གསོལ་འདེབས་ཞབས་བརྟན་དོན་ཀུན་གྲུབ་པའི་དབྱངས་སྙན།

༄༅། །གསོལ་འདེབས་ཞབས་བརྟན་དོན་ཀུན་གྲུབ་པའི་དབྱངས་སྙན་ཞེས་བྱ་བ་བཞུགས་སོ།། ཨོ་རྒྱན་ཐུགས་སྤྲུལ་མཆོག་གི་དངོས་གྲུབ་བརྙེས། །རྡོ་རྗེ་ཚེ་ལ་དབང་ཐོབ་གྲུབ་པའི་མགོན། །ནམ་མཁའི་སྙིང་པོ་ཡེ་ཤེས་མཐར་ཕྱིན་སྐུ། །ཁྱབ་བདག་དཔལ་ལྡན་བླ་མར་གསོལ་བ་འདེབས། །ཨོ་རྒྱན་སངས་རྒྱས་གཉིས་པའི་སྒྱུ་འཕྲུལ་གར། །མི་འགྱུར་ནམ་མཁའི་རྡོ་རྗེ་འདུས་མ་བྱས། །ཀུན་བཟང་དགོངས་པའི་དོན་རྟོགས་མགོན་པོ་ཡི། །བསྟན་པའི་རྒྱལ མཚན་མི་ནུབ་རྟག་བརྟན་གསོལ། །འཇམ་དབྱངས་མཁྱེན་པའི་ཡེ་ཤེས་རྒྱུད་ལ་ཞུགས། །མཁས་དང་གྲུབ་པའི་འཁོར་འདས་སྤྲོ་ཞིང་བསྡུད། །བསྟན་འགྲོར་སྨན་པའི་ཕྲིན་ལས་སྣང་བའི་དཔལ། །རྒྱ་མཚོའི་གོས་ཅན་གཞི་ལ་ཁྱབ་པར་ཤོག །འགྱུར་མེད་རྟག་པ་རྡོ་རྗེའི་ཁྲི་མཆོག་ལ། །པདྨའི་རྒྱལ་ཚབ་ཞབས་པད་མི་གཡོ་བརྟན། །རྣམ་ཀུན་རྒྱལ་བའི་མཛད་པ་རྒྱས་པ་ཡིས། །བདག་སོགས་འགྲོ་རྣམས་སྨིན་གྲོལ་ལམ་འགོད་ཤོག །རྩ་རྒྱུད་བླ་མ་མཆོག་གསུམ་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མའི་བདེན་སྟོབས་དང་། །ཆོས་ཉིད་ཆོས་ཅན་རྒྱུ་འབྲས་བསླུ་མེད་མཐུས། །ཇི་ལྟར་གསོལ་བ་བཏབ་བཞིན་འགྲུབ་གྱུར་ཅིག །ཅེས་ལུང་རྟོགས་བསྟན་པ་རྒྱ་མཚོའི་མངའ་བདག་ཡོངས་འཛིན་དགེ་བའི་བཤེས་གཉེན་དཔལ་མཚོའི་བླ་མ་ཚུལ་ཁྲིམས་རྒྱ་མཚོ་ལགས་ཀྱིས་རང་ཕྱོགས་སུ་འདུལ་བ་གཞི་གསུམ་ཆོ་ག་གསར་འཛུགས་སྐབས། ཚོགས་མང་ནས་ཞལ་འདོན་མཛད་རྒྱུར་འདི་འདྲ་ཞིག་གསུང་ནན་ཆེ་བའི་གཡར་ཁྲལ་ཙམ་དུ་དམ་པ་གོང་མ་རྣམས་ཀྱིས་རང་ལ་བདེན་སྨོན་ཤིས་བརྗོད་སོགས་གནང་བའམ་བྱིན་རླབས་ཅན་འགའ་ཞིག་ཕྱོགས་གཅིག་ཏུ་བྲིས་ནས་ཕུལ་བའི་དགེ་བས། བླ་སློབ་མི་འབྲལ་ལྷན་ཅིག་ཚོགས། །ཚེ་ལ་དབང་བའི་གྲུབ་པ་བརྙེས། །བཤད་སྒྲུབ་ཕྲིན་ལས་མཁའ་དང་མཉམ། །དོན་གཉིས་མཐར་ཕྱིན་བཀྲ་ཤིས་སྩོལ། །དགེའོ། །དགེའོ། །དགེའོ།