅུའི་བཀའ་ཁྲིམས་བཙན་པོའི་ཀེ་ཏ་ཀས། །སྙིགས་དུས་གདོལ་སྤྱོད་དྲི་མ་ཀུན་བགྲུང་ནས། །རྫོགས་ལྡན་གསར་པའི་ཆུ་གཏེར་སྤེལ་མཛད་པའི། །ཆོས་ལྡན་ས་བདག་རྒྱལ་བློན་ཞབས་བརྟན་གསོལ། །མཐོ་རིས་ཡོན་ཏན་བདུན་གྱི་ཁྱད་ནོར་མཆོག །འཕྲོག་ལ་མངོན་བརྩོན་འཆི་བདག་རྐུན་བུའི་སྡེ། །མཆོག་གསུམ་བདེན་མཐུའི་དཔུང་གིས་མཐར་བསྐྲད་པས། །འགྲོ་ཀུན་རིང་འཚོའི་དགེ་མཚན་འབར་གྱུར་ཅིག །སྲིད་དང་ཞི་བའི་དགེ་མཚན་པདྨའི་ཚལ། །ཅིག་ཅར་བཞད་མཛད་ཐུབ་བསྟན་ཉིན་བྱེད་དབང་། །བཤད་སྒྲུབ་ཁྱུང་སྔོན་སྐྱེས་ཀྱི་ཉེར་དྲངས་པས། །འགྲོ་བསོད་ཡངས་པའི་མཁའ་ལས་ཡོལ་མེད་ཤོག །ཁྱད་པར་མཁན་སློབ་ཆོས་རྒྱལ་དེད་དཔོན་ཆེས། །འཕགས་ཡུལ་གདེངས་ཅན་གནས་ནས་ཉེར་དྲངས་པའི། །ཚང་ལ་མ་ནོར་སྔ་འགྱུར་ཡིད་བཞིན་དབང་། །གངས་ལྗོངས་ཐུབ་བསྟན་རྒྱལ་མཚན་རྩེར་བཀོད་ཤོག །ཨོ་རྒྱན་མཁན་པོའི་རིང་ལུགས་པདྨའི་ཚལ། །སྨིན་གྲོལ་འདབ་སྟོང་གཡོ་བའི་འཛུམ་རླབས་ཀྱིས། །ཐར་འདོད་རྐང་དྲུག་ཚོགས་རྣམས་དགའ་བའི་གླིང་། །ངེས་པ་དོན་གྱི་དགའ་ཚལ་རྒྱས་གྱུར་ཅིག །ཐུབ་བསྟན་མདོ་དང་སྔགས་ཀྱི་གཞུང་མཐའ་དག །བཤད་སྒྲུབ་གཉིས་ཀྱི་དར་སྨིན་རྒྱས་མཛད་པའི། །འདུས་པའི་ཚོགས་རྣམས་ཞབས་པད་ཡུན་བརྟན་ཞིང་། །ཆོས་སྲིད་ཕྲིན་ལས་གླིང་བཞིའི་མཐར་ཁྱབ་ཤོག །རྩ་གསུམ་ཚེ་ལྷའི་ཐུགས་རྗེའི་བྱིན་རླབས་དང་། །ཆོས་ཉིད་རྣམ་པར་དག་པའི་བདེན་པའི་སྟོབས། །བདག་ཅག་ལྷག་བསམ་རྣམ་པར་དཀར་བའི་མཐུས། །གསོལ་བཏབ་སྨོན་པའི་འབྲས་ཀུན་འགྲུབ་གྱུར་ཅིག །རྩ་རྒྱུད་བླ་མའི་བྱིན་རླབས་སྤྲིན་ཕུང་འཁྲིགས། །ཡི་དམ་ཞི་ཁྲོའི་དངོས་གྲུབ་ཆར་རྒྱུན་བསྙིལ། །མཁའ་འགྲོ་ཆོས་སྐྱོང་ཕྲིན་ལས་གློག་དམར་འཁྱུགས། །དོན་གཉིས་ཆུ་གཏེར་འཕེལ་བའི་བཀྲ་ཤིས་ཤོག །ཅེས་པའང་ས་ཁྱི་ས་ག་ཟླ་བའི་འཕེལ་ཕྱོགས་ཀྱི་རྒྱལ་བ་གསུམ་པར་བྲག་དམར་གཡའ་མ་ལུང་འཆི་མེད་རྡོ་རྗེའི་ཀེའུ་ཚང་དུ་ཚེ་སྒྲུབ་ཡང་སྙིང་ཀུན་འདུས་ཀྱི་ཚོགས་བསྐང་དང་རྗེས་སུ་འབྲེལ་བར། སྔགས་བཙུན་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོ་ནས་གང་ཤར་བདེན་སྨོན་དུ་གསོལ་བ་སྟེ། འདིས་ཀྱང་བསྟན་འཛིན་མཆོག་རྣམས་ཞབས་པད་སྐལ་བརྒྱར་བརྟན་ཞིང་བཤད་སྒྲུབ་ཕྲིན་ལས་ཡར་ངོའི་ཟླ་ལྟར་འཕེལ་བའི་རྒྱུར་གྱུར་ཅིག དགེའོ།། ༈ མཆོག་བྱིན་ཉི་མ་འབུམ་གྱི་གཟི་བྱིན་གྱིས། །འཆི་བདག་འཇིགས་པའི་མུན་ཚོགས་གཏན་བཅོམ་ཞིང་། །འཆི་མེད་རྡོ་རྗེའི་པད་ཚལ་རྒྱས་མཛད་པའི། །རྩ་གསུམ་ཚེ་ལྷའི་ཚོགས་རྣམས་དགོངས་སུ་གསོལ། །ཕན་བདེའི་གཞིར་གྱུར་རྒྱལ་བསྟན་རིན་པོ་ཆེ། །གངས་ལྗོངས་དད་བསོད་གོས་བཟང་རྩེར་བཀོད་པའི། །སྒྲུབ་བརྒྱུད་རྣམ་བརྒྱད་རིང་ལུགས་གདུགས་དཀར་པོ། །འཛིན་མཛད་བཤེས་གཉེན་ཚོགས་རྣམས་ཞབས་བརྟན་གསོལ། །ཉེས་སྤྱོད་སྡོམ་པའི་ཚུལ་ཁྲིམས་འཛིན་མའི་ལྟོར། །དགེ་བ་ཆོས་སྡུད་ཕྱིན་དྲུག་ཡལ་འདབ་རྒྱས། །སེམས་ཅན་དོན་བྱེད་མེ་འབྲས་ཁུར་དུད་པའི། །བཤེས་གཉེན་དཔག་བསམ་དབང་པོ་ཞབས་བརྟན་གསོལ། །འདུལ་ཁྲིམས་རྣམ་པར་དག་པའི་སྡོང་པོ་ལ། །རྨད་བྱུང་བྱང་སེམས་བསླབ་པའི་འདབ་ཕྲེང་མཛེས། །གསང་སྔགས་དམ་ཚིག་ཟབ་མོའི་གེ་སར་ཅན། །བཤེས་གཉེན་གསེར་གྱི་པདྨ་ཞབས་བརྟན་གསོལ། །མང་ཐོས་ཏི་མའི་མཇིང་ལས་ལེགས་ཐོན་པའི། །བསམ་བྱུང་ངོ་བོ་དྲི་མེད་ཆུ་ཤེལ་ཁམས། །སྒོམ་བྱུང་ཤེས་རབ་ཆ་ཤས་ཡོངས་རྫོགས་པའི། །བཤེས་གཉེན་བདེ་འབྱུང་གཙུག་རྒྱན་ཞབས་བརྟན་གསོལ། །མཁྱེན་བརྩེ་ནུས་པའི་ཡོན་ཏན་ཡོངས་སུ་རྫོགས། །འཆད་རྩོད་རྩོམ་གསུམ་འབུམ་ཕྲག་སྣང་བ་ཡིས། །བསྟན་འགྲོའི་ཕན་བདེ་པད་ཚལ་བཞད་མཛད་པའི། །བཤེས་གཉེན་ཉིན་བྱེད་དབང་པོ་ཞབས་བརྟན་གསོལ། །རིག་འཛིན་བརྒྱུད་པའི་གངས་རིར་གནས་བཅས་ཤིང་། །གྲུབ་གཉིས་རྩལ་རྫོགས་ཐེག་མཆོག་ང་རོ་ཡིས། །ལྟ་བ་དམན་པའི་ཝ་ཚོགས་སྐྲག་མཛད་པའི། །བཤེས་གཉེན་གདོང་ལྔའི་དབང་པོ་ཞབས་བརྟན་གསོལ། །དགོངས་ཀློང་དུས་གསུམ་རྒྱལ་བར་རབ་མཉམ་ཡང་། །བདག་ལ་རྒྱལ་བ་ལས་ལྷག་བཀའ་དྲིན་ཅན། །དབང་བསྐུར་རྒྱུད་བཤད་མན་ངག་ལུང་འབོགས་པའི། །བཤེས་གཉེན་ཚོགས་རྣམས་བསྐལ་བརྒྱར་ཞབས་བརྟན་གསོལ། །དཀོན་མཆོག་རྩ་གསུམ་ཐུགས་རྗེའི་བདེན་སྟོབས་དང་། །བདག་ཅག་དད་མོས་གཅིག་ཏུ་དཀར་བའི་མཐུས། །དྲིན་ཆེན་བླ་མའི་ཚོགས་རྣམས་ཞབས་བརྟན་ཞིང་། །ཕྲིན་ལས་གླིང་བཞི་ཡོངས་ལ་ཁྱབ་གྱུར་ཅིག །རིས་བྲལ་བསྟན་འཛིན་སྐྱེས་བུ་རྣམས་ཀྱི་ཞབས་བརྟན་གསོལ་འདེབས་ཉུང་ངུ་འདིའང་། མཆེད་གྲོགས་བློ་གྲོས་གཞན་ཕན་གྱི་བཞེད་སྐོང་དུ། པདྨ་བི་ཛས་བྲིས་ཏེ་རྩེ་གཅིག་གུས་པས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག དགེའོ།། ༈ ༀ་སྭསྟི། མི་འགྱུར་འཕོ་མེད་བདེ་ཆེན་རྡོ་རྗེའི་གཟིགས། །གཟུང་འཛིན་མཚན་མའི་སྤྲོས་པ་ཀུན་བཅོམ་པའི། །དོན་དམ་རང་རིག་དཔལ་ལྡན་བླ་མ་དང་། །དབྱེར་མེད་རྩ་གསུམ་ཚེ་ལྷའི་དཀྱིལ་འཁོར་དགོངས། །རླབས་ཆེན་ཐུགས་བསྐྱེད་ཟབ་མོའི་ཆུ་གཏེར་དབུས། །ཐོས་བསམ་སྒོམ་པའི་རི་གླིང་བཀོད་ལེགས་ཤིང་། །གཞན་ཕན་ཕྲིན་ལས་ཉི་ཟླའི་རྣ་ཆ་ཅན། །འགྱུར་མེད་བདེ་ཆེན་ཆོས་སྒྲོན་ཞབས་བརྟན་གསོལ། །རིག་འཛིན་བརྒྱུད་པའི་གངས་རིར་གནས་བཅས་པའི། །མཁྱེན་རྟོགས་ཡོན་ཏན་རྩལ་རྫོགས་གདོང་ལྔ་པ། །ཐེག་མཆོག་གད་མོས་ས་གསུམ་གཡོ་བཞིན་དུ། །ཀུན་བཟང་ཡེ་ཤེས་ཆོས་སྒྲོན་ཞབས་བརྟན་གསོལ། །རླབས་ཆེན་ཚོགས་གཉིས་ཆུ་གཏེར་བསྲུབས་ལས་འཁྲུངས། །བསྔགས་འོས་ཡོན་ཏན་ཆ་ཤས་ཡོངས་སུ་རྫོགས། །ཕན་བདེའི་བསིལ་ཟེར་ཐུབ་བསྟན་ཀུ་མུཏ་གཉེན། །འགྱུར་མེད་བྱང་ཆུབ་ཆོས་སྒྲོན་ཞབས་བརྟན་གསོལ། །སྔོན་སྨོན་ཐུགས་བསྐྱེད་རྩ་བ་རབ་ཏུ་བརླིང་། །རིམ་གཉིས་རྣལ་འབྱོར་ཟབ་མོའི་ཡལ་འདབ་རྒྱས། །ཐུགས་རྗེའི་གྲིབ་བསིལ་སྐལ་བཟང་གདུང་སེལ་བ། །འགྱུར་མེད་གར་དབང་ཆོས་སྒྲོན་ཞབས་བརྟན་གསོལ། །ལེགས་བྱས་དཔྱིད་ཀྱི་རྒྱལ་མོས་བོས་པའི་མགྲོན། །བཀྲ་ཤིས་ངོ་མཚར་བྱེ་བའི་སྒྲ་དབྱངས་ཀྱིས། །ས་གསུམ་འཇིག་རྟེན་ཀུན་ནས་དགའ་མཛད་པ། །འཆི་མེད་བདེ་ལྡན་སྒྲོལ་མ་ཞབས་བརྟན་གསོལ། །སྔ་འགྱུར་རིང་ལུགས་བརྒྱུད་པའི་གོས་བཟང་རྩེར། །ཉེར་ཐོབ་འཁོར་ལོ་གསུམ་གྱི་གཟི་འབར་བའི། །མཚུངས་བྲལ་རྗེ་བཙུན་མ་ཎི་ཀ་ཡི་ཕྲེང་། །འགྱུར་མེད་རྡོ་རྗེའི་ཁྲི་ལ་རྟག་བརྟན་གསོལ། །རྒྱལ་ཀུན་འདུས་ཞལ་ཨོ་རྒྱན་བླ་མ་ཡི། །རིང་ལུགས་སྨིན་གྲོལ་ཆོས་ཀྱི་དགའ་ཚལ་མཆོག །མཁས་གྲུབ་ཨུ་དུམ་བཱ་རས་ཡོངས་གཏམས་རྒྱུས། །བཤད་སྒྲུབ་ཕྲིན་ལས་གླིང་བཞིའི་མཐར་ཁྱབ་ཤོག །བརྒྱུད་གསུམ་བླ་མའི་བྱིན་རླབས་སྤྲིན་བཞིན་འཁྲིགས། །ཡི་དམ་ཞི་ཁྲོའི་དངོས་གྲུབ་ཆར་དུ་བསྙིལ། །མཁའ་འགྲོ་ཆོས་སྐྱོང་ཐོགས་མེད་ཕྲིན་ལས་ཀྱིས། །དོན་གཉིས་འདོད་པ་འཇོ་བའི་བཀྲ་ཤིས་ཤོག །ཅེས་པའང་མཚུངས་བྲལ་འཁོར་ལོའི་མགོན་པོ་རྗེ་བཙུན་རིན་པོ་ཆེ་རྣམས་ཀྱི་ཞབས་པད་གཙུག་ན་བསྙེན་པའི་གུས་འབངས་ཞེ་ཆེན་པ་འགྱུར་མེད་པདྨ་རྣམ་རྒྱལ་དཔལ་བཟང་པོས་ཨོ་རྒྱན་སྨིན་གྲོལ་གླིང་གི་ཆོས་གྲྭ་ཆེན་པོར་བདེན་ཚིག་སྨོན་ལམ་དུ་གསོལ་བ་སྟེ། འདིས་ཀྱང་སྐྱབས་མཆོག་དམ་པ་རྣམས་ཞབས་པད་བསྐལ་བརྒྱའི་བར་དུ་བརྟན་ཞིང་གསན་བསམ་སྒོམ་པའི་ཡོན་ཏན་ཡར་ངོའི་ཟླ་ལྟར་རྒྱས་པའི་རྒྱུར་གྱུར་ཅིག དགེའོ།། ༈ ༀ་སྭསྟི། རྟག་བརྟན་གཞོམ་བྲལ་འོད་གསལ་གཉུག་མའི་གཤིས། །གང་འདུལ་མཚན་དཔེ་འབར་བའི་སྐུར་བཞེངས་ནས། །འགྲོ་ཀུན་འཆི་བདག་གཡུལ་ལས་རྒྱལ་མཛད་པའི། །རྩ་གསུམ་ཚེ་ལྷའི་ཚོགས་རྣམ་དགོངས་སུ་གསོལ། །དཔལ་ལྡན་སྟོབས་བཅུ་མངའ་བ་སྲས་བཅས་ཀྱི། །ཕུལ་བྱུང་བྲལ་ཐོབ་སྨིན་པའི་ཡོན་ཏན་འབུམ། །གཅིག་བསྡོམས་རྒྱལ་བས་ལུང་བསྟན་སྤྲུལ་པའི་སྐུ། །སྐྱབས་མཆོག་འཁོར་ལོའི་མགོན་པོ་ཞབས་བརྟན་གསོལ། །གུ་རུའི་ཞལ་ཚབ་གཏེར་འབྱིན་ཡོངས་ཀྱི་རྗེ། །ཚེ་ལ་དབང་ཐོབ་གྲུབ་པའི་རིག་པ་འཛིན། །དཀྱིལ་འཁོར་རྒྱ་མཚོའི་གཙོ་མཆོག་ཧེ་རུ་ཀཿ། །རྡོ་རྗེ་གཡུང་དྲུང་གླིང་པ་ཞབས་བརྟན་གསོལ། །མཁྱེན་རྩེ་ནུས་པའི་རི་གླིང་བཀོད་ལེགས་ཤིང་། །འཆད་རྩོད་རྩོམ་གསུམ་ཉི་ཟླའི་བགྲོད་པ་ཡིས། །ཐུབ་བསྟན་རྒུད་མུན་མཐའ་དག་གཏན་བཅོམ་པའི། །འཆི་མེད་བསྟན་གཉིས་གླིང་པ་ཞབས་བརྟན་གསོལ། །བཤད་རྒྱུད་ལུང་གི་འདབ་སྟོང་རྒྱས་པའི་རྩེར། །སྒྲུབ་བརྒྱུད་རྟོགས་པའི་ཟིལ་དངར་འབུམ་འཇོ་བས། །སྐལ་བཟང་རྐང་དྲུག་རེ་བ་སྐོང་མཛད་པའི། །ངག་དབང་ཡོན་ཏན་རྒྱ་མཚོ་ཞབས་བརྟན་གསོལ། །རྒྱུད་ལུང་མན་ངག་ཟབ་མོའི་ཆུ་གཏེར་ཆེ། །ཐུགས་བསྐྱེད་བརྩོན་པའི་གྲུ་ཡིས་ལེགས་བརྒལ་བས། །མཛོད་ཆེན་རྣམ་ལྔ་སྔོན་མེད་དགོས་འབྱུང་དབང་། །སྩོལ་མཛད་བློ་གྲོས་མཐའ་ཡས་ཞབས་བརྟན་གསོལ། །ཕྱོགས་རེར་མ་གྱུར་ཡོངས་རྫོགས་བསྟན་པའི་བདག །རིས་སུ་མ་ཆད་གདུལ་བྱ་རྒྱ་མཚོའི་མགོན། །རྣམ་ཐར་དཔག་ཡས་ཆོས་ཀྱི་དབྱིངས་ཁྱབ་པའི། །པདྨ་གར་དབང་བསྐལ་བརྒྱར་ཞབས་བརྟན་གསོལ། །རྡོ་རྗེ་འཆང་སོགས་བརྒྱུད་གསུམ་བླ་མའི་དྲུང་། །རྡོ་རྗེའི་ཐ་ཚིག་གཉེན་པོ་ཞལ་འཆེས་པའི། །རྡོ་རྗེ་ཆོས་སྲུང་དཀར་ཕྱོགས་སྐྱོང་རྣམས་ཀྱིས། །རྡོ་རྗེ་སློབ་དཔོན་བསྐལ་བརྒྱར་ཞབས་བརྟན་གསོལ། །རྡོ་རྗེ་འཛིན་དབང་བླ་མའི་ཞབས་པད་བརྟན། །རྡོ་རྗེའི་སློབ་ཚོགས་འདུ་བ་ཆེས་ཆེར་འཕེལ། །རྡོ་རྗེ་ཐེག་པའི་བཤད་སྒྲུབ་ཕྲིན་ལས་རྒྱས། །རྡོ་རྗེའི་གསང་མཆོག་འགྲུབ་པའི་བཀྲ་ཤིས་ཤོག །ཅེས་སྐྱབས་ཅིག་བཀའ་དྲིན་མཚུངས་བྲལ་རྡོ་རྗེ་འཆང་རིན་པོ་ཆེའི་ཞབས་པད་བསྐལ་བརྒྱའི་བར་དུ་བརྟན་བཞུགས་གསོལ་འདེབས་ཉུང་ངུ་འདིའང་། གུས་སློབ་ཐ་ཆུང་ཞེ་སྤྲུལ་མིང་འཛིན་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་ཙཱ་འདྲ་རིན་ཆེན་བྲག་གི་སྒྲུབ་སྡེ་ནས་བྲིས་ཤིང་གསོལ་བ་བཏབ་པ་དེ་དེ་བཞིན་དུ་འགྲུབ་པའི་རྒྱུར་གྱུར་ཅིག ༈ རྟག་བརྟན་འཕོ་འགྱུར་བྲལ་བ་གཉུག་མའི་གཤིས། །གང་འདུལ་མཚན་དཔེའི་སྐུར་བཞེངས་རྡོ་རྗེ་འཆང་། །མདོ་སྔགས་བསྟན་པའི་པད་ཚལ་རྒྱས་མཛད་པའི། །འགྲོ་མགོན་ཉིན་བྱེད་དབང་པོ་ཞབས་བརྟན་གསོལ། །དྲི་མེད་ཚུལ་ཁྲིམས་གསེར་སྦྱངས་སྙིང་པོའི་ཁམས། །ཏིང་འཛིན་མི་གཡོ་ཞི་བའི་མུ་ཁྱུད་བརྟན། །རྣམ་བཀྲའི་ཤེས་རབ་རྩིབས་སྟོང་རབ་མཛེས་པའི། །འགྲོ་མགོན་ཆོས་ཀྱི་འཁོར་ལོ་ཞབས་བརྟན་གསོལ། །མང་ཐོས་གདེངས་ཅན་གནས་ནས་ཉེར་ཐོན་པའི། །དྲི་མེད་བསམ་བྱུང་འཕྲོག་མིན་གཟི་འབར་ཞིང་། །སྒོམ་བྱུང་འདོད་དགུའི་གྲུ་ཆར་འཇོ་བའི་དཔྱིད། །འགྲོ་མགོན་ཡིད་བཞིན་ནོར་བུ་ཞབས་བརྟན་གསོལ། །བདེན་བཞིའི་ལུས་སྟོབས་རྒྱས་པའི་མཛའ་ན་མོ། །གཞན་ཕན་ཕར་ཕྱིན་དྲུག་གི་གོས་ཀྱིས་ཀླུབ། །གསང་སྔགས་རིམ་གཉིས་ནོར་བུའི་རྒྱན་ཆས་སྒེག །འགྲོ་མགོན་ངེས་དོན་བཙུན་མོ་ཞབས་བརྟན་གསོལ། །རྒྱུད་ལུང་མན་ངག་ཟབ་མོའི་བང་མཛོད་ཕྱུག །གཞན་དོན་ཐབས་མཁས་ཐུགས་རྗེའི་ཕྲིན་ལས་མྱུར། །འབྲེལ་ཚད་འདུན་མ་དགེ་ལ་བསྒྱུར་བའི་གཉེན། །འགྲོ་མགོན་བློན་པོ་རིན་ཆེན་ཞབས་བརྟན་གསོལ། །རྒྱ་ཆེན་མཁྱེན་པའི་ལུས་སྟོབས་མཆོག་ཏུ་རྒྱས། །རྨད་བྱུང་བརྩེ་བའི་སྣ་ལྗགས་ཕྱོགས་བཅུར་གཡོ། །ལུས་མེད་གཡུལ་ངོ་བཟློག་པའི་ནུས་སྟོབས་ཅན། །འགྲོ་མགོན་སྟོབས་ཀྱི་གླང་པོ་ཞབས་བརྟན་གསོལ། །ཐེག་བརྒྱད་སྤྲོས་པའི་སྒྲོག་གིས་བཅིང་མིན་པར། །ཡེ་གྲོལ་ཀློང་ཆེན་ཡངས་པའི་ཐང་མོ་ཆེར། །གཏད་མེད་རྒྱ་ཡན་རླུང་ཤུགས་ཀྱིས་བསྐྱོད་པའི། །འགྲོ་མགོན་ཅང་ཤེས་དབང་པོ་ཞབས་བརྟན་གསོལ། །ལུང་རིགས་ཚད་མ་གསུམ་གྱི་རལ་གྲི་ཡིས། །ལོག་སྨྲའི་ཕས་རྒོལ་དཔུང་ཚོགས་བཅོམ་ནས་སླར། །ཐེག་མཆོག་ཆོས་ཀྱི་རྒྱལ་སྲིད་སྲུང་བའི་གཉེན། །འགྲོ་མགོན་དམག་དཔོན་རིན་ཆེན་ཞབས་བརྟན་གསོལ། །བླུན་སྒོམ་ཞེན་པའི་འདོད་པས་མ་བསླུས་ཤིང་། །རང་མཐོང་རྟོག་གེའི་མཚོན་རྣོན་བསྣམ་མིན་པར། །གཟུང་འཛིན་ལྷ་མིན་གཡུལ་ལས་རྣམ་རྒྱལ་བའི། །འགྲོ་མགོན་འཆི་མེད་དབང་པོ་ཞབས་བརྟན་གསོལ། །སྐུ་ཚེ་རི་དབང་བཞིན་དུ་རྟག་བརྟན་ངོས། །བཤད་སྒྲུབ་མཛད་ཕྲིན་ཉི་ཟླའི་མདངས་གསལ་བས། །སྔ་འགྱུར་བསྟན་པའི་པད་ཚལ་བཞད་པའི་རྒྱུའི། །སྐལ་བཟང་རྐང་དྲུག་དགའ་བའི་གླུ་ལེན་ཤོག །མཆོག་བྱིན་ཚ་ཟེར་བརྒྱ་བའི་འཛུམ་རླབས་ཀྱིས། །འཆི་བདག་འཇིགས་པའི་མུན་ཚོགས་སེལ་མཛད་པའི། །རྩ་གསུམ་ཚེ་ལྷའི་ཚོགས་ཀྱི་བདེན་པའི་མཐུས། །གསོལ་བཏབ་སྨོན་པའི་འབྲས་ཀུན་འགྲུབ་གྱུར་ཅིག །ཅེས་སྔ་འགྱུར་བསྟན་པའི་སྒྲོན་མེ་མཚུངས་བྲལ་འགྲོ་བའི་མགོན་པོ་མཆོག་སྤྲུལ་རིན་པོ་ཆེའི་ཞབས་བརྟན་གསོལ་འདེབས་ཉུང་ངུ་འདི་ཡང་། མདོ་ཁམས་ཞེ་ཆེན་གྱི་བཙུན་པ་འགྱུར་མེད་པདྨ་རྣམ་རྒྱལ་དཔལ་བཟང་པོས་སོ།། ༈ སྙིང་རྗེའི་མངའ་བདག་རྒྱལ་བ་སྲས་བཅས་ལ། །གསོལ་བ་འདེབས་སོ་བདག་སོགས་འགྲོ་ཀུན་གྱིས། །སྡིག་སེམས་བསམ་པ་ཡིད་ལ་མི་འགྱུ་ཞིང་། །ཉིན་མཚན་ཆོས་ཀྱི་འདའ་བར་བྱིན་གྱིས་རློབས། །ཅེས་པའང་བི་ཛས་སོ།། ༈ ཐུབ་དབང་སྲས་ཀྱིས་བསྐོར་བའི་མགོན་རྣམས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །ཚུལ་ཁྲིམས་ཕུང་པོ་ཡོངས་སུ་དག་པ་དང་། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །ཞེས་པའང་བི་ཛས་སོ།། གངས་ཅན་བླ་མའི་སྐལ་བ་པདྨ་འབྱུང་། མི་ཕྱེད་སྙིང་ནས་གུས་པས་གསོལ་བ་འདེབས། །བྱང་ཆུབ་སྒྲུབ་པའི་འགལ་རྐྱེན་ཀུན་ཞི་ཞིང་། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཞེས་པའང་བི་ཛས་སོ།། ༈ རབ་འབྱམས་སྐྱབས་ཀུན་འདུས་པའི་བདག་ཉིད་ཆེ། །ཨོ་རྒྱན་རྡོ་རྗེ་འཆང་ལ་གསོལ་བ་འདེབས། །འདི་ཕྱི་ཀུན་ཏུ་འབྲལ་མེད་ཐུགས་རྗེས་ཟུངས། །བསམ་དོན་ཆོས་བཞིན་འགྲུབ་པར་བྱིན་གྱིས་རློབས། །ཞེས་པའང་བི་ཛས་སོ།། ༈ ཆོས་སྐུའི་ཀློང་ན་དགོངས་ཀློང་འདུ་འབྲལ་མེད། །ལོངས་སྐུའི་དབྱིངས་སུ་རང་སྣང་ཕྱག་རྒྱར་གསལ། །སྤྲུལ་སྐུའི་ཕྲིན་ལས་གདུལ་བྱའི་མོས་པར་འཇུག །དུས་གསུམ་རྩ་བརྒྱུད་བླ་མར་གསོལ་བ་འདེབས། །ཞེས་ཀྱང་བི་ཛས་སོ།། ༈ ༀ་སྭསྟི། རྟག་བརྟན་གཞོམ་བྲལ་གཉུག་མ་རྡོ་རྗེའི་སེམས། །གང་འདུལ་མཚན་དཔེའི་དཔལ་འབར་རྩ་གསུམ་ལྷ། །ཁྱད་པར་བླ་མ་ཚེ་ལྷའི་བདེན་བྱིན་གྱིས། །འཁོར་ལོའི་མགོན་གྱི་ཞབས་པད་བརྟན་གྱུར་ཅིག །འཇམ་དབྱངས་མཁྱེན་པའི་ཆུ་གཏེར་ལས་འཁྲུངས་ཤིང་། །བརྩེ་ཆེན་ཐུགས་རྗེའི་འདབ་སྟོང་རྣམ་པར་བཞད། །ཟབ་རྒྱས་ཆོས་ཀྱི་ཟིལ་མངར་འབུམ་འཇོ་བའི། །བློ་གྲོས་རྒྱ་མཚོའི་ཞབས་པད་བརྟན་གྱུར་ཅིག །གཞོམ་གཞིག་བྲལ་བ་འགྱུར་མེད་རྡོ་རྗེའི་སྐུ། །ཕུལ་བྱུང་མཚན་དཔེའི་དཔལ་གྱིས་རྟག་འཁྱུད་ཅིང་། །མཐོང་ཐོས་དྲན་རེག་ཐར་མཆོག་གཏན་བདེ་ཆེར། །འགོད་མཛད་སྐུ་ཡི་རྡོ་རྗེ་ཞབས་བརྟན་གསོལ། །འགགས་མེད་གསུང་གསང་གཞོམ་བྲལ་རྡོ་རྗེའི་སྐུ། །གང་འདུལ་གདུལ་བྱའི་ཁམས་དང་བསམ་པ་བཞིན། །ཅི་དགར་འཇོ་བས་ཐེག་མཆོག་སྙིང་པོའི་སྲོལ། །གསལ་མཛད་གསུང་གི་རྡོ་རྗེ་ཞབས་བརྟན་གསོལ། །ཟབ་ཞི་སྤྲོས་བྲལ་འོད་གསལ་སྙིང་པོའི་ཐུགས། །འཕོ་མེད་བདེ་ཆེན་རྡོ་རྗེས་རྟག་འཁྱུད་ཙམ། །གཟུངས་སྤོབས་བློ་གྲོས་མཁྱེན་བརྩེའི་དཀྱིལ་འཁོར་རྫོགས། །འགྱུར་མེད་ཐུགས་ཀྱི་རྡོ་རྗེ་ཞབས་བརྟན་གསོལ། །བྲལ་སྨིན་ཡོན་ཏན་བྱེ་བའི་ལེགས་མཛེས་ཤིང་། །གཞན་ཕན་ཕྲིན་ལས་ཟབ་མོའི་འཇུག་པ་ཡིས། །རིས་མེད་བསྟན་པའི་རྒྱལ་མཚན་འཛིན་མཛད་པའི། །མཆོག་གི་སྤྲུལ་སྐུའི་ཞབས་པད་བརྟན་གྱུར་ཅིག །རྡོ་རྗེ་སློབ་དཔོན་ཞབས་པད་བསྐལ་བརྒྱར་བརྟན། །རྡོ་རྗེའི་སློབ་ཚོགས་འདུ་བ་མཁའ་དང་མཉམ། །རྡོ་རྗེ་རྩེ་མོའི་སྨིན་གྲོལ་ཕྲིན་ལས་རྒྱས། །རྡོ་རྗེའི་གསང་མཆོག་འགྲུབ་པའི་བཀྲ་ཤིས་ཤོག །ཅེས་པའང་སློབ་དཔོན་རྒན་བུ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་བྲིས་ཤིང་དུས་ཚེས་དགེ་བར་གསོལ་བ་བཏབ་པ་དགེ། ༈ རབ་འབྱམས་རྩ་གསུམ་ཚེ་ལྷའི་བདེན་བྱིན་དང་། །བདག་ཅག་དད་དམ་ལྷག་བསམ་དཀར་པོའི་མཐུས། །སྲིད་ཞིའི་དཔལ་མགོན་མཚུངས་མེད་ཆོས་ཀྱི་རྗེའི། །ཞབས་པད་བརྟན་ཞིང་ཕྲིན་ལས་རྒྱས་གྱུར་ཅིག །བཀའ་ཕྱག་དྭགས་རྙིང་བརྒྱུད་པའི་རིང་ལུགས་མཆོག །ཀརྨ་བཀའ་བརྒྱུད་བསྟན་པའི་པད་ཚལ་མཆོག །བཞད་མཛད་ཆོས་ཀྱི་ཉིན་བྱེད་འོད་པོ་ཆེ། །འགྲོ་བསོད་མཁའ་ལ་རྟག་ཏུ་བརྟན་གྱུར་ཅིག །ཐུགས་ལ་བརྣག་པ་གཞན་ཕན་འབའ་ཞིག་སྟེ། །མཛད་པ་མཐའ་དག་བསྟན་འགྲོར་ཕན་པའི་སྒོ། །སྙིགས་མའི་དུས་ན་ཁྱོད་འདྲའི་བཤེས་གཉེན་སུ། །དེ་སླད་ཐུགས་ཀྱི་བཞེད་ཀུན་འགྲུབ་གྱུར་ཅིག །ཡང་དག་ལམ་གྱི་ས་མཁན་གཅིག་པུ་པ། །མཛད་སྤྱོད་གང་ལའང་འཁྲུལ་བའི་དྲི་མ་བྲལ། །ཁྱོད་འདྲའི་འདྲེན་པ་དུས་གསུམ་འབྱོན་དཀའ་བས། །བྱང་ཆུབ་བར་དུ་འབྲལ་བར་མ་གྱུར་ཅིག །བདག་ཀྱང་རྣམ་གཡེང་འདུ་འཛིའི་དགྲ་བོ་ལས། །རྒྱལ་ནས་དབེན་གསུམ་བདུད་རྩིས་འཚོ་བཞིན་དུ། །ཆོས་བརྒྱད་འཆིང་བས་མ་གོས་བསྟན་འགྲོའི་དོན། །ཡིད་ལ་བསམ་པ་མཐའ་དག་འགྲུབ་གྱུར་ཅིག །རྡོ་རྗེའི་མཆེད་གྱུར་འདུས་པ་རྒྱ་མཚོ་ཡང་། །སྐུ་ཚེ་བརྟན་ཞིང་ལེགས་མཛད་གོང་དུ་འཕེལ། །དམ་ཚིག་མི་ཉམས་ལྟ་སྤྱོད་དོན་མཐུན་པས། །རྡོ་རྗེའི་གསང་མཆོག་ཚེ་འདིར་འགྲུབ་གྱུར་ཅིག །ཕྱོགས་འདིར་དགེ་འདུན་འདུས་པའི་སྡེ་འཕེལ་ཞིང་། །བསྟན་འཛིན་ཞབས་བརྟན་སྤང་ཀློག་བྱ་བ་འཕེལ། །དཀར་ཕྱོགས་ལྷས་སྲུང་ནག་ཕྱོགས་རྩུབ་འགྱུར་ཞི། །དོན་གཉིས་དཔལ་ཀུན་ཡིད་བཞིན་འགྲུབ་གྱུར་ཅིག །བླ་མའི་ཐུགས་རྗེ་སློབ་མའི་རྒྱུད་ལ་ཞུགས། །སློབ་མའི་དད་མོས་བླ་མའི་ཐུགས་ལ་ཤར། །བླ་སློབ་མི་འབྲལ་དུས་ཀུན་ལྷན་ཅིག་འཚོགས། །ལེགས་ཚོགས་རྟེན་འབྲེལ་མཐའ་རྒྱས་བཀྲ་ཤིས་ཤོག །ཅེས་པའང་ཤཱཀྱའི་དགེ་སྦྱོང་རྒན་པོ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་གུས་ཤིང་དྭངས་པའི་སྒོ་ནས་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། སརྦ་དཱ་མངྒལཾ། ༈ ༀ་སྭསྟི་སིདྡྷཾ། རྒྱལ་ཀུན་འདུས་ཞལ་ཨོ་རྒྱན་ཆེན་པོ་ཡིས། །གདུང་འཚོབ་གྲུབ་རིག་འཛིན་པ་ཡོངས་ཀྱི་ཏོག །ཐེག་མཆོག་སྙིང་པོའི་ལམ་བཟང་སྣང་མཛད་པ། །རྡོ་རྗེ་འཆང་དབང་བླ་མར་གསོལ་བ་འདེབས། །མཆོག་གསང་ཐུགས་གཏེར་ནམ་མཁའ་མཛོད་སྒོ་ནས། །ཟབ་རྒྱས་སྨིན་གྲོལ་གདམས་པའི་གྲུ་ཆར་གྱིས། །མཐའ་ཀླས་སྐྱེ་དགུའི་རེ་སྐོང་རིག་པ་འཛིན། །གར་དབང་བཞད་པ་རྩལ་ལ་གསོལ་བ་འདེབས། །ཚོགས་བརྒྱད་ཀུན་རྟོག་སྣ་ཚོགས་འཁྲུལ་སེམས་སྤྲིན། །ཀ་དག་རིག་པའི་དབྱིངས་སུ་རང་གྲོལ་ནས། །ལྷུན་གྲུབ་སྣང་བཞིའི་ཡེ་ཤེས་རྩལ་རྫོགས་པ། །དགའ་རབ་གཉིས་པའི་ཞབས་ལ་གསོལ་བ་འདེབས། །རྣམ་བཞིའི་རིག་འཛིན་གྲུབ་པའི་གསེང་ལམ་ཆེར། །གདུལ་བྱ་རྒྱ་མཚོ་ཡོངས་སུ་སྨིན་མཛད་ཅིང་། །དམུ་རྒོད་སྙིགས་འགྲོ་འདུལ་བའི་དཔའ་བོ་མཆོག །རྡོ་རྗེ་སློབ་དཔོན་སྐལ་བརྒྱར་འཚོ་གཞེས་གསོལ། །དེ་ལྟར་མི་ཕྱེད་དད་པས་གསོལ་བཏབ་མཐུས། །དབང་བཅུའི་གོ་འཕང་མཆོག་བརྙེས་རིག་འཛིན་རྗེ། །གསང་གསུམ་ཚེ་ལྷའི་ངོ་བོར་བརྟན་བཞུགས་ནས། །ཟབ་རྒྱས་ཆོས་འཁོར་རྟག་པར་བསྐང་བྱིན་རློབས། །རླབས་ཆེན་བསྡུ་དངོས་གཞི་ཡི་ཕྲིན་ལས་ཀྱིས། །ས་གསུམ་སྐྱེ་དགུའི་རེ་བ་ཡོངས་སྐོང་ཞིང་། །རྨད་བྱུང་འཁོར་ལོ་གསུམ་གྱི་ཕྲིན་ལས་རྒྱུན། །སྲིད་མཐའི་བར་དུ་མི་ཉམས་བརྟན་གྱུར་ཅིག །རབ་འབྱམས་རྩ་གསུམ་ཚེ་ལྷའི་བདེ་བྱིན་དང་། །བདག་སོགས་དད་མོས་ལྷག་བསམ་དག་པའི་མཐུས། །ཇི་ལྟར་གསོལ་བཏབ་སྨོན་པའི་འབྲས་བཟང་ཀུན། །གེགས་མེད་ཡོངས་སུ་གྲུབ་པའི་བཀྲ་ཤིས་ཤོག །ཅེས་པའང་བསླབ་གསུམ་ནོར་བུའི་མཛོད་འཆང་རྨུགས་སངས་པ་ཚུལ་ཁྲིམ་རྒྱ་མཚོའི་བཞེད་སྐོང་དུ། མགོན་པོ་གང་ལ་མི་ཕྱེད་པའི་དད་མོས་སྙིང་ལ་འཆང་བའི་ཀུ་སཱ་ལི་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བྲིས་ཤིང་གསོལ་བ་བཏབ་པ་དགེ། མངྒལཾ། ༈ ཀུན་བཟང་པདྨའི་ཞལ་ཚབ་རིག་པ་འཛིན། །བློ་གྲོས་མཐའ་ཡས་ཐུགས་རྗེའི་འོད་ཟེར་ལས། །ཡོངས་ཤར་གཞན་ཕན་ཕྲིན་ལས་ཕ་མཐའ་ཡས། །ཞབས་པད་བརྟན་ཞིང་ཕྲིན་ལས་རྒྱས་གྱུར་ཅིག །ཅེས་པའང་དགེ་སྦྱོང་རྒན་པོ་འགྱུར་མེད་པདྨ་བསྟན་འཛིན་གྱིས་ཆེད་དུ་བརྗོད་པའོ། ། ༈ ༀ་སྭསྟི། བསྒྲངས་ཡས་སྲས་བཅས་རྒྱལ་བའི་ཡེ་ཤེས་སྐུ། །དྲན་པས་བདུད་བཞིའི་འཇིགས་པ་འཕྲོག་མཛད་པའི། །རབ་འབྱམས་རྩ་གསུམ་ཚེ་ལྷའི་བདེན་བྱིན་གྱིས། །དཔལ་ལྡན་བླ་མའི་ཞབས་པད་བརྟན་གྱུར་ཅིག །ཕུལ་བྱུང་སྐྱེས་ཐོབ་དགེ་བའི་ཨུཏྤ་ལ། །སྦྱོར་བྱུང་ཡོན་ཏན་བྱེ་བའི་བདུད་རྩིས་ཕྱུག །སྐལ་བཟང་བུང་བ་སྡུད་པའི་སྨན་གཅིག་པུ། །མཁན་ཆེན་ཚུལ་ཁྲིམས་རྒྱ་མཚོ་ཞབས་བརྟན་གསོལ། །རྣམ་དག་ཚུལ་ཁྲིམས་གསེར་རིའི་ཕྲེང་བས་བསྐོར། །དཔག་ཡས་ཏིང་འཛིན་ཞི་བའི་ལྷུན་པོ་བརྗིད། །རྣམ་བཀྲའི་ཤེས་རབ་ཉི་ཟླའི་དཀྱིལ་འཁོར་མཛེས། །མཁན་ཆེན་ཚུལ་ཁྲིམས་རྒྱ་མཚོ་ཞབས་བརྟན་གསོལ། །མང་ཐོས་ལུང་གི་རྒྱལ་མཚན་མཐོན་པོའི་རྩེར། །ཟབ་གསང་རྟོགས་པའི་ནོར་བུའི་ཏོག་མཛེས་པས། །བཤད་སྒྲུབ་འདོད་དགུའི་གྲུ་ཆར་འཇོ་བའི་དཔྱིད། །མཁན་ཆེན་ཚུལ་ཁྲིམས་རྒྱ་མཚོ་ཞབས་བརྟན་གསོལ། །བརྟན་མཁས་ཡོན་ཏན་བྱེ་བའི་དཔལ་གྱིས་མཐོ། །གཞན་ཕན་བསྡུ་དངོས་བཞི་ཡི་ཕྲིན་ལས་རྒྱས། །དྲི་མེད་ཐུབ་བསྟན་གསལ་བའི་བཤེས་གཉེན་མཆོག །མཁན་ཆེན་ཚུལ་ཁྲིམས་རྒྱ་མཚོ་ཞབས་བརྟན་གསོལ། །དོན་དམ་ཆོས་ཉིད་སྐྱེ་སོགས་སྤྲོས་བྲལ་ཀྱང་། །ཀུན་རྫོབ་ཆོས་ཅན་རྒྱུ་འབྲས་བསླུ་བ་མེད། །བདེན་གཉིས་ཟུང་འབྲེལ་རྟེན་འབྱུང་ཟབ་མོའི་མཐུས། །རྡོ་རྗེ་འཛིན་དབང་ཞབས་པད་བརྟན་གྱུར་ཅིག །རྡོ་རྗེ་སློབ་དཔོན་ཞབས་པད་བསྐལ་བརྒྱར་བརྟན། །དམ་ལྡན་སློབ་མའི་འདུ་ཚོགས་ཆེས་ཆེར་འཕེལ། །བླ་སློབ་རྟེན་འབྲེལ་བཤད་སྒྲུབ་ཕྱོགས་སུ་འགྲིགས། །ཐུབ་བསྟན་ཡུན་རིང་གནས་པའི་བཀྲ་ཤིས་ཤོག །ཅེས་མཁན་ཆེན་ཆོས་ཀྱི་རྒྱལ་པོའི་ཞབས་བརྟན་སྨོན་ཚིག་འདིའང་། རྗེ་བཙུན་བླ་མ་གང་གིས་བཀའ་དྲིན་གྱིས་འཚོ་བའི་ཞེ་སྤྲུལ་མིང་འཛིན་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་བྱང་ཆུབ་ཆོས་གླིང་དུ། ལོ་གསར་ཆོ་འཕྲུལ་ཟླ་བའི་དུས་ཚེས་བཟང་པོར་བྲིས་ཤིང་གསོལ་བ་བཏབ་པ་དེ་དེ་བཞིན་དུ་ཡོངས་སུ་འགྲུབ་པར་ཤོག་ཅིག་གུ། ཨ་ཡུ་ཏིཥྛནྟུ།
༄༅། །ༀ་སྭསྟི། རྟག་བརྟན་གཞོམ་གཞིག་བྲལ་བ་རྡོ་རྗེའི་སྐུ། །ཚངས་དབྱངས་འགགས་པ་མེད་པ་རྡོ་རྗེའི་གསུང་། །ཟག་བྲལ་བདེ་སྟོང་རྡོ་རྗེའི་ཐུགས་མངའ་བའི། །རྩ་གསུམ་ཚེ་ལྷའི་ཚོགས་ཀྱིས་དགེ་ལེགས་སྩོལ། །ཀུན་བཟང་པད་མའི་རིང་ལུགས་རྫོགས་པ་ཆེའི། །བསྟན་པའི་ཉི་མ་མཚུངས་མེད་རབ་འབྱམས་པ། །བཤད་སྒྲུབ་ཆོས་ཀྱི་གོ་ཆ་ཟླ་བྲལ་མཆོག །གསང་གསུམ་རྡོ་རྗེའི་ཁམས་སུ་བརྟན་གྱུར་ཅིག །མདོ་སྔགས་བསྟན་པ་གཉིས་ལྡན་ངུར་སྨྲིག་སྡེའི། །དད་བསོད་རྒྱལ་མཚན་རྩེ་ན་རྟག་བརྟན་ཞིང་། །འཁོར་ལོ་གསུམ་གྱི་ཕྲིན་ལས་དར་ཞིང་རྒྱས། །སྙན་གྲགས་འཛམ་གླིང་ཡོངས་ལ་ཁྱབ་གྱུར་ཅིག །ཅེས་པའང་ཤཱཀྱའི་དགེ་སློང་རྒན་པོ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་བདེན་ཚིག་སྨོན་ལམ་དུ་གསོལ་བ་སིདྡྷི་རསྟུ། ༈ བཀྲ་ཤིས་ཡོན་ཏན་བྱེ་བས་བརྒྱན་པའི་དཔལ། །དྲན་པས་འཆི་བདག་འཇིགས་པ་ཀུན་འཕྲོག་ཅིང་། །རྡོ་རྗེའི་ཚེ་མཆོག་སྩོལ་མཛད་ལྷག་པའི་ལྷས། །མཆོག་གི་སྤྲུལ་སྐུའི་ཞབས་པད་བརྟན་གྱུར་ཅིག །ཨོ་རྒྱན་རིང་ལུགས་ཐེག་མཆོག་རྫོགས་པ་ཆེའི། །བསྟན་པའི་རྒྱལ་མཚན་འཛིན་མཛད་སྤྲུལ་པའི་སྐུའི། །གསང་གསུམ་ཚེ་མཐའ་ཡས་པའི་ངོ་བོ་རུ། །རྟག་བརྟན་མཛད་ཕྲིན་གླིང་བཞིའི་མཐར་ཁྱབ་ཤོག །གསན་བསམ་སྒོམ་པའི་ཡོན་ཏན་མཐའ་རུ་ཕྱིན། །འཆད་རྩོད་རྩོམ་པའི་ལེགས་མཛད་རྨད་དུ་བྱུང་། །འཁོར་ལོ་གསུམ་གྱི་མཛད་ཕྲིན་མཁའ་མཐར་མཉམ། །དོན་གཉིས་ཕུན་སུམ་ཚོགས་པའི་བཀྲ་ཤིས་ཤོག །ཅེས་པའང་རིག་འཛིན་གྱི་བཙུན་པ་རྡོ་རྗེ་དབང་མཆོག་དགྱེས་པ་རྩལ་གྱིས་ལྷག་བསམ་རྩེ་གཅིག་པས་བྲིས་ཤིང་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག སརྦ་དཱ་མངྒལཾ་བྷནྟུ། ༈ རབ་འབྱམས་ཞིང་གི་རྒྱལ་བ་སྲས་བཅས་ཀྱིས། །བྲལ་ཐོབ་སྨིན་པའི་ཡོན་ཏན་གཅིག་བསྡུས་པ། །སྙིགས་འགྲོའི་སྐྱོབ་པ་མཚུངས་མེད་ཐུགས་རྗེའི་གཏེར། །བློ་གྲོས་མཐའ་ཡས་ཞབས་ལ་གསོལ་བ་འདེབས། །མགོན་ཁྱོད་ཆོས་དབྱིངས་ཞི་ལ་གཞོལ་མིན་པར། །བདག་སོགས་སྙིགས་འགྲོའི་གདུང་བ་སེལ་སླད་དུ། །ངོ་མཚར་སྤྲུལ་པའི་ཟློས་གར་མྱུར་བསྟན་ནས། །བསྟན་འགྲོའི་དོན་ཆེན་བསྒྲུབ་པར་མཛད་དུ་གསོལ། །ཅེས་པའང་སློབ་ཐ་པདྨ་བི་ཛས་སྙིང་ཐག་པ་ནས་སྨོན་པས་གསོལ་བ་བཏབ་པ་དགེའོ།། ༈ འགྱུར་མེད་ཀུན་ཏུ་བཟང་པོའི་ཡེ་ཤེས་ནི། །བསྟན་པ་རྒྱ་མཚོའི་མགོན་དུ་ལེགས་བཞེངས་པ། །སྨྲ་བའི་ཉི་མ་ཕྱོགས་ལས་རྣམ་རྒྱལ་དཔལ། །འདྲེན་མཆོག་བཟང་པོའི་ཞབས་ལ་གསོལ་བ་འདེབས། །མགོན་ཁྱོད་ཆོས་དབྱིངས་ཞི་ལ་གཞོལ་མིན་པར། །སྙིང་རྗེ་ཆེན་པོས་བདག་སོགས་གདུལ་བྱ་ལ། །རྗེས་དགོངས་ངོ་མཚར་སྤྲུལ་པའི་ཟླ་གཞོན་མཆོག །འགོག་མེད་མྱུར་དུ་སྟོན་པར་མཛད་དུ་གསོལ། །དེར་ཡང་བར་ཆད་བདུད་སྡེའི་གཡུལ་ལས་རྒྱལ། །གསན་བསམ་སྒོམ་པའི་ཡོན་ཏན་ཡོངས་སུ་རྫོགས། །རླབས་ཆེན་མཁས་ཚུལ་དགུ་ཡི་ཕྲིན་ལས་ཀྱིས། །བསྟན་འགྲོའི་དོན་ཆེན་སྒྲུབ་པར་མཛད་དུ་གསོལ། །རབ་འབྱམས་རྩ་གསུམ་རྒྱལ་བའི་བདེན་བྱིན་དང་། །ཆོས་ཉིད་ཆོས་ཅན་རྒྱུ་འབྲས་རྟེན་འབྱུང་མཐུས། །ཇི་ལྟར་སྨོན་ཅིང་གསོལ་བ་བཏབ་པའི་དོན། །གེགས་མེད་ཡོངས་སུ་འགྲུབ་པའི་རྒྱུར་གྱུར་ཅིག །ཅེས་པའང་གུས་སློབ་ཐ་ཤལ་པདྨ་བི་ཛས་རྩེ་གཅིག་ཏུ་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག ༈ གཡུ་སྒྲའི་རྣམ་འཕྲུལ་མ་ཧཱ་པཎྜི་ཏ། །འགྱུར་མེད་བདེན་དོན་མངོན་གཟིགས་གྲུབ་པའི་དབང་། །མཐུ་སྟོབས་རྩལ་གྱིས་བདུད་སྡེའི་དཔུང་བཅོམ་པའི། །ཕྱོགས་ལས་རྣམ་རྒྱལ་ཞབས་ལ་གསོལ་བ་འདེབས། །རང་དོན་མཐར་ཕྱིན་སྲིད་ལས་རྣམ་གྲོལ་ཀྱང་། །གཞན་ཕན་སྙིང་རྗེས་ཞི་མཐར་གཞོལ་མིན་པར། །དབང་བཅུའི་གྲིབ་མར་འགྲོ་ཀུན་ངལ་འཚོའི་སླད། །ངོ་མཚར་སྤྲུལ་པའི་ཟློར་གར་མྱུར་སྟོན་མཛོད། །བླ་མ་རྒྱལ་བ་སྲས་བཅས་བྱིན་རླབས་དང་། །རྩ་གསུམ་དམ་ཅན་སྲུང་མའི་བདེན་པའི་སྟོབས། །བདག་ཅག་མོས་དགེ་ལྷག་བསམ་དག་པའི་མཐུས། །གསོལ་བཏབ་སྨོན་པའི་འབྲས་བུ་འགྲུབ་གྱུར་ཅིག །ཅེས་པའང་རྡོ་རྗེ་དབང་མཆོག་དགྱེས་པ་རྩལ་གྱིས་ལྷག་པའི་བསམ་པས་གསོལ་བ་བཏབ་པ་དགེ། ༈ བདེ་ཆེན་རྡོ་རྗེའི་ས་མཁན་འཁོར་ལོའི་མགོན། །དྲན་པས་སྙིང་ལ་བདེ་སྟེར་མཚུངས་པ་མེད། །ཡིད་ལ་ཡེ་ཤེས་མཆོག་སྦྱིན་དྲིན་ཆེན་རྗེ། །བཀྲ་ཤིས་འོད་ཟེར་ཞབས་ལ་གསོལ་བ་འདེབས། །མགོན་ཁྱོད་དོན་དམ་གཤེགས་བཞུགས་མཚན་བྲལ་ཡང་། །ཀུན་རྫོབ་འགྲོ་ལ་སྣང་བ་མཚན་དཔེའི་གར། །རེ་ཞིག་དབྱིངས་སུ་བསྡུས་མོད་བདག་སོགས་ལ། །རྗེས་དགོངས་ངོ་མཚར་སྤྲུལ་པའི་ཟླ་ཞལ་སྟོན། །རྣམ་དག་ལྷག་བསམ་པུཎྜ་རི་ཀའི་ཚལ། །རྗེས་བརྩེའི་བསིལ་ཟེར་འབབ་པའི་སྟེགས་གྱུར་པས། །ངེས་གསང་སྙིང་པོ་སྒྲུབ་བརྒྱུད་བརྒྱད་སྲོལ་གྱི། །མཆོག་བསྟན་འོ་མའི་མཚོ་ཆེན་མཛོད་མཛད་གསོལ། །དེར་ཡང་མི་མཐུན་ཉེར་འཚོའི་གཡུལ་ལས་རྒྱལ། །གསན་བསམ་སྒོམ་པའི་ཡོན་ཏན་དཀྱིལ་འཁོར་རྫོགས། །མཁྱེན་བརྩེ་ནུས་པས་འགྲོ་ཀུན་སྨིན་ཅིང་གྲོལ། །དོན་གཉིས་མཐའ་རུ་ཕྱིན་པར་མཛད་དུ་གསོལ། །རབ་འབྱམས་རྩ་གསུམ་སྲུང་མའི་བདེན་བྱིན་དང་། །བླ་སློབ་དད་དམ་གཙང་མའི་རྟེན་འབྱུང་མཐུས། །གསོལ་བཏབ་སྨོན་པའི་འབྲས་བཟང་ཕྱོགས་འདི་རུ། །གེགས་མེད་མྱུར་དུ་སྨིན་པའི་རྒྱུར་གྱུར་ཅིག །ཅེས་པའང་གུས་སློབ་ཐ་ཤལ་གཞན་ཕན་ཆོས་ཀྱི་བློ་གྲོས་ཀྱིས་སྙིང་ཐག་པ་ནས་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ ཡེ་གྲོལ་ཀློང་ཆེན་ཡངས་པའི་མཁའ་དབྱིངས་སུ། །ཟང་ཐལ་རིག་པའི་ཁྱུང་ཆེན་ལྡིང་བ་ཡིས། །རྩོལ་བཅས་ཐེག་བརྒྱད་གཡང་ས་ཤུགས་ཀྱིས་བཅད། །བྱ་བྲལ་ནམ་མཁའི་རྣལ་འབྱོར་ཞབས་བརྟན་གསོལ། །ངན་རྟོག་རྟོག་གེའི་སད་ཀྱིས་མ་ཁྱེར་ཞིང་། །བླུན་སྒོམ་ཉམས་ཀྱི་སྤུན་པས་མ་གཡོགས་པའི། །ཟབ་དོན་མན་ངག་འབྲས་བུའི་མཛོད་མངའ་བའི། །རྫོགས་ཆེན་ཡོན་ཏན་དཔལ་བཟང་ཞབས་བརྟན་གསོལ། །ཕྱག་རྒྱ་ཆེན་པོའི་མན་ངག་འབྲུ་ཡི་མཆོག །རྫོགས་ཆེན་ཕབས་ཀྱིས་བརླན་པའི་དགེ་མཚན་གྱིས། །གྲུབ་གཉིས་ཆང་གིས་མྱོས་པའི་རྣལ་འབྱོར་པ། །བྱ་བྲལ་ལྷུན་རྫོགས་རྒྱལ་པོ་ཞབས་བརྟན་གསོལ། །ཀ་དག་ལྷུན་གྲུབ་ཟུང་འབྲེལ་གཉུག་མའི་གཤིས། །ཡིད་དཔྱོད་བྲལ་བར་མངོན་གྱུར་ཚད་ཕེབས་པས། །གཞི་བདེའི་སྟེང་དུ་བློ་བདེ་རྒྱུན་ཆད་མེད། །བདེ་མཆོག་བདེ་བའི་རྡོ་རྗེ་ཞབས་བརྟན་གསོལ། །སྲིད་འབྱོར་སྒྱུ་མའི་བསླུ་བྲིད་རིང་དོར་ཀྱང་། །གཞན་ཕན་ཕྲིན་ལས་ཟབ་མོའི་ལྕགས་ཀྱུ་ཡིས། །སྐལ་བཟང་འགྲོ་བ་འདྲེན་མཛད་རྫོགས་ཆེན་པའི། །ཞབས་པད་བརྟན་ཅིང་བཀྲ་ཤིས་རྒྱས་གྱུར་ཅིག །ཅེས་ངེས་པ་དོན་གྱི་རྫོགས་ཆེན་པ་ཡོན་ཏན་དཔལ་བཟང་གི་ཞབས་བརྟན་ཉུང་ངུ་འདིའང་ཞེ་སྤྲུལ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་གནས་དུས་བཟང་པོར་གསོལ་བ་བཏབ་པ་དགེ། ༈ མི་འགྱུར་འཕོ་མེད་བདེན་དོན་མངོན་གཟིགས་པའི། །པདྨའི་ཞལ་ཚབ་ཟླ་བྲལ་དུ་མ་ཡིས། །རྗེས་བཟུང་རིས་མེད་བསྟན་ལ་ལྷག་བསམ་ཅན། །རྣམ་པར་རྒྱལ་བའི་དཔའ་བོར་གསོལ་བ་འདེབས། །མགོན་ཁྱོད་གསང་གསུམ་ཚེ་མཐའ་ཡས་པའི་ངོར། །འབྲལ་མེད་ཚངས་གནས་རྒྱན་དུ་རྟག་བཞུགས་ནས། །སྲིད་ཞིའི་རྒུད་པའི་གདུང་བ་ཀུན་བཅིལ་ཞིང་། །དོན་གཉིས་བསམ་ཀུན་འགྲུབ་པར་མཛད་དུ་གསོལ། །རབ་འབྱམས་རྩ་གསུམ་ཚེ་ལྷའི་བདེན་སྟོབས་དང་། །བླ་མ་ལྷག་པའི་ལྷ་ཡི་བྱིན་མཐུ་ཡིས། །ཇི་ལྟར་སྨོན་ཞིང་གསོལ་བ་བཏབ་པའི་འབྲས། །གེགས་མེད་ཡོངས་སུ་འགྲུབ་པའི་རྒྱུར་གྱུར་ཅིག །ཅེས་པའང་དད་དམ་རྨད་བྱུང་རྡོ་རྗེའི་མཆེད་པོ་དགེ་འདུན་ཆོས་གྲགས་ལགས་ཀྱི་བཞེད་སྐོང་དུ་བི་ཛས་གང་ཤར་འཕྲལ་མར་བྲིས་ཏེ་ཕུལ་བ་དགེ། བཀྲ་ཤིས། མངྒལཾ།